عەزیز هەورامی:

پێلەكا مەزن یا شەرمزاركرنا ئیرانێ ل سەر ئاستێ نێڤدەولەتی ل بەرامبەر مووشەكبارانكرنا هەولێرێ، كو داخواز دهێتە كرن هەموو پشتەڤانیەك بهێتە كۆمكرن و بڕیارەكا سیاسی ژ جڤاتا ئاسایشا نێڤدەولەتی بهێتە دەركرن، ئاسمانێ كوردستانێ یێ پاراستی بیت و چەكێ پێشكەفتی بدەستخوەڤە بینیت بۆ پاراستنا خوە.
جەلیلێ ئازادیخواز، سیاسەتمەدارێ رۆژهەلاتا كوردستانێ بۆ رۆژنامەیا (ئەڤرۆ) گوت: ل ئیرانێ تشتەك ب ناڤێ لۆژیكا دەولەتێ و دەولەتداریێ نینە، كارێ ئەوان ترس و تیرۆرە و دڤێت ب ئەوێ لۆژیكێ بنێریتە دەستهەلاتدارێن ئیرانێ، ئەوژی سیاسەتەكا زالە ل سەر دەزگەهێن بڕێڤەبرنێ ل ئیرانێ».
گوت ژی: هێرشكرن ل سەر هەولێرێ ژ ئالیێ لەشكرێ پاسدارێن ئیرانێ ڤە كریارەكا تیرۆرستی بوو بۆ ترساندنا كوردان، ئیران یا كەفتیە د ناڤ شەڕەكی دا كو ئەوێ ب خوە یێ هەلكری، د ناڤبەرا حەماسێ وئیسرائیلێ دا و نەشیایە هیچ كارڤەدانەك هەبیت، ل ئیراقێ و یەمەنێ توپبارانكرنا گرۆپێن حەشدا شەعبی و حۆسیان دهێتە كرن، بەلێ ئیران نەشێت هیچ بەرسڤەكێ بدەت، بەلێ دهێت و هێرشی هەرێما كوردستانێ دكەت، تاكو بێژیتە حەشدا شەعبی و حەسیان، ئەڤە بۆ پشتەڤانیا هەوە بوو».
خویاكر ژی» دەولەتا داگیركەر یا ئیرانێ، ب ناڤێ هەبوونا مۆسادا ئیسرائیلی هێرشی كوردستانێ دكەت، ئەڤە تۆرا هەوالگیریا ئیسرائیلی ل ئازەربایجان یا هەی بۆچی لێنادەت؟ ب گۆڕەی رۆژنامەیەكا توركی، ئیران پەترۆلێ ب رێكا توركیا دفرۆشیتە ئیسرائیلێ».
زێدەتر دبێژیت: هیچ بەلگەیەكا پشتڕاستكری نینە كو ئیسرائیلێ هەبوون ل هەولێرێ هەبیت، هەكە هەبوون ژی هەبیت، هیچ پەیوەندیەك ب ئیرانێ ڤە نینە و كوردستان هەرێمەكە ب فەرمی هاتیە نیاسین د چارچۆڤەیێ دەولەتەكێ دا یە، ئیران ب خوە یا شكەستیە و بۆ قەرەبووكرنا شكەستنا خوە هێرشی كوردستانێ دكەت».
ل دۆر كارڤەدانێن نێڤدەولەتی بەرامبەر ئیرانێ و شەرمزاركرنا وێ ل سەر ئاستێ جیهانی، گۆت: نوكە كارڤەدانا رژد بەرامبەر دەستدرێژیا ئیرانی ل سەر هەولێرێ ژ ئالیێ ئەمریكا و ئورۆپا و پاپایێ فاتیكانێ و ئیراقێ ب خوەژی ڤە یا هەی» .
هەروەسا دبێژیت» پێدڤیە شەرمزاركرنا مووشەكبارانكرنا هەولێرێ ل ئاستێ دەزگەهێن راگەهاندنێ و هەلوەست وەرگرتن ب تنێ نەمینیت، بەلكو میكانیزمەكا تایبەت بۆ هەبیت، و هەرێما كوردستانێ بزاڤێن رژد بكەت كو جڤاتا ئاسایشا نێڤدەلەتی و نەتەوەیێن ئێكگرتی بڕیاران بدەن بۆ پاراستنا ئەسمانێ كوردستانێ و ب هێزكرنا پێگەهێ كوردستانێ و چەكێ پێشكەفتی ب دەستڤەبینیت بۆ پاراستنا خوە».

سەرۆكێ حوكمەتا هەرێما كوردستانێ، مەسرور بارزانی سەرەدانا ئەكادیمیا ساند هێرست یا شاهانە یا لەشكری ل بریتانیا كر و د چارچۆڤەیێ ئەوێ سەرەدانێ دا راگەهاند، بریتانیا هەڤپشكەكا ب هێز یا هەرێما كوردستانێ و ئیراقێ یە.
