جێگرێ سەرۆكێ جڤاتا نوونەرێن ئیراقێ ئاشكراكر، رۆژا دوشەمبی كۆمبوون ل بەغدا بۆ چارەسەركرنا كێشەیا مووچەی بەردەوامبوون، دوپاتكر ژی كو دانوستاندنێن د ناڤبەرا هەرێما كوردستانێ و حوكمەتا فیدرال قۆناغێن گەلەك باش یێن دەرباز كرین.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ گوت» ئارمانجا سەرەكییا سەرەدانا مەحموود مەشهەدانی، سەرۆكێ جڤاتا نوونەرێن ئیراقێ بۆ هەولێرێ ژبۆ چارەسەركرنا كێشەیا مووچەیێ فەرمانبەرێن هەرێما كوردستانێ بوو».
پتر گوت» تەوەرێ سەرەكیێ هەموو كۆمبوونێن مەحموود مەشهەدانی ل گەل سەرۆك بارزانی و نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، باسكرن بوو ل چارەسەركرن و دابینكرنا مووچەیێ فەرمانبەران د زووترین دەمدا».
شاخەوان عەبدوللا دوپاتكر ژی» سوپاس بۆ خودای دانوستاندنان قۆناغێن گەلەك باش بڕینە، ل رۆژا دوشەمبی ل بەغدا كۆمبوون د بەردەوام بوون بۆ وێ چەندێ هەردو ئالی بگەهنە رێككەفتنێ».
جێگرێ سەرۆكێ جڤاتا نوونەرێن ئیراقێ ئاماژە ب وێ چەندێ ژی كر» ب سوپاسیڤە ژ پێخەمەت چارەسەركرنا كێشەیا فەرمانبەرێن هەرێما كوردستانێ، مەسرور بارزانی، سەرۆكێ حوكمەتا هەرێمێ ب خوە گەلەك یێ هاریكار بوو تاكو وی ئاستی هندەك جاران دەستبەرداری هندەك مافێن قانوونی یێن هەرێمێ بوو پێخەمەت وێ چەندێ».

شیرەتكارەكێ بەرێ یێ سەرۆكێ ئەمریكی دۆنالد ترەمپ، پێشنیازا ئیمزاكرنا رێككەفتنەكا بەرگرییا هەڤپشك دكەت د ناڤبەرا هەرێما كوردستانێ و هێزێن سووریا دیموكرات (هەسەدە) بۆ روو ب رووبوونا گەفێن میلیشیا.
وەلید فارس، شیرەتكارێ بەرێ یێ سەرۆكێ ئەمریكی دۆنالد ترەمپ، ل تۆرا جڤاكییا ئێكس بەلاڤكر» پێدڤییە هێزێن سووریا دیموكرات ل سووریێ و حوكمەتا هەرێما كوردستانێ ل ئیراقێ، دژی گەفێن میلیشیێن جیهادی ل سنوورێن نێڤدەولەتی، رێككەفتنەكا بەرگرییا هەڤپشك ئیمزا بكەن».
وەلید فارسی ئاماژە ب رێككەفتنا سایكس – بیكۆ كر و گوت» مادەم هندەك كەس كار بۆ ژناڤبرنا سایكس – بیكۆ دكەن، باشە، بلا پێداچوون ل بن قانوونا نێڤدەولەتی و پەیمانا نەتەوەیێن ئێكگرتی دەستپێبكەت».
شیرەتكارێ بەرێ یێ سەرۆكێ ئەمریكی هەر ئێك ژ مەسرور بارزانی، سەرۆكێ حوكمەتا هەرێما كوردستانێ و مەزلووم عەبدی، فەرماندەیێ گشتیێ هێزێن سووریا دیموكرات، ل گەل هەژمارەكا سیناتۆر و بەرپرسێن ئەمریكی تاك كرن، ژ وان ژی وەزارەتا بەرگرییا ئەمریكی و سەرۆكێ جڤاتا نوونەرێن ئەمریكی.
وەلید فارس، شرۆڤەكارەكێ سیاسیێ ئەمریكییە و ل هەوا هەلبژارتنێن 2016 شیرەتكارێ دۆنالد ترەمپی بوو، ئەو ب شرۆڤەیێن ل سەر پرسێن رۆژهەلاتا ناڤین و دژەتیرۆرێ یێ ناڤدارە.

