ب بەرهەڤبوونا سەرۆك بارزانی و نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ و مایكل ریگاس، جێگرێ وەزیرێ دەرڤەیێ ئەمریكا ، ئاڤاهیێ نوو یێ قونسلخانەیا گشتییا ئەمریكا ل هەولێرێ هاتە ڤەكرن.
ڤەكرنا ڤی پڕۆژەی ب بەرهەڤبوونا بەرپرسێن بلند یێن هەردو ئالییان، وەك پەیامەكا سیاسی و دیپلۆماسی بۆ ب هێزكرنا هەڤبەندیێن ستراتیژی د ناڤبەرا هەرێما كوردستانێ و ئەمریكا دهێتە هەژمارتن.
نێچیرڤان بارزانی: ئەمریكا د دژوارترین وەختاندا ل گەل هەرێما كوردستانێ راوەستیایە
نێچیرڤان بارزانی، سەرۆكێ هەرێما كوردستانێ د رێوڕەسمێ ڤەكرنا قونسلخانەیا ئەمریكا ل هەولێرێ گوت» ئەڤرۆ ڤەكرنا ڤێ كۆمەلگەها قونسلی ل هەولێرێ، دوپاتكرنە ل سەر بەردەوامییا ڤێ هەڤبەندیێ و پێگیرییا ئەمریكایە ب كاركرنێ ل گەل مە ژ پێخەمەت ئاشتیێ وئارامیێ. هەروەسا رەنگڤەدانا باوەرییا وێیە ب پێشكەفتنا هەرێما كوردستانێ، ب هەڤپشكییا مە ل گەل بەغدا و ب شیانێن مە بۆ دروستكرنا نموونەیەكا سەركەفتی د پێكڤەژیانێ و ئارامییچ ل هەرێما كوردستانێ».
گوت ژی» ئەڤە وەك دەستپێكا قووناغەكا نوو بۆ بەرفرەهكرنا هەماهەنگیێ د گەلەك واراندا دبینین: د سیاسەتێ و ئاسایشێ، د ئابۆری و وەبەرهێنانێ، د رەوشەنبیریێ و پەروەردەیێ و د هەڤبەندییا د ناڤبەرا گەلاندا. ئەم تنێ ب دووڤ هەڤبەندیێن حوكمەتێ ل گەل حوكمەتێ نینین، بەلكو خوازیارێن هەڤبەندییانە د ناڤبەرا كۆمپانییان، جڤاكان و هەڤبەندیێن د ناڤبەرا گەنجێن مە و گەنجێن ئەمریكاین».
سەرۆكێ هەرێما كوردستانێ ئاماژەكر ژی» سیاسەتا مە ل هەرێما كوردستانێ یا رۆهنە: ئەم دخوازیت كوردستانێ پرا هەڤبەندییان بیت نەك مەیدانا ململانێ. دخوازین وەك پشكەكا كاریگەر د ئارامییا ئیراقێ و دەڤەرێدا بمینین».
رۆهنكر ژی» دێ بەردەوام بیت د كاركرنێدا ل گەل بەغدا بۆ چارەسەركرنا هەموو كێشەیان ل سەر بنەمایێ دەستووری و بڕێڤەبرنا وەلاتی ژ روویێ سیاسی و كارگێری و قانوونی ڤە، ب شێوەیەكی كو خزمەتا ئارامییا هەموو ئیراقێ بكەت».
گوت ژی» د هەمان وەختدا و د چارچۆڤەیێ ئیراقا فیدرالیدا، ل سەر بنەمایێ رێككەفتنا ستراتیژییا ئیراقێ و ئەمریكا، دێ پێگیر بین ب هەڤپشكییا مە یا ستراتیژی ل گەل ئەمریكا، چونكە باوەرییا مە ئەوە ئەڤ هەڤپشكییە بنەمایەكێ سەرەكییە بۆ ئاشتیێ و ئاسایشێ و پێشكەفتنێ».
