ئەڤرۆ نیوز:
پەیڤدارێ حوکمەتا هەرێما کوردستانێ راگەهاند کو رۆژا هەینی ٣١/٧/٢٠٢٠ هەتا رۆژا سێ شەمبیێ ٤/٨/٢٠٢٠ ل هەموو دەم و دەزگەهێن حوكمەتا هەرێما کوردستانێ دێ بیتە بێهنڤەدان ژ بەر جەژنا قوربانێ و رۆژا چارشەمبیێ دێ دەوام دەستپێ کەت.
د. جوتیار عادل ئەو یەک ژی دیار کر کو داخواز ژ هەموو وەلاتیان دکەین د رۆژێن جەژنێ دا ژ بۆ پاراستنا خوە ژ ڤایرۆسێ کۆرۆنایێ پێگیریێ ب رێنمایێن ساخلەمیێ بکەن.
ئه‌ڤرۆ نیوز:
رێكخراوا یونسیف سه‌ر ب نه‌ته‌وه‌یێن ئێكگرتی راگه‌هاند ب ئه‌گه‌رێ بلاڤ بوونا ڤایرۆسێ كورونایێ و ئه‌وێ قه‌یرانا ئابووری ب ئه‌گه‌رێ كورونایێ ل جیهانێ سه‌رهلدایه حه‌فت ملیۆن زارۆك تووشی بێ خارنێ بوون.
هینریتا فور رێڤه‌به‌را رێكخراوا یونسێفێ سه‌ر ب نه‌ته‌وه‌یێن ئێكگرتی راگه‌هاند به‌ری بلاڤ بوونا ڤایرۆسێ كورونایێ 47 ملیۆن زارۆك ل سه‌ر ئاستێ جیهانێ ب بێ خوارنیێ لاوازیێ ڤه دنالین، زیانێن ئابووری یێن ڤایرۆسێ كورونایێ كۆ بۆ ده‌مێ حه‌فت هه‌یڤانه ل جیهانێ به‌لاڤ بووی ل سه‌ر زارۆكان زێده‌تر هه‌بوویه.
هینریتا فور ئه‌و چه‌نده ژی راگه‌هاند ب ئه‌گه‌رێ زێده‌بوونا رێژا هه‌ژاریێ و كێمبوونا خارنێ و گرانبوونا بهایێن تشتێن خوارنێ، ل ده‌ستپێكا به‌لاڤ بوونا كوورنایێ و تانوكه حه‌فت ملیۆن زارۆك ل ته‌ڤایا جیهانێ ریب ری بێ خوارنیێ بووینه.
ئه‌ڤرۆ نیوز:
رێكخراوا ساخله‌میا جیهانی هوشداریا وه‌رنه‌گرتنا رێكارێن به‌رهنگاربوونا ڤایرۆسێ كورونایێ ل وه‌رزێ هاڤینێ دا،ته‌ئكید كر ڤایرۆس وه‌رزی نینه و ئێك پێلا مه‌زنه.
مارگرێت هاریس په‌یڤدارا رێكخراوا ساخله‌میا جیهانی راگه‌هاند تانوكه خه‌لك هزر دكه‌ن ڤایرۆس وه‌رزی یه، ئه‌ڤه دڤێت ل ئه‌وێ چه‌ندێ تێبگه‌هین ره‌فتارێن ڤایرۆسێ نوو جودایه، پێدڤیه هشیار بین ژ بجهكرنا رێ و ئاوایێن پاقژكرنا جهان ژ ڤایرۆسی، چونكو ب رێكا كۆمڤه‌بوونێن مه‌زن به‌ربه‌لاڤ دبیت.
مارگرێت هاریس هوشداریا ئه‌وێ چه‌ندێ ژی دا كۆ دڤێت هزر ل هاتنا چه‌ند پێله‌كێن دی یێن ڤایرۆسی بهێته‌كرن، كورونا دێ ئێك پلا مه‌زن بیت و ژماره‌یا توشبوویان بلند بیت و ناڤ به‌ین كێم بیت، باشترین رێك ئه‌وه پێلێن وێ بهێنه لاوازكرن و كارتێكرنێن وێ بهێنه كێمكرن.
