ئه‌ڤرۆ نيوز:
ئه‌ندامه‌كێ لژنا پيشه‌سازى و وزێ و ژێده‌رێن سروشتى ل په‌رله‌مانێ كوردستانێ راگه‌هاند كو حوكمه‌تا هه‌رێما كوردستانێ ناخوازيت بهايێ پانزينێ ئه‌رزان ببيت.
فايق مسته‌فا ئه‌ندامێ لژنا پيشه‌سازى و وزێ و ژێده‌رێن سروشتى ل په‌رله‌مانێ كوردستانێ د داخويانيه‌كا رۆژنامه‌ڤانى دا دياركر كو ئه‌و به‌رده‌وام بزاڤان دكه‌ن بۆ كێمكرنا بهايێ پانزينێ به‌لێ حوكمه‌تا هه‌رێما كوردستانێ ناخوازيت بهايێ پانزينێ ئه‌رزان ببيت.
ئه‌ڤرۆ نيوز:
برياره رۆژا ئه‌ينى، گه‌را چوارێ يا هێزێن پێشمه‌رگه‌ى ژ هه‌ولێرێ به‌ره‌ڤ كوبانێ، رۆژئاڤا كوردستانێ بچن، ب مه‌ره‌ما ڤه‌گه‌ريانا وان پێشمه‌رگێن ل گه‌را سيێ چووينه كوبانێ.
ژێده‌ره‌ك ژ وه‌زاره‌تا پێشمه‌رگه‌ى بۆ باسنيوز دياركريه برياره رۆژا ئه‌ينى گه‌را چارێ يا هێزێن پێشمه‌رگه‌ى بچنه شوونا وان پێشمه‌رگێن نوكه ل كوبانێ، رۆژئاڤا كوردستانێ كو ماوێ زێده‌تر ژ هه‌يڤه‌كێ يه ل وێرێ.
ئه‌و پێشمه‌رگێن دێ چنه كوبانێ، ژ 150 پێشمه‌رگان پێكدهێن و سه‌ر ب هێزا پشته‌ڤانيا ئێك و دو يا سه‌ر ب وه‌زاره‌تا پێشمه‌رگه‌ينه.
ئه‌ڤرۆ نیوز:
ل دووڤ راپرسیه‌كا په‌یمانگه‌ها پێوى یا ئه‌مریكى بۆ ڤه‌كولینان، 47% ژ ئه‌مریكیان پشته‌ڤانیا پشكداریا هێزێن وه‌لاتێ خوه دكه‌ن ل شه‌رێ دژى داعش و 49% دژى هنارتنا هێزێن پیاده نه.
ل دووڤ وێ راپرسیێ كو د ناڤبه‌را 18 بۆ 22 ڤێ هه‌یڤێ دا هاتیه كرن و هزار و 504 كه‌سان پشكدارى تێدا كریه 70% ژ كوماریان و 58% ژ دیموكراتان پشته‌ڤانیا په‌نابرن به‌ر شه‌رى دكه‌ن بۆ روى ب روى بوونا داعش.
ئه‌ڤرۆ نیوز، ره‌وان نهێلى
ئه‌ڤرۆ لایه‌نێن سیاسى ل پارێزگه‌ها هه‌له‌بجه، كو ژ 10 لایه‌نێن سیاسى پێكهاتینه، پشتى سێ ده‌مژمێرێن كومبوونێ بۆ دابه‌شكرنا پوستێن پارێزگه‌ها هه‌له‌بجه رێككنه‌كه‌ڤتن.
