سالار محەمەد دۆسكی:

بەهجەت عەلی سپینداری، بەربژارێ هەژمارە 6 ل سەر لیستا 190 یا پارتی دیموكراتی كوردستان بۆ رۆژناما ئەڤرۆ دیار كر، كارناما پارتی بۆ خولا شەشێ یا پەرلەمانێ كوردستانێ یا رۆهن و ئاشكرایە و دبێژیت: ل پەرلەمانێ كوردستانێ دێ‌ هەمی بزاڤان ژ بۆ بجهئینانا وێ كارنامێ كەین، چونكی كارنامەكا تێر و تەسەلە و هەمی ئالیێن ژیانێ ڤەدگریت و پارتی ژ بەرپرسایەتیێ دوور ناكەڤیت و دێ هەر پارتی بیت خودانا ڤی مللەتی.
بەهجەت سپینداری گۆت: «پارتی وەك پارتەكا خودان خەبات و قوربانیدان ب درێژاهیا دیرۆكێ، مێژوو شاهدێ خەبات و بەرخودانا پارتی یە، خودانا هەردو شۆڕەشێن ئیلۆن و گولانێ و سەرهلدانێ‌ یە، بەرەڤانی ژ ئاخا كوردستانێ كریە و شەرێ داعشێ‌ باشترین نموویە، پارتی هەلگرا دیاركرنا چارەنڤیسێ مللەتێ مە و بجهئینانا ڕیفڕاندۆما كوردستانێ یە، لەوما دبێژم پارتی بۆ ئەڤرۆ و سوباهی یە و پارتی خودان بەرنامەیە و دێ هەر پارتی بیت خودانا ڤی مللەتی».
بەربژارێ هەژمارە 6 گۆتژی: «پەیداكرنا دەلیڤەیێن كاری بۆ گەنجان دێ ژ كارێ‌ مە بیت، دێ بزاڤێن مە ئەو بن ل سەر هەمی تەوەرا كار بكەین، لێ تەوەرێ خوشكرنا ژین و ژیارا خەلكێ مە دێ تەوەرەكێ سەرەكیێ كارناما لیستا 190 بیت و ئەڤە ژی جهێ رێزا هەر كەسەكی یە».
ناڤهاتی زێدەتر گۆت: «داخوازێ ژ هەمی خەلكێ كوردستانێ دكەم بچنە سەر سندۆقێن دەنگدانێ و دەنگی بدەنە لیستا 190، لیستا هەردو داستانێن (پردێ و سحێلا) لیستا ئاڤەدانیێ و بەرگیریێ و ب تنێ درووشمێ پارتی دەربڕینێ ژ پاشەرۆژ و ئاڤەدانیێ و پێكڤەژیانێ دكەت، دیسا دەنگی بدەنە هەژمارە 6 دێ هەمی بزاڤا كەین زێدەتر خزمەتا گەل و وەلاتێ خوە بكەین، چونكی وەلاتێ مە ژ هەژی خزمەتێن مەزنترە.

سالار محەمەد دۆسكی:

د. هاڤین سەدیق خدر، بەربژارا هەژمار 46 ل سەر لیستا 190 یا پارتی دیموكراتی كوردستان و كچا شەهید سەدیق خدر سندی و هەلگرا باوەرناما دكتۆرایێ د بیاڤێ ئەدەبیاتێ كوردی دا، د دیدارەكێ دا بۆ رۆژناما ئەڤرۆ دبێژیت: هەلبژارتنێن پەرلەمانێ كوردستانێ گەلەك دگرنگن، ب تایبەت د ڤێ قووناغێ دا.
د. هاڤین سەدیق سندی گۆت: «كارناما پارتی یا پڕە ژ هەمی بیاڤێن خزمەتێ، كو پێشكێشی خەلكێ مە بكەت، ئەڤە ژی جهێ دلخوشیا هەر كەسەكی یە، ئەم دێ پێگێربین بجهئینانا وێ كارنامێ».
ناڤهاتیێ‌ گۆتژی: «ئەز هەلگرا باوەرناما دكتۆرایێ‌ مە و دبینم د لژنا خواندنا بلند و پەروەردێ دا دێ زێدەتر رۆلێ خوە بینم، ئەز دێ پتر كار ل سەر وێ چەندێ كەم، پێداچوون د پرۆگرامێن خواندنێ دا بهێتە كرن و گرفتێن دكەڤنە د رێكا پرۆسێسا خواندنێ دا بهێنە چارەسەركرن، دیسا دێ كار ل سەر ژین و ژیارا مامۆستا و فەرمانبەرێن خواندنا بلند كەم».
د. هاڤین بەربژارا هەژمار 46 زێدەتر گۆت: «بلا خەلكێ كوردستانێ باش بزانیت كێ خەبات و بەرخودان كرینە، كێ شۆڕەشێن كوردستانێ كرینە، كێ سەرهلدان كریە، كێ ڕیفڕاندۆم كریە، كیبوون شەرێ داعشێ‌ كرین، د رۆژێن دژوار دا خوە ل ڤی مللەتی كریە خودان، ئەو ژی پارتی یە و لیستا وێ‌ ژی 190، لیستا بەرخودان قوربانی دانا مللەتێ كوردە، لیستا ئەڤرۆ و داهاتی یە، لەو دڤێت دەنگێ‌ خۆ بدەینێ‌«.
گۆتژی: «ئەز كچا شەهیدیمە، لەو ئەز د ژینگەها كەسوكارێن شەهیدان دا ژیایمە و د دەردەسەریێن وان دگوهم، ژ بەر هندێ‌ دێ هەمی بزاڤان كەم دەنگێ خێزان و كەسوكارێن شەهیدانبم ل پەرلەمانێ كوردستانێ».
د. هاڤین سەدیق خدر ل دووماهیێ گۆت: «داخوازێ ژ دەنگدەرێن كوردستانێ و پارێزگەها دهۆكێ‌ دكەم دەنگی بدەنە لیستا 190 یا پارتی دیموكراتی كوردستان، ئەگەر مە ژ هەژی پەرلەمانێ كوردستانێ دبین وەك كچە شەهیدەك و مامۆستا زانكۆیێ، داخواز ژ هەمی خەلكێ خوە دكەم دەنگی بدەنە من هەژمارا من ژی 46 ل سەر لیستا 190 یا پارتی دیموكراتی كوردستان.

