دوهی سێشەمبی 21/10/2025، مسەرور بارزانی، سەرۆكێ حوكمەتا هەرێما كوردستانێ، پێشوازی ل نائل بۆرا ئینان، بالیۆزێ توركیا ل ئیراقێ كر.
د كۆمبوونەكێدا كو ئەرمان تۆپچو، قونسلێ گشتیێ توركیا ل هەرێما كوردستانێ بەرهەڤبووی، سەرەرای دوپاتكرن ل پێشڤەبرنا هەڤبەندیێن دو ئالییانە، دوماهی پێشهات ێن رەوشا گشتییا ئیراقێ و بەرهەڤیێن هەلبژارتنێن جڤاتا نوونەرێن ئیراقێ، هاتنە گەنگەشەكرن.
بالیۆزێ توركیا، پیرۆزباهییا سەركەفتنا پڕۆژە و چاكسازیێن حوكمەتا هەرێما كوردستانێ د كەرتێن جۆراوجۆردا ل سەرۆكێ حوكمەتا هەرێمێ كر و ب تایبەتی ژی ئاماژە ب پڕۆژەیێ رۆناهی و پڕۆژەیێن پاراستنا ژینگەهێ و كەمەرا كەسكاتیێ و دابینكرن و گەهاندنا خزمەتگوزارییا ئاڤێ كر.
د پشكەكا دی یا دانوستاندناندا، باس ل رێككەفتنا سێ ئالییانەیا هنارتنا پەترۆلێ هەرێما كوردستانێ ب رێیا بەندەرێ جەیهان ییێ توركی هاتە كرن و هەردو ئالی هەڤڕابوون ل سەر وێ چەندێ كو پێدڤییە ببیتە رێخوەشكەر بۆ دەركرنا قانوونا پەترۆل و غازێ ل خولا داهاتییا جڤاتا نوونەرێن ئیراقێ.

دیدار، هۆشەنگ تاجر:

بسپۆرەکێ پەیوەندیێن نێڤدەولەتی ل وەلاتێ سوید دیار دکەت، ئەڤ هەلبژارتنە ژ بۆ هەرێما کوردستانێ گەلەک گرنگن، دڤێت دەنگدەرێن هەرێما کوردستانێ پشتەڤانیێ ل وێ هێزا نەتەوەیی بکەن کو هەردەم خزمەتا خەلکێ کوردستانێ دکەت.

د. ئەکرەم ئۆنەن بسپۆرێ پەیوەندیێن نێڤدەولەتی ل وەلاتێ سوید د دیدارەکا تایبەت دا بۆ رۆژنامەیا ئەڤرۆ دیار کر، ئەڤ هەلبژارتنە دێ بنە ئەگەرێ هندەک گوهۆڕینان ل ئیراقێ، چونکی چەند هێز هەنە چاڤدێریا هەلبژارتنان دکەن و دخوازن هێزێن نێزیکی وان سەرکەڤن، ئیران، ئەمریکا و هندەک وەلاتێن دی یێن جیهانێ چاڤدێریا هەلبژارتنان دکەن، هەرچەندە د هەلبژارتنێن بەری نها دا ل ئیراقێ هێزێن نێزیکی ئیرانێ شیان سەرکەڤن لێ نها پێگەهێ ئیرانێ لاواز بوویە و دبیت ڤێجارێ ئیرانێ ئەو کاریگەریا جاران ل سەر شیعەیێن ئیراقێ نەبیت و گۆت: (لاوازبوونا پێگەهێ ئیرانێ دشێت ژ بۆ کوردان و ئالیێن دی یێن دیموکراتیخواز گرنگ بیت، چونکی ب سالانە هێزێن شیعە ل ئیراقێ ب پشتەڤانیا ئیرانێ ئاستەنگان ل هەمبەر کوردان و ئالیێن دی دروست دکەن و پشتی هەلبژارتنان ب سەرکێشیا پارتی دیموکراتی کوردستان هێزێن کورد و سوننە دشێن هەڤپەیمانیەکا بهێز ل ئیراقێ دروست بکەن، هەکە تشتەک وەسا روو بدەت دێ بۆ کوردان گەلەک یا باش بیت).
ناڤهاتی ئەو یەک ژی دیار کر، ئیراق ب سالانە بۆدجێ هەرێما کوردستانێ نادەت و مووچەی ژی وەکو کارتەکا فشارێ ل دژی کوردان بکار دئینیت، ئانکو نها مرۆڤ دشێت بێژیت پێدڤیا کوردان ب هێزەکا نەتەوەیی یا بهێز هەیە کو بشێت د بیاڤێن سیاسی، ئابووری و گەلەک بیاڤێن دیتر دا ل بەغدا شەڕی بۆ بەرژەوەندیێن کوردان بکەت، هەر کەس ژی دزانیت کا ئەو کیژ هێزە و گۆت: (هیڤیدارم دەنگدەرێن هەرێما کوردستانێ پشتەڤانیێ ل هێزا نەتەوەی یا خوەدان بەرنامە بۆ گەلێ کوردستانێ بکەن، براستی ژی سەرکەفتنا پارتی د ڤان هەلبژارتنان دا گەلەک یا گرنگە، چونکی رەوشا دەڤەرێ ب گشتی یا هەستیارە و هەروەسا مەترسی ژی هەنە، ڤێجا گرنگە بەری هەر تشتەکێ هەلبژارتنەکا سەرکەفتی بهێتە کرن و خالا دی ژی وەکو من بەری نها گۆتی هیڤیدارم دەنگدەرێن هەرێما کوردستانێ بزانن کا کیژ هێزە هەتا نها خزمەتا وێ کریە و نها ژی پتر ژ هەر دەمەکێ گرنگە هێزا نەتەوەیی کو پارتی نوونەراتیا وێ دکەت ل پەرلەمانێ ئیراقێ بهێز بیت).
د. ئەکرەم ئۆنەن د دووماهیا ئاخڤتنا خوە دا ئەو یەک ژی دیار کر، هیڤیدارم پشتی هەلبژارتنان هێزێن کوردی بشێن بەرەیەکێ ئاڤا بکەن، چونکی بهێزبوونا کوردان ل بەغدا د بەرژەوەندیا هەرێما کوردستانێ دایە، دەمێ کورد ل بەغدا بهێز بن دێ بەغدا ژی نەچار بیت داخوازیێن کوردان قەبوول بکەت و وی دەمی دێ رەوشا ئابووری یا هەرێما کوردستانێ ژی باش بیت و گۆت: (ژ بەر هندێ ئەز دبێژم ئەڤ هەلبژارتنە گرنگن چونکی د رەوشەکا گەلەک جودا دا دهێنە کرن و دبیت پشتی هەلبژارتنان ژی گوهۆڕینێن مەزن ل ئیراقێ و ب گشتی ل دەڤەرێ روو بدەن، ژ بەر ڤێ یەکێ ژی ئەز دبێژم سەرکەفتنا هێزا نەتەوەیی یا کو خزمەتا خەلکێ کوردستانێ دکەت گەلەک گرنگە و هیڤیدارم دەنگدەرێن هەرێما کوردستانێ ژی ل گۆر راستیێن هەی دەنگێ خوە بدەن).