سەرۆكێ حوكمەتا هەرێما كوردستانێ ڤیدیۆیا سەرەدانا خوە بۆ ئەكادیمیا ساند هێرست یا شاهانە یا لەشكری ل بریتانیا ل تۆرا جڤاكی یا ئینستیگرام بەلاڤكر و نڤیسی» د سەرەدانا من دا بۆ ئەكادیمیا ساند هێرست یا شاهانە یا لەشكری، گرنگیا هاریكاریێن بریتانیا بۆ چاكسازیێن پێشمەرگەی د ئینینە بیرا خوە».
ل دەستپێكا شەڕێ داعشێ، بریتانیا هەژمارەكا شیرەتكارێن لەشكری ل هەرێما كوردستانێ جهگیركرن كو مەشقێ ب هێزێن پێشمەرگەی دكەن.

ئەندامەكێ مەكتەبا سیاسی یا پارتی دیموكراتی كوردستان راگەهاند: بەردەوام ئیرانێ ب بەهانەیێن درەو و بێ بنەما، خەلكێ هەرێما كوردستانێ شەهید كریە. هەروەسا دبێژیت: هەرێما كوردستانێ چو جاران پشكەك نەبوو ژ ململانیێن رۆژهەلاتا ناڤین.
سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی دیموركراتی كوردستان ل پارێزگەها هەولێرێ د كۆنفرانسەكێ رۆژنامەڤانی دا گوت» ئارمانجا ئەوان هێرشێن بەردەوام ژ ئالیێ فرۆكەیێن بێ فرۆكەڤان، یان مۆشەكێن بالیستی ل سەر هەرێما كوردستانێ و فرۆكخانەیا نێڤدەولەتی یا هەولێرێ دهێنە كرن، پەكئێخستنا فرۆكخانەیێ و راگرتنا پرۆسەیا پێشكەفتن و ئاڤەدانكرنا هەرێما كوردستانێ یە».
سەربەست لەزگین ئاماژە ب ئەوێ چەندێ كر: مە ل هەرێما كوردستانێ بەردەوام بزاڤكریە كو مە باشترین پەیوەندی ل گەل دەوروبەرێن خوە هەبیت، چو جاران ژی نەبووینە پشكەك ژ ئەوان ناكۆكی و ململانێیێن بەردەوام ل دەڤەرا رۆژهەلانا ناڤین هەبووین و نوكە ژی هەنە. هەموو دەمان فاكتەرەكێ سەقامگیریێ بووین بۆ دەڤەرێ».
ب دیتنا سەربەست لەزگینی» گرژی و ئالۆزیێن نوكە یێن رۆژهەلاتا ناڤین كاریگەریا نەرێنی ل سەر گەلەك وەلاتان و ژ ئەوان ژی هەرێما كوردستانێ هەبوو. ب تایبەت ل ڤێ دووماهیێ هندەك وەلاتێن دەوروبەر ب ئاشكرا ب بەهانەیێن بێ بنەما هێرشی هەرێما كوردستانێ كر».
گۆت ژی: د دەمێ بۆری دا ئیراق وئیرانێ رێككەفتنەكا ئەمنی ئیمزا كربوو، هەرێما كوردستانێ رۆلەكێ سەرەكی د ئەوێ رێككەفتنێ دا هەبوو. مە ب رێكا ئەوێ رێككەفتنێ شیا مەترسی و دلتەنگیێن ئەمنی یێ ئیرانێ ل دەڤەرێ سنووری ڤەرەڤینین و رەوشەكا نوو پەیدابوو، بەلێ ئیرانێ ب هندەك بەهانەیێن بێ بنەما و دۆر ژ راستیێ، خەلكێ سڤیل یێ مە شەهید دكەت و وەلاتێ مە مۆشەک باران دكەن».

بەرپرسێ فەرمانگەها پەیوەندیێن دەرڤە یێن حوكمەتا هەرێما كوردستانێ راگەهاند، بۆ ڤەشارتنا ئەوێ تاوانا ل بەرانبەر هەرێما كوردستانێ ئەنجامدای، ئیرانێ كۆمەكا درەوان ڤەهاندینە ب فۆتۆشۆپی كو دیاربوو هەموو ددورن ژ راستیێ و جڤاكێ نێڤدەولەتی ژ ئەوان جۆرە روودانان یێ بەرپرسیارە و پێدڤیە رێگریێ ل وان جۆرە دەستدرێژیان بكەت».
