نێچیرڤان بارزانی ،سەرۆكێ هەرێما كوردستانێ، پێشوازی ل كریستەفەر بۆم، بالیۆزێ كەنەدا ل ئیراقێ كر. هەردو ئالییان دوپاتی ل زێدەتر پێشڤەبرنا هەڤبەندیێن كەنەدا ل گەل ئیراقێ و هەرێما كوردستانێ كر، ب تایبەتی د وارێ ئابۆریدا.
سەرۆكێ هەرێما كوردستانێ وبالیۆزێ كەنەدا دانوستاندن ل دۆر هەڤبەندیێن د ناڤبەرا كەنەدا و ئیراقێ و هەرێما كوردستانێ كر، هەروەسا رۆناهێ ئێخستە سەر هەلبژارتنێن داهاتی یێن جڤاتا نوونەرێن ئیراقێ، رەوشا ناڤخوەییا هەرێما كوردستانێ و بزاڤێن بەردەوام بۆ پێكئینانا كابینەیا نوو یا حوكمەتا هەرێما كوردستانێ.
سەرۆكاتیا هەرێما كوردستانێ دیاركر» د پشكەكا دی یا كۆمبوونێدا باس ل دەلیڤەیێن كار و وەبەرهێنانێ بۆ كۆمپانییان و كەرتێ تایبەت كەنەدی ل هەرێما كوردستانێ هاتە كرن، ئەڤە ژی وەك پێنگاڤەك بۆ زێدەتر بهێزكرنا هەڤبەندیێن ئابۆری.
هەڤدەم، ئاستێ نوونەراتییا كەنەدا هەرێما كوردستانێ و دوماهی پێشهاتێن دەڤەرێ و دەرئەنجامێن وان، تەوەرێ دی یێ كۆمبوونێ بوون.

سەرۆكێ هەرێما كوردستانێ راگەهاند، دەستوورێ ئیراقێ ب ناڤ فیدرالییە، بەلێ د راستیدا هەموو تشتەكە ژ بلی فیدرالیێ، گوت ژی: ئەوا ئیراق ل گەل هەرێما كوردستانێ دكەت ناڤەندكارییەكا گەلەك ب هێزە.
دوهی چارشەمبی 8/10/2025، نێچیرڤان بارزانی ،سەرۆكێ هەرێما كوردستانێ، د چارچۆڤەیێ پشكداریكرنێ د پانێلەكیدا ل دیدارا مێری، گوت» سەركردایەتییا كوردی ئەوا پێدڤی بوو بۆ ئاڤاكرنا ئیراقەكا نوو خەمساری نەكر».
سەرۆكێ هەرێمێ گوت ژی» دەستوورێ ئیراقێ دەستكەفتەكێ مەزن بوو بۆ هەرێما كوردستانێ نابیت ب كێمی لێ بنێرین، بەلێ دڤێت پرسیار بكەین ئایا دەستوور وەك خوە هاتیە بجهئینان؟ د بەرسڤێدا بێگومان نەخێر هەتا نوكە وەك خوە نەهاتیە بجهئینان».
نێچیرڤان بارزانی باس ل وێ چەندێ ژی كر» هەكە ئەم بخوازین ئیراقەكا خوەشگوزەران ژ روویێ سیاسی، جڤاكی و ئابۆری پەیدا بكەین، مەرجێ ئێكێ پێگیریبوونە ب دەستوورێ ئیراقێ، مەزنترین كێشەیا وەلاتی ئەوە هەتا نوكە ناهێتە زانین سیستەمێ وەلاتی فیدرالییە یان ناڤەندییە، ئیراق د ناڤەرۆكێدا هەموو تشتەكە تنێ فیدرالی نینە».
هەر ل دۆر سیستەمێ ئیراقێ، سەرۆكێ هەرێمێ راگەهاند» ئەوا ئیراق ل گەل هەرێما كوردستانێ كەت ناڤەندكارییەكا گەلەك ب هێزە».
هەڤدەم دوپاتی ل وێ چەندێ كر» ب باوەری ب خوەبوون ب دیتنا من كووراتییا ستراتیژییا هەرێما كوردستانێ بەغدایە، لەوما دڤێت ل گەل وێ بگەهینە ئەنجامەكی».
ل دۆر هەلبژارتنێن جڤاتا نوونەرێن ئیراقێ، نێچیرڤان بارزانی ئاشكراكر» هەلبژارتنێن ڤێجاری گەلەك دگرنگن، ئەڤ هەلبژارتنە دەستپێكا قووناغەكا نوویە و دڤێت هەموو ئیراقی ڤێ پرسێ گەلەك ب گرنگ بزانن و هەست ب وێ بەرپرسیارەتیێ بكەن».