حه‌سه‌ن شێخ عه‌بدولا به‌رپرسێ مه‌لبه‌ندێ هه‌له‌بجه یێ یه‌كگرتووى ئیسلامى كوردستان راگه‌هاند كو وان ل سه‌ر دو ته‌وه‌ران ئاخفتى یه، ئه‌وژى دانانا جڤاتا پارێزگه‌هێ و رێككه‌فتنێن ئیدارى و گۆت: نه‌گه‌هشتنه رێككه‌فتنێ و كومبوون ب ڤه‌كرى ما و چاڤه‌رێى لژنا بلندا دانوستاندنان یا لایه‌نێن سیاسى دكه‌ین بۆ وێ یه‌كێ بكارن د چه‌ند رۆژێن بهێت دا، پۆستێن ئیدارى و رێڤه‌به‌رێن گشتى یێن هه‌له‌بجه ئێكلا بكه‌ن.
فازل به‌شاره‌تى به‌رپرسێ لقا 12 یا پارتى ل هه‌له‌بجه بۆ ئه‌ڤرۆ نیوز دیاركر كو لایه‌نێن دى سیاسى ته‌كه‌زیێ ل پوستێ قایمقامیا هه‌له‌بجه دكه‌ن، د هه‌مبه‌ر دا ئه‌م د رازى بوون ده‌ستبه‌ردارى وى پۆستى بن، به‌رامبه‌ر پۆستێ جڤاتا پارێزگه‌ها هه‌له‌بجه، لێ لایه‌نێن سیاسى ته‌له‌فونا یێن ل سه‌ر خوه‌دا كرن و هه‌ر رازى نه‌بوون.
ئه‌ڤرۆ نيوز، نيوار محه‌مه‌د سه‌ليم:
شانده‌كێ په‌رله‌مانێ كوردستانێ ب سه‌رۆكاتيا جێگرێ سه‌رۆكێ په‌رله‌مانى، جه‌عفه‌ر ئيبراهيم سه‌ره‌دانا ده‌ڤه‌را شنگال كر و بڕياره دو رۆژان ل وێرێ بمينن.
ئامينا زكرى بڕيارده‌را فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز گۆت: “شانده‌كێ په‌رله‌مانێ كوردستانێ كو ژ هه‌شت لژنێن به‌رده‌وامێن ناڤا په‌رله‌مانێ كوردستانێ پێك دهێت دێ بۆ ماوێ دو رۆژان ل ڤان ده‌ڤه‌رێن نوو ژ ده‌ستێ داعش ده‌رخستين ل ده‌ڤه‌را بادينان كه‌ت”.
زێده‌تر گۆت: “ئه‌ڤرۆ ل نێزيك سكرێ مووسل ل گه‌ل رێڤه‌به‌رێ ناحيا وانكێ و زۆمار و هنده‌ك ئه‌ندامێن جڤاتا پارێزگه‌ها مووسل و جڤاتێن باژێرڤانيێ و بنگه‌هێن ساخله‌ميێ كۆمبووين و ژ نێزيك ئاگه‌هدارى ره‌وشا وان بووين”.
ئامينا خانێ دا زانين ژى كو سوبه‌هى ئه‌و دێ چنه سنونێ و ل وێرێ ژى ل گه‌ل ده‌زگه‌هێن حكومى يێن وێ ده‌ڤه‌رێ كۆم بن و پاشان سه‌ره‌دانا چيايێ شنگال كه‌ن و ژ نێزيك هايدارى ره‌وشا ئاوارێن سه‌رێ چياێ شنگال بن و پاشان ژى سلاڤه‌كێ ل پێشمه‌رگێ قاره‌مانێن يێ چه‌ندين داستان ب خوينا خوه تۆماركرين كه‌ن و گۆت: “هه‌كه ده‌ليڤه كه‌فتێ دێ هێزێن شه‌رڤانان ژى ب سه‌ر كه‌ين”.
ده‌رباره‌يى مه‌ره‌ما سه‌ره‌دانا شاندێ په‌رله‌مانێ ژى بڕيارده‌را فراكسيۆنا زه‌ر ل په‌رله‌مانێ كوردستانێ گۆت: “هه‌ر لژنه‌كا ئاماده‌بوويى دێ راپۆته‌كێ ل سه‌ر سه‌ره‌دانا خوه ده‌ته سه‌رۆكاتيا په‌رله‌مانى دا كو ژ نێزيك بشێن هاريكارا وێ ده‌ڤه‌رێ بكه‌ن ب تايبه‌ت ژ لايێ خزمه‌تگۆزارى ڤه”.
