ئەڤرۆ نیوز، عەلی حاجی:
ب ھەلکەفتا 43 سالیا شەھیدکرنا رێبەر مەلا حسێن کو ل 23/4/1976 ژ لایێ رژێما بەعسڤە ھاتبوو شەھیدکرن، لقێ ھەشت یێ پارتی ل زاخۆ رێورەسمەکێ رێزگرتنێ ل بنەمالا شەھیدێ ناڤبری بەرھەڤ کر.
شڤان شێخو، بەرپرسێ پشکا جەماوەری ل لقێ ھەشتێ پارتی دیموکراتی کوردستان بۆ ئەڤرۆ نیوز دیار کر، شەھید (رێبەر مەلا حسێن) شانەکا نھێنی د ناڤ سەنتەرێ باژێرێ زاخۆ دا ھەبوو و د ھەمان دەم دا پێشمەرگێ شۆڕەشا گولانێ ژی بوو و گۆت: “ژ بەر وێ خەباتا شەھیدێ ناڤبری کری، مە وەکو لقێ ھەشت ب فەر زانی ب ھەلکەفتا شەھیدکرنا وی رێورەسمەکێ رزگرتنێ ل بنەمالا وی ساز بکەین و خێزانا شەھیدی خەلات بکەین، دیسا ھەر د رێورەسمێ دا پرتووکەکا تایبەت ب خەباتا شەھیدێ ناڤبری و ب پشتەڤانیا لقێ ھەشت ھاتیە چاپکرن؛ ھاتە بەلاڤکرن و تێدا بەحس ل چەندین قووناغێن ژیانا وی و خەباتا وی یا نەتەوی ھاتیە کرن، ئەم پشتەڤانیێ ل وێ چەندێ ژی دکەین پەیکەرەک بۆ شەھید رێبەر مەلا حسێن و شەھید کوردستان سالحی ل باژێرێ زاخۆ بھێتە دانان”.
ئەحمەد سەعید، بەرپرسێ لقێ زاخۆ یێ ئێکەتیا قوتابیێن کوردستانێ بۆ ئەڤرۆ نیوز گۆت: “ئەم شەھید رێبەر مەلا حسێن ب شەھیدێ ئێکەتیا قوتابیێن کوردستانێ و سمبۆلا وێ دزانین، ژ بەرکو د بیاڤێ قوتابیان دا خزمەتەکا بەرچاڤ ھەبوویە، مە پێشنیار کری یە د ناڤ زانکۆیا زاخۆ دا پەیکەرەک بۆ شەھیدان (رێبەر مەلا حسێن) و (کوردستان سالحی) ب شێوەکێ جوان و رێکوپێک بھێتە دانان، د نوکە دا مە پێدڤی ب رازیبوونا زانکۆیا زاخۆ ھەیە ھەتا بشێین کارەکێ ب ڤی رەنگی ئەنجام بدەین”.
ئەڤرۆ نیوز:
وەزارەتا ئاڤەدانکرن و ئاکنجیکرنێ یا حوکمەتا ھەرێما کوردستانێ دیار کر، ئەو دێ گوھۆڕینان د دروستکرنا رێیێن ھەرێما کوردستانێ دا کەن و بریکارێ وەزارەتێ ژی بۆ کارێن رێیان دبێژیت: ئێدێ رێیێن ھەرێما کوردستانێ دێ ب تەکنولۆژیەکا نوو و بکارئینانا پۆلیمەری ھێنە دروستکرن.
سدقی ئامێدی، بریکارێ وەزارەتا ئاڤەدانکرن و ئاکنجیکرنێ بۆ کارێن رێیان خویا کر، پشتی چەندین کۆمبوونان، بڕیار ھاتیەدان ھەموو ئەو رێیێن ل سەرانسەری ھەرێما کوردستانێ تێکچووین، بھێنە نووژەنکرن و چەند رێیێن نوو ژی بھێنە دروستکرن، ژ وان ژی رێیا ھەولێر بۆ دھۆک و ھەولێر بۆ کۆیە و چەند رێیێن دی کو حوکمەتا ھەرێما کوردستانێ پارە یێ بوو تەرخانکری و بڕیارە ژی پتریا رێیان د ئەڤ سالە دا بھێنە نووژەنکرن.
