ئه‌ڤرۆ:
جیگرێ سەرۆک وەزیرێن تورکیا راگەھاند کو ل دووڤ لھەڤکرنا ب ئالیێ کوردی را دڤێت ھەتا نەورۆزا ئەڤسالە سەرکردەیێن PKK ب رەنگەکی فەرمی بریارا ڤەکێشانا گەریلایێن خوە ژ ئاخا تورکیا رابگەھینین و ئاشکرا بکەن کو ھەموو بزاڤێن خوە یێن چەکداری ل سەر ئاخا تورکیا بدەنە راگرتن و ل ھەمبەر ڤێ یەکێ قەندیلێ ژی راگەھاند کو وان ھەتا نھا بریارەکا وەسا نەداینە و دڤێت د دەستپێکێ دا حوکمەت بۆ چارەکرنا پرسا کوردی پێنگاڤێن بەرچاڤ ب ئاڤێژیت.
پشتی کو سەرۆک کۆمارێ تورکیا راگەھاند کو ئەو چاڤەرێ دکەن د ناڤا چەند رۆژێن بھێت دا PKK ب فەرمی ڤەکێشانا ھێزێن خوە ژ ئاخا تورکیا راگەھینیت، یالچین ئاکدۆگان جێگرێ سەرۆک وەزیرێن تورکیا د داخۆیانیەکی دا راگەھاند کو ھەڤدیتنێن وان یێن ل گەل شاندێ کوردی ئەرێنی بووینە و گۆت: (ئەم دخوازین پارتا کارکەرێن کوردستانێ ل دووڤ مەرجێن قۆناغا ئاشتیێ پێنگاڤان ب ئاڤێژیت و گەریلایێن خوە ژ ئاخا تورکیا ڤەکێشینیت و پاشی ژی ب رەنگەکی فەرمی ھەموو کار و بزاڤێن خوە یێن چەکداری ل تورکیا راوەستینیت و چو کەسێ چەکدار د ناڤ باژێر و ئاخا تورکیا دا نەھێلیت).
یالچین ئاکدۆگان ھەروەسا دیار ژی کر کو وان د ھەڤدیتنێن ڤێ دووماھیێ دا ل گەل عەبدوللا ئۆجەلان و شاندێ دانوستاندنێ یا پارتا دیمۆکراسیا گەلان ل ھەڤکرینە کو ھەتا نەورۆزا ئەڤسالە ئیمرالی و قەندیل ب رەنگەکی فەرمی ڤەکێشین و راوەستاندنا ھەموو کارێن چەکداری ل تورکیا رابگەھینن و گۆت: (ئەم وەک حوکمەت گرنگیەکا مەزن ددەینە قۆناغا ئاشتیێ و بۆ سەرکەڤتنا وێ ئەم دێ ھەموو فیداکاریەکێ ژی بکەین و دڤێت قەندیل ژی سۆزێن کو دایە بجە بینیت. ئەز باوەر دکەم ھەتا دووماھیا ڤێ سالێ ئەم دێ مزگینیا ئاشتیەکا ھەتا ھەتایی بدەینە ھەمو گەلێ تورکیا و پێکڤە وەلاتێ خوە گەشتر بکەین).
ھەر د ڤێ دەربارێ دا ئدریس بالوکەن ئەندامێ شاندێ دانوستاندنان یێ ل گەل حوکمەتا تورکیا و ئەندامێ پەرلەمانێ تورکیا د داخۆیانیەکی تایبەت دا بۆ رۆژناما ئەڤرۆ راگەھاند کو ھەڤدیتنێن وان یێن ل گەل حوکمەتا تورکیا باش پێشە دچن و ھەڤدیتنێن ل گەل سەرکردەیێن PKK ل قەندیلێ ژی مفادار دەرباز بوون و گۆت: (سەرکردەیێن PKK رەخنە ل حوکمەتا تورکیا کرن ژ بەر کو حوکمەت سۆزێن خوە بجە ناکەت، ب سستی نێزیکی قۆناغا ئاشتیێ دبیت، بەردەوامیێ ددەتە گرتنا چالاکڤان و سیاسەتمەدارێن کورد و بزاڤا دەرخستنا یاسایێن ل دژی دیمۆکراسیێ و مافێ مرۆڤان ددەت ئەڤ ژی وەسا دکەت کو قۆناغا ئاشتیێ بکەڤیتە مەترسیێ).
