ئەڤرۆ نيوز:
رێڤەبەریا گشتی یا پەروەردێ ل سلێمانیێ چەندین رۆژێن حەفتیێ بۆ مامۆستایان کرینە بھێنڤەدان و ئەو دشێن د حەفتیێ دا بۆ دەمێ دو یان سێ رۆژان بۆ مامۆستایێن سلێمانیێ بکەنە بھێنڤەدان، رێڤەبەرێ گشتی یێ پەروەردێ ل پارێزگەھا دھۆکێ ل دۆر ڤێ بڕیارێ بۆ رۆژناما ئەڤرۆ ئاشکرا کر کو چ بڕیارێن ب ڤی رەنگی ل پارێزگەھا دھۆکێ نەھاتینە دان.
نازدار محەمەد، رێڤەبەرا پەروەردا رۆژھەلات ل سلێمانیێ دیار کر کو نە یا گرنگە دو یان سێ رۆژ د حەفتیێ دا بۆ مامۆستایێن سلێمانیێ ببنە بھێنڤەدان، یا گرنگ ئەوە پرۆسا خواندنێ یا بەردەوام بیت و قەرەبوویا وان رۆژێن دەوام ھاتیە راوەستاندن بھێتەکرن و بۆ snn گۆت:” مە رێڤەبەر یێن ئازادکرین کو ل دووڤ وانێن مامۆستایان رۆژێن بھێنڤەدانێ بۆ وان بھێنە دیارکرن و مە داخوازکریە بھێنڤەدان بۆ وان مامۆستایێن دچنە ژ دەرڤەی باژێری زێدەتر بن داکو بارێ دارایی ل سەر وان گران نەبیت”.
ناڤھاتیێ ئاماژە دا وێ چەندێ کو ئەو مامۆستایێن کێم وانە ھەین دشێن ل دووڤ ھژمارا وانێن خوە بچنە دەوامێ و بەری دەوام ب دووماھی بھێت دشێن بچنە مالێن خوە.
دلێر قادر عەباس، رێڤەبەرێ پەروەردا شار باژێر گۆت:” ئەڤ بڕیارە ژبەر ئاریشا گیروبوونا موچەی د حەفتیا بھێت دا دێ ھێتە جێبەجێکرن و ھەتا ئەڤ ئاریشە ب دووماھی دھێت ئەڤ بڕیارە دێ یا بەردەوام بیت”.
عەبد یوسف، رێڤەبەرێ گشتی یێ پەروەردێ ل پارێزگەھا دھۆکێ بۆ رۆژناما ئەڤرۆ گۆت:” ل پارێزگەھا دھۆکێ چ بڕیارێن ب ڤی رەنگی نەھاتینەدان و چ رێنما ژی نەھاتینە کو د حەفتیێ دا سێ رۆژ بۆ مامۆستایان ببنە بھێنڤەدان”.
نووترين نووچه
- سەرۆك بارزانی و جێگرێ وەزیرێ دەرڤەیێ توركیایێ پرۆسەیا چارەسەریێ و ئاشتیێ گەنگەشە كر
- سەرۆك بارزانی پێشوازی ل هەژمارەكا نڤیسەر و ئەدیب و رەوشەنبیرێن عەرەب كر
- سەرۆك بارزانی پێشوازی ل سەرۆكێ هەڤپەیمانییا عەزم كر
- نێچیرڤان بارزانی پشتەڤانییا هەرێمێ بۆ پرۆسەیا ئاشتیێ دوپاتكر
- پێدڤییە هەموو كێشەیێن ل پێشبەری هنارتنا پەترۆلا هەرێمێ نەمینن
- د قووناغا بەلاڤكرنا پۆستانداینە
- نێچیرڤان بارزانی و سۆدانی دوپاتی ل سەر بەردەوامییا هەماهەنگی و هاریكارییا هەولێرێ و بەغدایێ كر
- سەرۆك بارزانی ل سالڤەگەڕا 37 یا تاوانێن ئەنفالێ: باشترین وەفاداری بۆ شەهیدێن ئەنفالێ ئێكدەنگییە دخزمەتكرن و پاراستنا وەلاتێ مە دا
- سەرۆك بارزانی پیرۆزباهیێ ل نووری مالكی و هومام حەموودی دكەت
- سەرۆك بارزانی پێشوازی ل شاندەكێ هەڤپشك یێ پەرلەمانێ بریتانیا و پەرلەمانێ ئێكەتییا ئۆرۆپا كر
سه‌ره‌كى نووترين نووچه
ئه‌مريكا: مه‌سعود بارزانى سه‌رۆكێ هه‌رێما كوردستانێ يه
ئه‌ڤرۆ نيوز:
ئاخفتنكه‌رێ وه‌زاره‌تا ده‌رڤه يا ئه‌مريكا راگه‌هاند: بارزانى هێشتا رۆلێ سه‌رۆكێ هه‌رێمێ بجهـ دئينيت و ژ ولا لايى ڤه ئه‌وى ب سه‌رۆك ددانين.
