ئەڤرو نيوز ، نەوزاد ھلۆری:

گەلیێ بالندا تاکە رێیا پێکڤە گرێدانا زێدەتری ١٥٠ گوندێن نێروە و رێکانە ، بەلێ ل خالا دەستپێکێ یا گەلیێ بالندا ل نێزیک پرا ئاسنی یا گەلیێ بالندا و بارەگایێ ئاسایشا گەلیێ بالندا ١١٠ ھەزار مەترێن عەردی مین و تەقەمەنی تێدا ھەنە و مەترسی بۆ سەر ژیانا وەلاتیان درۆستکریە ، رێڤەبەریا گشتی یا مین و تەقەمەنیان ژی دیارکر کو ئەو دێ پشتی جەژنێ ژ نێزیک سەرەدانا جھێ ناڤبری کەن بۆ چەوانیا راکرنا ئەوان مین و تەقەمەنیان.
سەمیع سەدیق وەلاتیەکێ دەڤەرێ یە دیارکر کو ل دەرێ گەلیێ بالندا ھژمارەکا زۆر یا مین و تەقەمەنیان ھەیە و بۆ ئەڤرۆ نیوز گۆت: (ھەبوونا مین و تەقەمەنیان ل دەرێ گەلیێ بالندا راستەوخوە مەترسی بۆ سەر ژیانا وەلاتیان ھەیە ژبەرکو ھژمارا وان زێدە زۆرە و بەری نھا ژی چەندین جاران مەترسی بۆ سەر ژیانا وەلاتیان و ئاژەلان درۆستکریە)
زێدەتر گۆت: (دخوازین کو جھێن شولەژێ ب زوترین دەم ئەوان مین و تەقەمەنیان راکەن ژبەرکو خەلکەکێ زور قەستا گەلیێ بالندا دکەن و رۆژانە ھاتن و چوونێ دنیڤا جھێ ئەوان مینان دا دکەن و ئەگەر خەلکێ دەڤەرێ بزانن مین ل وان جھان ھەنە خەلکێ بیانی نزانن)
دلگەش محەمەد پولیسێ دارستان ل گەلیێ بالندا لسەر بابەتی بۆ ئەڤرۆ نیوز گۆت: (ئەڤە چەند سالەکە ئەم ل گەلیێ بالندا دەست بکاربوین و مە ب چاڤ دیتیە کو چەندین جاران خەلکێ دەڤەرێ چوینە دناڤا جھێ مین و تەقەمەنیان دا ب تایبەتی زاروک و ئەوان زاروکان راستەوخو ئەو مین و تەقەمەنی ھەلگریتنە و یاری پێکرینە و دیسان چەندن جارەکان ژی پێش چاڤێن مە ئەو مین و تەقەمەنی ب ئاژەلێن دەڤەرێ پەقینە و کوشتینە ، زێدەباری ڤێ یەکێ ئەم وەکو پولیسێن دارستانێ یێن دناڤا مین و تەقەمەنیان دا و ھەموو رەخ و روویێن مە مین و تەقەمەنی ھەنە و بەری نھا ژی مە مین و تەقەمەنی لسەر رێیا سەرەکی یا ھاتن و چوونا خوە بو لایێ رووباری راکرینە ژبەرڤی َدخوازن کو جھێن شولەژێ ئەڤان مین و تەقەمەنیان راکەن داکو مەترسی بۆ سەر ژیانا وەلاتیان درۆست نەبیت)
ژلایەکێ دنڤە عەبدولەکریم ئەحمەد رێڤەبەرێ پلاندانانێ ل رێڤەبەریا گشتی یا مین و تەقەمەنیان ل پارێزگەھا دھۆکێ زێدەباری پشتراستکرنا بابەتی بۆ ئەڤرۆ نیوز گۆت: (بەلێ ھژمارکا زۆر یا مین و تەقەمەنیان ھەیە و نھا ١١٠ ھزار مەترێن چوار گوشەیێن عەردی ل رەخ و روویێن دەرێ گەلیێ بالندا مین و تەقەمەنی ھەنە ژبەرکو مەترسی بو سەر ژیانا وەلاتیان ھەیە مە ل سالا ٢٠٠٨ ھندەک نیشانێن ھوشیارکرنێ داناینە بەلێ دبیت نھا ئەو نیشان ژ کارکەفتن بن یان ژی کەڤن ببن ، مە ل بەرە پشتی جەژنا رەمەزانا پیروز جارەک دن ژ نێزیک سەرەدانا گەلیێ بالندا و جھێ ئەوان مین و تەقەمەنیان بکەین داکو بزانین چەوا دێ ئەوان مین و تەقەمەنیان راکەین داکو مەترسیێ بو سەر ژیانا وەلاتیان درۆست نەکەن )
زێدەترگۆت: (ئەو مین و تەقەمەنیە ل سەردەمێ رژێما بەعس و شەرێ پەکەکێ ھاتینە دانان و ھژمارا وان زۆرە و ھەموو مین و تەقەمەنی ژی دژی کوشتنا مرۆڤان و وێرانکرن و ژناڤبرنا ترومبێلان ھاتینە دانان ب شێوەیەک لسەر رەخ و رویێن جاددا سەرەکی و جھێن بلند ژی ھاتینە دانان )