سەرنج بۆ وێ چەندێ ژی راكێشا» دڤێت ئەم وەك كورد پشكداریێ د وان هەلبژارتناندا بكەین و دڤێت خوە بسەلمینن، چونكە سەنگێ كوردان و ئێكگرتنا كوردان ل بەغدا ژێدەرێ هێزێیە بۆ هەرێما كوردستانێ».
سەرۆكێ هەرێما كوردستانێ دوبارە باس ل گرنگییا بجهئینانا دەستوروی ل ئیراقێ كر و گوت» بۆ ئارامییا سیاسی، جڤاكی و ئابۆری ل ئیراقێ، دڤێت دەستوور وەك خوە بهێتە بجهئینان».
ل دۆر هەلبژارتنێن خولا شەشێ یا پەرلەمانێ كوردستانێ و پێكئینانا كابینەیا دەهێ یا حوكمەتا هەرێما كوردستانێ، نێچیرڤان بارزانی رۆهنكر» هەلبژارتنێن گەلەك سەركەفتی ل هەرێما كوردستانێ هاتنە ئەنجامدان، راستە پرۆسەیا پێكئینانا كابینەیا نوو یا حوكمەتا هەرێمێ گەلەك ڤەكێشا، بەلێ ئەوا نوكە گرنگ هەڤبەندییەكا گەلەك باش د ناڤبەرا پارتی و ئێكەتیێدا هەیە».
ل درێژییا ئاخڤتنێن خوەدا، ئەوژی بەرچاڤكر» مە قووناغێن گەلەك گرنگ ل گەل ئێكەتیێ دەربازكرینە، ل دووڤ بۆچوونا سیاسی یا مە بۆ پاشەڕۆژا سیاسی یا وی وەلاتی و چاوانییا رەفتاركرنێ ل گەل بەغدایێ، مە كاغەزەكا هەڤپشك دروستكریە. ل گەل ئێكەتیێ تنێ مایە ل سەر پۆستان ل هەرێما كوردستانێ رێكبكەڤین».
بەلێ ئەو چەندە نەڤەشارەت كو د وێ باوەریێدا نینە كابینەیا دەهێ یا حوكمەتا هەرێما كوردستانێ، بەری ئەنجامدانا هەلبژارتنێن جڤاتا نوونەرێن ئیراقێ بهێتە پێكئینان.
تەوەرەكێ دی یێ پانێلێ یێ تایبەت بوو ب پرسا مووچەیێ فەرمانبەرێن هەرێما كوردستانێ، سەبارەت ڤێ چەندێ، نێچیرڤان بارزانی گوت» پشتی هەلبژارتنێن جڤاتا نوونەرێن ئیراقی، هەم دڤێت دەستوور وەك خوە بهێتە بجهئینان، هەم دڤێت كێشەیا مووچەی ب دووماهی بهێت».
سەرۆكێ هەرێما كوردستانێ د پشكەكا دی یا ئاخڤتنێن خوەدا باس ل هەڤبەندیێن هەرێما كوردستانێ ل گەل كۆمارا ئیسلامییا ئیرانێ كر و راگەهاند» ئیران جیرانەكا باشە و دخوازین مە هەڤبەندییەكا باش ل گەل هەبیت» هەروەسا گوت» هیچ دەمەكی ناخوازین هەڤبەندییا مە ل گەل ئیرانێ تێكبچیت».
سەرۆكێ هەرێما كوردستانێ باس ل دووماهی سەرەدانا خوە بۆ ئیرانێ كر و گوت» ب دیتنا من پشتی سەرەدانا من بۆ ئیرانێ و كۆمبوونێ ل گەل عەلی خامەنەئی هەڤبەندیێن مە ل گەل ئیرانێ بۆ باشتر هاتینە گوهۆڕین».
ل دۆر هێرشێن ڤێ دووماهیێ ل سەر هەرێما كوردستانێ كو فرۆكخانە و زەڤیێن پەترۆلی دكرنە ئارمانج، نێچیرڤان بارزانی گوت» هێزا چەكدار هەیە درۆنان دژی هەرێما كوردستانێ بكاردئینیت و مووچەی ژ حوكمەتا ئیراقێ وەردگریت».
سەبارەت مەترسیێن ل سەر پاشەڕۆژا ئیراقێ، سەرۆكێ هەرێما كوردستانێ، ئاشكرا ك» ئەوا مەترسی ل سەر وەلاتی هێزێن ژ دەرڤەی قانوونێنە، بەلایەكا مەزنن ل سەر پاشەڕۆژا ئیراقێ».