دوهی ئێكشەمبی 13/10/2024، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، دەزگەهێ خێرخوازیێ بارزانی (پلاتفۆرما هیوا و گرنژین) بڕێڤەبر، هەڤدەم 540 یەكەیێن ئاكنجیبوونێ پێشكێشی مالباتێن سەربلندێن شەهیدان هاتنە كرن.
سەرۆكێ حوكمەتا هەرێما كوردستانێ د رێوڕەسمیدا پەیڤەك پێشكێشكر و ئاماژە كر» بڕێڤەچوونا رێوڕەسمێ ل سەر راسپاردە، فەرمان و رینمایێن سەرۆك بارزانی بوو و جەنابێ وی هەردەم خوە ب قەردارێ بنەمالێن سەربلندێن شەهیدان دزانیت».
دەقێ پەیڤا سەرۆكێ حوكمەتا هەرێما كوردستانێ..
بنەمالێن سەربلندێن شەهیدان ..
شانازیێ دكەم ئەڤرۆ د خزمەتا هەوەیێن بەرێز و خوەشتڤی مە. رێكێ بدەنە من سلاڤێن سەرۆك بارزانی بگەهینمە هەوە. جەنابێ وی سلاڤ و رێز و پێزانین بۆ هەوە هەموویان یێن هەین و ئەڤ رێوڕەسمە ل بن چاڤدێری و فەرمان و رێنمایێن سەرۆك بارزانی دهێتە ئەنجامدان, جەنابێ وی هەردەم خوە ب قەردارێ بنەمالێن سەربلندێن شەهیدان دزانیت، ئەڤە وەدكەت ئەم هەموو، هەموو خەلكێ كوردستانێ، خوە ب قەردارێ هەوەیێن بەرێز و خوەشتڤی بزانین. خزمەتكرنا هەوە ئەرك و شانازییە بۆمە و خوەشحالێن ئەڤرۆ ئەم بشێن د خزمەتا هەوەیێن بەرێز و خوەشتڤیدا بین بۆ بجهگەهاندنا ئەركەكێ گەلەك بچووك ژی بەرامبەر وێ قوربانییا كو هەوە بۆ گەل و وەلاتێ خوە دای. هیچ تشتەك نەشێت قەرەبوویا قوربانییا هەوە بكەت.
ئەم هەر چ بكەین یا كێمە بۆ بنەمالێن سەربلندێن شەهیدان، بەلێ مخابن ژبەر رەوشا ناڤخوەیی و دەڤەرێ، دبیت مە نەشیابیت وەكو پێدڤی د خزمەتا هەوەیێن بەرێز و خوەشتڤی بین، هەرچەندە خزمەتكرنا بنەمالێن سەربلندێن شەهیدان ئەركێ بەراهیێ یێ حوكمەتێ بوو، یێ تاك ب تاكێ مەبوو، یێ دەزگەهێ خێرخوازیێ بارزانی ژی بوو. ژ ڤی روانگەهی مە بزاڤكریە ئەوا ژ مە بهێن بۆ ب ساناهیكرنا رەوشا ژیارا هەڤوەلاتییان، ب تایبەتی بنەمالێن سەربلندێن شەهیدان، ئەوا ژ دەستێ مە بهێت بكەین، هەروەكو دابینكرنا ئاسانكاری و پێدڤیێن ساخلەمی بۆ وان كەسێن پێدڤی پێ هەی، یان ژی دابینكرنا دەلیڤەیێن خواندنێ بۆ زارۆكێن سەربلندێن شەهیدان.
ل ڤێرێ ژی، ئەم ئەڤرۆ یێن كۆمبووین بۆ بەلاڤكرنا كۆمەكا یەكەیێن ئاكنجیبوونێ بۆ بنەمالێن سەربلندێن شەهیدان ل پارێزگەها هەولێرێ و ئیدارەیا سەربخوەیا سۆران بێی جوداهی، هەر كەسەك ژ هەر گەند و باژێرەكی بیت ل پارێزگەها هەولێرێ و ل شەڕێ دژی داعشێ شەهید ببیت، بێی كو هزر د وێ چەندێ دا بكەین ژێیاتییا وی یا سیاسی چیە و سەر ب چ ئالی و حزب و بیروباروەرەكێ سیاسییە، بێی جوداهی، مە بڕیار دایە كو یەكەیێن ئاكنجیبوونێ بۆ هەموو شەهیدان دابین بكەین، ئەڤە ژی جهێ سەربلندیێیە و ئەڤە ئەو ئەركێ پیرۆزە كو ل سەر ملێ دەزگەهێ خێرخوازیێ بارزانی و پەیرەوكەرێن رێبازا بارزانییە كو رێز ل شەهیدی بهێتە گرتن، هەر كەسەكێ گیانێ خوە بكەتە قوربانی گەل و وەلاتێ خوە، بۆمە شەهیدە، برایە، كەسوكارە و هیچ جوداهییەك ل رێزێن شەهیدان ناهێتە كرن، ژبەر وێ چەندێ ئەم شانازیێ دكەین كو بشێین خزمەتكارێن هەموو شەهیدان بین بێی فەرق و جوداهی.
ئەز سوپاسییا دەزگەهێ خێرخوازیێ بارزانی دكەم كو گەلەك وەستییان د ئەنجامدانا ڤی پڕۆژەیدا و چەندین پڕۆژەیێن پێشنر ژی كو هاتینە ئەنجامدان و سوپاسییا وان وەلات و رێكخراوێن نێڤدەولەتی ژی دكەم كو هەڤكارێن دەزگەهیچ خێرخوازیێ بارزانی بوون بۆ دابینكرنا هاریكارییان بۆ خەلكێ كێمدەرامەت و كارێن خێرخوازی، سوپاسییا سەرمایەدار و بازرگان و خێرخوازێن كوردستانێ دكەم كو گەلەك هاریكارییا دەزگەهێ كری و هەردەم پالپشتێن سەرەكی بوون بۆ وێ چەندێ كارێن خێرخوازی بەردەوام بن. ئەم هەموو پێكڤە دشێین