ئەڤرۆ نیوز ، نەوزاد هلوری:

دبەردەوامیا چالاکیێن خوە دا ژ بو رزگارکرنا وەلاتێن ئێزدی ژ دەستێ داعش ، ئەڤرو ب هەڤکاریا چەند خێرخوازەکان نڤیسینگەها رزگارکرن و ڤەگەراندنا کوردێن ئێزدی پێنج وەلاتیێن دی یێن ئێزدی هاتنە رزگارکرن. دڤی واریدا “حسێن قایدی” رێڤەبەرێ نڤیسینگەها رزگارکری و ڤەگەراندنا کوردێن ئێزدی یا سەر ب حکومەتا هەرێما کوردستانێ بۆ ئەڤرۆ نیوز گۆت: (ئەڤرو روژا سێشەمبی ب هەڤکاری ل گەل چەند خێرخوازەکان و هێزێن ئێمناهیێ شیاین پێنج وەلاتیێن کوردێن ئێزدی ژبن زولم و ستەما داعش رزگار بکەین کو خەلکێ گوندێ کوچو و گوندێ شێخ خدر بوون کو دوو گوندێن سەر ب قەزا شنگالێ نە)

زێدەتر گۆت: (ب رزگارکرنا ئەڤان کەسان هژمار رزگارکریان گەهشتە سێ هزار 37 کەسان ، بەلێ هێشتا سێ هزار 300 کەسێن دن ماینە کو بهێنە رزگارکرن)

ئەڤرۆ نیوز ، نەوزاد ھلوری:
وەزارەتا نافخو یا حکومەتا ھەرێما کوردستانێ 15 ترومبێلێن پێشکەفتی تایبەت دوارێ ھاتن و چۆنێ دا بۆ رێڤەبەریا گشتی یا ھاتن و چۆنێ ل پارێزگەھا دھۆکێ دابینکرن.
دڤی واریدا عەمید فەخری ئەحمەد رێڤەبەریا گشتیێ ھاتن و چۆنێ ل پارێزگەھا دھۆکێ بۆ ئەڤرۆ نیوز گۆت: (وەزارەتا نافخو یا حکومەتا ھەرێما کوردستانێ 15 ترومبێلێن پێشکەفتی تایبەت دوارێ ھاتن و چۆنێ دا بۆ رێڤەبەریا گشتی یا ھاتن و چۆنێ ل پارێزگەھا دھۆکێ دابینکرن و ڤان رۆژێن بھێت دێ لسەر ھەموو بنگەە و رێڤەبەریێن ھاتن و چۆنێ ل سنوورێ پارێزگەھا دھۆک ب ھەموو قەزایێن خوڤە دابین کەت)
زێدەتر گۆت: (ب رێیا ئەڤان ترۆمبێلان دی َخزمەتەکا باشتر بو رێکخستنا ھاتن و چۆنێ ل پارێزگەھا دھۆکێ ھێتەکرن)

