ئەڤرۆ نیوز، ئەیاد بەرواری:
وەزارەتا بەرەڤانیا روسی ئەڤرۆ چارشەمبی راگەھاند، دبیت پێشنیارێن وەزارەتا بەرەڤانیا ئەمریکی ل دۆر ھەڤکاریێ د شەڕێ داعشێ دا ل سووریێ قەبوول بکەت و ئاماژە دا شارەزایێن لەشکری ئەڤرۆ دێ ڤەخواندنێ ل سەر ھووردەکاریێن ڤێ پرسێ کەن.
ئیگور کوناشینکوف نوونەرێ وەزارەتا بەرەڤانیا روسی، ل دووڤ سایتێ کەنالێ (روسیا الیوم) گوت” وەزارەتا بەرەڤانیا روسی بەرسڤا پێشنیارێن بەنتاگۆنێ دایە ل دۆر ھەڤکاریێ د شەڕێ داعشێ دا ل سەر ئاخا سووریێ و ب شێوەکێ گشتی دشیاندایە ئەو پێشنیارە بھێنە قەبوولکرن بۆ و بجھئینان”.

ئەڤرۆ نیوز، ئەیاد بەرواری
رۆژنامەکا ئەمریکی دبێژیت، پشتی روسیا ھێزێن خوە یێن ئەسمانی ھنارتینە سووریێ، یا ھاتیە دووپاتکرن کو ھێزێن خوە یێن لەشکری ژی یێن ھنارتین و پرسیار دکەت ئایا سوریێ دێ بیتە مەیدانا شەڕێ وەلاتێن مەزن؟.
رۆژناما (نیویورک تایمز) یا ئەمریکی د راپۆرتەکا خوەدا دبێژیت” دەنگێ چەکێ ل سووریێ یێ گەھشتیە ئاستەکێ نەچاڤەرێکری پشتی روسیا ھێزێن خوەبەخش ھنارتین بۆ پشکداریێ د شەڕی دا، د ھەمان دەمدا قۆلپا ناتۆی ھوشداری دا روسیا کو بەزاندنا سنۆرێن تورکیا دووبارە نەکەت، ناکۆکیێن ئەمریکا و روسیا ل دۆر سووریێ د نوو نینن ب تایبەتی د پرسا ھەلویستێ وان دا ل دۆر سەرۆکێ سوری بەشار ئەلئەسەدی”.
رۆژناما ناڤبری دبێژیت، ھەبوونا ھێزێن ئەردی یێن روسی ل سەر ئاخا سووریێ دبیت ھەڤسەنگیا ناکۆکیێ ب شێوەکێ بنەرەتی بگوھۆریت، پشتی چار سالێن شەڕی کو تێدا ٢٥٠ ھزار سوری ھاتینە کوشتن و نیڤا خەلکێ وی وەلاتی ئاوارەبووین.
خویاژی دکەت، سەرەرای داخۆیانیێن سەرۆکێ روسی فلادیمێر پوتن کو وەلاتێ وی چو ھێزێن ئەردی بۆ سوویێ نەھنارتینە، لێ ب راستی ژی روسیا ھێزێن خوە یێن ھنارتین، بەرپرسێن ئەمریکی ژی پێشبینیا وێ چەندێ دکەن کو روسیا ٦٠٠ سەربازێن خوە ھنارتبنە سووریێ زێدەباری ھەبوونا بنگەھەکێ لەشکریێ روسی ل نێزیک باژێرێ لازقیە کو یێ ھاتیە بەرھەڤکرن بۆ پێشوازیا دو ھزار سەربازان

ئەڤرۆ نیوز:
رۆژنەماڤانەکی ناڤدار یێ بریتانی د داخۆیانیکی دا راگەھاند کو د رەوشا نھا دا رۆژھەلاتا ناڤین بوویە مەیدانا شەرێن دژوار و ئاگرێ کو د سالا ٢٠١٠ دا ل تونسێ، یەمەنێ، لیبیایێ دەستپێکری و ھەموو سووریێ و پشکەکا مەزنا عیراقێ ڤەگرتیە و نھا بۆ ڤەمراندنا ئاگری ئاڤ د دەستێ کوردێن رۆژئاڤا و باشور دایە و دڤێت ھەڤپەیمانیا نێڤدەولەتی بۆ ژ نوو ڤە ئاڤاکرنا عیراقێ و سووریێ کوردان وەک بنگەە قەبوول بکەت.
