ئه‌ڤرۆ نیوز:
د روودانه‌كا هاتنوچوونێ دا ئه‌ڤرۆ ئه‌ینیێ 19/4/2019 ل رانیا چار ژن و دو زارۆیان گیانێ خوه ژ ده‌ست دا وپێنج كه‌سێن دى ژى بریندار بوون كو برینێن سێ ژ وان یا گرانه.
پۆلیسێن پاریزگه‌ها سلێمانیێ راگه‌هاند” روودان ل سه‌ر رێیا ناحیا بێگه‌رد بۆ رانیا د ناڤبه‌را دو ترومبێلێن ژ جۆرێ تویۆتا هایلۆكس وتویۆتا كامرى”.
ئه‌و هه‌ردو زارۆیێن گیانێ خوه ژ ده‌ست داى ژیێ وان 4 هه‌یڤێ وساله‌ك بوو.
ئه‌ڤرۆ نیوز:
وه‌زاره‌تا دارایى وئابوورى ل هه‌رێما كوردستانێ ل دۆر داخۆیانیه‌كا ئه‌ندامێ په‌رله‌مانێ عیراقێ د. رێبوار كه‌ریم بۆ رادیوا ده‌نگێ ئه‌مریكا رۆهنكرنه‌ك به‌لاڤكر.
وه‌زاره‌تا دارایى د رۆهنكرنا خوه دیارككر، ئه‌ڤرۆ ئه‌ینیێ 19/4/2019 د چاڤپێكه‌فتنه‌كێ دا ل پشكا كوردى ل ده‌نگێ ئه‌مریكا، ئه‌ندامێ په‌رله‌مانێ عیراقێ د رێبوار كه‌ریم راگه‌هاند كو (حوكمه‌تا هه‌رێما كوردستانێ پارێ مووچێ فه‌رمانبه‌رێن هه‌رێمێ كو ژ به‌غدا هاتیه بۆ تشتێن دى د مه‌زێخیت ول دووڤ پێزانینێن مه یێن داینه وه‌به‌رهێنه‌ران). وه‌كو وه‌زاره‌تا دارایى ل هه‌رێما كوردستانێ دخوازین ڤان چه‌ند خالان بێخینه به‌رچاڤێ وى په‌رله‌مانتارێ به‌رێز ووه‌لاتیێن هه‌رێما كوردستانێ كو ئه‌و پاره د چ دا هاتیه مه‌زاختن:
دیاركر ژى ” هه‌یڤانه حوكمه‌تا هه‌رێمێ د ناڤبه‌را 5 هه‌یڤێ هه‌تا 25 هه‌یڤێ مووچێ فه‌رمانبه‌ران وخانه‌نشینان به‌لاڤ دكه‌ت ول ڤێ هه‌یڤێ ژى 23/4/2019 دووماهى رۆژا به‌لاڤكرنا مووچێ ڤێ هه‌یڤێ یه”.
ئەڤرۆ نیوز ، زنار تۆڤی:
ئێڤاریا ئەڤرۆ ئەینیێ 19.4.2019 پێلەکا بەفرێ ناحیا کانی ماسێ ڤەگرتیە و د ئەنجامدا رێژەکا بەفرێ ل سنورێ ڤێ ناحیێ و گوندێن دەوروبەر باریە، ڤێ چەندێ ئاستەنگ ئێخستیە رێیا هاتنوچوونا وەلاتیان ل دەرگەهێ گۆمرکا سەرزێری ل ناحیا کانی ماسێ.
سەربەست سەبری ئاکرەیی، رێڤەبەرێ ناحیا کانی ماسێ بۆ ئەڤرۆ نیوز دیارکر: ئێڤاریا ئەڤرۆ پێلەکا دی یا بەفرێ ل ناحیا کانی ماسێ باریە و د ئەنجامدا پێنج سەنتیمێن بەفرێ ل خالا گۆمرکا سەرزێری باریە، ئەو خەلکێ هاتنوچوونێ د وی دەرگەهی را دکەن ئاسێ ماینە نەشێن بهێنە خوار، لێ نوکە ب هەڤکاریا تیمێن رامالینا بەفرێ ئەم بەردەوامین ژبۆ ڤەکرنا وێ رێکێ، داکو ئەو وەلاتیێن ماینە ئاسێ قورتال بکەین، دیسا بەفر ل هندەک گوندێن ناحیا کانی ماسێ ژی باریە.
