وەزیرێ دەرڤەیێ ئیراقێ راگەهاند: ل چەند رۆژێن داهاتی شاندێ هەڤپشكێ وەزارەتا داراییا ئیراقێ و هەرێما كوردستانێ سەبارەت پرسا مووچەیێ فەرمانبەرێن هەرێما كوردستانێ دێ كۆمبوونا دویێ ئەنجامدەن.
فوئاد حسێن، وەزیرێ دەرڤەیێ ئیراقێ د كۆنگرەكێ رۆژنامەڤانیدا دیاركر ل گەل محەمەد شیاع سودانی، سەرۆك وەزیرێن ئیراقێ سەبارەت وێ راستڤەكرنا ل جڤاتا نوونەرێن ئیراقێ ل دۆر دوبارە دەستپێكرنا هنارتنا پەترۆلا هەرێما كوردستانێ ئاخڤتییە بۆ وێ چەندێ ژ ئالیێ جڤاتا نوونەرانڤە بهێتە دەربازكرن.
فوئاد حسێن ئاماژە ب وێ چەندێ ژی كر، ل رۆژا ئەینییا داهاتی شاندێ هەڤپشكێ وەزارەتا داراییا ئیراقێ و هەرێما كوردستانێ سەبارەت پرسا مووچەیێ فەرمانبەرێن هەرێما كوردستانێ دێ كۆمبوونا خوە یا دویێ كەت.
فوئاد حسێنێ دیاركر ژی ل گەل هاكان فیدان، وەزیرێ دەرڤەیێ توركیا باس ل دوبارە دەستپێكرنا هنارتنا پەترۆلا هەرێما كوردستانێ كریە.

شیرەتكارێ سەرۆكێ حوكمەتا هەرێما كوردستانێ بۆ كاروبارێن دەڤەرێن كوردستانی راگەهاند: گرنگە ئەو بڕیارا ژ جڤاتا نوونەرێن ئیراقێ دەرچووی بهێتە بجهئینان، ژ بەر كو ئیراق ب شێوەیەكێ نە دستووری رەفتارێ ل گەل دەڤەرێن كوردستانی دكەت و هەكە پێداچوونێ ب خوە دا نەكەت، دێ كێشەیان بۆ خوە دروست كەت، چونكە نابیت ب وی شێوەی بەردەوام بیت.
رێبوار تالەبانی، شیرەتكارێ سەرۆكێ حوكمەتا هەرێما كوردستانێ بۆ كاروبارێن دەڤەرێن كوردستانی یێن ژ دەرڤەی ئیدارەیا هەرێما كوردستانێ گۆت» ئەو بڕیارا ژ جڤاتا نوونەرێن ئیراقێ دەرچووی بۆ ڤەگەراندنا زەڤییان بۆ خەلكێ رەسەن ل دەڤەرێن كوردستانی یێن ژ دەرڤەی ئیدارەیا هەرێما كوردستانێ، جهێ دەستخوەشیێیە و پێنگاڤەكا باشە و هیڤیدارین بڕیارێن دی ژی د دووڤدا بهێن».
رێبوار تالەبانی گۆت ژی» ئەو بڕیارە گەلەك گیرۆ بوو كو دڤیا ب گۆڕەی مادەیا 140 یا دستووری كو ل 2005 پشتی دانانا دستوورێ ئیراقێ یا دەرچووی، ئانكو بوو 20 سال و پێدڤی بوو پشتی 31/12/2007 ئەو پڕۆسەیە تمام بیت، بەلێ وان پاشئێخست، ل گەل وێ چەندێ ژی دا بجهئینانا وێ باشترە ژ وێ چەندێ هەر بهێتە گیرۆكرن، چونكە قۆناغەكا دی یا مای، ئەو ژی بڕیار بهێتە بجهئینان، لەوما میكانیزما بجهئینانێ گەلەگ یا گرنگترە ژ ئەوا هاتیە دان، چونكە هەكە بهێتە بجهئینان پشكەكا وان كێشەیێن لسەر زەڤییان هەین دێ چارەسەر بن و ئەڤە هەلوەشاندنا بڕیارێن جڤاتا سەركردایەتییا شۆڕەشێ یا بەرێ یا ب سەر رژێما بەعسا ژناڤچوویە، بەلێ نە هەموو بڕیاران و دخوازین هەموو بڕیار بهێنە هەلوەشاندن».
شیرەتكارێ حوكمەتا هەرێما كوردستانێ رۆهنكر ژی» هەكە بڕیار بهێتە بجهئینان، گەلەك باشە ژ بەر كو ئیراق دستووری و قانوونێ و رێككەفتنان پێشێل دكەت و هەكە نەهێتە بجهئینان، دێ وەكو بڕیارێن دی بیت، ژ بەر كو رەوشا دەڤەرێن كوردستانێ یێن ژ دەرڤەی ئیدارەیا هەرێما كوردستانێ پشتی 16 ئۆكتۆبەرێ، رەوشەكا نە دستوورییە و پێدڤییە ئیراق پێداچوونێ د خوەدا بكەت و ل دەڤەرێن سووننی ژی عەسكەرتارییەتەكا مەزن یا هەی و پێدڤییە ئیراق دستووری بجهبینیت ومافێ 20 سالان یێ خەلكی بزڤرینیت، چونكە دەڤەر یا د گۆهۆڕیناندا و هەكە ئیراق ژی ب خوە دا نەچیتەڤە،دێ كێشەیان بۆ خوە دروست كەت، لەوما ئیراق بەردەوام ب شێوەیەكێ نە دستووری رەفتارێ ل گەل دەڤەرێن كوردستانی یێن ژ دەرڤەی ئیدارەیا هەرێما كوردستانێ دكەت و زێدەتر ب شێوەیێ ناڤەندی كار دكەت، د دەمەكیدا ئیراق سیستەمێ فیدرالییە و پێدڤییە ب شێوەیێ فیدرالی كار بكەت، بەلێ مخابن ل ئیراقێ فیدرالی نەهاتییە بجهئینان.

