سەرۆكێ هەرێما كوردستانێ پێشوازی ل راگەهاندنا ئاگربەستێ د ناڤبەرا ئیسرائیلێ و ئیرانێدا ژ ئالیێ سەرۆكێ ئەمریكی ڤە كر و دیپلۆماسی ب تاكە رێك بۆ گەهشتن ب ئارامیێ دا زانین.
دوهی سێشەمبی 24/6/2025، نێچیرڤان بارزانی، سەرۆكێ هەرێما كوردستانێ ل تۆرا جڤاكییا ئێكس بەلاڤكر» پێشوازیێ ل راگەهاندنا ئاگربەستێ د ناڤبەرا ئیرانێ و ئیسرائیلێدا ژ ئالیێ سەرۆك دۆنالد ترەمپی ڤە دكەم».
سەرۆكێ هەرێما كوردستانێ گوت ژی» من باوەرییەكا تمام ب وێ چەندێ هەیە كو تاكە رێك بۆ ئارامیێ، تەناهیێ و خوەشگوزەرانیێ ل رۆژهەلاتا ناڤین دانوستاندنێن گشتگیر و ئاڤاكەر و تێكگەهشتنەكا هەڤپشك یا هەموو ئالییانە».
نێچیرڤان بارزانی دوپاتكر ژی» سوپاس و پێزانینان ئاراستەی دۆنالد ترەمپ، سەرۆكێ ئەمریكا و سەركردەیێن دی دكەم بۆ پێگیریبوونا وان ب دیپلۆماسییەتێ و چارەسەرییا ئاشتییانەیا ناكۆكییان د ڤی دەمێ هەستیار و گرنگدا».

سەرۆكێ هەرێما كوردستانێ ب هەلكەفتا مالئاڤاهییا كورێ وی، سەرەخوەشی ئاراستەی عەبدوللا حەسەن زادە و خیران و كەسوكارێن وی كر.
سەرۆكایەتییا هەرێما كوردستانێ پەیاما بەهیداریێ یا نێچیرڤان بارزانی، سەرۆكێ هەرێما كوردستانێ بەلاڤكر.
سەرۆكێ هەرێمێ د پەیاما خوە یا بەهیداریێدا دبێژیت» هەڤخەمێ وانم، ژ خودایێ مەزن دخوازم گیانێ رەحمەت ب دلوڤانییا خوە شاد بكەت، ئارامیێ و هەدارێ ب مە هەموویان ببەخشیت».
عەبدوللا حەسەن زادە، زمانزان و نڤیسەرەكێ ناڤدارێ كوردە، ل رۆژهەلاتا كوردستانێ ژ دایكبوویە.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: دەستهەلاتدارێن بەغدا یاریا ب قویتێ خەلكێ كوردستانێ دكەن و هەڤدەم یاریا ب هەستێ وان ژی دكەن، ب رێكا ئینانا بەهانەیان بۆ نەهنارتنا مووچەی.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» وەزیرا داراییا ئیراقێ ل مەها ئێك یا ئەڤسالە ل گەل هەرێما كوردستانێ رێككەفتبوو مو هەتا مەها 12 یا سالا 2025 پارە ژ بەغدا بهێتە هنارتن و مووچەیێ هەر 12 مەهان هەڤشێوەیێ مەها ئێك بهێتە هنارتن و هەر وی دەمی رێككەفتین ل سەر (هەژمارا من) و داهاتێ ناڤخوە و هەموو تشتەكی، بەلێ پشتی مووچەیێ مەها چار، بەری ناڤەڕاستا سالێ، دبێژن: هەوە پارە نەمایە ل بودجەیا ئەڤسالەیا ئیراقێ. باشە چاوان ب چار مەهان پشكا سالەكێ یا هەرێمەكێ نامینیت؟ بۆچی بەری رێككەفتنێ ئەو چەندە نەگوتە مە؟ بۆچی پشتی چار مەهان دبێژن هەوە پارێ هەشت مەهان نەمایە؟ «.
