سەرۆك بارزانی ل سەلاحەدین پێشوازی ل شاندەكێ دەولەتا ئیماراتێ ب سەرۆكایەتییا سەعید موبارەگ ئەلهاجری، وەزیرێ دەولەتێ و هنارتیێ تایبەتێ ئیماراتێ بۆ كاروبارێن ئابۆری بۆ هەرێما كوردستانێ كر.
شاندێ مێهڤان دوپاتی ل دۆستایەتی و هەلوەستێ سەركردایەتییا ئیماراتێ د پێشڤەبرنا هەڤبەندییان ل گەل هەرێما كوردستانێ كر و سلاڤێن سەرۆكێ ئیماراتێ و سەركردایەتییا وەلاتێ خوە گەهاندنە سەرۆك بارزانی.
سەرۆك بارزانی سوپاسییا حوكمەت و خەلك و سەركردایەتییا ئیماراتێ كر، كو هەردەم ب رێیا رێكخراوێن مرۆڤایەتی هاریكار و پشتەڤانێن كوردستانێ بووینە ب تایبەت ل دەمێ هاتنا سەدان هزار ئاوارەیان بۆ هەرێما كوردستانێ و هەروەسا سەرۆك بارزانی پێشوازی ل ب هێزكرنا دۆستایەتی و هەڤبەندیێن هەردو ئالییان كر.

ل رۆژا 11 ئیلۆنا 1961 مەزنترین شۆڕشا كوردی ب رێبەرییا بارزانیێ نەمر دەستپێكر و بۆ دەمێ 14 سالان ئەو شۆرەشە بەرهنگاری بزاڤێن داگیركاری یێن حوكمەتێن وی دەمی یێن ئیراقێ بوویە، تا كار گەهشتیە وێ چەندێ دەولەتا ئیراقێ دانپێدانێ ب مافێن گەلێ كورد بكەت و رێككەفتنا 11 ئادارا 1970 ئیمزا بكەت.
سەرۆك مەسعود بارزانی ل سالڤەگەڕا 64 یا شۆرشا ئیلۆنێ د پەیامەكێدا دبێژیت: شۆڕشا ئیلۆنێ بەرپەرەكێ زێرینێ بزاڤا رزگاریخوازا كوردستانێ و مەزنترین شۆڕشا سەرانسەرییا سیاسی و چەكداری و جەماوەرییا كوردستانێ بوو كو خەلكی كوردستانێ هاندا ب هێز و باوەری ب خوەبوونێ بەر ب ئەنجامێن نوو و ئاسۆیەكێ بەرفرهە پێنگاڤان ب هاڤێژیت و د ئەنجامدا دۆزا گەلێ كوردستانێ قووناغێن مەزن ببڕیت».
سەرۆك بارزانی دیاركر ژی: ئەڤ شۆرەشە ب رێبەرییا بارزانیێ نەمر بۆ ئێكەمین جار د دیرۆكێدا بناخەیەكێ ب هێز بۆ خەباتا هەڤپشك یا دەڤەرێن جودا جودا یێن كوردستانێ و هەموو تەخ و چین و پێكهاتەیێن كوردستانێ دانا، ئەوژی ژ پێخەمەت بەرگریكرنێ ژ دۆزا رەوا و مافێن خەلكێ كوردستانێ».
دیاركر ژی» شۆرشا ئیلۆنێ بۆ قووناغێن دی یێن خەباتا گەلێ كوردستانێ ژی ژێدەرا هێز و ئیلهامێ بوو و ئەزموون و دەستكەفتێن وێ شۆڕشا مەزن بۆ هەردەم دێ بەرچاڤرۆهنیێ دەتە خەباتا گەلێ كوردستانێ».
سەرۆك بارزانی گوت ژی» دەستخوەشی و رێز بۆ هەموو وان كادر و پێشمەرگە و خەباتكەران هەیە كو ب پێداگیری و وێرەكی و وەستییانا خوە دیرۆك و شانازی بۆ گەلێ خوە تۆماركری و هزاران سلاڤ ژی بۆ شەهیدێن شۆڕشا ئیلۆنێ و هەموو شەهیدێن رێیا ئازادییا كوردستانێ دهنێرین».
