ئه‌ڤرۆ نيوز:
وه‌زيرێ ناڤخۆ يێ حوكمه‌تا هه‌رێما كوردستانێ، رێبه‌ر ئه‌حمه‌د، ئه‌ڤرۆ د مه‌راسيمه‌كى دا، نڤيسينگه‌ها تايبه‌ت ب ده‌ركرنا پاسپۆرتێ ل زاخۆ ڤه‌كر.
وه‌زيرێ ناڤخۆ راگه‌هاند كو ل باژێرێ زاخۆ بۆ جارا ئێكێ يه مامه‌له‌يێن وه‌لاتيان دهێنه برێڤه‌برن و ل وێ نڤيسنگه‌هێ ئه‌ڤرۆ رۆژا سێشه‌مبى پاسپۆرتا ئێكێ ده‌ركه‌فت.
وه‌زيرێ ناڤخۆ د سه‌ره‌دانه‌كا دو رۆژى دا، دوهى رۆژا دوشه‌مبى گه‌هشته پارێزگه‌ها دهۆكێ و دوهى ل گه‌ل ئيدارا پارێزگه‌ها دهۆكێ كۆم بوو و ئه‌ڤرۆ ژى چه‌ندين سه‌ره‌دان كرن.
ئه‌ڤرۆ ل باژێرێ زاخۆ نڤيسينگه‌ها ده‌ركرنا پاسپۆرتان ڤه‌كر و راگه‌هاند كو ل ده‌مه‌كێ نێزيك دێ ل ئاكرێ ژى نڤيسينگه‌ها پاسپۆرتان هێته ڤه‌كرن دا كو وه‌لاتى نه‌چار نه‌بن سه‌ره‌دانا سه‌نته‌رێ پارێزگه‌هێ بكه‌ن بۆ ده‌ركرنا پاسپۆرتێ.
ئه‌ڤرۆ نيوز:
ليزا فه‌له‌كه‌دين كاكه‌يى، ئه‌نداما لژنا دارايى ل په‌رله‌مانێ كوردستانێ بۆ كوردستان 24 راگه‌هاند كو ل سالێن بۆرى حوكمه‌ت د پێناڤى ڤه‌ژاندنێ، حوكمه‌تا هه‌رێمێ بره‌كا پاره‌ى دايه هنده‌ك كۆمپانيا و وه‌به‌رهێنه‌ران، به‌لێ پشتى چه‌ندين سالان هه‌تا نها پاره بۆ حوكمه‌تێ نه‌ڤه‌گه‌رانديه.
ئاشكه‌را ژى كر كو ئه‌و كۆژمێ پاره‌ى نێزيكى 700 مليار دينارايه و پتريا وان ل لايێ شاسوار عه‌بدولواحده كو 42 مليار ديناره، دڤێت وى پاره‌ى بۆ حوكمه‌تێ ب ڤه‌گه‌رينيت.
نه‌ڤه‌شارت ژى كو شاسوار نها سه‌رۆكێ خزبه‌كێ يه و به‌حس ل گه‌نده‌لى و چاكسازيێ دكه‌ت، “ل ده‌ستپێكێ پێدڤيه ئه‌و ب خوه قه‌رزێ حوكمه‌تێ بده‌ت، دا كو حوكمه‌ت بشێت ب وێ چه‌ندێ كێماسيه‌كێ ب وى پاره‌ى پڕ بكه‌ت”.
ئه‌ڤرۆ نيوز، نيوار محه‌مه‌د سه‌ليم:
ئه‌ڤر رۆژا سێشه‌مبى روونشتنا ژماره 9 يا ئاسايى يا په‌رله‌مانێ كوردستانێ دێ هێته كرن و دو پرۆژێن قانوونان و پرسا كاره‌با نشتيمانى و به‌لاڤكرنا گازێ ل سه‌ر وه‌لاتيان دێ هێته گه‌نگه‌شه كرن.
پێشتر سه‌رۆكاتيا په‌رله‌مانى راگه‌هاندبوو كو د روونشتنا ئه‌ڤرۆ دا دێ خواندنا دويێ بۆ پێشنيازا قانوونا (ريكلاما بازرگانى ل هه‌رێما كوردستانێ – عيراق) هێته كرن و خواندنا ئێكێ ژى بۆ پێشنيازا بڕيارا (رۆژێن هه‌لكه‌فتێن نه‌ته‌وا توركمان) هێته كرن.
دوهى سه‌رۆكاتيا په‌رله‌مانى د به‌ياننامه‌كێ دا، ئه‌ندامێن په‌رله‌مانێ كوردستانێ ئاگه‌هداركرن كو خاله‌كا دى بۆ به‌رنامێ كارێ روونشتنا ئه‌ڤرۆ رۆژا سێشه‌مبى 10ى كانوونا ئێكێ 2019 زێده كريه كو ئه‌و ژى به‌حسكرنه ل سه‌ر گه‌نگه‌شه‌كرنا پرسا كێشا كاره‌با نشتيمانى و به‌لاڤكرنا سۆته‌مه‌نيێ ل ڤى وه‌رزێ سه‌رمايێ ب سه‌ر وه‌لاتيان دا.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا چارشه‌مبى دهێته پێشبينيكرن ئه‌سمان ئه‌ورێ ته‌مام بيت ل سپێدێ زوو دێ بارانه‌كا كێم باريت و ل دانێ نيڤرۆ دێ ئه‌سمان به‌ر ب ساهياتيێ ڤه چيت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك ب ده‌ست ئه‌ڤرۆ نيوز كه‌فتيه راگه‌هاند كو سوبه‌هى رۆژا چارشه‌مبى رێكه‌فتى 11ى كانوونا ئێكێ 2019 دهێته پێشبينيكرن ئه‌سمان ئه‌ورێ ته‌مام بيت ل سپێدێ زوو دێ بارانه‌كا كێم باريت و ل دانێ نيڤرۆ دێ ئه‌سمان به‌ر ب ساهياتيێ ڤه چيت.
