ئەڤرۆ نیوز، عەلی حاجی :
بەرپرسێ راگەهاندنا رێڤەبەریا ساخلەمیا زاخۆ د داخویانیەلێ دا بۆ ئەڤرۆ نیوز دیار کر ژ ئەگەرێ شەرەکێ دناڤبەرا هندەک گەنجان دا ل گوندێ سوریا یا سەر ب قەزا سێمێلێ ڤە کەسەکێ گیانێ خوە ژ دەستدا.
زێدەتر ئەمیر عەلی گوت : ل ئێڤاریا ئەڤرۆ روژا شەمبێی ل گوندێ سوریا یا سەر ب قەزا سێمێلێ ڤە ژ ئەگەرەکێ نەدیار شەرەک ب کێران دناڤبەرا هەژمارەکا گەنجان دا دروست دبیت و ژ ئەگەرێ دژواریا وی شەری چەند کێرەک ب گەنجەکێ دکەڤن و گیانێ خوە ژ دەست دەت و هەر دیسان دو کەسێن دیتر ژی بریندار بوینە و رەوشا ئێک ژ وان کەسان یا باش نینە و ل بەریا دەمەکێ کێم ئەو گەنجێن بریندار بوین بۆ باژێرێ دهوکێ هاتنە رەوانە کرن و هەتا نوکە ژی ئەگەرێن وی شەری نەهاتیە زانین.
ئەڤرۆ نیوز:
حوکمەتا هەرێما کوردستانێ ماوێ بهێنڤەدانا فەرمانگەهان ل هەرێما کوردستانێ هەتا 16 نیسانێ درێژ کر.
ده‌قێ راگه‌هاندنا پەیڤدارێ حكومه‌تا هه‌رێما كوردستانێ:
د چارچۆڤێ بەردەوامبوونا ڕێکارێن خۆپارێزیێ ل دژی ڤایرۆسێ کۆرۆنا ل ھەرێما کوردستانێ، بڕیار هاتە دان ب درێژکرنا ڕۆژانێن بهێنڤەدانێ ل سەرجەم وەزارەت و دەستە و فەرمانگەهـ و سازیێن ھەرێمێ و زانکۆ و پەیمانگەهـ و قوتابخانە و ناڤەندێن خواندنا حکومی و ئەھلی ( ژ بلی ھێزێن ئاسایشێ و ئاسایشا نافخۆ و سازیێن ساخلەمیێ)، ل ڕۆژا ئێکشەمبی رێکەفتی 29/3/2020 هەتاکۆ رۆژا پێنجشەمبی رێکەفتی 16/4/2020.
وەزارەتا ساخلەمیێ و وەزارەتێن خزمەتگوزاریێن گشتی دێ بەردەوام بن ل سەر پێشکێشکرنا خزمەتگوزاریێن گشتی و هەوارهاتنێ.
ئەڤرۆ نیوز:
ئەڤرۆ مالپەرێ ( وورلد ئومیتەر) یێ جیهانی بۆ داتایان دیار کریە، کو هژمارا تووشبوویێن ڤایرۆسێ كۆرۆنا ل سەرانسەری جیهانێ گەهشتیە 622 هزار كەسان.
لدووڤ وی ژێدەری، هەر ژ دەست پێكا سەرهلدانا ڤایرۆسێ کۆرۆنا هەتا نوكە پتری 28 هزار تۆشبوویان گیانێ خوە ژ دەستدایە و ئەڤ رێژە بەردەوام د زێدەبوونێ دایە.
ئەڤرۆ نیوز:
پتر ژ پێنج هزار نۆشدارێن وەلاتێن جۆدا ل ئورۆپا داخوارێ ژ وەلاتێن جیهانێ دکەن، کو سەلامەتیا ئاوارە و کۆچبەرێن دناڤا کەمپێن یۆنانێ دا بپارێزن و هۆشداریێ ددەن، ژ روودانا کارەساتان، هەکە دنوکە دا ئورۆپا ئاورەکێ ل رەوشا وان نەدەت.
وان نۆشداران گۆتیە، ئەڤ ڤایرۆسە هێرەشەکە بۆ سەر کەمپێن کۆچبەر و ئاواران، وەلاتیێن یۆنانێ و هەموو جڤاکێ ئورۆپا.
هەروەسا گۆتیە، ئەگەر بهێتە گۆتن، کو ئەو کەمپە د پاراستینە و ل ژێر کۆنترۆلێدانە، ئەڤە وەهمە، گۆتیە ژی ئەرکێ مەیە رێگریێ ل روودانێن کارەساتان بکەین.
ئەڤرۆ نیوز:
ژ ئەگەرێ ڤایرۆسێ کۆرۆنا یێ ئەڤرۆ ل ئیسپانیا ٨٣٢ کەسان گیانێ خوە ژ دەستدایە، ب ڤێ چەندێ هژمارا وان کەسێن ژبەر کۆرۆنا یێ گیانێ خوە ژ دەستداین گەهشتە نێزیکی شەش هزار کەسان.
وەزارەتا ساخلەمیا ئیسپانیا راگەهاند، ئەڤرۆ شەمبیێ ٨٣٢ توشبوویێن ڤایرۆسێ کۆرۆنایێ گیانێ خوە ژ دەستداینە.
د ٢٤ دەمژمێرێن بوری دا هەشت هزار و ١٨٩ حالەتێن دی ل ئیسپانیا هاتینە تۆمار کرن، ب ڤێ چەندێ هژمارا توشبوویان گەهشتە ٧٢ هزار و ٢٤٨ کەسان.