ئەو ژی گوت» ئەم ب رێز و سوپاسییەكا مەزن ڤە دنێرینە پشتەڤانییا ئەمریكا بۆ ئیراقێ و هەرێما كوردستانێ، چ ب رێكا سەربازێن خوە بین كو قوربانی داینە، یان ب رێكا دیپلۆماتكارێن خوە بیت، یان ب رێكا كۆمپانییا وەبەرهێنەرێن ئەمریكی بیت كو پشكداری د پێشڤەبرنا هەرێما كوردستانێدا كریە و جهێ رێز و سوپاسییەكا مەزنن. ب ناڤێ هەرێما كوردستانێ، رێز و سوپاسیێن خوە ئاراستەی گەل و دەولەتا ئەمریكا دكەین بۆ پشتەڤانییا وان یا بەردەوام د دەمێ سالێن بۆریدا ل هەرێما كوردستانێ و ب تمامی پشتەڤانیێ ل بزاڤ وپێنگاڤێن سەرۆك دۆنالد ترمپی دكەین ژ پێخەمەت چارەسەركرنا كێشەیان و چەسپاندنا ئاشتیێ ل دەڤەرێ، هەروەسا دەستخوەشیێ لێ دكەین بۆ دیاركرنا بەرێز مارك ساڤایا وەك هنارتیێ تایبەت بۆ ئیراقێ و ئەڤە پێشهاتەكا گرنگە هیڤیدارین رۆلێ خوە د هاریكارییا ئیراقێ و هەرێما كوردستانێ ژ هەموو روویەكی ڤە بگێریت و ب ئومێد و ئیرادە ڤە دنێرینە پێكڤەكاركرنێ بۆ دروستكرنا پاشەڕۆژەكا باشتر و ئارامتر و ئاڤادانتر بۆ هەموویان».
مەسرور بارزانی: دروستكرنا مەزنترین قونسلخانەیا ئەمریكا ل سەر ئاستێ جیهانێ ل هەولێرێ پەیامەكا رۆهنە كو ئەمریكا یا پێگیرە ب پشتەڤانیكرنا هەرێما كوردستانێ
هەروەسا مەسرور بارزانی، سەرۆكێ حوكمەتا هەرێما كوردستانێ د رێوڕەسمێ ڤەكرنا ئاڤاهیێ نوو یێ قونسلخانەیا ئەمریكا ل هەولێرێ پەیڤەك پێشكێشكر و تێدا ئاماژە كر» ئەڤ پڕۆژە تنێ ئاڤاهییەك نینە، بەلكو سیمبولا هەڤبەندیێن ب هێز و ستراتیژییە و ئەم شانازیێ ب دۆستایەتی و هەڤپەیمانیێ ل گەل ئەمریكا دكەین».
سەرۆكێ حوكمەتا هەرێما كوردستانێ گوت ژی» دروستكرنا مەزنترین قونسلخانەیا ئەمریكا ل سەر ئاستێ جیهانێ ل هەولێرێ، پەیامەكا رۆهنە بۆ دۆست و نەیاران كو ئەمریكا یا پێگیرە ب پشتەڤانیكرنا هەرێما كوردستانێ و وەك هەڤپشكەكا سەرەكی ل دەڤەرێ دێ مینیت».
مەسرور بارزانی هیڤی خواست ئەڤ پێنگاڤە ببیتە ئەگەرێ زێدەتر پێشڤەبرنا هەڤبەندییان د وارێن ئابۆری، بازرگانی و كەلتووری، سەرەرای هەماهەنگیێن ئەمنی و سەربازی كو هەتا نوكە هەبوون.
جێگرێ وەزیرێ دەرڤەیێ ئەمریكا: مە بەرژەوەندیێن هەڤپشك و دۆستایەتییا ب هێز ل گەل هەرێما كوردستانێ هەیە
هەر د چارچۆڤەیێ رێوڕەسمێ ڤەكرنا ئاڤاهیێ نوو یێ قونسلخانەیا ئەمریكا ل هەولێرێ، مایكل ریگاس، جێگرێ وەزیرێ دەرڤەیێ ئەمریكا د پەیڤەكێدا پێگەهێ هەرێما كوردستانێ بلند هەلسەنگاند و راگەهاند» مە ل گەل هەرێما كوردستانێ بەرژەوەندیێن هەڤپشك هەنە و هەڤبەندیێن مە ب هێزن».
جێگرێ وەزیرێ دەرڤەیێ ئەمریكا ئاماژە ب وێ چەندێ ژی كر كو دروستكرنا ڤێ كۆمەلگەها دیپلۆماسییا مەزن ل هەولێرێ، پەیامەكا رۆهن یا پێگیریبوونا ئەمریكایە ب مانێ و پێشڤەبرنا هەڤبەندییان ل گەل مللەت وحوكمەتا هەرێما كوردستانێ.