پشكا پێشبينيان ئاشكه‌را ژى كر كو له‌زاتيا بايى دێ ب ره‌نگێ ل سه‌رخوه و ناڤه‌ندى بيت ناڤبه‌را 5 بۆ 15كم بيت و مه‌ودايێ ديتنێ ژى دێ 9 بۆ 10كم بيت. نزمترين پلا گه‌رماتيێ دێ 7 پله بيت و بلندترين پله ژى دێ 10 بيت.
ئه‌ڤرۆ نيوز:
برياره سوباهى سێشه‌مبى ل به‌غدا خوه‌نيشادانه‌كا مليۆنى بهێته ئه‌نجامدان و فه‌رماندێ گشتيێ هێزێن چه‌كدار ل عيراقێ ژى بريارێ دده‌ت كو نابيت حه‌شدا شه‌عبى ده‌ستێوه‌ردانێ د كاروبارێن ئه‌منى دا بكه‌ت، سه‌ركرده‌كێ حه‌شدا شه‌عبى ژى خوه‌نيشادانا سوباهى ب تێكده‌ر د هه‌ژمێريت.
عه‌بدولكه‌ريم خه‌له‌ف، په‌يڤدارێ فه‌رماندێ گشتيێ هێزێن چه‌كگدارێن عيراقێ دووپات دكه‌ت كو سه‌رۆك وه‌زيرێن عيراقێ فه‌رمان دايه كو نابيت حه‌شدا شه‌عبى ده‌ستێوه‌ردانێ د كاروبارێ ئه‌منى دا بكه‌ت.
هه‌ر ل دۆر خوه‌نيشادانا سوباهى، قه‌يس خه‌زعه‌لى، سه‌رۆكێ گرۆپا عه‌سائيب ئه‌هلولحه‌ق يا سه‌ر ب حه‌شدا شه‌عبى ڤه راگه‌هاند” ئه‌وا دێ سوباهى هێته كرن، كاره‌كێ تێكده‌رانه‌يه”.
هه‌ڤده‌م ل هنده‌ك پارێزگه‌هێن عيراقێ بارێ نه‌ئاسايى هاته راگه‌هاندن و باليۆزخانا ئه‌مريكى ل عيراقێ ژى هوشدارى ل دۆر خوه‌نيشادانێن سوباهى ل باژێرێ به‌غدا دده‌ت.
ئەڤرۆ نیوز، نەوزاد هلۆری:
ب مه‌ره‌ما زێده‌تر خزمه‌تكرنا خوانده‌ڤانان و ب پارێزگارێ دهۆك و ب به‌رهه‌ڤبوونا هژماره‌كا خوانده‌ڤان و قوتابیان، حه‌فته‌مين پێشانگه‌ها دهۆك یا په‌رتوكێ ل ناڤه‌ندا قوتابیان ل زانكۆیا دهۆكێ هاته ڤه‌كرن، رێڤه‌به‌رێ راگه‌هاندن و چاپ و به‌لاڤكرنێ ژى بۆ ئه‌ڤرۆ نیوز دیاركر، پێشانگەهـ دێ بۆ دەما شەش رۆژان یا بەردەوام بیت.
ئدریس غازى، رێڤه‌به‌رێ رێڤه‌به‌ریا چاپ و به‌لاڤكرنێ ل دهۆكێ بۆ ئه‌ڤرۆ نیوز گۆت: ( ب چاڤدێریا پارێزگارێ دهۆكێ و ب به‌رهه‌ڤبوونا هژماره‌كا زۆرا خوانده‌ڤان و قوتابیان، ئەڤرۆ گه‌را حه‌فت یا پێشانگه‌ها په‌رتوكێ ل دهۆكێ ل ناڤه‌ندا قوتابیان ل زانكۆیا دهۆكێ ده‌ست پێ كرد و دێ بۆ ده‌ما شه‌ش رۆژان یا به‌رده‌وام بیت).
زێده‌تر گۆت: (ئارمانج ژ ڤه‌كرنا پێشانگه‌هێ ئه‌وه كو خواندڤان و په‌رتوكێ زێده‌تر ل هه‌ڤدو نێزیك بكه‌ین و ره‌وشه‌نبیریه‌كا زێده‌تر په‌یدا بكه‌ین، 12 ده‌زگه‌ه پشكدارن و ئێك ژ وان ل هه‌ولێرێ یه، د پێشانگه‌هێ دا پترى شه‌ش هزار ناڤونیشانێن په‌رتوكان ب چه‌ند زمانان هاتنه نیشاندان).
دهێتە زانین پێشانگەهـ رۆژانە دێ ل دەمژمێر 9:00ێ سپێدێ هەتا 6:00 ئێڤاری یا ڤەکری بیت.
..
ئەڤرۆ نیوز:
عەلی حەمە سالح ئەندامێ پەرلەمانێ کوردستانێ راگەهاند کو ل سەر داخوازا پرانیا ئەندامێن پەرلەمانێ کوردستانی دێ سپێدێ پەرلەمان ل دۆر ئاریشا کارەبێ ل هەرێما کوردستانێ کۆم بیت.
ئەو یەک د دەمەکێ دایە کو نها ل هەرێما کوردستانێ ب تایبەتی ژی ل وەرزێ زڤستانێ بابەتێ کێمبوونا کارەبێ د رۆژەڤا وەلاتیێن هەرێما کوردستانێ دایە.
نيشاندان