ئەڤرۆ نیوز:
وەقفا سوننی یا عیراقێ فەتوایەک دەربارەی نڤێژا ئەینیێ دەرکریە و راگەهاندیە، پێدڤیە نڤێژا ئەینیێ نەهێتە ئەنجامدان، ئەڤە ژی ب مەبەستا خۆپاراستنێ ژ ڤایرۆسێ کۆرۆنا یێ و رێگریکرن ژ بەلاڤبوونا ڤی ڤایرۆسی.
وەقفا سوننی یا عیراقێ د فەتوایەکێدا راگەهاندیە کۆرۆنا دێ زیانێ گەهینیتە موسولمانان و کۆمڤەبوونا وان دێ بیته ئەگەرێ پتر بەلاڤبوونا ڤێ نەخۆشیێ.
وەقفا سوننی یا عیراقێ سەبارەت ب ئەنجامدانا نڤێژا ئەینیێ گۆتیە، موسولمانان دشێن ل مالێن خوە دا نڤێژا ئەینیێ بکەن و پێدڤی ب هندێ ناکەت بچنە مزگەفتێ.
ئەڤرۆ نیۆز:
وەزارەتا ساخلەمیا عیراق ئامارێن نوو دەربارەی کۆرۆنا یێ بەلاڤ کرینە و راگەهاند: ل نەجەف کەسەک و ل بەغدا پێنج کەس تووشی کۆرۆنا یێ بوون.
وه‌زاره‌تا ساخلەمی و ژینگه‌ها عیراقێ د به‌یاننامه‌‌كێدا راگه‌هاند، د تاقیگه‌هاندا شه‌ش حاله‌تێن نوو یێن تووشبون ب کۆرۆنایێ هاتنە تۆمار كرن، ئێک ل نه‌جه‌ف و ئێک ل ره‌سافه ل به‌غدا و چارێن دیتر ل كۆمه‌لگه‌ها نۆشداری ل به‌غدا بووینه.
سەرجەمێ گشتی یێ تووشبوویان: (83) كه‌سن، سەرجەمێ چێبوویان: (24) كه‌س، حالەتێن مرنێ: (8) كه‌س.
ئەڤرۆ نیوز:
ژبەر مەترسیا بەلاڤبوونا کۆرۆنا یێ، پارتیێن کوردی یێن باکورێ کوردستانێ، بریاردان هەموو چالاکیێن نەورۆزێ بهێنە راگرتن.
ئەڤرۆ ١٢ ئادارا ٢٠٢٠ د داخویانیەکا رۆژنامەڤانی دا ١١ پارتی و دەزگەهێن کوردی ل باکورێ کوردستانێ راگەهاندن، ژبۆ پاراستنا گیانێ وەلاتیان و رێگرتن ژ مەترسیا بەلاڤبوونا ڤایرۆسێ کۆرۆنایێ، بڕیار دایە هەموو چالاکی و ئاهەنگێن تایبەت ب جەژنا نەورۆزێ ل باکورێ کوردستانێ رابگرن، ژ پێخەمەت گیانێ وەلاتیان بهێتە پاراستن، وان ئەڤ بریارە دایە.
ئەڤرۆ نیوز:
وەزارەتا ساخلەمیا ئیرانێ، دووماهی ئامارێن تووشبوویان و مریان ب ڤایرۆسێ کۆرۆنا یێ ل ئیرانێ بەلاڤ کرن، د دەمێ 24 دەمژمێرێن بوری دا 1075 کەسێن دیتر تووشی ڤایرۆسێ کۆرۆنا یێ بووینە.
ئەڤرۆ پێنجشەمبی کیانووش جەهانپوور، پەیڤدارێ وەزارەتا ساخلەمیا ئیرانێ راگەهاند، هژمارا گشتی یا تووشبوویان ل ئیرانێ 10 هزار و 75 کەسن و هەتا نوکە 429 کەسان گیانێ خوە ژ دەستدایە، ئەوێن چاکبووین سێ هزار و 276 کەسن.
هەروەسا گۆتیە: ب تنێ ل تەهرانێ 3132 حالەتێن کۆرۆنا یێ هاتێنە تۆمار کرن، هەروەسا ناڤەندا سەرەکی یا ڤی ڤایرۆسی ئەسفەهانە کو بلاند ترین ئاستێ تووشبوونێ ب ڤایرۆسێ کۆرۆنا تۆمار کریە.
ئەڤرۆ نیوز:
ئه‌ڤرۆ پێنجشەمبی 12-3-2020 ب سه‌رپه‌رشتیا فه‌رهاد ئه‌مین ئه‌تروشى پارێزگارێ دهۆكێ شه‌شه‌مین كۆمبوونا ژوورا عه‌مه‌لیاتا یا تایبه‌ت ژبۆ به‌رهنگاریا ڤایروسێ كۆرۆنا هاته ئه‌نجامدان.