زێدەتر هاریكارییا هەڤدو بكەین و شانازیێ دكەم ب وێ چەندێ كو دەزگەهێ خێرخوازیێ بارزانی شیایە ل سەر ئاستێ ناڤخوەیی و دەڤەرێ و نێڤدەولەتی، ببیتە دەزگەهەكێ جهێ باوەری و شانازییا مە هەموویان. دەستخوەشیێ ل هەوە دكەم، ئینشائەللا بەردەوام بن د وی ئەركێ پیرۆز یێ هەوە گرتییە بەر و بەردەوامبن دخزمەتكرنا بنەمالێن سەربلندێن شەهیدان و هەموو خەلكێ كوردستانێ كو پێدڤی ب هاریكارییا هەبیت. دزانم ڤی دەزگەهی ل دەرڤەی هەرێما كوردستانێ ژی گەلەك كار یێن ئەنجامداین و هاریكاری و بەخشینێن خەلكێ كوردستانێ یێن گەهاندینە گەلەك ئالی و كەسێن كو پێدڤی ب هاریكاریێ بووین، وەكو بیڤەلەرزێن ل توركیا و سووریێ رووداین، پشتی كو تووشی ئەو هەموو نەهامەتی و كێشەیان بووین، ب تایبەتی خووشك و برایێن مە یێن كورد كو مخابن زیانەكا مەزن ڤێكەفت، دەزگەهێ خێرخوازیێ بارزانی بەری هەموو ئالییەكی د هاوارا وان خوەشتڤییان چوو، ئەڤە ژی بۆمە جهێ شانازیێیە كو هەموو ئالییەك بزانیت، جەنابێ بارزانیێ نەمر چاوان د ژیانا خوەدا بۆ كوردستانێ ژیایە، پشتی وی ژی ناڤێ وی هەر ب سەربلندی دێ مینیت و هەر دێ د خزمەتا هەموو كوردستانێدا بیت.
بەری دو سالان مە زێدەتر ژ 368 یەكەیێن ئاكنجیبوونی ل پارێزگەها دهۆكێ و ئیدارەیا سەربخوەیا زاخۆ ل سەر بنەمالێن سەربلندێن شەهیدان بەلاڤكرن، ئەڤرۆ ژی ئەم یێن ل ڤێرێ بۆ بەلاڤكرنا 540 یەكەیێن ئاكنجیبوونێ ل سەر بنەمالێن سەربلندێن شەهیدان. هەكە هندەك بنەمالێن دی یێن شەهیدان بمینن، دیسان ئەم دێ بەردەوام بین د پڕۆژەیێن هەڤشێوەدا، تاكو هەر بنەمالەیەكا سەربلند یا خودان شەهید ل هەموو كوردستانێ ببیتە خودانا یەكەیا ئاكنجیبوونا خوە، ئەڤە سۆز و پەیمانە و ئینشائەللا دێ بجهئینین ژی .
ل دوماهیێ من د خواست دیسان ئاماژێ ب هندەك كارێن دی یێن دەزگەهێ خێرخوازیێ بارزانی بدەم، بەری وێ چەندێ بهێینە خزمەتا هەوەیێن بەرێز، كۆمەكا هەلكەفتێن دی هەبوون كو ل گەل هاتنا ژۆر یا من چووینە خزمەتا وان كارێن خێرخوازییانە یێن كو دەزگەهێ بارزانی بۆ هەڤوەلاتیێن دی دكەت. شانازیێ دكەین كو دەزگەهێ خێرخوازیێ بارزانی بوویە هاریكار بۆ وان زارۆكێن كو كێشەیا ئۆتیزمێ هەی، مە هاریكارییا وان كر و دێ بەردەوام بین د وێ چەندێ دا كو پیچەك ژ ئێش و ئازارێن وان كێم بكەین و وەبكەین ب خزمەتكرنا هەژی یا وان، وان بزڤرینین بۆ ناڤ جڤاكی. خوەشحالم كو من دیتی كۆمەكا وان خوەشتڤی و ئەزیزان نوكە د بەرهەڤن بزڤرن بۆ قوتابخانەیێ. هەروەسا وان خوەشتڤییچن كو نەخوەشییا تالاسیمیایێ هەی، دیسان دەزگەهێ خێرخوازیێ بارزانی هاریكارێ سەرەكی بوو دێ بەردەوام بیت د گەهاندنا هاریكارییان بۆ وان خوەشتڤی ئەزیزان.
مە گەلەك ئەزیزێن دی ژی یێن هەین كو پێدڤی ب دەزگەهێ خێرخوازیێ بارزانی هەبوو، ئەوێن دایك و بابێن خوە ژدەستداین، دیسان دەزگەهێ خێرخوازیێ بارزانی ل شوونا دایك و باب و كەسوكارێن وان، ئەركێ سەرپەرشتیكرنا وان ئێخستییە ستۆیێ خوە و شانازیێ دكەین كو بەردەوام بین د خزمەتكرنا وان ئەزیزان ژی.
گەلەك زارۆك یان خەلكێ دی یێ هەژار ژی هەبوو كو پێدڤی ب هاریكاریێن ساخلەمی هەبوو، چ ل ناڤ یان ل دەرڤەی وەلاتی، دیسان دەزگەهێ خێرخوازیێ بارزانی یێ هاریكار بوو. ئەز جارەكا دی دبێژم، هەموو ئەو ئەركێن پیرۆز یێن كو دەزگەهێ خێرخوازیێ بارزانی ب ستۆیێ خوەڤە گرتین، ژ دل و بێ منەت، ل دووڤ رێنمایێن سەرۆك بارزانی، بێی وێ چەندێ منەتێ ب سەر هیچ و كەس و ئالییەكی بكەین، وەكو ئەرك و شانازی، ئەم دكەین و دێ بەردەوام بین. هیڤیدارم هوون رازی بن، خەلكێ كوردستانێ ژ مە رازی بیت، ب تایبەتی بنەمالێن سەربلندێن شەهیدان ژمە رازی بن.

