بارزان، ھەڤال ھەسنی:
پەرلەمانتارەکێ کورد ل بەغدا ل سەر لیستا پارتی دیموکراتی کوردستان راگەھاند ئەو یێ گەشبینە ب حوکمەتا حەیدەر عەبادی ,چونکو ھەیا نھا عەبادی گەلەک ئاخڤتنێن ھەڤدژ ھەبوونە ل گەل مالکی, بۆ نمونە عەبادی پرسا پرچەککرنا پێشمەرگەی ب ئاسایی دبینیت و عەبادی وەکو مالکی مروڤەکێ ئایدولوژی نینە, دیسا دبێژیت دروستبوونا دەولەتا داعش فاکتەرەکە کو ھەڤبەیمانیا شیعی داگیرانێ ژ ھندەک پرسان بکەت ,چونکو داعش مەترسیە ل سەر وان، ب تایبەتی حزبا دەعوە کو گەلەک کاریگەیا خوە ژدەست دایە ژ بەر وی سیاسەتا مالکی پەیرەودکر.
د. عەرەفات کەرەم ئەندامێ جڤاتا نوونەرێن عیراقێ بۆ ئەڤرو دیارکر کو کورد نھا وەکو پرەنسیب دێ پشکداریێ د حوکمەتا عەبادی دا کەن، لێ ھەتا کێشێن ھەین چارەنەبن ژ ئالیێ پراکتیکی ڤە پشکدار نابین و ھەکە گەرەنتی نەبیت پشکداریێ د حوکمەتا عیراقێ دا ناکەین، لێ گەرەنتی ھەیە لەوما مە پشکداری د حوکمەتێ دا کریە، لێ مە دەنگ ب بەرنامێ حوکمەتا عەبادی نەدایە,چونکو مە گەلەک تێبینی ل سەر بەرنامێ حکومەتێ یێن ھەین.
د . عەرەفاتی خویاکر ژی” کوردان داخوازا پێنج وەزارەتان ل بەغدا کریە و ئەڤە ژی مافێ مە یێ دەستوریە، دیسان مە داخواز ژ حوکمەتا عیراقێ کریە کو نەە ملیۆن دولاران بدەتە ھەرێما کوردستانێ و داخوازیێن مە تشتەکێ نوو نینە، بەلکو مافێن ھەلبژارتنان و و د دەستوری نە”.
زێدەتر گوت “مە دڤێت پشتی گوھۆرینا مالکی، عیراق ببیتە عیراقەکا دیموکراسی فیدرالی کو تێدا کێشێن ھەلاویستی یێن پەترۆلێ و غازێ و پێشمەگەی و بودجەی ومووچێن فەرمانبەران و قانوونا دادگەھا فیدراڵ و جڤاتا فیدرالی بھێتەکرن. ھەکە عیراق عیراقەکا دیموکراسی و مەدەنی و دستووری نەبیت و مافێ مروڤی تێدا نەھێتە پاراستن و سیاسەتا مالکی دووبارە ب بیتەڤە، وی دەمی حوکمەتا عەبادی دێ ژ دو سالان کێمتر بیت و عیراق دێ ھێتە پارچەکرن”.
گۆت ژی” کوردان دو پلان ھەنە، یان پشکداریکرن د عیراقەکا دیموکراسی و مەدەنی و پلورالیزمی(فرە ئاینی و سیاسی و نەتەوەیی) و پێگیری کرن ب دستوورێ عیراقێ، یان ژی ئەنجامدانا ریفراندۆمێ بو کونفدرالیێ و سەربەخوەیێ کو ئەڤە ژی ل دووڤ قانوونێن نێڤدەولەتی”.
ب دیتنا د. عەرەفات کەرەمی” کورد د سەرکەفتی بوون د گوھۆرینا مالکی دا و باوەرناکەم چو جاران کەسێن وەکو مالکی دروست ببنەڤە، چونکە نە شیعە و نە حزبا دەعوە و نە ھەفپەیمانیا نیشتمانی و نە مەرجعێن دینی ژی رێ ب دەرکەفتنا کەسەکێ دی وەکی مالکی نادەن, ژ بەر خەلکێ عیراقێ لێ بێزاربویە,چونکە ھەکە سیاسەتا مالکی دووبارە ببیتەڤە ، دێ عیراق پارچەبیت”.
ل دووماھیێ د.عەرەفات کەرەم دیارکر کو بەغدا چو جاران باوەری ب چارەرکرنا کێشان نەبوویە و ماددێ (١٤٠) ژلایێ پراکتیکی ڤە یێ ھاتیە بجھئینان، تنێ مایە دانوستاندن و بھێتە کرن ل سەر کارێن قانوونی و دانانا میکانیزمەکێ بۆ ب دوماھی ئینان ب ڤی ماددەی.لێ ھندەک دەڤەرێن دی یێن ماین و پێدڤیە چارەنڤیسێ وان بھێتە دیار کرن. و گۆت کورد چو جاران بێ دەنگ و نەرم نابن ل سەر دەڤەرێن کوردستانی یێن ئازادکری و چو جاران داگیرانێ ژ ئاخا خوە ناکەن,لێ ھەردەم کوردان نەرمی ل میکانیزمێ دانوستاندنێ دا ھەبوویە بۆ چارەرکرنا کێشا”.
نيشاندان