دوهی دوشەمبی 22/1/، 2024سەفین دزەیی، بەرپرسێ فەرمانگەها پەیوەندیێن دەرڤە یێن حوكمەتا هەرێما كوردستانێ د كۆنفرانسەكێ رۆژنامەڤانی دا گوت» هەرێما كوردستانێ هەڤسنۆرا ئیرانێ یە و ئەوا ئیران ل گەل هەرێما كوردستانێ دكەت مافێ هەڤسنۆریێ نینە، هەڤدەم هەرێما كوردستانێ هیچ دەمەكی گەف نەبوو ل سەر هەڤسنۆرێن خوە و هەردەم دەستێ دۆستایەتیێ درێژكریە».
سەفین دزەیی گۆت ژی: دخوازین ئەڤە دووماهی نەخوەشیا هەموو ئالیەكی بیت، روودانێن ب ڤی شێوەی دوبارە نەبن. هەروەسا جڤاكێ نێڤدەولەتی ژ ئەڤان جۆرە رودانان یێ بەرپرسیارە و پێدڤیە رێگریێ ل ئەڤان جۆرە دەستدرێژیان بكەت».
ل دۆر ئەوان هەردو شاندێن كو حوكمەت و جڤاتا نوونەرێن ئیراقێ هنارتین بۆ دووڤچونا هێرشا ئیرانێ ل سەر باژێرێ هەولێرێ، سەفین دزەیی دبێژیت» قاسم ئەعرەجی (شیرەتكارێ ئاسایشا نیشتمانی یا ئیراقێ) د داخۆیانیا خوە دا دیاركریە كو ئەو خانییە جهەكێ ئاكنجیبوونێ بوو و خێزان تێدا ژیایە. بۆچوونا شاندێ جڤاتا نوونەرێن ئیراقێ ژی ب هەمان شێوەی بوو. بەلێ پاشی ئەو ب خوە دێ هووردەكاریان بەلاڤكەن و هێشتا ڤەكۆلین ب دوماهی نەهاتیە».
سەبارەت گازریكرنا قۆنسلێ ئیرانێ ل هەرێما كوردستانێ بۆ پێداچوونێ د پەیوەندیێن هەرێما كوردستانێ و ئیرانێ دا، پشتی ئەوێ هێرشا مووشەكی یا ئیرانێ ل سەر هەرێما كوردستانێ، بەرپرسێ فەرمانگەها پەیوەندیێن دەرڤەیێن حوكمەتا هەرێما كوردستانێ ئاماژەكر» حوكمەتا هەرێما كوردستانێ گازی نەكریە، ل ئاستێ وەزارەتا دەرڤە یا حوكمەتا فیدرالی یا ئیراقێ بالیۆزێ ئیرانێ ب توندترین شێوە هاتیە گازیكرن، هەروەسا ل چەندین وەلاتێن دی ژی هاتینە گازیكرن. چونكە پێشڕەو دزەیی بۆ دەمێ چەندین سالان ل سوید ژیایە و رەگەزنامەیا سویدی هەیە. هەڤژینا ئەوی ژی رەگەزنامەیا هولەندی هەیە، ل وێرێ ژی بالیۆزێ ئیرانێ هاتیە گازیكرن، ئەم ژی ئەوا پێدڤی بیت ب گۆڕەی روودانان بێگومان دێ كەین».

پشتی هێرشا مووشەكی یا لەشكرێ پاسدارێن ئیرانێ ل سەر هەولێرێ كو بوو ئەگەرێ شەهیدبوون و برینداربوونا هەژمارەكا وەلاتیێن سڤیل، راگەهاندنا ئەرەبی ب گرنگی ڤە باس ل شەرمزاركرن و كارڤەدانێن ئەوێ هێرشێ دكەن ل سەر ئاستێ جەماوەری و حكومی ل هەرێما كوردستانێ و ئیراقێ.
مالپەڕێ (سكای نیوز ئەرەبی) د راپۆرتەكێ دا ل دۆر هێرشا ئیرانێ ل سەر هەولێرێ بەلاڤكر» ئیراق ئەو ئاخڤتنێن ئیرانێ بۆ بەهانە ئینان بۆ هێرشا خوە ل سەر هەولێرێ ب نەڕاست د هەژمێریت» و ل سەر زارێ بەرپرسێن وەزارەتا دەرڤە یا ئیراقێ و لژنەیا ڤەكۆلینێ یا فیدرالی ل دۆر روودانێ ئاماژە ب ئەوێ چەندێ دكەت « ب شێوەیەكی مەیدانی مە سەرەدانا جهێ روودانێ كر و هیچ بنگەهەكێ مۆسادا ئیسرائیلی نەبوو، بەلكو جهێ ئاكنجیبوونێ بوو».
