ئه‌ڤرۆ نیوز، مه‌حمود نهێلى:
فرۆكێن له‌شكه‌رێ تۆركیا پشتى نیڤرۆیا ئه‌ڤرۆ 19/6/2020 بوردومانا گه‌لیێ رێكان و گوندێ سیدان ل سنورێ ناحیا شێلادزێ كر و د ئه‌نجامێ دا ترۆمێله‌كا سڤیل كره ئارمانج و دوو كه‌س شه‌هید بووینه.
وارشین سه‌لمان رێڤه‌به‌رێ ناحیا شێلادزێ بۆ ئه‌ڤرۆ نیوز دیار كر، پشتى نیڤرۆ یا ئه‌ڤرۆ فرۆكه‌یێن توركیا بوردومانا ده‌ڤه‌رێ كریه و د ئه‌نجامێ دا ترۆمێله‌كا سڤیل كریه ئارمانج و دوو وه‌لاتى شه‌هید دبن كو ئاكنجیێن ناحیا شێلادزێ نه.
ئیقبال عومه‌ر كه‌س و كارێن قوربانیان بۆ ئه‌ڤرۆ نیوز دیاركر، كو ئێك ژ وانا كورخالێ وى یه و ته‌مه‌نێ وێ دورێن 25 سالایه و تره‌مێن وان بو نوژداریا داد ل ئامێدیێ هاتینه شاندن.
و ئاشكراكر، كو ئه‌و جهێ هاتیه بوردومانكرن گه‌له‌ك نێزیكى جهێ ئاكنجى بوونێ یه.
ئەڤرۆ نیوز، زنار تۆڤی:
سەربەست سەبری ئاکرەیی رێڤەبەرێ ناحیا کانی ماسێ بۆ مالپەرێ ئەڤرۆ نیوز دیار کر: ل رۆژا چارشەمبی وەلاتیەکێ گوندێ گیلکا یێ سەر ب ناحیا کانی ماسێ، یێ سەر ب قەزا ئامێدیێ ڤە، ژ بۆ ئەنجامدانا کارێن چاندنێ قەستا گوندێ خوە کریە، ئەو وەلاتی خۆجهێ کۆمەلگەها قەدشێ بوویە، خێزاندارە و د ژیێ 27 سالیێ دایه.
ناڤهاتی گۆت ژی: ئەڤە دەمێ دو رۆژان بوو، مالا وان چ ژ سەروبەرێ وی نە دزانی، پشتی لێگەریانێ، ئەڤرۆ کەسوکارێن وی تەرمێ وی دناڤا زەڤیەکێ دا ل ئاقارێ گوندی دیتیە، کو ژ ئالیێ فرۆکێن تورکی ڤە هاتیە شەهید کرن.
ئه‌ڤرۆ نیوز، ئێقبال عومه‌ر:
ده‌مه‌كێ كێم به‌رى نوكه باله‌فرێن شه‌رى یێن سوپایێ توركیا هژماره‌كا وه‌لاتیان ل ده‌ڤه‌را رێكان كرنه ئارمانج و دوو ژ وان شه‌هیدكرن.
وه‌لاتیه‌كێ شێلادزێ یه بۆ ئه‌ڤرۆ نیوز گۆت: (ده‌مه‌كێ كێم به‌رى نوكه باله‌فرێن شه‌رى یێن سوپایێ توركیا ده‌ڤه‌را نێروه‌ورێكان یا سه‌ر ب ناحیا شێلادزێ بۆردومان كر).
زێده‌تر گۆت: (بۆردمان ل گوندێ سیدان بوویه و باله‌فرا ترومبێلا دو كه‌سان بۆرمان كریه كو بخوه چوبوونه داران، ناڤێ ئێك ژ وان دیموكراته عمر و یێن دن ژى ناهێته نیاسین ژبه‌ركو هه‌موو سوتیه).
ئەڤرۆ نیوز:
وەزارەتا ساخلەمیا هەرێما کوردستانێ ئامارێن 24 دەمژمێرێن بوری بەلاڤکرن و راگەهاندیە: 224 کەسێن دی تووشی ڤایرۆسێ کۆرۆنا بوون، ب ڤێ چەندێ تووشبوویێن کۆرۆنا یێ ژ سێ هزار کەسان بورین.
هەروەسا تووشبوویێن نوو ب ڤی رەنگی بووینە، 134 حالەت ل سلێمانیێ، 25 ل گەرمیان، 47 ل هەولێرێ، 14 ل هەلەبجە و چار ژی ل دهۆکێ.
شەش کەسان ل سلێمانیێ و ئێکێ ل گەرمیان گیانێ خوە ژ دەستدایە، هەروەسا 94 تووشبووی باشبووینە، کو 67 ل هەولێرێ، 23 ل گەرمیان و چار ل دهۆکێ.
سەرجەمێ گشتی یێ تووشبوویێن کۆرۆنا یێ ل هەرێما کوردستانێ گەهشتە سێ هزار و 45 کەسان، ژ وان ژی هزار و 217 تووشبوویی باش بووینە، 82 تووشبوویان گیانێ خوە ژ دەستدایە، کو 70 ژ وان ل سنوورێ پارێزگەها سلێمانیێ و 12 ژی ل سنوورێ پارێزگەها هەولێرێ بوون.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگه‌هاند: شەش نەخۆشێن دی یێن کۆرۆنا یێ ل دهۆکێ ب تەمامی چارەسەربوون.
ئەڤرۆ 18/6/2020، شەش نەخۆشێن دی یێن ڤایرۆسێ کۆرۆنا یێ ل دهۆکێ کو د نەخۆشخانێ دا بوون، پشتی هەموو پشکنین هاتینە کرن، دیاربوویە کو ب تەمامی چارەسەربووینە و ب سلامەتی ل نەخۆشخانێ هاتنە دەرخستن و چوونە دناڤ کەسوکارێن خوە دا.
ب ڤێ چەندێ هژمارێن چارەسەربوویان گەهشتە 98 کەسان و 38 نەخۆش ژی ماینە د نەخۆشخانێ دا.
نيشاندان