ئەڤرۆ نيوز:
پەیڤدارێ وەزارەتا خواندنا بلند و ڤەکۆلینێن زانستی ل حوکمەتا ھەرێما کوردستانێ ئاشکرا کر، د. یوسف گۆران، وەزیرێ خواندنا بلند و ڤەکۆلینێن زانستی دوھی ٢٦/٨/٢٠١٥ رێنمایا ھژمار دو یا سالا ٢٠١٥ تایبەت ب زانکۆ و پەیمانگەھێن ئەھلی ل ھەرێما کوردستانێ پەسەند کر و گۆت: “گرنگترین برگێن د ناڤ وێ رێنمایێ دا ئەوە، بۆ سالا بھێت یا خواندنێ ٢٠١٥ – ٢٠١٦ تێکڕایێ نمران بۆ چوونە ھەڤریا وەرگرتنێ ل زانکۆ و پەیمانگەھان ھاتە بلند کرن”.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی ل حوکمەتا ھەرێما کوردستانێ خویا کر، پشتی لژنەکا بلند ل سەر ئاستێ وەزارەتا خواندنا بلند و ل بەرچاڤوەرگرتنا کوالێتیا خواندن و فێرکرنێ ئەو رێنمایی ھاتینە بەرھەڤکرن و گۆت: “بۆ سالا بھێت یا خواندنێ ئەو قوتابیێن تێکرایێ نمرێن وان ژ (٥٥%) کێمتر بیت نەشێن بچیتە د ناڤ ھەڤرکیا وەرگرتنێ دا کو سالا بۆری (٥٠%) بوو”.
ھەروەسا دیار ژی کر، د رێنمایان دا ھاتیە: “رێژەکا بەرچاڤ یا کۆرسیێن خواندنێ ل پشکێن زانکۆیێن ئەھلی ھاتینە کێمکرن، وەکو: ل پشکێن (کارگێری کار، ژمێریاری، دارایی و بانک، کارگێریا ساخلەمی و کارگێریا یاسا) ژ ٢٠٠ کۆرسیێن خواندنێ بۆ ١٥٠ کۆرسیان ھاتینە کێمکرن، دیسا ل پشکێن (یاسا و پەیوەندیێن نێڤدەولەتی) ھژمارا کۆرسیێن خواندنێ ژ ١٦٠ کۆرسیان بۆ ١٢٠ کۆرسیێن خواندنێ ھاتینە کێمکرن”.

ھەروەسا ل پشکێن ئەندازەیێ ژی ١٠ کۆرسی ھاتینە کێمکرن، ٧٠ کۆرسیێن خواندنێ بۆ پشکێن (ئەندازەیا شارستانی، ئەندازەیا نەفتێ و IT ھاتینە دابینکرن بۆ پشکێن دیژی ب ھەمان رەنگی یە، ل ھەموو پشکان ھژمارەکا بەرچاڤ یا کۆرسیێن خواندنێ ھاتینە کێمکرن.
دەربارەی تێکرایێ نمرێن وەرگرتنێ ژی، پەیڤدارێ وەزارەتا خواندنا بلند و ڤەکۆلینێن زانستی ڕاگەھاند، ل ھندەک پشکان تێکرایێ نمرێن وەرگرتنێ ھاتینە بلندکرن، وەکو: ل پشکا یاسا تێکرایێ نمرێن چوونە د ناڤ ھەڤرکیا وەرگرتنێ دا ژ ٦٠% بۆ ٦٥% ھاتیە بلندکرن، ل پشکێن ئەندازا شارستانی و ئەندازا بیناسازی ژ ٨٠% بۆ ٨٥% ھاتیە بلندکرن، ھەروەسا ل پشکێن ئەندازەیا (نەفتێ، کۆمپیوتەر و گەھاندنێ) تێکرایێ نمرێن چوونە د ناڤ ھەڤرکیا وەرگرتنێ دا ژ ٧٥% بۆ ٨٠% ھاتینە بلندکرن و ل پشکا ئەندازا ژینگەھێ ژی ژ ٧٠% بۆ ٧٥% ھاتیە بلندکرن و ل پشکێن دیژی ھەر ب ڤی رەنگی یە و پێنج نمرە ھاتینە زێدەکرن.
دەربارەی ئارمانج ژ بلندکرنا سەرجەمێ نمرێن وەرگرتنا قوتابیان، عەباس ئەکرەم گۆت: “ئارمانجا وەزارەتێ ژ بلندکرنا تێکرایێ نمرێن وەرگرتنا قوتابیان و کێمکرنا ھژمارا کۆرسیێن خواندنێ ل زانکۆ و پەیمانگەھێن ئەھلی یێن ھەرێما کوردستانێ، ب مەرەما چاکسازیکرن و بلندکرنا کوالێتیا خواندن و فێربوونێ یە ل زانکۆ و پەیمانگەھێن ئەھلی”.
ل دۆر کرێیا خواندنێ ژی ل زانکۆ و پەیمانگەھێن ئەھلی یێن ھەرێما کوردستانێ ناڤبری گۆت: “کرێیا خواندنێ بۆ سالا بھێت یا خواندنێ ناھێتە بلندکرن، بۆ ڤێ چەندێ ژی وەزارەتا خواندنا بلند و ڤەکۆلینێن زانستی نڤیسار ئاراستەی ھەموو زانکۆ و پەیمانگەھێن ئەھلی کریە، کو رەوشا ئابووری یا ھەرێمێ ل بەرچاڤ بگرن و کرێیا خواندنێ بلند نەکەن، ھەموویان داخوازا وەزارەتێ قەبوولکر و پێگریا خوە ب بڕیارێن وەزارەتێ دوپاتکر”.
پەیڤدارێ وەزارەتا خواندنا بلند ئاماژە ب وێ چەندێ ژی کر، وەزارەتێ نڤیسارەکا فەرمی ئاراستەی ھەموو زانکۆ و پەیمانگەھێن ئەھلی یێن ھەرێما کوردستانێ کریە، دا کو وان رێنمایان پەیرەوبکەن، دیسا دەست ب بەلاڤکرنا فۆرمێن وەرگرتنێ بکەن و رێنمایان ب شێوێ رێبەر ل سەر قوتابیان حەزا خواندنێ ل وان زانکۆ و پەیمانگەھان ھەی بەلاڤ بکەن.