مایكل ریگاس دوپاتكر ژی كو ئەمریكا وەك هەڤپشكەكا سەرەكێ دێ مینیت بۆ پاراستنا ئارامیێ و پێشڤەبرنا رەوشێ و گوت» ئەم یێن ل ڤێرێ بۆ وێ چەندێ پێكڤە كاری بۆ پاشەڕۆژەكا باشتر بكەین».

سەرۆكێ هەرێما كوردستانێ و جێگرێ وەزیرێ دەرڤەیێ ئەمریكا كۆمبوون و دوپاتی ل وێ چەندێ كر، دڤێت ئەنجامدەرێن دووماهی هێرشا ل سەر زەڤییا كۆرمۆر یا غازی روو ب روویێ قانوونێ ببن و چەك ژی تنێ د دەستێ دەولەتێدا بیت.
ل رۆژا چارشەمبی 3/12/2025، نێچیرڤان بارزانی، سەرۆكێ هەرێما كوردستانێ پێشوازی ل مایكل ریگاس، جێگرێ وەزیرێ دەرڤەیێ ئەمریكا كر، كو بۆ ڤەكرنا ئاڤاهیێ نوو یێ قونسلخانەیا گشتییا ئەمریكا ل هەولێرێ، سەرەدانا هەرێما كوردستانێ كریە.
د كۆمبوونەكێدا، سەرەرای ب خێرهاتنێ، سەرۆكێ هەرێما كوردستانێ سوپاسییا سەرەدانا جێگرێ وەزیرێ دەرڤەیێ ئەمریكا كر و دوپاتكر» ئەڤ سەرەدانە نیشانا پێگرییا ئەمریكایە ب بەردەوامییا هەڤبەندیێن درێژخایەن و ستراتیژی ل گەل ئیراقێ و هەرێما كوردستانی». هەروەسا نێچیرڤان بارزانی سوپاسییا ئەمریكا كر بۆ پشتەڤانی و هاریكاریێن وێ بۆ ئیراقێ و هەرێما كوردستانێ د هەموو واراندا.
ب گۆڕەی بەیاننامەیەكا سەرۆكایەتییا هەرێما كوردستانێ، د كۆمبوونێدا هەردو ئالییان باس ل رەوشا گشتییا ئیراقێ و هەرێما كوردستانێ كر و رۆناهی ئێخستە سەر ب ئارمانجگرتنا ژێرخانەیا ئابۆرییا هەرێما كوردستانێ و سەبارەت وێ چەندێ دووماهی هێرشا ل سەر زەڤییا كۆرمۆر یا غازی پرۆتەستۆ كر و دوپاتكر كو دڤێت ئەنجامدەرێن وێ روو ب روویێ قانوونێ ببن، هەروەسا چەك تنێ د دەستێ دەولەتێدا بیت.
هەڤبەندیێن ئەمریكا ل گەل ئیراقێ و هەرێما كوردستانێ، ئەنجامێن هەلبژارتنێن جڤاتا نوونەرێن ئیراقێ، مەترسیێن داعشێ، دووماهی پێشهاتێن دەڤەرێ و چەند پرسێن دی یێن جهێ گرنگییا هەڤپشك، تەوەرێ دی یێ كۆمبوونێ بوون.

ل رۆژا چارشەمبی 3/12/2025، مەسرور بارزانی، سەرۆكێ حوكمەتا هەرێما كوردستانێ ل هەولێرێ، ل گەل ماسكل ریگاس، جێگرێ وەزیرێ دەرڤەیێ ئەمریكا كۆمبوو.
مایكل ریگاس، ل رۆژا سێشەمبی 2/12/2025 گەهشتبوو بەغدا و ل رۆژا چارشەمبی گەهشتە هەولێرێ و هەژمارەكا كۆمبوونان ل گەل بەرپرسێن ئیراقی و هەرێما كوردستانێ ئەنجامدان.
ئارمانجا سەرەكییا سەرەدانا جێگرێ وەزیرێ دەرڤەییچ ئەمریكا بۆ هەرێما كوردستانێ، ڤەكرنا قونسلخانەیا نوو یا ئەمریكایە ل هەولێرێ، كو مەزنترین قونسلخانەیا ئەمریكییە ل جیهانێ.