پاتریک کۆکبورن رۆژنامەڤانێ ناڤدار یێ بریتانی د سمینارەکی دا ل باژێرێ لەندەنێ راگەھاند کو رۆژھەلاتا ناڤین بوویە ئاگر و ئاڤ د دەستێ کوردان و وەلاتێن دیمۆکراتیک دایە و گۆت: (سیستەمێن دەولەتێن رۆژھەلاتا ناڤین دوورن ژ دیمۆکراسیێ و سیستەمێن دکتاتۆرینە و ل ھەمبەر وان دەستھەلاتان سەرھلدانا خەلکی تشتەکی سروشتیە و د رۆژا مە یا ئەڤرۆ دا ئاگرەکی دژوار سووریێ، عیراقێ، لیبیایێ و مسرێ دسۆژیت و ل سووریێ و عیراقێ بۆ ڤەمراندنا ئاگری ئاڤ د دەستێ کوردان دایە و ھەکە جیھانا پێشکەڤتی ئانکۆ ھەڤپەیمانیا نێڤدەولەتی دخوازیت ئاگری ڤەمرینیت و ژ نوو ڤە دەست ب ئاڤەدانکرنێ و بجە کرنا سیستەمەکێ نوو یێ دیمۆکراتیک بکەت دڤێت دەستێ کوردان بگریت و ل گەل کوردان ھەڤپەیمانیەکا نوو و بەرفرەە دروست بکەت).
پاتریک کۆکبورن د پشکەکا دی یا ئاخڤتنا خوە دا کو ھژمارەک زێدە سیاسەتمەدار و مامۆستایێن زانکۆیێن لەندەنێ بەرھەڤ بوون، راگەھاند کو مەترسیا ھەری مەزنا ل سەر جیھانێ رێکخستنێن وەک داعشێ، ئەل نوسرە، بۆکۆ حەرام و قاعیدە و وەلاتێن وەک عەرەبستانا سعوودیێ، ئیران و پاکستانە و گۆت: (ژ بەر کو ئالۆزیێن گەلەک دژوار د ناڤبەرا ئیرانێ و سعوودیێ دا ھەنە و ھەتا ئاستەکی بلند تورکیا و قەتەر ژی د ناڤ ڤێ ئالۆزیێ دانە، ھەموو رێکخستنێن تیرۆرست و یێن رادیکالێن ئیسلامی بنگەھێ خوە ئاڤاکرنێ و ب ھێزکرنێ پەیدا دکەن و ھندەک دەزگەھێن وان دەولەتان ژی بەردەوام ل گەل رێکخستنێن تیرۆرست د ناڤ پەیوەندیان دانە، ژ بەر ڤێ چەندێ ژی ئەم ئەڤرۆ دبینین کو رێکخستنێن تیرۆرست د وارێن سەربازی، ئابووری و پەیداکرنا بنگەھێن رێکخستنێ دا ژ گەلەک دەولەتان ب ھێزتر بووینە و بۆ نەھێلانا تیرۆرێ دڤێت بەری ھەر تشتەکی وان وەلاتێن کو مە بەحسێ وان کری، بھێنە رازیکرن).
