ئەڤرۆ نیوز:
د دیدارەکێ دا بۆ رۆژناما ئەڤرۆ کو ھۆشەنگ تاجر بەرھەڤ کریە، ئەندامەکێ مەکتەبا سیاسی یا پارتی دیموکراتی کوردستان/ ئیرانێ دیار دکەت کو وان دو سالان بەری نھا پێشبینیا وێ یەکێ کربوو کو دێ ئیران نەچار بیت ھەموو داخوازیێن رۆژئاڤا قەبوول کەت و رێککەڤتنا کو نھا ھاتیە کرن ژی نیشا ددەت کو ئیران ب ھەموو رەنگەکێ خوە رادەست کریە و ئەو رێککەڤتن چو مفایەکا خوە بۆ جڤاکێ ئیرانێ نینە و دێ مەترسیەکا مەزن بۆ جڤاکێ مەدەنی و کوردان و کێم نەتەوێن دی ل ئیرانێ دروست کەت.
روستەم جیھانگیری ئەندامێ مەکتەبا سیاسی یا پارتی دیموکراتی کوردستان/ ئیران بۆ رۆژناما ئەڤرۆ دیار کر کو بەری دو سالان مە ل کۆنگرێ پارتیا خوە بەحسێ وێ یەکێ کربوو کو ھاتنا رۆحانی بەرناما دەولەتا ئیرانێ یە دا کو بشێن نەرماتیەکێ ل سیاسەتا خوە یا دەرڤە نیشا بدەن و خوە نێزیکی وەلاتێن رۆژئاڤا بکەن و گۆت: (چەند ئەگەرێن سەرەکی ھەبوون کو کۆمارا ئیسلامی نەچار بوو خوە نێزیکی رۆژئاڤا بکەت و ھەمو و داخوازیێن وان قەبوول بکەت، چونکو رەوشا ئابووری یا ئیرانێ تێک چوو بوو و نەرازیبوونا خەلکێ ل دژی دەستھەلاتا سیاسی رۆژ ب رۆژێ زێدە ببوو و دەستھەلاتا سیاسی ل ئیرانێ ھەست ب مەترسیەکا مەزن کربوو و ژ بەر ھندێ ژی وان ھەموو داخوازیێن رۆژئاڤا قەبوول کرن و تنێ مفایا رێککەڤتنا کو ئیرانێ ل گەل وەلاتێن زلھێز کریە ئەوە کو رەنگە تا رادەیەکێ رەوشا ئابووری یا وەلاتی باش بیت، چونکو رێککەڤتنا ئیرانێ کری تنێ بۆ ھندێ یە ژیێ دەستھەلاتا سیاسی درێژ ببیت).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو ئیران ھەر چەند بۆ دەرڤە نەرماتیێ نیشا بدەت وەسا بۆ ناڤخوەیێ وەلات ژی دژوار بوویە. گرتنا چالاکڤانێن سیاسی و مەدەنی رۆژ ب رۆژێ زێدە بوویە، زۆرداریا ل سەر کوردان و بەلوچان و کێم نەتەوێن دی ل ئیرانێ نھا د ئاستەکی ھەر بلند دایە و ھەروەسا گرتنا رۆژنامەڤان و چالاکڤانێن مەدەنی ژی نھا ژ ھەر دەمەکێ زێدەتر بوویە و ئەو یەک ژی نیشا ددەت کو دەستھەلاتا سیاسی یا ئیرانێ ژ نەچاری رێککەڤتن ل گەل وەلاتێن زلھێزێن جیھانێ کریە و چو دەستکەڤتەکا وێ رێککەڤتنێ بۆ جڤاکێ ئیرانێ نینە و گۆت: (گەفێن کو بەرێ ئەحمەدی نەژاد و خامنەیی ل دژی رۆژئاڤا دکرن ھەموو نیشانا لاوازی و ناکۆکیێن ناڤخوەیی ل ئیرانێ بوون، چونکو ناکۆکیێن سەرۆکێ ئایینی ل گەل سەرۆک کۆمارێ وی دەمی ل ئیرانێ نیشا ددا کو کاریگەریا سزایێن ئابووری ل سەر ئیرانێ پشتا سیستەمێ سیاسی شکاندیە و ئەو ل رێیەکی دگەرین دا بشێن ھەناسەکا نوو وەربگرن و رێککەڤتنا بەری چەند رۆژان ژی ھاتە کرن تنێ بۆ ڤێ مەبەستێ بوویە و چو ئەنجامەکا وەسا مەزن ژێ دەرناکەڤیت).