جۆن كيرى ئاخفتنكه‌رێ ب ناڤێ وه‌زاره‌تا ده‌رڤه يا ئه‌مريكا بۆچوونا وه‌لاتێ خوه ل سه‌ر شه‌رعيبوونا ده‌سته‌لاتا مه‌سعود بارزانى سه‌رۆكێ هه‌رێما كوردستانێ راگه‌هاند و گۆت: “د ده‌مه‌كى دا لايه‌نێن كوردستانێ ل سه‌ر پرسا سه‌رۆكاتيا هه‌رێمێ دانوستاندنێ دكه‌ن، ئه‌و هێشتا رۆلێ سه‌رۆكێ هه‌رێمێ بجهـ دئنيت و ژ وى پێگه‌هى ڤه ئه‌م ژى وى ب سه‌رۆك دزانين”.
سه‌باره‌ت ب ده‌ستێوه‌ردانا ئه‌مريكا د پرسا سه‌رۆكاتيا هه‌رێمێ دا، ئاماژه ب وێ چه‌ندێ كر: “ب پشت راستى ڤه گازيكربووين دا هنده‌ك دانوستاندنان بكه‌ين ل ده‌سپێكێ د سۆپاسدار بووين بۆ وێ گازيكرنێ و ئه‌م چووين، به‌لێ ل دووماهيێ ئه‌ڤه بڕيارا سياسه‌تمه‌دارێن ناڤخۆيه دڤێت بده‌ن و ئه‌م ژى دێ رێزێ لێ گرين و ده‌ستتێوه‌رناده‌ين”.
ھندەک دەولەمەندان دڤیا جھێ قوتابخانە و نەخۆشخانەکێ بکەنە مول
ئەڤرۆ نیوز:
سەرۆکێ باژێرڤانیا زاخۆ بۆ رۆژناما ئەڤرۆ ئاشکرا کر کو نوکە کار د چێکرنا پارکا کوردستان دا ل قەزا زاخۆ دھێتە کرن و سەرەرایی ڤێ چەندێ جھێ قوتابخانا بھار د ناڤ بازاڕێ زاخۆ دا ل گەل جھێ نەخوەشخانا بھار ب پشتەڤانیا بەرپرسێ لقێ زاخۆ یێ پارتی ئەو شیان ژ بن کۆنترۆلا ھندەک کەسایەتیان دەربێخن و وان جھان بۆ جھێن گەشتیاری دابینبکەن.
ئەندازیارێ مافپەروەر بژار مۆنیب، سەرۆکێ باژێرڤانیا زاخۆ دیار کر کو پشتی قوتابخانا بھار د ناڤ بازارێ زاخۆ دا ھاتیە خرابکرن، نوکە نەخۆشخانا خابوور ل زاخۆ کەلوپەلێن خوە ڤەدگوھێزیت و ل بەرە ئاڤاھیێ وێ ژی بھێتە ھەرفاندن، بەلێ ژبەر کو ئەڤ ھەر دو جھە گەلەک ب بھانە د ماستەر پلانا زاخۆ دا بۆ جھێن گەشتیاری گەلەک کەسایەتی و دەولەمەندان پێکولکرن وان جھان بکەنە گۆرەپان و مۆل و گۆت:” ب پشتەڤانیا سەربەست لەزگین، بەرپرسێ لقێ پارتی ل زاخۆ ئەم شیاین وان گڤاشتنان ل سەر ئەردێ ناڤبری راکەین و وی ئەردی بۆ بەرژەوەندیێن گشتی بکاربینین”.