دوهی دوشەمبی 20/10/2025 ل باژێرێ هەولێرێ، سەرۆك مەسعود بارزانی ل گەل هەژمارەكا مامۆستایێن زانكۆیێ، نڤیسەر، رۆژنامەڤان، ئەدیب و هونەرمەند و وەرزشڤانێن كوردستانێ كۆمبوو.
د وێ كۆمبوونێدا سەرۆك بارزانی پەیڤەك پێشكێشی بەرهەڤبوویان كر و خوەشحالییا خوە ب وێ كۆمبوونێ دەربڕی و باس ل رەوشا نوكە و بابەتێ هەلبژارتنێن خولا شەشێ یا جڤاتا نوونەرێن ئیراقێ كر. ل دۆر وێ چەندێ سەرۆك بارزانی راگەهاند» هەلبژارتن پرۆسەیەكا دیموكراسییە ودڤێت مللەت ب خوە بڕیارێ ل چارەنڤیسێ خوە بدەت و ب ئازادانە نوونەرێن خوە ب هەلبژێریت».
هەروەسا سەرۆك بارزانی دوپاتكر»هەلبژارتن پرسەكا مەبدەئییە و مە باوەری پێ هەیە، ل دەمێ سەرهلدانێ ل مەها ئادارا سالا 1991 ل كۆیە من وی دەمی داخوازكر هەلبژارتن بهێنە ئەنجامدان، لەوما ل دەف مە تشتەكێ مەبدەئییە».
سەرۆك بارزانی دیاركر ژی» ئێكەمین هەلبژارتنێن ئازاد ل سالا 1992 ل كوردستانێ هاتنە ئەنجامدان و بوونە بنیاتەك بۆ وێ چەندێ دامودەزگەهێن هەرێما كوردستانێ بهێنە دامەزراندن، ل ئیراقێ ژی بۆ جارا ئێكێ د دیرۆكا وی وەلاتیدا ل سالا 2005 ئێكەم هەلبژارتنێن ئازاد هاتنە ئەنجامدان پشتی ل سەر دەستوورەكی بۆ ڤی وەلاتی رێككەفتین».
هەر د وی چارچۆڤەیدا سەرۆك بارزانی سەرەرای بەرچاڤكرنا تیبینیێن خوە ل دۆر قانوونا هەلبژارتنان ل ئیراقێ پشتی سالا 2010، راگەهاند» ژ بەر بەرژەوەندییا گشتی دێ پشكداریێ د هەلبژارتناندا كەین، هیڤیدارین ئەڤ هەلبژارتنە ببنە ئەگەرێ وێ چەندێ ئیراق بكەڤیتە سەر رێیا راست و كار ب دەستووری بهێتە كرن».
سەبارەت خەبات و قوربانیدان و دەستكەفتێن هەرێما كوردستانێ، سەرۆك بارزانی راگەهاند» ژ دەستكەفتێن هەرێمێ كەسی منەت ب مە نەكریە و كەس ژی نەشێت منەتێ ل سەر مە بكەت، ئەڤە بەرهەمێ خوونا شەهیدانە، بەرهەمێ روندكێن شەهیدانە، بەرهەمێ رەنجا ڤی مللەتییە».
هەر د پەیڤا خوە دا، سەرۆك بارزانی باس ل قووناغێن ئیراقا نوو پشتی 2003 كر و راگەهاند» پشتی 2003 ئەم ب ئیرادەیەكا ب هێز و نیازەكا گەلەك پاقژ چووینە بەغدایێ بۆ وێ چەندێ ئیراقا نوو بهێتە دروستكرن و مە هەموو بزاڤ كرن هەتا گەهشتینە 2005 و ئەو دەستوورێ كو نوكە هەی».
سەرۆك بارزانی رۆهنكر ژی» ئەڤ دەستوورە ئەو نینە یێ هەموو (تمووحا) مە دا تێدا بیت، بەلێ دەستوورەكە تشتێن ئەرێنی تێدا هەنە كو ئەم پێ رازی بین و پشتەڤانیێ لێ بكەین، نوكە ژی هەكە ئەو دەستوورە بهێتە بجهئینان، دەستوورەكێ باشە».
سەرۆك بارزانی دوپاتكر ژی» هەكە ئەڤ دەستوورە هاتبا بجهئینان، نە ل جهێن دی یێن ئیراقێ و نە ل هەڤبەندیێن هەولێرێ و بەغدایێ، گەلەك ژ وان كێشەیان روو نەدان».
هەڤدەم سەرۆك بارزانی راگەهاند» مخابن ئەوا مە دیتی، هێشتا فەرهەنگا حوكمەتا ناڤەندی ل بەغدا یا زالە و ئەم كێمتر ژ دەستووری قەبوول ناكەین».
سەبارەت بابەتێ پەترۆلێ و رێككەفتنا سێقۆلی د ناڤبەرا حوكمەتا هەرێمێ و حوكمەتا فیدرال و كۆمپانیێن پەرتۆلێدا، سەرۆك بارزانی هیڤی خواست ئەڤ رێككەفتنە سەربگریت و ببیتە بنەمایەك بۆ قانوونا پەترۆل و غازێ و ئەڤ كێشەیە بهێتە چارەسەركرن. هەروەسا ل دۆر مافێن دەستووری یێن خەلكێ كوردستانێ، سەرۆك بارزانی دوپاتكر ئەو مافە ئەمانەتن و خوون بۆ هاتیە دان و هزاران رۆلێن ئەزیز خوون بۆ رشتییە».
هەر د وێ كۆمبوونێدا سەرۆك بارزانی ل دۆر بڕینا بودجە ومووچەیێ خەلكێ كوردستانێ راگەهاند» ل دەف من و ل دەف هەر كوردەكێ دلسۆز و ئەوێ پێچەكا ویژدانێ ژی هەبیت، ئازارا نانبڕینا خەلكێ كوردستانێ كێمتر نینە ژ ئەنفال و كیمیابارانكرنێ».
سەرۆك بارزانی د پشكەكا دی یا پەیڤا خوە دا روو ل بەرهەڤبوویان كر و گوتێ» چاوان پێشمەرگەی تیرۆرستێن داعشێ شكاندن، هوون ژی ب پێنووس و هزر و بیرێن خوە، ب بزاڤ و وەستیانا خوە دڤێت شەڕێ وێ فەرهەنگا نامۆ بكەن كو ل بەرە ل كوردستانێ بەلاڤ ببیت كو تاكێ كورد باوەری ب خوە نەمینیت و گەنجێ كورد سۆز و ژێیاتی بۆ نیشتمانێ خوە نەمینیت».