دوهی ئێكشەمبی 13/10/2024، مەسرور بارزانی، سەرۆكێ حوكمەتا هەرێما كوردستانێ، د رێورەسمەكیدا ب بەرهەڤبوونا د. ئالان حەمە سەعید، وەزیرێ پەروەردێ، كۆمەلگەها بارزانیێ نەمر یا پەروەردەیی ل هەولێرێ ڤەكر.
سەرۆكێ حوكمەتا هەرێما كوردستانێ د پەیڤەكێدا د رێوڕەسمێدا راگەهاند» من باوەر نەدكر ئەڤ كۆمەلگەهە ب ڤێ شێوەیێ پێشكەفتی هاتبیتە دروستكرن، جهێ دەستخوەشیێ و شانازیێیە. دەستخوەشیێ ل وەزارەتا پەروەردێ و سەرپەرشتێن ڤێ كۆمەلگەها پەروەردەییا پێشكەفتی دكەم كو ل سەر ئەركێ حوكمەتا هەرێما كوردستانێ و ب شێوەیەكێ هەڤچەرخ و سەردەمییانە هاتییە دروستكرن و ژ چەندین پشێن جۆرا و جۆر پێك دهێت».
سەرۆكێ حوكمەتا هەرێمێ گۆت ژی» ژ بلی ئالیێ خواندنێ و فێربوونێ، ئالیێن دی یێن گرنگ یێن ژیانێ ژی د دروستكرنا كۆمەلگەها بارزانیێ نەمر یا پەروەردەیی ل بەرچاڤ هاتینە وەرگرتن، وەكو دابینكرنا پێدڤی، دەزگەهێن وەرزشی، هونەری و ساخلەمی، ئەڤە ژبلی سیستەمێ سلامەتیێ و ئاگر ڤەمراندنێ. هەروەسا رووبەرەكێ باش ژی ژ ڤێ كۆمەلگەهێ بۆ كەسكاتیێ هاتییە تەرخانكرن، كو ئەڤە سەقایەكێ گونجایتر و خوەشتر پەیدا دكەن بۆ وێ چەندێ قوتابی زێدەتر هۆگرێن قوتابخانێ بن و دەمەكێ ب مفا تێدا ببۆرینن».
ل دووڤ ئاخڤتنا مەسرور بارزانی» ئەڤ كۆمەلگەهە ب ناڤێ رێبەرێ نیشتمانیێ گەلێ كورد، بارزانیێ نەمر هاتیە ناڤكرن، ئەو رێبەرێ هەموو ژیانا خوە ژ پێخەمەت سەربلندییا نەتەوەیی دەربازكری و ئێك ژ ئارمانجێن وی یێن سەرەكی ژی ئەو بوو كو گەلێ مە ب ئازادی و سەربلندی، ب زمانێ خوە بخوینیت و گەنج ولاوێن كوردستانێ ب رێكا خواندنێ پێشبكەڤن و زێدەتر خزمەتا نیشتمانێ خوە بكەن».
سەرۆكێ حوكمەتا هەرێمێ دوپاتكر» ئەو ئازادی، ئاسایش، سەقامگیری و دەستكەفتێن مە هەین، هەموو ژ ئەگەرێ خەبات و قوربانیێن پێشمەرگێن قەهرەمان و شەهیدێن مەنە. هیڤیدارم ئەڤ كۆمەلگەهە ژی، قوتابی، مامۆستا و فەرمانبەرێن وێ د ئاستێ ناڤێ پڕ شكۆیێ بازرانیێ نەمر بن و نموونەیا زێرەكیێ و ژێهاتیێ و رەوشتبلندیێ، نیشتمانپەروەریێو ژینگەهدوستیێ بن».
مەسرور بارزانی دیاركر ژی كو بۆ پێشئێخستنا كەرتێ پەروەردێ ل هەرێما كوردستانێ، پێدڤییە زێدەتر قوتاخانە بهێنە دروستكرن و ئەو قوتابخانەیێن پێدڤی ب نووژەنگرنێ هەی، ب زووترین دەم بهێنە نووژەنكرن و گۆت» ل سالێن بەری ژی، سەرەرای رەوشا داراییا دژوار، حوكمەتا هەرێمێ ب هاریكارییا كەرتێ تایبەت، ب دەهان قوتابخانەیێن نوو دروستكرن و نووژەنكرن و د بەرنامەی دایە بۆ زێدەتر پێشڤەبرنا كەرتێ پەروەردێ و خواندنێ بەردەوام بین».

