ئەڤرۆ، سالار دۆسکی:

رێڤەبەرێ گشتیێ پەروەردێ ل پارێزگەھا دھۆکێ دیارکر کو ل دووڤ بریارەکا وەزارەتا پەروەردێ ھەر مامۆستایەکێ بەھرێن وی یێن وانە گۆتنێ د کێم بن دێ ھێتە ڤەگۆھاستن.

عەبد یوسف رێڤەبەرێ گشتیێ پەروەردێ بۆ رۆژناما ئەڤرۆ ھەروەسا گۆت ھەکە مامۆستا بۆ قۆتابخانەکا دەرڤە یان پەروەردەکا قەزایێ ھاتە ڤەگوھاستن دێ بۆ دو رۆژان بیتە بێنڤەدان، ئاشکرا ژی کر کو مامۆستایێ پشتی ڤەگوھاستنێ نەچیتە سەر کارێ خوە بلا خوە خانەنشین بکەت، چونکو نابیت مامۆستا حەفتیێ ژ 26 بەھران کێمتر بێژیت.

دھۆک، ئەکرەم ئیبراھیم:

پارێزگەرێ دھۆکێ فەرھاد ئەترووشی دوھی 12\11\2014 پێشوازیا شاندەکێ رێکخراوا GIZ یا ئەلمانی ب سەرۆکاتیا پاتریک پۆلیمن کر، د ھەڤدیتنەکێ دا بەحسێ بەرنامێن رێکخراوێ کو ل بەرە بۆ ئاواران ل سنوورێ پارێزگەھا دھۆکێ پێشکێش بکەن ھاتە کرن.

ڤێ رێکخراوا ئەلمانی سەر ب وەزارەتا ھاریکاریێن ئابووری یا ئەلمانی یە، بریار دایە کەمپەکێ بۆ حەواندنا شەش ھزار خێزانێن ئاوارە ئاڤا بکەت ل گەل دابین کرنا خزمەتگوزاریێن کەمپێ و دابینکرنا پێدڤیێن زڤستانێ، زێدەباری نووژەن کرن و ب سەروبەرکرنا ھژمارەکا ئاڤاھیێن نیڤەرۆ ئەوێن ئاوارە تێدا ئاکنجی بووین دا ژ سەرما زڤستانێ بھێنە پاراستن.

پارێزگەرێ دھۆکێ سوپاسیا وان کر ل ھەمبەر بەرنامێ وان بۆ ھاریکاریا ئاواران ل سنوورێ پارێزگەھێ و بەرھەڤیا پارێزگەھێ نیشا دا بۆ ھەر ھاریکاریەکێ.

ھەر دوھی پارێزگەرێ دھۆکێ پێشوازیا ئەسیل نوجێفی پارێزگەرێ مووسل کر، د ھەڤدیتنەکێ دا بەحسێ رەوشا وان ئاواران کر ئەوێن ژسنوورێ پارێزگەھا مووسل ھاتینە پارێزگەھا دھۆکێ و ئەو کار و خزمەتێن بۆ دھێنە پێشکێش کرن، تەکەزی ل سەر وێ چەندێ ھاتە کرن کو فشار ل سەر لژنا بلندا ئاواران یا عیراقێ بھێتە کرن کو پشتی کەمپ بۆ ھاتینە ئاڤاکرن یا فەرە لەز ل ئاڤاکرنا بنگەھێن ساخلەمی و قوتابخانان و گەھاندنا خزمەتکاریان بۆ ناڤ وان کەمپا بھێنە دابین کرن دا رەوشا وان باشتر لێ بھێت.

کر پتر ژ 800 ھزار وەلاتیێن پارێزگەھا مووسل ئاوارەی پارێزگەھا دھۆکێ بووینە و حوکمەتا ھەرێمێ و پارێزگەھا دھۆکێ کار دکەت بۆ ئاڤاکرنا پتر  ژ 20 خیڤەتگەھان بۆ حەواندنا وێ ھژمارا ئاواران ھندەک ژ وان ب دووماھی ھاتینە و یێن دی ل قووناغێن دووماھیێ نە.

