ئەڤرۆ، سالار دۆسکی:

سەرۆکێ لژنا سوتەمەنیێ ل جڤاتا پارێزگەھا دھۆکێ بۆ رۆژناما ئەڤرۆ دیارکر کو ئەو رێژا غازێ یا پێشتر بۆ پارێزگەھا دھۆکێ دھات نوکە چارێکا وێ دگەھیتە دھۆکێ، پێشتر 240 تەنێن غازا شل دگەھشتە پارێزگەھێ و ھەر تەنێ 83 قەنینە کەتن و تێرا دھۆکێ دکر، گۆتژی: “پشتی ھاتنا ئاواران و کاودانێن بێجێ تێکچووین نوکە غاز بێجی ناھێت و گەلەک پارێزگەە کەفتینە سەر کەرکووکێ و بارگرانبوویە، نوکە ب تنێ رۆژێ 70 تەن دھێن ئەو ژی ژ پارێزگەھا کەرکووک”.

عەبدولسەمەد تێلی عومەر سەرۆکێ لژنا سوتەمەنیێ ھەروەسا گۆت کێمیا غازێ ل سلێمانیێ ژی ھەیە لێ باراپتر قەیرانا غازێ ل دھۆکێ ھەیە چونکو پتر ئاوارە تێدانە، ئاشکرا ژی کر کو ل پارێزگەھا سلێمانیێ ل چەند رۆژێن بھێت دێ قەیرانا غازێ بنبڕبیت، وەزارەتێ ژی ئاماژە کریە وێ چەندێ کو بزاڤان دکەت قەیران چارەسەر ببیت.

ئاشکرا ژی کر کو سێ ژێدەرێن دابینکرنا غازێ ھەنە، کەرکووک، کەلەک، کۆمپانیا قادر کەرم ل سلێمانیێ، کو پێشتر غازا دھۆکێ ژ ڤان ھەرسێ ژێدەران دگەھشت و نوکە ب تنێ ژ کەرکووکێ دھێت.

سەرۆکێ لژنا سوتەمەنیێ دیارکر ژی کو ژ ڤانە ل رۆژا چارشەمبی رێڤەبەرێ بەلاڤکرنا بەرھەمێن گازێ ل گەل ھەموو پشکێن ب سەرڤە بھێتە داخواز کرن بۆ دیارکرنا ئەگەرێن چێبوونا ڤێ قەیرانێ و دیتنا چارەکێ، دیسا دیارکرنا پلانا وان بۆ بەلاڤکرنا گازا سپی ژی بۆ وەرزێ زڤستانێ.

گۆتژی: “ل دھۆکێ 15 کارگەھێن ئەھلی ھەنە و چو کارگەھێن حوکمەتێ نین و ل ھەولێر و سلێمانیێ ھەر ئێکی کارگەھەکا حوکمەتێ یا ھەی، ھەکە ل دھۆکێ ژی ئێک ھەبا دا عمبار ل گەل بیت و ھەکە ببا قەیران ژی دا دشیان دا بیت ل حەفتیەکێ چارەبیت، لەورا ھەکە رۆژەکێ غاز نەھێت قەیران پەیدا دبیت”.

دھۆک، لەزگین جۆقی:

راوێژکارێ ئایسایشا ئابووری ل ھەرێمێ بۆ ئەڤرۆ دیارکرکو دابەزینا بھایێ پترۆلێ دێ زۆر کارتێکرنێ ل بودجەیا گشتی کەت، نوکە 28 دۆلار ژ بھایێ ھەر ئیک بەرمیلا پترۆلێ یێن ھاتینە خارێ و ھەکەر حکومەتا عیراقێ بیرێن خوە یێن پترۆلێ ژ دەستێن خوە کوژێن داعش نە دەرئێخیت دێ کارتێکرنەکا مەزن ل ئابوورێ عێراقی بیت، ھەکەر بەری نوکە بھایێ ئێک بەرمیلا پترۆلێ ب 110 دۆلاران بیت نوکە 28 دۆلارێن ھاتینە ژ بھایی ھەر بەرمیلەکێ کێمبووینە. د.بێوار خەنسی راوێژکارێ ئایسایشا ئابووری ل ھەرێمێ بۆ ئەڤرۆ دیارکرکو دۆرێن ١٤٣٠ بیرێن پترۆلێ یێ د دەستێن خوە کوژێن داعش دانە ل عێراقی کو ڤان بیرێن پترۆلێ رۆژانە زێدەتر ژ 200 ھەتا 300 ھزار بەرمێلێن پترۆلێ بەرھەم دئینان، لێ نوکە ئەڤ ژمارەکێم بوویە ژبەر گورزێن ئەسمانیێن ھەڤپەیمانان، ب تنێ حکومەتا ھەرێما کوردستانی بیرێن خوە یێن پترۆلی ھەموو پاراستینە نوکە بیرا عنزالە و بەتمە نوکە ل بن کونترولا پێشمەرگەھێ ھەرێما کوردستانێ دانە و چوو بیرێن پترۆلێ د دەستین خوە کوژێن داعش دا ل سنۆری ھەرێمێ نەماینە و گۆت: پێدڤیە فرۆکێن ھەڤپەیمانان وان بیرێن پترۆلێ تۆپباران بکەن یێن د دەستێن خوە کوژێن داعش دا ل ئەنبار و تکریت ودەڤەرێن دی ل عیراقێ داکو داھاتیێ داعش بھێتە ژناڤبرن.

دلشاد شەعبان جێگری سەرۆکێ لیژنا پیشەسازی و وزە وژێدەرێن سروشتی ل پەرلەمانی کوردستانێ بۆ ئەڤرۆ دیارکرکو ھنارتنا نەفتا ھەرێمێ بۆ توورکیا یا بەردەوامە و بریارە ھەتا دووماھیکا ئەڤ سالە رۆژانە ھەتا 450 ھزار بەرمێلێن پترۆلێ بھێنە رەوانەکرن بۆ ژ دەرڤە و گۆت: بریارە ل ڤان نێزیکان شاندەکێ ھەرێمێ سەرەدانا بەغدا بکەت بۆ چارەکرنا ئاریشەیان لێ ئاریشێن پترۆلێ دگەل بەغدا ب تنی د سیاسی نە و حکومەتا عیراقێ باش دزانیت ھەرێم ل دووڤ دەستۆری و یاسایی کارێ پترۆلێ دکەت لێ بەغدا ئارێشە یا کریە سیاسی و بەردەوام ئارێشەیان دروست دکەت.

دلشاد شەعبان گۆتژى: عادل عبدولمەھدی پشتی پوستێ وەزارەتا پترۆلێ وەرگرتی کو کەسەکێ نێزیکی ھەرێمێ یە و سیاسیەکی زۆر باشە و نێزیکی کوردانە لێ ئاریشا ھەی دگەل بەغدا ب کەسەکێ چارە نابیت ئەڤ ئاریشێن ماینە ھەلاویستی ھەموو بووینە سیاسی و دورن ژ دەستۆر و یاسایێن عێراق پێ دھێنە ب رێڤەبرن، لێ ئەز گەلەکێ رەشبین نینن لێ ئەز دبینم ھەکەر عادل عبدولمەھدی پێنگاڤێن چارەسەری ژی بھاڤێژت بەرامبەرا نەحەز د زۆرن و دێ رێگری ل وان پێنگاڤان کەن ئانکو دەستێن خرابکار د زۆرن و عەبادی دگۆت ھەر دەمێ وەزیرێن کوردان سوویندا یاسایی خار و دەستبکاربوون دێ مووچە و بوودجەیا ھەرێمێ ھێتە رەوانەکرن لێ پشتی وەزیرێن کوردان دەست بکارێ خوە کری ل بەغدا عەبادی داخویانیەک دا وتێدا راگەھاند کو ئاریشێن ھەلاویستی دەستبکاربوونا وەزیران ناھێنە چارەکرن چوو پینگاڤ ھەتا نوکە عەبادی نەھاڤیتینە.