رۆژنامەڤانێ ناڤدار یێ بریتانی ھەروەسا د بەردەوامیا ئاخڤتنا خوە دا بەحسێ عیراقێ و سووریێ ژی کر و راگەھاند کو بێ واتەیە ئەڤرۆ ھەڤپەیمانا نێڤدەولەتی ئانکۆ ئەمریکا و ئورۆپا رژدیێ ل سەر دەولەتا ناڤەندی ل عیراقێ و سووریێ بکەن و گۆت: (جڤاکێن ھەردو وەلاتێن عیراقێ و سووریێ د وارێن سیاسی، جۆگرافی، نەتەوی و ئابووری دا ژ ھەڤدو جودا بووینە و نابیت ب زۆرێ ئێکەتیا ئاخا عیراقێ و ئێکەتیا ئاخا سووریێ ل سەر کوردان بھێتە فەرزکرن و ئەڤرۆ ب راوەستیانا خوە و ب سیاسەت و رەوشا خوە یا تایبەت مافێ کوردایە ژ سووریێ و عیراقێ جودا ببن و یان دو دەولەتێن کوردی، یان ژی دەولەتەکا یەکگرتی ئاڤا بکەن، ژ بەر کو ئەڤرۆ ب کریاری ژی ھەم ھێزێن سەربازی یێن کوردان و ھەم ژی رێڤەبەر و گەلێ کورد د شەرێ داعشێ دا نامووسا جیھانێ پاراستن و خوەدان ل ئاخ و گەل و وەلاتێن خوە دەرکەڤتن و کێمنەتەوێن جودا و باوەریێن جودا ژی پاراستن و خوەدان ل وان دەرکەڤتن، ئەڤە ژی بۆ جیھانێ ددەتە نیشادان کو دڤێت کورد پاشەرۆژا خوە ب دەستێ خوە دیار بکەن و ئورۆپا، ئەمریکا و وەلاتێن دی یێن جیھانێ پشتەڤانیێ ل دەولەتبوونا کوردان بکەن. ل دووڤ ھزرا من چارەنڤیسێ ھەری باش یێ سووریێ و عیراقێ ژی ئەوەیە).

ئەڤرۆ نيوز:

چاڤدێرێن سیاسی بۆچوونێن جودا جودا یێن ھەین ل سەر پرسا شەرێ داعشێ ل سووریێ و د وێ باوەرێ دانە کو داعش نەشێت روسیا و ئەمریکا نێزیکی ئێک بکەت، ئاماژێ ددەنە وێ چەندێ کو مایتێکرنا روسیا د سووریێ دا و کارودان و روودانێن نو دێ د بەرژەوەندا کوردان دابیت.
د.ھەوار نێروەیی مامۆستایێ زانستێن سیاسی ل زانکۆیا دھۆکێ ، ھەمبەر کاودانێن نوکە ل سووریێ دەرباز دبن بۆ رۆژناما ئەڤرۆ گۆت” چو نێزیک بوونەک د ناڤبەرا روسیا و ئەمریکا دروست نەبوویە، بەلکو پەیوەندیێن وان ھەردو وەلاتان یێن ئالۆزتر لێ ھاتین. ھەرچەندە روسیا بریار دا ب رێکا ھێرشێن ئەسمانی ل سووریێ ل داعشێ بدەت ، لێ ئەو مەترسیە ل دەڤ ئەمریکا یا ھەی کو روسیا ب ھێجەتا داعشێ، بارەگاێێن ئۆپۆزسیۆنا سووری کو دژی حوکمەتا بەشار ئەسەدی شەڕی دکەت، بکەتە ئارمانج د وان ھێرشێن ئەسمانی دا”.
ھەوار نێروەیی ھێشتا ژی گۆت” دبێت لێدانا بارەگایێن داعشێ ژلایێ روسیایێ ڤە وەک سیناریۆیەکێ بیت دا پتر پشتگیریا حوکمەتا بەشار ئەسەدی بکەت. ل گور ھەڤکێشا بەلانسا ھێزێ، دبیت ئەمریکا ل کێشا ئوکرانیا پاشڤە بچیت و ل ھەمبەر فێ چەندێ ژی روسیا دەست ژ ھاریکاریا حوکمەتا ئەسەدی بەردەت. ھەرچەندە روسیا داکۆکیێ بەردەوامیا حوکمەتا بەشار ئەسەدی ل پاشەرۆژێ دا دکەت، لێ پتریا دەولەتێن زلھێزێن جیھانێ وھەتا یێن ھەرێمی ژی ل سەر چونا ئەسەدی د ھەڤ دەنگن دەنگن، ھەکە ئیران، روسیا، چین وگەلەک دەولەتێن جیران ل گەل وێ چەندێ بن کو ئەسەد د حوکمرانیا سووریێ دا نەمینیت، بەلێ وان دەولەتان مەترسیژ وێ چەندێ ھەیە کا چ جورە حوکمەتەک دێ جھێ حوکومەتا ئەسەدی گریت.
