ئه‌ڤرۆ نيوز:
جێگرێ هاريكارێ وه‌زيرێ ده‌رڤه يێ ئه‌مريكى بۆ كاروبارێن عيراقێ وئيرانێ، ئه‌ندرۆ پيك، ئه‌ڤرۆ ئه‌ينيێ 12/7/2019 د په‌يوه‌نديه‌كا ته‌له‌فۆنى دا پيرۆزباهى ل مه‌سرور بارزانى سه‌رۆك وه‌زيرێن هه‌رێما كوردستانێ كر وهيڤيا سه‌ركه‌فتنێ بۆ كابينا نوو يا حوكمه‌تا هه‌رێما كوردستانێ خواست.
به‌رپرسێ ئه‌مريكى د وێ په‌يوه‌نديا ته‌له‌فۆنى دا ئاماژه ب گرنگيا به‌رده‌وامبوونا هاريكاريان بۆ پێِمه‌رگه‌ى وب هێزكرنا په‌يوه‌نديێن د ناڤبه‌را هه‌رێما كوردستانێ و ئه‌مريكا كر.
ئەڤرۆ نیوز ، عەلی حاجی :
ب پشكداریا 120 كچ و كوران ل زاخۆ ، دەست ب هەوەكا پاقژكرنا سەنتەرێ باژێرێ زاخۆ هاتە كرن و ئەڤ هەوە ژی ب سەرپەرشتیا لقا زاخۆ یا ئێكەتیا قوتابیێن كوردستانێ ب رێڤە چوو .
ئەحمەد سەعید ، بەرپرسێ لقا زاخۆ یا ئێكەتیا قوتابیێن كوردستانێ بۆ ئەڤرۆ نیوز گۆت” ژ بۆ جوانكرنا باژێرێ زاخۆ و پاقژ راگرتنا وێ 120 قوتابیێن خیڤەتگەها ئومێد ژ كچ و كوران مە ئەڤرۆ پێنچ شەمبێ 11/7/2019 دەست ب هەوەكا پاقژكرنا باژێری كریە دناڤ سەنتەرێ وێ دا ، ئەڤ هەوە هەر دناڤ خیڤەتگەها مە ئومێد دا هات بو رێڤە برن ، هەر ب رێ یا وێ خیڤەتگەهێ چەند سمینارەك ژی هاتبوونە پێشكێشكرن ل دور ژینگەهێ .
ئه‌ڤرۆ نیوز:
رێڤه‌به‌ریا گشتى یا پەروەردێ ل پارێزگه‌ها دهۆكێ د رۆهنكرنه‌كێ دا راگه‌هاند، پشتى ده‌ركه‌فتنا ئه‌نجامێن نه‌رازیبوونێ (اعتراض) د ئه‌زموونێن گشتى یێن قۆناغا 12 ئاماده‌یى، قوتابیه‌كێ دهۆكێ بوو یێ ئێكێ ل سه‌ر هه‌رێما كوردستانی.
رێڤه‌به‌ریا ناڤبرى د رۆهنكرنه‌كا خوه دا به‌لاڤكر” ل رۆژا ۲۳ ی هەیڤا خزیرانێ وپشتی ئەنجامێن ئەزموونێن گشتی یێن قۆناغا 12 ئامادەیی و نیشتیمانی یێن قۆناغا 9 بنەرەتی هاتینە راگەهاندن قوتابیێ کولیژا بەهرەداران سەر ب پەروەردا قەزا دهۆك رۆژهەلات (هەژی بنگین طاهر) ب تێکرایێ ( 99.14 ) بۆ یێ دویێ ل سەر ئاستێ هەرێما کوردستانێ پشكا زانستی “.
دیاركر ژى” قوتابی هەژی نەرازیبون (اعتراض ) ل سەر نمرێن خوه پێشکێشکر وپشتی دەرکەفتنا ئەنجامێن نەرازیبونێ وگۆهورین ل سەر نمرێن وی چێبووین، قوتابی (هەژی بنگین طاهر) بۆ یێ ئێکێ دووبارە ل سەر ئاستێ هەرێمێ ب تێکرایێ ( 99.43)”.
