ئه‌ڤرۆنیوز:
په‌رله‌مانتاره‌كێ فراكسیۆنا پارتى دیموكراتى كوردستان ل لژنا خواندنا بلند وڤه‌كۆلینێن زانستى ل په‌رله‌مانێ عیراقێ ئاشكرا دكه‌ت كو لژنا ناڤبرى مێهڤانداریا وه‌زیرێ خواندنا بلند وڤه‌كۆلینین زانستى یێن عیراقی كر وسۆزا دانپێدان كرنێ ب 9 زانكۆیێن هه‌رێما كوردستانێ وپشكا قوتابیێن كورد ل زه‌مالا خواندنێ ل ده‌رڤه وچه‌ند پرسین دى دایه.
محه‌مه‌د شاكر، ئه‌ندامێ لژنا خواندنا بلند ل په‌رله‌مانێ عیراقێ بۆ مالپه‌رێ فه‌رمى یێ پارتى گۆت”ل لژنا خواندنا بلند یا په‌رله‌مانى مه مێهڤانداریا قوسه‌ى سوهه‌یل وه‌زیرێ خواندنا بلند یا عیراقێ كر وبابه‌تێ سه‌ره‌كى كو مه خواست ل سه‌ر باخڤین پرسا دانپێدان بوو ب 9 زانكۆیێن هه‌رێما كوردستانێ كو حوكمه‌تا عیراقێ دانپێدان پێ نه‌كریه ئه‌وژى هه‌رسێ زانكۆیێن پۆلیته‌كنیك ل هه‌ولێر وسلێمانیێ ودهۆكێ ل گه‌ل زانكۆیێن سۆران وزاخۆ وراپه‌رین وگه‌رمیان وجه‌رمۆ وهه‌له‌بجه وبۆردێ كوردیێ كوردستان وئه‌و قوتابیێن كو باوه‌رنامێن خوه ژ ده‌رڤه بده‌ستڤه‌ئیناین ول عیراقێ دانپێدان پێ نه‌هاتیه كرن ونه‌شێن درێژیێ ب خواندنێ بده‌ن،كو ئه‌ڤه كێشه‌كه وده‌مێ چه‌ند سالانه نه‌هایته چاره‌كرن، ئه‌ڤرۆ ژى پێنجشه‌مبى 14/3/2019 پشتى دانوستاندنێ ل گه‌ل وه‌زیرێ خواندنا بلند یا عیراقێ، باوه‌رى بۆ دروست بوو وگۆت” من باوه‌ریا تمام یا هه‌ى ودڤێت دانپێدانێ ب وان زانكۆیێن هه‌رێما كوردستانێ بكه‌ین وپرسا قوتابیان ژى چاره بكه‌ین”.
گۆت ژى” وه‌زیرێ خواندنا بلند ل عیراقێ داخوازكر ب زووترین ده‌م لژنه‌ك بهێته پێكئینان وسه‌ره‌دانا وان 9 زانكۆیێن هه‌رێما كوردستانێ بكه‌ت، بۆ ڤێ چه‌ندێ ژى ئه‌م دێ د هه‌ڤكار بین وچاڤدێریا ڤێ پرسێ كه‌ین تاكو دهێته بجهئینان”.
ئه‌ڤرۆنیوز:
رێڤه‌به‌ریا گشتى یا كه‌شناسیێ ل هه‌رێما كوردستانێ ل دۆر ره‌وشا سوباهى ئه‌ینیێ ل پارێزگه‌ها دهۆكێ به‌لاڤكر كو ئه‌سمان دێ نیمچه ئه‌ور بیت پاشى دێ بیته ئه‌ورێ تمام وباران ل ده‌م وجهێن جودا ول ده‌ڤه‌رێن چیایى دێ بارانێن زێده‌تر بارن.
سه‌باره‌ت پلا گه‌رمێ یا سوباهى، دیاركر كو پلا گه‌رمێ دێ 18 بیت.