هەر ب ڤێ هەلكەفتێ نێچیرڤان بارزانی، سەرۆكێ هەرێما كوردستانێ پەیامەك بەلاڤكر و تێدا گوت» ل سالڤەگەڕا 64 یا شۆرشا ئیلۆنا مەزن، رێبەرێ شۆڕشێ و گەلێ كوردستانێ، بارزانیێ نەمر و هەموو وان سەركردە و پێشمەرگەیێن قەهرەمان و دلسۆزێن كوردستانێ دئینینە بیرا خوە و ب رێزڤە بیرئینانا وان دكەین كو پشكدار و هەڤپشك و هێزا شۆڕشێ بوون، نەمری بۆ گیانێ شەهیدان و سلاڤان بۆ بنەمال و كەسوكارێن وان دهنێرین».
سەرۆكێ هەرێمێ گوت ژی» شۆڕشا ئیلۆنا مەزن ل سەردەمەكێ ئالۆز و دژواردا كو ژ هەموو ئالییەكیڤە ستەم ل گەلێ كوردستانێ دهاتە كرن، بوویە بناغە و ناسنامەیا هزرا نەتەوەیی و نیشتمانی، گیانەكێ نوو بۆ رابوونێ و روو ب رووبوونا كرە بەر كوردستانێ, بوویە چەترا كۆمڤەكەرا هەموو تەخ و چینان و دەنگێ رەوا و دلێرێ ماف و ئازادییا گەلێ كوردستانێ گەهاندە هەموو جیهانێ و وەك مللەتەكێ زیندی و ژیاندۆست و ئاشتیخواز دیاربوو».
نێچیرڤان بارزانی ئاماژەكر» ب ڤێ هەلكەفتێ دوپاتیێ ل ئارمانج و پرەنسیپ و بهایێن بلند یێن شۆڕشێ ل ئازادیێ، دیموكراسیێ، پێكڤەییێ، هەڤدوقەبوولكرنێ، لێبۆرینێ و ئاشتیێ دكەین. وەك چاوان شۆڕشا ئیلۆنێ شۆڕشا هەموو پێكهاتەیێن كوردستانێ بوو، هەموویان پێكڤە ئێكڕێز و تەبا بۆ ئێك ئارمانج خەباتكر و قوربانی دان، ئەڤرۆ ژی بۆ پاراستنا ماف و دەستكەفتێن مە دڤێت ئەم هەموو پێكڤە كار بكەین تاكو گەل و وەلاتێ مە دگەهینینە كنارێ ئارامیێ».
د پەیاما مەسرور بارزانی، سەرۆكێ حوكمەتا هەرێما كوردستانێ دا ب هەلكەفتا سالڤەگەڕا 64 یا شۆڕشا ئیلۆنا مەزن دا هاتیە» ب رێزڤە بیرئینانا شۆڕشا ئیلۆنا مەزن ب رێبەرییا رێبەرێ مە یێ نیشتمانی بارزانیێ نەمر دكەین، كو شۆڕشەكا سەرانسەرییا خەلكێ كوردستانێ بوو ب هەموو نەتەوە و ئایین و پێكهاتەیێن جودا ڤە، ژ پێخەمەت بەرگریكرنێ ژ مافێن نەتەوەیی و نیشتمانی یێن گەلێ كوردستانێ و راوەستان دژی ستەم و داگیركاریێ».
مەسرور بارزانی دوپاتكر» ژ بەر خۆڕاگری و ئیرادەیا ب هێز یا خەلكێ كوردستانێ و ئێكگرتنا گەلێ كوردستانێ د شۆڕشا ئیلۆنێدا، چەندین دەستكەفتێن گرنگ ب دەستڤەهاتن كو گرنگترین دەستكەفت رێككەفتنا 11 ئادارا 1970 و نەچاركرنا رژێما ئیراقێ بوو كو دانپێدانێ ب مافێن گەلێ كوردستانێ بكەت».
سەرۆكێ حوكمەتا هەرێما كوردستانێ دیاركر ژی» ل سالڤەگەڕا 64 یا شۆڕشا ئیلۆنا مەزن، دوپاتیێ ل پێگیریبوونێ و بلندڕاگرتنا بهایێن گرنك یێن شۆڕشا ئیلۆنێ دكەین ژ ئێكگرتن و تەباییا هەموو پێكهاتە و تەخ و چینێن گەلێ كوردستانێ ژ پێخەمەت داكۆكیركرنێ ژ ماف و دەستكەفتێن مە یێن نیشتمانی و پاراستنا قەوارەیێ دەستووریێ هەرێما كوردستانێ».
