وەزیرێ وزەیا ئەمریكا راگەهاند، ئەمریكا دخوازیت پەترۆل و غازا زێدەتر ل كوردستانی بهێتە بەرهەمئینان و ئەڤە ژی د چارچۆڤەیێ بەرنامەیێ سەرۆكێ ئەمریكا دۆنالد ترەمبی دایە كو دخوازیت بەرهەمئینانا وزەیێ ل جیهانێ زێدەت ببیت.
كریس رایت، وەزیرێ وزەیا ئەمریكا سەبارەت ب رێككەفتنا كۆمپانیێن وزەیێ یێن ئەمریكی ل گەل حوكمەتا هەرێما كوردستانێ راگەهاند» ئەم دخوازین كەرتێ پەترۆل و غازێ ل كوردستانێ زێدەتر بهێتە پێشڤەبرن، چونكە بازارەك هەیە بۆ دەرئینانێ، ئەوژی گەلەك هاریكارە بۆ خەلكێ كوردستانێ و هەروەسا بۆ ئەمریكا و هەموو جیهانێ ژی».
وەزیرێ وزەیا ئەمریكا ل درێژییا ئاخڤتنا خوە دا گوت ژی» دەمی مەسرور بارزانی، سەرۆكێ حوكمەتا هەرێما كوردستانێ ل ئەمریكا بوو، من دیدار ل گەل كر. كوردستانێ یەدەكەكێ زۆر هەیە و كۆمپانیێن ئەمریكی ل وێرێ نە».
كریس رایت ئاماژە ب وێ چەندێ ژی كر» بەرنامەیێ سەرۆك ترەمبی وئیدارەیا وی ئەوە كو وزەیا زێدەتر دێ رەوشا هەموویان باشتر كەت و وەدكەت تێچووی كێم ببن و رێ ب مرۆڤان ددەت كارێن زێدەتر بكەن».
رۆهنكر ژی» ئەم مەزنترین بەرهەمهێنەرێن پەترۆل و غازا سروشتینە، لەوما مە گەلەك هەیە بۆ فرۆشتنێ ل هەموو جهەكێ. بەلێ ئەم ژی د دلخوەشین ب هاریكاریێ ل گەل یێن دی بۆ بەرهەمئینانا پەترۆل و غازا زێدەتر ل وان وەلاتان».

شارەزایێن وارێ پەترۆلێ، رێككەفتنا د ناڤبەرا حوكمەتا ئیراقا فیدرال، هەرێما كوردستانێ و كۆمپانیێن پەترۆلی یێن بیانی ب دەستكەفتەكێ جۆرەیی د هەژمێرن كو نەك هەر هنارتنا پەترۆلا هەرێما كوردستانێ دێ دەستپێكەت، بەلكو هەڤبەندیێن د ناڤبەرا بەغدا و هەولێرێ ئێخیتە د قووناغەكا نوو دا.
ب دیتنا شارەزا و پسپۆرێن وارێ پەترۆلێ، ئەو رێككەفتن دێ گوهۆڕینەكا مەزن د هەڤكێشەیا وزەیێ دا دروست كەت و ئەڤ گوهۆڕینە تنێ ل زڤرینا پەترۆلا كوردستانێ بۆ بازارێن جیهانێ كورن نابیت، بەلكو هەڤبەندیێن د ناڤبەرا بەغدا و هەولێرێ دا ئێخیتە ئاراستەیەكێ نوو كو ل سەر بنەمایێ پشكداریكرنا راستەوخوەیا وەبەرهێنەرایە.
ئەڤ پێشهاتە د دەمەكی دایە كو رێككەفتنەكێ رەهەندەكێ نێڤدەولەتی ژی هەیە و چاڤەڕێ دهێتە كرن كاریگەری ل سەر هەڤبەندیێن ئابۆری یێن ئیراقێ و توركیا ژی هەبیت.