چەمانکێ، بارزان مزووری:

رێڤەبەرێ ناحیا چەمانکێ بۆ رۆژناما ئەڤرۆ دیار کر کو پرۆژێ رێکا ستراتیجیا ئاکرێ بۆ ناحیا چەمانکێ دێ قەزا ئامێدیێ و ئاکرێ گەھینتە ئێک، ھەروەسا ئاماژە ب رەوشا دەربەدەر و ئاوارێن ل چەمانکێ ژی کر.

ھەڤال محەمەد شەریف رێڤەبەرێ ناحیا چەمانکێ دیار کر کو قووناغا ئێکێ ژ پرۆژێ رێکا ستراتیجیا ئاکرێ بۆ دەڤەرا ئامێدیێ دەست پێ کریە و ئەڤ رێکە دێ ئامێدیێ و ئاکرێ پێکڤە گرێدەت و گۆت “نوکە ٢٠ کیلومەتر ھاتینە دروستکرن و قێرکرن و نوکە کەفتیە د خزمەتا وەلاتیێن ھەردو دەڤەرا و گەشتیاران دا”.

ناڤبری دیار کر ژی کو درێژاھیا ڤێ رێکێ ٤٠ کیلومەترە و ژ گوندێ باکرمان سەر ب قەزا ئاکرێ ڤە دھێت و ھەتا دگەھیتە ناحیا چەمانکێ و بۆ قەزا ئامێدیێ دچیت و گۆت “ئەڤ دەڤەرە ب تمامی جھەکێ گەشتیاریە و ئەڤ پرۆژێ ستراتیجی مەزنترین پرۆژەیە بەس یێ بەرزەیە”.

ھەروەسا رێڤەبەرێ ناحیا چەمانکێ گۆت “دەستپیکا ڤێ رێکێ بۆ جارا ئێکێ ژ لایێ حوکمەتا بەعس ڤە ھاتبوو دروستکرن، بەس نەھاتبوو قێرکرن و بەرفرەھکرن و ژ ناحیا ئەترووش دھێت بۆ ناحیا چەمانکێ و قەزا ئاکرێ و ل ناحیا چەمانکێ بۆ قەزا ئامێدیێ دچیت ئەڤ رێکە دبیتە بار سڤکیەک بۆ وەلاتیان”.

ژ ئالیەکێ دن ڤە ھەڤال محەمەد شەریف رێڤەبەرێ ناحیا چەمانکێ ئاماژە ب دەربەدەر و ئاواران کر و گۆت “دوھی سپێدێ ١٢/١١ ھەر خێزانەکا ژبەر چەکدارێن تیرۆرستێن داعش ئاوارە بوویە دەڤەرا چەمانکێ بەرمیلەکا گازا سپی دگەل سۆپەکا گازێ ژ جۆرێ باش ل سەر ٣٥٠ سەرۆک خێزانان ھاتینە پارڤەکرن.

رێڤەبەرێ ناحیا چەمانکێ  ئاشکرا ژی کر کو حوکمەتا ھەرێما کوردستانێ گوندێ مێزێ ٦٠ خانی بۆ مەسیحیان ئاڤاکر بوون و گۆت “ئەو خانی ڤالا بوون کەس تێدا نەبوو نوکە ئەو ئاوارێن قەستا دەڤەرا مە کرین تێدا ئاکنجینە ھندەک ھول دەڤەرێ ھەنە تێدا ئاکنجینە ئەگەر ئەڤ سالە زڤستان یا دژوار بیت چ ئاریشە بۆ ڤان ئاوارەیا نابن و د رەوشەکا باش دانە و ھەمی پێدڤیی بۆ ھاتینە  دابینکرن چ ئاوارە ل بن خیڤەتان نینن”.