ئه‌ڤرۆ نيوز:
نێچيرڤان بارزانى سه‌رۆكێ هه‌رێما كوردستانێ ل سه‌ر داخوازا فه‌رمى يا سه‌رۆكێ فره‌نسا، دێ سه‌ره‌دانا پاريس كه‌ت و رۆژا چارشه‌مبى 10ى تيرمه‌ها 2019ێ دێ ل كۆچكا ئيليزيێ ل گه‌ل ئيمانوێل ماكرۆن، سه‌رۆكێ فره‌نسا كۆم بيت.
ب گۆره‌ى نڤيسينگه‌ها راگه‌هاندنێ يا سه‌رۆكێ هه‌رێما كوردستانێ، نێچيرڤان بارزانى، سه‌رۆكێ هه‌رێما كوردستانێ و ئيمانوێل ماكرۆن سه‌رۆكێ فره‌نسا په‌يوه‌نديێن فره‌نسا ل گه‌ل هه‌رێما كوردستانێ و عيراقێ و كاودانێن ده‌ڤه‌رێ و چه‌ند بابه‌تێن دى گه‌نگه‌شه كه‌ن.
ئه‌ڤرۆ نيوز، نيوار محه‌مه‌د سه‌ليم:
ده‌سته‌يا سه‌رۆكاتيا په‌رله‌مانێ كوردستانێ، به‌رنامێ كارێ روونشتنا ژماره 13 يا ئاسايى يا رۆژا چارشه‌مبى رێكه‌فتى 10ى تيرمه‌ها 2019ێ راگه‌هاند كو ژ سێ ته‌وه‌رێن سه‌ره‌كى پێك دهێت.
ب گۆره‌ى نڤيساره‌كا فه‌رمى يا مالپه‌رێ په‌رله‌مانێ كوردستانێ ئاشكه‌را كريه كو ب گۆره‌يى حوكمێ بڕگێن (ئێك، دو، سێ) ژ ماددێ 16 يێ برگا (سێ) ژ ماددێ (18) و ماددێن (47، 48، 52، 55، 56، 57)، ژ په‌يره‌وێ ناڤخۆ يێ په‌رله‌مانێ كوردستانێ – عيراق، ده‌سته‌يا سه‌رۆكاتيا په‌رله‌مانێ كوردستانێ بڕيار دايه به‌رنامێ كارێ روونشتنا ژماره (13) يا ئاسايى يا خولا بهارێ يا سالا ئێكێ ژ خولا پێنجێ يا هه‌لبژارتنا په‌رله‌مانى ل ده‌مژمێر (11)ى به‌رى نيڤرۆ رۆژا چارشه‌مبى دێ سێ ته‌وه‌ران ب خوه ڤه گريت.
ب گۆره‌ى به‌رنامێ كارى باوه‌رى دێ ب سه‌رۆكێ جڤاتا وه‌زيران هێته دان ب بڕيارا ژماره (7) يا سالا 2019 يا په‌رله‌مانێ كوردستانێ هاتيه به‌ربژاركرن ب گۆره‌ى بڕيارا ژماره (1) يا سالا 2019ێ سه‌رۆكاتيا هه‌رێما كوردستانێ هاتيه راسپاردن بۆ پێكئينانا كابينا نه‌هێ يا هه‌رێما كوردستانێ.
هه‌رديسان ناڤێن وه‌زيران دێ ژ لايێ راسپارديێ سه‌رۆكێ جڤاتا وه‌زيران ب گۆره‌ى برگا (4) يا ماددێ (56) ژ قانوونا ژماره (1) يا سالا 1992 يا راستڤه‌كرى و باوه‌رى دان ب وان ژ لايێ په‌رله‌مانێ كوردستانێ – عيراق.
پشكه‌كا دى روونشتنا رۆژا چارشه‌مبى دێ يا تايبه‌ت بيت ب سووندخوارنا سه‌رۆك و جێگرێ سه‌رۆكێ جڤاتا وه‌زيران و كابينا وه‌زارى يا نه‌هێ يا هه‌رێما كوردستانێ ب گۆره‌يى ماددێ (6) ژ قانوونا جڤاتا وه‌زيران يا هه‌رێما كوردستانێ ژماره (3) يا سالا 1992ێ يا راستڤه‌كرى.