ل رۆژا چارشەمبی 3/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل جۆرجیۆس ئەلەمانۆس، بالیۆزێ یۆنانێ ل ئیراقێ كر ب هەلكەفتا ب دوماهی هاتنا ئەركێ وی.
د دیدارەكێدا كو نیكۆلۆس ستێرگیۆلاس، قونسلێ گشتیێ یۆنانێ ل هەرێما كوردستانێ بەرهەڤبووی، سەرۆكێ حوكمەتا هەرێمێ سەرەرای ئاماژەدان ب هەڤبەندیێن دیرێن و دۆستانە د ناڤبەرا هەردو ئالییاندا، سوپاسییا بالیۆزی ژی كر بۆ كاركرنێ ژ پێخەمەت ب هێزكرن و پێشڤەبرنا هەڤبەندیێن دو قۆلی د وارێن جۆراوجۆردا.
بالیۆزێ یۆنانێ كاروانێ ئاڤەدانیێ و پێشكەفتنا هەرێما كوردستانێ بلند هەلسەنگاند و پیرۆزباهی و دەستخوەشی ل سەرۆكێ حوكمەتا هەرێمێ كر بۆ ئەنجامدانا پڕۆژە و چاكسازییان د كەرتێ جودا دا، هەروەسا خواستا وەلاتێ خوە ژی بۆ زێدەتر پێشڤەبرنا هەڤبەندییان ل گەل هەرێما كوردستانێ دەربڕی.

ل رۆژا سێشەمبی 2/12/2025، ل پیرمام سەرۆك مەسعود بارزانی پێشوازی ل شاندەكێ وەزارەتا دەرڤەیا چاپۆنێ كر كو پێكهاتبوو ژ ماسامیشی سوگایا، بەرپرسێ دۆسێیا رۆژهەلاتا ناڤین وەزارەتا دەرڤەیا چاپۆنێ و ئاكیارا ئیندۆ، بالیۆزێ چاپۆنێ ل ئیراقێ و هەژمارەكا دیپلۆماتكارێن دی یێن چاپۆنی.
بارەگەهێ بارزانی د بەیاننامەكێدا بەلاڤكر» شاندێ مێهڤان پیرۆزباهییا سەركەفتنا پارتی دیموكراتی كوردستان و ب دەستڤەئینانا زێدەتر ژ ملیۆن دەنگان ل سەرۆك بارزانی كر و ب نیشانەكا رۆهن ل پێگەهێ پارتی دیموكراتی كوردستان د ناڤ خەلكیدا هەژمارت. هەروەسا ڤەژاندن و پێشكەفتنا ل هەرێما كوردستانێ پەیدابووی بلند هەلسەنگاند و ب ئەگەرەكێ گرنگ هەژمارت بۆ گەشەكرنا وەبەرهێنانا بیانی و بەرهەڤییا وەلاتێ خوە ژی راگەهاند بۆ پێشڤەبرنا هەڤبەندییان د وارێن جۆرا و جۆردا ل گەل هەرێما كوردستانێ».
بارەگەهێ بارزانی ئاماژە ب وێ چەندێ ژی كر» شاندێ وەزارەتا دەرڤەیا چاپۆنێ دلتەنگییا خوە بۆ وێ هێرشا ل ڤێ دووماهیێ ل سەر زەڤییا كۆرمۆر یا غازی نیشادا و سەرەرای پرۆتەستكرنا وێ راگەهاند، ئەڤ هێرشە دژی ئارامییا وزەیێ و ئابۆرێ ئیراقێ و دەڤەرێ یە».

ل رۆژا سێشەمی 2/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ وەزارەتا دەرڤەیا چاپۆنێ كر ب سەرۆكایەتییا ماسامیشی سوگایا، بەرپرسێ دۆسێیا رۆژهەلاتا ناڤین ل وەزارەتا دەرڤەیا چاپۆنێ كر.
د كۆمبوونەكێدا كو ئەكیرا ئیندۆ، بالیۆزێ ژاپۆنێ ل ئیراقێ و هەژمارەكا بەرپرسێن وەزارەتا دەرڤەیا چاپۆنێ بەرهەڤ بووین، دوپاتی ل گرنگییا زێدەتر پێشڤەبرنا هەڤبەندیێن دو قۆلی هاتە كرن.
