ئەڤرۆ نیوز، عەلی حاجی:

برێکارا وەزیرا کار و کاروبارێن کومەلایەتی بۆ ئەڤرۆ نیوز دیار کر رێکخراوێن بیانی و نێڤدەولەتی رولەکێ بەرچاڤ هەبووینە د کێم کرنا رێژەیا بێکاری و هەژاریێ ل کوردستانێ و پێدڤیە زێدەتر رێکخراو بهێنە هاندان ل کوردستانێ پروژە هەبن .

زێدەتر زەکیا سەید سالح گۆت: (ل دویف پلانا حکومەتا هەرێما کوردستانێ و  وەزارەتا کار و کاروبارێن کومەلاتی ڤەکرنا خولێن پیشەیی یە بۆ وەلاتیان دا کو ببیتە رێیەک رێژەیا بێکاری و هەژاریێ بهێتە کێم کرن و ئەڤجا چ ئەڤ خولێن پیشەیی ب رێیا پشتەڤانیا دارایی یا حکومەتێ بیت یان ژی یا رێکخراوێن نێڤدەولەتی کو ب رەنگەکێ ئەو خول ببنە ئەگەر بۆ پەیداکرنا دەلیڤەیێن کاری بۆ وەلاتیان، رێکخراوێن بیانی و نێڤدەولەتی ڕولەکێ کارا هەبووینە د کێمکرنا رێژەیا هەژاری و بێکاریێ دا و زیندی ترین نمونە ژی کو ل زاخۆ هەژمارەکا خولێن پیشەیی ب دووماهی هاتن و ١٤٣ کەسان پشکداری کربوون و بوونە خودان کار و هەتا پشتەڤانیەکا باش یا ماددی ژی ل وان هاتە کرن دا کو بشێن ب رێیا وی پارەیی بەردەوامیێ بدەنە کارێ خوە و ببنە سەرچاوەیێ پەیداکرنا ژیانێ و لەورا پێدڤیە زێدەتر هانا رێکخراوێن نێڤدەولەتی ل کوردستانێ بهێتە کرن بۆ دروستکرنا پروژەیان پێخەمەتی پەیداکرنا دەلیڤەیێن کاری) .

ناڤهاتیێ دیار ژی کر هەکە پروژەیێن ب ڤی رەنگی هەبن دێ رێژەیا بێکاریێ کێمتر بیت و هەکە د ئایندەیی دا رەوشا حکومەتێ باشتر لێهات پێدڤیە حکومەت کار ل سەر پروژەیێن ب ڤی رەنگی بکەت دا کو ببیتە زەمینەکا باش بۆ پەیداکرنا دەلیڤەیێن کاری و ئەڤە ژی یا گرنگە بهێتە کرن.