ناڤھاتی ئاماژە دا وێ چەندێ کو ل جھێ وان ھەر دو پارچێن ئەردی پارکا شەھیدان دێ ب کۆژمێ نێزیکی ملیارەک و ٢٥٠ ملیون دیناران ھێتە دانان و کۆژمەکێ دی ژی دێ بۆ خرابکرنا ھەر دو جھان ھێتە دابینکرن و گۆت:” دوریانا ئەکادیمیا لەشکەری ل زاخۆ نوکە یا د قووناغێن بجھئینانێ دا و ب ناڤێ پێشمەرگەی یا ھاتیە ب ناڤکرن و سەرەرایی ڤێ چەندێ نوکە دوریانا شقان ژی ل زاخۆ د قووناغێن دووماھیێ دایە و ب ناڤێ دوریانا کوردستان ل دەمەکێ نێزیک دێ ھێتە ڤەکرن”.
ملیارەک و 65 ملیون دینار دێ ل سەر یانێن کوردستانێ ھێنە بەلاڤکرن
ئەڤرۆ نیوز:
رێڤەبەرێ گشتی یێ وەرزشێ ل حکومەتا ھەرێما کوردستانێ تایبەت بو روژناما ئەڤرۆ دیارکر کو پێشینەیێن سێ ھەیڤان یێن یانێن ھەرێما کوردستانێ دێ ھێنە بەلاڤەکرن و ھەر یانەک دێ ل دەڤەرا خوە وەرگریت.
زێدەتر ل دور ڤی بابەتی دکتور شاکر ئەحمەد سمو رێڤەبەرێ گشتی یێ وەرزشێ ل حکومەتا ھەرێما کوردستانێ گوت: رەزامەندی ھاتە وەرگرتن ژ حکومەتا ھەرێما کوردستانێ ب خەرجکرنا پێشینەیێن ھەرسێ ھەیڤێن ئێک و دو و سێ بو گشت یانێن وەرزشی یێن ھەرێما کوردستانێ کو دبیتە کوژمێ ملیارەک و 65 ملیون دینار و وەکو بەری نوکە نیڤا پێشینێ بو ھەر یانەکێ دێ ھێتە دان.
زێدەتر ناڤبری ئەو چەندە ژی خویاکر کو ھەر یانەک دێ ل پارێزگەھا خوە پێشینەیا خوە وەگرن یانێن سەنتەر و سنورێ پارێزگەھا دھوکێ ل دھوکی و یێن حەلەبچە و سلێمانیێ ل سلێمانیێ و گەرمیان و کەرکوک ل کەرکوکێ و یێن ھەولێری ل ھەولێرێ و شیان د بەردەوامن بو دابینکرن پێشینەیێن ھەیڤیێن دی ژی لێ وەکو دیار ھەرێما کوردستانێ د قەیرانا دارای دایە و ل دووڤ شیانا پشتەڤانی یا دھێتە کرن.
دەرگەھێن ئازادکرنا مووسلێ یێ ڤەدبن
ئه‌ڤرۆ نيوز:
شارەزایەکێ لەشکری د ھەڤدیتنەکا رۆژناما ئەڤرۆ دا بەحسێ شەرێ ئازادکرنا مووسلێ دکەت و دیار دکەت کو پێنگاڤێن ئازادکرنا مووسل یێن ھاتینە ھاڤێتن.
مەسعود سالح بۆ رۆژناما ئەڤرۆ گۆت” شەرێ نوکە یێ ھێزێن عیراقی دکەن ل رومادی و بێجی ب مەرەما وێ چەندی یە کو ھێزێن داعشێ بھێنە دۆرپێچکرن، ژلایێ باشوورێ مووسلێ ڤە ھەتاکو نەچار ببن مووسلێ ب جە بھێلن”.
گوت ژی” ھێزێن عیراقی یێن چووینە رومادی و ھێزێن حەشد شەعبی بەر ب بێجێ یێن چووین دا کو باژێرێ ( حەزەر) کونترۆل بکەن، پلانا رزگارکرنا مووسلێ ژی یا ھاتیە دارشتن و یا ب دووماھی ھاتی و دەمژمێر (سفر) یا ھاتیە دیارکرن و دبینم دێ شەڕێ ئازادکرنا مووسلێ ل چەند میحوەران بیت، باکوور و رۆژھەلات و رۆژئاڤا، دێ پێشمەرکە شەڕەکێ گران کەت بۆ نەھێلانا داعشێ ل مووسل و ئەڤە ژلایێ ئێمناھیێ ڤە بۆ ھەرێما کوردستانێ دێ باش بیت و ئێدی کوردستان ھەست ب مەترسیا چەکدارێن تیرۆرستێن داعشێ ناکەت.”