سەبارەت ڤێ چەندێ، گۆڤەند شێروانی، شارەزایێ وارێ پەترۆلێ د داخۆیانییەكا رۆژنامەڤانیدا گوت» رێككەفتنا سێقۆلی ب دەستكەفتەكا جۆرەیی دهێتە هەژمارتن، چونكە بۆ جارا ئێكێیە كۆمپانیێن بیانی وەك ئالیێ سەرەكی د رێككەفتنێدا دێ هێنە جهگیركرن».
گوت ژی» ئەڤ پێنگاڤە دێ باوەرییەكا زێدەتر ب وان كۆمپانییان بەخشیت بۆ بەردەوامبوونێ د كارێن خوەدا و پشتڕاستبوونا وان ل وەرگرتنا مافێن خوە یێن دارایی».
گۆڤەند شێروانی دوپاتی ل وێ چەندێ ژی كر كو ئالیێ تەكینیكیێ زەڤیێن پەترۆلی بێی پشكدارییا كۆمپانییان چارەسەر نابیت، چونكە تنێ ئەو دشێن شیانێن بەرهەمئینانا زەڤیێن پەترۆلی وچاوانییا چارەسەركرنا وان دیار بكەن، پشتی وان زیانێن كو ژ ئەگەرێ راوەستیانا درێژخایەن و هێرشێن فرۆكەیێن بێفرۆكەڤان، گەهشتینێ.
ل دۆر كاریگەرییا ئابۆری، گۆڤەند شێروانی ئاماژە ب وێ چەندێ كر كو زڤرینا هنارتنا پەترۆلا هەرێما كوردستانێ هەتا ب رێژەیا 200 هزار بەرمیلان د رۆژەكێدا، پێنگاڤەكا ئێكێیە بۆ بلندكرنا داهاتی كو رۆژانە نێزیكی 14 ملیۆن دۆلاران دابین دكەت. ئەڤە ژی د دەمەكی دایە كو بودجەیا ئیراقێ هێشتا ب دەست كۆرتئینانەكا ل سەرئێك كۆمبوویا سالا 2023 دنالیت.

سەرۆك بارزانی و سەرۆكێ هەرێما كوردستانێ و سەرۆكێ حوكمەتا هەرێما كوردستانێ پەیامێن بەهیداری و سەرەخوەشیێ ئاراستەی عەلی سیستانی، مەرجەعێ بلند یێ شیعەیان كر، ب هەلكەفتا مالئاڤاهییا هەڤژینا وی.
دوهی دوشەمبی 29/9/2025، سەرۆك مەسعود بارزانی د پەیامەكێدا راگەهاند» ب خەمەكا مەزنڤە دەنگوباسێ مالئاڤاهییا هەڤژینا سەید عەلی سیستانی، مەرجەعێ بلند یێ شیعەیان گەهشتە من، سەرەخوەشییا خوە ئاراستەی بنەمالا وی یا بەرێز دكەین و دخوازین خودایێ مەزن وەغەركریێ ب بەحەشتێ شاد بكەت و ئارامیێ ژی ب بنەمالا وێ ببەخشیت».
هەروەسا نێچیرڤان بارزانی، سەرۆكێ هەرێما كوردستانێ پەیامەكا سەرەخوەشیێ بەلاڤكر و تێدا گوت « ب خەمڤە دەنگوباسێ مالئاڤاهییا هەڤژینا مەرجەعێ بلند یێ ئایینی، ئایەتللا عزما سەید عەلی سیستانی گەهشتە مە».
نێچیرڤان بارزانی، سەرەخوەشی و هەڤخەمی ل عەلی سیستانی و بنەمالا وی كر و گوت» ژ خودایێ مەزن دخوازین رەحمەتیێ ب دلوڤانییا خوە شاد بكەت و جهێ وێ بەحەشت بیت و ئارامییا ب هەموو كەسوكارێن وێ ببەخشیت».
