ئەڤرۆ نیوز:
وەزارەتا ساخلەمیا هەرێمێ راگەهاند: کو پێنج تووشبوویێن دی یێن ڤایرۆسێ کۆڕۆنا یێ ل پارێزگەها دهۆکێ هاتنە دەستنیشانکرن، هەموو زەلامن و ئاکنجیێن قەزا ئاکرێ نە.
هەروەسڵ گۆتیە: هەموو پاسەوانن ل سەر میلاکێ حکومەتا عێراقا فیدڕال و ژی یێن وان ٣٨ و ٣٧ و ٣٧ و ٣٦ و ٣٠ سالن، پشتی تمامبوونا دەواما وان ل بەغداد و ڤەگەریانا وان و وەرگرتنا نموونێن پشکنینا تاقیگەهێ دەرەنجام پۆزەتیف دەرچوون.
ئەڤرۆ نیوز:
رێبەر ئەحمەد وەزیرێ ناڤخوە یێ حوکمەتا هەرێما کوردستانێ راگەهاند کو مە بریار نەدایە کو پشتی جەژنێ قەدەغەیا هاتنوچوونێ درێژ بکەین و د بەرنامێ مە دا ژی ئەو یەک نینە.
وەزیرێ ناڤخوە راگەهاند ژی دێ ل رۆژێن دو و سێ یێ جەژنێ دا ئاسانکاری بۆ جوتیاران هێتە کرن و دێ نانپێژی ژی هێنە ڤەکرن.
رێبەر ئەحمەد ئەو یەک ژی دیار کر کو ئارمانجا سەرەکی یا قەدەغەیا هاتنوچوونێ بۆ هندێ یە دا ڤایرۆسێ کۆرۆنا زێدە بەلاڤ نەبیت و وەلاتی د پاراستی بن.
ئەڤرۆ نیوز:
نەتەوێن ئێکگرتی دیار دکەت کو د خوەنیشادانێن ل عیراقێ دا ئەوێن ل دژی حوکمەتێ برێڤە چوون ب گشتی ٤٩٠ کەس ب دەستێ هێزێن ئێمناهیێ هاتینە کوشتن و هەروەسا پتر ژ ٧ هزار کەس ژ خوەنیشادەران ژی ب تەقەیا راستەوخوە یا هێزێن ئێمناهیێ بریندار بووینە.
نەتەوێن ئێکگرتی ئاماژە ب هندێ ژی دکەت کو ١٢٣ خوەنیشادەر ژی ژ ئالیێ هێزێن ئێمناهیێ ڤە هاتینە رەڤاندن و هەتا نها ب تنی جهێ ٩٨ کەسان دیار بوویە و چارەنڤیسێ ٢٥ کەسان ژی دیار نینە.
ئەڤرۆ نیوز:
سەرۆک مەسعود بارزانی ب هەلکەفتا جەژنا رەمەزانا پیرۆز، پیرۆزباهیێ ل هەموو موسلمانێن جیهانێ و کوردستانێ دکەت، ب تایبەتی ژی ژ خێزانێن شەهیدان، کارمەندێن ساخلەمیێ و هێزێن ئێمناهیێ و داخواز ژ هەموو ئالیێن سیاسی ژی دکەت کو پێکڤە کار بکەن بۆ دەربازبوون ژ رەوشا نها یا کو کوردستانێ تێدا دەرباز دبیت.
ئەڤە ژی دەقێ پەیاما سەرۆک بارزانی یە:
بەناوی خودای بەخشندە و میهرەبان
بەبۆنەی هاتنی جەژنی ڕەمەزانی پیرۆزەوە گەرمترین پیرۆزبایی ئاراستەی موسڵمانانی جیهان و عێراق بە گشتی و موسڵمانانی كوردستان بە تایبەتی دەكەم. پیرۆزبایی جەژنی ڕەمەزان لە خانەوادەی سەربەرزی شەهیدان و پێشمەرگە قارەمانەكان و هەروەها كارمەندانی دەزگا ئەمنی و تەندروستییەكانی كوردستان و هەموو لایەنە پەیوەندیدارەکان دەكەم كە لە ماوەی چەند مانگی ڕابردوو لەپێناو پاراستنی سەلامەتیی هاووڵاتیان زەحمەت و شەونخونیی زۆریان بینیوە.