سەرۆكا فراكسیۆنا پارتی ئەوژی رۆهنكر» ل دووماهی روونشتنا هەر چار سەرۆكایەتیێن ئیراقێ سەبارەت پرسا مووچەی، ڤێجارێ دبێژن دڤێت هەرێما كوردستانێ پێگیر بیت ب بڕیارا دادگەها فیدرالی ئەڤجا دێ پارە بۆ هێتە هنارتن ! باشە چاوا مە پارە ل بەغدا نەمایە بەلێ دهێن و دبێژن هەكە بڕیارا دادگەهێ بجهبینیت دێ پارەیان بۆ هەوە هنێرین؟ ئەڤ یاریكرنە ب هەستێ خەلكی چیە؟ هەروەسا ئەو چەند مەه بوون پارە د هنارتن، بۆچی نە دگوت بڕیارا دادگەهێ بجهبینن؟ باشە چاوان ئەو پارە هنارتینە؟ «.

دوهی سێشەمبی 24/6/2025، فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدا سەرەدانا بالیۆزخانەیا رووسیا ل بەغدا كر و ژ ئالیێ ئالبرۆس كوتراشیف، بالیۆزێ رووسیا پێشوازی لێ هاتە كرن.
د كۆمبوونەكێدا هەردو ئالییان باسێ رەوشا نوكە ل هەرێما كوردستانێ و ئیراقێ و دەڤەرێ كر ب تایبەتی پشتی راگەهاندنا ئاگربەستێ د ناڤبەرا ئیرانێ و ئیسرائیلێدا.
هەردو ئالییان گەنگەشە ل دۆر كێشەیێن هەلاویستی د ناڤبەرا هەولێرێ و بەغدایێ دا كر و دووپاتكر كو پێدڤییە ئەو كێشە ب گۆڕەی قانوونێ و دستووری دانوستاندنێ بهێنە چارەسەركرن.
بالیۆزێ رووسیا ل بەغدا خوەشحالییا خوە دیاركر ب سەركەفتنا سیاسەتا حوكمەتا هەرێما كوردستانێ ب وەرگرتنا هەلوەستەكێ هەڤسەنگ ژ شەڕێ د ناڤبەرا ئیرانێ و ئیسرائیلێدا، بۆ پاراستنا تەناهی و ئارامییا هەرێما كوردستانێ.
سەرۆكێ نوونەرایەتییا حوكمەتا هەرێما كوردستانێ ل بەغدا دوپاتكر كو سیاسەتا حوكمەتا هەرێما كوردستانێ، بەر ب پشتەڤانێیە ل چەسپاندنا تەناهیێ و ئارامیێ ل ئیراقێ و دەڤەرێ.

چاڤدێرێن سیاسی یێن كورد ئاماژە دكەن كو سەركردایەتییا سیاسییا كوردی گەلەك ب حەكیمانە پێنگاڤ هاڤێتن بۆ دوورئێخستنا وەلاتێ مە ژ ئاگرێ شەڕێ ل دەڤەرێ روودای، نوكە ژی بڕیارا كوردستانێ بۆ وەلاتێن هەرێمایەتی یا رۆهن و رێزلێگرتییە، هەتاكو ئیرانێ ژی پەسنا رۆلێ هەرێما كوردستانێ كر.
فازل بەشارەتی، چاڤدێرێ سیاسی بۆ رۆژنامەیا (ئەڤرۆ) گوت» سیاسەتا سەرۆكایەتییا هەرێما كوردستانێ و حوكمەتا هەرێما كوردستانێ گەلەك یا ساخلەمە ل رۆژهەلاتا ناڤین، هەروەسا جهێ پەسنا وەلاتێن دەڤەرێ ژی یە».
گوت ژی» سەركردایەتییا سیاسییا كوردستانێ بۆ ئارامی و پاراستنا قەوارەیێ هەرێمێ، رێگری ل ڤەگوهاستنا چریسكێن ئاگرێ شەڕی بۆ هەرێما كوردستانێ».
بەشارەتی رۆهنكر ژی» ل رۆژهەلاتا ناڤین شەڕەكێ گەرم بوو، كوردان شیا خوە ژێ بپارێزن و بێلایەنانە رەفتارێ بكەن، ڤێ چەندێ ژی باوەری ل دەف وەلاتان دروستكر و نوكە پەسنا رۆلێ گرنگ یێ كوردان ل دەڤەرێ دكەن».