ژ ئالیێ خوەڤە، مەسرور بارزانی، سەرۆكێ حوكمەتا هەرێما كوردستانێ پەیامەكا سەرەخوەشیێ ئاراستەی عەلی سیستانی مەرجەعێ بلند یێ شیعەیان كر ب هەلكەفتا مالئاڤاهییا هەڤژینا وی.
د پەیاما سەرۆكێ حوكمەتا هەرێمێ دا هاتیە» ب هەلكەفتا مالئاڤاهییا هەڤژینا سەماحەتا ئایەتوللا عوزما سەید عەلی سیستانی، ژ دل سەرەخوەشییا خوە یا دلسۆزانە پێشكێشی جەنابێ وی دكەین».
ئاماژە ب وێ چەندێ ژی كر» ژ خودایێ مەزن دخوازین وەغەركریێ ب بەهەشتا خوە یا بەرین شاد بكەت و هەدارێ و ئارامیێ ب سەماحەتا ئایەتوللای و كەسوكارێن وی ببەخشیت».

دوهی دوشەمبی 29/9/2025، نێچیرڤان بارزانی، سەرۆكێ هەرێما كوردستانێ، پێشوازی ل قەداسەتا پاتریارك مار ئاوا، پاتریاركێ كەنیسەیا رۆژهەلاتی یا ئاشۆری و هەژمارەكا ژ مەترانێن وێ كەنیسەیێ ل كوردستانێ و ئیراقێ و جیهانێ كر.
سەرۆكاتییا هەرێما كوردستانێ د بەیاننامەیەكێدا بەلاڤكر» د كۆمبوونەكێدا رەوشا كەنیسەیا رۆژهەلاتا ئاشۆری و پەیڕەوكارێن وێ ل هەرێما كوردستانێ، ئیراقێ و جیهانێ هاتە گەنگەشەكرن، هەروەسا رۆناهی ئێخستە سەر رەوشا پێكهاتەیێن ئایینی، ئازادییان و ب تایبەتی ئازادییا ئایینی ل هەرێما كوردستانێ و ئیراقێ».
سەرۆكاتییا هەرێما كوردستانێ د بەیاننامەیا خوە دا دیاركر ژی» قەداسەتا پاتریارك مار ئاوا باس ل كۆنفرانسێ سالڤەگەڕا 1700 یا (كۆمەلا نیقیە) كر كو ل دەمێ سێ رۆژێن بۆری ل هەولێرێ هاتە ئەنجامدان. هەروەسا هەر ئێك ژ مەترانان كورتییەك دەربارەی كەنیسەیا خوە ل وەلاتێن جیهانێ بەرچاڤكر و پێكڤەژیان و هەڤدوقەبوولكرن و ئارامییا هەرێما كوردستانێ بلند هەلسەنگاندن».
ژ ئالیێ خوەڤە سەرۆكێ هەرێما كوردستانێ، سەرەرای دەربڕینا خوەشحالییا خوە ب ئەنجامدانا چالاكیێن كەنیسەیا رۆژهەلاتی یا ئاشۆری ل هەولێرێ، سوپاسییا وان كر كو سالانە د چارچۆڤەیێ كار و بەرنامەیێ خوە دا، هەژمارەكا گەنجێن ل دەرڤەی وەلاتی دژین، بۆ سەرەدن و ئاشنابوون ب وەلات و كەلتوورێ خوە دئیننە كوردستانێ.
نێچیرڤان بارزانی هەروەسا دوپاتكر كو هەرێما كوردستانێ شانازیێ ب كەلتوورێ پێكڤەژیان و هەڤدوقەبوولكرنێ و لێبۆرینێ د ناڤبەرا پێكهاتەیاندا دكەت و هەردەم دێ پارێزەرا ماف و ئازادیێن هەموویان بیت.