شاندێ چاپۆنی هێرشا تیرۆرستی ل سەر زەڤییا كۆرمۆر یا غازی پرۆتەستۆكر و هەڤسۆزییا خوە ل گەل هەرێما كوردستانێ دیاركر. هەروەسا شاندێ چاپۆنی ئارامی و پێشكەفتن و ئاڤەدانییا هەرێما كوردستانێ بلند هەلسەنگاند و بەرهەڤییا ب هێزكرنا هەڤبەندییان ل گەل هەرێما كوردستانێ نیشادا.
سەرۆكێ حوكمەتا هەرێما كوردستانێ ئاماژە ب گرنگییا هەڤبەندیێن هەرێما كوردستانێ و چاپۆنێ كر و سوپاسییا پشتەڤانی و هاریكارییا حوكمەتا چاپۆنێ كر.
د پشكەكا دی یا كۆمبوونێدا، رەوشا گشتییا ئیراقێ پشتی هەلبژارتنێن جڤاتا نوونەران و بزاڤ و دانوستاندنێن ئالیێن سیاسی بۆ پێكئینانا حوكمەتا نوو هاتە گەنگەشەكرن. شاندێ چاپۆنی پیرۆزباهییا سەركەفتنا پرۆسەیا هەلبژارتنان و ئەنجامێن وان ل سەرۆكێ حوكمەتا هەرێما كوردستانێ كر.

ل رۆژا سێشەمبی 2/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل كریستۆفەر بووم، بالیۆزێ كەنەدا ل ئیراقێ كر.
د كۆمبوونەكێدا هەردو ئالی هەڤڕابوون ل سەر گرنگییا ب هێزكرنا هەڤبەندیێن دو قۆلی ب تایبەتی د وارێن وەبەرهێنانێ و لێكگۆهارتنا بازرگانیدا.
د پشكەكا دی یا كۆمبوونێدا، چاكسازیێن حوكمەتا هەرێما كوردستانێ د كەرتێن جۆرا و جۆردا هاتە گەنگەشەكرن. ل دۆر بزاڤ و دانوستاندنێن پێكئینانا كابینەیا نوو یا حوكمەتا هەرێما كوردستانێ مەسرور بارزانی دوپاتكر نوكە رەوشەكا نوو بۆ پێكئینانا كابینەیا نوو یا حوكمەتا هەرێمێ پەیدابوویە و پێدڤییە ل سەر بنەمایێ ئەنجامێن هەلبژارتنان بیت.
پرۆتەستۆكرنا هێرشا تیرۆرستی ل سەر زەڤییا كۆرمۆر یا غازی و رەوشا گشتییا ئیراقێ پشتی هەلبژارتنێن جڤاتا نوونەران، هەروەسا دوومهای گوهۆڕینێن سووریێ و پرۆسەیا ئاشتیێ ل توركیا چەند تەوەرێن دی یێن دانوستاندنێن كۆمبوونێ بوون.

ئەندامەكێ كۆمیتەیا ناڤین یا پارتی دیموكراتی كوردستان دیاركر: ئێكەتی ب دروستكرنا هنگامێ ڤە مژوولە، هەر تشتەك یان پێشهاتەكا خراب د ناڤ هەركییان دا روو بدەت، ئێكەتی بەرپرسیارە و دێ شەرمزار بیت، ژ بەر كو وان دڤێت ب بەلاڤكرنا چەكی و دانا چەكی نەئارامیێ دروست بكەن، لێ بۆ وان ناچیتە سەری.