ئەڤرۆ نیوز،بارزان مزووری:
محەمەد عارف تاتار،شوونوارناس ل قەزا شێخان بۆ ئەڤرۆ نیوز گوت:پەرستگەها لالش دگەل 12 جهێن دی ئەڤرۆ پێنجشه‌مبى 11/7/2019 وەزارەتا رەوشەنبیری و گەشت و گوزار یا عێراقى راگه‌هاند كو ئەڤ جهە دێ كەڤنە لیستا كەلەپوری یا جیهانى دا پەرستگەها لالش ژی دگەل دو جهێن دی ل كوردستانێ ئه‌وژى ئامێدیێ و هەلەبجە ،
خویاكر ژى” ئەڤە د دەمەكی دایە كو به‌رى چه‌ند رۆژان شوونوارێن بابل یێن دیرۆكى چووینه د لیستا كه‌له‌پۆرێ جیهانى یا رێكخراوا یونیسكۆ دا ل كۆنگرێ وێ رێكخراوێ ل (باكو) پایتەختێ ئازربایجانێ كو وەزیرێ رەوشەنبیری یێ عێراقێ بەرهەڤ تێدا به‌رهه‌ڤ بووى”.
گوت ژى” ل ڤان رۆژا تیمەكا بیانی یا تایبەت وشاره‌زا د بوارێ كەلەپورێ جیهانى ب هەماهەنگی دگەل وەزارەتا رەوشەنبیری و گەشت و گوزاری یا عێراقێ دێ سەرەدانا وان جهان كەن و پێزانینان ل سەر كۆم كەن، هه‌روه‌سا هەلسەنگاندنا وی جهی كەن وهاریكاریا دراڤى مادی بۆ تەرخان كەن”.
محەمەد عارف گوت ژی پەرستگەها لالش ئێك ژوان پەرستگەهایە كو هێمایێن كەڤن یێن لێ هەین كو ڤەدگەرن بۆ سەردەمێ سومەریان بەری 5 هزار سالان وگه‌له‌ك هێمایێن دی لێ هەنە، زێدەباری جهەكێ ئاینی یێ پیرۆز یێ ئێزدیانە .
ئه‌ڤرۆ نیوز:
فه‌رهاد ئه‌مین ئه‌تروشى پارێزگه‌رێ دهوكێ ئەڤرۆ پێشوازیا خانم ( حمیده ره‌مه‌دانى ) رێڤه‌به‌را گشتى یا رێكخراوا یونسێف (UNICEF)ل ئیراقێ وشاندێ دگه‌لدا كر.
دهه‌ڤدیتنه‌كێدا به‌حسێ به‌رنامێن رێكخراوا یونسێف ل عیراقێ ب گشتى ول هه‌رێما كوردستانێ ول پارێزگه‌ها دهوكێ ب تایبه‌تى هاته كرن.
دته‌وه‌ره‌كێ دن به‌حسێ پلانا پێنچ سالى یا رێكخراوا یونسێف دبیاڤێ پشته‌ڤانیكرنا زاروك و ژنان وپروژێن ئاڤێ ب گشتى هاته كرن.
رێڤه‌به‌را گشتى یا رێكخراوا یونسێف (UNICEF)ل عیراقێ سوپاسیا پارێزگه‌رێ دهوكێ وهه‌موو سازیێن په‌یوه‌ندیدار یێن پارێزگه‌ها دهوكێ كر كو به‌رده‌وام هه‌ڤكاریێ دگه‌ل تیمێن یونسێف دكه‌ن وژبه‌ر وێ هه‌ماهه‌نگیێ به‌رنامێن رێكخراوا یونسێف بره‌نگه‌كێ سه‌ركه‌فتیانه ل دڤه‌رێ دهێنه بجه ئینان.
