ئەڤرۆ نیوز:
سەرۆکێ جڤاتا ئێکەتیا ئورۆپا ب رێیا تەلەفونێ ل گەل رەجەب تەیب ئەردۆگانێ سەرۆک کۆمارێ تورکیا ئاخڤی و هۆشداری دا تورکیا کو دێ ئێکەتیا ئورۆپا دەست ب سزادانا تورکیا کەت.
شارل میشێل ب رێیا تەلەفۆنی ل گەل ئەردۆگانی سەبارەت ب کۆمبوونا وەلاتێن ئەندامێن ئێکەتیا ئورۆپا ئەوا کو ل رۆژێن ١٠ و ١١ یێ ڤێ مەهێ دا برێڤەچوویی هۆشداری دا تورکیا و راگەهاند کو پرانیا وەلاتێن ئورۆپا داخوازا سزادانا تورکیا دکەن و دڤێت تورکیا دەستان ژ سیاسەتا خوە بەردەت و نەبیتە مەترسی بۆ بەرژەوەندیێن ئورۆپا.
ئەڤرۆ نیوز:
جێگرێ سەرۆکێ لژنا دەستپاکیێ ل جڤاتا نوونه‌رێن ئیراقێ دیار كر: دوهى ژ ئه‌گه‌رێ فرۆشتنا دراڤى ب كۆژمێ ٢٧ ملیار دیناران زیان گه‌هشتینه ئیراقێ.
خالد جەشعەمى، گۆت ژى: دوهى د بازارێ فرۆشتنا دینارى دا ل هه‌مبه‌رى دۆلارێ ئه‌مریكى، ب كوژمێ ٢٧ ملیار و ٦٠٠ ملیۆن دیناران زیان گه‌هشتنه ئیراقێ.
دوهى بهایێ دۆلارى بلندبوونەکا بەرچاڤ د بازارێ ئیراقێ دا ب خۆڤە دیت و هەر ١٠٠ دۆلارێن ئەمریکى ب ١٣٠ هزار دیناران هاتە فرۆشتن.
ئەڤرۆ نیوز:
جۆ بایدن، بەربژارێ دیموکراتان، پرانیا دەنگێن جڤاتا هەلبژارتنێن ئەمریکا ب دەستڤه‌ئینان و ب فه‌رمى بۆ سه‌رۆكێ نوو یێ ئه‌مریكا.
بایدنى 306 دەنگ د جڤاتا هەلبژارتنان دا ب دەستڤه‌ئینان، ب ڤێ چه‌ندێ وى ده‌نگێن پێدڤى بۆ سەرۆکاتیا ئەمریکا ب دەستڤه‌ئیناینه.
د بەرامبەر دا دۆنالد ترەمپى، 232 دەنگێن جڤاتا هه‌لبژێری ب دەستڤه ئینان. ب پەسه‌ندکرنا دەنگێن وێ جڤاتێ، جۆ بایدن دێ بیتە سه‌رۆكێ 46 یێ ویلایەتێن ئێکگرتى یێن ئەمریکا.
ل شه‌ڤا بورى پرۆسا دوبارە ڤاڤارتنا دەنگێن ویلایەتا کالیفۆرنیا ب دووماهی هاتن و ب وەرگرتنا 55 دەنگێن جڤاتا هەلبژارتنان یا وێ ویلایەتێ، جۆ بایدنى، بەربژارێ دیمۆکراتان ب 306 دەنگان و ب فەرمی وەکو سەرۆکێ نوو هاتە هەلبژارتن.
دەستەیا هەلبژارتنان یا کۆنگرێسێ ئەمریکا سەرکەفتنا بایدنی دوپات کر و بزاڤێن دۆنالد ترامپی یێن تۆمارکرنا سکالایێن سەختەکاریێ و گوهرینا ئەنجامێن هەلبژارتنان د بەرژەوەندیا وی دا سەرنەگرتن.
هەر شڤێدی جۆ بایدنى گۆتارەک پێشکێشکر و تێدا ب توندی هێرشی ترامپی کر و گۆت: ترامپ رێزێ ل ئیرادا گەلێ ئەمریکا و سەروەریا قانوون و دستووری ناگریت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٢٢٢ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و هەروەسا سێ نەخوشێن کۆرۆنایێ ژی مرینە.
ل گۆر ئامارا وەزارەتا ساخلەمیێ ٣٢٠ نەخوشێن کۆرۆنایێ ژی ل هەرێما کوردستانێ ب تەمامی چارەسەر بووینە.
ل پارێزگەها دهۆکێ ژی ١٣٦ کەسێن دی تووشی کۆرۆنایێ بووینە و نەخوشەک ژی مریە، هەروەسا ١٧٢ نەخوش ژی ب تەمامی چارەسەر بووینە.
ئەڤرۆ نیوز:
ل گۆر چەندین ژێدەرێن میدیایی فەرماندارێن رژێما سووریێ ل هەمبەر دەستێوەردانێن هێزێن سەر ب ئیرانێ ل سووریێ دلگران بووینە و نەرازیبوونا خوە دیار کرینە.
ل گۆر زانیاریان ل دێرازۆرێ و ئەبوکەمال هێزێن سەر ب ئیرانێ رێگری ل هندەک بزاڤێن هێزێن رژێما سووریێ کرینە و هێزێن سووریێ ژی داخواز ژ هێزێن ئیرانێ کرینە کو وان دەڤەران چۆل بکەن.