نازم هەركی، ئەندامێ كۆمیتەیا ناڤین یا پارتی دیموكراتی كوردستان و هەڤدەم بەرپرسێ لقێ شنگالێ یێ پارتی بۆ رۆژنامەیا (ئەڤرۆ) گوت» ئێكەتیێ كەركووك رادەست كر، ل سلێمانیێ ژی كۆمكوژییا لالەزارێ كر، پشتی وی كارێ ل لالەزار كری ، داكو بێژن پارتی ژی وەك مە دكەت، هاتینە ب سیناریۆیان ڤە مژوولن و ب بەلاڤكرنا چەكی و هاندانا خەلكێ سڤیل دڤێن وەك لالەزارێ كۆمكوژی بهێتە كرن، ژ بەر كو ئەو حەز ژ وێ چەندێ دكەن، لێ ئەو حەزا وان ناهێتە جهـ، ئێكەتی ژ كەڤن دا د ناڤ هەركییاندا شەرمزار بوویە و دووماهی پێ هاتیە، ل سلێمانیێ ژی خەلك نەفرەتان لێ دكەت، لەورا دڤێن چاڤێ خەلكێ كوردستانێ ژ سەر لالەزارێ لادەن، هەركییان نەك باوەری ب ئێكەتیێ نەمایە، بەلكو باش دزانن ئێكەتی چاوا ب ڕێكا ئاغایێن وان ڤە ب جاشاتیێ ڤە مژوولن».
هەروەسا دیار كر» رێژەیا زێدەتر ل 90% ژ وەلاتییێن هەركی پارتینە و بۆ پێشڤەبرنا دۆزا كوردان و پاراستنا قەوارەیێ هەرێما كوردستانێ هەژمارەكا مەزن یا شەهیدان ل سەنگەرێن بەرگریێ داینە و ل پاراستنا ئاخ و خەلكێ كوردستانێ ژی د بەردەوامن».
نازم هەركی پتر گوت» هەركییان خەونا تێكدەر و ئاژاوەچیان ژناڤبر و نەهێلا بگەهنە خەون و ئارمانجێن خوە یێن تێكدەرانە، خەلكێ هەركی پارتینە و هەركی و پارتی ژێك جودا نابن و ب فیتنەیێن هندەك ئالییان هەلوەستێ هەركییان ناهێتە كێمكرن، ئەڤ چەندە بۆ وان ناچیتە سەری، ژ بەركو هەركی و گوندێ لاجان گەلەك ژ وێ چەندێ هشیارترن كو ئێكەتی بكار بینیت، هەر ب رێكا رۆژنامەیا ئەڤرۆ داخوازێ ژ وەزارەتا رەوشەنبیری و ئالیێن پەیوەندیدار دكەم سزایێ وان كەنالێن سێبەر و یێن فەرمی و ب تایبەتی كەنال (8) بدەت كو توڤێ كەرب و كینێ و هنگامێ د ناڤبەرا وەلاتییان و دەزگەهێن ئەمنیدا دچاند و پێدڤییە ئەڤ سازییێن كار بۆ لارێ دابرنا پرسێ دكر بهێنە سزادان و روو ب روویێ قانوونێ ببن، هەرچەندە ئەو نەگەهشتنە خەون و هیڤییا خوە و بابەتێ گوندێ لاجان بابەتەكێ قانوونییە و دەزگەه كارێ خوە دكەن، لێ ئێكەتی بزاڤان دكەت رەوشا گوندی تێك بدەت».

لقێ دویێ پارتی دیموكراتی كوردستان ب رێكا بەیاننامەیەكێدا بەرسڤا نەوەیی یێن مەلبەندێ سێ یێ ئێكەتی نیشتمانی كوردستان دا و راگەهاند( بەری بەرا نەهاڤێژنە مالا كەسەكێ، چونكە مالا هەوە ژ شووشەیە).
د بەیاننامەیا لقێ دوو یێ پارتی دیموكراتی كوردستاندا هاتیە ژی» مەلبەندێ هەولێرێ یێ ئێكەتیی ب رێكا نڤیسینێن پڕ ژ كەرب و كینێ و دوژمنكارانە دڤێت شكەستنێن خوە ل دووماهی هەلبژارتنان ل هەولێرێ ب ناڤئینانا پارتی و دەزگەهێن حوكمەتا هەرێما كوردستانێ ژبیرا خەلكی ببەن».