ئەڤرۆ نیوز ، مەحمود نھێلی
ژ بۆ پتر خزمەتکرنا خێزانێن شەھیدێن شەرێ دژی داعش سەروکاتیا ساخلەمیا قەزا ئامێدیێ پرۆژەیەک بەردەست کریە کو دێ بێ بەرامبەر خزمەتێن ساخلەمیێ پێشکێشی وان که ن.
دکتور نەجیب سەعید رێڤەبەریێ ساخلەمیا قەزا ئامێدیێ بۆ ئەڤرۆ نیوز دیارکر، کو ئەڤ پرۆژەیە ژ پێشنیارا وی بوویە و رازیبوونا ھەموو دکتورێن تایبەت مەندێن دەڤەرێ ل سەر ڤی پرۆژەی وەگرتیە و گۆت: ( ئەڤ پرۆژەیە پێک دھێت ژ پێشکێش کرنا خزمەتێن ساخلەمیێ بۆ خێزانێن شەھیدێن شەرێ دژی داعش کو پێک دھێن ژ سەرەدانا نوژداری و گرتنا پشکنینێن تاقیگەھا و تیشک و سونەر و خوە ھەتا دەرمان ژی ب بێ بەرامبەر دێ ب وانا ھێنە بەخشین).
ناڤبری دیارکر ژی کو ئەڤ پرۆژەیە ب ھەڤکاری ل گەل رێڤەبەریا شەھید و ئەنفالکریان ل ئامێدیێ و لقێ ھەژدە یێ پارتی دێ ب رێڤەچیت و گۆت: ( ھەر کەسەکی کارتا باوەرپێکری کو ژلایێ رێڤەبەریا شەھیدان ل ئامێدیێ ھاتیە چێکرن دگەل دا بیت دێ بێ بەرامبەر ل کومەلگەھا نوژداریا شێلادزێ ھێتە ب رێڤەبرن).
وخویاکر، کو ھەر چەندە ئەڤە خزمەتەکا کێمە کو ژلایێ ساخلەمیێ ڤە بۆ خێزانێن ڤان شەھیدان دھێتە کرن بەلێ ھەر چ نەبیت دێ شێن وەک ئەرکەکی نەتەوەیی و مروڤایەتی چارەسەریا وانا بێ بەرامبەر ھێتە کرن.

ئەڤرۆ نیوز ، نەوزاد هلوری:
شڤێدی چەکدارێن داعش خوە گەهاندە سنورێ مێحوەرێ دوزخورماتو و پشتی سێ دەمژمێرێن شەرەکێ گران پێشمەرگیان شیان هێرشا داعش بشکێنن و هژمارەکا چەکدارێن وان ژی بکوژن.
ژێدرەکێ دناڤا هێزێن پێشمەرگەی ل مێحوەرێ دوزخورماتو تایبەت بو ئەڤرۆ نیوز گۆت: (شڤێدی دەردورێن دەمژمێر 1:00 ب شەڤ چەکدارێن داعش ژ سێ لایان ڤە شیان خوە بگەهینن سەنگەرێن پێشمەرگەی ل گوندێ زەرگە ل مێحوەرێ دوزخورماتو ل پارێزگەها
کەرکوکێ ، ھێزێن پێشمەرگەی ژی ب توندی بەرسڤا وان دا ، پشتی سێ دەژمێران ژ شەرەکێ گران ب هاریکاریا فروکێن هەڤپەیمانان هێرشا داعش هاتە شکاندن و هژمارەکا چەکدارێن داعشێ هاتینە کوشتن و تەرمێن وان کەفتینە دەستێن پێشمەرگەیان)
زێدەتر گۆت: (ب مخابنیڤە هێزێن پێشمەرگەی شەهیدەک هەیە کو خەلکێ پارێزگەها حەلەبچەیە ل گەل بریندارەکێ سڤک)
ل گۆرەی زانیارێن ئەوی ژێدەری شەرێ شڤێدی ب هێزترین شەربوویە ل مێحوەرێ دوزخورماتو و چەند ترومبێلەکێن TNT کری و چەکدارێن خوە کوژ ژی دناڤ دا هەبون بەلێ هەموو هاتن ژناڤبرن.
شەرێ شڤێدی دبیتە شەرێ سێ ل مەها رەمەزانا پیرۆز کو دناڤبەرا هێزێن پێشمەرگەی و داعش ل دەڤەرێ دروست دبیت.