سەرۆك بارزانی هەروەسا ئاماژە ب وێ چەندێ كر كو بزاڤ دهێتە كرن نەهێلانا هزرا نەتەوەیی و بێئومێدیێ دناڤ مللەتێ مەدا بەلاڤ بكەن، ئەو فەرهەنگا زەنگین ئەوا مە هەی و شانازیێ پێ دكەین كو پێكڤەژیانە، ل بەرە ب شێوەیەكی ژ شێوەیان ڤێ فرەهەنگێ ژی نەهێلن، لەوما دڤێت ئەم هەموو روو ب روویێ ڤێ پیلانێ ببین و نەهێلین سەربگریت.
هەروەسا سەرۆك بارزانی باس ل پێشكەفتنێن كوردستانێ كر د وارێن پەروەردەیێ، خواندنا بلند، ئاڤەدانی، كارەبا، رێ و پران و دروستكرنا بەنداڤان. باس ژی ل گرنگییا پاراستنا ژینگەهێ و ژینگەهپارێزیێ كر و داخوازكر هەموو ئالییەك هەڤكار بن د زێدەتر پێشڤەبرنا ژینگەهپارێزیێ و پاراستنا سروشتێ كوردستانێ. سەرۆك بارزانی ئاماژە ب گرنگییا دروستكرنا بەنداڤان كر و راگەهاند» دروستكرنا وان كاریگەرییەكا مەزن هەیە د پاراستنا ئاڤێ و بەرهنگاربوونا قەیرانا ئاڤێدا ل پاشەڕۆژێ و دڤێت كارەكی بكەین خەلكێ كوردستانێ تووشی كێشەیا بێئاڤیێ نەبیت و دڤێت سیاسەتەكا راست و دروست یا بڕێڤەبرنا ئاڤێ هەبیت».
ل دۆر هەوا بانگەشیا هەلبژارتنان، سەرۆك بارزانی داخواز كر كو هەوا بانگەشەیێ ب ئارامی و دوور ژ توندوتیژیێ بڕێڤەبچیت و نابیت رێ بهێتە دان هیچ تشتەكێ خراب روو بدەت، هەر كەسەك ژی یێ ئازادە بانگەشەیا خوە بكەت و دەنگی بدەتە كێ.
راگەهاند ژی» سیاسەتا پارتی و سیاسەتا حوكمەتا هەرێما كوردستانێ ئەوە كو هزر ل وێ چەندێ بكەت ژێرخانەیەكا تمام د هەموو واراندنا بۆ نڤشێ داهاتی ئاڤا بكەت و دڤێت كار ل سەر وێ چەندێ بهێتە كرن كو د خزمەتا هەموو خەلكێ كوردستانێدایە بۆ وێ چەندێ پاشەڕۆژەكا خوەش و گەش و ساخلەم بۆ مللەتێ مە بهێتە مسۆگەركرن».
سەبارەت رەوشا ناڤخوەیا كوردستانێ و پێكئینانا كابینەیا نوو یا حوكمەتا هەرێما كوردستانێ، سەرۆك بارزانی گوت» پشتی راگەهاندنا ئەنجامێن هەلبژارتنان مە داخواز ژ هەموو ئالییان كر حوكمەتا بنكە بەرفرهە بهێتە دروستكرن، بەلێ هندەك نەهاتن و هندەكا گوت دێ بینە ئۆپۆزسیۆن، ئەڤا مای د ناڤبەرا پارتی و ئێكەتیێ دا، ل سەر بەرنامەیێ كارێ حوكمەتێ رێككەفتنا گەلەك باش هاتیە كرن و بەرنامەیەكێ گەلەك رێكوپێكە پێدڤییە ئەنجامێن هەلبژارتنان ل بەرچاڤ بهێنە وەرگرتن و هەر ئالییەك ل دووڤ ئیستیحقاقێ خوە یێ هەلبژارتنان پۆستان وەربگریت و هیڤیدارم ل سەر ڤێ چەندێ ژی رێككەفتن بهێتە كرن و بەری ئەنجامدانا هەلبژارتنێن جڤاتا نوونەرێن ئیراقێ حوكمەتا هەرێما كوردستانێ بهێتە پێكئینان».

مەسرور بارزانی، جێگرێ سەرۆكێ پارتی دیموكراتی كوردستان پشكداری د ئاهەنگا بانگەشەیا پارتی ل هەولێرێ كر.
دوهی دوشەمبی 20/10/2025، مەسرور بارزانی، جێگرێ سەرۆكێ پارتی دیموكراتی كوردستان، پشكداری د ئاهەنگا بانگەشەیا لیستا 275 یا پارتی دیموكراتی كوردستان پارتی ل هەولێرێ كر و د پشكەكا پەیڤا خوە دا گوت» پارتی بێگومان مەزنترین و ب هێزترین حزبە ل سەر ئاستێ كوردستانێ، بەلێ دخوازین بسەلمینین كو ل سەر ئاستێ ئیراقێ ژی پارتی ب هێزترین پارتا سیاسییە ئەڤرۆ ل مەیدانا كوردستانێ و هەموو ئیراقێ هەیە».
جێگرێ سەرۆكێ پارتی ئاماژە ب وێ چەندێ ژی كر» هەر ب ڤێ هەلكەفتێ دخوازم پیرۆزباهییا 20 ئۆكتۆبەرێ ل هەموو نیشتمانپەروەران، ل پێشمەرگێن قەهرەمان، ل هەوە یێن بەرێز و خوەشتڤی بكەم، ئەڤرۆ رۆژا داستانا پردێیە، ل هەوە هەموویان پیرۆز بیت. ئەڤرۆ سالڤەگەرا بیرئینانا ئیرادەیا مە یا نەتەوەییە كا چاوان بڕیارا خۆڕاگری، بڕیارا بەرگریكرن ژ ماف و كەرامەتا هەرێما كوردستانێ و خەلكێ كوردستانێ، بەرامبەر خائینان و داگیركەران سەركەفت».
د پشكەكا دی یا پەیڤا خوە دا مەسرور بارزانی گوت» ب پڕۆژە و دەستكەفت مە بەرسڤا نەیاران دایە، ئێك ژ وان ژی كارەبا 24 ساتییە و ل سالا 2026 كارەبا هەموو هەرێما كوردستانێ دێ بیتە 24 ساتی».
