ئه‌ڤرۆ نیوز، مه‌حمود نهێلی:

د سه‌ره‌دانه‌كی دا بۆ ده‌ڤه‌را ئامێدیێ مه‌سرۆر بارزانی سه‌رۆكێ حكومه‌تا هه‌رێما كوردستانێ ل رۆژا دوشه‌مبی 7/9/2020 به‌رێ بنیاتی بو نه‌خوشخانه‌یه‌كا 100 ته‌ختی ل كومه‌لگه‌ها هێتوتێ یا سه‌ر ب ناحیا دێره‌لۆك ڤه‌ دانا.

ل ده‌سپێكی عه‌لی ته‌ته‌ر پارێزگارێ دهوكێ په‌یڤه‌ك پێشكێش كر و دیار كر، كو ئه‌ڤه‌ دووه‌م سه‌ره‌دانه‌ یا جه‌نابێ سه‌رۆكێ حكومه‌تێ بو ده‌ڤه‌را به‌هدینان بو دانانا به‌رێ بنیاتی بو چه‌ند پرۆژه‌یه‌كان ل ده‌ڤه‌رێ ژ بو خزمه‌تكرنا خه‌لكێ ده‌ڤه‌رێ و دورستكرنا پرۆژه‌یان .

ناڤهاتی سوپاسیا خه‌لكێ گوندێ هێتوتێ ژی كر، كو بێ داخازیا هیچ تشته‌كی بكه‌ن ئه‌ڤ پارچا ئه‌ردی كو دورێن 45 هزار میترێن چار گوشه‌یه‌ پێكێشی حكومه‌تێ كریه‌ بو ئه‌نجامدان ڤێ پرۆژه‌ی.

دووڤ دا دكتور سامان به‌رزنجی وه‌زیرێ ساخله‌میێ یێ حكومه‌تا هه‌رێما كوردستانێ د په‌یڤه‌كی دا سوپاسیا جه‌نابێ سه‌رۆكێ حكومه‌تێ كر، بو گرنگی دانا وی ب كه‌رتێ ساخله‌میێ و گۆت:  ئه‌ڤ پرۆژه‌یه‌ دێ خزمه‌ته‌كا باش یا خه‌لكێ ده‌ڤه‌رێ كه‌ت ژلایێ ساخله‌میێ ڤه‌ بو دابینكرنا خزمه‌تگوزیارێن ئاست بلند وه‌ك نشته‌رگه‌ری و نڤاندنا نه‌خوه‌شان و هه‌وارهاتنێ و ئامیرێن پێشكه‌فتی یێن ئێم ئار ئه‌ی و سیتی سكان و تاقیگه‌ه و هه‌موو ئامیرێن پێشكه‌فتی یێن ته‌كنیكی و هونه‌ری.

پاشان مه‌سرۆر بارزانی سه‌رۆكێ حكومه‌تا هه‌رێما كوردستانێ د په‌یڤا خوه‌ دا خوه‌شخالیا خوه‌ ده‌ربری كو جاره‌كا دی سه‌ره‌دانا ده‌ڤه‌را ئامێدیێ كریه‌ و گۆت: ( سه‌ره‌دانا مه‌ یا ڤێ جارێ بو دانانا به‌رێ بنیاتی یێ ڤێ نه‌خوه‌شخانه‌یێ بوویه‌ و  هڤیدارم ل سه‌ر ئاستێ ستانده‌ردێن جیهانی و د ماوه‌یه‌كی كێم دا بهێته‌ چێكرن بو هندێ زێده‌تر خزمه‌تا خه‌لكێ ڤێ ده‌ڤه‌رێ بكه‌ن).

سەرۆکێ حوکمەتێ گۆت: (د به‌رنامه‌یێ حكومه‌تێ دا مه‌ گه‌له‌ك گرنگی دایه‌ هندێ كو فه‌رمانگه‌هێن حكومی و خزمه‌تگوزاری بگه‌هنه‌ هه‌موو گوند و ناوچه‌ و ده‌ڤه‌رێن كوردستانێ بو وێ یه‌كی هاولاتی نه‌چار نه‌بن و پێدڤی ب هندی نه‌بیت سه‌ره‌دانا سه‌نته‌رێن پارێزگه‌هان و باژێران بكه‌ن).

