ئه‌ڤرۆ نیۆز، عه‌زیز هه‌ورامی:

هه‌رێمی كوردستان 544 هاوڵاتی توشی كۆرۆنا بون وه‌زاره‌تی ته‌ندروستی ده‌ڵێ بێباكی هاوڵاتیان هۆكاربووه‌ له‌وه‌ی كۆرۆنا جارێكی تر به‌وشێوه‌یه‌ سه‌رهه‌ڵبداته‌وه‌ زۆر به‌خێرای ژماره‌كان هه‌ڵده‌كشێن و سه‌رچاوه‌ی توشبوانیش دیار نییه‌، مه‌ترسیه‌كان به‌رده‌وام له‌ زیاد بوندان، له‌ چاو نه‌خۆشه‌كانی پێشو هه‌ڵگرانی ڤایرۆسی كۆرۆنا ئێستا خه‌راپتره‌.

محه‌ممه‌د قادر گوته‌بێژی وه‌زاره‌تی ته‌ندروستی حكوومه‌تی هه‌رێمی كوردستان له‌ لێدوانێكی تایبه‌ت به‌ ئه‌ڤرۆ نیۆز گوتی: ” دۆخی كۆرۆنا له‌م هه‌فته‌ی ڕابردووه‌وه‌ مه‌ترسیداره‌ ئه‌و كه‌سانه‌ی دیاری ده‌كرێن هه‌ڵگری ڤایرۆسی كۆرۆنا سه‌رچاوه‌ی توشبوونیان دیارنییه‌، سه‌رچاوه‌ ئێستا له‌ ناوكۆمه‌ڵگا ده‌گه‌ڕێت كه‌سانی تر تووش ده‌كات به‌بێ ئه‌وه‌ی دیاری بكرێت.

محه‌ممه‌د قادر وتیشی:” ئه‌م هه‌فته‌یه‌ ژماره‌ی تووشبووان به‌ كۆرۆنا به‌رده‌وام له‌ هه‌ڵكشانداییه‌، وای لێهاتووه‌ناتوانی بڕیاربده‌ی كێ كه‌ره‌نتینه‌ ده‌كه‌ی چه‌شوێنێك كه‌ره‌نتینه‌ بكرێت پشكنینی سه‌د له ‌سه‌دی بۆ ده‌كرێت ،ئه‌وكه‌سه‌ی توشی كۆرۆنا ده‌بێت له‌ نه‌خۆشخانه‌ پشكنینی بۆده‌كه‌ی سه‌رچاوه‌ی ئه‌وه‌ی له‌ كوێوه‌ توش بووه‌ نادیاره‌ سه‌فه‌ری نه‌كردووه‌ به‌ركه‌وته‌ی نه‌بووه‌ له‌گه‌ڵ كه‌سانێك هه‌ڵگری ڤایرۆرسی كۆرۆنابن، مه‌ترسیه‌كه‌ زۆر به‌رزده‌كه‌نه‌وه‌ ئه‌گه‌ربێت و ئه‌و ساردبوونه‌وه‌ی خۆپارێزی له‌ ناو هاوڵاتیان به‌رده‌وامبێت ده‌كرێت كاره‌ساتێكی گه‌وره‌ی لێبكه‌وێته‌وه‌.

قادر زیاتر زانیاریدا و گوتی:” له‌ ماوه‌ی هه‌فته‌ی ڕابردوو نزیكه‌ی 150 كه‌س توشی ڤایرۆسی كۆرۆنا بون، ئه‌م تۆماركردنی هه‌ڵگرانی ڤایرۆسی كۆرۆنا شه‌پۆلی یه‌كه‌مه‌ و ناتوانین بڵێن شه‌پۆلی دووه‌م  له‌ ڕوی زانستییه‌وه‌ ده‌بێت له‌سه‌ر ئاستی جیهان نزیكببێته‌وه‌ له‌ سفر ئه‌وكات ناوی ده‌ندرێت شه‌پۆلی دووه‌م.

وته‌بێژی وه‌زاره‌تی ته‌ندروستی، ئاماژه‌ی بۆ ئه‌وه‌شكرد:”پابه‌ند نه‌بوونی هاوڵاتیان به‌ ڕێنماییه‌كان كاریگه‌ری نه‌رێنی یه‌كجار زۆری هه‌بوه‌ له‌ زیاد بوونی ڤایرۆسی كۆرۆنا ،له‌ئێستادا به‌شێوه‌ێكی گشتی نه‌خۆشمان نییه‌ باری ته‌ندروستی ئه‌وه‌نده‌ ناجێگیربێت له‌ ژێر هه‌ناسه‌دانی ده‌سكردابێت به‌ڵام به‌ نه‌خۆشه‌كانی پێشوو ئێستا نیشانه‌یان زیاتره‌ و چاره‌سه‌ری زیاتریان پێویسته‌ و له‌ حاڵه‌ته‌كانی مانگی 3 و 4 ژماره‌ی ئه‌وكه‌سانه‌ی كۆرۆنایان بوو 70% هیچ نیشانه‌كانیان نه‌بو، به‌ڵام ئێستا زۆربه‌ی ئه‌وكه‌سانه‌ی هه‌ڵگری ڤایرۆسه‌كه‌ن له‌ ڕێگه‌ی نیشانه‌كانه‌وه‌ ده‌ستنیشانیان ده‌كه‌ین.

هه‌روه‌ها ده‌ڵێ:” له‌ كوردستان تاوه‌كو ئێستا 544 كه‌س تووشی ڤایرۆسی كۆرۆنا بوون 407 چاك بووه‌ته‌وه‌ 5 كه‌سیش گیانیان له‌ ده‌ست داوه‌، ئه‌گه‌ربێت و له‌ كۆنتڕۆڵ ده‌ربچێت ئه‌وه‌ هه‌موو نه‌خۆشخانه‌كان ده‌كرێت به‌سه‌نته‌ری چاره‌سه‌ری كۆرۆنا.