ئه‌ڤرۆ نيوز:
رۆژنامەکا بریتانی د راپۆرتەکێ دا ئاماژە ب ڤێ یەکێ دکەت کو داعشێ شیایە د ڤان ھەفتیێن دووماھیێ جارەکا دی ھێرشی چەندین دەڤەران بکەت چالاکیێن خوە ل وەلاتێن دیتر ژی بەرفرەھتر بکەت، ژ بۆ وێ یەکێ ژی دڤێت سراتیژیەکا نوو یا شەری د ئاستێ جیھانی ل ھەمبەر داعشێ بھێتە برێڤە برن و تنێ عیراقی دشێن چالاکیێن داعشێ بدەنە راگرتن.
رۆژناما ئیندێپێندێنیت یا بریتانی د راپۆرتەکێ دا دیار دکەت کو دڤێت ستراتیژیا شەری یا ل دژی داعشێ بھێتە گوھۆرین، چونکو پشتی بۆرینا سالەکێ دیار بوو کو داعش ب رێیا ھێرشێن ئاسمانی ژناڤ ناچیت، راستە کو ھێرشێن ئاسمانی کاریگەریەکا گەلەک باش ھەبوویە و گەلەک بنگەھێن ئابووری و سەربازی یێن داعشێ ژناڤ چووینە لێ ئەو یەک بۆ ژناڤبرنا رێکخراوەکا وەسا درندە تێر ناکەت و دڤێت د چارچۆڤێ ستراتیژیەکا نوو شەرێ داعشێ بھێتە کرن، ژ بۆ وێ یەکێ ژی دڤێت ب باشی ھاریکاریا عیراقیان بھێتە کرن، چونکو ئەو دشێن چالاکیێن داعشێ بدەنە راگرتن و وێ رێکخراوێ ژناڤ ببەن، ب تایبەتی ژی دڤێت گرنگیەکا مەزن بۆ سوننە و کوردان بھێتە دان و رێ نەھێتە دان کو داعش بشێت ناکۆکیێن مەزھەبی بکار بینیت.
د پشکەکا دی یا راپۆرتێ دا ھاتیە دیار کرن کو دڤێت ل سووریێ ژی دەست ب ئۆپەراسیۆنێن مەزن ل دژی وێ رێکخراوێ بھێتە کرن، ھندەک کەس دبێژن دڤێت بۆ ژناڤبرنا داعشێ ھاریکاریا بەشار ئەسەدی بھێتە کرن، ئەو یەک شاشیەکا ستراتیژییە، چونکو بەشار ئەسەد بەرپرسە ژ کوشتنا ب ھزاران وەلاتێن سڤیل ل سووریێ و چو دەمەکێ دکتاتورەک وەک بەشاری نەشێت سیستەمەکێ دیموکراتی بۆ خەلکێ خوە ئاڤا بکەت و ژ بەر وێ یەکێ ژی دڤێت ل سووریێ ھاریکاریا کوردان و بەرھنگاریا نەرم یا سووریێ بھێتە کرن و ھەکە وەک پێدڤی ھاریکاریا وان بھێتە کرن و ھێزێن ھەڤپەیمان ژی شەری بکەن دێ بشێن ل سووریێ داعشێ ژناڤ ببەن.
د پشکەکا دی یا راپۆرتێ دا ھاتیە دیار کرن کو حەشد شەعبی ھێزەکا گرێدای سەرکردێن شیعە ھاتیە ئاڤاکرن، ھەرچەندە ئەو نھا ل مەیدانێ شەرێ داعشێ دکەن، بەس ئەو ل سەر بنەمایێ مەزھەبی سەرەدەریێ لگەل روودانان دکەن و ژ بەر وێ یەکێ ژی سوننە ل عیراقێ دترسن کو ئەو ژی پاشی وەک داعشێ سەرەدەریێ ل گەل خەلکێ بکەن، ئەو چەکدارێن شیعە وەک پێدڤی نەھاتینە پەروەردەکرن و لاوازیەکا مەزن د شێوەیێ شەرێ وان دا دیار دبیت و ئەو ب ڤێ رەوشا نھا نەشێن وەک پێدڤی شەرێ داعشێ بکەن و رەنگە ھەکە ئەو ب ھێز کەڤن ژی پاشی بۆ عیراقێ ب تایبەتی بۆ کورد و سوننان مەترسیێن مەزن یێن وەک داعشێ ژی دروست بکەن و ژ بەر ڤێ یەکێ ژی دڤێت ھێزێن ھەڤپەیمان ل گۆر وێ راستیێ ھاریکاریا عیراقیان بکەن.
د راپۆرتێ دا ھەروەسا ھاتیە دیار کرن کو دڤێت ل گەل شەرێ چەکداری د بیاڤێ ھزری دا ژی شەرێ داعشێ بھێتە کرن و ئەوە ژی دێ ھەر دیسان عیراقی بشێن بکەن، چونکو دەمێ کاریگەریا وی ھزری ل ناڤ جڤاکی نەمینیت و ئەو نەچنە ناڤ رێزێن داعشێ، خەلکێ بیانی ژی نەشێن بچنە ناڤ وێ رێکخراوا تیرۆرستی و ژ بۆ وێ یەکێ ژی دڤێت شەرەکی مەزن یێ ھزری بۆ ژناڤبرنا ھزرێن ھشکباوەر بھێتە و دڤێت ئەڤە ژی پشکەک بیت ژ ستراتیژیا نێڤدەولەتی یا شەرێ داعشێ و ھێزێن ھەڤپەیمان ژی دڤێت ھاریکار بن.
د دووماھیا راپۆرتێ دا بەحسێ رۆلێ کاریگەر و گرنگ یێ کوردان ل سووریێ و عیراقێ ھاتیە کرن و ھاتیە راگەھاندن کو کوردان شیان رۆلەکێ سەرەکی ل عیراق و سووریێ ل دژی داعشێ ب گێرن و دربێن کوژەک ل وان بدەن و شیان ل سەر ئاخا خوە وان بدەنە راگرتن، ژ بۆ وێ یەکێ ژی دڤێت د ستراتیژیا نوو یا شەرێ ل دژی داعشێ دا پتر ھاریکاریا کوردان بھێتە کرن و کورد دشێن ل سووریا و عیراقێ بۆ ژناڤبرنا داعشێ رۆلەکێ کاریگەر ب گێرن.