ئه‌ڤرۆنیوز:
رێڤه‌به‌ریا گشتى یا سامانێ ئاژه‌لى ل وه‌زاره‌تا چاندنێ یا هه‌رێما كوردستانێ ب نڤیسارا خوه یا هژمار 570 ل 10/3/2019 كو ئاراسته‌ى هه‌موو رێڤه‌به‌ریێن گشتى یێن چاندنێ ل پارێزگه‌هێن هه‌رێمێ كریه ئاماژه ب وێ چه‌ندێ كریه كو بریار هاتیه دان ب قه‌ده‌غه‌كرنا نێچیرا ماسیان ل رۆژا 15/3/2019 هه‌تا رۆژا 15/6/2019.
ئەڤرۆ نیوز، نەوزاد هلۆری:
ب هەلکەفتا دایکبوونا بارزانی نەمر پێشانگەهەکا فوتوکرافەری کو دەربرین ل پێشمەرگە و قارەمانیا وان د شورەشێن بارزان و ئیلوون وگۆلانێ دکر، ل سەر گورستانا گوندێ بارزان هاتەڤەکرن.
پشکەک ژ وێ پێشانگەهێ بۆ کچ و ژنێن رزگاربویێن دەستێ داعش بناڤ و نیشانێن سپی پوشێن رۆژێ هاتبویە تەرخانکرن.
ئەڤرۆ نیوز،بارزان مزووری:
د رێورەسمەکێ دا ئەڤرو پێنجشه‌مبى 14ی ئادارێ 2019ی ب بەشداریا سردار یحیی عبدالعزیز قایمقامێ قەزا شێخان و مەحمود ئێزدی بەرپرسێ لقا 20 شێخان و رێڤەبەرێن دامودەزگەهێن میری و حیزبی ب هەلکەفتنا ژ دایک بوونا مەلا مستەفا بارزانی پتری 400 دارێن جۆراو جۆر دناڤ سەنتەرێ شێخان دا هاتن چاندن.
ئه‌ڤرۆنیوز:
پارتى دیموكراتى كوردستان راگه‌هاند، سه‌رۆكایه‌تیا هه‌رێما كوردستانێ دێ هێته كاراركرن وپاشى ل گه‌ل لایه‌نێن سیاسى دنڤیسینا دستوورێ هه‌رێمێ دا دێ گۆهۆرین ل سه‌ر قانوونا وێ دا هێنه كرن.
مه‌حموود محه‌مه‌د، ئه‌ندامێ مه‌كته‌با سیاسى وپه‌یڤدارێ فه‌رمى یێ پارتى دیموكراتى كوردستان، ئه‌ڤرۆ پێنجشه‌مبى 14/3/2019 دداخۆیانیه‌كا رۆژنامه‌ڤانى دا گۆت” ئه‌وا نوكه ل به‌رده‌م مه، كاراكرنا قانوونا سه‌رۆكایه‌تیا هه‌رێمێ یه ودیاركرنا سه‌رۆكێ هه‌رێمێ وناڤئینانا وى وراسپاردرنا سه‌رۆكێ كابینا نه‌هێ یه تاكو كابینا خوه پێك بینیت”.
دیاركر ژى”سه‌رۆكایه‌تیا هه‌رێمێ دێ هێته كاراكرن وهه‌ڤده‌م سه‌رۆكێ هه‌رێمێ دێ هێته هه‌لبژارتن وپاشى ئه‌و جوداهیێن دبۆچوونێن پارتى ولایه‌نێن دى ل سه‌ر قانوونا سه‌رۆكایه‌تیێ هه‌ین، پێكڤه هه‌موو لایه‌ك دێ ئێخینه ده‌مێ نڤیسینا دستوورێ هه‌رێما كوردستانێ، ل وێرێ ده‌ستهه‌لات وچاوانیا هه‌لبژارتنا سه‌رۆكێ هه‌رێمێ دێ هێته گه‌نگه‌شه‌كرن ودێ هێته دیاركرن كا سه‌رۆكێ هه‌رێمێ دێ چاوان هێته هه‌لبژارتن وده‌ستهه‌لاتێن وێ دێ چ بن”.