نێچیرڤان بارزانی، ل دۆر كەرتێ تایبەت ل هەرێما كوردستانێ، گوت» داینەمۆیا پێشكەفتنا هەر وەلاتەكی كەرتێ تایبەتی وی وەلاتییە، نوكە كەرتێ تایبەت ل هەرێما كوردستانێ پێشكەفتنەكا مەزن ب خوەڤە دیتییە، هەتا گەهشتییە ئاستەكی كو حوكمەتا هەرێما كوردستانێ هزر ل وێ چەندێ دكەت ب قانوونێ وەبكەت كارمەندێن كەرتێ تایبەت خانەنشین بكەت».
نێچیرڤان بارزانی ل دۆر هەڤبەندیێن هەرێما كوردستانێ ل گەل توركیا ئاماژە ب وێ چەندێ كر» مە هەڤبەندییەكا گەلەك دۆستانە ل گەل توركیا هەیە».
پرۆسەیا چارەسەرییا توركیا تەوەرەكێ دی یێ ئاخڤتنێن نێچیرڤان بارزانی بوو و گوت» توركیا ل سەرئێخستنا پرۆسەیا چارەسەریێ یا جدییە».
سەرۆكێ هەرێما كوردستانێ باس ل رۆلێ پارتییا كاركەرێن كوردستانێ پەكەكێ كر د پرۆسەیا چارەسەریێ و ئاماژە ب وێ چەندێ كر» دڤێت پەكەكە هندەك پێنگاڤان ب هاڤێژیت بۆ وێ چەندێ پرۆسەیا چارەسەریێ بگەهیتە ئەنجامەكی».
حوكمەتا نوو یا سووریێ و رەفتار ل گەل پێكهاتە و كەمینەیێن وی وەلاتی، تەوەرەكێ دی یێ ئاخڤتنێن سەرۆكێ هەرێما كوردستانێ بوو، سەرۆكێ هەرێمێ سەبارەت ڤێ چەندێ گوت» ئەوا نوكە ل سووریێ هەی دەلیڤەیە بۆ ژیانەكا باشتر بۆ خەلكێ وێ».
ل دۆر شێوازێ حوكمڕانییا وەلاتی و شێوازێ بڕێڤەبرنێ، سەرۆكێ هەرێمێ گوت» ب دیتنا مە نابیت سووریێ ب شێوەیەكێ ناڤەندی بهێتە بڕێڤەبرن».
نێچیرڤان بارزانی گوت ژی» مە داخواز ژ برایێن خوە كریە پشكدارییەكا كاراد پرۆسەیا سیاسییا سووریێ دا هەبیت».
نێچیرڤان بارزانی رۆلێ هێزین سووریا دیموكرات – هەسەدە ل شەڕێ دژی داعشێ بلند هەلسەنگاند و باس ل وێ چەندێ كر» هەسەدە ل شەڕێ دژی داعشێ گەلەك شەهید داینە».

سەرۆكێ حوكمەتا هەرێما كوردستانێ پیرۆزباهییا دەستبكاربوونێ ل بالیۆزنێن نوو یێ ئێكەتییا ئۆرۆپا و ئەلمانیا ل ئیراقێ كر. ل دو كۆمبوونێن جودا باس ل پێشڤەبرنا هەڤبەندیێن هەرێما كوردستانێ ل گەل وەلاتێن ئێكەتییا ئۆرۆپا كر.
دوهی چارشەمبی 8/10/2025، مەسرور بارزانی، سەرۆكێ حوكمەتا هەرێما كوردستانێ جودا پێشوازی ل كلێمێنس زێمتنەر، بالیۆزێ نوو یێ ئێكەتییا ئۆرۆپا و دانیێل كرێبەر، بالیۆزێ نوو یێ ئەلمانیا ل ئیراقێ كر.
مەسرور بارزانی ل كۆمبوونێ ل گەل كلێمێنس زێمتنەر پیرۆزباهی لێكر ب هەلكەفتا دەستبكاربوونا وی وەك بالیۆزێ نوو یێ ئێكەتییا ئۆرۆپا ل ئیراقێ.
هەروەسا ب گۆڕەی بەیاننامەیا حوكمەتا هەرێما كوردستانێ هەردو ئالییان دوپاتی ل گرنگییا پێشڤەبرنێ ب هەڤبەندیێن هەرێما كوردستانێ و وەلاتێن ئێكەتییا ئۆرۆپا كر.
د پشكەكا دی یا كۆمبوونێدا باس ل چارەسەرییا كێشەیێن هەرێما كوردستانێ و حوكمەتا فیدرال و دوماهی بەرهەڤیێن هەلبژارتنێن جڤاتا نوونەرێن ئیراقێ كر.