ئەڤرۆ نیوز،زنار تۆڤی:

بەری چەند رۆژان سەروکێ تورکیا رەجەب تەیب ئەردوگان بریار دابوو کو ھێزێن وەلاتێ وی بکەڤنە دناڤ ئاخا وەلاتێ سوریا دا ژ پێخەمەت تێکدانا رەوشا کوردان ل وی وەلاتی.

ل سەر ڤی ھەلویستی سەرۆکی روسیا ڤلادیمێر پۆتین د دیدارەکا تەلەفزیونیدا د گەل کەنالێ (١) یێ روسی گوت: “تورکیا یا مژوولە کارێن ژ خوە مەزنتر ئەنجام بدەت، ئەگەر تورکیا بکەڤیتە دناڤ ئاخا سوریێ دا ئێدی نەشێت بھێتە ژ دەرڤە، ل وی دەمی نە ب تنێ سوریا و کوردان، بەلکو پێدڤیە مەژی ل بەرامبەر خوە ببینیت”.

ھەروەسا گۆتژی: “بەرسێن تورکیا گۆتینە كو ئەو دێ دەستێوەردانێ د رۆژئاڤایێ کوردستانێ کەن”، پوتن ب زمانەکێ زڤر رەخنە ل تورکیا گرتن و گۆت: “تورکیا ھەول ددەت کو کارێن ژ خوە مەزنتر ئەنجام بدەت، دشێت بچیتە دناڤ ئاخا سوریێ دا،بەلێ نەشێت ڤەگەریتەڤە، دوژمنێن مرۆڤایەتیێ کو دبێژنێ داعش دوو سال و نیڤە ھەڤ سنۆرن دگەل تورکیا، ل بەرچاڤێن تورکان سەرێن مرۆڤان دبرن، ب ساخی مرۆڤ سۆتینە و تورکیا چ جاران ژ ڤێ چەندێ عاجز نەبوویە، بەلێ دەمێ ھێزێن کوردی ئەو ناڤەندێن کو دەستێن داعشێن درندە دا بوون رزگار کرین، تورکیا گەلەک ژڤێ عاجز بوو، ئەڤە یا سەرنج راکێشە”.