سەرۆكێ دیوانا سەرۆكایەتییا هەرێما كوردستانێ راگەهاند: پەیوەندیێن هەولێرێ وبەغدایێ هەردەم یا كێشەدار بوو، هەروەسا دیاركر، تێكگەهشتنەكا باش یا هەی بۆ پێكئینانا كابینەیا دەهێ یا حوكمەتا هەرێما كوردستانێ.
فەوزی هەریری، سەرۆكێ دیوانا سەرۆكایەتییا هەرێما كوردستانێ گۆت» پەیوەندیێن هەولێرێ و بەغدایێ هەردەم د كێشەدار بوون، بەلێ محەمەد شیاع سودانی، سەرۆك وەزیرێن ئیراقێ بزاڤا چارەسەركرنا وان دكەت وسەرەرای وێ چەندێ ژی فشارەكا مەزن یا ل سەر هەی و هندەك چاران ئاخڤتنێن خوە بجه نائینیت».
سەرۆكێ دیوانا سەرۆكایەتییا هەرێما كوردستانێ گۆت ژی» حوكمەتا ئیراقێ پارەیەكێ مەزن بۆ پڕۆژەیێن جودا خەرج دكەت، بەلێ یا بەرهەڤ نینە بەهرا كوردستانێ بدەت».
ل دۆر پێكئینانا كابینەیا دەهێ یا حوكمەتا هەرێما كوردستانێ، فەوزی هەریری دوپاتكر» تێكگەهشتنەك باش یا هەی بۆ پێكئینانا كابینەیا دەهێ یا حوكمەتا هەرێما كوردستانێ».
هەروەسا دیاركر» دبیت بەری جەژنا نەورۆزێ كابینەیا دەهێ یا حوكمەتا هەرێمێ بهێتە پێكئینان».
رۆهنكر ژی كو ب ئەنجامێ كۆمبوونان یێ گەشبینە، هەرچەندە پێشتر دهاتە گۆتن پێكئینانا كابینەیا نوو هەتا هەلبژارتنێن ئیراقێ دێ هێتە پاشئێخستن، بەلێ نوكە سەقایەكێ ئەرێنی یا هەی و ئالیێن سیاسی د رژدن ل سەر پێكئینانا كابینەیا نوو یا حوكمەتا هەرێما كوردستانێ.

ل دۆر پرسا پێكئینانا حوكمەتا نوو یا هەرێما كوردستانێ، بڕیارە ئەڤرۆ چارشەمبی 29/1/2025، شاندێ تەكنیكی یێ پارتی و ئێكەتی ل هەولێرێ كۆمبیت.
ئەو كۆمبوون درێژەپێدەرا كۆمبوونێن بۆرییە، كو د تایبەتن ب بەرهەڤكرنا بەرنامەیەكێ هەڤپشك بۆ چار سالێن داهاتی یێن حوكمڕانیێ ل هەرێما كوردستانێ.
پێشتر، ئاری هەرسین، بەرپرسێ لقێ چار یێ پارتی دیموكراتی كوردستان د داخۆیانییەكا رۆژنامەڤانیدا راگەهاندبوو: تێكگەهشتنەك گەلەك باش د ناڤبەرا پارتی دیموكراتی كوردستان و ئێكەتی نیشتمانی كوردستانی دا بۆ پێكئینانا حوكمەتێ یا هەی و ل دەمەكێ نێزیك دێ دەنگوباسێن خوەش سەبارەت ڤێ چەندێ گۆهلێبین».
ل هەلبژارتنێن خولا شەشێ یا پەرلەمانێ كوردستانێ كو ل رۆژا 20/10/2024 هاتبوونە ئەنجامدان، پارتی 39 كورسی و ئێكەتیێ ژی 23 كورسی بدەستڤەئینابوون».