د پشكەكا دی یا پەیاما سەرۆكێ حوكمەتا هەرێما كوردستانێدا هاتیە» سلاڤ ل گیانێ پاقژ یێ شەهیدێن شۆڕشا ئیلۆنێ و هەموو شەهیدێن كوردستانێ».

مەسرور بارزانی، سەرۆكێ حوكمەتا هەرێما كوردستانێ پێشوازی ل سەعید موبارەگ ئەلهاجری، وەزیرێ دەولەتێ و هنارتیێ تایبەتێ ئیماراتێ بۆ كاروبارێن ئابۆری بۆ هەرێما كوردستانێ كر و شاندێ دگەلدا كر.
مەسرور بارزانی ئاماژە ب گرنگییا هەڤبەندیێن دۆستانە و تایبەت د ناڤبەرا هەرێمێ و دەولەتا ئیماراتێدا كر و سوپاسییا شێخ محەمەد بن زاید، سەرۆكێ ئیماراتێ كر بۆ پشتەڤانی و هاریكاریكرنا هەرێما كوردستانێ و دەستنیشانكرنا هنارتییەكێ تایبەت بۆ كاروبارێن ئابۆری بۆ هەرێما كوردستانێ، كو نیشانا هەڤبەندیێن ب هێزن د ناڤبەرا هەردو ئالییاندا.
ئەلهاجری خواستا وەلاتێ خوە بۆ زێدەتر پێشڤەبرنا هەڤبەندییان ل گەل كوردستانێ د هەموو واراندنا دیاركر و ئاماژەكر كو هەرێمێ پێگەهەكێ گرنگ و تایبەت ل دەف سەركردایەتییا ئیماراتێ هەیە.

بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ راگەهاند: پشتی دانوستاندن ل گەل حوكمەتا عەبدولكەریم قاسمی نەگەهشتینە چو ئەنجامان، وی دەمی شۆڕەشا ئیلۆنا مەزن دەستپێكر، ئەگەر نە بارزانیێ نەمر ل گەل وێ چەندێ بوو كێشە ل گەل ئیراقێ ب دانوستاندنان بهێنە چارەسەركرن نەك ب شەڕی.
سەربەست لەزگین، بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ د پەیڤەكێدا ل خیڤەتگەها شۆڕەشا ئیلۆنێ ئەوا هاتیە ڤەكرن بۆ هزار گەنجان كو ب هەلكەفتا سالڤەگەڕا 64 یا شۆڕەشا ئیلۆنا مەزن ئەو خیڤەتگەهە بۆ دەمێ سێ رۆژان یا بەردەوام بوو، گوت ژی» خەباتا رزگاریخوازا گەلێ كورد زنجیرەیەكە و ژێك ناهێتە جوداكرن، دەمەكێ درێژ بەری شۆڕەشا ئیلۆنێ دەستپێكریە و یا بەردەوامە، قۆناغا شۆڕەشا ئیلۆنا مەزن گەلەك یا گرنگە و شانازیێ ب وێ دیرۆكا خوە دكەین، هیچ كەسەك نەشێت باسێ وێ دیرۆكێ بكەت هەكە باسێ دەستكەفت و قوربانیدان و خۆڕاگرییا وێ شۆڕەشێ نەكەت، كەس نەشێت خوە لابدەت ژ رژدبوونێ ل سەر ب دەستڤەئینانا مافێن گەلێ كورد، لەوما سالا 1958 وەستگەهەكا گەلەك گرنگە، كو شۆڕەشا 14 تیرمەهێ دورست بوو، دوماهی ب حوكمڕانییا مەلەكی هات و حوكمڕانییا كۆماری ل ئیراقێ ب رێبەرییا عەبدولكەریم قاسمی دەستپێكر، ئەڤە ژی وەرچەرخانەكا مەزن بوو و گوهۆڕینەكا مەزن ل سەر كوردستانێ و دەڤەرێ دروستكر، ل سەر ئاستێ نێڤدەولەتی ژی روودانەكا مەزن بوو».