ھەروەسا پۆتن دبێژیت: “ئارمانجا تورکیا ژڤێ چەندێ ئەوە کو نەھێلیت کانتۆنێن کوردان ب گەھنە ئێک و ئاستەنگان بۆ چێکەت، بەلێ ئەز زۆر ب روونی دبێژم، زۆر سەختە تورکیا ژڤێ دەرباز بیت، تورکیا تێکەلیەکا چاوان د گەل داعشێ ھەیە نزانم، بەلێ ئەز ب ئاشکەرایی دبێژم، ئەگەر تورکیا بکەڤیتە دناڤ ئاخا سوریێ دا، بلا ب تنێ کوردا و سوریێ ل بەرچاڤێت خوە نەبینیت، بەلکو د ھەمان دەمدا بلا مەژی ل ھەمبەر خوە ببینیت”.

ئەڤرۆ نيوز:

لیژنا پاراستنا ئێمناھیا تورکیا ب سەرۆکاتیا سەرۆک کۆمار رەجەب تەیب ئەردۆگان ل باژێرێ ئەنقەرە یێ تورکیا کۆمبوونەک سازکر و د کۆمبوونێ دا ئەردۆگان ژ سەرۆک ئەرکانێ تورکیا خواست کو ھێزێن سەربازی بێختە د ئامادە باشیێ دا بۆ ئۆپەراسیۆنەکا ل باژێرکێ جەرابلوس یێ رۆژئاڤایێ کوردستانێ و ل ھەمبەر دا سەرۆک ئەرکانێ تورکیا و سەرۆکێ دەزگەھێ ھەوالگێریێ (میت) بۆ ئەردۆگانی راگەھاندن کو بەرھەڤیێن وان د ئاستەکی بلند دایە و ھەم د وارێ سەربازی و ھەم ژی د وارێ ھەوالگێریێ دا زانیاریێن پێدڤی بۆ ئۆپەراسیۆنا کۆنترۆلکرنا جەرابلوسێ تەمامە.

رۆژنامەڤانەک ب ناڤێ سەردەم بۆ تۆرێن ئنترنێتێ دیار کریە کو د کۆمبوونا ئێمناھیێ دا گەنگەشە یێن تایبەت بۆ چێکرنا ھەرێمەکا ئارام د ناڤبەرا ھەردو کانتۆنێن رۆژئاڤا کوردستانێ کۆبانێ و ئەفرینێ دا ھاتیە وەرگرتن و ئارمانجا سازکرنا ئۆپەراسیۆنێ و ئاڤاکرنا ھەرێما ئارام پارچەکرنا ئاخا رۆژئاڤایێ کوردستانێیە و تورکیا دخوازیت ب ڤێ یەکێ ببیتە رێگر ل ھەمبەر دروستکرنا دەولەتە یانکۆ ھەرێمەکا یەکگرتی ل رۆژئاڤایێ کوردستانێ و بۆ ئەنجام دانا ئۆپەراسیۆن و ئاڤاکرنا ھەرێمەکا ئارام ل جەرابلوس و عەزازێ ئەو چاڤەرێی بەرسڤا ئەمریکایە و پاشی ئەمریکا و تورکیا ل سەر ڤێ بابەتێ گەنگەشە کرینە و ئەمریکا رەت کریە کو ھەرێمەکا وەسا ل سەر ئاخا سووریێ بھێتە دروست کرن.