سقی ئامێدی بۆ مالپەرێ فەرمی یێ پارتی دیموکراتی کوردستان گۆت: “ئەو رێیێن ژ نوکە و پێڤە دھێنە دروستکرن؛ ب تەکنولۆژیەکا نوو دێ ھێنە دروستکرن و پۆلیمەر تێدا دێ ھێتە بکارئینان، ئەڤە ژی دێ بیتە ئەگەر کو ئێدی رێ بۆ دەمێ چەندین سالان تێک نەچن، نوکە ژی رێیا باتێل بۆ زاخۆ و رێیا کۆیە ژی پۆلیمەر تێدا بکار دھێت”.
ئەڤرۆنیوز، عەلی حاجی:
دو وەلاتیێن گوندێ بێرمانێ ل باکوورێ کوردستانێ د خابیری دا خەندقین و ھەتا نوکە لاشێ وان نەھاتیە دیتن، لەو وەلاتیێن گوندێ ناڤبری داخواز ژ خەلکێ باتیفا کریە ھەردەما لاشێ وان ھەردو کەسان دیت؛ ئاگەھدار بکەن.
محەمەد موراد ئاکنجیێ ناحیا باتیفا بۆ ئەڤرۆ نیوز دیار کر، گوندێ بێرمانێ نێزیکی سنوورێ گوندێ مە یە و بەری سێ رۆژان گەنجەکێ ژیێ وی د ناڤبەرا 30 ھەتا 35 سالیێ و زارۆیەکا 12 سالی د ئاڤا خابیری دا ل سنوورێ وەلاتێ تورکیا خەندقینە و لاشێ وان نەھاتیە دیتن، ژ بەرکو ئاڤ یا بۆشە، لەو رەنگە لاشێ وان ھات بیتە د سنوورێ کوردستانێ دا و گۆت: “ژ بەر ڤێ چەندێ گوندیێن گوندێ بێرمانێ داخواز ژ مە کری یە ھەردەما لاشێ وان ھەردو کەسا ھاتە دیتن؛ وان ئاگەھدار بکەین، داکو لاشێ وان بۆ گوندی َوان بھێتە ڤەگوھاستن”.
گۆتژی: “مە پۆلیس و جھێن پەیوەندیدار و خەلکێ دەڤەرێ ل سەر ڤێ روودانێ ئاگەھدار کرینە و دێ دھاریکار بین بۆ لێگەڕیانا تەرمێ وان ھەردو کەسان ھەتا کو دبینین”.
ئەڤرۆ نیوز:
سەرۆک وەزیرێن راسپاردی یێ ھەرێما کوردستانێ راگەھاند ھەو ھەست ل دەف ھەموو لایەنێن سیاسی ھەیە یێن ئەڤرۆ دگەل دا کومبووین پێخەمەت پێکئینانا کابینەیا نوو یا حوکمەتێ بەری دەمێ وێ یێ قانوونی، و سوپاسیا تەڤگەرا گۆران ژی کر.
بەری دەمەکێ کێم ئەڤرۆ رۆژا دوشەمبی ١٧-٦-٢٠١٩ پشتی بدووماھی ھاتنا کومبوونا مەسرور بارزانی راسپاردیێ پێکئینانا کابینەیا نوو یا حوکمەتا ھەرێمێ دگەلا تەڤگەرا گۆران د کونگرەکێ رۆژنامەڤانی دا دیارکر سوپاسیا ھەلویستێ تەڤگەرا گۆران دکەین د ڤی ماوێ بوری دا پێکڤە بووین و ھیڤیا مە ئەوە بەری دەسپێکرنا دەمێ بھێنڤەدانا پەرلەمانێ کوردستانێ ئەو پێکھاتەیا کابینەیا نوو پێشکێشی وان بکەت داکو رازەمەندیێ ل سەر بکەن.