هەروەسا مالپەرێ (الجزیرە نت) سەبارەت ئەوێ هێرشێ بەلاڤكر «ئیراق ل جڤاتا ئاسایشا نێڤدەولەتی دێ سكالایێ ل سەر ئیرانێ تۆمار كەت» وئاماژە ب ئەوێ چەندێ كریە كو بەغدا هێرشا لەشكرێ پاسدارێن ئیرانێ ب پێشێلكرنا سەروەری و قانوونێن نێڤدەولەتی د هەژمێریت و بەهانەیێن تەهرانێ ژی بۆ هەبوونا بنگەهێن ئیسرائیلی ل هەرێما كوردستانێ رەت دكەت.
رۆژنامەیا (العرب) ژی د راپۆرتەكا خوە دا باس ل ئەوێ چەندێ كریە» هەرچەندە ل سەر ئاستێ فەرمی حوكمەتا ئیراقێ ب توندی هێرشا مۆشەكی یا ئیرانێ ل سەر هەولێرێ شەرمزاركریە، بەلێ ئالیێن چارچۆڤەیێ هەماهەنگیێ بۆ شەرمزاركرنا ئەوان هێرشان تووشی ئیحراجەكا مەزن بووینە و هەتا نوكە ژی ب شێوەیەكێ راستەوخوە هیچ بەیاننامەیەك بۆ شەرمزاركرنا ئەوان هێرشان نەبوو، د دەمەكی دا پێشتر هەلوەستێ توند بەرامبەر هێرش و تۆپبارانێن لەشكرێ توركیا هەبوو».
مالپەرێ (بی بی سی ئەرەبی) ژی ب گرنگی ڤە باس ل روودانا هێرشا ئیرانێ و كارڤەدانا وێ كریە و د پشكەكێ دا ب ناڤێ ( بەرسڤەكا ب هێز ل دۆر توپبارانكرنا هەولێرێ) ئاماژە ب رەتكرنا دیدارا حسێن ئەمیر عەبدوللاهیان، وەزیرێ دەرڤەیێ ئیرانێ ژ ئالیێ مەسرور بارزانی، ڤە سەرۆكێ حوكمەتا هەرێما كوردستانێ ل كۆڕبەندی ئابۆریێ جیهانی ل داڤۆس ل سویسرا و خوەنیشادانێن جەماوەری ل باژێرێن هەرێما كوردستانێ دكەت.
ژ ئالیێ خوەڤە، رۆژنامەیا (العربی الجدید) دووڤچونەكا رۆژنامەڤانی بۆ پرسا هێرشێن مۆشەكی یێن ئیرانی ل سەر هەولێرێ كریە و ئاشكرا كریە كو ئیران چاڤەڕێی ئەوێ شەرمزاركرنا جەماوەری و كارڤەدانا توند نەبوو، لەوما ل بەغدا بزاڤێن دبلۆماسی دەستپێكریە بۆ دەربازكرنا ئەوان فشارێن ل سەر تەهرانێ دروست بووین.
ئەوێ رۆژنامەیێ باس ل كۆمبوونێن ئەڤێ دووماهیێ یێن بالیۆزێ ئیرانێ ل ئیراقێ ل گەل بەرپرسێن بلند یێن حوكمەتا ئیراقێ كریە و بەلاڤكر» ل رۆژێن بهێن دا ژی دا كەسایەتیێن سیاسی و لەشكری یێن دی یێن ئیرانێ ژی دێ سەرەدانا بەغدا كەن بۆ دانوستاندنێ ب ئاراستەیا هێمنكرنا رەوشێ، پشتی كو تورەییەكا مەزن ل جادەیا هەرێما كوردستانێ و ئیراقێ دروستبووی بۆ پێشێلكرنا سەروەریا وەلاتێ ئەوان».
مالپەڕێن (الحدث) و (العربیە) ل شەڤا هێرشا ل سەر هەولێرێ، دووڤچون بۆ روودانێ كریە و گازیكرنا بالیۆزێ ئیرانێ ژ ئالیێ وەزارەتا دەرڤە یا ئیراقێ ڤە بۆ ئەوێ چەندێ ب شێوەیەكێ فەرمی نەرازیبوونێ دیاربكەت ل بەرامبەر هێرشێن مۆشەكی یێن ئیرانێ ل سەر هەولێرێ وەكو ئێك ژ هەلوەستێن توند یێن حوكمەتا ئیراقێ بەرامبەر ئیرانێ باسكریە و بەیاننامەیا جڤاتا ئاسایشا هەرێما كوردستانێ ژی بۆ رەتكرنا بەهانەیێن ئیرانێ بۆ ئارمانجگرتنا بنگەهەكێ مۆسادا ئیسرائیلی ل هەرێما كوردستانێ، جهێ سەرنجا ئەوان هەردو مالپەران بوو وەكو ئێك ژ كارڤەدانان.