شارەزایێ لەشکەری مەسعود سالح ئەو چەندە ژی گۆت” ژلایێ باکووری ڤە ئانکو میحوەرێ پێشمەرگێ کوردستانێ دێ زیانێن گران ب داعشێ کەڤن، لەشکرێ عیراقێ دێ ھێرش کەتە سەر باژێرێن بەعاج و تلعفەر ژلایێ باکورێ رۆژئاڤا رومادی ڤە و ل ھەموو میحوەرێن شەڕی دێ لاوازی کەڤیتە دناڤ رێزێن چەکدارێن تیرۆرستێن داعشێ دا، چونکی ڤێ ھێزا تیرۆرست باوەری یا ژ دەستدای د ناڤبەرا خوە و خەلکێ دەڤەرێ دا و ئێدی نابینم کەسەک خوە ل وان بکەتە خودان، دیسان نەمانا باوەریا ھەرە مەزن د ناڤبەرا داعشێ و خەلکێ مووسل دا یا پەیدابووی و ئەڤە د بەروەژندا ھێزێن پێشمەرگەی و لەشکرێ عیراقێ دایە، ھەکە ل گەل دەستپێکرنا ئازاکرنا مووسلێ، خەلکێ وێ ژی سەرھلدانێ بکەت، دێ زووتر کونترۆل ل سەر وی باژێری ھێتەکرن.”
خویاکر ژی” پێشمەرگێ کوردستانێ بۆ ئازاکرنا مووسلێ پلانەکا ب ھێز ژلایێ پلاندانانا لەشکری و ب ھەڤکاری ل گەل ھێزێن ھەڤپەیمانان دێ ئۆپەراسیۆنا ئازادکرنا شنگالێ ژی دێ سەرپەرشتیا راستەوخوە یا سەرۆک مەسعود بارزانی بیت، شارەزایێن لەشکەری ژی ڤی میحوەری ب گرنگ دزانن چونکی دەرگەھێ عیراقێ یە ل گەل سووریێ و پێشمەرگە ب کێمترین زیان و زووترین دەم دێ شنگالێ ژ دەستێن تیرۆرستێن داعشێ رزگار کەت”.
ل دووڤ بۆچوونا مەسعودی سالحی” داعش ژ ھەموو لایان ڤە و تایبەت ژ روویێ لەشکری ڤە دێ گەلەک لاواز بیت و دێ زوو بەر ب نەمانێ چیت و ئێدی وێ ئەو ھێز نابیت ل سەر ئەردی ھێرشێ بکەتە سەر وەلاتیێن سڤیل و بێ گونەە”.
قوتابیێن زانکۆ و پەیمانگەھان چاڤەرێی بەرسڤێ نە
ئەڤرۆ نیوز:
سەرۆکێ لژنا پەروەردە و خواندنا بلند ل پەرلەمانێ کوردستانێ بۆ ئەڤرۆ ئاشکرا کر کو ئەو یێ بزاڤان دکەن دو وانە بۆ قوتابیێن زانکۆ و پەیمانگەھێن ھەرێما کوردستانێ ببنە دەربازبوون (عبور) و دوشەمبیا بھێت بڕیار دێ ل سەر ھێتە دان.
د. ئیبراھیم سمۆ، سەرۆکێ لژنا پەروەردە و خواندنا بلند ل پەرلەمانێ کوردستانێ دیار کر، دەربارەی بابەتێ دەربازبوونێ (عبورێ) بۆ دو وانان، وی پەیوەندی ب وەزیرێ خواندنا بلند و ڤەکۆلینێن زانستی یێ حوکمەتا ھەرێما کوردستانێ کریە و گۆت: “وەزیر رازیبوویە رۆژا دوشەمبیا بھێت ڤێ داخوازیا لژنا مە بێخیتە د بەرنامێ کۆمبوونا جڤاتا وەزارەتێ دا، کو سەرۆک زانکۆ ئەندامن تێدا و دانوستاندنێ ل سەر بکەن و ب رێیا دەنگدانێ دێ ھێتە ئێکلاکرن”.