ئەڤرۆ نيوز:
سکرتێرێ پەرلەمانێ کوردستانێ راگەھاند کو حەفتیا بھێت و ل رۆژا ئێکی ئیلۆنێ پەرلەمان دێ دەست ب گرێدانا خولا پایزێ کەت و ئێک ژ کارێن گرنگێن پەرلەمانی دێ راستڤەکرنا پەیرەوێ ناڤخۆیی بیت کو سال و نیڤە کار بۆ دھێتە کرن.
فەخرەدین قادر سکرتێرێ پەرلەمانێ کوردستانێ، بۆ مالپەرێ خەندان راگەھاند ل رۆژا ئێکی ئیلۆنێ خولا پایزێ یا پەرلەمانی دێ دەست پێ کەت، ئانکو دێ داویێ ب بێھنڤەدانا خوە یا ھاڤینێ ئینیت.
سەبارەتی کارێن گرنگێن پەرلەمانی ژ پرۆژان کو کاری ل سەر بکەت، سکرتێرێ پەرلەمانێ کوردستانێ گۆت “ئەولەویەتا کارێن مە دێ پرسا راستڤەکرنا پەیِڕەوی ناڤخۆیێ پەرلەمانی بیت، کو نێزیکی سال و نیڤە ئەم کاری بۆ دکەین و ئێکە ژ پرۆژێن مودێرن یێن پەیڕەوێ ناڤخۆیی”.
دەربارەی وێ ئێکێ کو ھەکە ئالیێن سیاسی ل دۆر پرسا سەرۆکاتیا ھەرێما کوردستانێ رێک نەکەڤن و ھەبوونا ئەگەرێ ھەلوەشاندنا حوکمەتێ و ئەنجامدانا ھەلبژارتنێن پێشوەخت، فەخرەدین قادر سکرتێرێ پەرلەمانێ کوردستانێ گۆت “وی دەمی سەرۆکاتیا پەرلەمانی دێ ل گەل لیژنا قانوونی یا پەرلەمانی کۆم بیت و دێ وێ پرسێ شرۆڤە کەن و دێ رێیەکا قانوونی بۆ ھێتە دیتن”.

ئه‌ڤرۆ نيوز:

رێڤه‌به‌ريا پۆليسێن پارێزگه‌ها دهۆكێ راگه‌هاند كو دوهى ل تاخێ ره‌زا ل دهۆكێ ژنه‌كا 18 سالى خوه‌ د مال ڤه‌ كوشتيه‌ و ل باعه‌درێ ژى كه‌سه‌كى ب گۆله‌يێن ده‌بانجێ دووماهى ب ژيانا خوه‌ ئينايه‌.

رائيدێ مافپه‌روه‌ر هێمن سلێمان، به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “ئێڤاريا رۆژا پێنجشه‌مبى رێكه‌فتى 27ى ته‌باخا 2015ێ پۆليسێن دهۆكێ هاتنه‌ ئاگه‌هداركرن ب هه‌بوونا روودانه‌كا كوشتنێ ل تاخێ ره‌زا ل دهۆكێ و پشتى پۆليس ل جهێ روودانێ ئاماده‌ بووين، ديار بوو ژنه‌كا 18 سالى دووماهى ب ژيانا خوه‌ ئينايه‌ و لاشێ وێ هاتيه‌ ڤه‌گوهاستن بۆ نوشداريا داد و دوسه‌يا ڤه‌كۆلينێ يا هاتيه‌ ڤه‌كرن بۆ ئه‌گه‌رێن دروست يێن روودانێ”.

رائيدێ مافپه‌روه‌ر زێده‌تر گۆت: “هه‌ر دوهى ل ناحيا باعه‌درێ يا سه‌ر ب قه‌زا شێخان ژى زه‌لامه‌كى د ناڤ مالا خوه‌ دا، خوه‌ ب گوله‌يێن ده‌بانجێ كوشت و دوسه‌يا ڤه‌كۆلينێ ل دۆر كوشتنا وى ژى ل دووڤ مادێ 408 يا قانوونا سزايێن عيراقێ هاتيه‌ ڤه‌كرن دا كو ئه‌گه‌رێن دروست يێن خوه‌كوشتنا وى ديار بن”.