ئەڤرۆ نیوز:
برێکارێ میرێ ئێزدیان بۆکاروبارێن گەنجان دیار کر: ئەمریکا ٥٠٠ هزار دۆلارێن دی بۆ نووژەنکرنا پەرستگەها لالش تەرخانکرن.
میر هەرمان میرزا بەگ بریکارێ میرێ ئێزدیان ڕاگەهاند: نوکە قۆناغێن نووژەنکرنا پەرستگەها لالش دەستپێکرینە و بزاڤێن ئێزدیان و حکومەتێ و ئەمریکا بۆ نووژەنکرنا تەمامیا پەرستگەهێ د بەردەوامن.
گۆت ژی: ب ئامادەبوونا کونسولێ گشتی یێ ئەمریکا و راوێژکارێن ئێزدیان، ئەمریکا٥٠٠ هزار دۆلارێن دی بۆ نووژەنکرنا پەرستگەها لالش تەرخانکرن.
ئەڤرۆ نیوز، زنار تۆڤى:
ده‌ڤه‌را به‌روارى بالا یا ناڤداره ب به‌رهه‌مئینانا چه‌ندین جۆرێن سێڤان، ژ وان ژى سێڤا به‌رواریا ناڤوده‌نگیا خوه ل سه‌رانسه‌رى كوردستانێ هه‌یه، ئه‌ڤ ساله رێژه‌كا باش یا سێڤان ل ڤێ ده‌ڤه‌رێ هه‌یه، ده‌وله‌مه‌نده‌كێ دهۆكێ ژى سێڤێن چه‌ندین گوندان كرینه، ژ وان ژى گوندێن دوورێ و شمایلا و دێریشكێ و ئیاتێ و هنده‌ك گوندێن دیتر، ڤێ چه‌ندێ دلخۆشیه‌ك ل ده‌ف جۆتیارێن ڤێ ده‌ڤه‌رێ په‌یدا كریه.
عزه‌ت دێریشكى جۆتیاره‌كێ ده‌ڤه‌را به‌روارى بالایه، بۆ ئه‌ڤرۆ نیوز دبێژیت: ده‌وله‌مه‌نده‌كێ دهۆكێ ب ناڤێ ئیسماعیل به‌رهه‌مێ چه‌ندین جۆتیاران كریه، نوكه چنینا سێڤان بوویه ده‌لیڤه‌كا كارى بۆ هژماره‌كا گه‌نجێن ده‌ڤه‌رێ یێن بێكار و رۆژانه پترى 30 گه‌نجان سندۆقێن سێڤا دادگرن و رۆژانه ب 25 هزار دیناران كار دكه‌ن، ئه‌و گه‌نجه رۆژانه دهێنه كارێ چنینا سێڤان و شیاینه ب ڤێ رێكێ بۆ خوه داهاته‌كێ په‌یدا بكه‌ن، چونكى به‌رى نوكه چو ده‌لیڤێن كارى نه‌بوون و نێزیكى دو هه‌یڤێن دیتر دێ كارێ چنینا سێڤان هه‌بیت، هه‌روه‌سا رۆژانه ئه‌و ده‌وله‌مه‌نده لۆریه‌كا سێڤان ژ ڤێ ده‌ڤه‌رێ دبه‌ت، ل گه‌ل چه‌ندین بارێن دیتر یێن ترۆمبێلێن دو ته‌نى، ل گه‌ل هندێ تریێ جۆتیاران ژى دكریت، ئێدى سێڤێن جۆتیاران ل بنێ سێڤان نارزن.
