ئەڤرۆ نیوز:
وەزارەتا ساخلەمی و ژینگەها عیراقێ راگەهاند، 15 حالەتێن نوو یێن توشبوون ب كۆرۆنا یێ هاتە تۆمار كرن و سێ كەساج ژی گیانێ خوە ژ دەستدایە، هەروەسا گۆتیە، د 24 دەمژمێرێن بوری دا ئەنجامێن پشكنینان بۆ 350 گومانلێكریێن توشبوو یێن كۆرۆنا یێ كرینە و تێدا 15 حالەت پۆزەتیڤ بووینە، کو شەش حالەت ل بەغداد و دو حالەت ل نەجەف و دو حالەت ل موسەنا و چار حالەت ل بەسرا و حالەت ژی ل سلێمانیێ هاتیە تۆمار كرن.
ئەڤرۆ نیوز:
سەرکەوت ئەحمەد پەیڤدارێ پۆلیسێن سلێمانیێ راگەهاند، ئەڤ شەڤە د ناڤ مالەکێ دا و ل نێزیک مزگەفتا قازی محەمەد ل باژێرێ سلێمانیێ تەقە هاتیە کرن و چار کەس هاتنە کوشتن و کەسەک ژی بریندار بوویە.
سەرکەوت ئەحمەد پەیڤدارێ پۆلیسێن سلێمانیێ گۆت ژی، د روودانەکا تەقەکرنێ دا، ل تاخێ ماموستایان ل باژێرێ سلێمانیێ کەسەکێ دایکا خوە و سێ برایێن خوە کوشتینە و بابێ خوە ژی ب گرانی بریندار کریە.
ئەڤرۆ نیوز:
ژێدەرەکێ ژ وەزارەتا دارایی و ئابووری یا هەرێمێ راگەهاند، ل رۆژێن شەمبی و یەکشەمبیێ ٢١ و ٢٢ ئادارا ٢٠٢٠ ، دێ موویێ یەکەیێن حەفتێ و هەشتێ یێن وەزارەتا پێشمەرگەی هێتە دابەشکرن، هەر چەندە پێشتر وەزیرێ دارایی و ئابووری یێ هەرێمێ راگەهاند بوو، کو مووچێ پێشمەرگەی یێ بەرهەڤە، لێ ژبەر قەدەغەیا هاتنوچوونێ هاتیە راگرتن.
ئەڤرۆ نیوز، ڕەزوان ڕۆژبەیانی:
ژ ئەگەرێ تەقەکرنا خۆشیێ بۆ جەژنا نەورۆزێ بەری دەمەکێ کێم ل ناڤ سەنتەرێ قەزا بەردەڕەش گەنجەک ب گولە هاتە بریندار کرن.
عەمید سەعدی شێخ ئەحمەد رێڤەبەرێ پۆلیسێن قەزا بەردەڕەش بۆ ئەڤرۆنیوز خۆیاکر پشتی مەغرەبا ئەڤرۆ ژ ئەگەرێ تەقەکرنەکا هەرەمەکی ب ناف تەقەیێ خۆشیێ جەژنا نەورۆزێ گەنجەکێ 20سالی ب ناڤێ موحەمەد یونس ل بەر دەری مالا خوە ب گولەیەکێ هەرەمەکی کو کەس نزانیت کی هاڤێتیە هاتە بریندار کرن ،
گوت ژی پشتی روودانی هاتە رەوانەکرن بۆ نەخۆشخانا بەردەڕەش سوپاس بۆ خودێ کو ب سفکی ئەو گەنج هاتبوو بریندارکرن و پشتی وەرگرتنا چارەسەریێ هاتە رەوانەکرن بۆ مالا خوە.
دیار ژی کر کو دۆسیە ل سەر ڤێ بابەتێ ل پۆلیسێن قەزا بەردەڕەش هاتیە ڤەکرن بەلێ ئاریشە ئەوە کو گەلەک کەسان پێکڤە تەقە کرینە زەحمەتە کو ئەنجامدەر وی بێتە دەستنیشان کرن.
ئه‌ڤرۆ نیوز:
سه‌رۆكێ حكومه‌تا هه‌رێما كوردستانێ په‌یامه‌ك ب هه‌لكه‌فتا جه‌ژنا نه‌وروزێ به‌لاڤكریه.