كۆمسیارییا بلند یێ نەتەوەیێن ئێكگرتی بۆ پەنابەران، دەستخوەشی ل حوكمەتا هەرێما كوردستانێ كر، بۆ وێ بڕیارێ كو هەڤوەلاتیێن سووری یێن ئاكنجی ل هەرێما كوردستانێ مۆلەتا 60 رۆژی هەیە دشێن ب هاریكارییا حوكمەتا هەرێما كوردستانێ ڤەگەرن وەلاتێ خوە.
كۆمسیارییا بلند یا نەتەوەیێن ئێكگرتی بۆ پەنابەران، راگەهاند» بڕیارا مۆلەتا 60 رۆژان بۆ هەموو پەنابەر و هەڤوەلاتیێن سووری یێن ئاكنجی ل هەرێما كوردستانێ، كو ژ ئالیێ حوكمەتا هەرێما كوردستانێ هاتیە دان، رێكەكا قانوونی و ئاسانكاری بۆ پەنابەران دابین دكەت بۆ زڤرینا وان، ب تایبەتی بۆ ئەوێن ڤێزەیا وان دەربازبووی یان نەشیاینە مۆلەتا نشینگەهێ نوو بكەن، د ڤی دەمیدا سزایێ زێدەتر مانێ وەك ئەوا رێكپێدای دێ هێنە بەخشین، ئەڤە ژی بەربەستەكێ بەرچاڤ بۆ گەلەك ژ تاك و خێزانان لاددەت».
كۆمسیارییا بلند یا نەتەوەیێن ئێكگرتی بۆ پەنابەران ئاماژە ب وێ چەندێ ژی كر» 260 هزار پەنابەرێن سووری ل هەرێما كوردستانێ یێن هاتینە تۆماركرن، پشتی تۆماركرنێ پەنابەر دشێن پەیوەندیێ ب رێڤەبەریێ نشینگەهێ بكەن بۆ ب دەستڤەئینانا بەلگەنامەیا دەرچووی یا حوكمەتێ، ئەڤە ژی دێ رێكخوەشكەر بیت بۆ دەستراگەهشتن ب كۆمەكا خزمەتگوزاریێن گشتی و هاریكارییان د دەمێ مانا وان ل ئیراقێ، هەروەسا شیانێن هەموو هەڤوەلاتیێن سووری ب پەناخوازان و پەنابەرانڤە بۆ بدەستڤەئینانا ڤێ بەلگەنامەیێ بێی وێ چەندێ روو ب روویێ هیچ سزایەكی ببن».
كۆمسیارییا بلند یا نەتەوەیێن ئێكگرتی بۆ پەنابەران باس ل وێ چەندێ ژی كریە» ئەڤ بڕیارە دێ بیتە ئەگەرێ وێ چەندێ هەڤوەلاتیێن سووری ب رێكەكا ب ساناهی بزڤرن، یان ب رێكا فرۆكخانەیا نێڤدەولەتییا هەولێرێ، یان ب رێكا دەرگەهێ فیشخابوور یێ سنووری».
دهێتە زانین ئەو بڕیارا حوكمەتا هەرێما كوردستانێ ل 1 خزیرانا 2025 كەفتییە د وارێ بجهئینانێدا.

سەرۆکێ گشتی یێ پارتا سوسیالیست یا کوردستانێ دیار دکەت، رادەستکرنا چەکان ژ ئالیێ پەکەکێ دەستپێکەکا گەلەک گرنگە ژ بۆ چارەسەرکرنا پرسا کوردی، دەولەتا تورکیا ژی گەهشتیە ڤێ باوەریێ کو بەردەوامیا شەڕی دێ مەترسیێن خوە یێن مەزن بۆ تورکیا هەبن.

بایرام بۆزیەل سەرۆکێ گشتی یێ پارتا سوسیالیست یا کوردستانێ سەبارەت ب پێشڤەچوونێن نها ل تورکیا و باکورێ کوردستانێ دیار کر، قووناغەکا گەلەک گرنگ دەستپێکریە، هەر کەس دزانیت هەبوونا شەڕێ چەندین سالان د ناڤبەرا پەکەکێ و دەولەتا تورکیا دا زیانێن خوە یێن گەلەک مەزن ژ بۆ کوردان و تورکیا هەبوویە، لێ نها قووناغەکا نوو دەستپێکریە و پەکەکە دێ چەکێن خوە رادەست کەت یان ژی ژناڤ بەت و گۆت: (ژناڤبرنا چەکان ژ ئالیێ پەکەکێ ڤە دەستپێکەکا نوو و گرنگە، ئەم دزانین هەردەم بەرپرسێن تورکیا دبێژن هەتا شەڕ و توندوتیژی هەبیت ئەو نەشێن ژ بۆ چارەسەرکرنا پرسا کوردی چو پێنگاڤان بهاڤێژن، لێ نها رەوشەکا نوو دهێتە پێش و پشتی شەڕ نەما دێ قووناغەکا نوو ل تورکیا دەستپێکەت، کو ب هەموو رەنگەکێ د بەرژەوەندیا کوردان دایە).