ئەو یەک د دەمەکێ دایە کو حەفتیا بۆری ئاژانسا سپوتینگ یا روسیا ژی دیار کربوو کو روسیا داخواز ژ ئیرانێ کریە کو هێزێن خوە ژ سووریێ ڤەکێشیت و ئێدی دەستێوەردانێ د کاروبارێن ناڤخوەیی یێ سووریێ دا نەکەت.
ل ئالیێ دی حەفتیا بۆری حەسەن رۆحانی سەرۆک کۆمارێ ئیرانێ ژی دیار کر کو سووریێ هەڤپەیمانا ستراتیژی یا ئیرانێ یە و ئەو دێ بەرەڤانیێ ل سووریێ کەن.
ئەڤرۆ نیوز:
پەرلەمانێ ئیرانێ ب دەنگێن پرانیا ئەندامێن پەرلەمانی یاسا تایبەت ب هەلبژارتنان سەرۆک کۆماریێ هەموار کر و ل گۆر یاسا نوو نابیت کەسێ کو خوە بۆ سەرۆک کۆماریێ کاندید دکەت ناسناما چ وەلاتێن بیانی هەبیت و نابیت بەری نها ل دەرڤەی ئیرانێ ژی ژیا بیت.
چاڤدێرێن سیاسی ژی دیار دکەن کو ل گۆر یاسا نوو گەلەک کەسێن کو دخواستن خوە بۆ خۆلا داهاتی یا سەرۆک کۆماریێ بەربژار بکەن ئێدی نەشێن و ئەو یەک ژی دێ ئاریشێن نوو ل ئیرانێ دروست کەت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٢٠١ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و هەروەسا ٩ نەخوشێن کۆرۆنایێ ژی مرینە.
وەزارەتا ساخلەمیا ئەو یەک ژی دیار کریە کو ٣٧٤ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ١٠٣ کەسێن دی تووشی کۆرۆنایێ بووینە و هەروەسا چار نەخوش ژی مرینە و ٢٣١ نەخوش ژی ب تەمامی چارەسەر بووینە.
ئەڤرۆ نیوز:
سەرۆکوەزیرێ عیراقێ، ل دووماهیا ڤێ حەفتیێ دێ سەرەدانا وه‌لاتێ تورکیا کەت و بابه‌تێن پەترۆلێ و بەرهنگاریا تیرۆرێ دێ مژارێن سەرەکی یێن وێ سەرەدانێ بن، بەری سەرەدانا کازمی، فوئاد حسێن، وەزیرێ ده‌رڤه یێ عیراقێ دێ چیتە تورکیا و دێ رێککەفتنێ ل سەر وان بابەتان کەت یێن دێ گوتۆبێژ ل سەر هێنە کرن.
حەسەن جەنابی، بالیۆزێ عیراقێ ل وه‌لاتێ تورکیا دیار كریه: ل پێنجشەمبیا بهێت دێ مسته‌فا كازمى سەرەدانا تورکیا کەت و د كڤانێ سەرەدانێ دا، دێ ل گەل رەجەب تەیب ئەردۆغانى، سەرۆککۆمارێ تورکیا کۆم بیت، هه‌روه‌سا ئه‌ڤه ئێکەم سەرەدانا كازمییه بۆ وه‌لاتێ تورکیا.
ئەڤرۆ نیوز:
پێلەكا باران بارینێ دێ هەرێما كوردستانێ ڤەگریت و سەقاناسیا هەرێمێ ژی دبێژیت: پلێن گەرمێ دێ نزم بن و ل دەڤەرێن چیایى دێ بەفر باریت.
سەقاناسیا هەرێمێ راگەهاندیە، ل رۆژا سێشەمبی پێلەكا باران بارینێ دێ هەرێما كوردستانێ ڤەگریت و ل گەل هاتنا وێ پێلێ پیشبینیا بەفر بارینێ ه ل دەڤەرێن چیایێن سنوری هه‌یه.
هه‌روه‌سا گۆتیه، ئاستێ باران بارینێ دێ یا ناڤین بیت، ل سەنتەرێ پارێزگەهێن هەولێر و دهۆكێ و ب تایبەتى ل سنورێ وان هه‌ردو پارێزگەهان ئاست و رێژا بارانبارینێ دێ زێدەتر بیت ب هەڤبەر كرن ل گەل دەڤەرێن دیتر.
ئەڤرۆ نیوز، عەلی حاجی :
بەرپرسێ راگەهاندنا بەرەڤانیا باژێری ل دهوکێ بۆ ئەڤرۆ نیوز دیار کر د روودانەکا ئاگر بەرونێ دا ل باژێرێ زاخۆ زەلامەکێ ٤٠ سالی گیانێ خوە ژ دەست دەت و لەشێ وی بۆ پزیشکیا داد ل زاخۆ هاتە رەوانە کرن.
زێدەتر بێوار عەبدولعەزیز گۆت : ئەو روودان ل دەمژمێر ٣:٣٠ ئێڤاری ل تاخێ شەعبانێی دروست بوو دەما تیمێن مەیێن ئاگر بەربونێ ل زاخۆ گەهشتنە جهێ روودانێ و هەر زوو شیان کونترولا ئاگری بکەن، بەلێ د ئەنجامێ وێ روودانێ دا کەسەکێ ٤٠ سالی دسوژیت و گیانێ خوە ژ دەست دا و لدووڤ دا تەرمێ وی کەسی بۆ نۆشداریا داد ل زاخۆ هاتە رەوانە کرن .
نيشاندان