هەڤدەم سەرۆكێ حوكمەتا هەرێما كوردستانێ د دیدارەكێدا ل گەل دانیێل كرێبەر، بالیۆزێ نوو یێ ئەلمانیا ل ئیراقێ هیڤییا سەركەفتنێ بۆ خواست و پشتەڤانییا حوكمەتا هەرێما كوردستانێ بۆ دیاركر.
ب گۆڕەی بەیاننامەیا حوكمەتا هەرێمێ: بالیۆزێ ئەلمانیا خواستا وەلاتێ خوە بۆ زێدەتر پێشڤەبرنا هەڤبەندیێن هەردو ئالییان دوپاتكر.
بەردەوامییا پشتەڤانییا پێشمەرگەی، پرۆسەیا هەلبژارتنێن جڤاتا نوونەران ئیراقێ و رەوشا گشتییا ئیراقێ و دەڤەرێ، چەند تەوەرێن دی یێن دانوستاندنان بوون.

سەرۆكێ حوكمەتا هەرێما كوردستانێ سوپاسییا مامۆستایێن هەرێما كوردستانێ كر ودوپاتكر: پاشەڕۆژا وەلاتێ مە د دەستەكێ ئەمیندایە.
دوهی چارشەمبی 8/10/2025، مەسرور بارزانی، سەرۆكێ حوكمەتا هەرێما كوردستانێ، ل رێوڕەسمێ ڤەكرنا چار باخچەیان و 25 قوتابخانەیێن حكومی یێن نوو، د پەیڤەكێ دا راگەهاند: پیرۆزباهیێ ل قوتابیێن خوەشتڤی و مامۆستایێن ئەزیز دكەم، پیرۆزباهیێ لێ دكەم و دەستخوەشیێ لێ دكەم بۆ وەستیانا وان وبۆ بێهنفرەهییا وان و بۆ وێ خزمەتا كو دكەن بۆ نڤشێ داهاتیێ گەلێ مە. ب راستی ئەوا من ئەڤرۆ دیتی جهێ دلخوەشییەكا ئێكجار مەزن بوو كو قوتابخانەیەكا ب ڤی ئاستێ جوان و بلند هاتیە دروستكرن».
مەسرور بارزانی گوت ژی: جهێ دلخوەشیێ بوو كو من دیتی هەم قوتابی گەلەك د دلخوەشن و ئاستێ وان گەلەك یێ بلندە و ب وی رەوشتێ بلند، نوكە ئەز گەلەك یێ پشتڕاستم كو پاشەڕۆژا وەلاتێ مە د دەستەكێ ئەمیندایە. من ئومێدەكا مەزن ب وان قوتابیێن چاڤگەش هەیە، هیڤییەكا مەزن من پێ هەیە كو دشێن دەستكەفتێن گەلەك مەزنتر هەم بۆ خوە، هەم بۆ وەلاتێ خوە ب دەستڤەبینن».
دەقێ پەیڤا سەرۆكێ حوكمەتا هەرێما كوردستانێ..
بەرێزان گەلەك خوەشحالم كو ئەڤرۆ ل ڤێرێ بەرهەڤك بۆ ڤەكرنا ڤێ قوتابخانەیێ، ل گەل چەندین قوتابخانەیێن دی كو سەرجەمێ وان دبیتە 29 باخچەیێن ساڤایان و قوتابخانە ل سەرانسەری كوردستانێ، بەلێ ئەڤرۆ وەك نموونە مە ڤێرێ هەلبژارتییە كو بهێین سەرەدانا هەوە بكەین.
ل دەستپێكێ پیرۆزباهیێ ل قوتابیێن خوەشتڤی و مامۆستایێن ئەزیز دكەم، پیرۆزباهیێ لێ دكەم، دەستخوەشیێ لێ دكەم بۆ وەستییانا وان، بۆ بێهنفرەهییا وان و بۆ وێ خزمەتا دكەن بۆ نڤشێ داهاتیێ گەلێ مە. ب راستی ئەوا من ئەڤرۆ دیتی جهێ دلخوەشییەكا ئێكجار مەزن بوو كو قوتابخانەیەك ب ڤی ئاستێ جوان و بلند هاتیە دروستكرن.
د جهێ خوەدایە سوپاسییا كاك شوانی بكەم كو ئەرك كێشای د دروستكرنا ڤێ قوتابخانەیێدا. هیڤیدارم نموونەیێن وی گەلەك بن و هەڤالێن دی ژی، برادەرێن دی، سەرمایەدارێن دی، ئەوژی بشێن هەڤشێوەیێ ڤێ قوتابخانەیێ هاریكارییا وەزارەتا پەروەردەیێ بكەن بۆ وێ چەندێ قوتابخانەیێن هەڤشێوە ل سەرانسەری كوردستانێ بهێنە دروستكرن.