ئه‌ڤرۆ نيوز:
دچارچۆڤێ گه‌را 23 ژ خۆلا ته‌پا پێى يا پلا ناياب يا عيراقى، ئه‌ڤرۆ پێنجشه‌مبى ل ده‌رڤه‌ى ياريگه‌ها خوه يانا هه‌ولێر ب ئه‌نجامێ 1-2 ل گه‌ل يانا سيناعات كهربائيه هاته دوراندن.
گۆلێن يانا سيناعات كهربائيه ل خۆله‌كێن 2 و4 ژ ياريێ هاتنه تۆمراكرن وگۆلا يانا هه‌ولێر ل خۆله‌كا 75 هاته تۆماركرن.
ب ڤى ئه‌نجامى يانا هه‌ولێر ب 27 خالان ما ل رێزا 10 د رێزبه‌ندا خۆلێ دا و يانا سيناعات كهربائيه ب 24 خالان پێشڤه هاته رێزا 16.
يانا هه‌ولێر كو تاكه نوونه‌را هه‌رێما كوردستانێ يه د خۆلا پلا ناياب يا عيراقێ دا هه‌تا نوكه 23 يارى ئه‌نجامداينه كو 7 سه‌ركه‌فتن تۆماركرينه و 6 وه‌كهه‌ڤى و 10 دوراندن.
ئه‌ڤرۆ نيوز:
وه‌زاره‌تا ڤه‌گوهاستن وگه‌هاندنێ ل هه‌رێما كوردستانێ راگه‌هاند، هه‌تا نوكه رێنما بۆ فلته‌ركرنا يان ژى راگرتنا ياريێن ئه‌لكترۆنى نه‌گه‌هشتينه مه.
ئۆمێد محه‌مه‌د سالح، په‌يڤدارێ وه‌زاره‌تا ڤه‌گوهاستن وگه‌هاندنێ ل هه‌رێمێ گۆت” د حاله‌ته‌كێ ژى دا ئه‌و قانوونا په‌رله‌مانێ عيراقێ ده‌ركرى بۆ قه‌ده‌غه‌ركرنا ياريا پۆبجى يا ئه‌لكترۆنى، هه‌رێما كوردستانێ ژى پێگير بكه‌ت، پێدڤيه ب رازيبوونا جڤاتا وه‌زيرێن هه‌رێمێ وپه‌رله‌مانێ كوردستانێ بيت، چونكى كۆمپانيێن ئه‌نترنێتێ مۆله‌ت ژ حوكمه‌تا هه‌رێمێ وه‌رگرتيه”.
دياركر ژى”هه‌مه بريارا عيراقێ ژ لايێ جڤاتا وه‌زيرێن هه‌رێما كوردستانێ وپه‌رله‌مانێ كوردستانێ رازيبوون ل سه‌ر هاته كرن، وى ده‌مى وه‌زاره‌تا ڤه‌گوهاستن وگه‌هاندنێ ل هه‌رێمێ دێ كۆمپانيێن ئه‌نترنێتێ وفايبه‌ر ووايرلێس ئاگه‌هداركه‌ت كو ژ سيرڤه‌رێ سه‌ره‌كى وان سايتان بلۆك بكه‌ن تاكو چالاكيێن ياريان ل ئه‌نترنێتێ رابگريت وبه‌رۆڤاژى كۆمپانى دێ هێنه سزادان”.
دهێته زانين په‌رله‌مانێ عيراقێ ل كۆمبوونا چارشه‌مبى 17/4/2019 پرۆژه قانوونا قه‌ده‌غه‌ركرنا ياريا پۆبجى وهه‌موو ئه‌و ياريێن هانده‌رن بۆ توندوتيژيێ په‌سه‌ندكر.
ئەڤرۆ نیوز:
ل زانینگه‌ها ئه‌مریكى یا كوردستان ل سێمێلێ وب ئاماده‌بونا فه‌رهاد ئه‌مین ئه‌تروشى پارێزگه‌رێ دهوكێ وچه‌ند به‌رپرسێن حزبى وئیدارى ئەڤرۆ دیدارا شه‌دا یا ره‌وشه‌نبیرى ئێك ژلایێ رێڤه‌به‌ریا گشتى یا ره‌وشه‌نبیرى وهونه‌رى دهوك ورێكخراوا كانیا سپى وب هه‌ڤكارى دگه‌ل زانینگه‌ها ئه‌مریكى كوردستان وپشته‌ڤانیا پارێزگه‌ها دهوكێ هاته سازكرن.
