ئەڤرۆ نیوز:

وەزارەتا کارەبا حوکمەتا هەرێما کوردستانێ راگەهاندیە ‏، ب ئەگەرێ ئاگرکەفتنێ ل کێلگەها غازا ‏کۆرمۆر بەرهەمئینانا کارەبێ 800 مێگاوات ‏کێم بووینە.

ئومێد ئەحمەد، پەیڤدارێ وەزارەتا کارەبا ‏حکومەتا هەرێما کوردستانێ گۆت، ئەڤ شەڤە ل؛دەمژمێر 08:30 خولەک ئاگر ‏بەربوویە وێستگەها غازا کۆرمۆر و بوویە ئەگەرێ کێمبوونا هنارتنا غازێ و نێزیکی 800 ‏مێگاواتێن کارەبێ کێمبووینە.

هەروەسا گۆتیە، تیمێن ‏کۆنترۆلا کارەبا وەزارەتێ و ڕێڤەبەریا ‏گشتی یا بەرهەمئینانێ ب هەماهەنگی ل گەل ‏وەزارەتا سامانێن سرووشتی شیاینە رەوشێ کۆنترۆل بکەن و نەهێلایە ‏کوژاندنا گشتی یا کارەبێ رووبدەت.

ئەو ژی ئاشکرا کر: ‏ئاگر هاتیە کۆنترۆل کرن، رەوش بەرەف ئاساییبوونێ ڤە دچیت و ئەم چاڤەرێی بلندبوونا ‏پەستانا غازێینە هەتاکو ئاستێ بەرهەمئیانا کارەبێ ‏ئاسایی دبیت.

ئەڤرۆ نیوز، عەلی حاجی :

د داخویانیەکێ دا ئەندامەکا پەرلەمانێ کوردستانێ بۆ ئەڤرۆ نیوز دیار کر، ژبۆ چارەسەرکرنا ئاریشا گلێشی ل زاخۆ مە سەرەدانا وەزیرێ شارەوانیێ کر داکو ب ئێکجاری ئەڤ کێشە بهێتە چارەسەر کرن.

زێدەتر رۆژان ئیبراهیم گوت : وەکو پەرلەمانتارێن نڤێسینگەها زاخۆ یا پەرلەمانێ کوردستانێ پشتی کۆمبوونەک ل گەل خودانێ کومپانیا هیزل و باژێرڤانیا زاخۆ و قایممقامێ زاخۆ مە ئەنجام دایی و لدووڤ دا مە سەرەدانا وەزیرێ شارەوانیان کر بۆ چارەسەر کرنا ڤێ کێشێ و پشتی مە راپورتەک پێشکێشی وەزیری کری وی ژی سوز دا ژلایێ خوە ڤە کار بکەن بۆ چارەسەر کرنا ڤێ کێشێ و هەر دیسان کار بکەن دا کو گلێش و بەرمایکێ زاخۆ بهێتە رەوانە کرن بۆ کاشێ ژبەر کو کومپانیا راکرنا گلێشی کرێکارێن وێ ل کاشێ کار دکەن و زێدەباری وێ چەندێ دێ د زووترین دەم دا کومپانیا هیزل و سەروکێ باژێرڤانیا زاخۆ و رێڤەبەرێ گشتیێ باژێرڤانیان ل پارێزگەها دهوکێ داخاز کەتە وەزارەتێ بۆ چارەسەر کرنا ڤێ کێشێ.

گوت ژی : وەزیری دیار کری یە نابیت وەلاتی ببیتە قوربانی ڤێ چەندێ و ئەڤ بابەتە پێدڤی یە بهێتە چارەسەر کرن و رێکێن چارەسەریێ بۆ بهێنە دیتن و زێدەباری وێ چەندێ پێدڤی یە زێدەتر گڤاشتن ل سەر وەزارەتا دارایی بهێتە کرن دا کو هەر چو نەبیت پارەیێ کومپانیێ بهێتە خەرچ کرن ژبەر کو ل دووف گرێبەستێ پێدڤی یە هەر دو هەیڤان جارەکێ پارەیێ کومپانیا هیزل بهێتە خەرچ کرن.

 
ئەڤرۆ نیوز ، زنار تۆڤی:

ل سپێدەهیا ئەڤرۆ سێشەمبی 4.2.2020 پێلەکا دیتر یا بەفرێ ناحیا کانی ماسێ یا سەر ب قەزا ئامێدیێ ڤەگرتیە و د ئەنجامدا هەتا نوکە رێژەکا بەفرێ ل سەنتەرێ ناحیا کانی ماسێ و گوندێن دەوروبەر باریە و نوکە ژی ب رەنگەکێ بەردەوام بەفر یا دباریت.

کامیران محەمەد رێڤەبەرێ شارەوانیا کانی ماسێ، تایبەت بۆ ئەڤرۆ نیوز دیار کر: ئەڤرۆ پێلەکا دیتر یا بەفرێ ل سنورێ ناحیا کانی ماسێ باریە و د ئەنجامدا هەتا نوکە رێژەکا بەفرێ ل سەنتەرێ ناحیا کانی ماسێ باریە و نوکە ژی بەفر بارین یا بەردەوامە، لێ هێشتا رێکێن هاتنوچوونێ نەهاتینە گرتن، هەروەسا نوکە ل هندەک گوندێن ڤێ دەڤەرێ نێزیکی میترەک و نیڤێن بەفرێ لێ هەنە.