جهێ دلخوەشیێ بوو من دیتی هەم قوتابی گەلەك ددلخوەشن، هەم مامۆستا دلخوەشن و ئاستێ وان گەلەك یێ بلندە و ب وی رەوشەتێ بلند، نوكە ئەز گەلەك یێ پشتڕاستم كو پاشەڕۆژا وەلاتێ مە د دەستەكێ ئەمیندای. من هیڤییەكا مەزن ب وان قوتابیێن چاڤگەش هەیە كو دشێن دەستكەفتێن گەلەك مەزنتر هەم بۆ خوە، هەم بۆ وەلاتێ خوە بدەستڤەبینن.
جارەكادی سوپاسییا وەزارەتا پەروەردەیێ دكەم بۆ وی ئەركی ووەستیانا كێشای د بلندكرمنا ئاستێ خواندنێ و پەروەردەیێدا ل سەرانسەری كوردستانێ. مە پرسیار كر ئایا چەند قوتابخانە ل هەرێما كوردستانێ د ڤی ئاستیدا نە؟ دیارە هەژمارەكا قوتابخانەیێن مە پێدڤی ب نووژەنكرنێ نە و ئەم پێدڤی دروستكرنا قوتابخانەیێن نوو ژی نە، بەلێ دڤی دەمێ كورتدا مە شیایە ئاستێ قوتابخانەیان ب جۆرەكێ گەلەك باش بلند بكەین. نەك تنێ وەك ئاڤاهی و قوتابخانە، بەلكو سیستەمێ پەروەردەیێ و فێركرنێ ژی و خواندنێ ب جۆرێ دیجیتالكرن و ئی- پەروەردە، ڤێ چەندێ كاریگەرییەكا مەزن كریە و دێ بەردەوام بین ژی د پشتەڤانییا وەزارەتێ بۆ پێشئێخستنا كەرتێ خواندنێ و پەروەردەیێ.

دوهی سێشەمبی 7/10/2025، ل پیرمام سەرۆك مەسعود بارزانی پێشوازی ل سەید عەمار ئەلحەكیم، سەرۆكێ باسكێ حیكمە یێ نیشتمانی و شاندێ د گەلدا كر.
ب گۆڕەی بەیاننامەیەكا بارەگەهێ بارزانی» د دیدارەكێدا باس ل رەوشا سیاسی یا ئیراقێ و دەڤەرێ ب گشتی، هەروەسا ئاستەنگ و گرفتێن د ناڤا پرۆسەیا سیاسی یا ئیراقێ دا وهەڤبەندییا د ناڤبەرا ئالیێن سیاسی یێن ئیراقێ هاتە كرن».
بارەگەهێ بارزانی ئاماژە ب وێ چەندێ ژی كر» هەلبژارتنێن جڤاتا نوونەرێن ئیراقێ تەوەرێ دی یێ وێ دیدارێ بوو».

سەرۆكێ حوكمەتا هەرێما كوردستانێ پێشوازی ل بالیۆزێ ئیتالیا ل ئیراقێ كر و هەردو ئالییان دووماهی گوهۆڕینێن رەوشا گشتییا ئیراقێ و بەرهەڤیێن پرۆسەیا هەلبژارتنێن جڤاتا نوونەرێن ئیراقێ گەنگەشەكر.
حوكمەتا هەرێما كوردستانێ د بەیاننامەیەكێدا بەلاڤكر» ل رۆژا سێشەمبی 7/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل نیكۆلۆ فۆنتانا، بالیۆزێ ئیتالیا ل ئیراقێ كر.
د بەیاننامەیێدا هاتیە» د دیدارەكێدا، دوپاتی ل گرنگییا زێدەتر پێشڤەبرنا هەڤبەندیێن دوقۆلی د وارێن جۆراوجۆردا هاتە كرن، ب تایبەتی د هەردو كەرتێن چاندنێ و گەشتوگوزارێدا».
حوكمەتا هەرێما كوردستانێ دیاركر ژی» د پشكەكا دی یا دیدارێدا، دووماهی گوهۆڕینێن رەوشا گشتییا ئیراقێ و بەرهەڤیێن پرۆسەیا هەلبژارتنێن جڤاتا نوونەرێن ئیراقێ هاتە گەنگەشەكرن».

دوهی سێشەمبی 7/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل عەمار ئەلحەكیم، سەرۆكێ باسكێ رەوتێ حیكمە یێ نیشتمانی كر.