ئەندامەکا مەکتەبا سیاسی یا پارتی دیموکراتی کوردستان/ ئیران د دووماھیا ئاخڤتنا خوە دا ئەو یەک ژی نەڤەشارت کو مەترسی دێ ل سەر کوردێن رۆژھەلات ژی زێدە بیت و رەنگە ل ناڤخوەیی ئیرانێ دەست ب ئۆپەراسیۆنێن نوو ل دژی خەلکێ بھێتە کرن دا ئەو چاڤترسی بن و داخوازا مافێ خوە نەکەن و گۆت: (لێ گەلەک ئاشکرایە کو د بیاڤی سیاسی و جڤاکی دا چو گوھۆرینێن بەرچاڤ ل ئیرانێ دروست نابن، ئیرانێ ئەو رێککەڤتن بۆ وێ یەکێ کر دا کو مەترسیا ناڤخوەیی و گوھۆرینا سیستەمێ سیاسی ژ خوە دوور بکەت و مخابن وەلاتێن رۆژئاڤا ژی بۆ بەرژەوەندیێن خوە یێن ئابووری و سیاسی ئەو رێککەڤتن کرن و دیارە ئەو چو گرنگیەکێ نادەنە داخوازیێن گەلێ ئیرانێ ب گشتی و ب تایبەتی ژی گەلێ کورد کو ب سالانە ل دژی سیستەمێ سیاسی یێ ئیرانێ شەری دکەت و ب ھزاران لاوێن خوە گوری ئازادیا کوردستانێ کرینە).

ئه‌ڤرۆ:
پرسێن گرێدای دانوستاندنێن راستڤەکرنا پڕۆژێ قانوونا دستوورێ ھەرێما کوردستانێ و ھەلبژارتنا سەرۆکێ ھەرێمێ یێن گەرمبووین و ئێکەتی و گۆڕان دخوازن سەرۆکێ ھەرێمێ ژلایێ پەرلەمانی ڤە بھێتە ھەلبژارتن و پەرلەمانتارەکێ پارتی ژی دبێژیت، بۆ ڤێ قۆناغێ پێدڤیە سەرۆک ژلایێ خەلکی ڤە بھێتە ھەلبژارتن.

ڤەمان فەیسەل، ئەندامێ فڕاکسیۆنا پارتی دیموکراتی کوردستان ل پەرلەمانێ کوردستانێ بۆ رۆژناما ئەڤرۆ گۆت” ئەم وەکو پارتی د رژدین ل سەر وێ چەندێ کو سەرۆکێ ھەرێما کوردستانێ ژلایێ خەلکێ کوردستانێ ڤە ب رێیا دەنگدانێ بھێتە ھەلبژارتن و پتر دێ شیان ھەبن ب رێیا دەنگدەران بھێتە ھەلبژارتن و راستە لایەنێن دی رەنگە بۆچوونێن جودا ھەبن و ب خوازن سەرۆک دناڤا پەرلەمانی دا بھێتە ھەلبژارتن، بەلێ پارتی دگەل ڤێ چەندێ دا نینە، سیستەمێ دەستھەلاتێ ل ھەرێما کوردستانێ سیستەمێ پەرلەمانی بیت و نوکە ژی ب خوە سیستەم پەرلەمانی یە، تنێ سەرۆک ژلایێ خەلکی ڤە دھێتە ھەلبژارتن، بۆ ڤێ قۆناغێ وەسا باشترە سەرۆک راستەوخوە ژلایێ خەلکێ کوردستانێ ڤە بھێتە ھەلبژارتن، بۆچوونێن جودا تنێ ل سەر سیستەمێ پەرلەمانی یە و د پرۆژێ بەرێ دا ژی یێ ھەی سیستەم پەرلەمانی و دیموکراسی بیت”.