گوت ژی» دڤێت ئەندامێن پارتی شانازیێ ب خوە بكەن، چونكە دۆست و نەحەز دەمێ دنێرنە كوردستانێ، دنێرنە پارتی. دزانن هەكە پارتی سەركەفت، دێ كوردستانێ ب سەركەڤیت، هەكە خودێ نەكەت پارتی بشكێت، ب دیتنا وان دشێن كوردستانێ بشكێنن، كو ئەڤە مەزنترین بەلگەیە، مەزنترین شانازییە بۆ هەموو پارتییەكی كو نوكە ناڤێ پاتیبوونێ و كوردستانیبوونێ وەك ئێكە».
مەسرور بارزانی هەروەسا گوت ژی» ئەم پشكدار بووین د نڤیسینا دەستووریدا و باوەرییا مە ئەوبوو كو هەموو خالێن دەستووری وەك خوە دێ هێنە بجهئینان، بەلێ مخابن مافێن دەستووری یێن هەرێما كوردستانێ هاتنە بنپێكرن و گەلەك ژ وان ئالیێن ب دیتنا مە دێ پشتەڤانێن مەبن و هەڤپەیمانێن مەبن، ب هیچ جۆرەكی بەرگری ژ مافێن خەلكێ كوردستانێ نەكر، هەتا ئەوێن ل هەرێما كوردستانێ ب ناڤێ نوونەرێن راستەقینەیێن خەلكێ كوردستانێ خواست بچم ل بەغدا نوونەرایەتییا خەلكێ كوردستانێ بكەن، ژ بلی پارتی، هیچ ئالییەكێ دی وەك پێدڤی بەرگری ژ مافێ هەوە نەكریە».
رۆهنكر ژی» ڤێجارێ دێ چینە بەغدا بەرگریێ ژ مافێن خوە كەین، ل وێرێ رێ نادەین كەسەك ب وەلاتیێن پلە دو بنێریتە وەلاتیێن هەرێما كوردستانێ، ئەم دێ هەڤپشكێن راستەقینەبین د ڤی وەلاتیدا. مە چو جاران قەبوول نەكریە پاشكوو بین و ژ نوكە و وێڤە ژی ب هیچ جۆرەكی قەبوول ناكەین پاشكوو بین. قەبوول ناكەین كەسێن دی ل شوونا مە بڕیارێ بدەن. ڤێجارێ ئەم ب خوە دێ بڕیارێ ل چارەنڤیسێ خوە دەین».
جێگرێ سەرۆكێ پارتی دیموكراتی كوردستان بەرچاڤكر ژی» ڤێجارێ دڤێت بچینە بەغدا بۆ وێ چەندێ ئێدی مووچە ب میزاجێ شەخسی یێ ڤی و ویێ دی بڕیار ل سەر نەهێتە دان، مافەكێ ئاسایی و قانوونیێ ڤی خەلكییە و كەس خێرێ ل گەل ناكەت».
خویاكر ژی» د شیاندایە گەلەك باسێ هەموو وان پڕۆژەیان بكەم یێن هاتینە ئەنجامدان بۆ خەلكێ كوردستانێ بەلێ من چەند نموونەیەك بۆ هەوە دەستنیشان كرینە. مە چەندین نەخوەشخانەیێن نوو دروست كرینە، چەندین نەخوەشخانەیێن كەڤن هاتینە نووژەنكرن، دەرمان، پێشتر نەخوەش هەبوو پشتڕاست نەبوو ژ جۆرێ وان دەرمانێن كو بكارئیناین، بەلێ ب وی بەرنامەیێ ریفۆرمێ كو مە ل سێكتەرێ ساخلەمیێ ئەنجامدایە، نوكە ئەم هەموو پشتڕاستین ژ كوالێتییا وان دەرمانێن كو بكاردئینین، ئاستێ كەرتێ ساخلەمیێ نوكە ل كوردستانێ گەهشتییە رادەیەكی كو ل دەوروبەرێن كوردستانێ ژی دهێنە كرودستانێ، قوتابخانەیێن مە، زانكۆیێن مە، نوكە د ئاستەكێ باشدانە، خواستا مە گەلەك گەلەك زێدەترە بۆ وێ چەندێ باشتر ژی بهێتە كرن، بەلێ ب پشتڕاستی ڤە دشێم بێژم كو ژ روویێ خواندنا ئەلكترۆنی و ئۆنلاینێ، كوردستانێ ل رۆژهەلاتا ناڤین، ئێكە ژ جهێن هەرە پێشكەفتی ژ روویێ خواندنێ و خواندنا بلند».

بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان دبێژیت: پارتی دیموكراتی كوردستان یا رژدە ل سەر بجهئینانا دەستوورێ ئیراقێ، هەروەسا ئاماژەكر كو هەلبژارتنێن جڤاتا نوونەرێن ئیراقێ د دیزاین كرینە.
فازل میرانی، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان گوت» نەشێم بێژم ئیراق وەلاتەكێ پەرلەمانی، دیموكراسییە وەكو د دەستووری دا هاتی». گوت ژی» پێكهاتەیا ئیراقێ، وەك وەلاتەكێ فرەنەتەوە و فرەئایین، فرەهێزێن سیاسی، دادپەروەری تێدا نینە».
ل دۆر قانوونا هەلبژارتنان ل ئیراقێ، فازل میرانی دبێژیت» بەربژارەك ل هەولێرێ و سلێمانیێ و دهۆكێ، دڤێت ب كێمی 20 هزار دەنگان ب دەستڤەبینیت هەتا ببیتە ئەندامێ جڤاتا نوونەران، بەلێ ل باژێرێن دی یێن ئیراقێ ب 500 هەتا دو هزار دەنگان دێ بیتە ئەندامێ جڤاتا نوونەران، لەوما دادپەروەری د قانوونا هەلبژارتناندا نینە».
بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان دیاركر ژی» ئالیێن دەستهەلاتدارێن ئیراقێ هەلبژارتن یێن دیزاین كرین، ئالیێن شیعی زۆرینەنە، چونكە دەستهەلاتا قانوونی د دەستێ واندایە، كۆمسیۆنا هەلبژارتنان د دەستێ واندایە، زۆرینەیا جڤاتا نوونەران د دەستێ واندایە، ئەو قانوونە ل بەغدایێ وەك جلكەكی بۆ خوە دووریبیت».
رۆهنكر ژی» هەكە ئەم 100 كورسی ژی بین ل جڤاتا نوونەرێن ئیراقێ، هەر كەمینەینە، درووشمێ مە لهەڤكرن و هەڤپشكی و هەڤسەنگییە، چونكە بنەمایێ دەستوورێ ئیراقێ ئەڤەیە، بەلێ هەكە ئەو زۆرینێ و كەمینێ ل گەل كوردان بكاربینن، ئەم حزبەك نینین، ئەم مللەتەكین، نەتەوەیێ دویێ نە ل ئیراقێ، لەوما دڤێت ب ل هەڤكرنێ پرس بهێنە چارەسەكرن».