سەربەست لەزگین گوت ژی» وی دەمی بارزانیێ نەمر و 500 پێشمەرگەیێن قەهرەمان ل ئێكەتییا سۆڤیەتی بوون، دەمێ ئەو گوهۆڕینە روودای، بارزانیێ نەمر ژ ئێكەتییا سۆڤیەتی پرۆسەكەیەكا پیرۆزباهیێ بۆ عەبدولكەریم قاسمی هنارت ژ بۆ وێ شۆڕەشا سەركەفتی ل ئیراقێ ئەنجامدی، وی ژی داخوازا زڤرینا بارزانیێ نەمر بۆ ئیراقێ كر، بارزانیێ نەمر ژی هەر زوو ب رێیا رۆمانیا چوو مسرێ، جەمال عەبدولناصر، سەرۆكێ مسرێ پێشوازییەكا گەرم ل بارزانیێ نەمر كر و رێزەكا مەزن لێ گرت، پاشی زڤری بەغدا، ل وێرێ ژی گەلێ ئیراقێ ب كورد و ئەرەبڤە پێشوازییەكا مەزن لێكر، بارزانیێ نەمر ل بەغدا ما، چەندین شاندێن جڤاكی و سیاسی ژ كوردستانێ چوونە بەغدا بۆ دیتنا بارزانیێ نەمر، مخابن ل سالا 1959 هندەك كێشەیان د ناڤبەرا حوكمەتا ئیراقێ و پارتی دیموكراتی كوردستان دەستپێكر، راستە هندەك بڕیارێن باش هاتبوونە دان، وەك دروستكرنا حزبان و ئازادییا رۆژنامەڤانی و شێخ ئەحمەد بارزانی هاتە ئازادكرن بۆ 12 سالێن زیندانكرنێ، ئەڤان بڕیاران كریگەرییا خوە هەبوو بۆ نێزیكبوونێ، پارتی ب ئازادی رێكخستنێن خوە بەلاڤ دكرن، هزاران خەلك ل دەوربەرێن پارتی و بارزانیێ نەمر كۆمبوون، بەلێ كێشە مەزن بوون، ئەوێن ل دەور و بەرێن عەبدولكەریم قاسمی، باس ل وێ چەندێ دكر كو بارزانیێ نەمر داخوازا سەربخوەیا كوردستانێ دكەت، ئەڤێ چەندێ وەكر دووركەفتن دروست ببیت».
بەرپرسێ مەكتەبا رێكخستنا پارتی ل پارێزگەها دهۆكێ گوت ژی» بارزانیێ نەمر گەلەك بزاڤ كر نێزیكبوون پەیدا ببیت، ل سالا 1959 جارەكادی بارزانیێ نەمر سەرەدانا مسرێ كر و جەمال عەبدولناسری وەك سەرۆك پێشوازی ل بارزانیێ نەمر كر، گەلەك رێز لێگرت و ل راگەهاندنێ ژی گەلەك رەنگڤەدان هەبوو، دەمێ زڤری خواست عەبدولكەریم قاسمی ببینیت، 10 رۆژان چاڤەڕێكر، ئەوژی رازی نەبوو، ب نەچاری زڤری بۆ بارزان، پارتی دیموكراتی كوردستان نامەیەكا دوور و درێژ بۆ عەبدولكەریم قاسمی نڤیسی و داخواز كر چارەسەرییا وان كێشەیێن هەین بكەت و نەبیتە ئەگەرێ دروستبوونا كێشەیێن دی ل ئیراقێ و كوردستانێ، بەلكو بگەهنە خالەكا هەڤپشك و مافێن كوردان د پاراستی بن، ئیراقا نوو كو دەستپێكری، مخابن هیچ ئەنجام نەبوو، ل دەستپێكا سالا 1960 هندەك بڕیار هاتنە دان، وەك دائێخستنا بارەگەه و رۆژنامە و چالاكیێن حزبی و گەلەك كارێن دی، خواست ب چەكی بەرسڤا كوردستانێ بدەن و رەوش خراب بوو، ل 9 ئیلۆنا 1961 ل زاخۆ سەرهلدان هاتە كرن و ژدەستێ رژێما وی سەردەمی هاتە رزگاكرن، هیچ هێزەكا ئیراقی تێدا نەما و كەفتە د دەستێ پێشمەرگەی و پارتی دا، پێشتر ژی چەندین هێرش ل سەر گەرمیان و خانەقین و قەرەداغ هاتنە كرن و رەوش دژوار بوو، لەوما ل 11 ئیلۆنا 1961 تۆپبارانكرنا سەرانسەری كوردستانێ دەستپێكر، خواستا وان ئەوبوو كوردستانێ ژناڤببەن، گەلەك چاڤێ وان ل سەر بارزان بوو، لەوما شۆڕەشا ئیلۆنێ دەستپێكر».