ئەڤرۆ نیوز،بارزان مزووری:
بەرپرسێ پەیوەندی و راگەھاندنا رێڤەبەریا ھاتنوچوونا پارێزگه‌ها دهۆكێ، ئازاد تاها بۆ ئەڤرۆ نیوز گوت:ئەڤرۆ 14/3/2019 ل سەر رێیا سەرەکی دهۆك – شێخان ل نێزیک سەنتەرێ باژێرێ باعەدرێ روودانەک دناڤبەرا ترومبێلەکا تایبەت ژ جۆرێ تویتا رەف و ترومبێلەک سەربازی ژ جورێ مەگزەمین روودا ودئەنجامدا دو کەسان گیانێ خوه ژ دەست دا وحەفت کەس ژی برینداربوون.
ئەڤرۆ نیوز:
ب هه‌لكه‌فتا ژدایكبوونا بارزانیێ نه‌مر وده‌ربازبونا 28سالا ل سه‌ر سه‌رهلدانا باژێرێن دهوك وسێمێل ئه‌ڤرو سپێدێ 14-3-2019ل هولا كونفرانسان ب ئاماده‌بونا به‌هزاد على ئاده‌م پارێزگه‌رێ دهوكێ ب وه‌كاله‌ت وسه‌ربه‌ست تروانشى ئه‌ندامێ سه‌ركردایه‌تیا پارتى به‌رپرسێ لقێ ئێك ولایه‌نێن سیاسى وحزبى وحكومى وجه‌ماوه‌رى ئاهه‌نگه‌كا تایبه‌ت هاته ل دارخستن وچه‌ند چالاكیێن جورا وجور هاتنه ئه‌نجامدان .
لبه‌راهیێ به‌رهه‌ڤبوى ده‌قیقه‌كێ رێزگرتن راوستیان بو سه‌ر گیانێ شه‌هیدێن كوردستانێ وسه‌رهلدانێ .
پاش به‌رپرسێ لقێ ئێك په‌یڤه‌ك پێشكێشكر وپیروزباهیا خه‌لكێ كوردستانێ ب گشتى ویێ باژێرێن دهوك وسێمێل ب تایبه‌تى كر ب هه‌لكه‌فتا ده‌ربازبونا 28سالا ل سه‌ر سه‌رهلدانا كوردستانێ وباژێرێن دهوك وسێمێلێ وگرنگیا سه‌رهه‌لدانێ به‌رچاڤكر وگوت: ده‌ستكه‌فتێن ئیرو بده‌ست ملله‌تێ كورد كه‌تین به‌رهه‌مێ سه‌رهلدان وخه‌بات وبه‌رخودانا گه‌لێ كورد بویه وته‌كه‌زكر كو هه‌رده‌ما ملله‌تێ كورد بویه ئێك ده‌نگ وره‌نگ شیایه گه‌له‌ك ده‌سته‌كه‌فتێن میژویى ب ده‌ستڤه‌بینیت.
هه‌روه‌سا ئاماژه دا روژا ژدایك بونا بارزانیێ نه‌مر كو یا هه‌ڤده‌مه دگه‌ل سه‌رهلدانا دهوك وسێمێلێ وپه‌سنا رولێ ڤى سه‌ركردێ كورد یێ نه‌ته‌وه‌یى كر كو گه‌له‌ك خه‌بات وتێكوشان كریه بو وێ یه‌كێ گه‌لێ كورد بگه‌هیته ئارمانجێن خو یێن نه‌ته‌وه‌یى وئاڤاكرنا ده‌وله‌تا كوردستانێ وگوت: بارزانیێ نه‌مر ومێژویا وى یا پرى سه‌روه‌رى یه وناڤ وخه‌باتا بارزانیێ نه‌مر یا ددلێ هه‌ر كورده‌كى دا ول هه‌ر جهه‌كێ كورد لێ هه‌بن.
هه‌روه‌سا گوت: ئه‌ڤرو ئه‌م یێ ل قوناغه‌كا نوو ودڤێت ئه‌م هه‌موو خه‌لكێ كوردستانێ ولایه‌نێن سیاسى وجه‌ماوه‌رى وپێشمه‌رگه هه‌ڤدوو بگرین كوردستانێ ب پارێزین وهه‌كه ئه‌م هه‌ڤدوو نه‌گرین دێ دگورێن كومه‌لدا ئێك ودوو گرین.