دکتۆری خویا ژی کر، لژنا وان دێ پشکداری وێ کۆمبوونێ بیت و گۆت: “ژ بەر رەوشا نوکە یا ھەرێمێ وەکو شەرێ داعش و قەیرانا دارایی، داخوازێ ژ سەرۆکێن زانکۆ و پەیمانگەھێن کوردستانێ دکەین، کو پشتەڤانیا ڤێ داخوازیا مە بکەن و بڕیارێ بدەن، وەکو عیراقێ دەربازبوون (عبور) ل شوونا وانەکێ ببیتە دو وانە”.
ئاماژە ب وێ چەندێ ژی کر، ئەو ھیڤی خوازن ھەموو سەرۆکێن زانکۆ و پەیمانگەھان رازی ببن دو وانە ببنە عبور و ھاریکاریا قوتابیان بکەن.
بەرپرسەکا تەڤدەمێ: ئەم ب ھەموو رەنگەکێ ل دژی ھاتنا پێشمەرگێن رۆژئاڤایین
ئەڤرۆ نیوز:
ئیلھام ئەحمەد ئەنداما سەرکردایەتیا تەڤدەمێ د داخۆیانیەکێ دا راگەھاند کو چو راستی بۆ ھاتنا وی ھێزا پێشمەرگەی نینە کو ل ھەرێما کوردستانێ راھێنان کرینە و داخۆیانیێن کو بەری نھا سەبارەت ب ھاتنا وان یا بۆ رۆژئاڤایێ کوردستانێ ژی بەلاڤ ببوون ژ راستیێ دوورن و گۆت: (مە نەڤێت کو ناکۆکی و شەرێ ناڤخوەیی ل رۆژئاڤایێ کوردستانێ روو بدەت، ژ بەر ھندێ ژی مە نەڤێت ئەو ھێزا پێشمەرگەی ڤەگەرنە رۆژئاڤا، چونکو ناکۆکیێن مەزن د ناڤبەرا مە و ئەنجوومەنێ نیشتمانی یێ کوردێن سووریێ دا ھەیە و سەرەرای چەندین کۆمبوونێن کو بەری نھا ھاتنە کرن ژی ناکۆکی وەک خوە ماینە و ژ بەر ھندێ ھەکە نھا ئەو ھێزا پێشمەرگەی دەربازی رۆژئاڤایێ کوردستانێ ببیت رەنگە ببیتە ئەگەرێ روودانا شەرەکی ناڤخوەیی و ئەو یەک دێ مەترسیا خوە بۆ رۆژئاڤایێ کوردستانێ ھەبیت و ئەم ل دژی ھاتنا وێ ھێزێ نە).
ئیلھام ئەحمەد د پشکەکا دی یا ئاخڤتنا خوە دا ئەو یەک ژی دیار کر کو ھەتا نھا ئەمریکا چو گەف ل مە نەکرینە کو ئەم رێ بۆ ھاتنا وێ ھێزا پێشمەرگەی خوەش بکەین، چونکو ئەمریکا نھا پشتەڤانیا یەکینەیێن پاراستنا گەل دکەت و پەیوەندی ژی د باشن و ئەم دبێژن رەوشا نھا یا رۆژئاڤایێ کوردستانێ گەلەک ئالۆزە و مە بەری نھا ژی دیار کربوو کو ئەم رێ نادەین ژ بلی یەکینەیێن پاراستنا گەل چو ھێزێن دی یێن سەربازی ل رۆژئاڤایێ کوردستانێ ھەبن.
سەبارەت ب داخۆیانیێن ئەنداما سەرکردایەتیا تەڤدەمێ فەیسەل ئیسماعیل ئەندامێ سەرکردایەتیا پارتی دیموکراتی کوردستان- سووریا راگەھاند کو ئەو داخۆیانی و ھەلویستێ ئالیێن سەر ب پارتیا ئێکەتیا دیموکراتیک نیشا ددەن کو وان نەڤێت چو ھێزەکا دی ژ بلی وان ل رۆژئاڤایێ کوردستانێ خەباتێ بکەن، چونکو بەری نھا چەندین جاران ل گەل سالح موسلم و بەرپرسێن دی یێن وێ پارتیێ دانوستاندنان ھاتبوونە کرن و وان سۆز دابوو کو رێ بدەن پێشمەرگە دەرباز ببن، لێ ھەلویستێ ڤێ دووماھیێ یێ وان نیشا ددەت کو ئەو ب خوە د ناڤا خوە دا ئێکگرتی نینن و کەس گوە نادەتە یێ دی و گۆت: (پێشمەرگێن رۆژئاڤایێ کوردستانێ دخوازن د شەرێ ل دژی تیرۆرێ دا پشکداریێ بکەن و رۆژئاڤایێ کوردستانێ بپارێزن و مافێ چو کەسەکێ نینە کو ئاستەنگیان ل ھەمبەر چوونا وێ ھێزێ دروست بکەت).