ھەڤدەم موحسن عبدالرحمن نڤیسەر، ھەمبەر ڤی بابەتی گۆت” سووریێ بوویە مەیدانا شەرەکێ نێڤدەولەتی و ھەر دەولەت و لایەنەک بزاڤێ دکەت بەرژەوەندیێن خوە یێن ئابووری و پێگەیێ خوەیێ لەشکری و شوین پێ وەک جھەکێ جیوسیاسی بپارێزیت، ئەڤە ئەوە یا ھەموو ھێز ل سەر ئەردێ سووریێ دکەن، ئانکو بەرەڤانیێ ژ بەرژەوەندیێن خوە یێن ھەیی دکەن، یان بۆ خوە ل جھەکی دگەرھن بۆ پاشەرۆژێ. “محسنی گۆت ژی” ئەمریکا مالا مەزن یا مرۆڤینیێ ب رێڤەدبەت، لێ روسیا د بزاڤا پاراستنا ئەوا مای دایە، ژ ئەنجامێ شەرێ دومدرێژێ ئەرەبی- ئیسرائیلی کو ئەمریکا پارێزەر و بەرەڤانکەر ژ ئیسرائیلێ بوو، لەورا ئەرەب نەچاربوون بەر ب بلوکێ سوۆشیالیست (سوڤێتا کەڤن) بچن کو خوە ب پشتەڤانا بزاڤێن رزگاریخواز ددانیاسین، پتریا دەولەتێن ئەرەبی وەکو میسر، ئیراق، سووریا و یەمەنا باشوور… رێککەفتنێن ستراتیژی و دومدرێژ ل گەل ئێکەتیا سوڤێتی واژووکرن، ھوسا بو ھاوردەکەرا سەرەکی یا چەکی بو دەولەتێن ئەرەبی، ئەڤە ژبلی وەبەرھێنانێ د کەرتێ پەترولێ دا و بوارێن دی دا، لێ یا نھا روودەت و بەرھەڤبوونا روسیا بھێز د شەرێ سوریێ دا، ژبلی پاراستنا بەرژەوندیێن ئابووری کو نەڤێت بازارێ رۆژھەلاتا ناڤەراست یا جاران ھوسا ب ساناھی بو ئەمریکا و ئەورۆپا چۆلبکەت، ھەروەسا ب ژناڤچوونا رژێما بەشاری قەرێن روسیا یێن ھێش ژ سەردەمێ حافز ئەسەدی کی دێ ئەداکەت و ھەیبەتا دەولەتا روسی وەکو میراتگرا روسیا قەیسەری دێ ھێتە ژ دەستدان، و بەھانەیا ھەرە سەرەکی و ئارێشەیا ھەنۆکەیی یە، بابەتێ تیرۆرێ کو ب ھزاران روسێن موسلمان ل ناڤ رێزێن داعشێ دا شەری دکەن و پشتراست ئەو دێ وی شەری کێشن ناڤ روسیا ل داھاتییەکێ نێزیک، کو ئەمریکا و روسیا ڤان راستییان باش دزانن و دروست دھەلسەنگینن، لەورا دڤێت روسیا رۆلەکێ سەرەکی د کێشەیێ دا ھەبیت، ئەڤە و گەلەک خالێن دی روسیا و ئەمریکا دگەھینەتە ھەڤ، کو خالێن ھەڤبەش پترن ژ خالێن ھەڤدژ”.
ب دیتنا ناڤبری” یا گرنگ ئەوە ھەموو کاودان و روودان و مایتێکرنێن دھێنەکرن د بەرژەوەندا مە کوردان دانە، ھەکە سیاسەتڤانێن کورد دوبەرکی و بدەن لایەکی و ب زانابوون یاریێ بکەن، کو مخابن ئەڤە جھێ گۆمانێ یە”.