ناڤهاتی د بەردەوامیا ئاخڤتنا خوە دا ئەو یەک ژی دیار کر، پشتی نەمانا شەڕی کورد دێ ب رێیێن سیاسی و دیموکراسیێ داخوازا مافێن خوە کەن، وی دەمی ئاستەنگێن ل هەمبەر خەباتا سیاسی یا گەلێ کورد ژی ل تورکیا نامینن و تورکیا نەچارە هەبوونا کوردان قەبوول بکەت، هێزێن سیاسی و نەتەوەیی یێن کورد وی دەمی دشێن پتر کار و خەباتێ بۆ بدەستڤەئینانا مافێن رەوا یێن گەلێ کورد ل تورکیا بکەن و گۆت: (ژ بەر ڤێ یەکێ ژی ئەم دبێژین نەمانا شەڕی ژ بۆ کوردان گەلەک گرنگە، کورد دشێن ب رێیا خەباتا سیاسی و پەرلەمانی دەستکەفتیێن گەلەک مەزن بدەستڤە بینن و ژ بەر ڤێ یەکێ ژی نها پڕانیا کوردان ل تورکیا پشتەڤانیێ ل قووناغا ئاشتیێ دکەن و هیڤیخوازن قووناغا نها بەردەوام بیت و بگەهیتە ئەنجامەک باش).
سەرۆکێ گشتی یێ پارتا سوسیالیست یا کوردستانێ د دووماهیا ئاخڤتنا خوە دا ئەو یەک ژی دیار کر، رادەستکرنا چەکان ژ ئالیێ پەکەکێ ڤە ناهێتە رامانا هندێ، کو پرسا کوردی ل تورکیا چارەسەر بوویە، رەنگە هندەک کەس وەسا بدەنە دیار کرن، کو پشتی شەڕ نەما ئێدی پرسا کوردی ژی چارەسەر بوو، لێ وەسا نینە و گۆت: (پشتی رادەستکرنا چەکان کورد دێ دەست ب قووناغەکا نوو کەن، ئانکو قووناغەکا نوو یا خەباتێ بۆ بدەستڤەئینانا مافێن گەلێ کورد ل تورکیا دەستپێ دکەت، ئەو یەک ژی بێگومان دێ ب رێیا خەباتا سیاسی و پەرلەمانی بیت، هێزێن سیاسی یێن کوردی ل تورکیا دشێن بێی چو ئاریشەیەکێ خەباتێ بکەن).

سەرۆك بارزانی د پێشوازییا مەحموود مەشهەدانی، سەرۆكێ جڤاتا نوونەرێن ئیراقێ، دووپاتی ل چارەسەركرنا كێشەیان د چارچۆڤەیێ دستووریدا كر.
دوهی ئێكشەمبی 6/7/2025 ل سەلاحەدین سەرۆك مەسعود بارزانی پێشوازی ل شاندەكێ جڤاتا نوونەرێن ئیراقێ ب سەرۆكایەتییا مەحموود مەشهەدانی، سەرۆكێ جڤاتا نوونەران كر.
د دیدارەكێدا گەنگەشە و لێكگۆهارتنا بیر و بۆچوونان ل دۆر رەوشا سیاسییا ئیراقێ و كێشەیێن د ناڤبەرا حوكمەتا ئیراقا فیدرال و حوكمەتا هەرێما كوردستانێدا، هەروەسا بڕیارا بڕینا مووچەیێ فەرمانبەرێن هەرێما كوردستانێ هاتە كرن و دووپاتی ل وێ چەندێ هاتە كرن كو پێدڤییە د چارچۆڤەیێ دستووری و ل بەرچاڤ وەرگرتنا بنەمایێن هەڤشكیێ و هەڤسەنگیێ و لهەڤهاتنێ كێشە بهێنە چارەسەركرن و ب هیچ شێوەیەكی ژی قووتێ هەڤوەلاتیێن هەرێما كوردستانێ تێكهەلی ناكۆكیێن د ناڤبەرا ئالیێن سیاسی و هەردو حوكمەتێن فیدرال و هەرێما كوردستانێ نەهێنە كرن و ب زووترین دەم كێشەیا مووچەی و شایستەیێن دارایی یێن هەرێما كوردستانێ بهێتە چارەسەركرن.
