ئەڤرۆ:

بالیۆزێ یونانێ ل عیراقێ دیار کر کو ژ نوکە وێڤە وەلاتیێن ھەرێما کوردستانێ بێ کو سەرەدانا بالیۆزخانا یونانێ ل بەغدا بکەن، دشێن ھەردو ڤیزێن شنگن و یونانێ ل بالۆزخانا وی وەلاتی وەربگرن.

پشتی دەست ب کاربوونا وی وەکو بالیۆزێ یونانێ ل عیراقێ، دوھی 28\10 دیۆنیسیوس کیڤێتۆس، بالیۆزێ وی وەلاتی سەرەدانا ھەرێما کوردستانێ کر و ژ لایێ نێچیرڤان بارزانی، سەرۆکێ حوکمەتا ھەرێما کوردستانێ ڤە پێشوازی لێ ھاتە کرن و د دیدارەکێ دا بەحس ل رەوش و پێشھاتێن ئەمنی، شەرێ دژی تیرۆرێ، گرنگیا پێکئینانا ھەڤپەیمانیا نێڤدەولەتی دژی داعش و رۆلێ پێشمەرگەی د شکاندن و پاشڤەبرنا تیرۆرستێن داعش، دیسا پێشوازیکرنا ھەرێمێ ل ئاواران و ھاریکاریکرنا وان ژ لایێ حوکمەت و خەلکێ کوردستانێ ڤە کرن، بالیۆزێ یونانێ دوپاتکر کو وەلاتێ وی ل سەر پێشکێشکرنا ھاریکاریان بۆ ئاواران دێ یێ بەردەوام بیت.

ژلایەکێ دیڤە، سەرۆکێ حوکمەتا ھەرێما کوردستانێ و بالیۆزێ یۆنانێ ل عیراقێ بەحس ل پێشڤەبرنا پەیوەندیێن ھەرێما کوردستانێ و وەلاتێ یونانێ و ئەو کار و پرۆژێن کۆمپانیێن وی وەلاتی ل ھەرێمێ ھاتە کرن و دیارکرن کو دڤێت پتر گرنگیەکا پتر ب وان بیاڤان بھێتەدان کو جھێ پووتەپێدانا ھەردو لانە.

وەکو پێنگاڤەک بۆ بەرەڤ پێشبرنا پەیوەندیێن ھەردو لایان بالیۆزێ یونانێ گۆت: “ژ نوکە وێڤە وەلاتیێن ھەرێما کوردستانێ بێی کو سەرەدانا بالیۆزخانا یونانێ ل بەغدا بکەن، دشێن ب رێیا بالیۆزخانا یونانێ ھەردو ڤیزێن شنگن و یونانێ وەربگرن”.

بالیۆزێ یونانێ ئاشکرا ژی کر، د داھاتیەکێ نێزیک دا ھێلەکا ئاسمانیا یونانی، دێ گەشتێن راستەوخۆ د ناڤبەرا ھەرێما کوردستانێ و یونانێ دا رێک ئێخیت.

ھەولێر، قائید میرۆ:
ئەمریک دێ دو بنگەھێن سەربازی لھەرێما کوردستانێ چێکەت و بۆڤێ مەرەمێ دەمەکێ نێزیک دێ دەست پاقژکرنا فڕۆکەخانا ناحیا ھەریر ھێتەکرن و نوکە یێ کار بۆ چۆلکرناڤێ دکەن، ھەروەسا پێشبینی تێتەکرن بنگەھەکێ دی یێ سەربازی ل ناحیا بامەڕنێ بھێتە ڤەکرن.

ژێدەرەکێ ئاگەھدار بۆ رۆژناما ئەڤرۆ دیارکر، دەمەکێ نێزیک دێ دەست چێکرنا بنگەھەکێ سەربازیێ ئەمریکی لھەرێما کوردستانێ ھێتەکرن و گۆت” بڕیارە دەمەکێ زۆرێ نێزیک بنگەھەکێ سەربازیێ ئەمریکی ژلایێ سوپایێ ئەمریکا ل سنورێ پارێزگەھا ھەولێرێ بھێتە ئاڤاکرن و ئەف بنگەھە دێ بۆ فڕینا فڕۆکەیێن ئەمریکا و ھەڤپەیمانبیت، ئەوژی بۆ لێدانا چەکدارێن داعش دێ ھێتە بکارئینان، کو دێ ل دەشتا ھەریرێ بیت و بەری سەرھەلدانێ ژی فڕۆکەخانا سەربازیا رژێما بەعسیان بوویە،کۆمپانیایەکا تورکی یا کارێ چێکرنا جووتسایدێ ھەولێر_ ئاکرێ دکەت، فڕۆکەخانە وەکی کەمپێ حەواندنێ بۆ خوە بکار د ئینا، بەلێ ھاتیە ئاگەھدارکرن دەمەکێ نێزیک بھێتە چۆلکرن و دێ دەست ب دانانا بنگەھێ سەربازیێ ئەمریکی ھێتەکرن، چونکی دەمێ پرۆسا ئازادکرنا عێراقێ ژی سەربازێن ئەمریکی ئەف بنگەھەکێ بۆ خوە بکار تینا و جھەکێ گونجایە بۆ رێڤەچوونا مەشقێن سەربازی و دانانا فڕۆکەیان”.

ئەڤی ژێدەری کونەڤیا ناڤێ وی بھێتە بەلافکرن ئەویەکژی خویاکر، ئەگەرێن زۆر ھەنە بنگەھەکێ دیێ سەربازی ل ناحیا بامەڕنێ یا سەر ب پارێزگەھا دھۆکێ بھێتە ڤەکرن، چونکو ئێک ژ ئاریشەیێن وەشاندنا گورزێن سەربازی ل بنگەھێن داعش دیریا فڕۆکەخانەیێن سەربازیە و بەری نوکەژی فەرماندەیێن سوپایێ ئەمریکا ئەف چەندە ب وەزارەت و حوکمەتا ھەرێمێ راگەھاندبوو، کو وان جھەکێ نێزیک نینە بۆ گەھاندنا فڕۆکە و پێدڤیێن سەربازی بۆ ھەرێما کوردستانێ و ھەردو لایەن رێکەفتینە لسەر ڤەکرنا بنگەھێن سەربازی”.