رۆژنامەیا (الشرق اڵاوسط) یا لەندەنی ژی ل دۆر بێ هەلوەستیێ ل شەرمزاركرنا هێرشێن سەر هەولێرێ ئاماژە ب ئەوێ چەندێ كر» سەركردەیێن شیعی ل گەل ئەوێ چەندێ دا نینن كو ئیران هێرشێن مۆشەكی ل سەر هەرێما كوردستانێ ئەنجام بدەت و باس ل ئەوێ چەندێ ژی كریە، تەهران دخوازیت فشارێن ئەمریكا ل سەر حوسیێن یەمەنێ ب ڤەكرنا بەرەیەكێ دی كێمتر بكەت و ئالۆزیێن دەریا سۆر ڤەگوهۆزیت بۆ نێزیك سنۆرێن خوە».
مالپەرێ (الحرة) سەبارەت سكالایا ئیراقێ ل جڤاتا ئاسایشا نێڤدەولەتی ل سەر هێرشێن ئیرانێ سەرنج بۆ ئەوێ چەندێ راكێشایە كو ئێكەمین جارە نەرازیبوونا بەغدا بەرامبەر تەهرانێ د دەمێ بۆری دا بگەهیتە ئەوی ئاستی و ب پێشڤەچوونەكا نوو د پەیوەندیێن د ناڤبەرا هەردو وەلاتان دا دانایە، دوپاتی ل ئەوێ چەندێ ژی هاتیە كرن كو دوبارەبوونا هێرشێن ئیرانێ و رێزنەگرتن ل سەروەریا ئەوی وەلاتی وەكریە نەرازیبوون ببنە فشارەكا مەزن ل سەر حوكمەتا ئیراقێ لەوما نەچارە پێرابوون و هەلوەستێ جوداتر بەرامبەر ئیرانێ بگریتە بەر.

چاڤدێرێن سیاسی دیار دکەن، دامەزراندنا کۆمارا کوردستانێ بەری ٧٨ سالان نیشا ددەت کوردان هەردەم بزاڤا ڤێ یەکێ یا کری کو ل سەر ئاخا خوە ئازاد بژین، لێ مخابن د ئاستێ هەرێمی و نێڤدەولەتی دا هەردەم دژبەریا کوردان یا هاتیە کرن، لێ خەباتا کوردان بۆ ئازادیێ و ئاڤاکرنا دەولەتا کوردی هەتا نها ژی یا بەردەوامە.

د. حەکیم محەمەدی چاڤدێرێ سیاسی ل رۆژهەلاتێ کوردستانێ دیار کر، بەری ٧٨ سالان ب سەرۆکاتیا پێشەوا قازی محەمەد کوردان بریارەکا گەلەک گرنگ و دیرۆکی دا، کوردان بۆ هەموو جیهانێ دیار کر وان دڤێت ل سەر ئاخا خوە ب رەنگەکێ ئازاد بژین، بریارا دیرۆکی یا راگەهاندنا کۆمارا کوردستانێ رەتکرنا پیلانێن دوژمنان بوو، بزاڤا گەلێ کورد بۆ ئازادیێ و دیموکراسیێ بوو، چونکی کۆمارا کوردستانێ د ناڤ دلێ سیستەمێ پاشایەتی یێ ئیرانێ دا هاتە دامەزراندن و وی دەمی کوردان بۆ هەموو جیهانێ سەلماند ئەو ل گەل پێشکەفتنێ و دیموکراسیێ و پێکڤەژیانێ نە و گۆت: (لێ مخابن ئەم کورد ناڤ خوە دا ئێکگرتی نەبوون و ناکۆکیێن وان گەلەک هەبوون و هەم ژی د ئاستێ هەرێمی و نێڤدەولەتی دا گەلەک دژبەریا کۆمارا کوردستانێ هاتە کرن، پیلان ل دژی کۆمارا کوردستانێ هاتنە گێران و کورد ژی وی دەمی لاواز بوون و نەشیان ل هەمبەر ئێرشێن تەهرانێ خوەراگر بن و ژ بەر ڤێ یەکێ ژی کۆمارا کوردستانێ ل باژێرێ مهابادێ ژناڤچوو).