ب گۆره‌يى به‌رنامێ كارێ په‌رله‌مانى دێ خواندنا هێلێن گشتى يێن به‌رنامێ كابينا وه‌زارى يا نه‌هێ ژى ژ لايێ سه‌رۆكێ جڤاتا وه‌زيرێن هه‌رێما كوردستانێ – عيراق بيت.
ئه‌ڤرۆ نيوز، نيوار محه‌مه‌د سه‌ليم:
په‌رله‌مانێ كوردستانێ د كۆمبوونا ئه‌ڤرۆ دا ب پتريا ده‌نگان و ب ده‌نگێن 80 په‌رله‌مانتاران به‌رامبه‌ر 20 ده‌نگێن نه‌خێر پێشنيازا راستڤه‌كرنا قانوونا جڤاتا پارێزگه‌هان هاته په‌سه‌ندكرن.
په‌رله‌مانێ كوردستانێ ئه‌ڤرۆ كۆمبوو و پشتى خواندنا راپۆرتا لژنا قانوونى ده‌رباره‌ى پێشنيازا راستڤه‌كرنا قانوونا جڤاتێن پارێزگه‌هان ل هه‌رێما كوردستانێ پرۆژه خسته به‌ر ده‌نگدانێ و ب 80 ده‌نگێن په‌رله‌مانتاران په‌سه‌ند كر و هه‌ڤده‌م 20 په‌رله‌مانتاران ژى ئه‌ڤ پرۆژه ره‌تكر.
د ڤى پرۆژێ پێشنيازكرى يێ ئه‌ڤرۆ په‌رله‌مانێ كوردستانێ په‌سه‌ندكرى دا، ژيێ جڤاتێن پارێزگه‌هان هه‌تا ئه‌نجامدانا هه‌لبژارتنان هاته درێژكرن، پارێزگار ژى دێ ژ ده‌رڤه‌ى جڤاتا پارێزگه‌هێ يان د ناڤ دا ب پتريا ده‌نگێن ئه‌ندامێن جڤاتێ هێته هه‌لبژارتن.
د پرۆژێ پێشنيازكرى يێ په‌رله‌مانێ كوردستانێ دا هاتيه؛ ئه‌ڤ خولا جڤاتا پارێزگان ژ پياده‌كرنا تايبه‌تمه‌نديان د ده‌مێ ب دووماهى هاتنا ماوێ وان يێ قانوونى دا هه‌تا هه‌لبژارتنا خوله‌كا نوو يا جڤاتێ دا به‌رده‌وام بن.
ئه‌ڤرۆ نيوز:
كاروان خۆشناو، ئاخفتنكه‌رێ به‌رێ يێ ب ناڤێ رێڤه‌به‌ريا پۆليسێن هه‌ولێر ل ژمارا تايبه‌ت يا خوه يا فه‌يسبۆكى به‌لاڤكريه كو ئه‌ڤرۆ سپێدێ 8ى تيرمه‌ها 2019ێ د رێيا سه‌ره‌كى يا دهۆك – هه‌ولێر ئاگر به‌ربوو ترۆمبێله‌كێ.
راگه‌هانديه ژى كو ترۆمبێل ژ جۆرێ BMW بوويه، روودان ژى ل نێزيك شێخان بوويه كو ژبلى زيانێن ماددى، زيانێن گيانى نه‌بووينه.
ئه‌ڤرۆ نيوز:
لژنا په‌يوه‌نديێن ژ ده‌رڤه ئاشكه‌را كر كو غي 70 پۆستێن بالوێزێن به‌تال ماينه و به‌رپرساتيا ڤێ چه‌ندێ ژى خسته ستوويێ لايه‌نێن سياسى.
عامر فائيز، د داخۆيانيه‌كێ دا بۆ رۆژناما سه‌باح يا نێزيكى حوكمه‌تا عيراقێ گۆت: “لژنه چاڤه‌رێ ناڤێن بالوێزێن به‌ربژاره ژ لايێ لايه‌نێن سياسى ڤه”، گۆتژى: “50% ژ ڤێ رێژێ دێ ژ لايێ لايه‌نێن سياسى ڤه هێنه هه‌لبژارتن و يا دژى وه‌زاره‌ت دێ هه‌لبژێريت”.