تەوەرێ سەرەكیێ كۆمبوونێ تایبەت بوو ب گرنگییا چارەسەركرنا كێشەیێن هەرێما كوردستانێ و حوكمەتا فیدرالی. سەبارەت ڤێ چەندێ ب گرنگیڤە ئاماژە ب رێككەفتنا سێقۆلییا ڤێ دوماهیێ و دەستپێكرنا هنارتنا پەترۆلا هەرێما كوردستانێ هاتە كرن و هەڤڕابوون ل سەر وێ چەندێ پێدڤییە ئەڤ رێككەفتنە، ببیتە دەستپێكەك بۆ رێككەفتنێ ل سەر دەركرنا قانوونا تایبەت ب پەترۆل و غازێ ڤە.
چاكسازیێن حوكمەتا هەرێما كوردستانێ د كەرتێن جۆرا و جۆردا، ب تایبەتی پڕۆژەیێ رۆناهی و دابینكرنا كارەبایا بەردەوام و كاراكرنا سیستەمێ بانكی و پڕۆژەیێ هەژمارا من، پشكەكا دی یا دانوستاندنان بوو. سەرۆكێ حوكمەتا هەرێما كوردستانێ بەرهەڤییا حوكمەتا هەرێمێ دیاركر بۆ وێ چەندێ د وارێ دابینكرنا كارەبایێ و مفا وەرگرتنێ ژ ئەزموونا سەركەفتییا پڕۆژەیێ رۆناهی و چاكسازیكرنێ د سیستەمێ بانكی و دیجیتالكرنا خزمەتگوزاریێن گشتی، هاریكارییا حوكمەتا فیدرالی بكەت.
هەروەسا دانوستاندن ل دۆر پرۆسەیا هەلبژارتنێن جڤاتا نوونەێن ئیراقێ هاتە كرن و هەردو ئالی هیڤیخواز بوون ببیتە دەستپێكەك بۆ قووناغەكێ نوو یا تێكگەهشتنێ و چاسەرەركرنا كێشەیان و پاراستنا مافێن گشتی یێن پێكهاتەیان.

سەرۆكێ حوكمەتا هەرێما كوردستانێ، د چارچۆڤەیێ ڤەكرنا پێشانگەها تەكنۆلۆژیا HITEX ل هەولێرێ راگەهاند: هەر سال دبینم كو پێشكەفتنا زێدەتر هەیە و خەلكەكێ شارەزا د ناڤ كوردستانێدا پەیدابوویە.
دوهی سێشەمبی 7/10/2025، مەسرور بارزانی، سەرۆكێ حوكمەتا هەرێما كوردستانێ، د چارچۆڤەیێ ڤەكرنا پێشانگەها تەكنۆلۆژیا HITEX ل هەولێرێ، بۆ دەزگەهێن راگەهاندنێ گوت» ئەڤە چەندین سالە پشكدار دبم، هەر سال دبینم و پێشكەفتنا زێدەتر هەیە و خەلكەكێ شارەزا دناڤ كوردستانێدا پەیدابوویە، گەنجێن مە ب خوە شیاینە هەم داهێنانێ بكەن و هەم د ڤێ پێشكەفتنا تەكنۆلۆژیایێ كو ل سەرانسەری جیهانێ هەیە، پشكداربن. جهێ دلخوەشیێیە و من هیڤییەكا مەزنە یا هەی كو دێ كوردستانێ پاشەڕۆژەكا گەش هەبیت».
سەرۆكێ حوكمەتا هەرێما كوردستانێ ئەوژی بەرچاڤكر» حوكمەت پشتەڤانە بۆ وێ چەندێ هاریكارییا هەموو وان بزنسمان و داهێنەران بكەت كو د بەرهەڤن كار بكەن، بێگومان دێ حوكمەت پشتەڤان بیت و دێ بەردەوام بین د ڤێ چەندێدا».
زێدەتر ژ 120 كۆمپانیێن ناڤخوە و بیانی تایبەت ب تەكنۆلۆژیایێڤە، پشكداریێ د پێشانگەها هایتێكسدا دكەن كو بۆ دەمێ سێ رۆژان دێ بەردەوام بیت.
كۆمپانیێن ناڤبری نووترین بەرهەمێن خوە د وارێ تەكنۆلۆژیایێ و ژێرییا دەستكرد نیشاددەن، هەروەسا 40 پسپۆر د وارێ تەكنۆلۆژیایێ دێ ل سەر ستەیچێ پێشانگەهێ ئاخڤن.
بۆ ئەڤسالە ژ سەرجەمێ 100 بزنسێن پێشكێشكری، 20 بزنس هاتینە هەلبژارتن و پشتەڤانییا دارایی لێ دهێتە كرن، بۆ جارا ئێكێیە ژی 37 كۆمپانیێن بیانی، 11 كۆمپانیێن ناڤخوەیا هەرێما كوردستانێ پشكداریێ د پێشانگەهێدا دكەن.