چاڤدێرێن سیاسی دیار دکەن کو پشتی ئەمریکا سۆز دایی کو ھاریکاریا یەکینەیێن پاراستنا گەل بکەت نھا ئەو خوە بێ منەت دکەن و دخوازن پشتا خوە ب ئەمریکا و رۆسیا گەرم بکەن و ب تنێ رۆژئاڤایێ کوردستانێ برێڤە ببەن، لێ ئەو یەک دێ بیتە ئەگەرێ ھندێ کو رەوشا ناڤخوەیی ل رۆژئاڤایێ کوردستانێ ئالۆز ببیت و ژ بەر ھندێ ژی نھا دھێتە خواستن کو کورد ل وێ پارچا کوردستانێ ئێکەتیا خوە دروست بکەن، چونکو ھەکە کورد ئێکگرتی بن دێ ئەمریکا و ھێزێن دی پتر ھاریکاریا وان بکەن، رەنگە نھا ژ بەر شەرێ ل دژی داعشێ ئەمریکا ھاریکاریا یەکینەیێن پاراستنا گەل بکەت، لێ ھەکە داعش نەما ئەو ھاریکاری ژی دێ ھێنە راوەستاندن و ژ بەر ھندێ ژی ھەکە کورد د ناڤا خوە دا ئێکگرتی بن و ل سەر ستراتیژیەکا نەتەوی کار بکەن دێ ئەمریکا ژی بەردەوام د بیاڤێ سیاسی و سەربازی دا ھاریکاریا وان بکەت.
پرۆژه یاسا مه‌زاختنێن به‌ره‌ڤانییا ئه‌مریكا د به‌رژه‌وه‌ندا پێشمه‌رگه‌ی دا ده‌ركه‌ڤت
ئه‌ڤرۆ نیوز: ڤه‌ده‌ر ره‌شاڤایی:
پرۆژه‌یاسایا مه‌زاختنێن به‌ره‌ڤانیا ئه‌مریكا بۆ سالا 2016 ێ رێ دده‌ت كو براسته‌راست پێشمه‌رگه د شه‌رێ دژی داعش دا ژ ئالیێ ئه‌مریكا ڤه بهێته پرچه‌ك كرن.
مه‌ك سۆرنبێری سه‌رۆكێ لژنا خزمه‌تێن له‌شكه‌ری یا جڤاتا نوونه‌ران یا ئه‌مریكا راگه‌هاند كو بریارا بزاڤا به‌ره‌ڤانیا نیشتمانی یا ئه‌مریكا رێ ب ئیدارا ئۆباما دده‌ت راسته‌راست چه‌كی بۆ هێزێن پێشمه‌رگه‌یێ هه‌رێما كوردستانێ بهنێریت بۆ به‌رهنگاربوونا داعش.
هه‌روه‌سا ناڤهاتی گۆت: هه‌كه‌ر وه‌زاره‌تا ده‌رڤه‌یا ئه‌مریكا ببینیت حكومه‌تا ئیراقێ وه‌ك پێدڤی یا گشتگیر نینه ل وی ده‌می دێ ئه‌مریكا هه‌می ده‌ستهه‌لات هه‌بیت بۆ پرچه‌ككرنا راسته‌راست یا پێشمه‌رگێ كوردستانێ و هه‌روه‌سا چه‌كدارێن هۆزێن سوننه بۆ وێ یه‌كێ ئه‌ڤ هاریگاریێن له‌شكه‌ری یێن ئه‌مریكا د به‌غدا را نه‌بۆرن.