بەداخەوە بەهۆی پەتای كۆرۆنا و قەیرانە سیاسییەكانی عێراق و دۆخی خەراپی ئابووریی ناوخۆیی و جیهانی، هەرێمی كوردستان لە دۆخێكی ناهەموار و هەستیار و لەبەردەم تەحەددیاتی تازەدایە. جەژنی ڕەمەزانی پیرۆز بە دەرفەت دەزانم كە داوا لە لایەنە سیاسییەكانی هەرێمی كوردستان بكەم، لەپێناو ڕووبەڕووبوونەوەی تەحەدییات و تێپەڕاندنی ئەم دۆخە ناهەموارە لە ئاست بەرپرسیارێتیی نەتەوەیی و نیشتیمانیدا بن و ڕێگەی تەبایی و برایەتی و یەكڕیزی بگرنە بەر. داوا لە گشت لایەك دەكەم لەبری یەكترشكاندن و دروستكردنی گرژی و ناكۆكیی زیاتر، پێكەوە و بۆ چارەسەركردنی گرفتەكانی خەڵك و نەهێشتنی كۆسپ و تەگەرەكانی بەردەم گەلی كوردستان هاوكاری یەكتر بن. ئەوە چاوەڕوانیی خەڵكی كوردستانە لە هەموو لایەنە سیاسییەكان و هەرچی دەستكەوت و سەركەوتنی گەلی كوردستانیش هەبووە لە سایەی یەكڕیزی و هەست بە بەرپرسیارێتی لایەنەكان هاتووەتە كایەوە. لەوەیش دڵنیام كە گەلی كوردستان پشت بە خودای گەورە بە سەربەرزییەوە ناخۆشی و قەیرانەكان تێدەپەڕێنێت.
لەو بۆنە پیرۆزەدا هیوای خۆشی و بەختەوەری بۆ گشت هاووڵاتیانی خۆشەویستی كوردستان دەخوازم و ئومێدی ئەوە دەخوازم خودای گەورە ڕۆژوو و عیبادەتی هەموو موسڵمانانی قبووڵ كردبێت و ئەو جەژنە ببێتە مایەی كۆتایهاتنی تیرۆر و نەخۆشی و نەهامەتییەكان و گەڕانەوەی ئارامی و ئاشتی بۆ سەرجەم مرۆڤایەتی.
مسعود بارزانی
30ـی ڕەمەزانی 1441ـی كۆچی
23ـی 5ـی 2020ـی زایینی
ئەڤرۆ نیۆز، رێوار محەمەد رەشید:
بژار خالد عزێر کۆچەر، سەرۆکێ لژنا قانوونی ل پەرلەمانێ کوردستانێ راگەهاند کو هەلبەت ئەو پەيامێن د گوتارا دوهی رۆژا 22/5/2020 یا (مەسرور بارزانی) سەرۆكێ حوکمەتێ دا هاتين، پەيامێن روهن و ئێكسەر بوون، گەلەك بابەتێن گرنگ گرێدایى سياسەتا كابينا نوى يا حوکەمەتا هەرێمێ و لێكتێگەهشتنا هەولێر و بەغدا، ئابوور و داهات و بەرفرەهـكرنا پشت بەستنا ئابوورى نه بتنێ ل سەر نەفتێ، جێبەجێكرنا قانوونا چاكسازيێ، باشتركرنا پێشكێشكرنا خزمەتگوزاريان، هاتنه دياركرن.
سەرۆکێ لژنا قانوونی ل پەرلەمانێ کوردستانێ گۆت : “من دڤێت لڤێرێ ئاماژه ب قانوونا چاكسازيێ بدەم، قانوونا چاكسازيێ ئێك ژ وان باشترين قانوونانه هەر ژ دەستپێكا پەرلەمانێ كوردستانێ تا نوكه پەسەند بووى، ئەگەر وەك خوە بهێتە جێبەجێكرن دێ پارەکێ زوور بۆ حوکمەتێ زڤريت هەروەسان دادپەروەريەكا ئيدارى و جڤاکی دێ پەیدا بیت ب تاييبەتى ل سەر ئاستێ فەرمانبەر و مووچه خوران، يا دياره ئەڤ قانوونە پرۆژێ پارتى بوو ل ھە لبژارتنێن پەرلەمانێ كوردستانێ و دووڤ دا ئێك ژ خالێن گرنگێن كارناما كابينا نەهێ بوو، بڤێ چەندێ پارتى بەرنامێ خو يێ هەلبژارتنان دەستپێكر، سەرەراى دروستكرنا چەند كێشه و رێگريا ل بەردەم پەسەندکرنا پرۆژێ ڤێ قانوونێ ھەتا جێبەجێكرنا ڤێ قانوونێ، لێ دوهی د گۆتارا سەرۆكێ حوکمەتێ دا زوور ب روهنى هات كو دێ ئەف قانوونە هێته جێبەجێكرن و جەنابێ وى دێ هێته بەرەيێ خەلكى”.