هەلبژارتنێن داهاتی یێن جڤاتا نوونەرێن ئیراقێ و هەماهەنگی د ناڤبەرا ئالییاندا ژ پێخەمەت چارەسەركرنا كێشەیان و راستڤەكرنا شاشی و كێماسیێن د ناڤا پرۆسەیا سیاسییا ئیراقێدا تەوەری دی یێ دیدارێ بوون.

دوهی ئێكشەمبی 6/7/2025 نێچیرڤان بارزانی، سەرۆكێ هەرێما كوردستانێ، پێشوازی ل مەحموود مەشهەدانی، سەرۆكێ جڤاتا نوونەرێن ئیراقێ كر.
د كۆمبوونەكێدا هەڤبەندیێن هەولێری- بەغدا و بزاڤێن و دانوستاندنێن بۆ چارەسەركرنا كێشەیان ب تێكگەهشتنێ و ل سەر بنەمایێ دستوورێ و رێككەفتنان هاتنە گەنگەشەكرن، هەروەسا دەرباەری رەوشا گشتییا ئیراقێ، بیر و بۆچوون هاتنە لێكگۆهارتن.
هەردو ئالی هەڤڕابوون ل سەر گرنگییا گەهشتنێ ب رێكەچارەیەكا گونجای بۆ كێشەیا مووچەیێ فەرمانبەرێن هەرێما كوردستانێ، ب تایبەتی د ڤێ قۆناغا هەستیاردا. سەبارەت ڤێ چەندێ هیڤی و گەشبینییا خوە ب بزاڤ و هەبوونا نەخەرێكەكێ بۆ چارەسەریێ نیشادا، هەروەسا هەردو ئالییان دوپاتكر كو چارەسەركرنا پرسان ل گەل هەرێما كوردستانێ، د بەرژەوەندییا هەموو ئیراقێ دایە.
مەشهەدانی، سوپاسییا رۆلێ ئەرێنی و بزاڤێن بەردەوام یێن سەرۆكێ هەرێما كوردستانێ بۆ تێكگەهشتن و نێزیككرنا ئالییان و دیتنا هەڤپشكییان بۆ چارەسەریێ، كر.
ژ ئالیێ خوەڤە، نێچیرڤان بارزانی، سەرەرای سوپاس و پێزانینان بۆ مەشهەدانی و خەمخۆری و بزاڤێن وی ژ پێخەمەت چارەسەریێ، دووپاتكر كو دێ د بزاڤێن خوە دا بۆ گەهشتنێ بۆ چارەسەریێ بەردەوام بیت.
د تەوەرەكێ دا یێ كۆمبوونێدا، باس ل هەلبژارتنێن گشتیێ یێن داهاتی یێ ئیراقێ هاتە كرن.

مەسرور بارزانی، سەرۆكێ حوكمەتا هەرێما كوردستانێ بەهینامەیەك ئاراستەی میر (هەرمان میرزا بەگ) وەكیلی میرێ ئێزدییان كر ژ بەر مالئاڤاهیكرنا دایكا وی و تێدا هەڤخەمییا خوە بۆ دیاركر.
د پەیاما سەرۆكێ حوكمەتا هەرێمێ بۆ هەرمان میرزا بەگ دا هاتیە» ژ بۆ وەغەرا دووماهیێ یا دایكا هەوە (ئەلماس عەلی بەگ)، بەهی و سەرەخوەشیێ ل مالباتا هەوە یا بەرێز دكەم و هەڤپشكێ خەما هەوەمە، خودایێ مەزن گیانێ وێ ب بەحەشتێ شاد بكەت و هەدارێ ب هەوە ببەخشیت».

دوهی ئێكشەمبی 6/7/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل مەحموود مەشهەدانی، سەرۆكێ جڤاتا نوونەرێن ئیراقێ كر.