پەیڤدارێ حوكمەتا هەرێما كوردستانێ راگەهاند: حوكمەتا هەرێما كوردستانێ ل گەل وێ چەندێ دایە ب دانوستاندنێ كێشەیان ل گەل حوكمەتا ئیراقێ چارەسەر بكەت، چونكە ب گۆڕەی قانوونێ هاتیە دیاركرن ئەركێن حوكمەتا هەرێما كوردستانێ چنە و پێدڤییە چ رادەست بكەت بۆ وێ چەندێ بەغدا ژی ئەركێ خوە بجهبینیت.
پێشەوا هەورامی، پەیڤدارێ حوكمەتا هەرێما كوردستانێ گوت» بڕیارا 550 یا هەی، د ڤێ بڕیارێدا چەند مەرجەك بۆ حوكمەتا هەرێما كوردستانێ هاتینە دیاركرن، ئەو داهاتێ نەپەترۆلی و هنارتنا پەترۆلا هەرێما كوردستانێ دكەنە مەرجێ هنارتنا مووچەی، ئەو چارەسەرییا كێشەیا هنارتنا مووچەیێن ئەڤسالە دكەت، چونكە نابیت مووچەیێ چەند مەهان نەهێتە هنارتن و ب وی شێوەی بنێرین و بێ دەنگ بین، مە ئومێد ب دانوستاندنێ هەیە تا رێكبكەڤین، بەلێ هەكە نەهاتە كرن كۆمەكا بژاردەیان ل پێشبەری مە هەنە، وەكو ڤەكێشان ژ پرۆسەیا سیاسی و پشكدارینەكرن د هەلبژارتنێن جڤاتا نوونەرێن ئیراقێدا وپشكدارینەكرن د پرۆسەیا سیاسیدا، لەوما هەكە گەهشتینە وی قۆناغێ وی دەمی هیچ دانوستاندن نامینیت، ئەو داهاتێ ل بەردەستێ حوكمەتێ ژی هەی دێ ب دادپەروەرانە ل سەر خەلكی بەلاڤكەت، ئەو چەندە باشترە ژ وێ چەندێ زێدەتر بنپێكرنا مافێن خەلكێ هەرێما كوردستانێ بهێتە كرن و وەزیرەك ب كەیفا خوە بخوازیت وەك پارێزگەه رەفتارێ ل گەل هەرێما كوردستانێ بكەت».
پەیڤدارێ حوكمەتا هەرێما كوردستانێ رۆهنكر ژی» ل مادەیا 29 ژقانوونا ئیدارەیا مالی گەلەك ب ئاشكرا باس ل وێ چەندێ هاتیە كرن 50% ژ گومرك و باجا بۆ ئیراقێ بیت، رسوماتێن ل دووڤ قانوونێن هەرێما كوردستانێ هاتینە دیاركرن دێ 100% بۆ حوكمەتا هەرێما كوردستانێ بن، ئەوێن ل دووڤ قانوونا ئیراقێ دهێنە بجهئینان دێ 50% بۆ ئیراقێ بن، مە كێشە د وێ چەندێدا نینە و ل دوماهی كۆمبوونا جڤاتا وەزیرێن هەرێما كوردستانێ سەرۆكێ حوكمەتا هەرێمێ باس ل وێ چەندێ كر مە 100% ئەو داهات دڤێت».
هەورامی باس ل وێ چەندێ ژی كر» جڤاتا دەولەتێ بڕیارێ ل سەر هەرێما كوردستانێ نادەت، بەلكو تنێ دێ بۆچوونا وێ هێتە وەرگرتن، ئەوژی حوكمەتا ئیراقێ یا داخوازكری، نەك مە، تنێ بەرچاڤرۆهنییە و دێ ب حوكمەتا ئیراقێ هێتە دان، پێشتر دادگەها بلند یا فیدرالی ئێكلاكریە، نوكە ژی جڤاتا دەولەتێ، نزانین پاشی دێ چ لێهێت، لەوما دەستێوەردان تێدا دهێتە كرن، ب گۆڕەی قانوونێ هەموو یا هاتیە دیاركرن و یا رۆهن و ئاشكرایە».