ئەندامێ شاندێ دانوستاندنان ھەروەسا دیار ژی کر ھەتا نھا بریارا دەست بەردانا ژ چەکی یان ڤەکێشین ژ ئالیێ قەندیلێ ڤە نەھاتیە دایین و چاڤەرێ نە کو تورکیا ب رەنگەکی فەرمی دانوستاندنان دەستپێ بکەت و گرتیێن سیاسی و یێن نەساخ سەربەست بەردەت و گۆت: (گەلەک خال ھەنە کو سەرکردایەتیا PKK ژێ نە رازینە و د دەستپێکێ دا ژی قانوونا ھەلبژارتنان و بەندێ ١٠% و دەستپێ نەکرنا دانوستاندنان ب رەنگەکی فەرمی و سەرەدەریا حوکمەتێ ل گەل پرسا گەلێ کورد).
ل ئالیێ دی جەنگیز چاندار رۆژنامەڤان و نڤیسەرێ ناسکری یێ تورکیا ژی راگەھاند کو ھەتا عەبدوللا ئۆجەلان ب دەنگ و رەنگێ خوە بەحسێ قۆناغا ئاشتیێ و ل ھەڤکرنێ نەکەت قۆناغا ئاشتیێ سەرناکەڤیت و گۆت: (ئەڤ ١٦ سالن عەبدوللا ئۆجەلان د زیندانا ئیمرالی دایە و بەلکو چو کەسەکی باوەر نەدکر ئۆجەلان ل زیندانێ ببیتە ھێڤیا ئاشتیێ و راستیەک ژی ھەیە کو نە دەولەت و حوکمەتا تورکیا و نە ژی سەرکردەیێن PKK ل قەندیلێ بێی ئۆجەلانی نەشێن ل سەر چو خالەکی لھەڤ بکەن و بۆ ڤێ چەندێ رۆلێ ئۆجەلانی بۆ سەرکەڤتنا قۆناغا ئاشتیێ گەلەک گرنگە، د ھەمان دەمی دا ژ ئالیێ حوکمەتێ ڤە ژی کەسێ بریاردەر د قۆناغێ دا سەرۆک کۆمار رەجەب تەیب ئەردۆگانە و وەسا خوەیا دکەت کو ھەردو ئالی بۆ سەرکەڤتنا قۆناغا ئاشتیێ نێزیکی ھەڤدونە لێ ھەتا ئۆجەلان راستەوخوە ژ بۆ سەرکردە و ئەندامێن PKK بەحسێ چاوانیا ل ھەڤکرنا ل گەل حوکمەتێ نەکەت ئەز باوەر ناکەم ڤەکێشینا گەریلا ژ ئاخا تورکیا پێک بھێت و ھەتا قەندیل گەرەنتیان وەرنەگریت بزاڤێن خوە یێن چەکداری راناوەستینیت ب تایبەت د رەوشا نھا یا کو عیراق، سووریێ و رۆژھەلاتا ناڤین تێدا دەرباز دبن).
د دووماھیا ئاخڤتنا خوە دا ژی جەنگیز چاندار دیار کر کو ل دووڤ ھزرا من بێی ئاڤاکرنا ھەرێمەکا خوەسەر قەندیل رازی نابیت کو بزاڤێن چەکداری راوەستینیت و وەسا خوەیا دکەت کو حوکمەت د ڤێ دەربارێ دا سۆز دایە ئیمرالی و قەندیل ژی دخوازیت ڤێ یەکێ ب کریاری ببینیت.