مسته‌فا ئه‌حمه‌د، به‌رپرسێ پاراستنا رووه‌كى ل هۆبا چاندنا كانى ماسێ، بۆ ئه‌ڤرۆ نیوز دبێژیت: هه‌بوونا ده‌وله‌مه‌ندان بۆ كرینا سێڤان د ئه‌ڤ ساله دا پالده‌ره‌كێ باشه بۆ جۆتیارێن ده‌ڤه‌را به‌روارى بالا و ئه‌ڤ ساله به‌رهه‌مێ وان ب هه‌روه ناچیت، هه‌روه‌سا ئه‌و سالێن به‌رهه‌مێ سێڤان یێ باش بیت ب هزاران ته‌نێن سێڤان ل ڤێ ده‌ڤه‌رێ به‌رهه‌م دهێن، ئه‌ڤ ساله سێڤ پتر ل گوندێن ده‌ردورا ناحیا كانى ماسێ هه‌نه، رێژا سێڤان ل وان گوندان باشتره، هه‌ر چه‌نده ره‌وشا ئێمناهیێ ژى كاریگه‌رى ل سه‌ر كارێ جۆتیاران كریه، ژ ئه‌گه‌رێ ململانا په‌كه‌كێ و سۆپایێ توركیا جۆتیارێن ڤێ ده‌ڤه‌رێ نه‌شێن وه‌كو پێدڤى كارێ چاندنێ و جۆتیاریێ و سه‌خبێریا زه‌ڤیێن خوه بكه‌ن.
ناڤهاتى گۆت ژى: ئه‌ڤ ساله سێڤ ل گوندێن تروانش و مێركاجیا و ئیاتێ و شمایلا و دوورێ و بێدۆهێ و دێریشكێ و مایێ ب رێژه‌كا گه‌له‌ك باش هه‌نه، ئه‌ڤ ساله بكرێن سێڤان مشه یێن هه‌ین، هه‌موو ژى كه‌رتێ تایبه‌ته و حوكمه‌تێ بازار بۆ جۆتیاران په‌یدا نه‌كریه.
سه‌ربه‌ست سه‌برى ئاكره‌یى رێڤه‌به‌رێ ناحیا كانى ماسێ دیار كر: كرینا به‌رهه‌مێ جۆتیاران پێنگاڤه‌كا گه‌له‌ك باش و سه‌ركه‌فتیه بۆ جۆتیارێن ناحیا كانى ماسێ، وى ده‌وله‌مه‌ندى جهێن ته‌زاندنا فێقى هه‌یه ل دهۆكێ و دیسان كارگه‌هه‌كا شه‌ربه‌تێ ژى هه‌یه، هه‌روه‌سا سێڤێن ڤێ ده‌ڤه‌رێ دبه‌ته ژێریا عیراقێ و ب تایبه‌تى باژێرێن نه‌جه‌ف و به‌غدا و میسان، ل سالا بهێت ئه‌و سه‌رمایه‌داره دێ هاریكاریا جۆتیارێن ڤێ ده‌ڤه‌رێ كه‌ت د وارێ ره‌شاندنا داروبارێ سێڤان و كه‌زاختن و پاقژكرنا وان بێى به‌رامبه‌ر، ئه‌ڤه ژى هاریكاریه‌كا باشه بۆ جۆتیاران، دیسان وى كه‌سى عه‌لوه ژى ل دهۆكێ هه‌یه و ئه‌ڤه ژى دێ ڤه‌ژاندنه‌كا دیتر ئێخیته ڤێ ده‌ڤه‌رێ، ئه‌ڤه پترى 20 رۆژانه بارێن سێڤان و ترى دبه‌ته بازارى.
ئەڤرۆ نیوز:
ئەڤرۆ چارشەمبی 21.10.2020، وەزیرێ ساخلەمی و ژینگەھـا عیراقێ راگەھاند: د ٢٤ دەمژمێرێن بوری دا، سێ هزار و ٦٦٧ حالەتێن نوو یێن کۆرۆنایێ ھاتینە تۆمار کرن، هەروەسا ٥٢ کەسان ژی ب ڤایرۆسێ کۆرۆنایێ وەغەرکریە، هەروەسا دو هزار و ٨٧٦ توشبوویێن دی ژی ب تەمامی باشبووینە.
دیسان گۆتیە: ھەتا نوکە ٤٣٨ هزار و ٢٦٥ کەس ل عیراقێ تووشی ڤایرۆسێ کۆرۆنایێ بووینە، هەتا ڤی دەمی ١٠ ھزار و ٤١٨ کەسان وەغەرکریە، دیسان ٣٦٩ هزار و ١٠ کەس ژی باشبووینە.
