ئه‌ڤرۆ نيوز:

تورکیا بەر ب ھەلبژارتنێن پێشوەخت ڤە دچیت و وەک ھەموو جارێن بۆری کۆمپانیێن راپرسیان ل ھەموو باژێرێن تورکیا و باکورێ کوردستانێ دەست ب راپرسیان کرینە دا کو بزانن رێژا دەنگێ پارتیا ل گۆر ھەلبژارتنێن حەفتێ خزیرانێ کێم بووینە یان زێدە، کۆمپانیا گەزیجی یا راپرسیان کو راپرسیێن وێ جارا بۆری گەلەک نێزیکی ئەنجامێن ھەلبژارتنان بوون د راپۆرتەکێ دا دیار کریە کو ژ بلی دەنگێ ئاکپارتیێ دەنگێ پارتێن دی زێدە بووینە و دەنگێ ئاکپارتیێ ڤێجارێ دێ نێزیکی ٣٨% بیت و دەنگێ پارتیا کۆماری ژی دگەھیتە ٢٩% و دەنگێ پارتیا بزاڤا نەتەوەپەرست ژی دگەھیتە نێزیکی ١٨% و دەنگێ پارتیا دیموکراستی یا گەلان ژی دگەھیتە نێزیکی ١٤%.

د بەردەوامیا راپۆرتا کۆمپانیا گەزیجی یا راپرسیان دا ھاتیە دیار کرن کو پرانیا وەلاتیێن کورد یێن کو بەری نھا دەنگێ خوە دابوونە ئاکپارتی ڤێجارێ دەنگی نادەنێ و دیار دکەن کو ئەردۆگانی فێل ل کوردان کر و نھا دیسان گوندان کوردان دسوژینن و خەلکێ مەدەنی دکوژن و ژ بەر ھندێ ئەو ئێدی پشتەڤانیێ ل ئاکپارتی ناکەن و دێ دەنگێ خوە بدەنە پارتیا دیموکراتی یا گەلان و ھندەکان ژی دیار کریە کو ئەو دەنگ نادەنە چو پارتیەکێ و پشتەڤانیێ ل ئاکپارتی ناکەن.
ل پشکەکا دی یا راپۆرتێ دا ھاتیە دیار کرن کو ل باژێرێن مەزنێن تورکیا یێن کو پرانیا ئاکنجیێن وان تورکن رێژەکا زێدە یا خەلکێ ژ سیاسەتا ئەردۆگانی یا نھا رازی نینن و دژی سیستەمێ سەرۆکاتیێ نە و ناخوازن ھەموو تشت د دەستێ ئەردۆگانی دا بیت و دبێژن ئەردۆگان بۆ ئەگەر کو جارەکا دی رەوشا تورکیا ئالۆز بیت و بێکاری زێدە بیت و رەوشا ژیانا خەلکێ خراب بوویە و ژ بەر ھندێ ئەو پشتەڤانیێ ل پارتیا کۆماری دکەن و رێژەک کێم ژی دەنگێ خوە ددەنە بزاڤا نەتەوەپەرست و ناخوازن ئێدی وەک بەرێ ئاکپارتی ب تنێ ل سەر دەستھەلاتێ بیت.
کۆمپانیەکا دی یا راپرسیان یا ب ناڤێ سۆنار ژی ل پرانیا باژێرێن تورکیا دەست ب راپرسیان کریە و ل گۆر راپرسیا وێ کۆمپانیێ ژی دەنگێ ئاکپارتی ل گۆر ھەلبژارتنێن حەفتێ خزیرانێ کێم دبیت و ھەر سێ پارتێن دی رێژەک ژ دەنگێ وان زێدە بوویە و خەلک ژ شەرێ نھا ل تورکیا بێزارن و داخوازا راگرتنا شەری دکەن، ھەروەسا د ئەنجاما راپرسیێ دا دیار بوویە کو ژ بەر شەری زیان گەھشتیە بارێ ئابووری یێ تورکیا و وەلاتی زەرەرمەند بووینە و ژ بەر ھندێ ژی ناخوازن ئێدی دەنگێ خوە بدەنە ئاکپارتی و دخوازن ل تورکیا ئێدی ئێک پارتی تنێ ل سەر دەستھەلاتێ نەبیت.
چاڤدێرێن سیاسی ل تورکیا ژی دیار دکەن کو خالا کو دێ د ڤان ھەلبژارتنان دا کاریگەریا خوە ل دەنگدەران بکەت شەر و بارێ خراب یێ ئابووری یە، چونکو ژ دەمێ دەستپێکرنا شەری ھەتا نھا ب سەدان کەس ل تورکیا جانێ خوە ژ دەست داینە و بھایێ لیرێ تورکیا ھاتیە خوارێ و ھەروەسا ژ بەر شەری گەشتیار وەک سالێن بۆری سەرەدانا تورکیا ناکەن و وێ یەکێ ژی زیانەک مەزن گەھاندیە خەلکێ و ئەو خالە ھەموو دێ کاریگەریا خوە ل دەنگدەرێن تورکیا کەت.