وی چاڤدێرێ سیاسی خویاكر ژی» سیاسەتا سەركردایەتییا سیاسییا كوردستانی پەیڕەوكری گەلەك ژ وەلاتان نەشیا وێ سیاسەتێ پەیڕەوكەن».

دوهی ئێكشەمبی 22/6/2025، مەسرور بارزانی، سەرۆكێ حوكمەتا هەرێما كوردستانێ، جودا پێشوازی ل هەردو قونسلێن ئوردنێ و هندستانێ ل هەرێما كوردستانێ كر.
مەسرور بارزانی، سەرۆكێ حوكمەتا هەرێمێ پێشوازی ل فوئاد ئەلمەجالی، قۆنسلێ گشتیێ ئوردنێ ل هەرێما كوردستانێ كر ب هەلكەفتا ب دووماهی هاتنا ئەركێ وی یێ دیپلۆماسی ل هەرێما كوردستانێ.
سەرۆكێ حوكمەتا هەرێمێ سەرەرای سۆپاسیكرنا قونسلێ گشتیێ ئوردنێ بۆ وی دەمێ كار بۆ ب هێزتركرنا پەیوەندیێن دو ئالییانە كری، هیڤییا سەركەفتنێ ژی د ئەركێ وی یێ داهاتیدا بۆ خواست.
مەسرور بارزانی هەروەسا ئاماژە ب هەڤبەندیێن دۆستانە و تایبەت د ناڤبەرا ئوردنێ و هەرێما كوردستانێ كر، رێز ژی بۆ پشتەڤانییا شاە عەبدوللایێ دوێ ل هەرێما كوردستانێ دەربڕی.
قۆنسلێ گشتیێ ئوردنێ ئاماژە ب وێ چەندێ كر كو دەستكەفتێن حوكمەتا هەرێما كوردستانێ ب تایبەتی چاكسازیێن كابینەیا نەهێ د كەرتێن جۆرا و جۆردا جهێ شانازیێ نە، هەروەسا سوپاسییا هاریكاری و هەماهەنگییا ئالیێن پەیوەندیدارێن حوكمەتا هەرێما كوردستانێ ژی كر بۆ سەرئێخستنا ئەركێ وی.
ژ ئالییەكی دیڤە، سەرۆكێ حوكمەتا هەرێمێ پێشوازی ل بریجیش كۆمار، قۆنسلێ گشتیێ نوو یێ هندستانێ ل هەرێما كوردستانێ كر پیرۆزباهییا دەستبكاربوونێ لێكر و پشتەڤانییا حوكمەتا هەرێما كوردستانێ بۆ سەرئێخستنا ئەركێ وی دیاركر.
ژ ئالیێ خوەڤە قۆنسلێ گشتیێ هندستانێ، خواستا وەلاتێ خوە بۆ زێدەتر پێشڤەبرنا هەڤبەندیێن دو ئالییانە د وارێن جۆرا و جۆردا دوپاتكر، ب تایبەتی د وارێن وەبەرئێنانێ و بازرگانیێ و ساخلەمیێدا.
د پشكەكا دی یا دیدارێدا، رەوشا رەڤەندا هندستانی ل هەرێما كوردستانێ هاتە گەنگەشەكرن و ل دۆر ڤێ چەندێ قۆنسلێ گشتیێ هندستانێ سوپاسییا وەلاتێ خوە بۆ ئاسانكاری و هاریكارییا ئالیێن پەیوەندیدارێن حوكمەتا هەرێما كوردستانێ دیاركر.

هەرێما كوردستانێ ل دۆر شەڕێ د ناڤبەرا ئیرانێ و ئیسرائیلێدا شیایە دیپلۆماسییانە رەفتارێ بكەت و شەڕی رەت بكەت و داخوازا ئاشتیێ و دانوستاندنێ بكەت و ئەو ب خوە ژی بێلایەن بمینیت بۆ پاراستنا گەل و ئاخا كوردستانێ.
