ئەڤرۆ نیوز،عەلی حاجی :
زێدەتری 12 سالایە ماموستایەكێ زانكویا زاخۆ ب داهاتێ خوە سالانە كوژمەكێ پارەی د دەتە 10 قوتابیێن ئێكەمێن دەڤەرێن ئامێدیێ و شێلادزێ و بۆ ئەڤ سالە ژی نێزیكی 10 قوتابیێن ئێكەم ب كوژمەكێ پارەی خەلات كرن .
دكتور سەلاحەددین محەمەد بۆ ئەڤرۆ نیوز گوت : ب مەرەما پشتەڤانی كرنێ ل قوتابیێن ده‌ست كورت ل سنورێ دەڤەرا ئامێدیێ و كانی ماسێ و شێلادزێ و چەندین دەڤەرێن دی، هەر ژ سالا 2007 هەتا نوكە سالانە ئەز وان قوتابیان خەلات دكەم یێن كونمرێن خوە ل قوناغا دوازدێ 92 هەتا دوماهی نمرە ب دەست خوەڤە دئینن ئەز ب 200$ خەلات دكەم وەكو پشتەڤانیەك بۆ وان قوتابیان ژبەر كو پتریا وان قوتابیان دەست كورتن و ئەو شیان نینن ماموستایێن تایبمەت ب كرێ بۆ خوە بگرن و پتریا ئەو قوتابیێن ل وان قوتابخانەیان دەوامێ دكەن وەكو پێدڤی ژی پشكەكا ماموستایێن وان ل ئاستێ پێدڤی دا نینە و ئەڤە ژی بۆ زەحمەتا وان ڤەدگەریت و بۆ ئەڤ سالە ژی نێزیكی 10 قوتابیێن ئێكەم ل سنورێ پەروەردا ئامێدیێ ب 2100 هزار دولاران ل سەر وان قوتابیان ب داهاتێ خوەیێ كەسی بەلاڤ كرن و ئەڤ سالە ژی پشكەكا قوتابیێن قونابیێن سنورێ دەڤەرا ئامێدیێ ل دهوكێ دخوینن من هەتا هاریكاری دگەل وان قوتابیان دا كر.
زێدەتر ناڤهاتی گوت ژی : پێدڤیە هه‌موو كەسەك ژلایێ خوە ڤە هاریكاریا قوتابیان بكەت ب مادی و مەعنەوی، ل وەلاتێن ئەوروپی زێدەتر گرنگی ب قوناغا سەره‌تایی دهێتە كرن، من ژی دخواست هاریكاریا قوتابیێن قوناغا سەرەتایی بكەم، بەلێ ل كوردستانێ وەكو پێدڤی ئەم نوزانین كیش قوتابی ب دروستی ژهەژی خەلاتكرنێ یە .
ئەڤرۆ نیوز،عەلی حاجی :
ئەندامێ لژنا هەڤپشكا دووڤچوونا ناڤ بازارێن زاخۆ، لاوین هابیل د داخویانیەكێ دا بۆ ئەڤرۆ نیوز دیاركر د بەردەوامیا لێگەریانێ دا ل باژێرێ زاخۆ دەست ب سەر زێدەتر پێنچ تەنێن چكلێتێن دەم ب سەرڤە چووی دا هاتە گرتن .
لاوین هابیل گوت : پشتی مە دووفچوونەكا بەردەوام كری ل سەر كوگەها كومپانیەكێ ،ئەڤرۆ چار شەمبێ 16/10/2019 وەكو لژنا هەڤپشك ل زاخۆ شیاین دەست ب سەر پێنچ تەن و نیڤێن چكلێتێن دەم ب سەرڤە چووی دا بگرین و پشتی دەست ب سەردا هاتیە گرتن ئەو چكلێت ژلایێ لژنا مە ڤە هاتنە ژناڤبرن وئەو جهە ژى ب كوژمێ ملیون دیناران هاتە سزادان و هەر دەما ئەڤ كارە دووبارە كر دێ سزایێن توندتر هەبن.