جڤاتا وەزیرێن هه‌رێما كوردستانێ دوھـی ب سه‌رپه‌رشتییا مه‌سرور بارزانى، سه‌رۆكێ حكومه‌تا هه‌رێما كوردستانێ و ئاماده‌بوونا قوباد تاله‌بانى، جێگرێ سه‌رۆكێ حكومه‌تێ کۆمبوو و داخواز ژ بەغدا کر پێشنیازا وان دەربارەی داهاتێ نە نەفتی قەبوول بکەن.
د کۆمبوونێ دا جڤاتا وەزیران وەزارەتا دارایی راسپارد کو ل گەل دەستەیا خانەنشینی یا نیشتیمانی یا فیدرال، رێکارێن یاسایی بۆ دابینکرنا مووچەیێ خانشینییێ یێ هێزێن پێشمەرگەیی بگریتەبەر و ب زووترین دەم مووچەیێ وان یێ خانەنشینییێ یێ پاشئێخستی بهێتە مەزاختن.
ل دۆر داهاتێ نەپەترۆلی یێ هەرێمێ جڤاتا وەزیران داخوازێ ژ حکومەتا فیدرال دکەت؛ ل دووڤ یاسایێن فیدرال و بڕیارا دادگەها فیدرال پێشنیازێن مە بۆ ئێکلاکرنا بابەتێ داهاتی بکەتە بنەما، دا کو ئێدی مووچە و شایستەیێن دارایی نەهێنە گیرۆکرن.
ھەروەسا وەزارەتا سامانێن سروشتی بۆ دوبارە هنارتنا پەترۆلێ هاتە راسپاردن دا کو بزاڤێن چڕ بکەت و پەترۆل بهێتە هنارتن و ئاستەنگ نەمینن.
دیسا د کۆمبوونێ دا بڕیارا لێخۆشبوونا 15% یا پێشینە و قەرێن سەر ب بەنکێن وەزارەتا دارایی ڤە هاتە دان و هەتا 31-12-2025 دێ لێخۆشبوون یا بەردەوام بیت.

پارت و ئالیێن سیاسی یێن رۆژئاڤایێ كوردستانێ، پەیام و هەلوەستەیێن سەرۆك مەسعود بارزانی ل دۆر رەوشا كوردێن رۆژئاڤا ب (گرنگ و دیرۆكی) هەژمارتن و داخوازا ئێكڕیزییا زێدەتر كر.
ئالیێن سیاسی یێن كوردی ل رۆژئاڤایێ كوردستانێ، هەلوەستێ خوە ل بەرانبەر داخۆیانیێن سەرۆك بارزانی دەربارەی كوردێن رۆژئاڤایێ كوردستانێ نیشاندا. ئەو ئاماژێ ب وێ چەندێ دكەن، ئەڤە جارا ئێكێ نینە سەرۆك بارزانی داخوازا پشتەڤانیێ بۆ رۆژئاڤایێ كوردستانێ دكەت و پشتەڤانیێن وی ژی د دیرۆكێدا د تۆماركرینە، وەك چاوان پشتەڤانی ل كۆبانی كری.
سلێمان ئۆسۆ، ئەندامێ سەركردایەتییا جڤاتا نیشتمانییا كوردی ل سووریێ (ENKS) رۆلێ مەزن یێ سەرۆك بارزانی د پشتەڤانیكرنا رۆژئاڤایێ كوردستانێ د هەموو واراندا بلند هەلسەنگاند، ب تایبەتی بۆ پێكهاتەیێن دەڤەرێ و ئالیێن سیاسی.
ناڤبری ئاماژە ب وێ چەندێ كر» سەرۆك بارزانی ل دەستپێكا شۆڕەشا سووریێ پشتەڤانییا رۆژئاڤایێ كوردستانێ كریە و كاروانێ هاریكاریێ بۆ خەلكێ رۆژئاڤا هنارتییە بێی جوداهی بۆ عەرەب وكورد و سریانان و ئەڤە ژی هەلوەستەكێ رۆهن و ئاشكرایە بۆ خەمخوری و دلسۆزییا وی».