ل دۆر پرۆسەیا سیاسی یا ئیراقێ ژی، فازل میرانی گوت» دەستوورێ ئیراقێ ل سالا 2005 پترییا خەلكێ ئیراقێ دەنگ بۆ دا و سەرۆك بارزانی بزاڤێن مەزن كرن بۆ وێ چەندێ پترییا مافێن كوردان تێدا بهێنە جهگیركرن، هەكە دەستوور وەك خوە بهێتە بجهئینان، دەستوورەكێ باشە، بەلێ حوكمڕانییا ل ئیراقێ، حوكمڕانییا شیعی یە، ئیراقێ حوكمەتا هەی، بەلێ ئیراق، وەك دەولەت ب تێگەهێ سەروەرییا تمام، هەبوون نینە، من ئاخڤتنا خوە ل سەر ئیراقێ هەیە و دبێژم ئیراق دەولەتەكا بێ سەروەرییە».
سەبارەت ئەگەرێ ڤێ چەندێ ژی دبێژیت» ئیراقێ سەروەری نینە چونكە نەشێت هیچ بڕیارەكێ بێی ئیرانێ بدەت، توركیا پشكەكا وەلاتێ ئیراقێ داگیركریە و نەشێت باخڤیت، پارتییا كاركەرێن كوردستانێ دەڤەرا شنگالێ داگیركریە و ئیراقێ نەشێت ژێ وەرگریت، پشكەكا مەزن ژ دەڤەرێن مە ل رانیە و پشدەر و برادۆست و تێروە و رێكان و بەرواری هەتا دگەهیتە چۆمان و گەلالە، نە دەستهەلاتا كوردی تێدایە، نە دەستهەلاتا حوكمەتا ئیراقێ، بەلكو پارتییا كاركەرێن كوردستانێ تێدایە، لەوما دبێژم ئیراقێ سەروەری نینە، بەلكو ئیراقێ نە ل بڕیارا سیاسی سەروەری هەیە، نە ل پاراستنا ئاخا خوە و پترییا حزبێن ئیراقی پاشكۆیێ وەلاتەكی نە».
ل دۆر ئارمانجا پارتی دیموكراتی كوردستان بۆ چوونا بەغدایێ، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان دبێژیت» پارتی ب ئەركێ خوە دزانیت بەرگریێ ژ قەوارەیێ هەرێما كوردستانێ بكەت، هەروەسا بەرگریێ ژ مافێن خەلكێ كوردستانێ بكەت، ئێك ژوان رێیان ژی دەستوورە، پارتی دوپاتیێ ل بجهئینانا دەستووری دكەت ژ بۆ وێ چەندێ كێشە ب رێیا دەستووری بهێنە چارەسەركرن».
ل دۆر ئێكڕێزییا مالا كوردی ژی، فازل میرانی گوت» پێدڤییە ل كوردستانێ نەك ئێكڕێزی، بەلكو ئێك رێ بین و بۆ ئێك ئارمانج بچین، ئێكهەلوەستییا پارتی دیموكراتی كوردستان و ئێكەتی نیشتمانی كوردستان وەك جاران نینە، بەلێ نابیت رۆناهیێن پێشتر نەبینین كو د ناڤبەرا هەردو ئالییاندا هەبوون».
سەبارەت كێشەیێن د ناڤبەرا هەولێرێ و بەغدایێ دا، میرانی گوت» كووراتییا كێشەیێن كوردان ل سەردەمێ پاشاتیێ هەتا ئەڤرۆ، ل بەغدایە، چارەسەرییا وان ژی هەر ل بەغدایە، من پێشتر بۆ میدیایێن ئیرانی باسكربوو دەمەكی كێشەیێن د ناڤبەرا هەولێرێ و بەغدایێ دا دێ چارەسەر بن، كو ببنە دو جیران».
فازل میرانی، ل دۆر كێشەیا مووچەیێ خەلكێ كوردستانێ ل بەغدا، گوت» ب مەنتق و لۆژیك كوردان دانوستاندن ل گەل بەغدا نەكریە، چونكە هەكە ب مەنتق و لۆژیك با، نە دبوو رێ بدەن پرسا مووچەی بكەتە كێشەیا سەرەكی د ناڤبەرا هەولێرێ و بەغدایێ دا، چونكە د سیستەمێ فیدرالیدا نابیت مووچە ببیتە كێشە، حوكمەتا عەبادی مووچەیێ خەلكێ كوردستانێ بڕی».
بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان رۆهنكر ژی» ئەم وەك پارتی وەسا هزر دكەین هەر دەمێ پارتی یا ب هێز بیت، كورد دێ ب هێز بن، چونكە مە هەردەم بزاڤ كریە هێزا كوردان كۆمڤەكەین، هەر دەمێ كورد پێكڤە كۆمبوون و وەكهەڤ هزركریە، ب واقعی هزر دكەت، یا باش نینە كورد بچنە ل گەل ئالییەكی ژ ئالیێن شیعی یان سوونی و بچنە د ناڤ دوبەرەكییەكێدا».
فازل میرانی ل دۆر پێكئینانا كابینەیا نوو یا حوكمەتا هەرێما كوردستانێ ژی ئاشكراكر» ئەولەویەتا پارتییە حوكمەت بهێتە پێكئینان و ب هێز بچینە بەغدا» سەبارەت ئۆپۆزسیۆنێ ژی دبێژیت» پێدڤییە ئۆپۆزسیۆنەكا ئاڤاكەر هەبیت، ب باشی بێژیت باش و ب خرابی ژی بێژیت خراب».

دوهی ئێكشەمبی 19/10/2025، ل پیرمام سەرۆك مەسعود بارزانی پێشوازی ل شاندەكێ هەڤپەیمانییا (صقورنا) ب سەرۆكایەتییا سەلیم ئەلجبووری كر.
بارەگەهێ بارزانی د بەیاننامەیەكێدا گوت» د دیدارەكێدا دانوستاندن ل دۆر رەوشا سیاسییا ئیراقێ و هەلبژارتنێن داهاتی یێن جڤاتا نوونەرێن ئیراقێ و هەڤبەندی و هەماهەنگی د ناڤبەرا ئالیێن سیاسی یێن ئیراقی، هاتە كرن».

نێچیرڤان بارزانی، جێگرێ سەرۆكێ پارتی دیموكراتی كرودستان ل هەولێرێ پشكداری د هەوا بانگەشەیا هەلبژارتنێن جڤاتا نوونەرێن ئیراقێدا كر و داخواز ژ ئەندام و لایەنگرێن پارتی دیموكراتی كوردستان كر دەنگێن پارتی د ڤان هەلبژارتناندا بگەهیننە ئێك ملیۆن دەنگان.