ئەڤرۆ نيوز:
سەرۆکێ ناڤەندا ڤەکۆلینێن ستراتیژی یێن رۆژھەلاتا ناڤین ل موسکۆ راگەھاند کو کورد ھێزەکا گەلەک مەزنن ل دژی تیرۆرێ و شیاینە د ئاستێ جیھانێ دا بۆ خوە پشتەڤانێن مەزن دروست بکەن و ئەڤرۆکە ل سووریا و عیراقێ کورد بووینە ھێزەکا گەلەک کاریگەر و پرانیا وەلاتێن جیھانێ ژی ھاریکاریا وان دکەن، پۆتین شاشیەکا گەلەک مەزن دکەت کو ھەتا نھا چەک نەدایە ھێزێن پێشمەرگەە و شەرڤانێن رۆژئاڤایێ کوردستانێ.
سیمیون باگداسارۆڤ سەرۆکێ ناڤەندا ڤەکۆلینێن ستراتیژی یێن وەلاتێن رۆژھەلاتا ناڤین ل موسکۆ د داخۆیانیەکێ دا بۆ ئاژانسا سپۆتینگ یا نووچەیان دیار کر کو چەند رۆژ بەری نھا ڤیلادەمیر پۆتین سەرۆکێ روسیار راگەھاند کو ئەو دێ ب ھەموو رەنگەکێ ھاریکاریا رژێما بەشاری بکەن، لێ پۆتین تووشی شاشیەکا مەزن بوویە و ل سەر شاشیا خوە ژی یا بەردەوامە، چونکو نھا رۆژھەلاتا ناڤین بەر ب گوھۆرینەکا مەزن ڤە دچیت و کورد ژی د ناڤەندا وێ گوھۆرینێ دانە و ژ بەر ھندێ ژی ئەڤرۆکە ئەمریکا و وەلاتێن رۆژئاڤا گرنگیێ ددەنە کوردان و پەیوەندیێن باش ل گەل وان دروست دکەن، دڤێت روسیا ژی ئێدی سیاسەتا خوە ل ھەمبەر کوردان بدەتە گوھۆرین و گۆت: (کورد ل سووریا و عیراقێ بووینە ھێزەکا گەلەک مەزن ل دژی تیرۆرێ، تشتێ کو لەشکرێ دو وەلاتان نەشیان ل دژی داعشێ بکەن کوردان ب دەلیڤێن گەلەک کێم شیان دربێن گەلەک مەزن ل وێ رێکخراوا تیرۆرستی بدەن و ژ بەر ھندێ ژی وەلاتێن رۆژئاڤا و ئەمریکا گرنگی دانە کوردان و پەیوەندیێن خوە ل گەل وان باشتر لێ کرینە، لێ پۆتین بەرۆڤاژی وێ یەکێ ل ھەمبەر کوردان بێدەنگ مایە و ھاریکاریا وان نەکریە، ئەو یەک شاشیەکا گەلەک مەزنە و دڤێت روسیا سیاسەتا خوە ل ھەمبەر کوردان ب تەمامی بدەتە گوھۆرین و ھاریکاریا وان بکەت).
سەرۆکێ ناڤەندا ڤەکۆلینێن ستراتیژی ل موسکۆ د پشکەکا دی یا ئاخڤتنێن خوە دا ئەو یەک ژی دیار کر کو ھەموو کەس باش دزانیت کو داعش تنێ ب رێیا ھێرشێن ئاسمانی ژناڤ ناچیت، لەشکرێن سووریا و عیراقێ ژی نەشیاینە داعشێ بدەنە راگرتن، ئەو چەکێ کو د دەستێ وان دا بوویە کەڤتینە دەستێ داعشێ و ئەو یەک مەترسیەکا مەزن بۆ خەلکێ رۆژھەلاتا ناڤین دروست کریە، لێ ھێزێن پێشمەرگێن کوردستانێ و شەرڤانێن کورد ژ بەر ئەزموونا خوە یا شەری و روحی فیداکاریێ سەرەرای نەبوونا چەکێن پێدڤی شیان دربێن مەزن ل داعشێ بدەن و وێ رێکخراوا تیرۆرستی ژ گەلەک دەڤەران دەربخینن، ژ بەر ھندێ ھەکە چەکێن پێدڤی بکەڤیتە دەستێ کوردان ئەو دێ بشێن داعشێ ژ عیراق و سووریێ ژی دەربخینن و گۆت: (ئەمریکا و وەلاتێن رۆژئاڤا ل گۆر سیاسەتا خوە ھندەک چەکان ددەنە کوردان، لێ روسیا ھەتا نھا بێدەنگ مایە و چ نەکریە، ئەو یەک شاشیەکا گەلەک مەزنە، چونکو ھەکە روسیا بڤێت ل رۆژھەلاتا ناڤین ببیتە خوەدان سەنگ و ھێزا خوە ب پارێزیت دڤێت پەیوەندیێن خوە ل گەل کوردان باش بکەت و ھاریکاریا وان بکەت، ژ بەر ھندێ ژی یا نھا پۆتین دکەت شاشیەکا مەزنە و دێ پاشی پەشیمان بیت، ئەز پێشنیاز دکەم روسیا بلەز چەکی بدەتە ھێزێن کوردی).
ناڤھاتی د دووماھیا ئاخڤتنا خوە دا ئەو یەک ژی دیار کر کو داعش مەترسیەکا گەلەک مەزنە ل سەر بەرژەوەندیێن روسیا، چونکو ھەکە داعش ب ھێز کەڤیت دێ خوە بگەھینتە سنۆرێن روسیا و ئەزموونا بەری نھا یا رێکخراوێن ھشکباوەر کو شەری روسیا کرینە نیشا ددەت کو جارەکا دی داعش دشێت وان کەسان بکار بینیت، نھا پتر ژ ٢٥٠٠ چەکدارێن روس د ناڤ داعشێ دانە، ئەو ب خوە وەک بومبەکێ نە و دشێت ھەردەم بپەقیت و زیانێن مەزن بگەھینتە روسیا. پۆتین نھا ھاریکاریێن سەربازی ددەتە عیراق و سووریا دڤێت ئەو ھاریکاری بۆ کوردان ژی بچن دا کو د گوھۆرینێن دەڤەرێ روسیا ھێزا کوردان ژ دەست نەدەت.