ئه‌ڤرۆ نیوز:
فه‌رمانده‌یه‌كێ بلندێ سوپایێ عیراقێ د هێرشه‌كا تیرۆریستی دا بۆ سه‌ر بنگه‌هه‌كێ سه‌ربازی ل پارێزگه‌ها ئه‌نبار هاته كوشتن.
فه‌رمانده‌یا ئوپراسیونێن هه‌ڤبه‌ش، نوچه‌یی كوشتنا ئه‌حمه‌د لامی فه‌رمانده‌یێ لیوا 29 یا فیرقه‌یا 7 یا سوپایێ عیراقێ ل پاژێرێ هیت راگه‌هاند.
فه‌رمانده‌یا ئوپراسیونێن هه‌ڤبه‌ش ئه‌و چه‌نده ژی راگه‌هاند د وێ هیرشا شه‌ڤا بووری دا تیرۆریستان بۆ سه‌ر بنگه‌هه‌كی سه‌ربازی ل باژێرێ هیت ئه‌نجامدا، ژبلی ئه‌حمه‌د لامی، ئه‌فسه‌ره‌كێ دی ژی یێ ب پله‌یا میلازم ئێك و دو سه‌ربازێن دی یێن عیراقی هاتنه كوشتن.
ئه‌ڤرۆ نیوز:
ئه‌ڤرۆ رێ و ره‌سمێن حه‌جێ و رێكارێن خوه پاراستنێ ژ ڤایرۆسێ كورونایێ ده‌ستپێكرن.
ئه‌ڤ سال ب ئه‌گه‌رێ به‌ربه‌لاڤبوونا ڤایرۆسێ كورونایێ، سعودیێ بریار دا بتنێ رێكێ بده‌ته 10 هزار ئاكنجیێن وه‌لاتێ خوه پشكداریێ ل حه‌جێ دا بكه‌ن، ئه‌ڤه ژی د ده‌مه‌كی دایه كۆ سالا بووری نێزیكی دو ملیۆن و 500 هزار حاجیان پشكداری كربوو.
وه‌زاره‌تا حه‌ج و عومره‌یا سعودیێ ب هه‌ڤكاری ل گه‌ل وه‌زاره‌تا ساخله‌میێ، رێ و رێكارێن ساخله‌میێ یێن پێدڤی بۆ پاراستنا حه‌جیان بكار ئیناینه.
حه‌جیێن ئه‌ڤ سال د ده‌مه‌كیدا بریڤه دچن كۆ زێده‌تری 663 هزار كه‌سان ل جیهانێ ب ئه‌گه‌رێ ڤایرۆسێ كورونایێ گیانێ خوه ژ ده‌ست داینه.
ئەڤرۆ نیوز:
وەزارەتا ساخلەمیا هەرێما کوردستانێ ئامارێن نوو یێن کۆرۆنایێ بەلاڤکرن و گوتیە: 302 تووشبوویێن دی یێن کۆرۆنایێ هاتنە دەستنیشان کرن، 225 تووشبوویی چێبووینە و هەشت تووشبوویا ژی وەغەرکریە.
هەروەسا گۆتیە: دو هزار و 295 پشکنینێن تایبەت بۆ ڤایرۆسێ کۆرۆنایێ هاتینە کرن، ئەنجامێن پشکنینێن 302 کەسان پۆزەتیڤ بووینە و ژ وات ژی 139 ل هەولێرێ بووینە، 54 ل سلێمانیێ، 42 ل ئیدارا راپەرین، 28 ل ئیدارا گەرمیان، 24 ل دهۆکێ و 15 ل هەلەبجە.
هەروەسا 225 تووشبوویی چێبووینە کو 62 ل هەولێرێ نە، 134 ل سلێمانیێ، 9 ل گەرمیان، 15 ل هەلەبجە و 5 ل دهۆکێ.
ئەڤرۆ نیوز:
سەقاناسیا ھەرێمێ بلندترین پلا گەرمێ یا ئەڤرۆ سێشەمبی بەلاڤکریە و تێدا ھاتیە، کو بلندترین پلا گەرمێ ل کەرکوک و دوزخورماتوو بوویە،کو ٥۰ پلا سیلیزی بوویە.
