ئه‌ڤرۆ نیوز، نه‌وزاد هلۆرى:
شه‌ربه‌تا مێویژا ئێكه ژ شه‌ربه‌تێن هه‌رى خوش كو پرانیا خه‌لكى د هه‌یڤا ره‌مه‌زانێ دا بكاردئینن، وه‌لاتیه‌كێ شێلادزێ بناڤێ (مه‌ناف ئه‌حمه‌د) ئه‌ڤه 20 ساله چه‌ندین جورێن شه‌ربه‌تێ چێدكه‌ت ب تایبه‌تى شه‌ربه‌تا مێویژا، به‌حس ل چاوانیا چێكرنا شه‌ربه‌تا مێویژا ب ره‌نگه‌كێ سرۆشتى و خوش دكه‌ت.
ئه‌ڤرۆ نيوز:
گوڤاره‌كا ئه‌مريكى پێشبينيا زڤرينا داعشێ دكه‌ت وبه‌لاڤكر كو داعشێ جاره‌كادى دێ بيته گه‌ف ل سه‌ر عيراقێ.
گوڤارا Foreign Policy يا ئه‌مريكى به‌لاڤكر” رێكخراوا داعش يا تيرۆريتى جاره‌كادى زڤريه‌ڤه ونوكه گه‌فان ل سه‌ر عيراقێ دروست دكه‌ت، ئه‌ڤه ژى د ده‌مه‌كى دايه هێزێن ئه‌منى بزاڤا ژ ناڤبرنا وێ دكه‌ن”.
به‌لاڤكر ژى” داعشێ يا ده‌ست ب زڤرينێ بۆ عيراقێ كرى، يان ژى يا بزاڤا زڤرينێ دكه‌ت” ديسا دياركر” پشتى كه‌فتنا باژێركێ باغۆز كو دووماهى بنگه‌هێ داعشێ بوو ل سووريێ ل هه‌يڤا ئادارا بۆرى، گۆمانا وێ چه‌ندێ يا هه‌ى كو ب كێمى هزار چه‌كدارێن داعشێ بۆ ناڤ ئاخا عيراقێ زڤرى بن”.
ئاماژه كر ژى كو گه‌له‌ك چه‌كدارێن داعشێ د وان تۆنێلان دا دژين كو وان ب خوه كولا بوون وخوارن وجلك تێدا كرمكربوو.
ئەڤرۆ نیوز ، زنار تۆڤی:
عەبدولسەلام بەرواری چاڤدێرەكێ سیاسی یە، د دیدارەكێ دا بۆ ئەڤرۆ نیوز دبێژیت: ب رەنگەكێ گشتی هەكە حوكمەتەكا كارا هەبیت، بۆ سیستەمێ سیاسی یێ كوردستانێ یێ باشە، هەر چەندە حوكمەتا نوكە ژی یا ل سەر كار، لێ ئەو بەرنامێ نوو یێ كو دگونجیت ل گەل پێدڤیێن ڤێ قۆناغێ، هەروەسا ئەو هەر هێزێن سیاسی یێن سەرەكی ل كوردستانێ یێن كو حوكمەتا نوو پێك دئینن، دێ پشتەڤانیەكا ب هێزتر دەنە حوكمەتێ و دێ ب رەنگەكێ كاراتر دەست پێكەن، دیسا خوە بەرهەڤكرنە بۆ وان پیشهاتێن نوو یێن كو ل رۆژهەلاتا ناڤێن روو ددەن، هەروەسا سەرۆكاتیا هەرێما كوردستانێ دەزگایەكە، كو پشكەكە ژ سیستەمێ سیاسی یێ كوردستانێ، هەروەسا هەبوونا كەسایەتیەكێ كاریزمایی و خودان ئەزموون ل حوكومرانیێ، كو نێچیرڤان بارزانی ئەزموونەكا ب هێز هەیە د پەیوەندیێن نێڤدەولەتی دا، لەوما دەمێ دبیتە سەرۆكێ هەرێما كوردستانێ، دێ بیتە هاریكاریەك كو پتر شیانێن حوكمەتا هەرێما كوردستانێ بەرجەستە ببن.