جێگری سەرۆکێ لیژنا پێشەسازی و وزە وژێدەرێن سروشتی ل پەرلەمانێ کوردستانێ گۆت: برنا پترۆلا ھەرێمێ بۆ دەرڤە ل سەر شاندێ دانوستاندنێ دمینت کا چ کۆمپانی ببەت یان نە لێ ئاریشە ئەو بەغدا دڤێت ھەموو دبن کونترولا وان دابیت. دلشاد شەعبان ئەوژی خۆیا کرکو کاودانێن ڤێ دووماھیێ یێن ھەرێما کوردستانێَ ڤەگەرتی چوو کارتێکرن ل کۆمپانیێن پترۆلێ نەکریە و نوکە کۆمپانی بەردەوام کاری خوە ئەنجام ددەن ب تنی د چەند رۆژێن دەستپێکی دا سستبوونەک د کارێ واندا دروستبوو لێ نوکە ئەوژی نەمایە و ئاسایی کار خوە ئەنجام دەن. ئەندامێ پەرلەمانێ کوردستانێ گۆت: نوکە ھەرێم رۆژانە 400 ھزار بەرمیلێن پترۆلێ بەرھەم دئینیت ژوانا ژی 150 ھەتا 160 ھزار بەرمێلا رۆژانە بۆ نافخۆیی ھەرێمێ دھێنە مەزاختن و 200 ھەتا 250 ھزار بەرمیل د ھێنە ھنارتن و پلان وەسایە ھەتا دووماھیکا ئەڤ سالە ئاستێ رەوانەکرنا نەفتا ھەرێمێ ژ 250 ھزار بەرمیلان بگەھیتە 450 ھزار بەرمیلان و چوو راستی بۆ وی چەندێ نینە بگەھیتە 700 ھزار بەرمیلان د رۆژێ دا ھەتا دووماھیا ئەڤ سالە و گوت پترۆلا ھەرێمێ ژی ب بھایێ جیھانی دھێتە فروتن.

ئەڤرۆ نیوز، لەزگین جۆقی:
سەرۆکێ کۆمیسۆنا بلندا سەربەخۆیا ھەلبژارتنان ل عێراقی بۆ ئەڤرۆ نیوز دیارکر کو ھەموو بەرھەڤی یێن ھاتینە کرن بۆ بەلاڤکرنا پارێ کارمەندێن سەر سەندوقێن دەنگدانێ ل بەرە ژی ل دەمەکێ نێزیک ل سەرانسەری عیراقێ و ھەرێما کوردستانێ دەست ب بەلاڤکرنا وان بھێتە کرن.
سەربەست مستەفا سەرۆکێ کۆمیسۆنا بلندا سەربەخۆیا ھەلبژارتنان ل عیراقێ گۆت: “ئەگەرێ گیرۆبوونا بەلاڤنەکرنا پارێ کارمەندێن سەر سەندوقێن دەنگدانێ ڤەدگەریت بۆ ھەبوونا ئاریشەکا تەکنیکی د گەل وەزارەتا دارایی ل عیراقێ، لێ نوکە ئەو ئاریشە ھاتیە چارە کرن”.
زێدەتر گۆت: “چو ئاریشێن دی نەماینە ل ھەموو پارێزگەھان ژی ئامادەکاری یێن ھاتینە کرن، دێ د دەمەکێ نە دوور دا پارە ھێتە بەلاڤکرن ل ھەموو پاریزگەھان ژبلی وان پاریزگەھێن ئاریشێن ئەمنی لێ ھەین”.
سەربەست مستەفا زێدەتر گۆت: “ل سەرانسەری عیراقێ و ھەرێما کوردستانێ دۆرێن ٣٥٠ ھزار کەسان پرۆسەیا ھەلبژارتنێن بۆری برێڤە بریە، دێ پاداشتێن ھەموویان ژی ھێنە دان ول ھەر پارێزگەھەکێ دێ بەنک ھێنە دەست نیشانکرن بۆ بەلاڤکرنا پارێ کارمەندێن سەر سەندوقێن دەنگدانێ”.