دكۆمبوونێدا گه‌نگه‌شێن تێر و ته‌سه‌ل ل سه‌ر نووترین پیشهاتێن به‌لاڤبوونا ڤایروسێ کۆرۆنا ل ده‌ڤه‌رێ و جیهانێ هاتنه كرن، هه‌روه‌سا دان وستاندن ل دور ئه‌جیندایێن كومبوونێ و كێم و كاسیێن كارێ تیمێن جێبه‌جێكار یێن لدووڤ چوونا بابه‌تێ خۆپاراستنێ ژ ڤایروسێ كۆرۆنا دكه‌ن هاتنه كرن.
دكونگره‌كێ روژنامه‌ڤانیدا پارێزگه‌رێ دهوكێ دیاركر كو به‌رده‌وام كومبوون ل سه‌ر ئاستێ حكومه‌تا هه‌رێما كوردستانێ و پارێزگه‌ها دهۆكێ ل دور بابه‌تێ ڤایروسێ کۆرۆنا دهێنه ئه‌نجامدان و چه‌ندین رێنما و بریار هاتینه ده‌رخستن و هه‌موو بریار و رێنما ژبۆ به‌رژه‌وه‌ندیا خه‌لكێ ده‌ڤه‌رێ هاتینه بجهئینان و ده‌ست خوشى و سوپاسى ل تیمێن ساخلەمیێ و یێن جێبه‌جێكرنا رێنما و بریارێن جڤاتا وه‌زیران و ژوورا عه‌مه‌لیاتا یا به‌رهنگاریا ڤایروسێ کۆرۆنا كر، هه‌روه‌سا سوپاسیا خه‌لكێ پارێزگه‌هێ و خودان كار وپیشه‌یان ژى كر كو هه‌موویان پێگرى ب هه‌موو رێنما و بریارێن حكومه‌تا كوردستانێ و كارگێریا پارێزگه‌هێ كریه بۆ وێ چه‌ندێ خه‌لكێ پارێزگه‌هێ ژ ڤایروسێ كۆرۆنا بهێنه پاراستن.
هه‌روه‌سا ته‌كه‌زكر كو هه‌تا نوكه چ حاله‌تێن ڤایرۆسێ كۆرۆنا ل پارێزگه‌ها دهۆكێ په‌یدا نەبووینه و داخواز ژ خه‌لكێ پارێزگه‌هێ كر كو ل جهێن قه‌ره‌بالغ كوم نه‌بن و هاتنوچوونا جهێن گشتى و سه‌ره‌دانا كێم بكه‌ن و خه‌لك خوە نێزیكى هه‌ڤدو نه‌كه‌ن و یا باشتره ل مالێن خو بمینن و نه‌چنه سه‌یران و جهێن خرڤه‌بوونا و بابه‌تى ب سڤكى وه‌رنه‌گرن بۆ وێ یه‌كێ هه‌ر تاكه كه‌سه‌ك خوە و خێزانا خو بپارێزیت.
هه‌روه‌سا گوت: ژ رێكه‌فتى 14-3-2020 سنورێن پارێزگه‌هێ ل گه‌ل پارێزگه‌هێن هه‌رێمێ دێ هێنه گرتن و به‌رى نوكه ل گه‌ل پارێزگه‌هێن عیراقێ ژى هاتینه گرتن بتنێ بزاڤا دبلوماتكار وتیمێن رێكخراوێن مرۆڤایه‌تى و حاله‌تێن فه‌ر نه‌بیت رێك پێ هاتیه دان هاتنوچوونێ بكه‌ن و گه‌له‌ك بریار ژى هاتینه ده‌ركرن ب رێیا ده‌زگه‌هێن راگه‌هاندنێ و سوشیال میدیا دێ هێنه به‌لاڤكرن بو وێ یه‌كێ وه‌لاتیێن مه ژ ڤایروسێ كۆرۆنا یێ بهێنه پاراستن.