و دیار ژی کر ژ به‌ر هندێ مه‌ بریار دا ئه‌م ڤێ نه‌خوه‌شخانه‌یێ ل ڤێ ده‌ڤه‌رێ دروست بكه‌ین ژ به‌ر كو ئه‌ڤه‌ ده‌ڤه‌ره‌كا به‌رفره‌یه‌ و خه‌لكه‌كی قه‌هره‌مان و خه‌باتكه‌ر و تێكوشه‌ر، ساله‌هانه‌ خه‌بات كریه‌ بو ئازادكرنا كوردستانێ و نوكه‌ ژی وه‌ختێ هندێ یه‌ ئه‌م هه‌موو خزمه‌تا خه‌لكێ ڤێ ده‌ڤه‌رێ بكه‌ین.

ناڤهاتی دیار ژی كر، ب مخابنی ڤه‌ هه‌ر ل ده‌سپێكا ده‌ست بكار بوونا كابینا نوویا حكومه‌تێ ئه‌و توشی گه‌له‌ك قه‌یرانان بوون كو ئێك ژ وانا نه‌خوشیا كورونایێ یوو یه‌ و دووڤ دا ئاریشه‌یێن ئابوری.  به‌س ئه‌ڤان قه‌یرانان ئه‌م رانه‌گرتین به‌لكو وه‌كو پێدڤی و وه‌كو مه‌ دڤیا ئه‌م نه‌شیانه‌ زوو ڤان پرۆژان ئه‌نجام بده‌ین چونكه‌ یا پیدڤی ئه‌و بوو ئه‌م به‌رسینگێ ڤان قه‌یرانان بگرین و هه‌كه‌ خودێ فه‌رسه‌تی بده‌ت دێ یێن به‌رده‌وام بین ل سه‌ر بجهئینانا پرۆژه‌یان ل هه‌موو ده‌ڤه‌رێن كوردستانێ .

ناڤهاتی گۆت ژی بو ڤێ ده‌ڤه‌رێ ژی نه‌ بتنێ ئه‌ڤ پرۆژه‌یه‌ دێ هێته‌ چێكرن به‌لكو هند پرۆژه‌یێن دیتر ژی هه‌نه‌ و ئه‌م ل گه‌ل پارێزگارێ دهوكێ  قایمقامێ ئامێدیێ و رێڤه‌به‌رێن ناحیان كومبووینه‌ و مه‌ به‌حسێ داخازی و پێداویستیێن خه‌لكێ ده‌ڤه‌رێ و ئاریشه‌ و پرۆژێن پیدڤی كریه‌ كو دێ ل ده‌ڤه‌رێ هێنه‌ ئه‌نجام دان و ئه‌وا مه‌ پێچیت ئه‌م ته‌خسیریێ ناكه‌ین بۆ خزمه‌تكرنا خه‌لكێ ده‌ڤه‌رێ.

و گۆت:  (ئه‌ز حه‌ز دكه‌م هوین بزانن جه‌نابێ سه‌رۆكی گه‌له‌ك حه‌ز دكه‌ت پتر خزمه‌تا خه‌لكێ ده‌ڤه‌رێ بهێته‌ كرن چونكه‌ ئه‌وی پێشمه‌رگایه‌تی یێ ل ڤێ ده‌ڤه‌رێ كری و ئه‌و دزانیت قه‌در و قیمه‌تێ خه‌لكێ ڤێ ده‌ڤه‌رێ چه‌نده‌ و مه‌ بۆ ڤێ یه‌كی لیژنه‌ پێك ئیناینه‌ بو وێ یه‌كێ بزانین پێدڤیێن خه‌لكێ ڤێ ده‌ڤه‌رێ چنه‌ كو بكه‌ینه‌ به‌رنامێ حكومه‌تێ دا بو بجهینانێ) .