نوونەرێ سەرۆك مەسعود بارزانی، سیداد بارزانی پشكداری د كەرنەڤالەكا پارتی دیموكراتی كوردستان بۆ پشتەڤانیكرنێ ل لیستا 190 یا پارتی بۆ هەلبژارتنێن پەرلەمانێ كوردستانێ راگەهاند، د رێكێ دا د هاتین بۆ دەڤەرا راپەڕین ل سالێن نۆتان رێك یا باشتر بوو ژ نوكە، خەلكێ دەڤەرێ دشێن وێ رێكێ بكەنە پیڤەر بۆ وێ چەندێ بزانن كی خزمەتێ دكەت.
سیداد بارزانی سلاڤێن تایبەت یێن سەرۆك بارزانی گەهاندنە خەلكێ دەڤەرا راپەڕین و ئاماژە ب خەباتا دەڤەرێ د بزاڤا رزگاریخوازا كوردستانیدا كر ب رێبەرییا بارزانیێ نەمر، هەروەسا گۆت» خەلكێ ڤێ دەڤەرێ قوربانیێن مەزن یێن داین و تووشی كیمیاباران و دەربەدەركرنێ بووینە، شوون تبلێن وان د بزاڤا رزگاریخوازا كوردستانیدا یێ دیارە».
دیاركر ژی كو دەڤەرا پشدەر و بتوێن لاندكا شۆڕەش و خەباتێ بوون، بەلێ وەكو پێدڤی ژ روویێ ئاڤەدانیێ و گەشەپێدانێ و خزمەتگوزارییان گرنگی پێ نەهاتییە دان، بەرسڤا قوربانی و مەزلومییەتا ڤێ دەڤەرێ نەهاتییە دان، هەروەسا ئەگەرێ بێبەهربوونا ڤێ دەڤەرێ ژی ئێخستە ستوورێ حزب و ئالیێ دەستهەلاتدار ل وێ دەڤەرێ زڤراند كو دەستهەلات و دارایی بۆ خزمەتا خەلكی بكارنەئینایە.
سیداد بارزانی ئاماژە كر» دزانین ژ ئەگەرێ پارتیبوونا هەوە هوون تووشی فشار و مەحروومییەتێ بووینە، سەرۆك بارزانی پێزانین بۆ هەدارا هەوە یا هەی، وەكو چاوان ل شۆڕەش بەرگریێ ژ قەوارەیێ هەرێما كوردستانێ رۆل هەبوو، بۆ هەلبژارتنێن 20 ئۆكتۆبەرێ ژی ب دەنگدانێ ب لیستا 190 یا پارتی، داستانا سەركەفتنەكا دی یا دیرۆكی بۆ پارتی ل ڤێ دەڤەرێ دێ تۆمار كەن».
هەروەسا گۆت» ل هەموو هەلبژارتنێن 30 سالێن بۆری پارتی حزبا ئێكێ و سەركەفتییا ئێكێ بوو و ب پشتەڤانییا خودایێ مەزن و هێمەتا هەوە، پارتی دێ هەر یا ئێكێ بیت و دێ ب سەركەڤین، سەركەفتنا پارتی ب رامانا مانا كوردستانێ و ب هێزكرنا وێیە، پارتی حزبا ئارامیێ و ئاڤەدانیێ و ئاشتیێ و ئاڤەدانیێیە، نەكو یا ژناڤبرنێ و تێكدانێیە».
نوونەرێ سەرۆك بارزانی گۆت ژی» پشتڕاست بم ل كابینەیا داهاتییا حوكمەتا هەرێما كوردستانێ دێ بزاڤێن زێدەتر كەیت بۆ وێ چەندێ سنوورێ ئیدارەیا راپۆڕین ژ روویێ ئاڤەدانیێ و گەشەپێدانێ زێدەتر گرنگی پێ بهێتە دان».
سیداد بارزانی خویاكر « دێ هەموو بزاڤێن مە بۆ وێ چەندێ بن دەستێ سەقامگیری وئارامی و ئاڤەدانییا حوكمەتا هەرێمێ بگەهیتە دەڤەرا راپەڕین، تاكو كوردستان سەربلند و ب هێز بیت، هەڤدەم دەڤەرا راپەڕین یا ئارام و ئاڤەدان بیت، داخواز ژ هەوە دكەم هوون و مالبات و كەسوكارێن هەوە، ب گەرمێ پشكداریێ د هەلبژارتناندا بكەن و دەنگی بدەنە لیستا 190 یا پارتی دیموكراتی كوردستان و بەربژارێن پارتی، دەنگەگێ ب تنێ ژی بهایێ خوە یێ هەی و نابیت ئێك دەنگێ پارتی ب هەدەر بچیت».
هەروەسا دوپاتكر» خەلكێ زۆر ل دەڤەرا راپەڕین باوەری ب پارتی كریە بۆ خزمەتكرنێ، ب پێدڤی ژی هاتە زانین كو پێشوازی ل وان دەنگدەران بهێتە كرن بۆ وێ چەندێ بشێن پێكڤە خزمەتێ و ئاڤەدانیێ و ئارامیێ بگەهیننە دەڤەرێ».
پتر گۆت» ل 20 ئۆكتۆبەرا 2017 ب هاریكارییا چەند ئالییان هێرش ل سەر قەوارەیێ هەرێما كوردستانێ هاتە كرن، بەلێ هاتنە شكاندن. ل 20 ئۆكتۆبەرا ئەڤسالەژی دێ سەركەفتنەكا دی یا مەزن بۆ رێبازا پارتی و بارزانی ب دەنگێن خوە تۆماركەین».
گۆت ژی» دەمێ دهاتینە ڤێ دەڤەرێ، ب رێكەكا گەلەك خرابدا هاتین، ل سالێن نۆتان ئەو رێك یا باشتر بوو، بلا خەلكێ دەڤەرێ وێ رێكێ ببینن و بڕیارێ ل سەر وێ چەندێ بدەن كی هەژی حوكمڕانیێیە».
ل دوماهیێ گۆت» ب نیاز بوون كارخانەیەكا قەند و شەكرێ ل رانیا ڤەكەن و نوكە دا وێ قەند و شەكرێ خوین، بەلێ تنێ ئاخڤتن بوو، نە قەند و نە شەكر هاتە دروستكرن».