بەرچاڤكرنا چەندین بیر و بۆچوون و تێبینیێن جودا دەربارەی ژیان و رەوشا پێكهاتەیان ل هەرێما كوردستانێ و ئیراقێ، تەوەرەكێ دی یێ كۆمبوونێ بوو.

مەسرور بارزانێ، سەرۆكێ حوكمەتا هەرێما كوردستانێ، سەرەرای پیرۆزباهییا دەستبكاربوونێ ل مەقسود ئەلحەق، بالیۆزێ نوو یێ بەنگلادێشێ ل بەغدا، دوپاتی ل پێڤەبرنا هەڤبەندییان كر.
دوهی دوشەمبی 29/9/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل مەقسود ئەلحەق، بالیۆزێ نوو یێ بەنگلادێشێ ل ئیراقێ كر.
د دیدارەكێدا سەرۆكێ حوكمەتا هەرێما كوردستانێ سەرەرای پیرۆزباهییا دەستبكاربوونێ، پشتەڤانییا حوكمەتا هەرێما كوردستانێ بۆ بالیۆزێ بەنگلادێشێ دوپاتكر ژ پێخەمەت پێشڤەبرنا هەڤبەندیێن دوقۆلی.
بالیۆزێ بەنگلادێشێ ل ئیراقێ، سلاڤ و رێزێن سەرۆك كۆمارێ بەنگلادێشێ گەهاندنە سەرۆكێ حوكمەتا هەرێمێ و دوپاتی ل گرنگییا ب هێزكرنا هەڤبەندیێن وەلاتێ خوە و هەرێما كوردستانێ د وارێن جۆرا و جۆردا كر، هەروەسا ب ناڤێ رەڤەندا بەنگلادێشی یا ل هەرێما كوردستانێ ئاكنجی، رێز و سوپاسی بۆ هاریكاری و كارئاسانی و مێهڤاندارییا خەلك و حوكمەتا هەرێما كوردستانێ دەربڕی.

شیرەتكارێ سەربازی یێ سەرۆكێ هەرێما كوردستانێ راگەهاند: د چارچۆڤەیێ ڕێكخستنا هێزا پێشمەرگەی ، میحوەر نامینن و فرقە دێ سەرپەرشتییا میحوەران كەن و دو دەڤەر ژی دێ هێنە دروستكرن، كو ئەو دێ سەرپەرشتییا هەموو فرقەیان كەن و بڕیارە هەتا دووماهییا سالا بهێت هەرێما كوردستانێ  ببیتە خودانا ئێك هێزا پێشمەرگەی.شیرەتكارێ سەربازی یێ سەرۆكێ هەرێما كوردستانێ راگەهاند: د چارچۆڤەیێ ڕێكخستنا هێزا پێشمەرگەی ، میحوەر نامینن و فرقە دێ سەرپەرشتییا میحوەران كەن و دو دەڤەر ژی دێ هێنە دروستكرن، كو ئەو دێ سەرپەرشتییا هەموو فرقەیان كەن و بڕیارە هەتا دووماهییا سالا بهێت هەرێما كوردستانێ  ببیتە خودانا ئێك هێزا پێشمەرگەی.بابەكر زێباری، شیرەتكارێ سەربازی یێ سەرۆكێ هەرێما كوردستانێ ل دۆر دروستكرنا دو دەڤەران د چارچۆڤەیێ ڕێكخستنا هێزا پێشمەرگەی و دروستكرنا فرقەیان گوت» د وەزارەتا پێشمەرگەیدا میحوەر و فەرماندەیی نامینن و ل شوونا وان فرقە و دەڤەر وەك فەیلەقان دهێنە دروستكرن، لەورا هەر فرقەیەك دێ ل جهێ خوە كارێن خوە كەت ل شوونا میحوەران، فرقە  گەلەك باشترە ژ میحوەران، چونكی راستەوخوە پەیوەندییا وان دێ د گەل وەزارەتا پێشمەرگەی بیت، لەورا هەتا سالا 2026  چ میحوەر نامینن و فرقە دێ كارێ خوە كەن و دو دەڤەر ژی دێ هێنە دروستكرن».