ژ ئالیێ خوەڤە، سالح گدۆ، سكرتێرێ پارتا چەپا كوردستانێ، سوپاسییا» هەلوەستێن دیرۆكی یێن سەرۆك بارزانی كر، ب تایبەتی دەستپێشخەرییا وی بۆ كۆبانی، كو بوویە ئەگەرێ ئێكگرتنا هەلوەستێن كوردی».
باس ل وێ چەندێ ژی كر» پشتەڤانییا سەرۆك بارزانی پشتی ڤەكێشانا رژێما بەشار ئەسەد و دامەزراندنا ئیدارەیا خوەبڕێڤەبەری و هنارتنا هێزا پێشمەرگەی بۆ كۆبانی ل سالا 2014، چو جاران ناهێتە ژبیركرن».
ئەڤە د دەمەكی دایە، ل چەند رۆژێن بۆری سەرۆك بارزانی د چاڤپێكەفتنەكێدا ل گەل كەنالێ (فرانس 24) دوپاتی ل پشتەڤانییا هەرێما كوردستانێ بۆ كوردێن رۆژئاڤایێ كوردستانێ كر و دیاركربوو د بەرهەڤن هەموو پشتەڤانیێ ل ئالیێن سیاسی یێن رۆژئاڤایێ كوردستانێ بكەن ب مەبەستا مسۆگەركرنا مافێن گەلێ كورد ل سووریا نوو. هەڤدەم داخوازا بجهئینانا رێككەفتنا 10 ئادارێ د ناڤبەرا مەزلووم عەبدی، فەرماندەیێ گشتیێ هەسەدە و ئەحمەد شەرع، سەرۆكێ قۆناغا ڤەگوهاستی یا سووریێ كربوو.

دوهی چارشەمبی 10/9/2025، نێچیرڤان بارزانی، سەرۆكێ هەرێما كوردستانێ، پێشوازی ل سەعید ئەلهاجری، وەزیرێ دەولەتێ و هنارتیێ تایبەت یێ ئیماراتێ بۆ كاروبارێن دارایی بۆ هەرێما كوردستانێ و شاندەكێ د گەلدا، كر.
سەرۆكایەتییا هەرێما كوردستانێ بەلاڤكر» د كۆمبوونەكێدا هەردو ئالییان سەرەرای بلند هەلسەنگاندنا دیرۆكا دۆستایەتی و هەڤبەندییان، خوەشحالییا خوە ب ئاستێ هەڤبەندیێن د ناڤبەرا هەردو ئالییاندا دەربڕی و دوپاتی ل خواستا دو ئالییانە بۆ زێدەتر پێشڤەبرن و بەرفرەهكرنا هاریكارییا هەڤپشك د ناڤبەرا واندا كر، ب تایبەتی ژی د وان واراندا كو بۆ هەردویان د گرنگن. هەر سەبارەت ڤێ چەندێ هەردو ئالییان هەبوونا قانوونەكا هاندەر و سەقایەكێ هاریكار بۆ وەبەرهێنانێ ل هەرێما كوردستانێ، ب گرنگ هەلسەنگاند» .
سەرۆكێ هەرێما كوردستانێ، سەرەرای سوپاسیكرنا سەركردایەتی و حوكمەتا ئیماراتێ بۆ هاریكاری و پشتەڤانییا وێ ل ئیراقێ و هەرێما كوردستانێ، دەستنیشانكرنا هنارتییەكا تایبەت یێ ئیماراتێ بۆ كاروبارێن ئابۆری بۆ هەرێما كوردستانێ، ب پێنگاڤەكا گرنگ هەژمارت كو گرنگییا هەڤبەندیێن هەردو ئالییان نیشان ددەت.
نێچیرڤان بارزانی هەروەسا رێز و سوپاسییا خوە بۆ سەرۆكێ ئیماراتێ، شێخ محەمەد بن زاید ئال نەهیان دوپاتكر كو ل نیسانا بۆری ل كۆمبوونەكا دوقۆلیدا ل ئەبوزەبی، دوپاتی ل هنارتنا هنارتیێەكێ تایبەتێ ئیماراتێ بۆ وەبەرهێنانێ بۆ هەرێما كوردستانێ كربوو.