ئیبراهیم مەندەلاوی، شرۆڤەكارێ سیاسی بۆ رۆژ نامەیا (ئەڤرۆ) گوت» هەكە پیچەكی بزڤرین بۆ چەند سالێن بۆری ئیرانێ چەندین جاران ب راستەوخوە ئاخا هەرێما كوردستانێ كریە ئارمانج ب مووشەكێن بالیستی و درونان، ب تۆمەتێن نەرەوا، بەلێ پشتی سەرەدانا دیرۆكییا نێچیرڤان بارزانی، سەرۆكێ هەرێما كوردستانێ ل مەها گولانا 2024 بۆ تەهرانێ، هەڤكێشە هاتنە گوهارتن و هێرشێن ئیرانێ بۆ سەر هەرێما كوردستانێ هاتنە راوەستاندن».
وی شرۆڤەكارێ سیاسی گوت ژی» د وێ سەرەدانێدا سەرۆكێ هەرێما كوردستانێ دیتنا هەرێما كوردستانێ ب دروستی گەهاندە بەرپرسێن ئیرانی وئەو دیتنا شاش یا وان ل بەرامبەر هەرێما كوردستانێ هەی نەهێلا، د شیاندایە ئەو ب خالا وەرچەرخانێ بهێتە سەحكرن هەروەسا دەستپێكا تێكگەهشتنێ و هەڤبەندییەكا نوو د ناڤبەرا كۆمارا ئیسلامییا ئیرانێ و هەرێما كوردستانێدا».
دیاركر ژی»پشتی هێرشێن ئیسرائیلێ ل سەر ئیرانێ ل 13 ڤێ مەهێ، هەرێما كوردستانێ ئەو هێرشە پرۆتەستۆكرن و پشتەڤانییا خوە بۆ ڤەكرنا دەرگەهێ دانوستاندنێ و راگرتنا شەڕی دوپاتكر».
گوت ژی» هەرێما كوردستانێ بێلایەنییا خوە د ڤی شەڕیدا یا پاراستی، رێك نەدایە ئاخا هەرێمێ بۆ دژایەتیكرنا هیچ ئالییەكی بهێتە بكارئینان، چونكە ئەم پشكەك نین ژ وێ ململانێ و هەرێم شیایە ب شێوەیەكێ سەركەفتییانە وێ پەیامێ بگەهینیت ژ پێخەمەت پاراستنا ئاسایش و ئارامییا كوردستانێ و ئەو لڤینا دیپلۆماسییا هەرێما كوردستانێ جهێ دەستخوەشیێیە كو ل دەڤەرەكا پڕكرژی كو هەرێما مە كەفتییە د ناڤبەرا دو بەرەیێن شەڕیدا، شیایە ئاخا خوە دووربێخیت ژ وێ شەڕی».

رێكخراوا نێڤدەولەتی بۆ پەروەردەیێ، كو نوونەرایەتییا 34 ملیۆن مامۆستایان دكەت، د نڤیسارەكێدا داخواز ژ محەمەد شیاع سوودانی، سەرۆك وەزیرێن ئیراقێ كر، ب لەز بڕیارا راگرتنا مووچەیێن فەرمانبەرێن هەرێما كوردستانێ ب هەلوەشینیت. ژ ئالیێ خوەڤە ئێكەتییا مامۆستایێن كوردستانێ دبێژیت: ئەو نڤیسارە گەلەك یا گرنگە و ژ روویێ نێڤدەولەتی ژی تشتەكی باشە.
رێكخراوا نێڤدەولەتی بۆ پەروەردەیێ، د نڤیسیارەكا فەرمیدا كو ل 20/6/2025 بۆ محەمەد شیاع سودانی، سەرۆك وەزیرێن ئیراقێ هنارتییە، داخوازا هەلوەشاندنا راگرتنا مووچەیێن مامۆستایان و فەرمانبەران دكەت.
د نڤیسارا وێ رێكخراوا نێڤدەولەتیدا هاتیە» د دلتەنگین سەبارەت ب بڕیارا ڤێ دووماهیێ یا راگرتنا مووچەیێن مامۆستا و فەرمانبەرێن حكومی ل هەرێما كوردستانێ، داخوازێ ژ حوكمەتا فیدرالی دكەین، كو ب لەز ڤێ بڕیارێ ب هەلوەشینیت و پرسا مووچەی ل سەر ل بەرچاڤ وەرگرتان سیاسی بمینیت».
