ئەڤرۆ نیوز:
سه‌رپه‌رشتێ چاره‌سه‌ركرنا نه‌خۆشێن كۆرۆنایێ ل پارێزگه‌ها دهۆكێ دیاركر كو پێنج تووشبوویێن كۆرۆنایێ د ره‌وشه‌كا مه‌ترسیدار دانه و هه‌شت تووشبوویێن دى ژى ره‌وشه‌كا نه‌باش دانه نوكه 13 تووشبوویێن كۆرۆنا ره‌وشه‌كا نه‌باش دانه.
د. موئه‌یه‌د ئه‌غالى سه‌رپه‌رشتێ چاره‌سه‌ركرنا نه‌خۆشێن كۆرۆنایێ ل پارێزگه‌ها دهۆكێ دیاركر كو ره‌وشا 13 تووشبوویێن كۆرۆرنایێ تێكچوویه وباش نینه ژ وانا ژى ره‌وشا پینج تووشبوویێن كۆرۆنایێ گه‌له‌ك یا مه‌ترسیداره و هه‌شت تووشبوویێن دى ژى ره‌وشه‌كا نه‌باش دانه ژیێ هه‌ر 13 تووشبوویێن كۆرۆنایێ دناڤبه‌را 31 سالى دا هه‌تا 70 سالى دانه پتریا وان ژی هه‌لگریێن نه‌خۆشیێن ده‌مدرێژن ب تایبه‌تێ ژى نه‌خۆشیا شه‌كرێ ل ده‌ڤ گه‌له‌ك تووشبوویێن كۆرۆنایێ هه‌یه و هنده‌ك تووشبوویێ ژى سه‌نگا وان گه‌له‌ك یا زێده‌یه ئه‌ڤه بوویه ئه‌گه‌ر ره‌وشا تووشبوویان تێك بچیت.
ئه‌ڤرۆ نیوز:
رێڤه‌به‌راتیا ساخله‌میا دهۆكێ راگه‌هاند ئه‌ڤرۆ توشبوویه‌كا دی یا كورونایێ كۆ دژیێ 63 سالیێ دا ئاكنجیا قه‌زا زاخۆیه گیانێ خوه ژ ده‌ست دا، بڤێ ته‌ڤایا گیان ژ ده‌ست دانێ ل دهۆكێ گه‌هشته پێنج كه‌سان.
لگۆری راگه‌هاندنا ساخله‌میا دهۆكێ، توشبوویه‌كا ڤایرۆسێ كورونایێ كۆ دژیێ 63 سالیێ دا بوو ئاكنجیا قه‌زا زاخۆیه ده‌مێ هه‌فتیه‌كێ ره‌وشا وێ تێك چو بوو ل بن ئامیرێ هه‌ناسه‌دانا ده‌ستكرد ڤه بوو، ل نه‌خوشسخانه‌یا تایبه‌ت ب كورونایی ل پارێزگه‌ها دهۆكێ گیانێ خوه ژ ده‌ست دا.
لگۆری دوماهی ئامارا وه‌زاره‌تا ساخله‌میا حوكمه‌تا هه‌ریما كوردستانێ، ل پاریزگه‌ها دهۆك 475 توشبوویێن كورونایێ هاتینه توماركرن، 376 توشبوو ساخ بووینه و پێن كه‌سان ژی گیانێ خوه ژ ده‌ست دایه.
ئه‌ڤرۆ نیوز:
وه‌زاره‌تا كاره‌با عیراقێ راگه‌هاند ل چه‌ند رۆژێن بهێت 200 مێگاواتێن كاره‌بێ ژ توركیا و 450 مێگاوات ژ رێكا خورمه‌له كه‌ركووك دێ گه‌هنه به‌غدایا پایته‌خت و پارێزگه‌هێن دی یێن عیراقێ.