د كۆمبوونەكێدا، كو شاخەوان عەبدوللا، جێگرێ سەرۆكێ جڤاتا نوونەرێن ئیراقێ و پەرلەمانتار زیاد خەفاجی، سەرۆكێ لژنەیا دەستپاكیێ ل جڤاتا نوونەران بەرهەڤ بووین، دانوستاندن ل دۆر گرنگییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالدا، ب تایبەتی بابەتێ مووچەی و شایستەیێن دارایی یێن فەرمانبەرێن هەرێما كوردستانێ هاتە كرن.
هەردو ئالی د هەڤڕابوون ل سەر وێ چەندێ نابیت ب هیچ شێوەیەكی بابەتێ مووچەی، تێكهەلی هیچ كێشە و ناكۆكییەكا سیاسی بهێتە كرن و فەرمانبەرێن هەرێما كوردستانێ باجا وان ناكۆكییان بدەن، كو ب شێوەیەكێ نەدادپەروەرانە رەفتار ل گەل خەلكێ هەرێما كوردستانێ هاتیە كرن.
هەردو ئالییان دووپاتی ل وێ چەندێ كر كو پێدڤییە د زووترین دەمدا، كێشەیا مووچەی بهێتە چارەسەركرن و شایستەیێن دارایی یێن هەرێما كوردستانێ بهێنە هنارتن. سەبارەت ڤێ چەندێ دانوستاندنێن د ناڤبەرا هەردو حوكمەتێن فیدرال و هەرێما كوردستانێ د بەردەوامن بۆ وێ ئێكێ ل ڤان چەند رۆژاندا، كێشە بهێتە چارەسەركرن.
د تەوەرەكێ دی یێ دیدارێدا، دووپاتی ل پێدڤییا رێزگرتنێ ل سیستەمێ فیدرالیێ ئیراقێ و مافێن دستووری یێن قەوارەیێ هەرێما كوردستانێ هاتە كرن.

وەزارەتا ناڤخوە ل هەرێما كوردستانێ راگەهاند: مخابن هەست دكەین جۆرەكێ خوەڤەدزینێ ژ بەرپرسیارەتیێ هەیە بەرامبەر وان زێدەگاڤیێن ئەمنی كو ل دژی هەرێما كوردستانێ دهێنە كرن.
وەزارەتا ناڤخوە ل حوكمەتا هەرێما كوردستانێ، رۆهنكرنەك بەلاڤكر و تێدا هاتیە، ئەو چاڤەڕێبوونا ژ ئالیێن پەیوەندیدارێن حوكمەتا فیدرال، د دەمێ هەبوونا گەفان ل سەر هەرێما كوردستانێ یان هەر دەڤەرەكا دی یا ئیراقێ هەیە، ل شوونا وەرگرتنا پێرابوونێن پێدڤی و رێكگرتنێ ل دووبارەنەكرنا گەفان و سزادانا تاوانباران، بەلێ مخابن هەست دكەین جۆرەكێ خوەڤەدزینێ ژ بەرپرسیارەتیێ هەیە بەرانبەر وان زێدەگاڤیێن ئەمنی كو ل دژی هەرێما كوردستانێ دهێنە كرن.
وەزارەتا ناڤخوە گوت ژی» ل سالێن بۆری ژی دا كو ب دەهان جاران هەرێما كوردستانێ تووشی هێرشا درۆن و مووشەكان دبوو، هەرچەندە ئاراستە و ژێدەرێ مووشەك و درۆنان ژی د دیاربوون و چەندین جاران بۆ دیاركرنا راستییان لژنەیا هەڤپشك د ناڤبەرا حوكمەتا هەرێما كوردستانێ و حوكمەتا فیدرالدا دروست بوون، بەلێ دیسان مخابن نە دەرئەنجامێن ڤەكۆلینان بۆ رایا گشتی هاتنە ئاشكراكرن، نە كەس ژی ل سەر وان تاوانان هاتە سزادان، بەلكو هیچ پێرابوونەك ژی ل بەرانبەر هیچ ئالییەكی نەهاتە كرن، د دەمەكیدا بلندترین ئاستێ هەماهەنگیێ د ناڤبەرا هەردو حوكمەتێن هەرێمێ و بەغدایێ هەبوو و بەلگەیێن رۆهن و ئاشكرا ژی ل بەردەست هەبوون».