کەریم سەدیقی چاڤدێرێ سیاسی ژی دیار کر، براستی ئەڤرۆکە رۆژەکا گەلەک گرنگ و گەشە د دیرۆکا گەلێ کوردستانێ دا، ب سەرۆکاتیا پێشەوا قازی محەمەد و ب پشکداریا بارزانیێ نەمر و هەڤالێن وی کۆمارا کوردستانێ بەری ٧٨ سالان ل باژێرێ مهابادێ هاتە ئاڤاکرن، ئەو یەک پێنگاڤەکا گەلەک گرنگ بوو، کۆمارا کوردستانێ وی دەمی پێدڤی ب پشتەڤانیا دەرڤە هەبوو، لێ رەوشەکا گەلەک جودا ل دەڤەرێ هەبوو و هێزێن جیهانی ژی ژ بەر بەرژەوەندیێن خوە یێن ل گەل تەهرانێ پشتەڤانی ل کۆمارا کوردستانێ نەکرن و ژ بەر ڤێ یەکێ ژی د دەمەکێ کورت دا کۆمار ژناڤچوو و گۆت: (لێ کۆمارا کوردستانێ ئێکە ژ دەستکەفتێن نەتەوەیی یێن گەلێ کوردستانێ و هەموو کورد ئەڤرۆکە شانازیێ ب کۆمارا کوردستانێ دکەن، کوردان بەری ٧٨ سالان ئەڤ پەیامە دا جیهانێ کو ئەو بندەستیێ، تەپەسەریێ قەبوول ناکەن و وان دڤێت ب رەنگەکێ ئازاد بژین، خەباتا کوردان هەتا نها ژی بۆ ئازادیێ یا بەردەوامە و هێڤیدارین د دەمەکێ نێزیک دا کورد ژی وەکو هەموو گەلێن دی یێن جیهانێ بگەهنە مافێن خوە و دەولەتا کوردی بهێتە ئاڤاکرن).
ب هەلکەفتا ٧٨ سالیا دامەزراندنا کۆمارا کوردستانێ ل باژێرێ مهابادێ یێ رۆژهەلاتێ کوردستانێ، هژمارەک زێدە ژ پارتێن سیاسی یێن کوردستانێ، کەسایەتیێن سیاسی و چالاکڤانێن سیاسی و جڤاکی ب داخۆیانیێن جودا جودا دیار کرن دڤێت هەموو پارتێن سیاسی وانەیێن پێدڤی ژ ئەگەرێن ژناڤچوونا کۆمارا کوردستانێ وەربگرن و نها ب دل و جان پشتەڤانیێ ل هەرێما کوردستانێ و دەستکەفتێن کوردان بکەن.

سەرۆكێ ئەوێ لژنەیا جڤاتا نوونەرێن ئیراقێ كو سەرەدانا مالا شەهید پێشڕەو دزەیی كری، رادگەهینیت، ئەو خانی جهێ ئاكنجیبوونا وەلاتیێن سڤیل بوو، نەكو بنگەهەكێ سیخوڕی بوو.
دوهی ئێكشەمبی 21/1/2024، لژنەیەكا تایبەت یا جڤاتا نوونەرێن ئیراقێ كو ژ هەژمارەكا ئەندامێن هەردو لژنەیێن ئاسایش و بەرگریێ و پەیوەندیێن دەرڤە پێكهاتبوو، گەهشتبوو هەرێما كوردستانێ و پاشی ل گەل رێبەر ئەحمەد، وەزیرێ ناڤخوە ل هەرێما كوردستانێ سەرەدانا خانیێ شەهید پێشڕەو دزەیی كربوو، ئارمانجا سەرەدانێ، ڤەكۆلین بوو ل دۆر ئەوێ هێرشا ژ ئالیێ لەشكرێ پاسدارێن ئیرانێ ڤە ل سەر ئەوی خانی هاتیە كرن.
عەباس زاملی، سەرۆكێ ئەوێ لژنەیا تایبەت یا جڤاتا نوونەرێن ئیراقێ د كۆنفرانسەكێ رۆژنامەڤانی دا گۆت: خانیێ پێشڕەو دزەیی ب چەند مووشەكان بوویە ئارمانج كو ب دیتنا من مووشەكێن بالیستی بوون و زیانێن مەزن پەیدا كرینە».
عەباس زاملی گوت ژی» ئەو خانی جهێ ئاكنجیبوونا وەلاتیێن سڤیل بوو و هیچ ئاماژەیەك نینە كو بنگەهەكێ سیخوڕی بیت».
ناڤبری ئاماژە ب ئەوێ چەندێ ژی كر» هێرشێن مووشەكی یێن ئیرانێ ل سەر هەرێما كوردستانێ هیچ بەهانەیەك بۆ نینە و پێشێلكرنا سەروەریا ئیراقێیە. هەكە ب راست بنگەهەكێ سیخوڕی یێ هەر وەلاتەكی ل ناڤ هەرێما كوردستانێ هەبیت، ئیران دشیا ب رێكا هەردو حوكمەتێن هەرێما كوردستانێ و ئیراقێ ب دانوستاندنێ ئەوی بابەتی چارەسەر بكەت، نەكو هێرشا مووشەكی بكەتە سەر خانیێن وەلاتیێن سڤیل».