گۆتژى: “ئه‌ندامه‌كا په‌رله‌مانێ كوردستانێ ل سه‌ر فراكسيۆنا پارتى ل هه‌ڤكاريا ده‌زگه‌هێ خێرخوازى يێ بارزانى چه‌ندين هاريكاريێن پێدڤى بۆ ئاوارێن سه‌رێ چيايێ شنگال به‌رهه‌ڤكرينه دێ گه‌هيننه وان ئاواران”.
ئه‌ڤرۆ نيوز:
ل حه‌فتيا بۆرى سه‌رۆكێ هه‌رێما كوردستانێ قانوونا ئيدارا پارێزگه‌ها هه‌له‌بچه په‌سه‌ند كر و ب نڤيسارا هژمار 104 قانوون ره‌وانه‌يى جڤاتا وه‌زيران كر.
لۆقمان عه‌بدولقادر، سه‌رۆكێ كۆمه‌لا قوربانيێن كێمابارانا هه‌له‌بچه د داخۆيانيه‌كێ دا بۆ ئاژانسا ئه‌نادۆل راگه‌هاند: “ژێده‌ره‌كێ ئاگه‌هدار ژ سه‌رۆكاتيا هه‌رێمێ راگه‌هاند كو مه‌سعود بارزانى سه‌رۆكێ هه‌رێما كوردستانێ رۆژا سێشه‌مبيا بۆرى 17ى شياتا 2015ێ قانوونا ئيدارا پارێزگه‌ها هه‌له‌بچه په‌سه‌ند كر و ب نڤيسارا ژماره 104 ره‌وانه‌يى جڤاتا وه‌زيران كريه”.
رۆژا 5ى شياتا 2015 په‌رله‌مانێ كوردستانێ د روونشتنه‌كا نه‌ئاسايى دا ل مۆنۆمێنتێ هه‌له‌بچه پرۆژێ قانوونا ئيدارا هه‌له‌بچه ب پرانيا ده‌نگان په‌سه‌ند كر و پاشان ژى ئاراسته‌يى سه‌رۆكاتيا په‌رله‌مانێ كوردستانێ كر، دا ژ لايێ سه‌رۆكێ هه‌رێمێ ڤه بهێته په‌سه‌ندكرن.
ئه‌ڤرۆ نيوز:
ژ بوو ئێكلاكرنا پۆستێن پارێزگه‌ها هه‌له‌بچه و زوو ده‌ست ب كار بوونا كارێن وێ پارێزگه‌هێ، ئه‌ڤرۆ ده‌مژمێر 11:00 لايه‌نێن سياسى يێن هه‌له‌بچه ل مۆنۆمێنتێ شه‌هيدێن هه‌له‌بچه ده‌سپێكر.
بڕياره ئه‌ڤ كۆمبوونه بۆ ئێكلاكرنا پۆستێن پارێزگه‌هێ بيت دا كو ب ده‌مه‌كێ زوو پۆستێن وێ پارێزگه‌هێ بهێنه ئێكلاكرن ب تايبه‌ت خه‌لكێ وێ پارێزگه‌هێ دخوازيت ده‌ستبكاربوونا پارێزگه‌هێ و جڤاتێ ل گه‌ل سالرۆژا كيميا بارانكرنا هه‌له‌بچه بيت.
هه‌تا نوكه پارتى ل سه‌ر ئه‌و پارڤه‌كرنا پۆستێن هه‌ر ئێك ژ بزاڤا گۆڕان و ئێكه‌تى نشتيمانى كوردستان ل سه‌ر رێكه‌فتين يا رازى نينه، ژ به‌ر هندێ ژى دهێته پێشبينيكرن كو ئه‌ڤ كۆمبوونه ب ده‌مه‌كێ زوو ئێكلا نه‌بيت.