دەقێ بەیاننامەیا لقێ دوو یێ پارتی دیموكراتی كوردستان بۆ مەلەبندێ سێ یێ ئێكەتیێ:
ئەوا ل چەند رۆژێ بۆری روودای ژ هێرشكرنێ ل سەر زەڤییا كۆرمۆر و راوەستیانا كارەبێ بۆ چەند رۆژان و پاشی هێرشا ل سەر پارزینگەها لاناز، بزاڤەكا دوژمنكارانەیە بۆ لێدانا ژێرخانەیا ئابۆرییا هەرێما كوردستانێ و ب ئارمانجگرتنا وێ بۆ وێ چەندێ ببیتە فشار ل سەر حوكمەتا هەرێما كوردستانێ و زیانێ ب خەلكێ هەرێما كوردستانێ و دەزگەهێن وێ بگەهینن ژ پێخەمەت تاكە ئافەرینەكا هەڤئاواز و هەڤپەیمانێن وان كو ئارمانجا وان نەمانا كوردستانێ و تێكدانا ئارامییا وێیە».
مخابن نڤیسینەك ب دەست و خەتەكێ پڕ ژ كەربێ و دژمنكارانە ژ ئالیێ مەلبەندێ هەولێرێ یێ ئێكەتی هاتیە بەلاڤكرن و وەك وێ چەندێ هنگڤین ل دارەكێ دیتبیت و دخوزان شكەستنا خوە ل دووماهی هەلبژارتنان ل هەولێرێ ب ناڤئینانا پارتی و دەزگەهێن حوكمەتێ ژ بیرا خەلكی ببەن، دیارە وەك قوباد تالەبانی گۆت هێشتا ( د سەقایێ هەلبژارتناندا ماینە)، بەلێ دڤێت ل بیرا مەلبەندێ ئێكەتیێ بیت وەختێ ب بڕیارا سەرۆكێ حزبا وان دەبابە و كۆپتەر و چەكێ گران ل جادەیێن باژێرێ عەزیز سلیمانیێ ئێخستینە بەرژەوەندییا كەسی و ئێكلاكرنا هەژموونا دو پسمامان ئەوژی ئازادی بوو؟ و قەتلوعام ل لالەزار كر وی وەختی ل بەرچاڤ وەرگرتان بنەمایێن مافێن مرۆڤی بوو؟
ئەرێ نوكە كو سێ سەرۆكێن حزبێن ئۆپۆزسیۆنێ ل زیندانێن سلێمانیێ دانە، ئایا دێ چ لێ هێن، ئەرێ ئەو فیتنە و هنگامەیا كەنالێن هەوە دكەن بۆ نەمانا كارەبێ و تەقاندنا زەڤییا كۆرمۆر یا غازی و ب ئارمانجگرتنا ژێرخانەیا ئابۆرییا هەرێما مە چ رامانەك هەیە و ئەو دلخوەشییا هەوە بۆ چیە؟
لەوما وەسا باشترە ئێدی مەلبەندێ ئێكەتیێ و كەنال و سیبەر و دەست و گرێدایێن وان بێدەنگ بن و پشتڕاست بن ئەو فیتنە و هنگامەیە هەردو برایێن سەركردەیێن هەوە دكەن ژبلی نەمانا باوەریێ ل دەف خەلكێ كوردستانێ هیچ مفایەكێ دی نینە و دیرۆك دیدەڤانە و چەند رۆژەكە ئەنجامێن هەلبژارتنان هەوە دیتینە و خەلكێ كوردستانێ یێ هشیارە، لەوما وەسا باشترە هەكە مالا هەوە ژ شووشەی بیت، بەرا نە داننە د مالا كەسەكی دی.

هەولێر، قائید میرۆ

دبێژیت، بڕیاربوو بەری پەسەندكرنا دەستوورێ ئیراقێ، جڤاتا فیدرالی بهێتە دامەزراندن، بەلێ حوكمەتێن ئیراقێ پێگیر نەبوون.
د. نەوزاد عەزیز، چاڤدێرێ سیاسی وسەرۆكێ رێكخراوا دووربین بۆ پرسێن سیاسی و ئابۆری بۆ رۆژناما ئەڤرۆ گوت» سەرۆك بارزانی ل كۆڕبەندێ (مێپس) ل باژێڕێ دهۆكێ ئاماژە ب سی خالێن گەلەك گرنگ دا، ئێك ژوان دامەزراندنا جڤاتا بلندا فیدرالییە ل ئیراقێ، بەریا پەسەندكرنا دەستوورێ ئیراقێ بڕیاربوو جڤاتا فیدرالی ل ئیراقێ بهێتە دامەزراندن، بەلێ مخابن حوكمەتێن ئێك ل دووف ئێك یێن ئیراقێ پێگیرنەبوون ب دامەزراندنا جڤاتا فیدرالی و هەتا نوكە ئەو جڤات نەهاتیە دامەزراندن، چونكە دامەزراندنا جڤاتا فیدڕالی گەلەك یا پێدڤییە بۆ قووناغا نوكە یا ئیراقێ و دێ هەڤسەنگییا ند اڤبەرا كورد و سوننە و شیعەیان راگریت».