زێباری گوت ژی» ئەو دو دەڤەرێن دێ هێنە دروستكرن، دێ سەرپەرشتییا وان فرقەیان كەن یێن هاتینە دروستكرن و ئەو دێ بنە د بن فەرمانا وان دا و نوكە ژی دروستكرنا وان هەردو دەڤەران د قووناغا دووماهییێ دایە، ئێك ژ سحێلا هەتا پردێ و ئەوا دی ژی هەتا خانەقینێ دێ بیتە دەڤەرەك، لەورا ل هەرێما كوردستانێ دو دەڤەر دهێنە دروستكرن و كارێ وان دێ سەرپەرشتیكرنا فرقەیان بیت، كو ئەڤە ژی گاڤەكا گەلەك گرنگە و باشترە ژ میحوەران، كو رێكخستنا هێزا پێشمەرگەیە و دێ سەر ب وەزارەتا پێشمەرگەی ل حوكمەتا هەرێما كوردستانێ ڤە بن و بڕیارە هەتا دووماهییا سالا بهێت هەرێما كوردستانێ بیتە خودانا ئێك هێزا پێشمەرگەی».

هەولێر، قائید میرۆ

جێگرێ سەرۆكێ لژنەیا پەترۆل و غازێ ل جڤاتا نوونەرێن ئیراقێ راگەهاند، راستە رێككەفتنا دناڤبەرا هەرێما كوردستانێ و بەغدایێ دا بۆ سێ مەهان هاتیەكرن، بەلێ دێ زێدەتر ڤەكێشیت و بیتە بناغە بۆ بەرهەڤكرنا قانوونا بودجەیا گشتییا ئیراقێ بۆ سالا داهاتی، هەروەسا دبێژیت، رێككەفتنا سێقۆلی هاتیەكرن و ئێكە ژ رێككەفتنێن دیرۆكی و گرنگ د ناڤبەرا هەرێمێ و بەغدایێ دا.
د. سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و جێگرێ سەرۆكێ لژنەیا پەترۆل و غازێ ل جڤاتا ناڤبری بۆ رۆژنامەیا (ئەڤرۆ) گوت» رێككەفتنا د ناڤبەرا هەرێما كوردستانێ و بەغدا ل دۆر بابەتێ پەترۆلێ رێككەفتنەكا گرنگ بوو، چونكە پشتی زێدەتری دو سالێن دانوستاندنان رێككەفتنا سێقۆلی هاتە ئیمزاكرن، ئەڤەژی دێ بیتە بناغە بۆ شێوازێ مامەلەكرنێ دگەل بادەكا پەترۆلێ ل سەر ئاستێ ئیراقێ، ئانكو رێككەفتنا د ناڤبەرا هەرێما كوردستانێ و بەغدایێ دا دێ مفایەكێ مەزن هەبیت ب تایبەتی بۆ بەرهەڤكرنا پڕۆژەیێ قانوونا بودجەیا سالا داهاتی 2026ێ، هەروەسا بناغەیە بۆ قانوونا پەترۆل و غازێ هەكە رێككەفتنا هاتیە كرن دەمكی ژی بیت بۆ چەند مەهەكان، بەلێ ئەز پێشبینی دكەم زێدەتر ڤەكێشیت، چونكە رێككەفتنەكا دیرۆكی و گرنگە هاتیەكرن، چەندین سالە رێككەفتنا ب ڤی شێوەی نەهاتیەكرن ودێ پرا هەڤبەندیێ و باوەریێ د ناڤبەرا هەرێما كوردستانێ و ئیراقێدا ئاڤاكەت، ئەڤەژی دێ بیتە ئەگەر بۆ وێ چەندێ د ناڤا خەلكێ كوردستانێ و ئیراقێ شێوازێ تێكگەهشتن و دیپلۆماسییەت باشترین رێیە بۆ چارەسەركرنا هەموو ئاریشەیان د ناڤبەرا هەردو حوكمەتاندا، دوسال زێدەترە ئەم دانوستاندنێن بەردەوام دكەین بۆ وێ چەندێ رۆژەكێ بگەهینە رێككەفتنێ و ئاریشە بهێنە چارەسەركرن».