رێكخراوا نێڤدەولەتی بۆ پەروەردەیێ د وێ نڤیسارا خوە دا دوپاتكر ژی» خەرجكرنا مووچەیان ب شێوەیەكێ رێكوپێك و د دەمێ خوەدا نەك هەر پێگیرییەكا قانوونییە، بەلكو پێدڤییەكا ئەخلاقی ژی یە».
ژ ئالیێ خوەڤە، ئەحمەد گەرمیانی، سەرۆكێ ئێكەتییا مامۆستایێن كوردستانی گوت» ئەو نڤیسارا رێكخراوا نێڤدەولەتی بۆ پەروەردەیێ گەلەك یا گرنگە، چونكە رێكخراوەكە نوونەرایەتییا 34 ملیۆن مامۆستایان ل 180 وەلاتێن جیهانی دكەت، ئەم ژی تێدا ئەندامین، لەوما ئەو نڤیسار ژ روویێ نێڤدەولەتی ژی تشتەكێ باشە».
سەرۆكێ ئێكەتییا مامۆستایێن كوردستانێ ئاماژە كر ژی» هەموو جیهان تێگەهشتییە كو ئەو رەوشا هەی یا مووچەیێن فەرمانبەر و مووچەخۆرێن هەرێما كوردستانێ بەغدا یا دروستكری و وەكو كارتەكا سیاسی بكاردئینیت».
رۆهنكر ژی» هەموو رێكخراوێن نێڤدەولەتی پشتەڤانییا مووچەخۆرێن هەرێما كوردستانێ دكەن».

پشتی هێرشێن ئەمریكا ل سەر بنگەهێن ئەتۆمی یێن ئیرانێ، ئیراقێ هێزەكا مەزن ل دەوروبەرێن بنگەهێ (عەینولئەسەد) ل پارێزگەها ئەنبارێ بەلاڤكر.
مالپەرێ (العربی الجدید) ژ زاردەڤێ چەند بەرپرسێن وەزارەتا بەرگرییا ئیراقێ بەلاڤكر» یەكەیێن هەوالیگری یێن وەزارەتا بەرگریێ و هێزێن زرێپۆش ل دەروبەرێن بنگەهێ (عەینولئەسەد) ل رۆژئاڤایێ پارێزگەها ئەنبارێ هاتینە بەلاڤكرن و رێكێ ب چوونا د ناڤدا وهاتنا هیچ ترۆمبێلەكێ بۆ دەڤەرێن نێزیك ژ بنگەهێ ناڤبری نادەن، تنێ ئاكنجیێن گوندێن دەوروبەری بنگەهێ نەبیت، ژ بلی وێ چەندێ ژی، فرۆكەیێن چاڤدێریێ ل ئەسمانی چاڤدێرییا رەوشێ دكەن».
ئەوژی هاتە ئاشكراكرن كو سەربازگەها (ڤیكتۆری) ل نێزیك فرۆكخانەیا نێڤدەولەتییا بەغدایێ، پێرابوونێن ب هەمان شێوە تێدا هاتینە وەرگرتن، سەرەرای وێ چەندێ ل حەفتییا بۆری هەوەكا بەرفرهە هاتە كرن و هەموو ئەوێن ل بنگەهێن سەربازی یێن ئەمریكی هاتنە ڤەگەراندن كو سەرباز نینن.
ئەڤ پێرابوونە پشتی وێ چەندێ دهێت كو میلیشیێن نێزیكی ئیرانێ د ناڤ حەشدا شەعبی دا، پێشتر گەفا وێ چەندێ كربوو هەكە ئەمریكا هێرشێ بكەتە سەر ئیرانێ، دێ ب هەموو شیانێن خوە ل بنگەهێن ئەمریكی ل دەڤەرێ دەن.
