ئه‌ڤرۆ نيوز:

رێڤه‌به‌ريا پۆليسێن پارێزگه‌ها سلێمانيێ د راگه‌هاندنه‌كێ دا ئاشكه‌را كر كو به‌رى نيڤرۆيا ئه‌ڤرۆ 21ى گۆلانا 2019ێ ل باخچێ گشتى يێ باژێرێ سلێمانيێ گه‌نجه‌كى ته‌قه‌ ل كه‌سه‌كى كر و بريندار كر.

ئاشكه‌را ژى كر كو ئه‌و كه‌سێ ته‌قه‌ كرى هاته‌ ده‌سته‌سه‌ركرن ژ لايێ مه‌فره‌زێن پشكا پۆليسێن هاوارهاتنێ و ب ناڤێ “ر، س، ع” ژ دايكبوويێ 2000ێ يه‌، ل بنگه‌هێ پۆليسێن سه‌راوه‌ په‌رێن ڤه‌كۆلينێ بۆ هاتينه‌ ڤه‌كرن و ڤه‌كۆلينێ ده‌ست پێ كريه‌.

ئاماژه‌ و وێ چه‌ندێ ژى كريه‌ كو ئه‌و كه‌سێ هاتيه‌ برينداركرن ژى بۆ نه‌خۆشخانا هاواهاتنێ هاتيه‌ ره‌وانه‌كرن ب مه‌ره‌ما وه‌رگرتنا چاره‌سه‌ريێ.

ئه‌ڤرۆ نيوز:

پشتى په‌سه‌ندكرنا به‌ربژارێن سه‌رۆكاتيا هه‌رێما كوردستانێ ژ لايێ دادگه‌ها تێهه‌لچوونێ يا هه‌رێما كوردستانێ، بڕياره‌ ل ده‌ستپێكا حه‌فتيا بهێت پرۆسا ده‌نگدانێ بۆ هه‌لبژارتنا سه‌رۆكێ هه‌رێما كوردستانێ ب رێڤه‌ بچيت.

په‌رله‌مانێ كوردستانێ ل رۆژا چارشه‌مبى 8ى گۆلانا 2019ێ د روونشتنا خوه‌ يا ئاسايى يا ژماره‌ “5” يا وه‌رزێ ئێكێ يا سالا ئێكێ دا، قانوونا كاراكرنا ده‌زگه‌هێ سه‌رۆكاتيا هه‌رێما كوردستانێ په‌سه‌ند كر و پاشان ژى به‌ربژاران ناڤێن خوه‌ پێشكێش كرن و دادگه‌ها تێهه‌لچوونێ ژى پێنج به‌ربژار په‌سه‌ندكرن و يێن په‌سه‌ند ژى نه‌كرين هه‌تا نها كو ئه‌ڤرۆ دووماهى ژڤانه‌ ژى چو تان يان سكالا تۆمار نه‌كرينه‌.

ئۆمێد خۆشناو سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ د داخۆيانيه‌كێ دا راگه‌هاند كو دهێته‌ چاڤه‌رێكرن ل ده‌ستپێكا حه‌فتيا بهێت رۆژا ئێكشه‌مبى يان ژى دوشه‌مبى كۆمبوونا په‌رله‌مانێ كوردستانێ بهێته‌ كرن و سه‌رۆكێ هه‌رێما كوردستانێ بهێته‌ هه‌لبژارتن.

نێچيرڤان بارزانى، جێگرێ سه‌رۆكێ پارتى ديموكراتى كوردستان و سه‌رۆك وه‌زيرێ نها يێ هه‌رێما كوردستانێ به‌ربژێرێ پارتى ديموكراتى كوردستانه‌ بۆ پۆستێ سه‌رۆكاتيا هه‌رێمێ و ئێكه‌تى نشتيمانى كوردستان و گۆڕان و سوشالست ژى پشته‌ڤانيا وى دكه‌ن.

ئه‌ڤرۆ نيوز:

لقێ 3 يێ پارتى ديموكراتى كوردستان ل كه‌ركووكێ د به‌ياننامه‌كێ دا به‌رسڤا مه‌لبه‌ندێ 2 يێ ئێكه‌تيێ دده‌ت ل دۆر هه‌ڤكارى وهه‌ماهه‌نگيێ د ناڤبه‌را مه‌لبه‌ندێ ئێكه‌تيێ وراكان سه‌عيد پارێزگارێ سه‌پاندێ ل سه‌ر كه‌ركووكێ.

لقێ 3 يێ پارتى ب توندى ره‌خنه‌ ل هه‌لويستێ لايه‌نگرێن مه‌لبه‌ندێ ئێكه‌تيێ ژ راكان سه‌عيد گرت ودبێژيت هه‌وه‌ ئيمزايێن سه‌خته‌ ب ناڤێ ليستا برايه‌تى كرن بۆ وێ چه‌ندێ دانپێدانێ ب راكان سه‌عيد بكه‌ن، به‌لێ نوكه‌ هوون دبێژن كو هه‌وه‌ په‌يوه‌ندى پێڤه‌ نينه‌.

دياركر ژى” هه‌موو كورد دزانن هوون خيانه‌تكارێن 16 ئوكتوبه‌رێ بزاڤێ دكه‌ن د راگه‌هاندنێ دا خه‌لكى د سه‌ردا ببه‌ن، د ده‌مه‌كى دا ل رۆژا 16 ڤێ هه‌يڤێ د بن را ل گه‌ل راكان سه‌عيد رێككه‌فتن تاكو هه‌لبژارتنێن داهاتى د پۆستێ پارێزگاريێ دا بمينيت”.

به‌رسڤا  لقێ 3 يێ پارتى ل كه‌ركووكێ بۆ ئێكه‌تيێ دبێژيت ژى ” د رێككه‌فتنا 16 ڤێ هه‌يڤێ دا، هه‌وه‌ پۆستێ جێگرێ پارێزگارێ كه‌ركووكێ بۆ وارێ خزمه‌تگوزارى وه‌رگرتيه‌، دووباره‌ پرسيار دكه‌ين هه‌كه‌ ئه‌ڤه‌ په‌يوه‌نديا راسته‌وخوه‌ ل گه‌ل پارێزگارێ سه‌پاندى نه‌بيت، پا چيه‌؟”.

مه‌لبه‌ندێ ئێكه‌تيێ ل كه‌ركووكێ د به‌ياننامه‌كێ دا ره‌ت كربوو په‌يوه‌ندى ل گه‌ل راكان سه‌عيد پارێزگارێ سه‌پانديێ كه‌ركووكێ هه‌بيت، د ده‌مه‌كى دا پێشتر راكان سه‌عيد بۆ ده‌زگه‌هێن راگه‌هاندنێ گۆتبوو، ل گه‌ل ئێكه‌تى رێككه‌فتنينه‌ و ب هه‌ڤپشكى كار دكه‌ن.