رێڤەبەریا گشتی یا سەقاناسی و ئەردھەژان ل ھەرێما کوردستانێ بلندترین پلا گەرمێ یا ھاتیە تۆمار کرن بەلاڤکریە، لدووڤ وێ لیستێ کەرکوک و دوزخورماتوو ب ٥۰ پلەیان بلندترین پلا گەرمێ بوون و نزمترین پلە ژی ل کانیماسێ بوویە کو ۳٨ پلا سیلیزی بوویە.
پلا گەرمێ ل ھەولێرێ ٤۷ بوویە ، ل سلێمانیێ ٤٦ ، ل دھۆکێ ژی ٤٦ پلە بوویە.
ئەڤرۆ نیوز:
ئەڤرۆ سێشەمبی، وەزارەتا ساخلەمی و ژینگەها عیراقێ راگەهاند: دو هزار و ٥٦٢ حالەتێن نوو یێن کۆرۆنایێ، دو هزار و ١٩٧ حالەتێن چێبوونێ و ٧١ حالەتێن وەغەرکرنێ هاتنە تۆمار کرن.
هەتا نوکە ١١٥ هزار و ٣٣٢ کەس ل عیراقێ تووشی ڤایرۆسێ کۆرۆنایێ بووینە، ژ وێ هژمارێ چار هزار و ٥٣٥ کەسان وەغەر کریە، ٨١ هزار و ٦٢ کەس ژ وێ نەخۆشیێ چێبووینە.
ئەڤرۆ نیوز، رێوار محەمەد رەشید:
وەزارەتا دەرڤە یا عیراقێ د راگەهاندنەکێ دا ئاشکرا کر: کو ڤیزا راستەوخوە بۆ وەلاتیێن تورکیا دێ هێتە ڕاگرتن، ئەڤە ژی ژ ئەگەرێ وێ چەندێ یە کو تورکیا پاپەندی وێ رێککەفتنا بەری نوکە نەبوویە کو ل سالا 2009 هاتیەکرن کو رێ دهاتەدان وەلاتیێن عیراقێ بێ کو سەرەدانا قۆنسلخانا یان بالیۆزخانێن تورکیا بکەن دێ ڤیزێ وەرگرن.
وەزارەتا دەرڤە یا عیراقێ د هەمان راگەهاندن دا خویا کریە کو عیراق د چارچۆڤێ بەرژەوەندی و سەرخستنا هەڤکاریا دولایەنانە پاپەندی وان رێککەفتنا یە کو ب وەلاتان ڤە دهێتە گرێدان.
لدووڤ رێککەفتنا سالا 2009 یا کو دناڤبەرا عیراقێ و تورکیا دا هاتیەکرن وەلاتیێن هەر دو وەلاتان دشێن بێ کو سەرەدانا بالیۆزخانا و و قۆنسلخانان بکەن ل دەرگەهێن سنووری ڤیزا گەشتێ وەرگرن.
وەزارەتا دەرڤە یا عیراقێ ئاماژە دا وێ چەندێ کو ئەو رێککەفتن بۆ وێ چەندێ بۆ کو ئاسانکاری بۆ گەشتیارێن هەر دو وەلاتان بهێنەکرن، بەلێ تورکیا ژ لایێ خوە ڤە کارکرن ب ناڤەڕۆکا رێککەفتنێ راوەستاند ژ بەر ڤێ چەندێ حوکمەتا عیراقێ ژی بڕیار دا ئەو ژی ئەڤێ رێککەفتنێ ب راوەستینن.
وەزارەتا ژدەرڤە یا عیراقێ بالیۆزخانا خوە ل ئەنقەرە ل دۆر ڤێ چەندێ ئاگەهدارکریە داکو لایەنێن پەیوەندیدارێن تورکیا ئاگەهدار بکەت، هەروەسا گۆت: مە ژی بالیۆزخانا تورکیا ل بەغدا ل دۆر ڤێ بڕیارێ ئاگەهدارکریە.
نيشاندان