ڤەمانی گۆت ژی” گەلەک جاران بەحس ل وێ چەندێ دھێتەکرن کو دەستھەلاتێن سەرۆکێ ھەرێما کوردستانێ گەلەکن، بەلێ ھەکە ئەم بەرێ خوە بدەینە قانوونا ھژمار ئێک یا سالا ٢٠٠٥ێ یا سەرۆکایەتیا ھەرێما کوردستانێ، دێ بینین، چو دەستھەلاتێن وەسا نینن، چو مەترسی ل سەر دەستھەلاتێن سەرۆکی نینن، ئەم درازینە دەستھەلاتێن سەرۆکێ ھەرێمێ بھێنە کێمکرن، لێ چو دەستھەلات نینە ھەتا بھێنە کێمکرن، ھنارتنا لەشکری بۆ دەرڤەی سنۆرێ ھەرێما کوردستانێ دڤێت ب رازیبوونا پەرلەمانی بیت، ھەکە راگەھاندنا رەوشا نە ئاسایی بیت، ئەڤە ژی دێ د چوارچۆڤێ قانوونێ دا ھێتە رێکخستن، تنێ دەستھەلاتا سەرۆکێ ھەرێمێ ھەی ئەوە، سەرۆکێن جڤاتا وەزیران و پەرلەمانی تەکلیف بکەت بۆ پێکئینانا حوکمەتێ و پەرلەمانی، ل دووڤ ھزرا مە، سەرۆکی چو دەستھەلاتێن وەسا نینن و ئەو دەستھەلاتێن ھەین ژی د پڕۆتوکولی و تەشریفاتی نە، ھەر تشتەک ژی ھەژی ھندێ بیت د دانوستاندناندا گۆھۆڕین تێدا بھێنەکرن و داخوازا سەرۆک بارزانی ئەو بوویە سازان ل سەر پڕۆژە قانوونا دستوورێ ھەرێما کوردستانێ بھێتەکرن و ھەموو لایەن رازیبن ل وی پرۆژەی”.
زانا عەبدولڕەحمان، ئەندامێ پەرلەمانێ کوردستانێ ل سەر لیستا ئێکەتی نیشتمانی کوردستان بۆ رۆژناما ئەڤرۆ گۆت” ھێشتا مە ئاخڤتنا خوە یا دووماھیێ نەدایە پارتی ل دۆر پرسا پۆستێ سەرۆکێ ھەرێما کوردستانێ و ئەوا د راگەھاندنێ دا دھێتە بەحسکرن بۆچوونێن کەسایەتی نە، بەلێ بەری بچینە دناڤا ناڤەڕۆکا پرسا پۆستێ سەرۆکێ ھەرێمێ، مە ئاریشێن دی ل گەل پارتی یێن ھەین، ئێک ژوانا پرسا پڕۆژە قانوونا دستوورێ ھەرێما کوردستانێ ل ٣٠ خزیرانێ مە رێککەفتن ل گەل پارتی یا ھەی، دڤێت دستوور ڤەگەڕیت پەرلەمانی بەری بچیتە دەنگدانێ دناڤ خەلکی دا، دەمێ ئەم نوکە دبینین پارتی ب جۆرەکێ دی رەفتارێ ل گەل ئێکەتیێ دکەت و دشێم بێژم پارتی بێ وەفابوو بەرامبەر ئێکەتیێ، ئەڤە ددەمەکی دایە، مە باجا ڤێ چەندێ دایە و ١٢ کۆرسی مە ژ دەستداینە، بەلێ پارتی ئەڤ چەندە ل بەرچاڤ نەگرتیە و خوە د ئێکەتیێ ناگەھینیت”.
ل دۆر پرسا پۆستێ سەرۆکێ ھەرێما کوردستانێ، زانای دیارکر، مە گەلەک ئاریشە ل گەل پارتی یێن ھەین، جارێ دڤێت دستوور بھێتە راستڤەکرن و دانوستاندن ل دۆر بھێنەکرن، ھەکە ھەموو لایەن رازیبوون، دێ چینە سەر پرسا ھەلبژارتنا سەرۆکێ ھەرێمێ، ئایا ب رێیا پەرلەمانی بیت، یان ژلایێ خەلکی ڤە بھێتە ھەلبژارتن ب رێیا دەنگدانێ، نابیت تنێ ب دلێ پارتی بیت، یان دلێ ئێکەتیێ بیت، دڤێت خەلک یێ رازیبیت، ل رۆژێن داھاتی دێ دانوستاندن ھێنەکرن و ئەڤ بابەت دێ ھێتە بەحسکرن، وی دەمی دێ مە ھەلویستەکێ ئێکلا ھەبیت و ل گەل پارتی دێ خوە ئێکلاکەین”.