ئەڤرۆ نیوز، زنار تۆڤی:
رێڤەبەرێ ناحیا کانی ماسێ، بۆ ئەڤرۆ نیوز دیار کر: سوبەهی پێنجشەمبی دێ گازا سپی ل سەر هەموو قوتابخانێن سنۆرێ ناحیا کانی ماسێ هێتە دابەش کرن.
سەربەست سەبری ئاکرەیی زێدەتر گۆت: گازا سپی دێ لدووڤ هژمارا پۆل و قوتابیان ل سەر قوتابخان هێتە دابەش کرن و نوکە 23 قوتابخانە ل سنۆرێ ناحیا کانی ماسێ هەنە.
ئەڤرۆ نیوز:
رێڤەبەرێ گشتی یێ ساخلەمیا دهۆکێ راگەهاند کو رێژا تووشبوونا ب کۆرۆنایێ ل پارێزگەها دهۆکێ گەلەک زێدە بوویە و تنێ ئەڤرۆ ٤٧١ کەس ل پارێزگەها دهۆکێ تووشی کۆرۆنایێ بووینە و گۆت: (٣٠ هەتا ٤٠% ژ پشکنینێن کو دهێنە کرن ئەنجامێن وان پوزەتیڤن و ئەو یەک ژی مەترسیەکا گەلەک مەزنە).
د. نزار عسمەت داخواز ژ هەموو وەلاتیان ژی کر کو پتر گرنگیێ بدەنە خوەپاراستنێ چونکو هەکە وەسا بەردەوام بیت دێ کارەساتێن مەزن ل پارێزگەها دهۆکێ روو دەن.
ئەڤرۆ نیوز:
سەرۆک مەسعود بارزانی پێشوازی ل خانم ئاگایاما یوشیکۆ کونسولا وەلاتێ یابانێ ل هەولێرێ کر و د روونشتەکێ دا بەحسی رەوشا عیراقێ و ئاریشێن نها ل دەڤەرێ هاتنە کرن.
کونسولا وەلاتێ یابانێ راگەهاند کو وەلاتێ وێ دڤێت پەیوەندیێن خوە ل گەل هەرێما کوردستانێ ب هێزتر لێ بکەت و سەرۆک بارزانی ژی کەیفخوەشیا خوە ل هەمبەر بزاڤێن یابانێ ل عیراقێ و هەرێما کوردستانێ دیار کر و داخوازا سەرکەفتنێ بۆ کونسولا یابانێ ل هەولێرێ کر.
ئەڤرۆ نیوز:
بانکا رافیدەین یاعیراقێ راگەهاند: دێ کوژمێ ٦٠ ملیۆن دیناران ب قەر دەته فەرمانبەر و وەلاتی و خانەنشینان بۆ کرینا ترومبێلان، هەروەسا بانکا رەشید یا عرراقی ژی دەسپێکرنا خەرجکرنا پێشینەیەکێ بۆ فەرمانبەرێن وەزارەتا ناڤخۆ و فەرمانگەهێن مەدەنی راگەهاند.
ئەڤرۆ سێشەمبی، بانکا رافیدەین دیار کریە: دێ کوژمێ٦٠ ملیۆن دیناران ب قەر و ب شێوەیێ قست و ب مفایێ ٤% دەتە وەلاتیان بۆ کرینا ترومبێلان، وێ بانکێ گرێبەست ل گەل کومپانیان کرییە ژبۆ ئینانا نووترین جۆرێن ترۆمبێلان، هەر ولاتیەکێ بڤێت قەران وەربگریت دشێت سەرەدانا لقێن بانکێ بکەت بۆ پێدانا رێنمایان ل سەر مەرجێن مفاداربوونێ.