جێگرێ سەرۆكێ پارتی دیموكراتی كوردستان داخواز ژ ئەندام و لایەنگرێن پارتی كر كوردستانیبوون رێبازا وان بیت و گوت» ئەم وەسا یێن هاتینە فێركرن كوردستانیبوون رێبازا مەیە و پێكڤەژیان ژی پەیاما مەیە».
د پشكەكا دی یا ئاخڤتنێن خوە دا نێچیرڤان بارزانی دوپاتی ل وێ چەندێ كر كو ئەندام و لایەنگرێن پارتی ب پشتەڤانییا وان دێ دەنگێن پارتا خوە گەهیننە ئێك ملیۆن دەنگان و گوت» ب پشتڕاستی ڤە ڤێجارێ پارتی خودانا ئێك ملیۆن دەنگایە».
نێچیرڤان بارزانی پەیامەك ئاراستەی گەنجان كر و گوت» پارتی جزبا گەنجایە، كەلها پاراستنا كوردستانێیە».
هەروەسا جێگرێ سەرۆكێ پارتی دیموكراتی كوردستان ئەوژی بەرچاڤكر» هەموو مافێن گەلێ كوردستانێ د دەستوروێ ئیراقێ دا نینن، بەلێ دەستكەفتێن باش ژی تێدا هەنە، بجهئینانا دەستووری گرەنتییا ئارامییا ئیراقێ بوو، دەستوور بجهنەئینا و پشتگوه هاڤێت، كارەسات و مەینەت بەر ب ئیراقیچ هاتن، ژ ئەنجامێ وێ چەندێ كو دەستوور بجهنەئینا. ئەم دخوازین پارتی دیموكراتی كوردستان یا ب هێز بیت و زێدەتر ل بەغدایێ ب هێز بیت، بۆ وێ چەندێ بشێین وی دەستووری بجهبینین، لەوما دبێژین، ئارمانجا پارتی دەستوورە، ب وێ چەندێ دەمێ دەستوور دهێتە بجهئینان، پشتگەرمە ب دەنگدەرێن خوە، دەنگدەرێن هەرێما كوردستانێ، ب وێ چەندێ كو پارتی دخوازیت سیستەمێ فیدرالی ل ئیراقێ بهێتە بجهئینان».
نێچیرڤان بارزانی پشكەكا ئاخڤتنێن خوە تەرخانكرن بۆ پرسا مووچەی و بودجەی و گوت» پارتی دخوازیت بودجە و مووچەیێ هەرێما كوردستانێ ل ئیراقێ نە دا داوا بیت و نە كێشە ژی بیت، دەستووری گوتیە، مووچە مافە، مووچە ئەو نینە ب خێر كەسەك بدەتە وەلاتیێن هەرێما كوردستانێ، مووچە مافێ هەوەیە. بودجە مافە. دانانا بودجەی ژی بۆ كوردستانێ یا پێدڤییە، ئەوا ب دەستووری هاتیە رێكخستن، نابیت ب نە دەستووری بهێتە تێكدان، دڤێت ئەم ل سەر وێ چەندی د رژد بین ل بەغدایێ».
جێگرێ سەرۆكێ پارتی دیموكراتی كوردستان ئەڤ هەلبژارتنێن ئیراقێ ب» ئێك ژ گرنگترین هەلبژارتنان» هەژمارت و گوت « دێ ناڤێ ڤان هەلبژارتنان كەینە هەلبژارتنێن بجهئینانا دەستوورێ بەردەوامێ ئیراقێ».
گوت ژی» پارتی د بەرگریێدا ئێكەمینە، د ئاڤەدانكرنێدا ژی بێ گومان پارتی یا بێ هەڤڕكە».

سەرۆكێ حوكمەتا هەرێما كوردستانێ، جادەیا دوسایدییا گۆمەسپان – سماقۆلی ڤەكر و راگەهاند: ل ڤێرێینە بۆ وێ چەندێ بێژین مە سۆزەكا دی ژی بجهئینا.
دوهی ئێكشەمی 19/10/2025، مەسرور بارزانی، سەرۆكێ حوكمەتا هەرێما كوردستانێ، دو سایدیێ گۆمەسپان – سماقولی ڤەكر، د رێوڕەسمێ ڤەكرنا وێ جادەیا دو سایدی، مەسرور بارزانی پەیڤەك پێشكێشكر .
دەقێ پەیڤا سەرۆكێ حوكمەتا هەرێما كوردستانێ..
پیرۆزباهیێ ل خەلكێ كوردستانێ و هەوەیێن بەرێز و خوە دكەین بۆ ڤی دەستكەفتێ مەزن، بۆ ڤی پڕۆژەیێ نایاب كو بێگومان دێ خزمەتەكا مەزن یا خەلكێ كوردستانێ كەت.
دەستخوەشیێ ل كۆمپانییا (هێمن گرۆپ) و بەرێز خالد خۆشناو دكەم كو جارەكا دی ژی سەلماند خەخۆرێن ڤی مللەتی نە و شیان ڤی پڕۆژەی ب باشترین شێوە جارەكادی ژی د دەمەكێ گەلەك كورتدا بجهبینن.
ئەو ئەندازیار وهەموو كەسێن ل كۆمپانییا (هێمن) كار دكەن، ب دلسۆزی ڤە ب شەڤ و رۆژ كار ل سەر ڤی پڕۆژەی كر كو ئەڤرۆ دبینین تمام بوویە.
پشتی سالەكێ كو مە سۆزا دابوو دێ ڤی پڕۆژەی بجهئینین، نوكە ل ڤێرینە كو بێژین جارەكادی ژی مە سۆزەكا دی ژی بجهئینا.
سەرەرای هەموو وان قەیران و گرفتێن كو بۆ هەرێما كوردستانێ دهێنە دروستكرن، سەرەرای وان هەموو كێشە و گرفتێن كو بۆ ئابۆرێ كوردستانێ و پێشئێخستنا كوردستانێ هاتینە دروستكرن، نوكە ئەم راوەستاینە بەرامبەر خەلكێ كوردستانێ، بەرامبەر هەموو جیهانێ كو بێژینە وان هەكە ئیرادەیا ب هێز هەبیت و نیشتمانپەروەرێ دلسۆز هەبیت، هیچ تشتەك ئەستەم نینە. ئەڤ دەستكەفتە بەرهەمێ رەنج و خەبات و دلسۆزییا رۆلێن ڤی وەلاتی نە كو نوكە دبینین.
جارەكادی دەستخوەشیێ ل هێمن گرۆپ دكەم و پیرۆزباهیێ ژی ل هەموو خەلكێ كوردستانێ دكەم. هیڤیدارم ئەڤ پڕۆژەیە بكەڤیتە خزمەتا هەموو وەلاتیێن هەرێما كوردستانێ، چ ئەوێن هاتنوچوونێ تێدا دكەن یان ژی بۆ مەرەمێن گەشتوگوزاری سەرەدانا ڤێ دەڤەرێ دكەن.