ناڤهاتی زێدەتر گۆت: دیموكراتی بێی هەبوونا ئوپوزسیۆنەكا بێ هێز، دێ ل سەر پییەكێ راوەستیت، هەروەسا ل ئەزموونێن جیهانی ژی یا روودای، كو هندەك جاران قۆناغەك پێدڤی دبیت، كو دوور ژ هەموو سنورێن حزبایەتیێ هەموو ئالیێن سیاسی خوە بدەنە ئێك و بەرپرسیارەتیا حوكمەتێ وەربگرن، كو مە ئەڤ ئەزموونە ل سالا 2014 جەرباندیە لێ سەرنەكەفت، لێ ل كوردستانێ دۆرهێلەكێ تەحل هەیە و مە بڤێت و مەنەڤێت، ئەو ژی ئەوە كو دەنگدەرێن كوردستانێ یێن دابەش بووین ل سەر دو هێزێن سەرەكی، كو ئەو ژی پارتی دیموكراتی كوردستان و ئێكەتی نیشتیمانی كوردستان، دیسا هەردو هێز خودان پێشمەرگە و پۆلیسن ژی، گەلەك یا گرنگە هەموو پشكداربن د حوكومرانیێ دا، چونكی ل كوردستانێ هەكە ئالیەك پتر 50% یا كورسیێن پەرلەمانی ژی ب دەست ڤە بینیت، نەشێت ب تنێ حوكمەتێ پێك بینیت، لەوما ئەوا نوكە بووی ژ هەموویان چێترە، كو حوكمەتەكا نیڤ بنگە فراوانە، هەر چەندە بێی پارتی و ئێكەتی حوكمەتا كوردستانێ ناهێتە پێكئینان.
بەرواری زێدەتر ئاشكرا كر: هەتانوكە ئوپوزسیۆنەكا ب هێز ل كوردستانێ پەیدا نەبوویە، دیسا چو هێز ژی نەبووینە، كو بهێن و خوە بكەنە هێزەكا سەرەكی یا ئوپوزسیۆنێ و نەشیاینە باوەریێ بۆ خەلكێ چێكەن، كو وان رێكە چارەیێن باشتر یێن هەین ژ پارتی و ئێكەتیێ، لەوما هەكە ئەو هێز هەبا دا كاریگەریا خوە هەبیت، هەر چەندە مە ئوپوزسیۆن ژی یا ل كوردستانێ هەی، لێ نە ئەو ئوپوزسیۆنە یاكو دبێژیت، ئەم دێ شێین كارێن باشتر كەین، وان ئەڤ چەندە بۆ خەلكێ كوردستانێ نە سەلماندیە، هەروەسا ئەو ئالیێن بووینە ئوپوزسیۆن ژی نەشیاینە چو تشتێن نووتر بیننە د مەیدانێ دا، لەوما ل ڤان هەلبژارتنان خەلكێ كوردستانێ پشتا خوە دا پارتیێن ئوپوزسیۆنێ.
وی چاڤدێرێ سیاسی ئەو چەند ژی دیار كر: هەبوونا دەولەتێ بۆ كوردان گەلەك یا گرنگە، لەوما هندی ئەم نەبیتە دەولەت، ئەڤ كێشێن مە هەین، گەلەك ژ وان دێ مینن، هەر چەندە هەكە هەرێما كوردستانێ دستورەك هەبیت، ئێدی موزاییدێن سیاسی و سەنگەر ل ئێكودۆ گرتن نابن، هەر چەندە ل گەلەك ئەزموونێن جیهانی ژی دستور نینە، لێ د وارێ دانانا قانوونان، كو هندەك قانوون هەنە دبێژنێ خودان سرۆشتێن دستوری، كو ئەڤە پێناسا سیستەمی و پێكهاتا سیستەمی دكەن و دیسا پەیوەندی دناڤبەرا پێكهاتان، كو ئەڤ قانوونە مە یێن هەین، وەكو قانوونا ئێك یا هەلبژارتنا پەرلەمانی و قانوونا سێ یا جڤاتا وەزیران و دیسا قانوونا ژمارە ئێك یا سالا 2005 یا سەرۆكاتیا هەرێما كوردستانێ، كو ئەڤان قانوونا سیفەتێ دستوری هەیە، لێ هەكە ئەڤ قانوونە هەموو د دستورێ هەرێمێ دا بهێنە چەسپاندن دێ باشتر بیت، لەوما یا گرنگە هەرێما كوردستانێ خودان دستور بیت، هەروەسا هەكە كورد خودان دەولەت بان، كیانێ كوردی نەدكەفتە ژێر هێرشان.