هەڤدەم شاخەوان عەبدوللا، جێگرێ سەرۆكێ جڤاتا نوونەرێن ئیراقێ كو ل گەل لژنەیا جڤاتا نوونەران سەرەدانا خانیێ شەهید پێشڕەو دزەیی كربوو، د ئەوی كۆنفرانسێ رۆژنامەڤانی دا گۆت: مە وەكو جڤاتا نوونەرێن ئیراقێ داخواز ژ حوكمەتا فیدرالی كریە پێنگاڤێن كریاری بۆ رێكگرتنێ ل ئەوان هێرشێن بەردەوام ل سەر هەرێما كوردستانێ دهێنە كرن بلەزتر بكەت و پێدڤیە سنۆرەك بۆ ئەوان هێرشان بهێتە دانان كو خەلكێ سڤیل دبیتە ئارمانج».
شاخەوان عەبدوللا گۆت ژی» جادەیا ئیراقێ و هەرێما كوردستانێ ژی چاڤەڕێی زێدەتر ژ جڤاتا نوونەران و حوكمەتا ئیراقێ دكەت بۆ ئەوێ چەندێ ئێدی هەلوەستێ وێ ب شەرمزاركرنێ ب دوماهی نەهێت، بەلكو پێنگاڤێن كریاری و نێڤدەولەتی بهاڤێژیت بۆ ئەوێ چەندێ ئەڤ هێرشە دوبارە نەبن و ب دوماهی بهێن».
جێگرێ سەرۆكێ جڤاتا نوونەرێن ئیراقێ دوباتكر» ئەم وەكو جڤاتا نوونەران پشتەڤانیێ ل هەموو ئەوان پێنگاڤان دكەین كو محەمەد شیاع سۆدانی، سەرۆك وەزیرێن ئیراقێ ل دۆر هێرشا مووشەكی ل سەر هەولێرێ هاڤێتین».
هەروەسا گۆت: ژ نوكە و پێڤە خەلكێ ئیراقێ ژ مە قەبوول ناكەت هەلوەستێ مە ل دۆر ئەوان هێرشێن ژ ئالیێ ئیرانێ ڤە ل سەر هەرێما كوردستانێ دهێنە كرن تنێ شەمزاركرن بیت، بەلكو پێدڤیە پێنگاڤێن كریاری بگرینە بەر».
ژ ئالیێ خوەڤە رێبەر ئەحمەد، وەزیرێ ناڤخوە ل حوكمەتا هەرێما كوردستانێ گۆت: مە هەموو پێزانینێن پێدڤی ل دۆر خانیێ شەهید پێشڕەو دزەیی و هێرشا مووشەكی یا لەشكرێ پاسدارێن ئیرانێ ل سەر هەولێرێ یێن داناینە بەر دەستێ لژنەیا جڤاتا نوونەرێن ئیراقێ».
رێبەر ئەحمەد دوپاتكر ئەو جهێ ژ ئالیێ لەشكرێ پاسدارێن ئیرانێ ڤە بوویە ئارمانج جهێ ئاکنجحبوونا سڤیلانە و خانیێ سەرمایەدارەكێ سەركەفتی و ب رێز یێ باژێرێ هەولێرێ یە. دەمێ چەندین سالان بوو خێزانا وی تێدا دژیا و ئەوان هیچ پەیوەندی ب پرسێن سیاسی و لەشكری ڤە نەبوو. هەموو ئەو بنەمایێن دهێنە باسكرن، دبێ بنەمانە.

هەلەبجە، عەزیز هەورامی:

چاڤدێرەكێ سیاسی دبێژیت، ئیران شەڕی ب هەرێما كوردستانێ د فرۆشیت د دەمەكی دا ل بەرەیێن شەڕی ل گەل ئەمریكا و ئیسرائیلێ ل یەمەن و غەزە و ئیراقێ شكەستن ئینایە، هەروەسا ئاماژەكر كو ئیرانێ دڤیا ب ئەوێ هێرشا خوە یا ترسنۆك خوە دیار بكەت، بەلێ رایا گشتیێ جیهانی و ناڤخوەیا ئیرانی ئەو كریارا پاسدارێن ئیرانێ شەرمزاركر.
دلشاد نامق، چاڤدێرێ سیاسی بۆ رۆژنامەیا (ئەڤرۆ) گوت» بەردەوامیا هێرشێن ئیرانی ل سەر هەولێرا پایتەختا كوردستانێ، پشكەكە ژ هنارتنا كێشەیێن خوە بۆ دەرڤەی سنۆرێن خوە، ئەو كێشەیا خویناوی ئەوا د ناڤبەرا ئیرانێ و ئەمریكا دا هەی وەكریە هێرشێ ل سەر هەولێرێ بكەت».