ئاشكه‌را ژى كر كو نها عيراق پێدڤى ب 70 بالوێزايه و ئه‌گه‌رێ گيرۆبوونێ ژى د ستوويێ لايه‌نێن سياسى دايه.
ئه‌ندامێ لژنا په‌يوه‌نديێن ژ ده‌رڤه نه‌ڤه‌شارت ژى كو دامه‌زراندن دێ ب گۆره‌يى هنده‌ك پيڤه‌ران بن كو وه‌زاره‌تێ ديار كرينه و گۆت: “د ماوێ وه‌رزێ ئێكێ يێ كارێ په‌رله‌مانى ژ سالا ئێكێ دڤێت ئه‌ڤ ناڤه بهێنه دياركرن”.
ئه‌ڤرۆ نيوز:
سپێده‌هيا ئه‌ڤرۆ بيڤه‌له‌رزه‌كێ باشوور و باشوورێ ناڤه‌راستا عيراقێ هه‌ژاندن كو ب گۆره‌ى پێزانينان ژێده‌رێ سه‌ره‌كى يێ وێ بيڤه‌له‌رزێ ژى ئيران بوو.
ب گۆره‌ى ژێده‌رێن ده‌نگوباسان ئه‌و بيڤه‌له‌رز ب 5.7 پله بوويه ل دووڤ پيڤه‌رێ ريخته‌ر و وه‌لاتيێن به‌سرا و ميسان ژى هه‌ست پێ كريه، ژ لايه‌كێ دى ڤه ژێده‌رێن ده‌نگوباسان ل كوێت ژى راگه‌هانديه كو وه‌لاتيێن وان ل وێرێ ژى هه‌ست ب ڤێ بيڤه‌له‌رزێ كريه.
هه‌ر ب گۆره‌يى وان ژێده‌رێن ده‌نگوباسان يێن ئه‌ڤرۆ نيوز پشت به‌ستن ل سه‌ر كرى، ژێده‌رێ سه‌ره‌كى يێ ڤێ بيڤه‌له‌رزێ ئه‌هوازێن وه‌لاتێ ئيرانێ بووينه، د ده‌مه‌كى دا هێشتا چو زيانێن فه‌رمى نه‌هاتينه راگه‌هاندن.
ئه‌ڤرۆ نيوز:
په‌رله‌مانێ كوردستانێ بۆ دانوستاندن ل سه‌ر راستڤه‌كرنا قانوونا جڤاتێن پارێزگه‌ها كۆم بيت و ل بڕياره ل گه‌ل باوه‌رى دان ب حوكمه‌تا نوو، ده‌سته‌يا سه‌رۆكاتيا په‌رله‌مانى ژى ب گوهۆڕيت.
ماوێ ساله‌كێ يه، ماوێ قانوونى يێ جڤاتێن پارێزگه‌هان ب سه‌رڤه چوويه، كه‌فتينه ناڤ بۆشايى يا قانوونى، بۆ ڤێ مه‌ره‌مێ ژى ئه‌ڤرۆ په‌رله‌مانێ كوردستانێ دێ كۆم بيت و چه‌ند ماددێن پێدڤى ب قانوونا جڤاتا پارێزگه‌هان راست ڤه كه‌ت.
ب گۆره‌يى پێزانينان، پێشنياز هاتيه كرن قانوونا نوو مافى بده‌ته كه‌سێن ده‌رڤه‌يى جڤاتا پارێ.گه‌هان، خوه بۆ پۆستێ پارێزگارى هه‌لبژێرن.
هه‌روه‌سا بڕياره ل ده‌مێ دووماهيا حه‌فتيا باوه‌ريێ ب كابينا نه‌هێ يا حوكمه‌تا هه‌رێما كوردستانێ بده‌ن. ل گه‌ل وێ چه‌ندێ ژى فراكسيۆنا ئێكه‌تيێ ل په‌رله‌مانى دێ داخوازێ كه‌ت، به‌رى باوه‌رى دان ب كابينا نوو، رێواز فايه‌ق وه‌كو سه‌رۆكا نوو يا په‌رله‌مانى بهێته هه‌لبژارتن.