لبه‌راهیێ په‌یڤا سه‌روكێ زانینگه‌ها ئه‌مریكى یا كوردستان هاته خاندن وبخێر هاتنا هه‌موو مێهڤانان كر وسه‌ركه‌فتن بو دیدارێ خواست.
پاش پارێزگه‌رێ دهوكێ په‌یڤه‌ك پێشكێشكر تێدا بناڤێ كارگێریا پارێزگه‌هێ بخێر هاتنا مێهڤانێن دیدارێ كر وده‌ست خوشى ل وان هه‌موو لایه‌نان كر یێن دیدارا شه‌دا رێكخستى وته‌كه‌زكر كو ئه‌ڤ جوره دیداره زور دگرنگن بو گوهورین و پێشئێخستنا هه‌ر جڤاكه‌كى چونكو ئه‌و كه‌سێن سمینارا ل ڤان دیدارا پێشكێشدكه‌ن كه‌سانێن ئه‌كادیمى وشاره‌زانه دبوارێ كلتورى وموزیكێ وزمانێ كوردى وئارمانجا وان یا سه‌ره‌كى په‌یداكرنا گوهورینێ یه د دوارێن جودا جودا وسه‌ركه‌فتن بو به‌رنامێن دیدارێ خواست.
پاش په‌یڤا رێڤه‌به‌ریا گشتى یا ره‌وشه‌نبیرى وهونه‌رى ژلایێ ئه‌یوب ره‌مه‌زان هاته خاندن و ئارمانجێن دیدارێ به‌رچاڤكرن وچه‌ند پێشنیار ئاراسته‌ى سازیێن هه‌رێما كوردستانێ كرن بو وێ یه‌كێ مفا ژێ بهێته وه‌رگرتن.
پاش ده‌ست ب په‌نه‌لێ ئێكێ یێ دیدارێ بناڤێ ره‌وشه‌نبیرى و وه‌رگوهاستنێن جڤاكى هاته كرن:
لبه‌راهیێ د.فازل عمر سمیناره‌ك لبن ناڤێ ئالیسه‌نگیا مادى وهزرى ل جڤاكێن روژهه‌لاتا ناڤین پێشكێشكر وپروفیسور( سابینێ رولبێرك) سمیناره‌ك بناڤێ كلتور كارێ جڤاكى یێ سبه‌یه پێشكێشكر وپروفیسور( روت ئولشان) سمیناره‌ك لبن ناڤێ فلم وه‌كو پارچه‌یه‌ك ژپروسه‌یا چێكرنا ئاشتیێ پێشكێشكر.
پاش گه‌نگه‌شێن تێر وته‌سه‌ل ل سه‌ر هه‌رسێ سمیناران هاتنه كرن.
ل دوڤدا به‌رنامێن په‌نه‌لێ دووێ لبن ناڤێ ره‌وشه‌نبیرى وناسنامه هاتنه ل دارخستن:
لبه‌راهیێ (د.پاول لیندرى ) سمیناره‌ك بناڤێ ره‌وشه‌نبیرى وناسنامه پێشكێشكر وهونه‌رمه‌ندعدنان كریم سمیناره‌ك بناڤێ ستران وناسنامه‌یا نه‌ته‌وه‌یى پێشكێشكرو د.دلشاد محمد سعید سمیناره‌ك بناڤێ موزیكا كوردى وناسنامه‌یا كوردى پێشكێشكر ، پاش دان وستاندن ل سه‌ر هه‌رسێ بابه‌تان هاتنه كرن.
روژا 19-4-2019 دێ به‌رده‌وامى ب به‌رنامێن دیدارا شه‌دا هێته دان ول ده‌م ژمێر پێنجى ئێڤارى ل هولا دهوك مول فلمێ ده‌رهێنه‌ر هونه‌ر سلیم ل ژێر ناڤێ (كێ لیدى وینسلى كوشت) دێ هێته نمایشكرن.