ناڤهاتی ئەو چەندە ژی گوت : داخستنا وی جهی بۆ ده‌مێ چەند رۆژایه و دبیت ب كوژمەكێ پارەیی ژی بهێتە سزادان،وەكو لژنا هەڤپشك هەتا رادەكێ مە شیایە كونترولێ ل سەر وان كەلوپەلێن دەم ب سەر ڤه چووی بكەین و وان جهان ژی سزا بدەین .
ئەڤرۆ نیوز، عەلی حاجی :
ب بریارەكا قایممقامێ زاخۆ لژنەكا دووفچوونێ ل زاخۆ هاتە پێكئینان و د ئێكەم رۆژا خوە یا دووفچوونان دا شیان دو جهان دائێخن و چەندین رێنما یان بدەنە جهێن داگرتنا ئاهێن خوارنێ و جهێن فروتنا پێدڤیێن نارگیلان .
وەلات هەجەر، نوونەرێ قایمماقامێ زاخۆ د لژنا دووفچوونێ دا بۆ ئەڤرۆ نیوز گوت : لژنا دووفچوونێ پێك دهێت ژ گومركا زاخۆ و كونترولیا جوری ل گومركا ئیبراهیم خەلیل و ئاسایشا زاخۆ و ساخلەمیا زاخۆ و قایممقامیا زاخۆ و چاڤدێریا بازرگانی و ئەڤ لژنە پشتی وێ یەكێ هات كو وه‌لاتیان چەندین تێبینی هەبوون ب تایبەتی ژی ل سەر كارگەهێن داگرتنا توڤێ چایێ، ل دەست پێكێ مە چەندین تێبینی ل سە روان كارگەهێن رادبن ب داگرتنا ئاهێن خوارنێ بەلاڤ كرن،مە چەندین تێبینی ژی ل سەر وان جهان هەبوون، دو ژ وان كارگەهان ژبەر نەبوونا مۆله‌تا كاركرنێ بۆ ده‌مێ چەند رۆژان هاتنە دائێخستن وهه‌روه‌سا كارگەهەكا دی یا ئاهێن خوارنێ ژبەر نەبوونا مەرجێن ساخلەمیێ هاتە داخستن بۆ ده‌مێ 10 رۆژان تاكو ب دروستی رێنمایێن لژنێ بجه دئینن و مە چەندین رێنما ل سەر كارگەهێن فروتنا پێدڤیێن نارگیلا دا بەلاڤكرن ئەو ژی مە چەند تێبینیەك ل سەر كارێ وان هەبوون .
زێدەتر گوت : ئەڤ لژنە دێ بەردەوام دووفچوونێ ل سەر وان جهان كەت یێ كو تێبینی و گازنده‌یێن وه‌لاتیان ل سەر هەی و هەر دەما وه‌لاتیه‌كێ گازندەك ل سەر جهەكێ هەبیت، دشێت قەستا قایممقامیا زاخۆ بكه‌ت و ب رژدی دێ دووفچوونا خوە دەست پێكەین و وەكو پێدڤی ژی د دەرحەقێ وان دا پێرابونان وەرگرین .
ئەڤرۆ نیوز،بارزان مزووری:
سالم سەعید،بەرپرسێ راگەهاندن و پەیوەندیان ل بوردێ كارۆبارێن مرۆڤایەتی ل پارێزگەها دهوكێ بۆ ئەڤرۆ نیوز گوت :بوردێ كارۆبارێن مروڤایەتی ب هەڤكاری ل گەل هەموو دامودەزگەهێن شولەژێ و رێكخراوێن كارۆبارێن مروڤایەتی كاردكەن و هەموو بەرهەڤی كرینە بۆ ڤەحەواندنا پەنابەرێن رۆژئاڤا ل هەرێما كوردستانێ.
گۆت ژى” ئێك ژوان جهێن هاتیە دەست نیشانكرن ل قەزا بەردەرەش كەمپه‌كا ڤەحەواندنا ئاواره و پەنابەرانه كۆ جهێ ڤه‌حه‌واندنا 3 هزار خێزانان تێدا هاتیە دروست كرن”.