گوت ژی» پارتی دیموكراتی كوردستان یا بزاڤان دكەت لەزی د دامەزراندنا جڤاتا فیدرالیدا بهێتەكرن وپارتی وەك حزبا ئێكێ لسەر ئاستێ ئیراقێ دێ كاركەت ئەو جڤاتە بهێتە دامەزراندن و دەست بكاری بكەت، ژ بەر كو چەندین ئاریشە و پرسێن گرنگ هەنە وهەكە ل ئیراقێ جڤاتا بلندا فیدرالی هەبیت ئەو پرس دێ هێنە ئێكلاكرن».
خویاكر ژی»خالەكا دی یا گرنگ كو سەرۆك بارزانی تەكەزی لسەركری راستڤەكرنا قانوونا هەلبژارتنایە ل ئیراقێ، یا خۆیایە قانوونا هەلبژارتنان یا نوكە نەدادپەروەری تێدا هەیە و بەری نوكە ژی ب نەحەقی ئەو قانوونا هەلبژارتنان ب سەر كوردان هاتیە دەربازكرن و گەلەك كێماسی تێدانە، یا بەرئاقل نینە حزبەكا وەك پارتی دیموكراتی كوردستان زێدەتری ملیۆن دەنگان بدەستڤەبینیت و كورسیێن وێ كێم بن، ئەڤە د دەمەكی دایە حزب هەنە ل ئیراقێ دەنگێن وێ نیڤا دەنگێن پارتی نە و هەژمارا كورسیێن وێ پترن ژ هەژمارا كۆرسیێن پارتی ، لەوڕا ژی قانوونا هەلبژارتنان پێدڤی ب راستڤەكرن و گوهۆڕینێ هەیە، چەندین جاران قانوونا هەلبژارتنان هاتیە گوهۆڕین هەتا پارتی بشكێنن ونەهێلن سەركەڤیت، بەرەڤاژی ب گوهۆڕینا قانوونا هەلبژارتنان پارتی هەر هێزا ئێكێیە لسەر ئاستێ ئیراقێ و هەرێما كوردستانێ، ئانكو ب گوهۆڕینا قانوونا هەلبژارتنان ژی نەشیان پارتی لاواز بكەن و سەرۆك بارزانی ژی گەلەك تەكەزیێ لسەر گوهۆڕینا قانوونا هەلبژارتنان دكەت».
د. نەوزاد محەمەد عەزیز ئاماژە كر» ئاریشەیەكا دی د پرۆسەیا سیاسی و قانوونیدا ل ئیراقێ هەیە ئەوژی بابەتێ دادگەها بلندا فیدرالییە، چەندین سالە كوردان ئاریشە ل گەل دادگەها فیدرالی هەنە و دادگەها نوكە هەی ب گۆڕەی پیڤەرێن دەستوورێ ئیراقێ نەهاتیە پێكئینان، چونكە ل دووڤ دەستووری پێدڤی ب گوهۆڕینان هەیە و نابیت ئەو دادگەها نوكە كار دكەت ب ڤی شێوەی یا بەردەوامبیت، دڤێت دادگەها فیدرالی رەنگڤەدانا دادوەری یا هەموو پێكهاتەیێن ئیراقێ پێڤە دیاربیت، ئێك ژوان خالێن پارتی یا رژدە لسەر بۆ چار سالێن داهاتی راستڤەكرنا دادگەها بلند یا فیدرالییە ل ئیراقێ و نابیت چو پێكهاتە و ئالیێن دیاركری زالبن لسەر وێ دادگەهێ، بەرەڤاژی پارتی دخوازیت دادگەهەك ل ئیراقێ هەبیت چو پێكهاتەیێن وی وەلاتی هەست ب وێ چەندێ نەكەن كو ب گۆڕەی دەستووری كار ناكەت و نابیت لایەنگری ژی ب بڕیارێن ڤێ دادگەهێ ڤە دیار بیت».