سەرۆكێ لیستا پارتی دیموكراتی كوردستان ل سلێمانیێ راگەهاند: سەركردەیێن پارتی هەردەم ل سەنگەرێ بەراهییێ یێ داكۆكیكرنێ ژ مافێن خەلكێ كوردستانێ ل بەغدایێ بوویە و رۆلێ وێ یێ كاریگەر بوویە، هەڤدەم دبێژیت: پێشبینیێ دكەین هەمبەركرن ل گەل هەلبژارتنێن بۆری، دەنگێن پارتی ل سلێمانیێ زێدە بكەن.
عەلی حسێن، ئەندامێ مەكتەبا سیاسی و بەرپرسێ رێكخستنا پارتی دیموكراتی كوردستان ل سلێمانیێ و هەلەبجە و سەرۆكێ لیستا پارتی ل سلێمانیێ گوت» مە دەست ب بانگەشەیا هەلبژارتنان كریە و پەیاما مە ئەوە، هەلبژارتنێن شارستانی بهێنە ئەنجامدان كو دەربڕینێ ژ پەیاما پارتی و سەرۆك بارزانی بكەت و رێز ل ئالیێن دی بگرن و بزاڤێ بكەن ژێنگەها گوند و باژێر و باژێركان بپارێزین و رێزێ ل پۆستەر و بەرنامەیێ ئالیێن سیاسی ژی بگرین بۆ وێ چەندێ ب شێوەیەكێ شارستانی و دیموكراسی پرۆسە بڕێڤەبچیت».
عەلی حسێن گوت ژی» ئەم پشت گەرمێن وێ خەبات و هەلوەستێ نەتەوەیی، نیشتمانی، خەلكێ مە دلسۆز، مالباتێن شەهیدان و پێشەرگەیێن مە یێن قەهرەمان، ب هەموو ئەوێن نیشتمانپەروەر».
ئاماژە كر ژی» پارتی د حوكمڕانیێ و خزمەتكرنا كوردستانێ ژ روویێ دیپلۆماسی ل سەر ئاستێ نێڤدولەتی و هەرێمایەتی رۆلەكێ سەركەفتی هەبوویە».
سەرۆكێ لیستا پارتی دیموكراتی كوردستان ل سلێمانیێ باس ل وێ چەندێ ژی كر» رۆلێ سەركردەیێن پارتی دیموركاتی كوردستان ل پێداگیریێ ل مافێن وەلاتیێن هەرێما كوردستانێ ل گەل بەغدایێ، یێ كاریگەر بوویە، هەڤدەم پارتی و سەرۆك بارزانی ل سەنگەرێ بەراهیێ یێ داكۆكیكرنێ بوون ژ مافێن خەلكێ كوردستانێ».
ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل سلێمانیێ و هەلەبجە ئەوژی بەرچاڤكر» سەرۆك بارزانی گەلەك گرنگیێ ب سنۆرێ هەلەبجە و گەرمیان و سلێمانیێ ددەت و مەسرور بارزانی، سەرۆكێ حوكمەتا هەرێما كوردستانێ ژی چەندین جاران سەرەدانا ڤێ دەڤەرێ كریە و دووڤچوون بۆ كارێن هەلەبجە كریە و بەرنامەیێ تایبەت بۆ ڤێ دەڤەرێ هەیە، ب شێوەیەكی ل بەرە خزمەتگوزاری ل ئاستێ قوربانیێن خەلكێ ڤێ دەڤەرێ بیت».
عەلی حسێن گوت ژی» ل هەلبژارتنێن پەرلەمانێ كوردستانێ هەژمارا دەنگێن پارتی ب رێژەیەكا بەرچاڤ ل ڤی سنۆرێ زێدەببوون و بۆ ڤان هەلبژارتنان ژی چاڤەڕێ دكەین زێدەتر ژی ببن، چونكە تنێ لایەنگرێن پارتی دەنگ ب پارتی نادەن، بەلكو گەلەك كەس یێن هەین باوەرییەكا مەزن ب حوكمڕانییا پارتی هەیە».
سەبارەت كۆمبوونێن پارتی دیموكراتی كوردستان و ئێكەتی نیشتمانی كوردستان، گوت» كۆمبوون د بەردەوامن و پێنگاڤێن باش یێن هاتینە هاڤێتن، ئەم هەموو بزاڤا وێ چەندێ دكەین كابینەیا نوو یا حوكمەتا هەرێما كوردستانێ ب زووترین دەم بكەڤیتە كاری و پێگەهەكێ ب هێز بۆ خوە هەم ل ناڤ كوردستانێ و هەم بەرانبەر بەغدایێ دروست بكەین».