ئه‌حمه‌د موسا عه‌بادی په‌یڤدارێ وه‌زاره‌تا كاره‌با عیراقێ راگه‌هاند ب رێا كۆمپانیا كارله‌وه 450 مێگاوات كاره‌ب ژ رێیا هێلا خورمه‌له كه‌ركوك بۆ به‌غدا و پارێزگه‌هێن ناڤه‌راستا عیراقێ هێته هنارتن، 200 مێگاواتێن دی ژی ژ توركیا ب هێلا سلوپی فایدا بۆ سكرێ موسلێ بۆ ده‌ڤه‌رین عیراقێ ئیته ڤه‌گۆهاستن بۆ ئه‌ڤێ مه‌به‌ستێ ژی د هه‌ماهه‌نگیه‌كا به‌رده‌وام دانه ل گه‌ل توركیا.
په‌یڤدارێ وه‌زاره‌تا كاره‌با عیراقێ ئه‌و چه‌نده ژی راگه‌هاند چه‌ند خاله‌ك بونه ئه‌گه‌ر بۆ كێمبوونا ده‌مژمێرێن دانا كاره‌بێ، ب پله‌یا ئێكێ بلند بوونا پله‌یێن گه‌رماتیێ، كارتێكرن ل سه‌ر به‌رهه‌م ئینانێ دروستكریه، ب ئاوایه‌كی ژ 18 هزار و 600 میگاواتان بوویه 16 هزار و 250 مێگاواتێن به‌رهه‌م ئینانا كاره‌بێ.
ئه‌ڤرۆ نیوز:
په‌یڤدارا وه‌زاره‌تا ده‌رڤه‌یا ئه‌مریكا راگه‌هاند ئه‌و نوچه‌یه‌ێن به‌حسێ كۆمبوونا دناڤبه‌را به‌رپرسێن ئه‌مریكا و به‌رپرسێن په‌كه‌كێ ل نێزیك قه‌ندیلی دكه‌ن دوورن ژ راستیێ.
مورگان ئورتاگوس په‌یڤدارا وه‌زاره‌تا ده‌رڤه‌یا ئه‌مریكا ئه‌و چه‌نده ژی راگه‌هاند ئه‌و نوچه‌یێن به‌حسێ كۆمبوونا به‌رپرسێن ئه‌مریكا و په‌كه‌كێ ل نێزیك قه‌ندیلی دكه‌ت راست نینن و چ كۆمبوونێن ژڤی جوری نه‌هاتینه كرن.
ئەڤرۆ نیوز:
رێڤەبەریا گشتی یا پەروەردا پارێزگەها دهوکێ راگەهاندنەک بەلاڤکریە و تێدا هاتیە: ئەم ئاگەهداریا هەموو قوتابیێن خوشتڤی دکەین، کو ئەزموونێن قۆناغا ۱۲ ئامادەیی و ئەزموونێن دووماهیا وەرزێ دویێ، یێن پولێن ( ٤ ـ ۱۱) دێ هێنە کرن و چ گوهۆرین ب سەر دەم و ژڤانێ ئەنجامدانا ئەزموونان ناهێنە کرن، هەروەسا رێڤەبەریا گشتی یا پەروەردێ داخوازێ ژ هەموو مامۆستا و قوتابیێن خوشتڤی دکەت، کو هەموو پێرابوونێن خوە پاراستنێ وماسک و دەست كێشان ل دەمێ ئەنجامدانا ئەزموونان بکەنە بەرخۆ.
ئەڤرۆ نیوز:
وەزارەتا ساخلەمیا هەرێما کوردستانێ ئامارێن نوو یێن ڤایرۆسێ کۆرۆنایێ راگەهاندن، کو 348 تووشبوویێن نوو ل هەرێمێ هاتینە تۆمار کرن و 14 کەسان ژی وەغەر کریە.
هەروەسا 60 نەخۆشێن دی یێن کۆرۆنایێ ل دهۆکێ هاتینە تۆمار کرن، سەرجەمێ نەخۆشان گەهشتنە 718
کەسان و هەتا نوکە 376 کەس ب تەمامی چارەسەربووینە، دیسان 4 کەسان وەغەر کریە.