د په‌یامه‌كێ دا كۆ ئه‌ڤرۆ هه‌ینی 20/3/2020 مه‌سرور بارزانی سه‌رۆكێ حكومه‌تا هه‌رێما كوردستانێ زێده‌باری پیرۆزباهیا نه‌وروزێ، سوپاسیا پێگیربوونا وه‌لاتیان ب رێنماییان تایبه‌ت ب كورونایێ كر.
ده‌قێ په‌یاما سه‌رۆكێ حكومه‌تا هه‌رێما كوردستانێ:
ب هه‌لكه‌فتا جه‌ژنا نه‌وروزێ و سه‌رێ سالا نوو یا كوردی، پیرۆزباهیه‌كا گه‌رم ئاراسته‌ی گه‌لێ كوردستانێ و تایبه‌ت پێشمه‌رگێن قاره‌مان و بنه‌ماله‌یێن سه‌ربلندێن شه‌هیدان دكه‌م، هیڤی دارم ئه‌ڤ نه‌وروزه ب بیته خێر و خوشیێ بۆ خه‌لكێ كوردستانێ.
وه‌ك دزانین ئیسال ب ئه‌گه‌رێ به‌ڤلابوونا ڤایرۆسێ كورونایێ و زیانێن ئابووری، د ره‌وشه‌كا دژوار دا ئه‌ڤێ جه‌ژنا نیشتمانی دكه‌ین.
سوپاسیا هه‌وه دكه‌م، كو پێگیرن ب رێنمایێن ساخله‌میێ و ئه‌و رێكارێن بۆ سلامه‌تی و پاراستنا هه‌وه هاتینه بكار ئینان ژ وان ژی توخیبداركرنا هاتنوچونێ، پشت راستین دێ هه‌ڤكاریا ئیك كه‌ین كۆ ئه‌ڤێ قه‌یرانێ ده‌رباز بكه‌ین، كۆ چه‌وا ل به‌ری نوكه ب خوراگریێ سه‌ركه‌تین ب سه‌ر ره‌وشین دژوار دا.
هیڤی دارم ئه‌ڤ ئاسته‌نگیا هاتیه هه‌مبه‌ری مه، ب بیته ده‌لیڤه‌یه‌ك بۆ ئه‌وێ چه‌ندی چاڤه‌كی د خودا بگێرین و خوپاریزیا زێده تر ل ده‌مێن بهێت بكه‌ین، ل ئاستێ ئابووری ژی زێده‌تر مه پالد دده‌ت بۆ به‌رده‌وام بوون ل سه‌ر بجهكرنا یاسایا چاكسازیێ و دارای و كارگێریێ كۆ ئێكه ژ كارێن ئێكێ یێن حكومه‌تا هه‌رێما كوردستانێ، ب تایبه‌ت كۆ هه‌ر ل ده‌ستپیكا ده‌ستبكار بوونێ مه ته‌ئكید ل سه‌ر سیاسه‌تا زێده‌كرنا ژیده‌رین ئابووری یێن هه‌رێما كوردستانێ كریه نه بتنێ پشت به‌ستنێ ب ئێك ژیده‌ریا داهاتی بكه‌ین، ئه‌و ره‌وشا نوكه مه رژدتر دكه‌ت كۆ ل سه‌ر چاكسازیێ به‌رده‌وام بین.
نه‌وروزا وه پیرۆز بیت و هیڤیدارم كوردستان ژی بهێز و ئاڤه‌دانتر بیت
مه‌سرور بازرانی
سه‌رۆكی حكومه‌تا هه‌ریما كوردستانێ.
20/3/2020
ئه‌ڤرۆ نیوز:
د. دارا ره‌شید وه‌زیرێ پلان دانانا حكومه‌تا هه‌رێما كوردستانێ د به‌رنامه‌یه‌كێ كه‌نالێ رووداو دا راگه‌هاند حكومه‌تا هه‌رێمێ رێكارێن پێدڤی به‌ری داكه‌تنا بهایێ پترۆلێ و كێم بوونا داهاتی بكار ئیناینه و دانوستاندن ل سه‌ر ئه‌ڤێ چه‌ندێ ل گه‌ل جڤاتا وه‌زیران هاتیه‌كرن.
