ئه‌ڤرۆ نیوز:
سه‌رۆك بارزانى ئه‌ڤرۆ ل سه‌لاحه‌دین پێشوازیا ئوسامه‌ نوجێفى جێگرێ سه‌رۆك كومارێ عیراقا فیدرال كر، د هه‌ڤدیتنه‌كێ دا دووماهى پێشهاتێن سیاسى و ئێمناهى یێن عیراقێ به‌حس كرن و دیسا به‌حسێ به‌رهنگاربوونا تیرورستێن داعش كرن.
هه‌ر دكومبوونێ دا، جێگرێ سه‌رۆك كومارێ عیراقێ ده‌ستخوه‌شى ل هێزا پێشمه‌رگێ كوردستانێ و وان سه‌ركه‌فتنێن مه‌زن كر كو ل شه‌رێ تیرورستان دا بده‌ستڤه‌ئینان و پشته‌ڤانیا خوه‌ژى بۆ گه‌لێ كوردستانێ و هێزا پێشمه‌رگه‌ى دووپاتكر.

ئه‌ڤرۆ نيوز:

سۆپاسالارێ له‌شكرێ كوردستانێ د داخۆيانيه‌كێ دا بۆ ئه‌ڤرۆ نيوز به‌حس ل ره‌وشا ئه‌ڤرۆ يا ناڤا باژێرێ شنگال دكه‌ت.

فه‌ريق جه‌مال ئێمينكى، سۆپاسالارێ له‌شكرێ كوردستانێ، ده‌رباره‌يى ره‌وشا ئه‌ڤرۆ يا شنگال گۆت: “ژ شڤێدى وه‌ره‌ چو هێرش نه‌بووينه‌، نه‌ پێشمه‌رگه‌يى كرينه‌ سه‌ر داعش و نه‌ژى داعش كرينه‌ سه‌ر پێشمه‌رگه‌يى”.

زێده‌تر گۆت: “ب تنێ شه‌رێ قه‌ناسان يێ به‌ره‌ده‌وامه‌ و ماوه‌ بۆ ماوه‌يى، هنده‌ك ده‌نگێن گۆلێن قه‌ناسى دهێنه‌ گوهلێبوون”.

ده‌رباره‌يى پرسا وێ چه‌ندێ كا هه‌تا نوكه‌ چه‌ند ژ شنگال هاتيه‌ رزگار كرن، سۆپاسالارێ له‌شكرێ كوردستانێ، گۆت: “هه‌ر تاخێن به‌رى نوكه‌ نه‌ و چو تشتێ نوو نينه‌”، گۆتژى: “هه‌ر كه‌سێ رێژه‌كا سه‌دى ببێژيت يێ خه‌له‌ته‌ و راست نابێژيت، به‌لێ ناڤا باژێرێ شنگال ئێك ل سه‌ر سێ نه‌هاتيه‌ رزگار كرن”.

ئه‌ڤرۆ نيوز:

ئه‌ندامه‌كێ مه‌كته‌با سياسى يا حزبا ديموكراتى كوردستان، به‌حس ل ئێكگرتنا حزبا وان ل گه‌ل حزبا ديموكراتى كوردستانا ئيرانێ دكه‌ت و رادگه‌هينيت كو هه‌ردو لا يێ دان و ستاندنێ دكه‌ن دا كو حزبێن وان ببنه‌ ئێك.

قادر وريا ئه‌ندامێ مه‌كته‌با سياسى يا حزبا ديموكراتى كوردستان ب NNA راگه‌هاند، ماوێ زێده‌ترى ساله‌كێ يه‌ دانوستاندن و روونشتن د ناڤبه‌را هه‌ردو حزبێن ديموكراتى كوردستان و حزبا ديموكراتى كوردستانا ئيرانێ هه‌نه‌، هه‌ردو لژنێن تايبه‌ت بۆ رێكخستنا هه‌ردو حزبان پێكئيناينه‌.

ئاماژه‌ ب وێ چه‌ندێ ژى كر كو دو لژنه‌ ژ هه‌ردو لايان پێكهاتينه‌ و مژوولى دانوستاندنانه‌ و چه‌ندين جاران ژى د ناڤه‌برا سكرتێرێن هه‌ردو حزبان دا دانوستاندن هاتينه‌ كرن دا كو ل سه‌ر ميكانيزما ئێكخستنا هه‌ردو حزبان رێك كه‌ڤن.

قادر وريا رۆنژى كر كو چو ده‌م بۆ ئێكگرتنا هه‌ردو حزبان نه‌هاتينه‌ ده‌ستنيشانكرن، به‌لێ ب گشتى هه‌ردو لا وه‌سان دبينن كو ب ره‌نگه‌كێ ئێكگرتى كارێن خو بكه‌ن.