هەر ئەڤرۆ سێشەمبی، بانکا رەشید دەست ب خەرجکرنا پێشینەکێ بۆ هژمارەکا فەرمانبەرێن وەزارەتا ناڤخۆ و فەرمانگەهێن مەدەنی کریە، ئەو کەسێن مفاداربووین ژ وێ پێشینەیێ دێ ب رێیا کورتە نامەیەکێ هێتە ئاگەهدارکرن، داکو سەرەدانا ئێک ژ لقێن بانکا رەشید بکەت بۆ ب دەست ڤەئینانا پێشینەیێ.
ئەڤرۆ نیوز:
وەزیرێ کارەبا هەرێمێ راگەهاند: پێدانا کارەبێ ب کەرتێ تایبەت ب مەرەما باشترکرنا دەمژمێرێن پێدانا کارەبێ و کێمکرنا تێچوویێ یە ل سەر حوکمەتا هەرێمێ.
کەمال محەمەدی د کۆنفرانسەکێ رۆژنامەڤانی دا دیار کر: ئارمانجا سەرەکی ژ پێدانا کارەبێ ب کەرتێ تایبەت ب مەرەما باشترکرنا رەوشا کارەبێ و زێدەکرنا دەمژمێرێن پێدانا کارەبێ و کێمکرنا تێچوویێ یە ل سەر حوکمەتا هەرێمێ، دێ هەمان بها هەبیت ل گەل کارەبا حکومی و گوهۆرین ب سەر بهایی دا ناهێت.
وەزیرێ کارەێ گۆت ژی: هەتا دووماهیا ئەڤ سالە دێ تەندەر بەرهەڤبیت و دێ چیتە د وارێ جێزەجێکرنێ دا،
هەروەسا ٪٧٠ یێ ستافێ حکومی دێ چیتە سەر ستافێ کەرتێ تایبەت، دیسان ئەو حەز دکەن وەلاتی ب تنێ ئێک بهایی بدەتە کرێیا کارەبێ و وەکو نوکە نەبیت، کو پارێ کارەبا گشتی و مووەلیدێن ئەهلی ژی بدەت.
ئەڤرۆ نیوز:
ئەڤرۆ سێشەمبی، وەزارەتا ساخلەمی ژینگەھـا عیراقێ راگەھاند: د ٢٤ دەمژمێرێن بوری دا، دو هزارو٩٢٠ حالەتێن نوو یێن کۆرۆنایێ ھاتینە تۆمار کرن، ژ وان ژی هزار و ٢٢٢ حالەت ل بەغدا بووینە، ٢٥ کەسان وەغەر کریە، هەروەسا دو ھزار و ٢٤٩ توشبوویێن دیتر ب تەمامی باشبووینە.
ھەتا نوکە ٤٣٤ هەزار و ٥٩٨ کەس ل عیراقێ تووشی کۆرۆنایێ بووینە، هەتا نوکە ١٠ ھزار و ٣٦٦ کەسان وەغەرکریە، دیسان ٣٦٦ هزار و ١٣٤کەس ژی باشبووینە.
ئەڤرۆ نیوز، زنار تۆڤی:
كارۆخ خۆشناو، سەرۆکێ پەیمانگەها ڤەکۆلینێن کوردی ئەمریکی بۆ ئەڤرۆ نیوز دیار کر: ل (2020/11/3) دێ هەلبژارتنێن ئه‌مریكا هێنە ئەنجامدان، ئەڤ هەلبژارتنە گرنگترین هەلبژارتنن ل سەر ئاستێ جیهانێ، چونکی هەتا نوکە ئه‌مریكا زلهێزترین وەلاتە ل جیهانێ، واشنتۆن چەقێ دارێژتنا بریارێن چارەنڤیسسازە ل جیهانێ، د مێژوویا (244) سالێن سەربەخۆیا ئەمریكا دا چ جاران هەلبژارتنێن سەرۆکاتیا ئه‌مریكا نەهاتینە پاشخستن، هەتا ل دەمێ شەرێ ناڤخۆیی و شەرێ دەرڤە دا، هەر چار سالان جارەکێ، لدووڤ مادێ دو یێ دستوری ئه‌مریكا، هەلبژارتنێن سەرۆکاتیێ هاتینە ئەنجام دان.