گۆت ژی: بەهانەیا ئیرانێ بۆ هێرشكرنێ ل سەر هەولێرێ گەلەك یا لاوازە و نەشیایە باوەریێ هەتا بۆ دۆستێن خوە ژی ل دۆر ئەوێ هێرشێ دروست بكەت، و نوكە نزانیت دێ چاوا خوە ژ ئەوێ رەوشا تێكەفتی ژ ئەگەرێ ئەوێ كریارا تیرۆرستی رزگار بكەت.
پتر گۆت: شەهیدكرنا زارۆكێن د بن ئێك سالیێ دا و هێرشكرن ل سەر خانیێن وەلاتیێن سڤیل، ب ناڤێ هێرشكنێ ل سەر بنگەهێ مۆسادێ شكەستن و لاوازیا لەشكرێ پاسدارێن ئیرانێ دیاردكەت».
هەروەسا دبێژیت» هێرشا لەشكرێ پاسدارێن ئیرانێ خوە نمایشكرن و ڤەشارتنا شكەستنێن خوە بوو، كو ل گەلەك ژ سیاسەتێن خرابێن خوە شكەستن ئینایە، شەڕێ غەزە د ناڤبەرا حەماس و ئیسرائیلێ دا، تەپبارانكرنا حوسیان ژ ئالیێ ئەمریكا و بریتانیا ڤە، شكەستن بۆ ئیرانیان دهێنە هەژمارتن كو ئیرانێ ئەو دو دەولەتە خستینە ئەوی شەڕی كو زیانێن مەزن گەهشتینێ».
خۆیاكر» گەلێن ئیرانێ هیچ باوەریەك ب حوكمەت و لەشكرێ وەلاتێ خوە نەمایە، ئەو پرۆپاگندەیێن دبێژن كو ل هەولێرێ بارەگەهێ مۆسادێ توپبارانكریە، ب تمامی یا بێ بنەما بوو، گەلێ ئیرانێ ژی كارێ ترسنۆك یێ لەشكرێ پاسدارێن وەلاتێ خوە شەرمزار دكەن كو ژن و زارۆك و زەلامێن سڤیل شەهید و بریندار كرینە.

سەرۆك مەسعود بارزانی پێشوازی ل ئەلینا رۆمانۆسكی، بالیۆزا ئەمریكا ل ئیراقێ كر. ددیدارەكێ دا بالیۆزا ئەمریكا پشتەڤانیا وەلاتێ خوە بۆ گەلێ كوردستانێ ژ بەر توپبارانكرنا بێ بنەما یا لەشكرێ پاسدارێن ئیرانێ بۆ سەر هەرێما كوردستانێ راگەهاند و دیاركر ئەوێن بووینە قوربانی خەلكێ سڤیلن.
سەرۆك بارزانی ئاماژەكر كو هێرشا لەشكرێ پاسداران ستەمەكا مەزن بوو ل هەموو گەلێ كوردستانێ هاتیە كرن و پێشێلكرنا سەروەریا ئیراقێ و هەرێما كوردستانێ بوو، بەلێ ئەو جۆرە هێرشە ئیرادەیا گەلێ كوردستانێ ناشكێنن بەلكو ب هێزتر دكەن و ئاماژەكر كو دخوازین مە پەیوەندیێن دۆستانە و ب هێز ل گەل وەلاتێن دەوروبەر هەبن، بەلێ ناچینە ژێر بارێ سەپاندنا بڕیارێن تاكلایەنە و خوەسەپاندنێ. ژ پێخەمەت وێ چەندێ ژی دا دەست ژ بهایێن پیرۆز یێن گەلێ مە و دۆزا وی یا رەوا ل بن هیچ هێرشەك و فشارەكێ بەرنادەین.

سەرۆك مەسعود بارزانی پێشوازی ل ستیڤن هین، بالیۆزێ بریتانیا ل ئیراقێ كر و د دیدارەكێ دا، بالیۆزێ بریتانیا پشتەڤانیا وەلاتێ خوە بۆ خەلك و هەرێما كوردستانێ دیاركر ل بەرانبەر ئەوێ هێرشا بێ بنەما كو ژ ئالیێ لەشكرێ پاسدارێن ئیرانێ ڤە ل سەر هەرێمێ هاتیە كرن. سەرۆك بارزانی سوپاسیا هەڤسۆزی و هەڤخەمیا حوكمەتا بریتانیا كر و دوپاتكر كو هەردەم دخوازین پەیوەندیێن دۆستانە و ب هێز یێن هەرێمێ و ئیراقێ ل گەل وەلاتێن دەوروبەر ل سەر بنەمایێ رێزگرتنا هەڤپشك بیت، هەروەسا دیاركر كو ئەو هێرشا ئیرانی ل سەر هەولێرێ ب بهانەیێن نەراست و بێ بنەما بوون و پێشێلكرنا سەروەریا ئیراقێ و هەرێمێ بوو.