ئەڤرۆ نیوز:
جێگرێ پارێزگارێ دهۆکێ دەربارەی راگەهاندنا قەدەغەیا هاتنوچوونێ ل سنورێ پارێزگەها دهۆکێ دیار کر: قەدەغەیا هاتنوچوونێ ناهێتە راگەهاندن، لێ بریارا داخستنا چەند جهان هاتیەدان.
ماجد سەید سالح جێگرێ پارێزگارێ دهۆکێ د کۆنفرانسەکێ رۆژنامەڤانی دا راگەهاند: نوکە ئامارێن توشبوون و وەغەرکرنێ ب کۆرۆنایێ ل پاریزگەها دهۆکێ بەر ب زێدەبوونێ ڤە دچن، لدووڤ بریارا هژمارە ٤٨ یا ئەڤرۆ ل وەزارەتا نافخۆیا هەرێمێ دێ چەندین رێکار هێنە وەرگرتن.
هەروەسا گۆت ژی: لدووڤ وان رێکارێن ژ وەزارەتێ دەرکەفتین لژنا روو ب رووبوونا پارێزگەها دهۆکێ هەماهەنگی کریە و چەند بریارەک زێدەکرینە، ئەو ژی هەر کەسەکێ سەرەدانا خوارنگەهـ و مارکێتان بێ ماسک و دەستکێش بکەت دێ خودانێ وی جهی ب ملیۆن دیناران هێتە سزادان و جهی وی ژی بۆ دەمێ ١٠ رۆژان دێ هێتە داخستن، دیسان هەموو جهێن نۆشداری و سەنتەرێن جوانکاریێ و جهێن گەشتیاری و کافتریا و چایخانە دێ بۆ دەمێ ١٤ رۆژان هێنە داخستن و بریار دێ ١٢ شەڤ چنە د وارێ جێبەجێکرنێ دا.
ئەڤرۆ نیوز:
وەزارەتا ناڤخۆ راگەهاندنەک بەلاڤکریە و تێدا هاتیە: نابیت جهێن گشتی یێن وەکی (مارکێت، خوارنگەهـ و جهێن بازرگانی) رێ بدەنە وەلاتیان، بێی ماسک بچنە وان جهان، هەکە بەرۆڤاژی ڤێ چەندێ هاتە کرن، ئەو جهە دێ بۆ دەمێ 10 رۆژان هێنە گرتن و خودانێن وان جهان دێ ب گۆژمێ ملیۆن دیناران هێنە سزادان، گرتنا هەموو سەنتەر و کلینیکێن (نۆشدار، نۆشدارێن ددانان، کارمەندێن ساخلەمیێ و تاقیگەهان)، بۆ دەمێ 14 رۆژان.
. گرتنا هەموو جهێن گەشتیاری یێن وەکو (پارك، کافتیریا و چایخانان).
.بەردەوامبوونا گرتنا هۆلێن وەرزشی، لەشجوانی، مەلەڤانگەهـ و یانێن شەڤێ، قەدەغەکرنا سازدانا هەلکەغتێن جڤاکی دێ بەردەوامبیت، وەکو (بەهی، ئاهەنگ و هەلکەفتێن جڤاکی).
. خوارنگەهـ دێ ڤەکری مینن، بەلێ پێدڤیە ب تنێ ب شێوێ گەهاندنێ کارێ خوە بکەن، پێدڤیە رێنمایێن ساخلەمیێ بهێنە بجهئینان، دیسان راگرتنا هاتنوچوونا دناڤبەرا پارێزگەهـ و کارگێریێن سەربخۆ، هاتنوچوون ب تنێ دێ ژ بۆ رەوشێن ئاوارتە و گەلەک پێدڤی بیت، ئەو ژی دێ لدووڤ سیستەمێ رێپێدانا ئەلەکترونی بیت.