ئەڤرۆ نیوز، عەلی حاجی:
راھێنەرێ تیما تەپا پێ یا یانا زاخۆ ئەحمەد کازم ناما دەستژکارکێشانا خوە ب رێیا ئەڤرۆ نیوز راگەھاند ژ سەرپەرشتیا تیما تەپا پێ بۆ ھەردو خولێن ھەرێمێ و عیراقێ و ڤەگەریا بەغدا.
د ڤێ نامێ دا ئەحمەد کازم داخوازا لێبورینێ ژ پشتەڤانێن یانا زاخۆ کریە و دیارکر ژ بەر نەبوونا پشتەڤانیا تیمێ و گیروبونا بەرھەڤیێن یانێ بۆ ڤاڤارتنێن خولا عیراقێ و زێدەباری نەگەھشتنا یاریزانێن پیشەکار یێن ئیرانی و غانی و نە ئەنجامدانا راھێنانان ل ژڤانێ دەستنیشانکری کو تنێ ٤٠ رۆژ ماینە بۆ دەستپێکرنا ھەڤرکیێن دەربازبوونێ بۆ خولا نایابا عیراقێ، لەورا د شیانێن وی دانەبوو ڤی شێوەی و دابرینا ئەندامێن یانێ ب شێوەکی کو مەحالە بشێم خزمەتا یانا زاخۆ بکەم و ڤەگەرینمە خولا نایاب عيراقى لەورا نەچارم دەست ژکارێ خوە بەردەم و ھەر ئەگرۆ ڤەگەرمە بەغدا.
دھۆک، لەزگین جوقی:
رێڤەبەریا گشتی ساخلەمیا پارێزگەھا دھۆکێ ب ھەڤکاریا رێکخراوا ASB رۆژا جیھانیا ھیموفیلیا ل ھۆلا ساخلەمیا دھۆکێ ساخکر و تێدا ھژمارەکا نەخۆشان ھاتنە خەلاتکرن.
د. محه‌مەد سالح ب ناڤێ رێڤەبەریا ساخلەمیا دھۆکێ پەیڤەک پێشکیشکر و تێدا سوپاسیا رێکخراوا ASB كر بۆ پشتەڤانیا وان ژبۆ نەخۆشیێن ھیموفیلیا و دەستخوشی ل ھەموو لایەیان کر بۆ ئەنجامدانا چالاکیا ھیموفیلیا.
د. ئومێد عەدنان بەرپرسێ بەشی ھیموفیلیا ل سەنتەری ژین دیارکر کو ھیموفیلیا ئێک ژ نەخۆشین بەربوونا خوینا ماوەی یە کو سێ جۆرێن نەخۆشیا ھیموفیلیا ھەنە ئەوژی ژ جۆری A, B,C کو جۆری A کیمبوونا فاکتەری ھەشت و کیمبوونا فاکتەری نەھی ژی جۆری B یە و جۆرێ سیێ ژی ئانکو C کیمبوونا فاکتەرێ 11ێ یە ئەڤە فاکتەرێن لاشی مرۆڤێ نه رێ ل خوین بەربوونێ دگرن دەمێ دروست دبیت ھەکە ئەڤ فاکتەره دکێم بن دەمێ خوین بەربووین دروست بیت زوو راناوەستیت.
ئاشکەرا کرکو ل پارێزگەھا دھۆکێ چارەسەریا ھاتیە دابینکرن بۆ ڤان نەخۆشیان وسالانە ژی ھندەک حالەتیێن نوو پەێدابن ئەگەر ژی ژئینانا دناڤ کەس وکارێن نێزیکی دایە پتر ژ دایکی بۆ زارۆکێ دھێتە ڤەگوھاستن، ل سەرانسەری جیھانی 400 ھزار نەخۆشین ھیموفیلیا ھاتینە تۆمارکرن لدھۆکێ 142 نەخۆش هه‌نە ب ھەموو جۆرێن خوە ڤە ژوانا ژی 100 کەس ھیموفیلیا نە ئەوژی 85 نەخۆش ھەلگرێن جۆری A نە ژ نەخۆشیا ھیموفیلیا.
ھزره‌ت عه‌بدولا ژ کومەلا ھیموفیلیا ل دھۆکێ دیارکرکو ھەکە پشتەڤانیی ل کۆمەلا مە بھێتە کرن دێ ئەم شێین پلانان دانن بۆ باشتر خزمەتکرنا نەخۆشیێن ھیموفیلیا ژلایی مادی و مەعنەوی ڤە دابين كه‌ين.
نيشاندان