پارێزگه‌رێ دهوكێ خوشحالیا خو ب سه‌ره‌دانا شاندێ رێكخراوا یونسێف (UNICEF) دیاركر وده‌ست خوشى ل تیمێن رێكخراوێ كر ئه‌وێن كار وپروژێن جودا جودا ل سنورێ پارێزگه‌هێ بجه دئینن تایبه‌تى پروژێن گرێداى ب ژن وزاروكان و په‌ره‌پێدانا پروژێن ئاڤێ وخواست كو رێكخراوا یونسێف (UNICEF) قه‌بارێ پروژێن خو ل سنورێ پارێزگه‌هێ به‌رفره‌ه بكه‌ت وپشته‌ڤانیا پارێزگه‌هێ نیشان دا بو هه‌ر هه‌ڤكاریه‌كێ .
ئه‌ڤرۆ نیوز:
ل دور چاره‌سه‌ری و سۆتنا به‌رمایكێن نوشداری ل نه‌خۆشخانێن تایبه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ و رێڤه‌به‌رێ ژینگه‌ها دهۆكێ كۆمبونه‌ك دگه‌ل نوونه‌رێن نه‌خۆشخانێن تایبه‌ت گرێدا.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو پشتی دووڤچوون هاتیه كرن وه‌سا دیاره به‌رمایكێن نه‌خۆشخانێن تایبه‌ت ب شێوه‌یه‌كێ زانستی ناهێنه چاره‌سه‌ركرن و سۆتن و گۆت: ئه‌و به‌رمایك پێكهاتینه ژ كه‌رستێن كیمیاوی و بایولوجی كو دناڤ ( ده‌رمانێن ب كارهاتی و ئێكسپایر، ده‌رزیك و كه‌رستێن تاقیگه‌هان و نشته‌رگه‌ریان) دا هه‌نه، پێدڤیه ژێك بهێنه ڤارڤارتن و د زه‌رفێن تایبه‌ت دا بهێنه هه‌لگرتن و نابیت دگه‌ل به‌رمایكێن گشتی بهێنه تێكه‌لكرن، چونكو كارتێكرنه‌كا راسته‌وخو ل سه‌ر ژینگه‌هێ و ساخله‌میا مرۆڤان هه‌یه و بو ڤێ چه‌ندێ پێدڤیه رۆژانه بهێته كۆمكرن و ل سوتنگه‌هان بهێنه سۆتن و ژناڤبرن و بو ڤێ چه‌ندێ دێ هه‌موو ئاسانكاری ژلایێ ساخله‌میێ هێنه كرن.
محه‌مه‌د تاهر بریفكانی، رێڤه‌به‌رێ ژینگه‌ها دهۆكێ ژی دیاركر هه‌ر نه‌خۆشخانه‌كا ب دروستی سه‌ره‌ده‌ریێ دگه‌ل چاره‌سه‌ركرنا به‌رمایكان نه‌كه‌ت و ل دووڤ رێنمایێن ژینگه‌هێ نه‌بیت، هه‌تا هه‌شت ملیون دیناران دێ هێنه سزادان و جارا دوێ مه ماف هه‌یه بگرین و گۆت: بو ڤێ چه‌ندێ دێ رینمایێن تایبه‌ت ب ساخله‌می و ژینگه‌هێ ئاراسته‌ی هه‌موو نه‌خوشخانان كه‌ین و پێدڤیه پێگیری پێ بهێته كرن.
ژێده‌ر: نوش نيوز
ئه‌ڤرۆ نيوز:
ب ده‌نگێن (72) په‌رله‌مانتاران رێواز فايه‌ق ژ فراكسيۆنا ئێكه‌تى نشتيمانى كوردستان بۆ سه‌رۆكا په‌رله‌مانێ كوردستانێ.
د كۆمبوونا ئه‌ڤرۆ يا په‌رله‌مانێ كوردستانێ دا و د بڕگا دويێ دا، هه‌لبژارتن د ناڤبه‌را هه‌ر ئێك ژ د. رێواز فايه‌ق ژ فراكسيۆنا ئێكه‌تى نشتيمانى كوردستان و شادى ره‌سۆل ئه‌نداما فراكسيۆنا نه‌وه‌ى نوێ بۆ پۆستێ سه‌رۆكاتيا په‌رله‌مانێ كوردستانێ ده‌ستپێكر.
