ئەڤرۆ نیۆز، قائید میرۆ:

بەرپرسەکێ پارتی ل کەرکووکێ داخوازێ ل ئیدارەیا کەرکووکێ دکەت ھاریکاریا دەزگەھێ خێرخوازیێ بارزانی بکەت ژ بۆ گەھاندنا ھاریکاریان بۆ کەرکووکێ.

دکتۆر محەمەد خورشید، بەرپرسێ لقێ پارتی ل کەرکووکێ بۆ ئەڤرۆ نیۆز دیارکر” بەری نوکە مە داخوازەک ئاراستەی دەزگەھێ خێرخوازیێ بارزانی کربو ھاریکاریان بسەر خەلکێ کەرکووکێ بەلاف بکەن، بەلێ ئیدارەیا کەرکووکێ وەک پێدڤی یا ھاریکار نینە و دەمەکێ زۆر بسەرڤەچوو ھەتا مۆھلەتا بەلافکرنا ھاریکاریان دایە دەزگەھێ بارزانی.

ئەڤی بەرپرسێ پارتی گۆتژی” ھندەک رێگری ھەنە بۆ گەھاندنا ھاریکاریان ژلایێ خالێن پشکنینێ یێن دچنە ناڤا کەرکووکێ.

دکتۆر محەمەد خورشید ئاماژەکر” ئەم داخوازێ ل ئیدارەیا کەرکووکێ دکەین ل خالێن پشکنینێ ھاریکاربن بۆ ڤەکرنا رێکێ و گەھاندنا ھاریکاریان بۆ خەلکێ کەرکووکێ، چونکە خەلکەکێ زۆرێ ھەژار ل کەرکووکێ پێدڤی ب ھاریکاریان ھەیە.

ئەڤرۆ نیۆز، قائید میرۆ:

گورەی پلانا وەزارەتا پەروەردێ ئەگەر رەوش تەنا ببیت دێ ل دەستپێکا ھەیڤا داھاتی دەست ب پڕۆسا خواندنێ ھێتەکرن ئەندامەکێ لیژنا خواندنا بلند ژی دبێژیت، تەمام کرنا خواندنا ئەڤسالە ژبەر کۆرۆنایێ یا بێ ئاستەنگ نابیت.

دکتۆر زێدان برادۆستی، ئەندامێ لیژنا پەروەردێ ل پەرلەمانێ کوردستانێ بۆ ئەڤرۆ نیۆز دیارکر” خواندنا ئەڤسالە دێ ب زەحمەت دووماھی ھێت، چونکە ھێشتا ڤایرۆسا کۆرۆنا وەک خوە مایە و رێو جھێن خۆپارێزیێ دھێنە بکار ئینان، گورەی پلانا وەزارەتا پەروەردێ ئەگەر ھەتا دووماھیا ڤێ ھەیڤێ ڤایرۆسا کۆرۆنا بەرەف کێمبوونێ بچیت دێ دەست ب پڕۆسا خواندنا بھێتەکرن، بەرۆڤاژی رەوش یا ھوسابیت قوتابخانە ناھێنە ڤەکرن.

ل دۆر خواندنا ئونلاین ژی دکتۆر زێدان برادۆستی ئاماژەکر” خواندنا ئونلاین بۆ ھەرێما کوردستانێ دڤێ قۆناغێ دا سەر ناگریت، چونکە پێدڤی خوە بەرھەڤکرنێ ھەیە و بجەئینانا سیستەمێ ئونلاین د شیانێن ھەرێما کوردستانێ دا نینە، چونکە سیستەمەکە پێدڤی ب رێکارێن خوە ھەنە.

ئەڤرۆ نیۆز، قائید میرۆ:

چەند رۆژەکە ھژمارەکا پەرلەمانتار و نوونەرێن ئێکەتیێ و بزاڤا گۆڕان ل دەزگەھێن راگەھاندنێ و تۆڕێن کۆمەلایەتی ھێرشی سەر حوکمەتێ دکەن و حوکمەتێ گونەھبار دکەن کو دێ مووچە ھێنە کێمکرن پەرلەمانتارەکێ پارتی ژی ئاشکراکر، ئەو کەس بێ وژدانن و تنێ پارتی دڤێ قەیرانێ دا یا ھاریکارە.