ناڤھاتی ئەو چەندە ژی دیارکر ئەو ل وێ باوەرێ یە ھەڤالێن گۆران دێ سیڤیێن وەزیرێن خوە بزووترین دەم پێشکێشی حوکمەتێ کەن، دەربارەی ھەلویستێ لایەنێن سیاسی ژی گۆت: ئەو گەلەک خوشحالە پشتی ئەڤ دیدارە دگەل لایەنێن سیاسی ئەنجامداین و ھەموویان ب بەرپرسیارانە بەرامبەر زوو پێکئینانا کابینەیا نوو یا حوکمەتێ ھەستێ خوە دەربریە.
ئەفرۆ نیوز:
ئه‌ڤرو سپێدێ 17/6/2019 فه‌رهاد ئه‌مین ئه‌تروشى پارێزگه‌رێ دهوكێ پێشوازیا شانده‌كێ لیژنا بلند یا ئاكنجیبونێ ل عیراقێ ب سه‌روكاتیا لیوا(عبدالكریم الشاوى) كر.
دهه‌ڤدیتنه‌كێ دا ب ئاماده‌بونا بهزاد على ئاده‌م جێگرێ پارێزگه‌رێ دهوكێ وهاریكارا رێڤه‌به‌رێ رێكخراوا UNHCRل به‌غدا به‌حسێ ره‌وشا په‌نابه‌ران ل سنورێ پارێزگه‌ها دهوكێ وئه‌و كار وخزمه‌تا بو دهێته پێشكێشكرن دوارێ مروڤایه‌تى دا هاته كرن.
دته‌وه‌ره‌كێ دن دا به‌حسێ چاوانیا ب رێڤه‌چونا پروسا پێدانا كارتا چه‌سپاندنا مافێن كه‌سایه‌تى یێن په‌نابه‌ران ژلایێ لیژنا ناڤبرى ل عیراقێ وكوردستانێ ب گشتى ول سنورێ پارێزگه‌ها دهوكێ ب تایبه‌تى هاته كرن.
سه‌روكێ لیژنا ناڤبرى سوپاسیا پارێزگه‌رێ دهوكێ وهه‌موو سازیێن میرى یێن په‌یوه‌ندیدار ل سنورێ پارێزگه‌هێ كر كو گه‌له‌ك دهه‌ڤكار وهاریكاربوینه دگه‌ل تیمێن لیژنا بلند یا ئاكنجیبونێ ل ده‌ڤه‌رێ وخواست ئه‌و هه‌ڤكارى و هاریكارى دگه‌ل تیمێن وان یا به‌رده‌وامبیت هه‌تا كار وئه‌ركێن لیژنێ ب دوماهى دهێن.
ژلایێ خوڤه پارێزگه‌رێ دهوكێ خوشحالیا خو ب سه‌ره‌دانا شاندێ ناڤبرى دیاركر وده‌ست خوشى ل تیمێن كارى كر وته‌كه‌زكر كو هه‌موو ئاسانكارى ژلایێ فه‌رمانگه‌هێن پارێزگه‌هێ دگه‌ل تیمێن لیژنا بلند یا ئاكنجیبونێ دێ هێنه كرن هه‌تاپروسا ناڤبرى ب دوماهى دهێت.
ئەڤرۆ نیوز، نەوزاد ھلوری:
دەمەکێ کێم بەری نوکە کچەکا دێرەلووکێ ژ ئەگەرەکێ نەدیار خوە ھاڤیتە د رووبارێ زێ دا،ھەتا نوکە چارەنڤیسێ وێ نەدیارە.
کەس و کارەکێ وێ کچێ، بو ئەڤرۆ نیوز گوت: (دەمەکێ کێم بەری نوکە کچەکا مە بناڤێ ھنداڤ فەرھاد دژیێ ١٦ سالیێ دا، خوە ھاڤێتە دناڤا رووبارێ زێ دا، خەندقی).