هێمن هه‌ورامى جێگرێ سه‌رۆكێ په‌رله‌مانێ كوردستانێ كو ل وى ده‌مى روونشتنا په‌رله‌مانێ كوردستانێ برێڤه دبر، راگه‌هاند كو هه‌لبژارتن بۆ سه‌رۆكا په‌رله‌مانێ كوردستانێ دێ ب نهێنى برێڤه چيت.
پشتى هه‌لبژارتن هاتينه ئه‌نجامدان، ئه‌نجام ب ڤى ره‌نگى بوون:
رێواس فایه‌ق: 72
شادی نه‌وزاد: 16
ده‌نگی سپی و به‌تال: 9
ئه‌ڤرۆ نيوز:
بڕياره ئه‌ڤرۆ رۆژا پێنجشه‌مبى 11ى تيرمه‌ها 2019ێ جڤاتا نوونه‌رێن عيراقێ بۆ دو مه‌ره‌مان كۆم ببيت كو ئێك ژ وان گرێدايى پرسا هه‌لبژارتنێن كه‌ركووكێ يه.
ب گۆره‌ى به‌رنامێ كارێ جڤاتا نوونه‌رێن عيراقێ بڕگا ئێكێ دانوستاندنه ل سه‌ر پرۆژێ راستڤه‌كرنا قانوونا هه‌لبژارتنان ل جڤاتا پارێزگه‌هـ و قه‌زايان ل كه‌ركووك.
بڕگا دويێ يا به‌رنامێ كارێ جڤاتا نوونه‌رێن عيراقێ مێڤانداريكرنا هه‌ر ئێك ژ وه‌زيرێ په‌ترۆلێ، دارايى، نوونه‌رێ سه‌رۆكێ جڤاتا وه‌زيرێن عيراقێ و چاڤدێريا دارايى يه ده‌رباره‌يى بجهئينانا قانوونا بوودجا گشتى يا حوكمه‌تا فيدرال و هنارتنا په‌ترۆلا هه‌رێمێ و راده‌ستكرنا داهاتى بۆ حوكمه‌تا ناڤه‌ندى.
ئەڤرۆ نیوز، رێوار مزیری:
مافپه‌روه‌ر سه‌ركار سبغه‌تۆللا، به‌رپرسێ مولك و زه‌ڤیان ل رێڤه‌به‌ریا گشتیا باژێرڤانیان ل پارێزگه‌ها دهۆكێ بۆ ئەڤرۆ نیوز دیار كر، ل گۆره‌ی پرۆژه‌قانوونا په‌رله‌مانێ كوردستانێ ئه‌وا گرێدای تاپۆكرنا خانیێن زێده‌گاڤی ل هه‌رێما كوردستانێ ئه‌و خانیێن هه‌تا سالا 2018 ب زێده‌گاڤی هاتینه چێكرن دێ هێنه تاپۆكرن.
سه‌ركار سبغه‌توللا ئاشكرا ژی كر، هژماره‌كا خانیێن زێده‌گاڤی كو نێزیكی چوار هزار خانیانه ل گۆره‌ی یاسایه‌كێ به‌ری نوكه هاتینه چاره‌سه‌ركرن، به‌لێ نێزیكی 21 هزار خانیێن زێده‌گاڤی چو یاسا ژێ نه‌گرتینه و هه‌تا نوكه نه‌هاتینه تاپۆكرن و گۆت: ل سالا 2018 یاسایا ژماره 3 ژ په‌رله‌مانێ كوردستانێ ده‌رچوویه و ل گۆره‌ی وێ یاسایێ ب تنێ ئه‌و خانیێن هه‌تا سالا 2018 هاتینه چێكرن دێ هێنه تاپۆكرن و پشتی سالا 2018 یاسایه‌كا نوو ژ په‌رله‌مانێ كوردستانێ ده‌رچوویه و رێگریێ ل چێكرنا خانیێن زێده‌گاڤی دكه‌ت و ناهێلێت خانیێن زێده‌گاڤی بهێنه چێكرن.
نيشاندان