دياركر” ل شەڤا 14 ل سه‌ر 15 ڤێ هەیڤێ ئێكەم گەرا پەنابەران كو ژ 180 كەسان پێك دهات ب رێيێن نە قانوونى ژ رۆژئاڤا گەهشتە پارێزگەها دهوكێ و ل كەمپا دومیز ئێك هاتن ئاكنجی كرن و بوردێ كارۆبارێن مروڤایەتی دگەل دەزگەهێ بارزانى يێ خێرخازی هەموو جورێن هاریكاریان ل سەر وان به‌لاڤكرن”.
ناڤهاتی خویاكر ئەڤرۆ رچارشه‌مبى 16/10/2019 ل خالا سحێلا 88 پەنابەرێن رۆژئاڤا ب رێيا ترومبێلێن ڤەگوهاستنێ ژلایێ رێكخراوا (ئای ئو ئێم) هاتینە دابین كرن بۆ كەمپا بەردەرەش هاتن ڤەگوهاستن و ستافێ بوردی هەموو ل كەمپێ بەرهەڤ بوویە و پێدڤيێن سه‌ره‌كى بۆ هاتينه دابين كرن.
ناڤهاتی گوت زێدەتری 800 پەنابەرا ل لایێ رۆژئاڤا ماینە ل نێزیك خالا سنوری ل سحێلا بەرهەڤن بهێنە ناڤ هەرێما كوردستانێ دا ئەو ژمارا پەنابەران ژی بۆ كەمپا بەردەرەش ژی دهێن ڤەگوهاستن هەتا ژمارا وان بگەهیتە 3 هزار خێزان ژبەركۆ جهێ 3 هزار خێزانا دناڤ وێ كەمپێ دا دروست كریە ،
ناڤهاتی زێدەتر گوت ل سنورێ پارێزگەها دهوك 27 كەمپ یێن ئاوارا و پەنابەرا یێن هەین پشتی ڤەگەریانا ئاوارێن مووسل 5 كەمپ د ڤالانە یێن شێخان و بەردەرەش ، د نها دا 21 كەمپ مە یێن هەین نێزیك 600 هزار ئاوارا و پەنابەرا دناڤ وان كەمپا و دەرڤەی كەمپا ئاكنجینە ل سنورێ پارێزگەها دهوك بەلێ د نها دا رێكخراوا بودجەیا وان كێم بویە مەگەلەك پرۆژە د دەستان دا بۆن بۆ ئاواران و پەنابەرا بەلێ هەموو هاتن راوەستاندن ژبەر نەبونا بودجەیا وان و رێكخراوا .
ئه‌ڤرۆ نيوز:
لژنا دووڤچوونا بازارى ل قايمقاميا قه‌زا دهۆكێ، ل دووڤ به‌رپه‌رێ قايمقاميا قه‌زا دهۆكێ ل سه‌ر تۆرا فه‌يسبووكى، ئه‌ڤرۆ چارشه‌مبى 16/10/2019 دووڤچوونا چه‌ند ماركت و خوارنگه و سه‌مونخانه و كارگه‌هه‌كا ماستى كر.
هه‌يهات ئيبراهيم، ئه‌ندامێ لژنا دووڤچوونا بازارى دياركر كو كارگه‌ها (چياڤين) يا چێكرنا ماستى هاته سزادان ب گۆژمه‌كێ پاره‌ى ژ به‌ر هه‌بوونا پتر ژ دو ته‌نێن شيرێ خرابووى ل گه‌ل ژناڤبرنا وى شيرى.
گۆت ژى” ده‌ست ب سه‌ر چه‌ند مێلاكا قه‌ده‌غه‌كرى ل ماركتا (لاناس) هلاته گرتن و هوشدارى ژى بۆ چه‌ندين سه‌مونخانا هاتنه دان كو نابيت زه‌رفێن نايلۆنى بكاربينن”.
ئەڤرۆ نیوز،بارزان مزووری:
ئەڤرۆچارشه‌مبى 16/10/2019 شاندەكێ حوكمه‌تا ئەلمانیا ب سەرۆكاتیا وەزیرێ كوچ و كوچبەران سەرەدانا كەمپا مام رەشان و شێخان یێن ئاواران كر دیسان سەرەدانای پەرستگەها لالش ژى كر.