پێشتر به‌رپرسێ لقێ 12 يێ پارتى ديموكراتى كوردستان بۆ ئه‌ڤرۆ نيوز گۆتبوو پۆستێ قايمقامێ هه‌له‌بچه ب مافه‌كێ خوه يێ ره‌وا دزانين و گۆت: “هه‌كه مافێن مه بهێنه بنپێكرن، دێ بينه ئۆپۆزسيۆن”.
ئه‌ڤرۆ نيوز، نيوار محه‌مه‌د سه‌ليم:
ليوا هاشم سيته‌يى، فه‌رماندێ ليوا هه‌شت يا پێشمه‌رگێ كوردستانێ، د ديداره‌كێ دا بۆ ئه‌ڤرۆ نيوز به‌حس ل نووترين پێزانينێن ل سه‌ر رزگاركرنا شنگال دكه‌ت و ئه‌گه‌رێن گيرۆبوونا وێ ژى به‌رچاڤ دكه‌ت و دده‌ته زانين كو نوكه مژوولى نه‌خشێ رزگاركرنا شنگال و كۆمه‌لگه‌هـ و گۆندێن ماين يێن وێ ده‌ڤه‌رێ نه.
ليوا هاشم سيته‌يى گۆت: “ب ره‌نگه‌كێ رۆژانه هێرشێن ب هێز دكه‌نه سه‌ر پێشمه‌رگێ كوردستانێ، ژ به‌ر كو ئه‌و جهێن پێشمه‌رگه‌يى ل شنگال وه‌رگرتين جهێن ستراتيژى نه و كۆنترۆلێ ل سه‌ر هه‌موو شنگال دكه‌ت، به‌لێ هێرشێن وان هه‌موو ب شكه‌ستن ب دووماهى دهێن هه‌ر ژ به‌ر پلانا باشا پێشمه‌رگه‌يى و هێزا وان و هه‌ر ژى ژ به‌ر هه‌ڤكاريا هێزێن هه‌ڤپه‌يمانان”.
دا زاينن ژى كو نوكه 30% ژ شنگال يا هاتيه ستاندن و هه‌موو ئه‌و جهن يێن كونترۆلا شنگال دكه‌ن، ئانكو جهێن ستراتيژى نه.
ئه‌ڤى فه‌رماندێ پێشمه‌رگه‌يى ئاماژه ب وێ چه‌ندێ كر كو هێرشا سه‌ر شنگال نه‌هاتيه راوه‌ستاندن، به‌لێ هنده‌ك تشت يێن هه‌ين گرێدايى پلانێن له‌شكريه، دبيت شنگال يا ب جهه‌كێ دى يێ له‌شكرى ڤه گرێدايه و گۆت: “هه‌كه نوكه شنگال ژ ده‌ستێ داعش بينينه ده‌ر ژى دبيت وه‌كو شه‌ر مفايى ژێ نه‌بينين و زيان پتر بگه‌هيته مه”.
گۆتژى: “راسته هنده‌ك لايه‌ن موزايه‌دێن سياسى دكه‌ن كو رزگاركرنا شنگال يا ب ساناهى يه، به‌لێ د راستى دا پلانه‌كا دارێتى بۆ دڤێت و ب تايبه‌ت سه‌رۆك بارزانى سه‌رپه‌رشتيا ڤى كارى دكه‌ت ب پلانێن گه‌له‌ك باش به‌رنامه بۆ شنگال دهێته دارێتن”.
ليوا هاشم سيته‌يى نه‌ڤه‌شارت كو رزگاركرنا شنگال دبيت يا ب 9 كۆمه‌لگه‌هـ و چه‌ندين گۆندێن ل گه‌ل ڤه گرێدايه و دڤێت ل گه‌ل شنگال بهێنه رزگاركرن دا كو بشێن به‌ره‌ڤانيێ ژێ بكه‌ن.