زێدەتر گۆت: (ھەتا نوکە چارەنڤیسێ وێ نەدیارە، پیچەکێ ژ روویێ دروونی نەیا دروستە).
میلازم ئێحسان سەنعان، بەرپرسێ بەرەڤانیا باژێری ل دێرەلوک بو ئەڤرو نیوز گوت: (ب گورەی پێزانێن کەسوکارێن کچێ، کچەکا وان ل مال دەرکەڤتیە و قەستا رووباری کریە و پاشان خوە ھاڤێتیە ئاڤێ دا، نوکە تیمێن مە گەھشتینە جھێ روودانێ و مژولێ لێگەریانێ نە).
ئه‌ڤرۆ نيوز:
مه‌سرور بارزانى، سه‌رۆك وه‌زيرێن هه‌رێما كوردستانێ ئه‌ڤرۆ رۆژا دوشه‌مبى 17ى خزيرانا 2019ێ دێ سه‌ره‌دانا سلێمانيێ كه‌ت و ل گه‌ل وان لايه‌نان كۆم ببيت يێن كو دێ پشكدارى حوكمه‌تێ بن.
بڕياره ئه‌ڤرۆ ل ده‌مژمێر 11:00ى به‌رى نيڤرۆ سه‌رۆك وه‌زيرێن راسپاردى يێ كابينا نوو يا حوكمه‌تا هه‌رێما كوردستانێ ل باره‌گايێ مه‌كته‌با سياسى يا ئێكه‌تى نشتيمانى كوردستان ل گه‌ل وێ حزبێ كۆم بيت.
ئێكه‌تيێ ب مه‌ره‌ما روونشتن ل گه‌ل مه‌سرۆر بارزانى، شانده‌كێ دانوستاندكار ب سه‌رۆكاتيا عيماد ئه‌حمه‌د، ئه‌ندامێ مه‌كته‌با سياسى يا حزبا خوه پێكئينايه، هه‌ر ئێك ژ قادر حه‌مه‌جان، عه‌دنانێ حه‌مه يێ مينا، ده‌رباز و شالاو كوسره‌ت ره‌سۆل ئه‌ندامێن شاندى نه.
بڕياره هه‌ر ئه‌ڤرۆ ل ده‌مژمێر 03:00ى پشتى نيڤرۆ سه‌رۆك وه‌زيرێ راسپاردى، ل گه‌ل بزاڤا گۆڕأن ل مه‌كۆيا سه‌ره‌كى يا بزاڤا گۆڕان ل سلێمانيێ كۆم ببيت و ژماره‌ك ژ ئه‌ندامێن خانا راپه‌راندنێ دێ پشكدارى كۆمبوونێ بن.
هه‌ر ئێك ژ دلشاد شه‌هاب، ئۆمێد خۆشناو، هێمن هه‌ورامى و فه‌رسه‌ت سۆفى هه‌ڤالينيا شاندێ مه‌سرور بارزانى راسپارديێ پێكئينانا كابينا نوو يا حوكمه‌تا هه‌رێما كوردستانێ كه‌ن.
دوهى رۆژا ئێكشه‌مبى 16ى خزيرانێ، مه‌سرور بارزانى، سه‌رۆك وه‌زيرێ راسپاردى راگه‌هاند كو پێدڤيه لايه‌نێن سياسى سى ڤى يێن به‌ربژارێن خوه بۆ پۆستان ئاماده بكه‌ن دا كو ب كێمترين ده‌م پێكئينانا كابينا نوو بده‌نه ده‌ست په‌رله‌مانى.