ژلایێ خوە ڤه رێڤه‌به‌رێ گشتى یێ ساخله‌میێ دیار کر، كو هه‌تا نوكه چ حاله‌تێن ڤایروسێ كۆرۆنا نه‌هاتینه تۆماركرن و پێرابوونێن باش ل هه‌موو بنگه‌هێن ساخلەمیێ و ل خالێن سنورى هاتینه وه‌رگرتن وداخواز كر كو هه‌ر وەلاتیه‌كێ نیشانێن كۆرۆنا هه‌بن بلا سه‌ره‌دانا تیمێن ساحلەمیێ بكه‌ن دا رێكارێن ساخلەمیێ ل سه‌ر بهێنه كرن بۆ وێ یه‌كێ ڤایرۆسێ كۆرۆنا نه‌هێته به‌لاڤكرن و سلامه‌تیا هه‌موو وه‌لاتیان بهێته پاراستن.ح
ئەڤرۆ نیوز:
د. فەرسەت سۆفی پارێزگارێ هەولێرێ ل گەل وەزیرێن ساخلەمیێ و ناڤخوە یێ حوكمەتا هەرێما کوردستانێ د پرێس کۆنفرانسەکێ دا راگەهاند کو داخواز ژ وەلاتیان دکەین کو پێگیریێ ب رێنمایان بکەن و گۆت: (داخواز ژ وەلاتیان دکەم کو ل مالێن خوە دا بن و نەچنە دەرڤە. هەکە وەلاتی پێگیریێ ب رێنمایان بکەن دێ هەتا دو حەفتیێن دی ب سەر نەخوشیا کۆرۆنا سەرکەڤین).
پارێزگارێ هەولێرێ ئەو یەک ژی دیار کر کو بریار هاتیە دان هاتنوچوون د ناڤبەرا پارێزگەهێن هەرێما کوردستانێ دا بهێتە راگرتن و هێڤی خواست کو رەوش نەگەهیتە وێ ئاستێ کو هاتنوچوونا دناڤبەرا باژێران دا ژی بهێتە راگرتن.
ئه‌ڤرۆ نیوز، زنار:
ئێكه‌تیا ته‌پا پێ یا ئسپانى بریار دا سه‌رجه‌م چالاكیێن خوه یێن ته‌پا پێ بۆ ماوه‌كێ نه‌دیار راگریت ژ ئه‌گه‌رێ به‌لاڤبوونا ڤایروسێ كورونا ل وى وه‌لاتى.
ئه‌ڤ بریارا ئێكه‌تیا ته‌پا پێ یا ئسپانیا هاته پێش پشتى یاریزانه‌كێ ریال مه‌درید یێ باسكت بۆلێ تووشى كورونا بووى و دگه‌ل ڤێ چه‌ندێ فه‌رمانا مه‌له‌كى ژى هاته ده‌ركرن و تێدا داخواز كریه چالاكیێن ته‌پا پێ بۆ ماوێ هه‌ر چو نه‌بیت دو حه‌فتیان بهێته راگرتن هه‌تاكو كونترولا ڤایروسێ كورونا دهێته كرن.
دهێته پێشبینى كرن یاریا یانا ریال مه‌درید دگه‌ل مانچسته‌ر ستى ژ قاره‌مانیا ئوروپا قاره‌مانێن خولان ژى بهێته پاشخستن بۆ ده‌مه‌كێ دى.
ئه‌ڤرۆ نیۆز، عه‌زیز هه‌ورامی:
پاش ئه‌وه‌ی به‌ڕێوه‌به‌رایه‌تی گشتی ته‌ندروستی هه‌ڵه‌بجه لیستێكی 31 كه‌سی قوتابی زانكۆكانی ئێران بڵاو كرده‌وه له ده‌روازه‌ی مونزریه‌ی عێراق گه‌رابونه‌وه نه‌ڕشتبونه كه‌ره‌نتینه ئه‌مڕۆ 28 كه‌سیان كه‌ره‌نتینه كران.
به‌ڕێوه‌به‌ری گشتی ته‌ندروستی هه‌ڵه‌بجه دكتۆر ئازاد موسته‌فا، به ئه‌ڤرۆ نیۆزی ڕاگه‌یاند:” دوای ئه‌وه‌ی وه‌زاره‌تی ناوخۆ لیستێكی ئه‌و قوتابیانه‌ی بۆ ناردین له ئێرانه‌وه گه‌ڕاونه‌ته‌وه،ئێمه‌ش له‌گه‌ڵ ئه‌وكه‌سانه‌مان به‌راوردكرد كه له‌كه‌ره‌نتینه‌كان بون بۆمان ده‌ركه‌وت 28 قوتابی نه‌هاتوونه‌ته كه‌ره‌نتینه.
ئازاد موسته‌فا ده‌ڵێ:” بانگه‌وازێكمان بڵاو كرده‌وه له‌وه‌ی ئه‌و قوتابیانه‌ی گه‌راونه‌ته‌وه له ئێران له ڕێگه‌ی ده‌روازه‌ی مونزریه ئاماده نه‌بون سه‌ردانی كه‌ره‌نتینه بكه‌ن، له ماوه‌ی 24 سه‌عات نه‌یه‌نه كه‌ره‌نتینه ئه‌وه ناوه‌كانیان ده‌ده‌ین به وه‌زاره‌تی خوێندنی باڵا و توێژینه‌وه‌ی زانستی مۆڵه‌تی خوێندنیان هه‌ڵده‌وه‌شێنینه‌وه وه له‌گه‌ڵ دیوانی یاسایی پارێزگای هه‌ڵه‌بجه ڕێكاری یاسای له دادگا ده‌گرینه‌به‌ر دژیان.