وەزارەتا ناڤخوە ل حوكمەتا هەرێما كوردستانێ راگەهاند ژی» سەقایێ سیاسی و بیر و بۆچوونێن سیاسی یێن ئالییان ل هەر رەوشەكێدا بیت، پاراستنا ئاسایشا وەلاتی و رێكگرتن ل ئارمانجگرتنا ژیانا هەڤوەلاتییان و سەروەری و ئارامییا وەلاتی، ئەركێ بەراهیێ یێ دامودەزگەهێن فەرمی یێن هەردو حوكمەتێن فیدرالییا ئیراقێ و حوكمەتا هەرێما كوردستانێ نە».
ئەڤە د دەمەكیدایە، ل رۆژا ئەینییا بۆری 4/7/2025، وەزارەتا ناڤخوە ل حوكمەتا هەرێما كوردستانێ راگەهاندبوو» بەری دو رۆژان، درۆنەك ل دەڤەرەكا چۆل ل نێزیك هەولێرێ كەفتە خوار، ئەڤ هێرشە ژی ژ ئالیێ هندەك گرۆپێن حەشدا شەعبی ب مەبەستا ئاژاوەگێریێ دهێنە ئەنجامدان و پێدڤییە ئالیێن پەیوەندیدار ل حوكمەتا فیدرالی سنوورەكی بۆ ڤان كارێن تێكدەرانە دابنیت و پێرابوونێن قانوونی بەرانبەر تاوانباران بهێنە وەرگرتن.

پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: حوكمەتا هەرێما كوردستانێ دخوازیت ب رێكا دانوستاندنێ كێشەیان ل گەل بەغدا چارەسەر بكەت ب شێوەیەكێ ریشەیی نەك مەهانە ئەو كێشە دوبارە ببن.
ڤیان دەخیل، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» ئەم وەكو هەرێما كوردستانێ دخوازین ب رێكا دانوستاندنێ كێشەیا د ناڤبەرا هەرێما كوردستانێ و بەغدایێ دا ل دۆر مافێ خەلكێ كوردستانێ بهێتە چارەسەركرن، بەلێ بەغدا پێگیری رێككەفتنان نابیت، ئەگەر نە حوكمەتا هەرێما كوردستانێ پێگیری هەموو رێككەفتنایە و ئەركێن خوە بجهئیناینە، بەلێ ئەو نە هنارتنا مووچەی وەكو كارتەكا سیاسی بەرامبەر خەلكێ هەرێما كوردستانێ بكاردئینن، كو ماف نینە ب وی شێوەی رەفتارێ ل گەل هەرێما كوردستانێ بكەن و مووچەیێ خەلكێ هەرێما كوردستانێ نە هنێرن».
پەیڤدارا فراكسیۆنا پارتی دیموكراتی كوردستان گوت ژی» بەغدا بەردەوام بەهانەیان ل بەرامبەر هەرێما كوردستانێ دئینیت ژ داهاتێ ناڤخوە و خالێن سنووری و پەترۆلێ، هەموو ژی بەهانەنە و وەكو كارتەكا فشارێ بۆ مەرەمێن سیاسی ل سەر هەرێما كوردستانێ، چونكە ئەم نێزیكی هەلبژارتنان بووینە و دخوازن ب وی جۆری دەنگێن زێدەتر ل ئیراقێ ب دەستڤەبینن، لەوما نابیت مووچەیێ فەرمانبەران وەكو كارتەك بۆ مەرەما هەلبژارتنان بكاربینن، چونكە نوكە هەموو كارەكی دكەن بۆ وێ چەندێ بشێن دەنگان د هەلبژارتناندا ب دەستڤەبینن، هندەك ئالی ژی هەموو رێكان دژی هەرێما كوردستانێ بكاردئینن و دخوازن ب وی شێوەیی دژایەتییا هەرێمێ بهێتە كرن».
ڤیان دەخیلێ دیاركر ژی» پێدڤییە ل دووڤ قانوونێ و دستووری ئیراق مافێ خەلكێ هەرێما كوردستانێ بدەتێ و نابیت ئەو بێژن ئەم ب هێزین و ناهنێرین، لەوما پێدڤییە هەر چاوان بیت مافێ خەلكێ هەرێما كوردستانێ بهێتە هنارتن و نابیت مەهانە ئەو گرفتە بۆ خەلكێ هەرێما كوردستانێ بهێتە دروستكرن و پێدڤییە چارەسەرییەكا ئێكلاكەر بۆ وێ كێشەیێ بهێتە دیتن، چونكە مخابن ئیراق خودانا سۆزا خوە نینە د جهئینانا رێككەفتن و سۆزێن ددەت».