جۆشیم ستامپ،وەزیرێ كوچ و كوچبەران یێ ئه‌لمانى بۆ ئەڤرۆ نیوز گوت:گەلەك یێ گەشبینم كۆ هەموو ئاوارە ل هەرێما كوردستانێ ب ئاشتی و ب تەڤای دژین بێ جوداهیا ئاینى و نەتەوى ژبەر وێ چەندێ حوكمه‌تا ئەلمانیا پشتەڤان و هاریكارا حوكمه‌تا هەرێما كوردستانێ یە ،مەرەم ژ سەرەدانا من بۆ قەزا شێخان و كەمپێن ئاواران كو كار بكەین دگەل حوكمه‌تا هەرێما كوردستانێ و بەغدا كۆ دوبارە وان ئاواران ڤەگەرینین بۆ سەر گەندێن وان یێن لێ ئاوارەبوین،
ناڤهاتی خویاكر دەستپێكا ڤەگەریانا ئاواران بۆ سەر جهێن وان دێ ژ قەزا شێخان دەست پێ كەین ژبەركۆ حوكمه‌تا ئەلمانیا جەندین رێكخراوێن ئەلمانی هنارتینە ڤێ دەڤەرێ هەتا نها ژی دەست بكارن بۆ هاریكاری كرنا ئاواران ، سوزێ د دەینە هەموو ئاوارێن ل قەزا شێخانئاكنجى بێ جوداهى دێ هاریكاریا وان كەین هەتا ڤەگەرنە سەر جهێن خۆ،
دیاركر ژى هه‌كه ئەمن و ئاسایش ل دەڤەرێن ئەڤ ئاوارە لێ هاتین بەرقرار نەبیت، نەشێین پرۆژان ل وان دەڤەران ئەنجام بدەین.
سه‌ردار یه‌حیا ،قایمقامێ قەزا شێخان بۆ ئەڤرۆ نیوز گوت:سەرەدانا شاندێ حوكمه‌تا ئەلمانیا بۆ دەڤەرا شێخان بۆ ڤەدیتنا رێ چارەیەكێ بۆ ڤەگەریانا ئاوارێن ل قەزا شێخان كۆ ڤەگەرن بۆ سەر جهێن خوه،هه‌روه‌سا هژماره‌كا پرۆژان د وارێن پەروەردە و ساخلەمی و چاندنێ و پەیداكرنا دەلیڤێن كاری بۆ ئاواران دروست كرینە سەرەدانا وان پرۆژان دا .
ئه‌ڤرۆ نيوز:
جڤاتا پارێزگه‌ها دهۆكێ د به‌رپه‌رێ خوه دا ل سه‌ر تۆرا جڤاكى يا فه‌يسبووكى چه‌ندين وێنه ژ مالا په‌رستاران به‌لاڤكرن و دياركر كو لژنا ساخله‌ميێ ل جڤاتا پارێوگه‌ها دهۆكێ سه‌ره‌دانا مالا په‌رستاران كر دا ژ نێزيك هايدار ره‌وشا وان ببن و كا چ خزمه‌ت بۆ دهێته پێشكێشكرن و ره‌وشا خوارن و پاقژيێ يا چاوايه.
ئه‌ڤرۆ نيوز:
جڤاتا وه‌زيرێن هه‌رێما كوردستانێ ئه‌ڤرۆ چارشه‌مبى 16/10/2019 ب سه‌رپه‌رشتيا مه‌سرور بارزانى سه‌رۆكێ جڤاتا وه‌زيرێن هه‌رێنا كوردستانێ كۆمبوو.
نڤيسنگه‌ها راگه‌هاندنا جڤاتا وه‌زيران د به‌ياننامه‌كێ دا ئاماژه‌كر كو ل ده‌ستپێكا كۆمبوونێ دانوستاندن ل دۆر بابه‌تێ دامه‌زراندنا هه‌رسێ ئێكه‌مێن زانكۆيێن حكومى بۆ سالا خواندنێ 2015- 2016 هاته كرن و پشتى كو ئارام محه‌مه‌د وه‌زيرێ خواندنا بلند راپۆرته‌ك پێشكێشكرى، جڤاتا وه‌زيران بريارا دامه‌زراندنا وان وه‌كو قۆناغا ئێكێ يا دامه‌زراندنا ئێكه‌مێن زانكۆيان ده‌ركر.