سەرۆكایەتییا هەرێمێ بەلاڤكر ژی» د كۆمبوونەكێدا باس ل دەلیڤەیێن سەرماگۆزاری و وەبەرهێنانێ و كار و چالاكیێن كۆمپانی و كەرتێ تایبەت یێ ئیماراتی ل هەرێما كوردستانێ هاتە كرن دەربارەی ئاسۆیێ بەرفرەهكرنا وان د وارێن جودا جودا جودا، بیر و بۆچوون لێكگۆهارتن. هەر بۆ وێ مەبەستێ سەرۆكێ هەرێما كوردستانێ هەموو بەرهەڤی بۆ پێشكێشكرنا هەموو جۆرێن پشتەڤانیێ و هاریكارییەكا پێدڤی یا ئالێن پەیوەندیدارێن هەرێما كوردستانێ، دوپاتكر».
هەمەجۆركرنا ئابۆری، هەبوونا روانگەهەكا رۆهنە بۆ وەبەرهێنانا ئیماراتی ل ئیراقێ و هەرێما كوردستانێ، ئابۆرێ بەردەوام، هەڤبەندیێن ئیراقێ ل گەل ئیماراتێ و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو كو هەژمارەكا بەرپرسێن هەرێما كوردستانێ، بەرهەڤ ببوون.

سەرۆكایەتییا هەرێما كوردستانێ بەیاننامەیەك ل دۆر هێرشا ئیسرائیلێ ل سەر دەوحە پایتەختێ وەلاتێ قەتەر بەلاڤكر و تێدا دبێژیت: ئاسایش و ئارامییا دەڤەرێ د ئێخیتە د مەترسیێدا.
سەرۆكایەتییا هەرێما كوردستانێ د بەیاننامەیا خوە دا گوت» ب تمامی پشتەڤانێن قەتەرێ نە و داخوازێ ژ جڤاكا نێڤدەولەتی دكەین هەموو بزاڤان بكەت بۆ رێگریێ ل وان كاران و ڤەگەراندنا ئاشتێ و ئارامیێ بۆ دەڤەرێ».
د بەیاننامەیێدا هاتیە « هێرشا ئیسرائیلی ل سەر دەوحە پرۆتەستۆ دكەین كو ئاسایش و ئارامییا دەڤەرێ د ئێخیتە د مەترسیێدا. ب تمامی پشتەڤانێن قەتەرێ نە و داخوازێ ژ جڤاكا نێڤدەولەتی دكەین هەموو بزاڤان بكەت بۆ رێگریكرنێ ل وان كاران و ڤەگەراندنا ئاشتیێ و ئارامیێ بۆ دەڤەرێ».

قونسلا گشتییا ئەمریكا ل هەولێرێ راگەهاند: هەرێما كوردستانێ سەقایەكێ باش و گونجای هەیە بۆ بازرگانیێ و دخوازین وەبەرهێنانا زێدەتر ل هەرێما كوردستانێ بكەین.
ویندی گرین، قونسلا گشتییا ئەمریكا ل هەولێرێ گوت» ژۆرا بازرگانییا ئەمریكا یا پێگیرە ب وێ چەندێ هەڤبەندییەكا ئابوورییا ب هێز د ناڤبەرا ئەمریكا و هەرێما كوردستانێدا دروست بكەت، دخوازین هەڤبەندیێن خوە ل گەل هەرێما كوردستانێ ب هێزتر بكەین».
قونسلا گشتییا ئەمریكا ل هەولێرێ رۆهنكر ژی» پێدڤییە زێدەتر وەبەرهێنانێ ل هەرێما كوردستانێ بكەین، چونكە سەقەیاكێ گەلەك باش یێ بازرگانی ل هەرێما كوردستانێ هەیە، هەڤدەم هاتنا شاندەكێ بازرگانیێ ئەمریكی بۆ هەرێما كوردستانێ رەنگڤەدانا هەڤبەندییەكا ب هێزە د ناڤبەرا ئەمریكا و هەرێما كوردستانێدا، هەروەسا هەرێما كوردستانێ خواستەكا مەزن بۆ وەبەرهێنان و بەرهەمێن ئەمریكا هەیە».
قونسلا گشتییا ئەآمریكا ل هەولێرێ دوپاتی ل وێ چەندێ ژی كر» ژۆرا بازرگانییا ئەمریكا ب رێكا دروستكرنا هەڤبەندییان دێ بیتە جهێ پڕكرنا وان پێدڤییان».