رەمەزان زەكەریا

بەرزو عەبدی سۆرچی، بەربژارێ هەژمار 9 ل سەر لیستا هەژمار 190 یا پارتی دیموكراتی كوردستان بۆ خولا شەشێ یا پەرلەمانێ كوردستانێ ل بازنەیێ دهۆكێ‌، بەرنامەیێ كارێ خوە ئاشكرا كر و گۆت :دێ كاركەم ل پەرلەمانی بۆ دانانا دەستوورەكێ باش بۆ هەرێما كوردستانێ.
بەرزو عەبدی سۆرچی ، بەربژارێ هەژمار 9 لیستا هەژمار 190 یا پارتی دیموكراتی كوردستان بۆ خولا شەشێ یا پەرلەمانێ كوردستانێ ل بازنەیێ دهۆك بۆ رۆژناما ئەڤرۆ گۆت: ئێك ژ كار و پڕۆژەیێن من بۆ پەڕلەمانێ كوردستانێ كاركردنە بۆ دانانا دەستوورەكێ كۆنكرێتی ب هەڤكاریا فراكسیۆنا پارتی ل پەڕلەمانێ كوردستانێ ل سەر بەرژەوەندییا هەرێما كوردستانێ .
ناڤبری گۆتژی: ل چارچۆڤێ بسپۆریا خۆ دێ كار بۆ دابینكرنا مافێن مامۆستایان و قوتابییان كەم بۆ باشترین پرۆژەیاسا ل بەرژەوەندیا كەرتێ پەروەردێ .
ناڤهاتی خویا كر: ئێك ژ كارێن من یێن هەرە گرنگ هەولدانە ب رێیا فڕاكسیۆنا پارتی، ئاكرێ بكەینە ئیدارەكا سەربخۆ، چونكی ئاكرێ جهـ و جوگرافییەكا باش هەیە كو ببیتە ئیدارەیا سەربخۆ، ئەڤە ژی پێدڤی ب پاڵپشتیا سەركردایەتیا مە و فراكسیۆنا زەر ل پەرلەمانێ هەیە.
بەربژار بەرزو عەبدی سۆرچی ئاشكرا ژی كر: بۆ كاركرنێ‌ ل سەر ڤان پرسێن گرنگ، كارنامەیا من د چارچۆڤەیێ كارنامەیا پارتی دایە بۆ ئاڤەدانییا كوردستانێ‌، دێ بزاڤان كەم هەر پڕۆژەیەكێ د بەرژەوەندییا خەلكێ مە دا بیت ب باشترین شێوە پالپشتیێ لێ بكەم ب تایبەت پرۆژەیێن قانوونی و دەستووری.

سەرۆکێ گشتی یێ پارتا ماف و ئازادیان دیار دکەت، رۆژهەلاتا ناڤین و هەرێما کوردستانێ د قۆناغەکا دیرۆکی دانە، هەلبژارتنێن هەرێما کوردستانێ ژی گەلەک گرنگن و دڤێت گەلێ کورد دەنگێ خوە بدەتە وێ هێزێ یا کو ب سەرۆکاتیا سەرۆک بارزانی کار بۆ سەرخوەبوونا کوردستانێ دکەت.

دوزگوون قاپلان سەرۆکێ گشتی یێ پارتا ماف و ئازادیان ل باکورێ کوردستانێ د دیدارەکا تایبەت دا ل دۆر هەلبژارتنێن پەرلەمانێ کوردستانێ بۆ ئەڤرۆ دیار کر، نها رۆژهەلاتا ناڤین د رەوشەکا تایبەت دایە، بێگومان ژ ئالیێ بەغدا ڤە زۆرداری ل سەر هەرێما کوردستانێ دهێتە کرن، هەتا نها ژی بەغدا هەموو مافێن گەلێ کورد نەدایێ و هەروەسا دەڤەرێن کوردستانی یێن دەرڤەیی ئیدارا هەرێما کوردستانێ ژی دڤێت ڤەگەرنە ڤە سەر هەرێما کوردستانێ، ژ بۆ ڤێ یەکێ ژی دڤێت پارتی دیموکراتی کوردستان کو کار بۆ بدەستڤەئینانا مافێن رەوا یێن گەلێ کوردستانێ دکەت د ڤان هەلبژارتنان دا بشێت سەرکەفتنەکا مەزن بدەستڤە بینیت و گۆت: (هێڤیدارم گەلێ مە ل هەرێما کوردستانێ دەنگێ خوە بدەنە وێ هێزێ یا کو ب سەرۆکاتیا سەرۆک بارزانی ریفراندۆم کری، چونکی ئیران و هێزێن سەر ب وێ ل ئیراقێ کار دکەن دا نەهێلن ئیرادا گەلێ کوردستانێ سەرکەڤیت و دەولەتێن داگیرکەرێن کوردستانێ ژی حەز ناکەن هەلبژارتنەکا سەرکەفتی بهێتە کرن، ئەز هێڤیدارم گەلێ مە ل هەرێما کوردستانێ ل گۆر ڤان راستیان دێ دەنگێ خوە دەتە وێ هێزا کو ب سەرۆکاتیا سەرۆک بارزانی کار بۆ سەرخوەبوونا کوردستانێ دکەت، سەرکەفتنا ریفراندۆمچیان بۆ پاشەرۆژا هەرێما کوردستانێ و دۆز رەوا یا گەلێ مە گەلەک یا گرنگە).
سەرۆکێ گشتی یێ پارتا ماف و ئازادیان ئەو یەک ژی دیار کر، ئەز ب باوەرم دەمێ گەلێ مە ل هەرێما کوردستانێ بچیتە سەر سندوقێن دەنگدانێ دێ خیانەتا وان کەسان ژبیر نەکەت کو کەرکووکا دلێ کوردستانێ رادەستی دوژمنان کری، ئەز باوەرم دێ دەنگدەرێن ل هەرێما کوردستانێ ب دەنگێن خوە وان هێزان سزا دەن کو هەردەم ل هەرێما کوردستانێ خزمەتا دوژمن و نەیارێن گەلێ کورستانێ دکەن و گۆت: (خەباتا پارتی دیموکراتی کوردستان ژ بۆ بدەستڤەئینانا مافێن نەتەوەیی یێن گەلێ کوردستانێ بەرچاڤە، پارتی هێزا سەرەکی یە کو هەردەم ل دژی دوژمنێن کوردستانێ کار کریە و بەرەڤانی ژ مافێن رەوا و نەتەوەیی یێن گەلێ کوردستانێ ل هەر چار پارچەیان دکەت و ژ بەر ڤێ یەکێ ژی ئەز هێڤیدارم د ڤان هەلبژارتنان دا پارتی دیموکراتی کوردستان سەرکەفتنەکا مەزن و دیرۆکی بدەستڤە بینیت، چونکی ئەو یەک دێ بیتە ئەگەرێ بهێزبوونا پێگەهێ هەرێما کوردستانێ).
ناڤهاتی د دووماهیا ئاخڤتنا خوە دا ئەو یەک ژی دیار کر، هێڤیدارم هەلبژارتنێن پەرلەمانێ کوردستانێ د کەشەکا ئازاد و دیموکراتی دا بهێنە کرن و پشتی هەلبژارتنان کابینا نوو یا حوکمەتا هەرێما کوردستانێ بشێت د هەموو بیاڤان دا زێدەتر ژ جاران خزمەتا وەلاتیان بکەت دا کوردستان هەر یا ئارام و ئاڤەدان بیت.