ل دۆر وێ چه‌ندێ كو په‌كه‌كه دبێژيت رزگاركرنا شنگال يا ب ساناهى يه، فه‌رماندێ ليوا هه‌شت گۆت: “په‌كه‌كه موازيدان دكه‌ت ب گۆره‌يى ئه‌و جهێ ئه‌و لێ و دبێژيت د ئاماده‌نه، شنگال جهێ وان نينه، شنگال جهه‌كێ كوردستانى يێ گرێدايى هه‌رێمێ يه و نوكه سه‌ر ب عيراقێ يه، نوكه ده‌مێ رزگاركرنا وێ نه‌هاتيه، هه‌ر ده‌مێ هات دێ ب كۆمه‌لگه‌هێن خوه ڤه هێته رزگاركرن”.
ده‌رباره‌يى كا دێ ژڤانێ رزگاركرنا شنگال ل به‌رى نه‌ورۆزێ بيت، ئه‌ڤى فه‌رماندێ پێشمه‌رگێ كوردستانێ خۆيا كر كو به‌رى نه‌ورۆزێ يان پشتى نه‌ورۆزێ بيت، هه‌ر ده‌ما ژڤان هاته ده‌ستنيشانكرن دێ ده‌ست ب رزگاركرنا وێ هێته كرن و گۆت: “نوكه پلان يا دهێته دارێتن و نه‌خشێ رزگاركرنا ده‌ڤه‌رێ يێ دهێته كێشان، به‌رپرساتيا مه نه وه‌كو يا وانه 99% يا ل سه‌ر ملێ پێشمه‌رگه‌يى و دڤێت به‌پرسانه سه‌ره‌ده‌ريێ ل گه‌ل كێشێ بكه‌ين، نوكه شنگال رزگار بكه‌ين ژى دڤێت ئه‌ڤان تيرۆرستێن داعش وه‌سان ژ وان دوور بكه‌ين مه‌ترسيا وان ل سه‌ر خه‌لكێ ده‌ڤه‌رێ نه‌هێلين دا بشێن بژين”.
ئه‌ڤرۆ نيوز:
د ده‌مه‌كى دا كو قه‌يرانا دارايى يا هه‌يى، به‌لێ پێدانا په‌رزێن بچووك يێن لاوان د به‌رده‌وامن و بڕياره ژ 15 مليۆنان ژى ببيته 30 مليۆن دينار.
ئارام ئه‌نوه‌ر، رێڤه‌به‌رێ سندوقا پشته‌ڤانيا پرۆژێن بچووكێن لاوان ل وه‌زاره‌تا كار و كاروبارێن جڤاكى ل هه‌رێما كوردستانێ بۆ باس گۆت: “قه‌رزێن بچووك به‌رده‌وامى يا هه‌يى و ڤه‌گه‌راندنا وى قستى ژى به‌رده‌وامى يا هه‌يى، سندوقێ ژى پاره‌كێ باش يێ تێدا”.
ئاماژه ب وێ چه‌ندێ دكه‌ت كو ئه‌و ل سه‌ر 75% ژ داخوازيێن گه‌نجان رازى دبن و ژ مليۆنه‌كێ هه‌تا 15 مليۆنان پێ دده‌ن.
نه‌ڤه‌شارت ژى كو ل هه‌ولێر 50 هه‌تا 60 داخوازيان بۆ چووينه و ل سلێمانيێ ژى رێژه‌كا باش بۆ چوويه و هه‌تا 400 قه‌را داينه لاوان و ئه‌و كه‌س شياينه ژ 10 هه‌تا 12 مليۆن ديناران مفادار بن.