رۆژنامەڤانێ ناڤھاتی ھەروەسا دیار ژی کریە ئەمریکا ب رێیا بالیۆزێ خوە یێ ل ئەنقەرە ھۆشداری دایە بەرپرسێن تورکیا کو دەست ب کارەکی وەسا نەکەن ژ بەر کو دێ رەوشا سووریێ ئالۆزتر بکەن و شەرێ ل دژی تیرۆرستان ژی لاواز بکەن و گۆت: (لێ پشکەک ژ بەرپرسێن تورکیا کو سەرکێشیا وان ئەردۆگان و سەرۆکێ دەزگەھێ میتێ دکەن رژدن ل سەر ئاڤاکرنا ھەرێمەکا ئارام و ل گەل ڤێ چەندێ دانە گرنگی ب ھۆشداریێن ئەمریکا نەھێتە دان و ل ھەمبەر دا داوود ئوگلۆ و وەزیرێ دەرڤە ل گەل ڤێ یەکێ نە کو ل دووڤ بریارێن (ناتۆ) و ھەڤپەیمانیا نێڤدەولەتی دا بزاڤێ بکەن).

ل ئالیێ دی ئیلکەر باشبوغ سەرۆک ئەرکانێ بەرێ یێ تورکیا ژی بۆ رۆژناما حوڕیەتێ راگەھاند کو نابیت تورکیا بکەڤیتە ئاخا سووریێ ژ بەر دێ تورکیا ببیتە پشکەک ژ شەرێ ناڤخوە یێ وی وەلاتی و دێ شەر ھێتە ڤەگوھاستن بۆ ناڤ تورکیا و ژ سەرۆک کۆمار و حوکمەتا تورکیا خواست کو خوە ژ پیلانەکا وەسا دوور بکەن، ژ بەر پیلانەکا وەسا دشێت رەوشا تورکیا گەلەک ئالۆز بکەت و د ئاستێ ناڤخوەیی و دەرڤە نەرازیبوونێن گەلەک مەزن دروست ببن و ئێمناھیا تورکیا ژی بکەڤیتە مەترسیێ.

فیگەن یوکسەکداخ ھەڤسەرۆکا پارتا دیمۆکراسیا گەلان ژی د ڤێ دەربارێ دا تایبەت بۆ رۆژناما ئەڤرۆ راگەھاند کو ئەو ب چ رەنگەکی قەبوول ناکەن کو تورکیا پشکەک ژ ئاخا رۆژئاڤایێ کوردستانێ داگیر بکەت و ھەرێمەکا ئارام دروست بکەت و گۆت: (مەرەما تورکیا ژ دروستکرنا ھەرێمەکا وەسا بۆ ژناڤبرنا دەستکەڤتێن گەلێ کوردە ل رۆژئاڤایێ کوردستانێ و ھەکە تورکیا دەست ب کارەکی وەسا بکەت دێ ئالۆزی ل ھەموو تورکیا بەلاڤ ببن).

حەسەن جەمال رۆژنامەڤانێ ناڤدار یێ تورکیا ژی د ڤێ مژارێ دا راگەھاند کو ئەردۆگان و (ئاکپارتی) دخوازن شەرەکی ل گەل رۆژئاڤا و سووریێ دەرخینن و د رەوشەکا وەسا دا ل تورکیا ھەلبژارتنێن پێشوەخت ئەنجام بدەن دا کو بشێن سیستەمێ سەرۆکاتیێ ل تورکیا بجە بکەن و جارەکا دی دەستھەلاتەکا یەک پارتیتی ھەتا یەک کەسی ئاڤا بکەن و گۆت: (لێ شەر نە یاریە و ھەکە تورکیا ب سەربازی ڤە بکەڤیتە سووریێ و بخوازیت ھەرێمەکا ئارام دروست بکەت ئەو یەک دھێتە واتەیا شەری ل گەل سووریێ و کوردان و ئەو یەک دێ شەری ڤەگوھێزیتە ناڤ تورکیا و رەوشا وەلات ب تەمامی ئالۆز بکەت و ئەز پشتراستم پیلانەکا وەسا نە ژ ئالیێ ئوروپا، نە ژ ئالیێ ئەمریکا ڤە ناھێتە قەبوولکرن و ھەکە قەبوول ژی بکەن دەلیڤا سەرکەڤتنا پیلانەکا وەسا نینە و بۆ تورکیا کارەساتە).