ئەڤرۆ نیوز:
لیژنا دووڤچوونا بازاری ب سەرپەرشتی و ئامادەبونا جەھوەر عەلی قائیمقامێ قەزا دھوکێ و ھژمارەکا رێڤەبەرێن حکومی سەرەدانا بازارێ دھوکێ کرن.
دڤێ دووڤچوونێ دا ، ژ نێزیک ھایداری رەوشا بازاری بوون.
جەھوەر عەلی قائیمقامێ قەزا دھوکێ ئاشکراکر ل دەستپێکا رەمەزانێ حەتا ئەڤرو ۱۸٦ ھوشداری بو جھێن جودا ھاتینە دان و ۳٤ جهـ ھاتینە داخستن و ۱۰۸ جھێن جودا ھاتینە سزادان ب گوژمێ پتر ژ ۲۰ ملیون دیناران وگوتژی ل ماوێ ڤان بیست و پێنج روژێن رەمەزانێ دا ۱۲ تەنێن کەرستێن خوارنێ ھاتینە ژنافبرن.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ پێنجشه‌مبى 30/5/2019 په‌يامه‌ك به‌لاڤكر وتێدا به‌حسێ وێ سته‌م ونه‌هه‌قيان كر كو ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ به‌رامبه‌ر كوردان دهێته ئه‌نجامدان.
د وێ په‌يامێ دا، سه‌رۆك بارزانى ئاماژه ب وێ چه‌ندێ كر كو سوتنا ده‌خل ودانێ وه‌لاتيێن كورد ل ده‌ڤه‌رێن مادێ 140 وكوشتن وئازاردان وبرينداركرنا خه‌لكێ كورد ل وان ده‌ڤه‌ران كو ده‌مه‌كه بوويه ديارده ورۆژانه دهێته ئه‌نجامدان، تاوانه‌كا مه‌زنه وسته‌مه‌كا ئاشكرايه ل وه‌لاتيێن بێتاوانێن كورد دهێته كرن.
دياركر ژى” ئه‌وا ل وان ده‌ڤه‌ران دهێته ئه‌نجامدان، پێشێلكرنا قانوونێ ودستوورى وبهايێن مرۆڤايه‌تيێ يه وزه‌نگێ مه‌ترسيێ يه ژى بۆ ژيانا خه‌لكى وداهاتيێ وان ده‌ڤه‌ران، ئه‌ڤ سته‌ما كو رۆژانه دهێته كرن، سزادانا خه‌لكى يه ل سه‌ر ناسناما نه‌ته‌وى”.
سه‌رۆك بارزانى د په‌ياما خوه دا راگه‌هاند كو سه‌پاندنا وێ ره‌وشێ ل سه‌ر جوتيار وخه‌لكێ سڤێلێ وان ده‌ڤه‌ران ب چو شێوه‌كى جهێ قه‌بوولكرنێ نينه وپێدڤيه جڤاكێ نێڤده‌وله‌تى ولايه‌نێن په‌يوه‌نديدار ل سه‌ر وێ ره‌وشا ناله‌بار بهێنه ده‌نگ وپێدڤيه حوكمه‌تا عيراقێ ژى به‌رپرسياره‌تيێ هه‌لبگريت ودووماهيێ ب وێ سته‌مێ وقانوون شكێنيێ بينيت كو ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ دژى وه‌لاتيێن كورد دهێته ئه‌نجامدان”.
ئه‌ڤرۆ نيوز:
راكان جبۆرى پارێزگارێ سه‌پاندى يێ كه‌ركووكێ، ب تۆمه‌تا مه‌زاختنا 900 مليۆن ديناران بۆ خوارنا مێڤانخانا پارێزگه‌هێ، دێ بۆ دادگه‌هێ هێته گازيكرن.
ب گۆره‌ى نڤيسارا ده‌سته‌يا ده‌ستپاكيێ كو ميديايێن عيراقى به‌لاڤكريه، پارێزگارێ ب وه‌كاله‌تێ كه‌ركووكێ ب تۆمه‌تا گه‌نده‌ليێ، بۆ به‌غدا هاتيه گازيكرن و ئێك ژ وان دوسيا ژى ئه‌وه كو 900 مليۆن دينار بۆ خوارنا مێڤانخانا پارێزگه‌هێ د ماوه‌كێ كێم دا مه‌زاختينه.
