ئەڤرۆ، بارزان مزووری:

كانیوار جبرائیل محەمەد رێڤەبەرێ‌ پرۆژێ‌ ئەندەر پاسێن دهوك بۆ ئەڤرۆ نیوز گۆت: سوبەهی رێكکەفتی 9/12/2020 هەماهەنگی دگەل رێڤەبەریا هاتن و چوونا پارێزگەها دهوك جادا سەرەكی یا بارزان ئەوا دكەڤیتە نێزیك پاركا ئازادی دهێتە گرتن و هاتن و چوون دێ‌ هێتە ڤەگوهاستن بۆ هەر دو  رێكێن دەوروبەری پرۆژەی بۆ دانانا گێردەرا بۆ پاراستنا گیانێ‌ وەلاتیان ژ هەر رویدانەكا نەچاڤەرێ‌ كری.

ناڤهاتی خویاكر ئەڤ رێكە بۆ ماوێ‌ دو هەیڤان دهێتە داخستن ئەو گێردەرێن نها ل كارگەها كاڤین  گرۆپ كارگەها دروستكرنا دنگ و گێردەرو قالبێن پریكاس ل قەزا شێخان هاتیە دانان بۆ ڤی پرۆژەی دهێنە ڤەگوهاستن.

ئەڤرۆ نیوز، عەلی حاجی :

ل رێککەڤتی ٢٣/١١/٢٠٢٠ێ ب ئامادەبوونا عەمید شەعلان ئەحمەد رێڤەبەرێ پولیسێن پارێزگەها دهوکێ و نوینەرێ قایمقامێ زاخۆ، گهورین د پوستێ رێڤەبەریێن پولیسێن قەزا زاخۆ دا هاتنە کرن .

د ئەنجامێ وان گهورینان دا و د رێ و رەسمەکێ دا مقەدەم نزار سلێمان حاجی وەکو رێڤەبەرێ نوو یێ پولیسێن قەزا زاخۆ ل جهێ مقەدەم سەعەد عومەری هاتە دانان، ژلایێ خوە ڤە ژی رێڤەبەرێ پولیسێن پارێزگەها دهوکێ داخازا سەرکەڤتنێ بۆ رێڤەبەرێ نوو یێ پولیسان خواست و سوپاسیا رێڤەبەرێ بەری نوکە یێ پولیسێن قەزا زاخۆ کر بەرامبەر وێ خزمەتا د سالێن بوری دا پێخەمەتی ئارامیا قەزا زاخۆ دا ئەنجام داین.

ئەڤرۆ نیوز، عەلی حاجی :

رێڤەبەرێ ناحیا رزگاری د داخویانیەکێ دا بۆ ئەڤرۆ نیوز دیار کر ئەندەر پاسا زاخۆ گەهشتیە د قوناغێن دەست نیشان کرنا نەخشەیەکێ و پێدڤیە رێیەک ژی بهێتە دیتن بۆ نەهێلا قەرەبالغیێ ل جاددەیا زانکویا زاخۆ.

زێدەتر ئەندازیار سەروەر سەعید گۆت: (نوکە دا سێ نەخشە بۆ ئەندەر پاسا زاخۆ هاتینە دەست نیشان کرن و هێشتا بریار ل سەر دەست نیشان کرنا نەخشەیەکێ نەهاتیە دان بەلێ پێدڤی یە ئەو نەخشەیێ دهێتە دەست نیشان کرن ببیتە ئەگەرێ کێم کرنا قەرەبالغیا ترومبێلان ل دەف زانکویا زاخۆ ژبەر کو قەرەبالغیەکا زێدە ل سەر وێ جاددەیێ دروست دبیت،بۆ ڤێ چەندێ ژئ مە دگەل رێڤەبەریا هاتن و چوونا زاخۆ پەیوەندی هەنە و وان ژی ژلایێ خوە ڤە پلانەکا باش هەیە ب رەنگەکێ کو ئەو ترافیک لایت نێزیک زانکویا زاخۆ نەمینیت و ئەم چاڤەرێ نە هەتا کو نەخشەیێ ئەندەر پاسێ بهێتە ئێکلا کرن دێ ل دویف دا پلانەک ژی هێتە دانان بۆ نەمانا قەرەبالغیێ ل سەر وێ جاددەیێ).

ناڤهاتی گۆت ژی دروستکرنا وێ ئەندەر پاسا نێزیک نیو زاخۆ بەر ب کومپانیەکا نافخۆ کەفتی یە و ب دوماهی ژی هاتیە و وێ کومپانیێ ژی پشکنینێن وێ جاددەیێ ژی کرینە پێخەمەتی وێ چەندێ هەر دەما رەزامەندی ل سەر نەخشەیەکێ هاتە دان ئێکسەر دەست ب کاری بن و پارەیەکێ تەخمین کری هاتیە دانان بەلێ پارەیێ دەست نیشان کریێ دروست بۆ ئەندەر پاسێ ئێکلا نەبوویە ئەو ژی دێ دگەل نەخشەیی هێتە ئێکلا کرن.

ئەڤرۆ نیوز، عەلی حاجی:

د سێ روودانێن جودا دا ل باژێرێ زاخۆ رۆژا چارشەمبیێ ١٨/١١/٢٠٢٠ چار کەسان گیانێ خوە ژ دەست دان و دو کەس ژی بریندار بوون.

ئەمیر عەلی بەرپرسێ راگەهاندنا ساخلەمیا زاخۆ بۆ ئەڤرۆ نیوز گۆت: (ل دەمژمێر ٢:٠٠ی پشتی نیڤرۆ ل جاددەیا دادگەها نوو ل زاخۆ ترومبێلەکا راکرنا گلێشێ مالان خوە ل ئافرەتەکا ٥٠ سالی ددەت دکوژیت و ل دویف دا تەرمێ وێ ئافرەتێ بۆ پزیشکیا داد ل زاخۆ هاتە رەوانە کرن و ژلایێ خوو ڤە ژی پولیسێن زاخۆ لاپەرێن ڤەکولینێ بۆ وێ روودانێ ڤەکرینە).

ژلایێ خوە ڤە کومیسەر بەشیر یوسڤ ژ راگەهاندنا هاتن و چوونا زاخۆ بۆ ئەڤرۆ نیوز دیار کر  ل دەمژمێر ١:٣٠ێ نیڤرۆ ل سەر رێیا دهوک – زاخۆ نێزیک تونێلا زاخۆ ژ ئەگەرێ بلەز هاژوتنێ ترومبێلەکا کامری خوە ل ستونەکا هاتن و چوومێ ددەت و سێ کەسان د وێ روودانێ دا گیانێ خوە ژ دەست دان، هەر ل هەمان رۆژ و ل دەمژمێر ٨:٢٠ی شەڤ ل دەروازەیا زاخۆ بەرامبەری زانکویا زاخۆ د ئەنجاما روودانەکا هاتن وچوونێ دا دناڤبەرا پیک ئاپەک و کامریەکێ دا دوو کەس بریندار دبن و زیانێن ماددی ژی بەر ب وان ترومبێلان کەڤتن.