ئەڤرۆ نیۆز، قائید میرۆ:
گورەی ئاخفتنێن بەرپرس و بسپۆرێن ساخلەمیێ قەدەغەیا ھاتنوچوونێ کاریگەری لسەر کێمبوونا زیانێن ڤایرۆسا کۆرۆنایێ ھەبووینە و بەرپرسەکێ وەزارەتا ساخلەمیێ ژی دبێژیت، قەدەغەیا ھاتنوچوونێ رێگربوویە ل پەیدابوونا کارەساتان.
دکتۆر خالس قادر، رێڤەبەرێ گشتیێ دیوانا وەزارەتا ساخلەمی بۆ ئەڤرۆ نیۆز دیارکر” بڕیارا قەدەغەیا ھاتنوچوونێ کاریگەریەکا زۆر لسەر رێگریکرن ل بەلافبوونا ڤایرۆسا کۆرۆنایێ ھەبوویە و شیایە ببیتە رێگر ل ھەمبەر زیانێن کۆرۆنایێ، ئەز باوەرم ھەگەر تەدبیرێن حوکمەتا ھەرێما کوردستانێ نەبانە ئەڤە پێشبینیا روویدانا کارەساتان ھەبوو ل ھەرێما کوردستانێ و ھژمارەکا بەرچاڤا وەلاتیان دا تووشی ڤایرۆسا کۆرۆنایێ بن.
دکتۆر خالس قادر ئاشکراکر” ئەم دگەل درێژکرنا بڕیارا قەدەغەیا ھاتنوچووینێ نە ل ھەرێما کوردستانێ، چونکو ھەتا رادەیەکێ زۆر دێ مەترسیێن بەلاڤبوونا کۆرۆنایێ کێم بکەت و پێدڤیە ژی وەلاتی پێگیریێ ب بڕیارێن حوکمەتێ بکەن، چونکو مەرجێ سەرکەفتنا ھەرێما کوردستانێ بسەر کۆرۆنایێ پێگیریا وەلاتیانە بۆ خۆ پارێزیێ.
ئەڤرۆ نیوز:
موسەننا ئەمین پەرلەمانتارێ کورد ل بەغدا راگەهاند کو دهێتە چاڤەرێکرن ڤێ حەفتیێ عەدنان زورفی راسپاردیێ شیعان بۆ پێکئینانا کابینا نوو یا حوکمەتێ سەرەدانا هەرێما کوردستانێ بکەت.
ناڤهاتی دیار ژی کر زورفێ دێ ل گەل بەرپرسێن هەرێما کوردستانێ و سەرکردێن کورد ل دۆر چاوانیا پێکئینانا کابینا نوو یا حوکمەتێ دێ هەڤدتینان کەت.
ئەڤرۆ نیوز:
وەزارەتا دەرڤە یا ئەمریکا ئەڤرۆ راگەهاند کو بیست کەسایەتی و هندەک سازی ل عیراقێ هاریکاریا فەیلەقێ قودس یێ سەر ب سوپای پاسداران یێ ئیرانێ کرینە و ژ بەر هندێ ژی ئەمریکا دێ وان کەسان سزا دەت.
د داخۆیانیا وەزارەتا دەرڤە یا ئەمریکا دا ناڤێ چو کەسێن عیراقی نەهاتیە راگەهاندن، لێ هاتیە دیار کرن کو بەلگەیێن تەمام ل بەر دەست دا هەنە کو وان کەسان هاریکاریا سوپای پاسداران کرینە و هەروەسا وان دڤێت بەردەوام عیراق د بیاڤێ وزێ دا پێدڤی ب ئیرانێ بیت کو ئەو یەک ژی دهێتە رامانا پێشیلکرنا سەروەریا عیراقێ.
ئه‌ڤرۆ نیوز:
سه‌رۆك كۆمارێ ئیرانی راگه‌هاند: نێزیكی 100 هزار ملیار تیمه‌ن بۆ به‌رهنگاربوونا نه‌خوشیا ڤایرۆسێ كورونایێ ته‌رخانكرن.
میدیایێن فه‌رمی یێن ئیرانێ به‌لاڤكرن حه‌سه‌ن روحانی سه‌رۆك كۆمارێ ئه‌ڤرۆ ل جڤینا نیشتمانی بۆ به‌رهنگاربوونا كورونایێ راگه‌هاند: توشبوویێن ب ڤایرۆسی كورونایێ ری ل داكه‌تنێ كریه ل سه‌ر ئاسته‌كی راوه‌ستیاینه و دشیێن دڤێ ره‌وشێ دا ده‌ست پێ بكه‌ین و ساخله‌میێ بۆ وه‌لاتی ڤه‌گه‌رینن.
سه‌رۆك كۆمارێ ئیرانێ ئه‌و چه‌نده ژی دیاركر د ئه‌ڤێ ره‌وشا دژوار دا، به‌لێ 20% یا بودجا ئیسال كۆ نێزیكی 10 ملیار تیمه‌نان دبیت بۆ به‌رهنگاربوونا كورونایێ ته‌رخان بكه‌ین ئه‌ڤ چه‌نده بۆ هه‌موو جیهانێ جهێ حێبه‌تی بوونێ یه.
ئه‌ڤ چه‌نده ل ده‌مه‌كی دایه كۆ زێده‌تری 30 هزار وه‌لاتی یێن ئیرانی تووشی ڤایرۆسێ كورونایێ بووینه .
نيشاندان