هه‌ڤده‌م ژ ئه‌گه‌رێ وه‌رگرتنا چه‌ند پۆستێن وه‌زارى، هه‌ر ئێك ژ د. ڤالا فه‌ريد ژ فراكسيۆنا پارتى، بێگه‌رد ته‌له‌بانى ژ فراكسيۆنا ئێكه‌تى، عه‌بدولا حاجى مه‌حمود ژ فراكسيۆنا سوسياليست و ئايدن مه‌عروف ژ به‌ره‌يى توركمانى دێ ده‌ست ژ كارێ په‌رله‌مانتاريێ به‌رده‌ن.
بڕياره ئه‌ڤرۆ فراكسيۆنا پارتى ديموكراتى كوردستان ناڤێن به‌ربژارێن خوه بۆ كابينا نوو يا حوكمه‌تا داهاتى ئاشكه‌را بكه‌ت.
ئه‌ڤرۆ نيوز:
د كابينا نوو يا حوكمه‌تا هه‌رێما كوردستانێ دا ب سه‌رۆكايه‌تيا مه‌سرور بارزانى، كوردێن ئێزدى دێ چار پۆستان وه‌رگرن.
پۆستێن ئێزدى ل كابينا نوو يا حوكمه‌تێ دێ وه‌رگرن، ل دووڤ كوردستان 24 پێك دهێن ژ:
- شيره‌تكارێ سه‌رۆك وه‌زيران بۆ كاروبارێن ئێزديان كو شێخ شامۆ به‌ربژاره بۆ وى پۆستى.
- شيره‌تكارێ په‌رله‌مانێ كوردستانێ بۆ كاروبارێن ئێزديان كو مه‌حما خه‌ليل به‌ربژاره بۆ وى پۆستى.
- بريكارێ وه‌زيرى.
- رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقافێ.
ئه‌ڤرۆ نيوز،عەلی حاجی :
ژ ئەگرێ روودانەکا ئاگر بەر بونێ ب ب پێش و پەلەخی ل چیایێ بێخیری ل دەڤەرا شیناڤا زاخۆ ؍ سێ روژایە ئاگر ب وی چیایی ڤە و پرانیا ئاگری هاتیە کونترول کرن.
خالد سەعید ؍ رێڤەبەرێ بەرەڤانیا باژێری ل زاخۆ بۆ ئەڤرۆ نیوز گۆت” ده‌مێ سێ روژایە ئاگر ب پێش و پەلەخی کەڤتیە و ل درەنگیا شەڤا بوری ئاگرەکێ مەزن ب وى چیایی کەڤت ؍ ترومبێلێن ٤ بنگەهێن مە و ۲ تیمێن گەرۆك و بۆلیسێن پاراستنا ژینگەهێ ؍ ژلایێ گوندێ قادیا ڤە و دەڤەرا شیناڤا ڤە دەست ب کونترولکرنا وی ئاگری کرن و هەتا دەمژمێر سێ سپێدێ شیان رێژەیەکا مه‌زن یا وی ئاگری کونترول بکەن ؍ هندەک جهـ ماینە هەتا نوکە ئاگرێ وێ نەهاتیە ڤەمراندن ژبەر کو ئەو جهە ب زەحمەتن و ترومبێلن نەشێن بچنە وی جهی و هەتا فروکە ژی نەشێن بچنە وان جهان ؍ بەلێ تیمێن مه ناهێلن ئەو ئاگرە زێدە بیت و بەرەڤ گوندان ڤە بچیت و هەر زوو دهێتە کونترول کرن”.
گوت ژی” فروکێن ئاگر ڤەمراندنێ ل پارێزگەها دهۆكێ ژ وان فروکانە نەشێن رێژەیەکا ئاڤێ یا زور ب هەلگرن، لەورا ب زەحمەتە ئەو ژی بشێن جهێن ماین یێ ئاگری ل چیایی بگەهنێ ؍ وی ئاگری زیانەکا مەزن بەر ژینگەهێ ڤە ئێخست و رێژەیەکا زور یا داران ل وی چیایی هاتنە سوتنێ”.
روودانێن سوتنا پێش و پەلەخی بەرەڤ زێدەبونێ ڤە چووینە و ل سنورێ رێڤەبەریا مە هەتا نوکە نێزیکی ۳۰۰ روودانێن ئاگر بەربونێ ب پێش و پەلەخی روویداینە و ئەڤە رێژەیەکا بلندە هەتا نوکە هاتیە تومارکرن.
نيشاندان