هەرهین محەمەد:

پارێزەر رێناس عزەت عەبان دۆسكی، بەربژارێ‌ هەژمار (24) ل سەر لیستا (190) یا پارتی دیموكراتی كوردستان ل بازنەیێ‌ دهۆكێ‌ ل دۆر بەربژاركرنا خوە بۆ پەرلەمانێ‌ كوردستانێ‌ گۆت:پارتی دیموكراتی كوردستان بۆ خولا بێت یا پەرلەمانی كابینەیا دەهێ‌ یا حكومەتا هەرێما كوردستانێ‌ بەرنامەیەكێ‌ گەلەكێ‌ گشتگیر و تێروتەسەل دارێتیە و هەموو واران بخوە ڤە دگریت، بەلێ‌ ئەز وەكو بەربژار هەكو بوومە جهێ‌ باوەریا دەنگدەران من ژی بەرنامەیێن خوە یێن تایبەت هەنە هندەك قانوون هەنە دڤێت بهێنە راستڤەكرن و هندەك قانوون هەنە دڤێت ژ نوو بهێنە دەرئێخستن بۆ نموونە گەلەك پرۆژەقانوونێن باش هەنە و ئێك ژ وان قانوونا كار و قانوونا دەستەبەركرنا جڤاكی ئەڤ هەردو قانوونە هەكە ل پەرلەمانێ‌ كوردستانێ‌ بهێنە پەسەندكرن و دەربازكرن حكومەت ژی پشتەڤانیەكا باش لێ‌ بكەت باوەردكەم دێ‌ گەلەك كێشە چارەسەربن و ئەڤ هەردو قانوونە هەكە جهی خوە بگرن كەرتێ‌ تایبەت ژی دی وەكو كەرتێ‌ حكومی لێهێت، ئانكو ئەو كەسێ‌ ل كەرتێ‌ تایبەت كار دكەت دێ‌ ئمتیازاتێن وی وەكو وی كەسی لێهێن یێ‌ ل كەرتێ‌ حكومی كار دكەت و ئەڤە ژی بارسڤكیە بۆ حكومەتێ‌ بۆ وەرگرتنا دامەزراندنی.
بەربژارێ‌ هەژمار (24) ل سەر لیستا پارتی دیموكراتی كوردستان ئەو چەندە ژی گۆت: من سۆزدایە سۆزێن نەدرست نەدەم، بەلی من سۆز و سووند خواریە ئەوا ئەرك و بەرپرسیارەتیا من بیت خەمساریێ‌ نەكەم و ل وی دەمی كارێ‌ پارێزەریێ‌ ناكەم و هەموو دەمێ‌ من دێ‌ بۆ پەرلەمانتاریێ‌ بیتن، چونكو دێ‌ بمە نوونەرێ‌ دەنگی خەلكی ل هۆلا پەرلەمانێ‌ كوردستانێ‌ و دڤێت ببمە دەنگ و رەنگێ‌ خەلكی د ناڤ پەرلەمانێ‌ كوردستانێ‌ دا، هەم گلەو گازندەیێن وان بگەهینمە جهێن بەرپرس، هەم ژی كار ژ بۆ بدەستڤە ئینانا وان داخوازیان بكەم ئەوێن دڤێن بجه بهێن و بتنێ‌ ئەڤ سۆزە من داینە و من سۆزێن كەسوكی یێن تایبەت نەداینە چو كەسان.

دهۆك، لەزگین جوقی:

دكتور ملا عبدالقهار سەبری شرنەخی ، بەربژارێ‌ ژمارە 340 ل سەر لیستا 190 یا پارتی دیموكراتی كوردستان بۆ پەرلەمانێ‌ كوردستانێ‌ بۆ رۆژنامەیا ئەڤرۆ راگەهاند هەروە كو ژبەری نوكە دهەرسێ‌ بیاڤێن ئایینی و زانستی وجڤاكی مە خزمەتا خەلكێ‌ خوە كری ئەم سۆزێ‌ ددین ل پاشەرۆژێ‌ ژی هەر ل سەر ئەڤێ‌ رێبازێ‌ بەردەوام بین و خودایێ‌ خوە و خەلكێ‌ خوە ژ خوە ڕازی بكەین، و پتر خزمەتا وەڵاتێ‌ خۆ بكەین ب پشتەڤانیا خەلكێ‌ خۆ دێ‌ پتر خزمەتا مللەت و وەڵاتێ‌ خوە كەین .
بەربژارێ‌ ژمارە 34 ل سەر لیستا 190 پارتی دیموكراتی كوردستان گوت: پتر ژ 20 سالا خزمەتا خەلكێ‌ خۆ ل سەر مینبەری دكەین، دێ‌ بەردەوام بن ل سەر خزمەتكرنا خەلكێ‌ خوە و پتر ژ 20سالانە خزمەتا خەلكێ‌ خوە دكەم، دیوارێ‌ هارێكاریا خەلكێ‌ هەژار و دەست كورت و هارێكاریا خێزانیێن پێدڤی دئاڤاكرنا خانی و دابینكرنا دەرمانان بۆ نەخوەشان یێن پێدڤێ‌ و هارێكاریا خەلكەكێ‌ پێدڤی بۆ نشتەرگەریێ‌ ل هەرێمێ‌ و ژ دەرڤەی وەڵاتی گەلەك بیاڤێن دێ‌ مرۆڤایەتی دا هارێكاری وپشتەڤانیا خەلكێ‌ خۆ دكەین، دەمی باوەڕیا خەلكێ‌ خۆ دەستڤە دئینن ل پەرلەمانێ‌ كوردستانێ‌ دێ پتر خزمەتكرنا خەلكێ‌ خۆ كەین، هەمی بیاڤەكێ‌ دا تەكەز كر بەرنامێ‌ پارتی دیموكراتی كوردستان وارێ‌ ئاڤەدانی و پێكڤە ژیانی وئارامی وچەندێن سەكتەرێن ژیانێ‌ بخوە ڤە دگریت، ئەم دێ‌ كاركەین هەر تشتەكێ‌ پێدڤی ییت بۆ خەلكێ‌ خۆ بكەین، ب رێكا داڕشتن ودەرئێخستنا قانوون ودەرئیخستنا قانوونا د بەرژەوندیا خەلكێ‌ خوە دا .
دكتور ملا عبدالقهار صبری ، ئەوژێ‌ راگەهاند وارێ‌ مرۆڤایەتی و چاندن وگەشتوگوزارێ‌ وپەرووردا وساخلەمیێ‌ هەمی سەكتەرێن ژیانی دا دوویڤ بەرنامێ‌ پارتی دیموكراتی كوردستان دێ‌ خزمەتا وەلاتیان كەین، خوەیاكر دێ‌ بەرنامەیێ‌ كارنامەیا لیستا پارتی دیموكراتی كوردستانە كو بەرنامەیەكێ‌ گشتگیر و دارێتی و تێروتەسەلە بۆ خزمەتكرنا هەموو تەخ و چینێن گەلێ‌ كوردستانێ‌ وەك، پاراستنا كولتۆرێ‌ پێكڤەژیان و لێبورینێ‌، ب ئەركێ‌ خۆ دزانیت ب رێكا رێزگرتن ل ئایین، نەتەوە و هەمی جوداهیێن ئایینی و نەتەوەیی و هاندانا دیالۆگا دناڤبەرا ئایین و ئایینزایان و موكمكرنا پێكڤەژیانیێ‌، گیانێ‌ لێبورینا ئایینی، تێكگەهشتن، هەڤ قەبوولكرن و لێك نێزیكبوون. هەروەسا گرنگیدان ب تێكەلیا كولتۆری د ناڤبەرا نەتەوە و پێكهاتەیان دا و رێزگرتن ل زانایێن ئایینی، ناڤەندێن ئایینی و دابینكرنا خزمەتگوزاری و پێدڤیێن وان.

دهۆك، لەزگین جۆقی:

د. سەلیم شەعبان محەمەد تاهر گولی، بەربژارێ‌ ژمارە (28) ل سەر لیستا (190) یا پارتی دیموكراتی كوردستان بازنەیێ‌ دهۆك، تایبەت بۆ رۆژنامەیا ئەڤرۆ راگەهاند، دێ‌ كاركەم بۆ دارشتن و رێكخستنا قانوونا باجێ‌ ل هەرێما كوردستانێ‌ ب شێوەكێ‌ ئەو بارگرانی نەمینیتە سەر مللەتێ‌ خەلكێ‌ مە، بتایبەتی ئەو خەلكی هەژار و كێم دەرامەت، زێدەبار وان قانوونێن دبنە بنەمایێ‌ پاراستنا قەوارەیێ‌ هەرێما كوردستانێ‌ و تەناهی و سەقامگێریا سیاسی ل هەرێما كوردستانێ‌، هەكە مە باوەریا جەمارەی ب دەستخوەڤە ئینا دێ‌ بمە پارێزەرێ‌ ماف و دەستكەفتێن وەلاتیان ل دویف پرانسیبێن دیموكراتیێ‌ دێ‌ بەرەڤانیا ژ مافێن وانا كەین، دێ‌ بینە پشتەڤان بۆ پاراستنا سەنگا هەرێما كوردستانێ‌ ژویێ‌ نێڤدەولی ڤە.
د.سەلیم شەعبان گوڤلی هەروەیا خوەیاكر، دەمێ‌ باوەریا جەمارێ‌ پارتی و كوردێن دلسۆز مە بەدستخوەڤە ئینا بۆ پەرلەمانێ‌ كوردستانێ‌ دێ‌ كار بۆ دارشتن و پەسەندكرنا قانوونا لێبۆرینا ب گشتی كەین، داكو بشێوەكێ‌ زیندانی ژێ‌ مافدار بن و ڤەگەڕن دناڤ جڤاك وخێزانێن خوە و ببنە تاكەكەسێن ب مفا بۆ جڤاكێ‌ كوردستانێ‌.
بەربژارێ‌ ژمارە (28) هەروەسا گۆت: ئێك ژ بەرنامەیێن كارێ‌ من دێ‌ دارشتن و پەسەندكرنا قانوونا كاری ل هەرێما كوردستانێ‌ بیت، بشێوەكێ‌ هەمی كاركەر و پالە و خودان پیشە مافێن وانا بهێنە پاراستن وەكی وان وەلاتێن پێشكەفتی سەرەدەری ل گەل مافێن وانا بهێتە كرن، هەتا ژ ئالیێ‌ خانەنشیكرنێ‌ ڤە ژی مافێن وانا بهێنە پاراستن، داكو ببیتە پشتەڤانیەك بۆ كێمكرنا وێ‌ سەنگ و گرانیا ل سەر كەرتێ‌ حكومەتی هەی، كو ماف و ئیمتیازاتێن وان ل كەرتێ‌ تایبەت بهێنە پاراستن ب قانوونەكا رێكخستی.