ئەڤرۆ نیوز، عەلی حاجی:

رێڤەبەرێ ناحیا رزگاری د داخویانیەکێ دا بۆ ئەڤرۆ نیوز دیار کر بۆ دەما سێ ڕۆژانە ژلایێ کومپانیا کاڤین گروپ ڤە دەست ب دروستکرنا سایدەکێ ژ ناحیا رزگاری بۆ زاخۆ هاتیە کرن .

زێدەتر ئەندازیار سەروەر سەعید دوسکی گۆت: (پشتی چاڤەرێبوونەکا درێژ و سەروکێ حکومەتا هەرێما کوردستانێ بەرێز مەسرور بارزانی بریارا دروست کرنا جاددەیا سایدێ ژ ناحیا رزگاری بۆ زاخۆ دەرکری،بۆ دەما سێ ڕۆژایە ژلایێ کومپانیا کاڤین گروپ ڤە دەست ب دروست کرنا وی سایدی هاتیە کرن ب درێژاهیا هەشت کێلومەتر و نیڤان و کوژمێ هەشت ملیار دیناران ژئ بۆ دروست کرنا وێ ژلایێ حکومەتا هەرێما کوردستانێ ڤە هاتینە تەرخان کرن،ل دویف وی دیزاینێ هاتیە دانان دێ د ماوەیێ سالەکێ دا ئەو سایدە هێتە دروست کرن بەلێ ل دویف گوتنێن کومپانیا جێبەجێکار کو وەسا دیار کری یە دێ دماوەیێ دوو هەیڤان دا کارێ خوە ب دوماهی ئینن بەلێ دگەل هاتنا بارانێ د نوکە دا دێ بیتە ئەگەر کو کومپانی بتنێ مفای ژ روژانێن کەش و هەوایێ نورمال ببینن و ئەڤە ژی دێ بیتە ئەگەر ژ دەمێ کومپانیێ دیار کری کو دەما دوو هەیڤایە زێدەتر بچیت،د گوتنێن کومپانیێ دا وەسا هاتە دیار کرن ژی کو ئەو دێ هەمی هێزا خوە ئێخیتە سەر وێ جاددەیێ ژبەر کو هەمی کەل و پەل و ترومبێلێن خوە ئیناینە سەر وێ جاددەیێ دا کو د زووترین دەم دا ب دوماهی بهێت،نوکە دا جاددە هاتیە گرتن و جاددە ژی دێ پیچ پیچە هێتە گرتن ب رەنگەکێ کو ئەو رێکە نەهێتە گرتن دا کو ئاستەنگی بۆ شوفێران دروست نەبیت) .

ناڤهاتی ئەو چەندە ژی خویا کر سایدێ ژ ناحیێ دچیتە باژێرێ زاخۆ دێ ب ئوڤەر پاسا زاخۆ ڤە هێتە گرێدان و ب وی رەنگی چو ئاریشەیێن خرابیا رێیان ل سەر وێ جادەەیا نێڤ دەولەتی نامینن .

ل دووماهیێ ئاشکرا کر پشکەکا جاددەیا ژ ناحیا رزگاری بۆ کومەلگەها دێرەبوونێ دچیت نیڤەرو مابوو نوکە ژی ژلایێ کومپانیەکا پارێزگەها دهوکێ کار تێدا دهێتە کرن و نێزیکی ٨٪ کار تێدا ب دووماهی هاتیە و ب کوژمێ پێنچ ملیار دیناران بۆ جاددەیا نیڤەرو مایی هاتبوونە تەرخانکرن و دشێن بێژین هەر ژ دەروازەیێ ئیبراهیم خەلیل هەتا دگەهیتە نێزیکی تونێلا زاخۆ کو ل دەڤەرێن نێزیکی چیایێ بێخێرێ دا دەرباز بیت دێ بیتە دو سایدی و جاددەیەکا نێڤدەولەتی و ئەڤە ژی دێ خزمەتەکا مەزن ل خەلکێ دەڤەرێ و کەرتێ بازرگانی کەت ژبەر کو ب درێژاهیا وێ رێکێ هەمی هاتیە دوساید کرن.

ئەڤرۆ نیوز، عەلی حاجی :

هاریکارێ سەروکێ زانکویا زاخۆ بۆ کاروبارێن قوتابیان بۆ ئەڤرۆ نیوز دیار کر ل دووڤ بریارا جڤاتا زانکویێ دێ ل دەستپێکا حەفتیا بهێت دێ قوتابیێن قوناغا ئێکێ ل زانکویا مە دەستپێکەت .

زێدەتر دکتور کاروان فەهمی گۆت: (پشتی بریارا جڤاتا زانکویا زاخۆ کو قوتابیێن قوناغا ئێکێ دەست ب دەوامێ بکەن دێ هەمی پێنگاڤێن بۆ وانەیێن ئونلاین وەکو دروستکرنا ئەکاوەنتەکێ د بەرنامەیێ مودل و چاوانیا ب کارئینا وێ بۆ قوتابی هێتە ئامادە کرن و ل دویف بریارا وەزارەتا خواندنا بلند و ڤەکولینێن زانستی قوتابیێن نوو هاتینە وەرگرتن دێ دەواما وان ژ قوتابیێن قوناغێن زێدەتر بیت ژبەر کو ژینگەهەکا نوویە ئەو قوتابی هاتینە تێدا، سەرباری ڤێ چەندێ هەمیێ ژی دێ رێکارێن ساخلەمیێ بەرچاڤ وەرگرین و پێدڤیە قوتابی هەمی رێکارێن ساخلەمیێ بجهـ بینیت و تێکەلیا قوتابی دگەل قوتابی یا کێم بیت) .

ل دوماهیێ گۆت ژی ژ ئەنجامێ سکالا قوتابیان ناڤێ ٢٩٣ قوتابیان ڤەگەریایە ڤە و ئەو دشێن دوبارە بهێنە زانکویێ و فورمێن خوە وەربگرن و دێ پشتی وی دەمی فورمێن وان دوبارە بۆ وەزارەتێ هێنە رەوانە کرن، هەر دیسان مە دگەل سەروک پشکان ئاخڤتیە کو هەکە کورسیێن ڤالە مابن د زانکویێ دا دێ زێدەتر دەلیڤێ ل بەرامبەر قوتابیان ڤەکەین یێ کو ناڤێ وان ل چو زانکو و پەیمانگەهان نەهاتی پێخەمەتی وێ چەندێ زێدەتر خزمەتا قوتابیان بکەین.