به‌لاڤكر ژى” پاشى بێگه‌رد تاله‌بانى، وه‌زيرا چاندنێ و ژێده‌رێن ئاڤێ پرۆژه‌ك ل دۆر ب بازاركرنا ناڤخوه‌يى يێ گه‌نمێ به‌رهه‌مئيناى ل هه‌رێما كوردستانێ به‌رچاڤكر، سه‌رۆكێ جڤاتا وه‌زيرێن هه‌رێمێ ئاماژه كر كو گرنگيدان ب كه‌رتێ چاندنێ ئێك ژ ئه‌ركێن به‌راهيێ يێن كارناما كابينا نه‌هێ يا حوكمه‌تا هه‌رێما كوردستانێ يه، ب جۆره‌كى كو پێدڤيه كار ل سه‌ر دابينكرنا ئاسايشا خوراكى بكه‌ين و بزاڤێ بكه‌ين بازارى بۆ به‌رهه‌مێن چاندنێ يێن ناڤخوه‌يى ل هه‌رێما كوردستانێ ببينين، جڤاتا وه‌زيران ژى ل دۆر وى بابه‌تى بريار دا چه‌ند وه‌زاره‌ت و فه‌رمانگه و ده‌سته‌يێن حوكمه‌تێ راسپێريت بۆ ئه‌نجامدانا ڤه‌كۆلينێن زێده‌تر ل دۆر پرۆژه‌ى بۆ وێ چه‌ندێ بريارا پێدڤى بهێته دان”.
ئه‌ڤرۆ نيوز:
وه‌زاره‌تا دارايى و ئابوورى ل هه‌رێما كوردستانێ خشتێ به‌لاڤكرنا مووچێ هه‌موو وه‌زاره‌ت و ده‌سته‌يان به‌لاڤكر كو هه‌تا نوكه مووچێن خوه وه‌رنه‌گرتين.
- ئێكشه‌مبى 20/10/2019
وه‌زاره‌تێن (داد، سامانێن سروشتى، ئه‌وقاف، خواندنا بلند، ناڤخوه) – رێڤه‌به‌ريا گشتى يا ره‌گه‌زنامێ- ليوايێن پاراستنا ده‌زگه‌هێن په‌ترۆلێ- پێشمه‌رگێ زێره‌ڤانى- به‌رگرى و فرياكه‌وتن- ده‌زگه‌هێ ئاسايشێ – جڤاتا ئاسايشێ
- دوشه‌مبى 21/10/2019
وه‌زاره‌تێن (باژێرڤانيان و گه‌شتوگوزار- كاره‌با- ڤه‌گوهاستن و گه‌هاندن- پلاندانان- چاندن و ژێده‌رێن ئاڤێ) – ديوانا چاڤدێريا دارايى- ده‌سته‌يا مافێن مرۆڤى- ده‌سته‌يا ده‌ڤه‌رێن كوردستانى يێن ده‌رڤه‌ى ئيدارا هه‌رێمێ- ده‌سته‌يا وه‌به‌رهێنانێ- ده‌سته‌يا ده‌ستپاكيێ – كۆمسيۆنا هه‌لبژاردن و راپرسى- ده‌زگه‌هێ مين).
- سێشه‌مبى 22/10/2019
وه‌زاره‌تێن (بازرگانى و پيشه‌سازى- ره‌وشه‌نبيرى و لاوان- ئاڤه‌دانكرن و ئاكنجيكرن) – سه‌رۆكايه‌تيا هه‌رێمێ -په‌رله‌مان- جڤاتا وه‌زيران
- چارشه‌مبى 23/10/2019
خانه‌نشينێن پێشمه‌رگه
- پێنجشه‌مبى 24/10/2019
خانه‌نشينێن مه‌ده‌نى
نيشاندان