ناڤهاتی گۆت ژی: هەلبژارتنێن ڤێ جارێ، دێ د رەوشەکا ئالۆزدا هێنە ئەنجام دان، ژ ئەگەرێ بەلاڤبوونا پەژیکا کۆرۆنایێ، ئه‌مریكا رۆژانە ژمارا پیڤایی تۆمار دکەت، د رێژا توشبوویان و رێژا مریان دا، هەردو رکابەرێن سەرەکی (دۆنالد تره‌مپێ کاندیدێ کۆماریان و جۆزیف بایدنێ کاندیدێ دیموکراتان) ب شێوەکێ کوور رایا گشتی و جادا ئه‌مریكا دابەشکرینە، ژ بلی (تره‌مپی و بایدنی) کۆمەکا کاندیدێن دیتر هەنە، کو هژمارا وان (34) کاندیدن، بەلێ چ ژ وان ئەگەرێ سەرکەفتنێ نینە، بەلکو چانسێ برنا (کورسیێ) کۆچکا سپی بۆ هەردو بەربژێرێن سەرەکی یێن ئه‌مریكا (بایدنی و تره‌مپی) یە، د هەمان رۆژدا هەلبژارتن بۆ هەموو ئەندامێن جڤاتا نوونەران و (3/1) یا ئەندامێن جڤاتا پیران و پشکەک ژ حاکمێن ویلایەتان دهێنە ئەنجامدان.
کارۆخی گۆت ژی: هەردو وەلاتێن چین و ئیران پشتگیریێ ل (بایدنی) دکەن، هەردو وەلاتێن (رووسیا و تورکیا) ژی پشتگیریێ ل (تره‌مپی) دکەن بۆ خولا دویێ، ئەڤ چار وەلاتە ب رەنگەکی ئاشکرا (لۆبیکرن) و نهێنیا (ئەلکترۆنی) بزاڤێ دکەن، کاریگەریێ ل سەر ئەنجامێن هەلبژارتنان دروست بکەن، ژ ئەگەرێ بەلاڤبوونا ڤایرۆسێ كۆرۆنایێ هەتا نوکە ل (45) ویلایەتان پتر ژ (22) ملیۆن وەلاتیان د دەنگدانا پێشوەخت دا دەنگێ خوە دایە، ئەڤە رێژەکا پیڤانەیی یە د دەنگدانا پێشوەخت دا، هەروەسا دهێتە چاڤەرێ کرن بۆ خوە پارێزیێ ژ (ڤایرۆسێ كۆرۆنایێ) پشکەکا زۆر ژ دەنگدانێن وەلاتیێن ئه‌مریكا ب رێیا پۆستی بیت، ب شێوەکێ گشتی پارتا کۆماری پارێزگار و (کۆنزەرڤاتیڤن) ل گەل بچووک کرنا رۆلێ حوکمەت و بەرفرەهکرنا ڕۆلێ کەرتێ تایبەت و کێمکرنا باجێ یە، لێ پارتا دیموکرات ڤەکری تر و لیبرالترن ل گەل بەرفرەهکرنا رۆلی حوکمەتێ و سنوردارکرنا کەرتێ تایبەت و پشتگیریا مافێ پەناپەران و ئازادیا کەسی.
هێشتا دبێژیت: میکانیزما هەلبژارتنا سەرۆکێ ئه‌مریكا (تایبەت و جۆدایە) ژ هەموو وەلاتێن دیتر یێن جیهانی، خەلک دەنگێ خوە ددەنە دەستەکێ دبێژنێ، (ئیلیکتۆرال کۆلیج) هژمارا وێ دەستەیێ هندی هژمارا ئەندامێن کۆنگرێسی و سینات (جڤاتا نوونەران و پیران) و سێ ئەندام وەکو نوونەرێ واشنتۆنا پایتەخت، هژمارا وێ دەستەیێ [538] ئەندامن (435+100+3=538)، هەر کاندیدەکێ سەرۆکاتیێ بشێت (270) دەنگان ژ وێ دەستەیێ ب دەستڤە بینیت، دێ بیتە سەرۆکێ ئه‌مریكا.
نيشاندان