مەسرور بارزانی دیار ژی كر، كو خه‌لكی ده‌ڤه‌رێ به‌رێزێن مه‌ نه‌ و ئه‌و خودانێ ده‌ڤه‌رێ نه‌ و بلا چ كه‌سه‌كی دی خوه‌ ل ده‌ڤه‌رێ و خه‌لكێ ده‌ڤه‌رێ نه‌كه‌ته‌ خودان و ئه‌و كه‌سێن دبنه‌ ئه‌گه‌ر كو ئه‌ف ده‌ڤه‌ره‌ نه‌هێنه‌ ئاڤاكرن و د سه‌ر هندێ را دهێن و خه‌لكی هاندده‌ن كو گازندا ژ حكومه‌تێ بكه‌ن ل سه‌ر نه‌گه‌هشتنا خزمه‌تگوزاریان بلا پسیارێ ژ وان بكه‌ن كو كیه‌ بوویه‌ ئه‌گه‌رێ هندێ   800 گوند نه‌هێنه‌ ئاڤاكرن  هه‌روه‌سا دڤێت واز ل هندێ بینن كو خه‌لكی بلڤین بو دروستكرنا ئاریشه‌یان و دڤێت بزانن ئه‌وێن حه‌ژ خزمه‌تكرنا وه‌لاتێ خوه‌ دكه‌ت ئه‌ون یێن توڤێ دوبه‌ره‌كیێ نه‌چینن . و ته‌كه‌ز كر، كو حكومه‌تا هه‌رێمێ حكومه‌تا هه‌وه‌یه‌ و یا د خزمه‌تا هه‌وه‌ دا و ئه‌م خزمه‌تكارێن هه‌وه‌ینه‌ و ئه‌م نه‌ مه‌زنێن هه‌وه‌ینه‌ و ئه‌ركێ مه‌ یه‌ ئه‌م خزمه‌تا هه‌وه‌ بكه‌ین.

ناڤهاتی ده‌ربارێ نه‌خوشیا كورونایێ ئاشكراكر، كو هنده‌ك لایه‌نان ئه‌ڤ نه‌خوه‌شیه‌ كره‌ بابه‌ته‌كی سیاسی و خه‌لكی باجا هندێ دا و داخاز ژی كر، خو دڤێت هاولاتی خوه‌ ب پارێزن دكو خوه‌شتڤێن خوه‌ ژ  ده‌ست نه‌ده‌ین.

تێ زانین ئه‌ڤ نه‌خوه‌شخانه‌یه‌ دێ یا 100 ته‌ختی بیت و دێ ل سه‌ر رووبه‌رێ 45 هزار میترێن دوو جاری هێته‌ دروست كرن و كوژمێ 43 ملیون دولاران بو هاتینه‌ ته‌رخانكرن و پێك دهێت ژ ئاڤاهیێ سه‌ره‌كی یێ نه‌خوشخانێ و ئاڤاهیێ نوژداریا داد و هه‌وارهاتنێ  و ئاڤاهیێ ته‌كنیكی و جهێ دانانا فرۆكه‌یێ دێ لێ هه‌بیت و دێ د ماوێ 900 رۆژان دا ب دووماهی هێت.

ئه‌ڤرۆ نیوز، سالار دۆسكی:

پشتی بورینا 32 سالان ل سه‌رخرابكرنا قوتابخانا گوندێ‌ پیرۆمه‌را ڤه‌ ژلایێ‌ رژێما به‌عس ڤه‌، پشته‌ڤانیا گه‌نجه‌كێ‌ هه‌مان گوندی قوتابخانه‌ دوباره‌ یا دهێته‌ ئاڤاكرن ڤه‌.

درێوره‌سمه‌كێ‌ ژ هه‌ژی دا ب ئامادبه‌وونا (فه‌هیم عه‌بدوللا حه‌مو) سه‌رۆكێ‌ جڤاتا پارێزگه‌هێ‌، (عومه‌ر عه‌لی تاها ) رێڤه‌به‌رێ‌ گشتیێ‌ په‌روه‌ردا دهۆك و چه‌ندین به‌رپرسێن حزبی و حوكمی و كه‌ساتیێن ده‌ڤه‌رێ‌، ئه‌ڤرۆ رۆژا شه‌مبی رێكکه‌فتی 28/3/2020 سه‌رەدانا جهێ‌ ئاڤاكرنا قوتابخانا ناڤبری هاته‌كرن و ده‌ستخوشی ل خێرخواز (نزار مسته‌فا سێفدین پیرۆمه‌ری) هاته‌كرن كو رابوویه‌ ب ئاڤاكرنا قوتابخانێ‌.

فه‌هیم عه‌بدوللا حه‌مو، سه‌رۆكێ‌ جڤاتا پارێزگه‌ها دهۆك په‌یڤه‌كێ‌ دا به‌حسێ‌ مێژوویا قوتابخانا گوندی كر و رۆلێ‌ قوتابخانێ‌ ل سالێن دامه‌زراندنێ‌ بلند نرخاند و پشتی شوره‌شا ئه‌یلولێ‌ ئاڤاهیێ‌ قوتابخانێ‌ ببوو باره‌گایێ‌ پێشمه‌رگێ‌ كوردستانێ‌، ل سالا 1988 ل هه‌وا ئه‌نفالان قوتابخانه‌ ژلایێ‌ رژێما به‌عس ڤه‌ هاتبوو هه‌رفاندن.