مسته‌فا ده‌ڵێ، به‌شێك له‌و قوتابیانه خۆیان هاتن و ڕۆشتنه كه‌ره‌نتینه به‌شێكی تریشیان له ڕێگه‌ی هێزه‌كانی ئاسایش و پۆلیس هێندران بۆ كه‌ره‌نتینه ئێستا 28 كه‌س له كۆی 31 كه‌سیان كه‌ره‌نتینه كراون، ته‌نها سێ كه‌سیان ماوه ژماره‌ی ته‌له‌فۆنیان داخستووه، خۆیان حه‌شارداوه.
ئەڤرۆ نیوز:
پشکا په‌یوه‌ندى و ڕاگه‌هاندنا كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل، ئەڤرۆ پێنجشەمبی راگەهاندنەک سه‌باره‌ت ترۆمبێلیێن مه‌نه‌فێست ده‌ره‌كى بەلاڤکریە و تێدا هاتیە: ئه‌و به‌رێزێن كو ل ده‌روازێ سنوریێ نێڤده‌وله‌تى یێ ئیبراهیم خه‌لیل ترۆمبێلێن تایبه‌ت یێن مه‌نه‌فێستێن وەلاتێن دیتر ب شێوه‌‌كێ ده‌مكى ئیناینه دناڤ هه‌رێما كوردستانێ دا و ده‌مێ ڤه‌مانا وان ترومبێلان دناڤ هه‌رێما كوردستانێ دا ب دووماهی هاتی، هەموویا ئاگه‌هدار دكهین كو ل وێ رێكکه‌فتا كو سنورێ توركیایێ ل سه‌ر وان ترۆمبێلان هاتیه گرتن، هه‌تاكو سنور ڤه‌دبیت و توركیا رێكێ دده‌ت كو ئه‌و ترۆمبێل ده‌ربازى ناڤ وەلاتێ وان دبن، ژلایێ گومركا ئیبراهیم خه‌لیل چ سزادانه‌ك ناكه‌ڤنه سه‌ر گیرو بوونا وان ترۆمبێلان دناڤ هه‌رێما كوردستانێ دا.
ئه‌ڤرۆ نیوز:
سه‌رۆكێ حكومه‌تا هه‌رێما كوردستانێ په‌یامه‌ك ده‌ربارێ هێرشا سه‌ر بنگه‌هێ تاجی یێ عیراقێ به‌لاڤكر.
ئه‌ڤرۆ 12/3/2020 مه‌سرور بارزانی سه‌رۆكێ حكومه‌تا هه‌رێما كوردستانێ، دراگه‌هانه‌كێ دا به‌لاڤكركۆ ب توندی ئه‌وێ هێرشێ شه‌رمزار دكهین كۆ دهی ب شه‌ڤ هاتیه كرن بۆ سه‌ر بنگه‌هێ تاجی و بوویه ئه‌گه‌رێ كوشتن و برینداربوونا هژماره‌كا راهێنه‌ر و راوێژكارێن هێزێن هه‌ڤپه‌یمانان ل عیراقێ.
د راگه‌هاندنا سه‌رۆكێ حكومه‌تا هه‌رێما كوردستانێ ئه‌و چه‌نده ژی تێدا هاتیه دیاركرن كۆ د ده‌مه‌كی دا هێشتا گه‌فێن تیرۆرێ ل عیراقێ و ده‌ڤه‌رێ به‌رده‌وامن، ئه‌ڤ جورێن كرداران ده‌لیڤه‌یێ بۆ بهێزبوونا گرۆپێن توندكار خوش دكه‌ت، دناڤ عیراقێ ئاریشه‌یا ساخله‌میێ و ئابووری و ئه‌منی فشارێن زۆر بۆ سه‌ر وه‌لاتیان دروستكرینه له‌ورا ئالوزكرنا ره‌وشێ دێ ب زیان بۆ عیراقێ و گه‌لێن ده‌ڤه‌رێ كه‌ڤیت.
مه‌سرور بارزانی ئه‌و چه‌نده ژی د راگه‌هاندنێ دا دیاركر هیڤی خازین ب هه‌ماهه‌نگیا هه‌موو لایه‌نێن نیشتمانی و دلسوزێن ده‌ڤه‌رێ و هه‌ڤپه‌یمانان، رێكێ ل هه‌ر بزاڤه‌كا تێكده‌رانه بگرن كو شیانێن خۆ بۆ سه‌قامیگری و ئاشتیێ و باشتركرنا ره‌وشا ژین و ژیارا وه‌لاتیان بكار بینن.
نيشاندان