پرۆژێ قه‌رێ لاوان ل 2011 ده‌سپێكريه و هه‌تا سالا 2014 زێده‌ترى حه‌فت هزار كه‌سان مفادار بووينه و پرۆژێن بازرگانى و پێشه‌سازى و چاندن و گه‌شتيارى ب خوه ڤه دگريت.
ئارام ئه‌نوه‌ر گۆتژى: “ب رێيا راستڤه‌كرنا قانوونێ ئه‌م دشێين ڤى قه‌رى ژ 15 مليۆنان بۆ 30 مليۆنان زێده بكه‌ن ب تايبه‌ت بۆ سێكته‌رێن پێشه‌شازى و چاندن و گه‌شتوگۆزارى”.
ئەڤرۆ:
رۆژناما ئەڤرۆ پیلانەکا چار لایەنێن ھەرێما کوردستانێ دژی پارتی دیموکراتی کوردستان ئاشکرا دکەت، کو بەری بچنە کۆمبوونا ل گەل نێچیرڤان بارزانی، چار لایەن ل سلێمانیێ دژی پارتی کۆمبووینە و پەرلەمانتارەکا ئێکەتیێ ژی دبێژیت، مە رەخنە ل سیاسەتا ئابووریا پارتی یێن ھەین و ئێکەتی و گۆڕان و ئێکگرتوو و کۆمەل ئەڤ بۆچوونە یا ھەی و ئاخڤتن ل سەر ھاتیەکرن.
رەنگین عەبدولا، پەرلەمانتارا ئێکەتی نیشتیمانی کوردستان ل بەغدا بۆ ئەڤرۆ گۆت” ئەو رۆژا نێچیرڤان بارزانی دا ل گەل نوونەرێن کورد ل بەغدا کۆمبیت، ئێکەتی و گۆڕان و ئێکگرتوو و کۆمەلا ئیسلامی ب شەڤ ل سلێمانیێ دژی پارتی کومبووین، کومبوون ب نھێنی و بێی پارتی ھاتە گرێدان، ژ بەر کو سیاسەتا ڤان چار لایەنان لێک نێزیکبوویە ل دۆر رەوشا ئابووریا ھەرێما کوردستانێ، ب تایبەتی دژی سیاسەتا وەزارەتا سامانێن سرۆشتی، چونکە ئەڤ چار لایەنە، پارتی ب بەرپرس دزانن ژ رێڤەبەرنا سیاسەتا پەترۆلێ و پارتی چاوا دخوازیت وەسا ب رێڤەبەت”.
رەنگینێ گوت ژی” من پشکداری د کومبوونێ دا نەکر، بەلێ تێدا تەکەزی ل سەر ئێکخستنا بۆچوونا ھەرچار لایەنان ھاتەکرن و پارتی ھاتە تۆمەتبارکرن، کو ئەگەرێ نەھنارتنا وێ رێژا پترۆلێ بوویە کو رێککەفتن ل گەل بەغدا ل سەر ھاتیە کرن”.
خۆیاکر ژی” رێککەفتنا ھەولێرێ و بەغدا یا زەلال نینە بۆ خەلکێ کوردستانێ و لایەنێن سیاسی، ئەز ئاشتی ھەورامی تۆمەتبار ناکەم، بەلکۆ سیاسەتا وەزارەتا سامانێن سرۆشتی یا باش نینە و مە وەک ئێکەتی رەخنە ل سیاسەتا ئابووریا پارتی یا ھەی، سیاسەتا ئابووریا ھەرێما کوردستانێ یا د دەستێ پارتی دا و ددەمێ قەیراناندا پتر ئەو بەرپرس دبیت و پشکا شێری بەر پارتی دکەڤیت، ژبەرکو دڤێ خۆلا پەرلەمانی و حوکمەتێ دا پتریا کۆرسیان بەر پارتی کەفتینە و دڤێت خوە پتر بەرپرس بزانیت ل دەمێ پەیدابوونا ئاریشان”.
نيشاندان