سه‌رۆكێ‌ جڤاتێ‌ گۆت ژی” نه‌بوونا قوتابخانێ‌ ل گوندێ‌ پیرۆمه‌را ئاریشه‌ بوو بۆ خه‌لكێ‌ ڤی گوندی و رۆژانه‌ زارۆكێن خوه‌ ب ترۆمبێلا دگه‌هانده‌ باژێرێ‌ دهۆكێ‌، ب ئاڤاكرنا ڤێ‌ قوتابخانێ‌ دێ گه‌شه‌كا دی ده‌ته‌ قوتابخانێ‌ و دێ‌ ژیان پتر به‌ر ئاڤه‌دانیێ‌ ڤه‌ چیت و ده‌ست خوشیێ‌ ل نزاری دكه‌ین.

خێرخوازێ‌ نزار مسته‌فا سێفدین پیرۆمه‌ری، خودانێ‌ كومپانیا (ماكس مێدیكا بۆ كه‌روستێن پزیشكی) یا رابوویی ب ئاڤاكرنا ڤێ‌ قوتابخانێ‌ په‌یڤه‌ك پێشكێشكر و تێدا ئاشكراكر كو 150 ملیون دینار بۆ ئاڤاكرنا ڤێ‌ قوتابخانێ‌ هاتینه‌ ته‌رخانكرن و پێك دهێت ژ شه‌ش ژوورا ل گه‌ل ژوورا رێڤه‌به‌ر و ژوورا مامۆستا و ده‌ستئاڤا و ل سه‌ر رووبه‌رێ‌ ئێك دونه‌م دهێته ‌دروستكرن و ئاڤاهی 400 مه‌ترن و ژڤانه‌ 31/1/2021 ب دووماهی بهێت.

نزاری ئه‌و ژی گۆت:  (مه‌ دڤێت به‌رێ‌ خێرخوازان بده‌ینه‌ ئاڤاكرنا قوتابخانا و سه‌نته‌رێن پزیشكی  و ره‌نگه‌ خێرا وان مه‌زنتر بیت و ئه‌ڤه‌ من بۆ گوندێ‌ خوه‌ و ملله‌تێ‌ خوه‌ كریه‌، حوكمه‌تا مه‌ د قه‌یرانێ‌ دایه‌ و دڤێت هاریكاربین ل گه‌ل حوكمه‌تا خوه‌ و مه‌ ب ده‌لیڤه‌ دیت وه‌ك كومپانیا مه‌ پشته‌ڤانیێ‌ ل پرۆژه‌كی بكه‌ین و خه‌لكێ‌ مه‌ مفاداربیت).

جهێ‌ ئاماژپێكرنێ‌ یه‌ قوتابخانا پیرۆمه‌را ل سالا 1951 هاتیه ‌دامه‌زراندن و ئێكه‌م مامۆستا و رێڤه‌به‌رێ‌ قوتابخانێ‌(ئه‌حمه‌د محه‌مه‌د دۆسكی) بوویه‌ و ل ده‌ستپێكێ‌ د چه‌ند ئاڤاهیان دا بوویه‌ بكرێ‌، دیف دا قوتابخانه‌كا كونكریتی ل سالا 1959 هاتیه‌ دروستكرن، ل 1961 هاتیه‌ ڤه‌گوهاستن بۆ ئاڤاهیێ‌ قوتابخانا نه‌وروز ل گه‌ل قوتابخانا دهۆك یا دووێ‌ ده‌وام كریه‌ و ل سالا 1971 ناڤێ‌ قوتابخانێ‌ هاتیه‌ گوهورین بۆ قوتابخانا هندرین، گوندی پیرۆمه‌را پێنچ كیلومه‌تران ژ سه‌نته‌رێ‌ دهۆك دویره‌ و دكه‌ڤیته‌ باكورێ‌ رۆژئاڤا دهۆكێ‌ ل سالا 2011 دووباره‌ هاتیه‌ ئاڤاكرن و نوكه‌ (24) مال تێدا دژین و ب ئاڤاكرنا ڤێ‌ قوتابخانێ‌ (23) زارۆك ل گوندی دێ‌ مفادار بن.