ئەڤ دو سایدە پشكەكە ژ پڕۆژەیەكێ مەزنتر كو ژ باژێرێ هەولێرێ دەست پێ دكەت، بەلێ ئەڤ پشكا كو نوكە ئەم لێ د بەرهەڤین، دو سایدێ سماقولی ح گۆمەسپانە كو ل دۆر بەنداڤا گۆمەسپانێ ژی دزڤریت، ئەڤە دێ رێخوەشكەر بیت بۆ ڤرێدانا پارێزگەها هەولێرێ ب پارێزگەها سلێمانیێ و ئیدارەیا سەربخوەیا راپەرین و ئاسانكارییێ د هاتنوچوونێدا بۆ خەلكێ ڤان دەڤەران دكەت. ژ ئالییەكێ دیڤە ئاسانكاریێ دكەت و دێ هاریكار بیت بۆ كێمكرنا روودانێن هاتنوچوونێ، ب تایبەت كو جادەیەكا ل ڤی ئاستی و ب ڤی جۆری دهێتە دروستكرن، بێگومان روودانێن هاتنوچوونێ ژی دێ كێمتر بن و دبینین كو ل سەر ئاستێ هەرێما كوردستانێ پشتی كو شۆڕشا دروستكرنا رێ و پران ل كوردستانێ هاتیە دەستپێكرن، دبینین روودانێن هاتنوچوونێ ب رێژەیەكا بەرچاڤ كێم بووینە.
داخوازێ ژ هەموو خووشك و برایێن خوەشتڤی دكەم، هەموو وەلاتییان دكەم كو رێنمایێن هاتنوچوونێ ل بەرچاڤ وەربگرن. ئەو رێنمایێن كو ژ وەزارەتا ناڤخوە و ژ پۆلیسێن هاتنوچوونێند دهیچنە دەركرن، هەموو بۆ سلامەتییا وەلاتییانە، بۆ هەوەیە و بۆ وەلاتیێن دی ژی یە و بزاڤێ بكەن كو وان رێنمایان ل بەرچاڤ وەربگرن و هەم خوە و هەم خەلكێ دی ژی بپارێزن.
من داخوازییەكا دی ژی ژ هەموو خووشك و برایێن بەرێز هەیە، كوردستان وەلاتەكێ جوانە و بێگومان ئەڤ جۆرە پڕۆژە دێ كوردستانێ جوانتر كەن، بەلێ گەلەك ل سەر مە دمینیت كو ئەڤێ جوانیێ بپارێزین و ب پاقژ رابگرین. من چەندین جاران داخواز ژ خووشك وبرایێن بەرێز كریە كو ژینگەهێ بپارێزن، پاقژییا ڤی وەلاتی بپارێزن، كوردستان مالا مەیە مەزنە، ئەركێ مەیە ڤێ مالێ بپارێزین و ب جوانی رابگرین. سەرەرای وان هەموو بانگەوازییان، بەلێ دیسان دبینین كو هندەك كەسێن نەبەرپرسیار مخابن ژینگەهپارێزیێ پشت گوه دهاڤێژن.
جارەكادی هیڤیدارم و داخوازێ ژ هەوە دكەم كو ژینگەهێ بپارێزن، ئالیێن پەیوەندیدارێن حوكمەتا هەرێمێ رادسپێرم كو پێدڤییە پێرابوونێن پێدڤی وەربگرن بەرامبەر هەر كەسەكێ كو رێزێ ل ئاخا مە نەگریت، ل ژینگەها مە نەگریت، ل وەلاتێ مە نەگریت، تاكو ئێدی چاڤپووشی لێ نەهێتە كرن و ئەو كەسێن كو ژینگەهێ پیس دكەن، روو ب روویێ قانوونێ و سزایێن قانوونی ببن. هیڤیدارم كەس نەچار بیت كو روو ب روویێ قانوونا سزایان ببیت بۆ پیسكرنا ژینگەهێ، هوون هەموو هەست ب بەرپرسیارەتیێ بكەن، بەلێ هەمە خودێ نەكەت خەلكەك هەبن كو رێز بۆ وەلاتێ مە نەبیت، بۆ خوە نەبیت، ئەم ژی بیگومان دێ نەچاربین وی دەمی پێرابوونێن دی وەربگرین.
ئەڤ پڕۆژەیە پشكەكە ژ پڕۆژەیەكێ مەزنتر، ماستەرپلانەكا باش هاتیە دانان بۆ وێ چەندێ ئەڤ جهە ببیتە جهەكێ گەشتیاریێ گرنگ كو خەلكێ هەولێرێ و خەلكێ هەموو كوردستانێ مفای ژێ وەربگرن و خەونا مە ژی ئەوە كو كوردستان ب تێكرا ببیتە جهەكێ كو هەم وەلاتیێن كوردستانێ ژێ مفادار بن، هەم ئەوێن سەرەدانا هەرێما كوردستانێ دكەن چ ژ ئیراقێ چ ژ دەڤەرێ ب شێوەیەكێ گشتی، یان ژی ژ دەرڤە كو بهێن و ئەڤان دەڤەرێن گەشتیاری یێن جوان ل هەرێما كوردستانێ دبینن. ئەو هەم ب خوە مفای ژێ وەردگرن، هەم خەلكێ ڤان دەڤەران دشێن ژ روویێ گەشتیاری ڤە، ژ رویێ ڤەژاندنا ئابۆری ڤە مفادار بن ژ هاتنا گەشتیاران.
مە گەلەك بەرنامەیێن هەین بۆ پێشئێخستنا كەرتێ گەشتیاری ل ڤێ دەڤەرێ و ل دەڤەرێن دی ژی، چەندین پڕۆژەیێن دی ژی د دەستێ مەدانە و ئینشائەللا ئەو ژی د دەمەكێ گەلەك نێزیك دا دێ گەهنە ئەنجام و هەموو دێ كەڤنە د خزمەتا خەلكێ خوەشتڤیێ كوردستانێ دا.

دوهی ئێكشەمبی 19/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل بالیۆز یورگن لیندستۆم، كاربرێڤەبەرێ كاروبارێن بالیۆزخانەیا سوید ل ئیراقێ كر.
د دیدارەكێدا دوپاتی ل گرنگییا ب هێزكرنا هەڤبەندیێن هەرێما كوردستانێ و سوید د وارێن جۆراوجۆردا هاتە كرن.
كاربرێڤەبەرێ بالیۆزخانەیا سوید، پیرۆزباهییا سەركەفتنا چاكسازیێن هەرێما كوردستانێ د كەرتێن جودا جودا دا ل سەرۆكێ حوكمەتا هەرێمێ كر.