پاش هه‌لبه‌ستڤان موئه‌یه‌د ته‌یب هوزانه‌ك پێشكێشكر ده‌ربرین ژ ئازارێن په‌نابه‌ریا ده‌یكا شه‌هیده‌كى دكر كو پشتى نسكویا سالا 1975 هاتبونه ئاكنجیكرن ل ده‌ڤه‌را زه‌هدان ل سه‌ر سنورێ دناڤبه‌ر ئیران وه‌لاتێ پاكستانێ .
پاش فلمه‌كێ دكیومه‌نتارى ل سه‌ر سه‌رهلدانا دهوكێ وژدایك بونا بارزانیێ نه‌مر هاته نمایشكرن.
پاش ئاهه‌نه‌گه‌كا هونه‌رى هاته ل دارخستن وچه‌ندین ستران وپارچه موسیقه هاتنه پێشكێشكرن.
هه‌ژى گوتنێ یه هه‌ر ئه‌ڤرو سپێدێ 14-3-2019 ب هه‌لكه‌فتا ژدایك بونا بارزانیێ نه‌مر وسه‌رهلدانا دهوك وسێمێل وب ئاماده‌بوناچه‌ند به‌رپرسێن حزبى وحكومى هه‌وه‌كا دارچاندنێ ل ناڤ پاركێن به‌رامبه‌ر فه‌رمانگه‌هێن خزمه‌تكارى ل تاخێ نزارى هاته ئه‌نجامدان وچه‌ندین شتلێن دارا هاتنه چاندن.
ئەڤرۆنیوز، سەباح زوهێر:
لیژنا نەهێلانا_یارییێن ئاگرى یێن دەنگى وتیما چاڤدێرییا بازرگانی و ب هەماهەنگی دگەل لیژنا سەرپێچییان یا سەر ب رێڤەبەریا پولیسێن ئاكرێ سەره‌دان و پشكنینا چەندین ماركێت و جهێن فروتنا وان یارییێن ئاگری یێن قەدەغەكری كر و زێدەتر ژ (30) هزار جۆرێن وان یاریان هاتن دەستەسەركرن.
“شهاب ياسين” بەرپرسێ چاڤدێریا بازرگانی و سەرۆكێ لیژنا نەهێلانا دیاردا یاریێن ئاگری یێن دەنگى بۆ ئەڤرۆ نیوز ددا دیارکرن کو پێخەمەت بەرژەوەندییا گشتی یا وەڵاتیان و ب مەرەما نەھێلانا وێ دیاردا زیان بەخش و مەترسیدار لسەر ساخلەمیێ و دەروونێ ووەڵاتیان و ژینگەهێ ب گشتی و نەخاسمە زارۆکان ب تایبەتی، کو چەندین روودان ل دەمێ بەرێ ھاتبوونە رویدان وەکو وی زاروکێ ئێک ژ وان یاری یێن ئاگرێ ددەستی دا پەقی و (٣) پەنجە یێن خو ژ دەست داین، يان ئەو زارۆكێن توشی سوتنێ و كورەبووین، زێدەباری زیانێن دی یێن دروستکرنا روودانێن ئاگری و زیانێن دەروونی و بێزارکرنا وەڵاتیان.
خویاكر ژى كو ئەو كەلوپەلێن هاتین دەستەسەركرن یێن قەدەغەكرینە و فەرمان ژی بۆ رێڤەبەری و فەرمانگەهێن پەیوەندیدار ژ ئاسایش و و نەهێلانا گونەهباریان و پولیسێن ئاكرێ و زالگەهێن ئاسایشێ هاتینە شاندن بۆ دەستەسەركرنا وان جۆرێن یاریێن ئاگرى یێن دەنگى یێن قەدەغەكری.
دیار كر ژى كو بڕەكا زۆر ژ وان تەقەمەنیان هاتینە ده‌سته‌سه‌كرن لڤان چەند رۆژان و دێ ب بەردەوامی دووڤچوونا كەسێن بازرگانیێ ب ڤان جۆرێن یاریێن قەدەغەكری كەین و پێرابوونێن قانوونى ژی دێ ل هەمبەر وەرگرین.
نيشاندان