شوان زراری، پەرلەمانتارێ فڕاکسیۆنا پارتی ل پەرلەمانێ کوردستانێ بۆ ئەڤرۆ نیۆز دیارکر” خەلکەک بێ وژدانانە ھێرشی دکەتە سەر حوکمەتا ھەرێما کوردستانێ، ب تایبەتی ھژمارەک ژوان پەرلەمانتارێن بزاڤا گۆڕان و ئێکەتیێ نە ل ھەرێمێ و بەغدا، بەلێ پێدڤیە خەلکێ کوردستانێ ئەڤێ راستیێ بزانیت حوکمەتا ھەرێمێ ژ سێ لایەنێن سەرەکی پێک ھاتیە و ھەر بڕیارەکا بھێتەدان لدۆر ھەر پرسەکێ ئێکەتی و گۆڕان ژی تێدا پشکدارن و پارتی چەند یا پشکدارە ئەو زێدەتر.

ئەڤی پەرلەمانتارێ پارتی ئاماژەکر” دەمێ پێکئینانا حوکمەتێ ئێکەتی و گۆڕان بەرھەڤنەبوون د ئێک پۆستێ بەھرا خوە خوەشبن و نوکە ژی ئێک دینارێ ل بەھرا خوە خۆشنابن، بەلێ کوردستانێ د قەیرانەکا دژوار دا دەرباز دبیت و دخوازن بڕەڤن ژ بەرپرسیاریا نوکە.

شوان زراری گۆتژی” پارتی ستویێ خوە دانایە بن ئەڤێ قەیرانا نوکە پەیدابووی، بەلێ مخابن ھندەک لایەن د دەمێ پەیدابوونا قەیرانان دا نەک ھەڤکار نینن، بەرۆڤاژی دژی حوکمەتێ نە، بەرێ ژی مە ئەزموون دگەل وان لایەنان ھەبوویە، ھندەک پەرلەمانتارێن ئێکەتیێ و گۆڕان پێگیریێ ب رێککەفتنا حزبێن خوە ناکەن و ھێرشی سەر حوکمەتێ و پارتی دکەن، بەلێ وان ئەو پرسیار ژ خوە نەکریە دەمێ بڕیارەکا باش یان یا خراپ دھێتە دان بۆچی نوونەرێن وان ل حوکمەتێ دەنگی ددەن.

ئەڤرۆ نیۆز، قائید میرۆ:

وەزارەتا ساخلەمیا حوکمەتا ھەرێما کوردستانێ ئاشکراکر، قەدەغەیا ھاتنوچوونێ ژیانا ھزاران وەلاتیان پاراستیە و پشتی پێداچوونێ ژی دێ بڕیار لدۆر درێژکرنا قەدەغەیا ھاتنوچوونێ ھێتەدان.

دکتۆر محەمەد قادر، پەیڤدارێ وەزارەتا ساخلەمیێ بۆ ئەڤرۆ نیۆز دیارکر” قەدەغەیا ھاتنوچوونێ ژیانا ھزاران وەلاتیێن ھەرێما کوردستانێ پاراستیە و بوویە ئەگەرێ کێمبوونا زیانێن ڤایرۆسا کۆرۆنایێ لسەر ھەرێما کوردستانێ، لەوڕا ھێشتا بڕیار نەھاتیەدان دێ قەدەغەیا ھاتنوچوونێ یا بەردەوامبیت یان ژی ھێتە راکرن.

پەیڤدارێ وەزارەتا ساخلەمیێ ئاشکراکر” درێژکرنا بھێنڤەدانا فەرمانگەھێن حوکمەتێ گرێدایی قەدەغەیا ھاتنوچوونێ نینە.

دکتۆر محەمەد قادر گۆت ژی”وەزارەتا ساخلەمیێ دێ پێشنیازەکێ دەتە حوکمەتێ بۆ درێژکرنا قەدەغەیا ھاتنوچوونێ، بەلێ پشتی پێداچوون دھێتەکرن، کو ئایا ھەتا چەند مەترسیا ڤایرۆسا کۆرۆنایێ لسەر ھەرێما کوردستانێ مایە، ئەگەر بھێت و بزانین ھێشتا مەترسیە ئەڤە دێ ھێتە درێژکرن.