د پشكەكا دی یا دانوستاندناندا، بیر و بۆچوون ل دۆر چارەسەكرنا كێشەیێن د ناڤبەرا هەرێما كوردستانێ و حوكمەتا فیدرال ل سەر بنەمایێ دەستووری و رێككەفتنان و رەوشا گشتییا ئیراقێ و دوماهی بەرهەڤیێن هەلبژارتنێن جڤاتا نوونەرێن ئیراقێ، هاتنە لێكگۆهارتن.
هەر دوهی ئێكشەمبی مەسرور بارزانی، سەرۆكێ حوكمەتا هەرێما كوردستانێ پێشوازی ل گلێن مایلز، بالیۆزێ ئوسترالیا ل ئیراقێ كر.
د كۆمبوونەكێدا، پێشڤەبرنا هەڤبەندیێن دو ئالییانە، رەوشا گشتییا هەرێما كوردستانێ و ئیراقێ و كێشەیێن هەولێر و بەغدا هاتنە گەنگەشەكرن.
تەوەرەكێ دی یێ دانوستاندنان تایبەت بوو ب پرۆسەیا هەلبژارتنێن جڤاتا نوونەرێن ئیراقێ، هەردو ئالی هەڤڕابوون ل سەر پێدڤییا ئەنجامدانا هەلبژارتنان د سەقایەكێ ئارام و دیمكوكراسییانە دا و دوور ژ توندوتیژیێ و بنپێكرنێ.

دیدار، هۆشەنگ تاجر:

چاڤدێرەکێ سیاسی یێ باکورێ کوردستانێ دیار دکەت، ل بەغدا فشار ل کوردان دهێنە کرن و مافێن کوردان دهێنە بنپێکرن، گرنگە ڤێجارێ پارتی بهێز بچیتە بەغدا دا مافێن گەلێ کوردستانێ ل ئیراقێ بهێنە گەرەنتیکرن.

ئیبراهیم گوچلو چاڤدێرێ سیاسی یێ باکورێ کوردستانێ د دیدارەکا تایبەت دا ل گەل رۆژنامەیا ئەڤرۆ دیار کر، ئەڤ هەلبژارتنە هەکە ژ بۆ ئیراقێ جارەکێ گرنگ بن ژ بۆ کوردان چەندین جاران گرنگن، چونکی چەند سالن بەغدا زۆرداریێ ل گەلێ کوردستانێ دکەت، مافێن سیاسی و ئابووری یێن گەلێ کوردستانێ دهێنە بنپێکرن، ژ بەر ڤێ یەکێ ژی گرنگە پێگەهێ کوردان ل بەغدا بهێز بیت، بۆ بهێزبوونا پێگەهێ کوردان ل بەغدا ژی د ڤێ رەوشا نها یا هەستیار دا گرنگە د ڤان هەلبژارتنان دا پارتی دیموکراتی کوردستان سەرکەفتنەکا مەزن تۆمار بکەت، ژ بەر ڤێ یەکێ ژی بەری هەر تشتەکێ دڤێت وەلاتیێن هەرێما کوردستانێ ب رێژەیەکا مەزن بچنە سەر سندۆقێن دەنگدانێ و دەنگێ خوە ژی بدەنە لیستا ٢٧٥ یا پارتی دیموکراتی کوردستان، چونکی سەرکەفتنا لیستا پارتی دێ بیتە ئەگەر کوردان پێگەهەکێ بهێز ل بەغدا هەبیت، هەتا کورد ل بەغدا بهێز نەبن دێ زۆرداریا ل سەر کوردان یا بەردەوام بیت.
چاڤدێرێ سیاسی یێ باکورێ کوردستانێ د پشکەکا دی یا ئاخڤتنا خوە دا ئەو یەک ژی دیار کر، بێگومان دەمێ پارتی بهێز بیت دشێت وەکو هێزا هەری مەزن یا کوردستانێ و ئیراقێ ل گەل پارتێن دی یێن کوردی ژی هەڤپەیمانیەکێ دروست بکەت، وی دەمی دێ کورد شێن ل پەرلەمانێ ئیراقێ و ل حوکمەتێ ژی خوەدان بریار بن، ژ بەر ڤێ یەکێ ژی گرنگە دەنگدەرێن هەرێما کوردستانێ ل گۆر گرنگیا ڤان هەلبژارتنان و رەوشا نها پشکداریەکا باش د هەلبژارتنان دا بکەن.
ئیبراهیم گوچلو ئەو یەک ژی دیار کر، خالەکا دی یا گرنگ ژی دەڤەرێن کوردستانی یێن دەرڤەیی ئیدارا هەرێما کوردستانێ نە، دڤێت کوردێن ل کەرکووکێ، شنگالێ و خانەقینێ ئانکو ب گشتی ئەو دەڤەرێن کوردستانی کو مخابن نها ل ژێر کۆنترۆلا هەرێما کوردستانێ دا نینن دڤێت کورد ل وان دەڤەرێن ژی پشتەڤانیەکا باش بدەنە پارتێن کوردستانی ب تایبەتی ژی لیستا ٢٧٥، چونکی ئالیێن دی خزمەتا کوردان ناکەن و ژ بەر ڤێ یەکێ ژی سەرکەفتنا لیستا پارتی ل دەڤەرێن کوردستانی یێن دەرڤەیی ئیدارا هەرێما کوردستانێ ژی گرنگە.
چاڤدێرێ سیاسی یێ باکورێ کوردستانێ ئاماژە ب ڤێ یەکێ ژی کر، کو ئەڤرۆکە پارتی دیموکراتی کوردستان ل سەر ئاستێ رۆژهەلاتا ناڤین و جیهانێ بەرەڤانیێ ل مافێن رەوا یێن گەلێ کوردستانێ دکەت، ئەڤرۆکە پارتی گەرەنتیا هەرێما کوردستانێ کریە، پارتی دیموکراتی کوردستان شیایە پڕانیا پیلانێن ل دژی هەرێما کوردستانێ ژناڤ ببەت، ژ بەر ڤێ یەکێ ژی ئەز هیڤیدارم بەری هەر تشتەکێ ئەڤ هەلبژارتنە ب سەرکەفتی ب دووماهی بهێن و بێگومان ب سەرکەفتنا پارتی دیموکراتی کوردستان دێ هەم پێگەهێ کوردان ل بەغدا بهێز بیت و هەم ژی دێ ب سەرکێشیا پارتی کورد شێن ئەو زۆرداریا نها شیعە ل کوردان دکەن ژی ب دووماهی بینن و هەموو مافێن سیاسی و ئابووری و یێن دی بۆ کوردان هێنە ڤەگەراندن.