د. سەباح سوبحی ئاماژەكر « مووچەیێ فەرمانبەرێن هەرێما كوردستانێ چو پەیوەندی ب هنارتنا پەترۆلێڤە نینە، بەلێ د دەمێ بۆریدا هندەك ئالیێن سیاسی پرسا مووچەی و پەترۆلێ پێكڤە گرێدابوو و رێككەفتنا هاتیەكرن دێ بیتە ئەگەرێ چارەسەركرنا ئاریشەیا مووچەیێ فەرمانبەرێن هەرێما كوردستانێ، ئانكو گیرۆبوونا مووچەی ژی دێ هێتە چارەسەركرن و نامینیت، بێگومان ب هنارتنا پەترۆلا هەرێما كوردستانێ بۆ بازارێن جیهانێ دێ كاریگەریێن راستەوخوە ل سەر هەموو بیاڤان هەبن ئێك ژوان ژی پرسێن دارایی و ماف و شایستەیێن خەلكێ هەرێما كوردستانێ ژئالیێ بەغدایێ ڤە بهێنە مەزاختن، چونكە هەرێمێ دەست ب هنارتنا پەترۆلێ كریە و ئێدی ئەركێ حوكمەتا فیدڕالە پێگیریێ ب رێككەفتنێ بكەت و ئەركێن خوە هەمبەری وەلاتیێن هەرێما كوردستانێ بجهبینیت».

شیرەتكارەكێ سوودانی راگەهاند: رێككەفتنا سێقۆلی بۆ هنارتنا پەترۆلا هەرێما كوردستانێ، دێ كێشەیا مووچەیێ فەرمانبەرێن هەرێما كوردستانێ ب ئێكجاری چارەسەركەت.
حسێن عەلاوی، شیرەتكارێ محەمەد شیاع سودانی، سەرۆك وەزیرێن ئیراقێ گوت» حوكمەتا هەرێما كوردستانێ و حوكمەتا ئیراقا فیدرال د گەهشتنێ ب رێككەفتنێ د سەركەفتی بوون و رێككەفتن یا ستراتیژی بوو و هەموو ئاستەنگێن دارایی د ناڤبەرا حوكمەتا هەرێما كوردستانێ و حوكمەتا ئیراقێ ناهێلیت، پرسا مووچەی ژی ب تمامی دێ چارەسەر كەت».
عەلاوی دوپاتكر» نوكە حوكمەتا هەرێما كوردستانێ و حوكومەتا فیدرالی بزاڤێن خوە بۆ كاركرنا رژد ل سەر دەربازكرنا قانوونا پەترۆل وغازێ، چڕكرینە».
شیرەتكارێ سەرۆك وەزیرێن ئیراقێ دیاركر ژی» رێككەفتنا سێقۆلی یا هنارتنا پەترۆلا هەرێما كوردستانێ، سیاسەتەكا تمامكاری د ناڤبەرا هەردو حوكمەتێن ( هەرێمێ و فیدرال) پەیدا كەت، هەروەسا دێ بیتە ئەگەرێ چارەسەركرنەكا بنەڕەتی بۆ كێشەیا مووچەیێ فەرمانبەرێن هەرێما كوردستانێ، نوكە بزاڤێن هەردو حوكمەتان ژ پێخەمەت وێ چەندێ دایە، هەروەك هەردو حوكمەتا ب رێیا وەزارەتا سامانێن سروشتی و وەزارەتا پەترۆلا فیدرالی بزاڤێن خوە چڕكرینە بۆ وێ چەندێ ژ نوكە و وێڤە ئەو كێشە دوبارە نەبن، پاشی كار ل سەر قانوونا پەترۆل و غازێ بهێتە كرن بۆ وێ ئێكێ كاروبارێن د ناڤبەرا هەردو حوكمەتاندا رێكبێخیت، ل دوماهیێ ژی ببیتە بنەمایێ ب دوماهی ئینان ب كێشەیێن دارایی د ناڤبەرا حوكمەتا فیدرالی و حوكمەتا هەرێما كوردستانێدا.

