ئەڤرۆ، لەزگین جۆقی:

کارگێرەکێ لقێ ١٤ یێ پارتی دیمۆکراتی کوردستان بۆ ئەڤرۆ دیار کر کو دوھێ ٢٦/١٠/٢٠١٤ ل تاخێ کەرامە سەربازێن ئازاد ل موسلێ شەرەکی دژوار دگەل خوەکوژێن داعش کر و بزاڤ کر کو وی تاخی ژ داعش بستینن و گۆت “نوکە داعش زۆرا لاواز بووی و شیانێن شەری و بەرەڤانیکرنێ نەماینە و نھا ئەو عەرەبێن گەھشتینێ رێزێن وان دھێلن”.

شێخ محیەدین مزووری کارگێرێ لقێ ١٤ یێ پارتی و بەرپرسێ میحوەرێ سکرێ مووسلێ دیار کر دەمێ زومار ژ تیرۆرستین داعش ھاتیە پاقژکرن و ھێزێن پێشمەرگەی چووینە د ناڤ زومار دا وەلاتین مووسل کەیفخوش بوون و تەقا خۆشیێ ل گەلەک تاخێن مووسل ھاتە کرن و ل تاخێ کەرامە شەر د ناڤبەرا داعش چەکدارێن ئازاد دا روو دا.

شێخ محیەدین مزووری گۆت ژی “پشتی کونترۆلکرنا ناحیا زومار و گوندێن دەوروبەر ژ لایێ ھێزێن پێشمەرگەیێ کوردستانێ  ڤە زیانێن مەزن گەھشتینە چەکدارێن تیرۆرستێن داعش و ترسەکا مەزن بۆ وان کەسێن دەڤەرا زومار چووینە ل ناڤ رێزێن داعش قەناعەت بۆ وان دروست بوویە کو داعش ج جھێن ڤەحەواندنا وان نینە، لەورا ئەو وەلاتیێن عەرەبێن دەردورێن مووسلێ کو گەھشتینە داعش نھا چەکێ خوە ددانن و ل مالێن خوە درووننە خوارێ و ھەتا دوھی ١٩ چەکداران چەکێ داعش دانایە و زڤرینە مالێن خوە”.

شێخان، بارزان مزووری:

بەرپرسێ نڤیسینگەھا رەوشەنبیری و راگەھاندن لقێ ١٤ یێ پارتی ل مووسلێ دیار کر کو دووماھی ئامارا کوشتیێن داعش یێن شەرێ زومار و ل نێزیک سکرێ مووسل و بوردومانێن فرۆکێن جەنگی ل شەڤێن بۆری ھەتا دوھی ٢٦/١٠ بووینە ٥٤١ کوشتی.

سەعید مەموزینی بەرپرسێ نڤیسینگەھا رەوشەنبیری و راگەھاندن لقێ ١٤ یێ پارتی ل مووسلێ بۆ رۆژناما ئەڤرۆ گۆت “ژ بلی وان کوشتیان ب ھزارەھا بریندار ژی گەھشتینە ناڤ نەخۆشخانێن مووسلێ و پتریا وان ژ بەر نەبوونا دەرمانان ماینە بێ چارەسەری”.

سەعید مەموزینی دیار کر کو چەکدارێن تیرۆرستێن داعش ب شێوەیەگی گشتی کەفتینە رەوشەکا خراب و ئالۆزدا ژبەر چارەسەرکرنا برینێن بریندارا و چ چارەسەری بۆ ژمارەکا زۆر یا تەرمان نەدیتیە کا وان تەرما بۆ کیڤە ڤەگوھێزن و گۆت “بریندارێن وان ل نەخوۆشخانێن (حەی عەرەبی، بەعوێزە و موشەت کندی و مەجموعێ) دھێنە چارەسەرکرن و ژبەر نەبوونا دەرمان و کەلوپەلێن پێدڤی گەلەک بریندارێن وان ماینە بێ چارەسەری”.