وه‌زیرێ پلان دانانا حكومه‌تا هه‌رێما كوردستانێ ئه‌و چه‌نده ژی راگه‌هاند حكومه‌تا هه‌رێمێ دێ یاسایا چاكسازیێ بجهـ كه‌ت ژبوی ڤه‌گه‌راندنا داهاتی بۆ خه‌زینه‌یا حكومه‌تێ، ئه‌ڤه ژی برێكا برینا دو موچه‌ی و موچه‌یێ نه یاسایی و كێمكرنا مه‌زاختیان و رێكخستنا كه‌رتێ گشتی.
د. دارا ره‌شید ئه‌و چه‌نده ژی گۆت: ب چ شێوه‌یه‌كی حكومه‌تا هه‌رێمێ ده‌ست ب پاشه‌كه‌وتێ موچه‌ی ناكه‌ته‌ڤه ب چ شێوه‌یه‌كی ده‌رماله‌یێن فه‌رمانبه‌ران كێم ناكه‌ت و بۆ ئه‌ڤێ چه‌ندێ بلا فه‌رمانبه‌ر پشت راست بن.
ئه‌ڤرۆ نیوز:
سه‌رۆكێ فه‌ره‌نسا 5 ملیار یورو بۆ ڤه‌كۆلینكرنێ تایبه‌ت ب ڤه‌دیتنا چاره‌سه‌ریا ڤایرۆسێ كرونایێ ته‌رخانكرن.
ئیمانوێل ماكرۆن سه‌رۆكێ فه‌ره‌نسا راگه‌هاند قه‌یرانا كورونایێ پێدڤی ب ڤه‌كۆلینێن زانیستی یه، له‌ورا 5 ملیار یورویان دێ ته‌رخان كه‌ین بۆ ڤه‌كۆلینكرنێن تایبه‌ت بۆ ڤه‌دیتنا چاره‌سه‌ریا ڤایرۆسێ كورونایێ.
لگۆری ئاماران: تانوكه 11 هه‌زار و 10 كه‌س ل فه‌ره‌نسا توشی ڤایرۆسێ كورونایێ بوون، 295 كه‌س ساخ بووینه و 372 كه‌س ژی ب ڤایرۆسی مرینه.
ئه‌ڤرۆ نیوز:
حكومه‌تا سعودیێ مزگه‌فتا پێغه‌مبه‌ری (س) ل باژێرێ مه‌دینه ب ته‌مامی داخست.
داخستنا مزگه‌فتا پغه‌مبه‌ری(س) كۆ جارا ئیكێ یه د دیرۆكێ دا بهێته‌گرتن، ئه‌ڤ چه‌نده ئێكه ژ پێنگاڤێن سعودیێ بۆ رێگرتن ژ زێده‌تر نه به‌لاڤ بوونا ڤایرۆسێ كورونایێ.
ده‌رگه‌هی مزگه‌فتا پێغه‌مبه‌ری(س) بۆ ده‌مه‌كێ نه‌دیار ب ریارا سه‌رۆكاتیا گشتی یا كارۆبارێن حه‌ره‌مێن شه‌ریف هاتیه‌گرتن چ كه‌سه‌ك نه‌شێت بچیته ناڤ مزگه‌فتێ ڤه.
لگۆری دوماهی ئامار، تانوكه ل سعودیێ 274 كه‌س تووشی ڤایرۆسێ كورونایێ بووینه و هه‌شت كه‌س ساخ بووینه‌و چ كه‌س ژی نه‌مرینه.
ئه‌ڤرۆ نیوز:
وه‌زیرێ ناڤخۆ یێ حكومه‌تا هه‌ریما كوردستانێ ب راسپارده‌یا سه‌رۆكێ حكومه‌تا هه‌رێما كوردستانێ، سه‌ره‌دانا زیان ڤێكه‌تیێن له‌هیا دهۆكێ بكه‌ت.
ئه‌ڤرۆ 20/3/2020 رێبه‌ر ئه‌حمه‌د وه‌زیرێ ناڤخۆ یێ حكومه‌تا هه‌رێما كوردستانێ ل گه‌ل فه‌رهاد ئه‌ترۆشی پارێزگارێ دهۆكێ كۆمبوو، ژبلی قه‌ره‌بوكرنا زیان ڤێكه‌تیێن له‌هیان، رێكارێن حكومه‌تا هه‌رێما كوردستانێ بۆ رێگرتن ژ به‌لاڤبوونا ڤایرۆسێ كورونایێ ته‌وه‌ره‌كێ دی یێ كۆمبوونێ بوو.
نيشاندان