دیسان هاتنوچوونا د ناڤبەرا پارێزگەهێن هەرێمێ و عیراقێدا دێ بۆ دەمێ حەفتیەکێ هێتە راگرتن، لێ
رێ ب هاتنوچوونا دبلۆماتکارێن بیانی و هێزێن هەڤپەیمانان دناڤبەرا پارێزگەهـ و کارگیریێن سەربخۆ هاتیە دان.
دیسان رێ ب هاتنوچوونا ئاژانس، ڕێکخراوێن UN و رێکخراوێن نێڤدەولەتى ل سەرانسەری هەرێما کوردستانێ هاتیە دان، بۆ ڤێ چەندێ ژی فەرمانگەها پەیوەندیێن دەرڤە هاتیە راسپاردن.
. شۆفێرێن هەموو جۆرێن ترۆمبێلان (تایبەت، کرێ و بارهەلگر) پێدڤیە ئەو هەر کەسێ ل گەل وان ل ترۆمبێلێ سوار بیت، بەردەڤك و دەستگورکان بکار بینن، هەکە ئەڤ رێنمایە نەهێنە بجهئینان، ژ بۆ هەر جارەکا سەرپێچیێ شۆفێر دێ ب بهایێ (50,000) هزار دیناران هێتە سزادان.
. هەر کۆمڤەبوونەکا ژ دەرڤەی جهـ و ئاڤاهیێن حکومی و کەرتێ تایبەت، هەکە بەردەڤك نەهێنە بکارئینان و دووراتیا مێتر و نیڤان د ناڤبەرا هەر کەسەکیدا ل بەرچاڤ نەهێتە وەرگرتن، هەر سەرپێچکارەك دێ ب بهایێ (10,000) هێتە سزادان.
. پێدڤیە هەموو کارمەندێن سازی و فەرمانگەهێن کەرتێ تایبەت، رێنمایێن ساخلەمیێ ل بەر چاڤ وەربگرن و بەردەڤکان بکاربینن، هەکە رێنمایی نەهێنە بجهئینان دێ خودانێ کاری ب کوژمێ (150,000) هێتە سزادان.
. ئەو کەسێن ژ دەرڤەی وەلاتی ڤەدگڕنە هەرێما کوردستانێ، ل دەمێ سۆزنامێ دنڤیسین کو ل مال یان هۆتێلێ خوە کەرەنتین بکەن، ئەگەر پێگیری ب ئەوێ سۆزنامەیێ نەکەن، دێ ب کوژمەیێ ملیۆن دیناران هێنە سزادان.
ئەگەر پشکنینێن وان پۆزەتیڤ دەرچوون و ئەوان کەسەکێ دی تووشی ڤایرۆسێ کۆرۆنایێ کربیت، دێ هەموو مەزاختیێن نەخۆشێ ب رێیا وی تووشبووی ل سەر کیستێ وی بیت.
. دەرگەهێ سنۆری یێ ئیبراهیم خەلیل، دێ بۆ دەمێ حەفتیەکێ ل هەمبەری گەشتیاران هێتە گرتن، بۆ کارێن گەلەک پێدڤی ب تنێ دێ ب رەزامەندیا وەزارەتا ناڤخۆ بیت، بەلێ هاتنوچووبا بازرگانی دێ لدووڤ رێنمایێن ساخلەمیێ هەر وەکو بەری نوکە بیت.
. ل سەر ژوورێن ئۆپەڕاسیۆنێن پارێزگەهـ و کارگێریێن سەربخۆ، پشتی دەرچوونا ڤێ راگەهاندنێ دێ بۆ دەمێ حەفتیەکێ دووڤچوونا بجهئینانا هەموو خالێن بەیانناما وەزارەتا ناڤخۆ کەن، ب تایبەتی رێنمایێن ساخلەمی و بکارئینانا بەردەڤکان و دووراتیا د ناڤبەرا کەسان دا.
نيشاندان