راكان جبۆرى پارێزگارێ ب وه‌كاله‌ت يێ كه‌ركووكێ، دێ بۆ دادگه‌هێ هێته گازيكرن و ئيمزايا ئاماده‌بوونێ بۆ به‌رسينگێ دادگه‌هێ ل سه‌ر كريه. ئه‌ندامه‌كێ جڤاتا پارێزگه‌ها كه‌ركووكێ راگه‌هاند بۆ چاوانيا مه‌زاختنا پارێ ئيدارا كه‌ركووك چه‌ند پرسيار ئاراسته‌ى وى هاتينه كرن، به‌لێ هه‌تا نوكه به‌رسڤ نه‌دايه هه‌تا كار گه‌هشتيه دادگه‌هێ.
ئه‌ڤرۆ نيوز:
سه‌رۆكا په‌رله‌مانێ كوردستانێ، هه‌موو ئه‌ندامێن په‌رله‌مانێ كوردستانێ داخواز دكه‌ت بۆ ئاماده‌بوون د روونشتنا ژماره (7) يا ئاسايى، سالا ئێكێ ژ خولا ئێكێ يا هه‌لبژارتنێن پێنجێ يا په‌رله‌مانى، ل ده‌مژمێر 11:00ى به‌رى نيڤرۆيا رۆژا دوشه‌مبى رێكه‌فتى 10ى خزيرانا 2019ێ وئه‌ڤه ژى ده‌قێ وێ يه:
ئه‌ڤرۆ نيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان ئاشكه‌را كر كو هه‌كه ئێكه‌تى نشتيمانى كوردستان هه‌ر يا سور بيت ل سه‌ر پشكدارينه‌كرن د پرۆسێ دا، پێكئينانا حوكمه‌تێ ناهێته راگرتن و دێ هه‌ر هێته پێكئينان.
هشيار زێبارى، ئه‌ندامێ مه‌كته‌با سياسى يا پارتى، سورسومانيا خوه ژ پشكدارينه‌كرنا ئێكه‌تيێ د روونشتنا په‌رله‌مانى بۆ هه‌لبژارتنا سه‌رۆكێ هه‌رێمێ دا ده‌ربڕى و راگه‌هاند: “سه‌رسورمان بووين كو د ده‌مێن دووماهيێ دا، بڕياره‌كا سياسى هه‌بوو د ناڤ بالێن ئێكه‌تيێ دا كو پشكداريێ نه‌كه‌ن، ب راستى ژى ئه‌ڤه ئاماژه‌يه‌كا باش نه‌بوو”.
زێبارى د وێ چاڤپێكه‌فتنێ دا ل گه‌ل پشكا كوردى يا “ده‌نگێ ئه‌مريكا” نه‌ڤه‌شارت كو پشكدارينه‌كرنا ئێكه‌تيێ د روونشتنا باوه‌رى دان ب سه‌رۆكێ هه‌رێمێ بۆ “كێشێن بالێن ناڤ ئێكه‌تيێ” ڤه‌گه‌راند نه‌كو بۆ بابه‌تێ دانانا پارێزگارێ كه‌ركووكێ. گۆتژى: “ديار هێشتا كێشه يێن د ناڤبه‌را بالێن ئێكه‌تيێ دا هه‌ين، دڤێت د رێيا ده‌ست گرتن ب سه‌ر ڤێ پرۆسێ دا، ره‌هينه‌يه‌كى بۆ به‌رژه‌وه‌نديا وى بالى و بالێ دى ببينن، ئه‌ڤه ژى نه د به‌رژه‌وه‌ندا ئێكه‌تيێ و خه‌لكێ كوردستانێ و چو لايه‌كى دا نينه”.
به‌حس ل وێ چه‌ندێ ژى كر كو كێشێن كه‌ركووك ب تنێ د ده‌ستێ پارتى و ئێكه‌تيێ دا نينن، به‌لكو په‌يوه‌ندى ب عه‌ره‌ب و توركمان و حوكمه‌تا عيراقێ ژى ڤه هه‌يه، ژ به‌ر هندێ “ئه‌ڤى بابه‌تى په‌يوه‌ندى يا ب بالێن ناڤ ئێكه‌تيێ ڤه هه‌يى”.