ئەڤرۆ نیوز، نەوزاد ھلوری:
ھەمبەری وان شاشیێن د ئەزموونێن ویزاری دا ل گەل قوتابیێن رێزا ١٢ێ ئامادەیی ھاتینەکرن، بریارە چەند رۆژێن بھێت خوەنیشاندانەکا سەرانسەری ل کوردستانێ ژلایێ قوتابیێن نەرازی بھێتە ئەنجامدان، ئەڤ راگەھاندنا قوتابیان ددەمەکێ دایە کو دوھی د کونکرەکێ روژنامەفانی دا شاشیێن پەروەردێ د ئەزموونان دا ئێکلاکرینە.
ب گورەی راگەھاندنەکێ کو ژلایێ دەستەیا قوتابیێن نەرازی یێن رێزا ١٢ێ ئامادەی ھاتیە بەلاڤکرن و دانەیەک دەست ئەڤرۆ نیوز کەفتیە، تێدا دبێژیت: (شەڤا بوری ئاخفتنکەرێ وەزارەتا پەروەردێ یا حوکمەتا ھەرێما کوردستانێ د کونگرەیەکێ رۆژنامەڤانی دا راگەھاند کو پشتی پێکئینانا لژنەکێ لسەر دوڤچون بۆ شاشیێن د ئەزموونان دا ھاتیەکرن، وان دیارکر کو چوار نمرە دێ بو بابەتێ کوردی و چوار نمرە ژی لسەر بوچونێن جودا بو وانەیا بیرکاری، دیسان چوار نمرە ژی بۆ وانەیا عەرەبی بۆ قوتابیان ھێنەدان، دیسان ئەو ھەرسێ پرسیارێن دوو بەرسڤێن دروست ژی ھاتینە دیارکرن کو قوتابیان کیش ژ وان ھەلبژارتبیت دێ بۆ ب دروست ھێتە ھژمارتن).
د راگەھاندنا وان دا زێدەتر ھاتیە، (ئەم وەکو دەستەیا نەرازی یا قوتابیان دژی بریارا وەزارەتا پەروەردێ نە و یا سەیرە زێدەباری ھەبوونا ھەموو ئەڤان شاشیان، چەوا ئاماژێ ب سەرکەفتنا پروسێ ددەن، ژبەرڤێ ئەم وەکو دەستەیا قوتابیێن نەرازی، رادگەھینین کو ب ئیمزا ٣٠ ماموستا و ب بەلگە ١٠ پرسیارێن شاش دوانەیا عەرەبی دا، د وانەیا کوردی دا قوتابی ژ ھەژی شەش دەرەجێن زێدەترە، ب بەلگە پتری ٣٥ پەرێن بەلگەیان لایێ مە ھەنە، ھەروەسا د وانەیا بیرکاریێ دا ب گورەی ئاخفتنێن ئاحفتنکەرێ وەزارەتا پەروەردێ ٤٥ پرسیار پێدڤی ب کاغەزا موسوەدە نەبویە، مەگرتی پرسیاڕەک بو جھێن بەتال مایە، دڤێت چوار پرسیار ژی وەکو قەرەبو، بۆ قوتابیان بھێنەدان کو دبنە ھەشت نمرە، ژبەرڤێ ئەم دبینین کو دووبارە غەدر ل قوتابیان ھاتەکرن، ل شونا چارەسەرکرنا کێشا قوتابیان، زێدەتر دەروونێ قوتابیان ھەرفاندیە، ئەم رژدێن ھەتاکو نمرێن تمام بو قوتابیان دھێنەدان و دێ بەردەوام بین لسەر داخوازیێن خوە).
د درێژاھیا راگەھاندنا دەستەیا قوتابیێن نەرازی دا ھاتیە ژی، کو (لژێر دروشمێ ماف ناھێتەدان، بەلکو دھێتە لێوەرگرتن، قوتابی نابیت ببنە نێچیرا زانکۆیێن ئەھلی، لرۆژا ٢٠-٦-٢٠١٩ دێ ل بەردەرگەھێ دیوانا وەزاڕەت و پەروەردێن باژێر و باژێرکێن کوردستانێ خوەنیشاندان ب رێڤەچیت).
نيشاندان