ناڤهاتی گۆت : “جێبەجێكرنا قانوونا چاكسازيێ بوویە هيڤييا زۆربەيا خەلكى ب تاييبەتى تەخا فەرمانبەر، مووچه خوران و ڤی خەلکی ب خوە ژی باوەری ب دووپاتیا سەرۆکێ حوکمەتێ ھەیە بۆ چاکسازیێ، لەوما ب جێبەجێكرنا وێ ئەف خەلكه ب خوە ژى دێ هێنه بەرەيێ كابينا نەهێ ب سەرۆكاتيا (مەسرور بارزانى)”.
ئه‌ڤرۆ نیوز:
په‌یڤدارێ وه‌زاره‌تا كاره‌بێ راگه‌هاند د رۆژین چه‌ژنێ دا ده‌مژمێرێن دانا كاره‌بی ب وه‌لاتیان بۆ 15 ده‌مژمێران هێته زێده‌كرن.
ئومید ئه‌حمه‌د په‌یڤدارێ وه‌زاره‌تا كاره‌با هه‌رێما كوردستانێ راگه‌هاند د رۆژێن چه‌ژنێ دا سێ ده‌مژمێرێن دی یێن كاره‌با نیشتمانی دێ هێنه زێده‌كرن، كۆ رۆژێن بوری 12 ده‌مژمێرین كاره‌بێ دهاتنه دان ب وه‌لاتیان، به‌لێ د رۆژێن چه‌ژنێ دا دبیته 15 ده‌ژمێرێن دانا كاره‌با نیشتمانی.
په‌یڤدارێ وه‌زاره‌تا كاره‌با حكومه‌تا هه‌رێما كوردستانێ ئه‌و چه‌نده ژی راگه‌هاند ژبلی گرتنا فه‌رمانگه‌هان نه‌بوونا دوامی و راوه‌ستاندنا كارگه‌هان قه‌ده‌غه‌یا هاتنوچونێ بوویه ئه‌گه‌ر كاره‌ب زێده بیت و د ئه‌ڤان رۆژا زێده كاره‌بێ بده‌ین.
په‌یڤدارێ وه‌زاره‌تا كاره‌بێ ئه‌و چه‌نده ژی راگه‌هاند ملیۆن 600 هزار پشكدار هه‌نه، داخوازی ل سه‌ر بكارئینانا كاره‌با نیشتمانی چار هزار و 400 میگاواتن، به‌رهه‌مئینان ژی دو هزار و 700 میگاواتێن كاره‌بێ یه.
ئەڤرۆ نیوز، زنار تۆڤی:
ئەڤرۆ شەمبیێ 23 گولانا 2020، ب بەهانەیا هەبوونا گەریلایێن پەکەکێ، فرۆکێن سوپایێ تورکی دو جهێن جۆدا ل قەزا ئامێدیێ بوردۆمان کرن.
وەڵاتیەکێ وێ دەڤەرێ بۆ ئەڤرۆ نیوز دیار کر: ئەڤرۆ ل دەمژمێر 12:20 خولەکی نیڤرۆ، هێزێن ئەسمانی یێن سوپایێ تورکیا چیایێ کۆرەژاری و گوندێ هیزانکێ ل سنورێ قەزا ئامێدیێ ب دژواری بۆردومانکرن و نوکە ژی هاتنوچوونا فرۆکان ل ئەسمانێ وێ دەڤەرێ یا بەردەوامە.
ئەڤرۆ نیوز،عەلی حاجی :
بەرپرسێ راگەهاندنا رێڤەبەریا هاتن و چوونێ ل پارێزگەها دهۆکێ بۆ ئەڤرۆ نیوز ئاشکەرا کر د ماوەیێ ٢٤ دەمژمێران دا ل باژێرێ زاخۆ د دو رودانێن هاتن و چوونێ دا دو کەسان گیانێ خوە ژ دەست دا و ٨ کەس ژی بریندار بون.
زێدەتر مقەدەمێ مافپەروەر ئازاد تەها گۆت : روودانا ئێکێ ل رۆژا ئەینیێ ل دەمژمێر ٦:٠٠ ی سپێدێ ل نێزیک گەلیێ زاخۆ روودا ترۆمبێلەکا ژ جورێ BMW ژ ئەگەرێ بلەز هاژووتنا ترۆمبێلێ ژلایێ شوفێری ڤە،ترۆمبێل د وەرگەریت و زاروویەکی گیانێ خوە ژ دەست دا و دو کەس ب گرانی بریندار دبن،روودانا دووێ د درەنگیا شەڤا بوری دا ل سەر رێیا سەرەکیا باتیفا بۆ زاخۆ ژ ئەگەرێ وەرگەریانا ترۆمبێلەکا رینو کو ژ بن کۆنترولا شوفێری دا دەرکەڤت بوو د ئەنجام دا گەنجەکی گیانێ خوە ژ دەست دا و شەش کەسێن دیتر ژی بریندار بون.
نيشاندان