ل سنۆرێ لقێ نەهێ پارتی دیموكراتی كوردستان، رێوڕەسمەك بۆ دانەنیاسینا بەربژارێن لیستا 275 یا پارتی دیموكراتی كوردستان هاتە رێكخستن، تێدا بەرپرسێ لقێ نەهێ پارتی دیموكراتی كوردستان گوت» ب پشتەڤانییا جەماوەرێ خوڕاگرێ ئاكرێ و بەردەرەش، دێ سەركەفتنەكا دی د ڤان هەلبژارتناندا بۆ پارتی تۆماركەین و دانینە ل گەل سەركەفتنێن دی».
مەردان خدر، بەرپرسێ لقێ نەهێ ئاكرێ یێ پارتی دیموكراتی كوردستان راگەهاند» پشتبەستن ب رێبازا پیرۆزا بارزانیێ نەمر و سیاسەتا حەكیمانەیا سەرۆك بارزانی و ب پشتەڤانییا نێچیرڤان بارزانی، سەرۆكێ هەرێما كوردستانێ و خۆڕاگرییا كابینەیا نەهێ یا حوكمەتا هەرێما كوردستانێ ب سەرۆكاتییا مەسرور بارزانی، ل ئاكرێ یا خۆڕاگر و ل سنۆرێ لقێ نەه، ل هەردو قەزایێن ئاكرێ و بەردەرەش ل بن درووشمێ هەڤپشكی، هەڤسەنگی و لهەڤهاتن، دەست ب هەوا بانگەشەیا لیستا 275 یا پارتی دیموكراتی كوردستان، لیستا شەهیدان، لیستا پێشمەرگە و سەرۆك و لێڤەگەرێ كوردستانێ سەرۆك بارزانی دكەین».
مەردان خدر گوت ژی» ڤێجارێ ژی ب پشتبەستن ب خەلكێ كوردسانێ و دلسۆز و كوردپەروەرێن هەردو قەزایێن ئاكرێ و بەردەرەشێ و ئەندام و لایەنگرێن پارتی، بەر ب هەلبژارتنێن خولا شەشێ یا جڤاتا نوونەرێن ئیراقێ دچین، ب پشتەڤانییا هەوە ڤێجارێ ژی دێ سەركەفتنەكا دی دانینە سەر سەركەفتنێن د دیرۆكێدا مە تۆماركرین. ئەڤجارە پشتڕاستین ژ وێ خزمەتا بەردەوام د وارێ سیاسی، كوردایەتی، خزمەتگوزاری، ئاڤەدانی، خۆڕاگرییا پارتی و نوونەرێن وێ ل حوكمەتێ و سەرۆكاتییا هەرێمێ و ل حوكمەتا ئیراقێ و جڤاتا نوونەرێن ئیراقێ هاتینە پیشكێشكرن، دێ سەركەفتنەكا دی تۆماركەین و پێگەهێ كوردان ل بەغدا ب هێزتر كەین، ژ بەر كو چەند پارتی ب هێز بیت و كورسیێن وێ زێدەتر بن، پێگەهێ كوردان دێ زێدەتر ب هێز بیت و دێ مە ژ دەستكەفتێن گەلێ كورد نێزیكتر كەت».
دیاركر ژی» ڤێجارێ ژی ب شێوەیەكێ ئارام و ل سەرخوە، بۆ هەلبژارتنێن خولا شەشێ یا جڤاتا نوونەرێن ئیراقێ دێ بانگەشەیێ كەین و دێ رێزێ ل هەموو بیر و بۆچوونان گرین، ئەڤە ژی ب پشتبەستن ب وێ خزمەتا 76 سالی یا پێشكێشی خەلكی دكەین، ب پشتبەستن ب خوونا شەهیدان و پێشمەرگە و ئەنفالكرییان، دەست ب بانگەشەیێ دكەین. مەزنییا پارتی د وێ چەندێ دایە رێزێ ل بۆچوونێن جودا دگریت و بانگەشەیەكا سەردەمیانە ئەنجام ددەت، لەوما داخوازێ ژ ئەندام و لایەنگرێن پارتی دكەم، بانگەشەیەكێ نەكەن یا دوور بیت ژ پرنسیپێن دیموكراسی و پرنسیپێن رێبازا پیرۆزا بارزانی. ل گەل وێ چەندێ نینین پەنا بۆ لادان و دڕاندنا درووشم و وێنەیێن بەربژارێن دی بهێتە برن، چونكە ئەو چەندە ل گەل سیاسەتا پارتی و رێبازا بارزانی ناگونجیت».