ئه‌ڤ یه‌ك هات پشتی ل رۆژا چارشه‌مب پرۆژه‌یاسایا مه‌زاختنێن به‌ره‌ڤانیا ئه‌مریكا بۆ سالا 2016 ێ تێرا وێ یه‌كێ ده‌نگ ئینان كو بێی بكه‌ڤیته به‌ر مافێ ڤیتۆیا سه‌رۆكێ ئه‌مریكا بهێته په‌سه‌ندكرن.
مه‌زاختنێن سه‌ربازیێن په‌سه‌ندكری 612 میار دۆلارن كو 38 ملیار دۆلار بۆ مه‌زاختنێن سه‌ربازیێن ده‌رڤه‌ی ئه‌مریكانه.
سێ رووسی ل سوریا هاتنه كوشتن
ئه‌ڤرۆ نیوز: ڤه‌ده‌ر ره‌شاڤایی:
لدووڤ نووچه‌یه‌كێ ئاژانسا رویته‌رز سێ رووسیێن شه‌ر بۆ سه‌ربازێن سۆپایێ ئه‌سه‌د دكر ل نێزیك لازقیه ل سوریا هاتنه كوشتن، پشتی جهێ وان هاتیه بۆمبه‌بارانكرن.
روانگه‌ها سوری بۆ مافێن مرۆڤی پشتراستكر كو كوشتن هه‌بوویه لێ هه‌ژمارا دروست ناهێته زانین.
هه‌كه‌ر ئه‌ڤ راپۆرته راست بیت، دێ بیته ئێكه‌م نموونا ئاشكرا لدۆر كوشتنا رووسیێن پشته‌ڤانییا ئه‌سه‌د دكه‌ن ل سوریا.
پۆليسێن هه‌ولێر: عه‌لى حه‌مه سالح پاره دابوونه سنێلان دا تێكدانێ بكه‌ن
ئه‌ڤرۆ نيوز:
رێڤه‌به‌رێ گشتيێ پۆليسێن هه‌ولێر، عه‌بدولخالق ته‌لعه‌ت، ئاشكه‌را كر كو عه‌لى حه‌مه سالح رۆژا عه‌ره‌فێ، ئانكو رۆژا به‌رى جه‌ژنا قوربان، كۆمه‌كا سنێلان كۆم كربوون و 350 هزار دينار پێ دابوون دا كو كێشه‌يان ل هه‌ولێر دروست بكه‌ن، به‌لێ پۆليسێن چالاكيێن مه‌ده‌نى پلانا وى ژناڤبر.
عه‌بدولخالق ته‌لعه‌ت، زێده‌تر روونكرن بۆ حه‌فتيناما “باس” داينه سه‌ر ڤێ روودانێ و دبێژيت: “عه‌لى حه‌مه سالح رۆژا عه‌ره‌فێ ئانكو رۆژه‌كێ به‌رى جه‌ژنا قوربان، كۆمه‌كا سنێلێن هه‌ژار كۆمكربوون و 350 هزار دينار پێ دابوون دا كو كێشه‌يان ل هه‌ولێر دروست بكه‌ن، به‌لێ خۆشبه‌ختانه شيان د رێيا هێزێن پۆليسێن چالاكيێن مه‌ده‌نى دا و ب فه‌رمانا دادوه‌رى ده‌سته‌سه‌ر بكه‌ن، پشتى ڤه‌كۆلينێ ديار بوو كو عه‌لى حه‌مه سالح رۆله‌كێ سه‌ره‌كى هه‌بوو د هاندانا وان دا بۆ دروستكرنا كێشان”.
ئاماژه ب وێ چه‌ندێ ژى كر كو پشتى بابێن وان هاتينه ئاگه‌هداركرن و گازى كرن، ديار بوو كو ئه‌وان چو ئاگه‌هى ل سه‌ر بابه‌تى نه‌بوو و هيڤى ژ عه‌لى حه‌مه سالح خواست كو ده‌ست ژ زارۆيێن وان به‌رده‌ت و “پاشان ب كه‌فاله‌ت هاتينه به‌ردان”.
رێڤه‌به‌رێ پۆليسێن هه‌ولێر گۆت: “هه‌ر كه‌سه‌كێ بزاڤا تێكدانا كاودانێن ئارامێن هه‌ولێر و ته‌ناهيا وێ و ژيانا وه‌لاتيان بده‌ت دێ روو ب روو سزايێ قانوونى بيت”.
نيشاندان
WP Facebook Auto Publish Powered By : XYZScripts.com