سەبارەت ڤێ چەندێ ئەحمەد نعێمی، شارەزایێ وارێ ئەمنی ل ئیراقێ راگەهاند « هەر هێرشەك ل سەر بنگەهێن ئەمریكی یان ژی بەرژەوەندیێن ئەمریكا ل ئیراقێ بهێتە كرن، د ئەنجامدا دێ ئەمریكا كارڤەدانەكا گەلەك توند ل ئیراقێ هەبیت».
دوپاتكر ژی» هەتا نوكە یا رۆهن نینە كا ئەو میلیشییا دێ گەفێن خوە بجهئینن و بنگەهێن ئەمریكا ل ئیراقێ كەنە ئارمانج یان نە، بەلێ هەكە ب كریار ئەڤە روو دا، دێ ئەمریكا ب توندی بارەگەهێن میلیشییا و سەركردەیێن وان كەتە ئارمانج».
راشكاوانەژی راگەهاند كو حوكمەتا ئیراقێ نەشێت چو بكەت، هەكە میلیشییان ل سەر داخوازا ئیرانێ هێرشێ ل سەر بنگەهێن ئەمریكی ئەنجام بدەن.

ژ ئەگەرێ وان گرژی و ئالۆزیێن ل چەند رۆژێن بۆری، دەڤەر ڤەگرتی، فرۆكخانە هاتینە دائێخستن و گەشتێن ئەسمانی ب هەموو شێوەیەكی هاتینە راگرتن، كو ب سەدان هەڤوەلاتیێن كوردستانێ ل وەلاتێن دەوروبەر یێن ئاسێ بووین و نەشیاینە بزڤرن، بەلێ ب فەرمانا مەسرور بارزانی، سەرۆكێ حوكمەتا هەرێما كوردستانێ كێشەیا زێدتر ژ 13 هزار هەڤوەلاتییان بۆ زڤرینێ هاتە چارەسەركرن.
فەرمانگەها میدیا و پێزانینان ل حوكمەتا هەرێما كوردستانێ راگەهاند» پشتی وان گرژی و ئالۆزیێن دەمێ حەفتییەكێیە دەڤەر ڤەگرتی و هێلێن ئەسمانی راوەستیاین، حوكمەتا هەرێما كوردستانێ ب فەرمانا مەسرور بارزانی، سەرۆكێ حوكمەتا هەرێما كوردستانێ، پێرابوونێن زڤراندنا هەڤوەلاتیێن هەرێما كوردستانێ ژ دەرڤە ب شێوەیەكێ ب لەز و هوور دەستپێكر».
فەرمانگەها میدیا و پێزانینان ل حوكمەتا هەرێما كوردستانێ دیاركر ژی» وەزارەتا ناڤخوە ل حوكمەتا هەرێمێ و فەرمانگەها هەڤبەندیێن دەرڤە و وەزارەتا ئەوقافێ و كاروبارێن ئایینی ب هەماهەنگی، بۆ چارەسەرییا كێشەیێ ل گەل وەلاتێن پەیوەندیدار كەفتنە كاری، د ڤی چارچۆڤەیدا پشتی راگەهاندن و پشتڕاستكرنا هەوەلاتییان كو دێ ب سلامەتی هێنە زڤراندن، هێلەكا گەرم و پاشی ژی فۆرمەك بۆ داگرتنێ هاتە راگەهاندن و ب هەماهەنگی ل گەل وەلاتێ توركیا، ڤیزا سێ رۆژی بۆ هاتە دابینكرن، ب وێ چەندێ ژی كێشەیا 13 هزار هەڤوەلاتییان هاتە چارەسەركرن و دشێن بزڤرنە وەلاتی، كو پشكەك ژێ زڤرینە و پرۆسە یا بەردەوامە».
سەبارەت وان هەوەلاتیێن هەرێما كوردستانێ كو ل وەلاتێ ئیرانێ بوون، فەرمانگەها میدیا و پێزانینان راگەهاند» هەتا نوكە پێنج هزار كەس یێن زڤرین».
ئەوژی بەرچاڤكر» حوكمەتا هەرێما كوردستانێ هەڤوەلاتییان پشتڕاست دكەت كو هێلێن گەرم ل بەردەستن و د رەوشا پێدڤیدا دودل نەبن د پەیوەندیێدا بۆ هاریكارییا وان».