د درێژاهيا چاڤپێكه‌فتنا خوه دا گۆت: “مه گه‌له‌ك ئارامى راگرت، زێده‌تر ژ شه‌ش هه‌يڤان، ب تنێ ژ به‌ر وێ چه‌ندێ دا كو هه‌موو لايه‌ك پشكداريێ د حوكمه‌تێ دا بكه‌ت، به‌لێ هه‌كه ئێكه‌تى يا رژد بيت ل سه‌ر پشكدارينه‌كرنێ، پرۆسه راناوه‌ستيت و دێ يا به‌رده‌وام بيت، بلا ئه‌و لايه‌نێن ئاماده پشكداريێ د حوكمه‌تێ دا بكه‌ن”.
ئه‌ندامێ سه‌ركرداتيا پارتى ديموكراتى كوردستان گۆتژى: “وه‌سان هاتيه دانان هه‌تا دووماهيا هه‌يڤا شه‌ش حوكمه‌تا نوو يا هه‌رێما كوردستانێ بهێته پێكئينان”.
ئه‌ڤرۆ نيوز:
ژێده‌رێن رۆژنامه‌ڤانى يێن عيراقى راگه‌هاند كو بڕياره پشتى جه‌ژنێ ئوسمانه نوجێفى هه‌ڤپه‌يمانيه‌كا نوو ب راگه‌هينيت.
ب گۆره‌ى مالپه‌رێ سومه‌ريه نيوز يێ عيراقى، بڕياره ئوسامه نوجێفى، سه‌رۆكێ هه‌ڤپه‌يمانيا قرار و ژماره‌كا په‌رله‌مانتار و وه‌زير و سه‌ركرداتيێن به‌رى و نها يێن حوكمه‌تا عيراقێ هه‌ڤپه‌يمانيه‌كێ پێك بينن.
هه‌ر چه‌نده مالپه‌رێ ناڤبرى چو پێزانينێن زێده‌تر ل سه‌ر ناڤێن وان كه‌سان به‌لاڤ نه‌كرينه و ژێده‌رێ پشت به‌ستن ژى ل سه‌ر كرى ئاشكه‌را نه‌كريه، به‌لێ دهێته پێشبينيكرن ل رۆژانێن بهێت ب ره‌نگه‌كێ كارا ئه‌ڤ فراكسيۆنه بهێته راگه‌هاندن و وه‌كو ئه‌و دده‌نه زانين ژى مه‌ره‌م پێ ئه‌وه كێشێن هه‌ين نه‌هێلن و پرۆسا سياسى يا عيراقى راست ڤه كه‌ن.
ئه‌ڤرۆ نيوز:
سيروان محه‌مه‌د، سه‌رۆكێ ده‌سته‌يا گشتى يا ئامارا هه‌رێما كوردستانێ راگه‌هاند كو بڕياره د چارێكا دووماهيا 2020ێ دا سه‌رژمێريا گشتى يا روونشتڤانان بهێته ئه‌نجام دان و چه‌ند رۆژان دێ يا به‌رده‌وام بيت و ب ئه‌لكترۆنى ب رێيا تابلێتێ هێته ئه‌نجام دان.
سه‌رۆكێ ده‌سته‌يا گشتى يا ئامارا هه‌رێما كوردستانێ ئاشكه‌را ژى كر كو پێدڤى ب 20 هه‌تا 30 هزار كه‌سان هه‌بيت، بۆ ئه‌نجامدانا ڤێ پرۆسێ.
ئاماژه ب وێ چه‌ندێ ژى كر كو عيراقێ ل سالا 2019ێ كۆژمێ 50 مليۆن ديناران بۆ قووناغا ئێكێ يا سه‌رژمێريا گشتى يا روونشتڤانان ته‌رخانكرينه.
گۆتژى: “وه‌زاره‌تا پلاندانانا حوكمه‌تا عيراقێ ب گشتى به‌رپرسن ل سه‌رژمێريێ، مه‌سه‌له‌يا سه‌رژمێريێ پرسه‌كا حه‌سريه و دڤێت حوكمه‌تا فيدرال كۆنترۆل بكه‌ت، هه‌كه نه‌شيا ڤێ چه‌ندێ بكه‌ت ئه‌و به‌رپرسن ژ وێ چه‌ندێ.
نيشاندان