ل سەلاحەدین سەرۆك مەسعود بارزانی پێشوازی ل جوشوا هاریس، كاربڕێڤەبەرێ بالیۆزخانەیا ئەمریكا ل ئیراقێ كر.
د دیدارەكێدا كو گوێندلن گرین، قونسلی گشتیێ ئەمریكا ل هەولێرێ بەرهەڤبووی، كاربڕێڤەبەرێ بالیۆزخانەیا ئەمریكا ل ئیراقێ دوپاتی ل پەیاما دۆستایەتی د ناڤبەرا وەلاتێ خوە هەرێما كوردستانێ كر و راگەهاند كو ئەمریكا خوازیارا كوردستانەكا ب هێز و ب هێزییا كوردستانێ ژی د مفایێ ئارامییا ئیراقێ دایە.
ئەوژی دوپاتكر ئەمریكا پشتەڤانا مافێن دەستووری یێن هەرێما كوردستانێیە و پشتەڤانیێ ل دانوستاندنێن د ناڤبەرا حوكمەتا ئیراقا فیدرال و حوكمەتا هەرێما كوردستانێ دا دكەت و نابیت بابەتێ نەدانا مووچەیێن فەرمانبەرێن هەرێما كوردستانی هەر بەردەوام بیت و پێدڤییە بهێتە چارەسەركرن، د پشكەكا دی یا ئاخڤتنێن خوە دا كاربڕێڤەبەرێ بالیۆزخانەیا ئەمریكا ل ئیراقێ باس ل ئەزموونا سەركەفتییا هەرێما كوردستانێ ب تایبەت د وارێ وزەیێ و كارەبێ كر وەك نموونەیەك بۆ پشكێن دی یێن ئیراقێ هەژمارت.
ل دۆر پرۆسەیا سیاسییا ئیراقێ ژی راگەهاند كو وەلاتێ وی خوازیارا وێ چەندێیە سەروەرییا ئیراقێ بهێتە پاراستن و رێ ل دەستێوەردانێ د كاروبارێن ئیراقێدا بهێتە گرتن.
ژ ئالیێ خوەڤە سەرۆك بارزانی سوپاسییا هەلوەستێ ئەمریكا كر د هاریكارییا گەلێن ئیراقێ و هەروەسا هەرێما كوردستانێ.
سەبارەت ب پرۆسەیا سیاسییا ئیراقێ ژی سەرۆك بارزانی راگەهاند» مخابن دەستهەلاتدارێن ئیراقێ پێگیری دەستووری و رێككەفتنان نەبوون و ئەو چەندە ژی بوویە ژێدەرێ گرفتان».
سەرۆك بارزانی سەرەرای ئاماژەدان ب پرۆسەیا هەلبژارتنان ل ئیراقێ دوپاتی ل وێ چەندێ كر كو باشترین رێ بۆ نوونەرایەتیكرنا راستەقینەیا زڤرینێ بۆ قانوونا ئێك بازنەیی بۆ وێ چەندێ ل گونجاندنا هەژمارا كورسییان ل گەل رێژەیا ئاكنجییان دادپەروەری هەبیت.
رەوشا ناڤخوەیا هەرێما كوردستانێ تەوەرێ دی یێ دیدارێ بوو.