مەزلوم عەبدی فەرماندارێ گشتی یێ هێزێن سووریا دیموکرات د داخۆیانیەکێ دا دیار کر، د ڤان رۆژێن دووماهیێ دا ل گەل ئەحمەد شەرع دەست ب دانوستاندنان کرینە و نها ل دۆر هندەک خالێن ستراتیژی تێگەهشتنەکا باش د ناڤبەرا وان و شامێ دا هەیە و ئەو یەک ژی گەلەک گرنگە و گۆت: (مە دڤێت هێزێن سووریا دیموکرات ببنە پشکەک ژ لەشکرێ نوو یێ سووریێ، لێ دڤێت ژ بۆ وێ یەکێ ژی ئالیەتەکا قانوونی هەبیت و نها ئەم ل سەر ڤێ یەکێ کار دکەین، هندەک هێزان گەلەک بزاڤ دکرن دا هێزێن سووریا دیموکرات و چەکدارێن تەحریر شام شەرێ هەڤدو بکەن، لێ مە نەهێلا تشتەک وەسا روو بدەت، چونکی ئەو یەک د بەرژەوەندیا گەلێ سووریێ دا نینە).
سەبارەت هەلوەستێ هەرێما کوردستانێ ژی ناڤهاتی دیار کر، هەلوەستێ هەرێما کوردستانێ سەبارەت ب رۆژئاڤایێ کوردستانێ گەلەک گرنگە، سەرەدانا من یا بۆ هەولێرێ ژی ژ بۆ ئێکەتیا هێزێن کوردی ل رۆژئاڤایێ کوردستانێ بوو و گۆت: (د چەند رۆژێن بهێت دا ل گەل ئەنجوومەنێ نشتیمانی یێ کوردی ل سووریێ دێ دەست ب دانوستاندنان کەین و مە دڤێت کورد هەموو پرسێن هەی د ناڤبەرا خوە دا چارەسەر بکەن، گەلەک گرنگە کورد وەکو ئێک شاند بچنە شامێ و ل گەل دەستهەلاتا نوو یا سووریێ دانوستاندنان بکەن).
فەرماندارێ گشتی یێ هێزێن سووریا دیموکرات د دووماهیا ئاخڤتنا خوە دا سەبارەت ب شەڕی د ناڤبەرا وان و گرۆپێن چەکدار یێن سەر ب تورکیا ژی دیار کر، نها ل بەنداڤا تشرینێ بەرخوەدانەک گەلەک مەزن ل دژی چەکدارێن سەر ب تورکیا هەیە، دڤێت ئەمریکا و وەلاتێن هەڤپەیمانیا شەڕێ ل دژی داعشێ داخواز ژ تورکیا بکەن دا ئێرشێن خوە بدەتە راگرتن، چونکی مە نەڤێت شەڕی بکەین و مە دڤێت کورد ل سووریێ ب رەنگەکێ ئاشتیانە ل گەل هەموو پێکهاتەیێن دی پێکڤە بژین

دیدار: دلۆڤان ئاكرەیی:

سەرۆكا فراكسیۆنا پارتی ل چڤاتا نونەرێن ئیراقێ، د. ڤیان سەبری كو هەڤدەم ئەنداما لژنەیا پەیوەندییێن دەرڤە یێن چڤاتا ناڤبرییە ل دۆر گرنگییا پشكدارییا سەرۆكێ حوكمەتا هەرێما كوردستانێ مەسرور بارزانی د كۆربەندێ داڤۆسێ دا بۆ رۆژنامەیا (ئەڤرۆ) گوت پشكداریكرنا مەسرور بارزانی دڤی كۆڕبەندیدا پێگەهێ هەرێما كوردستانێ ل سەر ئاستێ جیهانێ بهێز كر.
سەبارت جوداهییا پشكدارییا سەرۆكێ حوكمەتا هەرێمێ ل گەل جارێن بۆری گۆت» گوهۆڕینێن گرنگ ل دەڤەرێ یێن هاتینە روودان وەكو شەرێ غەزە و ئیسرائیلێ و ژناڤچوونا رژێما بەعس ل سووریێ و پرسا كوردان د پاشەرۆژا سووریا نوو دا و شەڕێ گرۆپێن چەكدارێن دەڤەرێ ل گەل ئەمریكا و بەرفرەهبوونا بیاڤێ وەبەرهێنانێ ل هەرێما كوردستانێ بابەتێن گرنگ بوون ل دیدار و كۆمبوونێن سەروكێ حوكمەتا هەرێمێ ل گەل سەركردە و بەرپرسێن وەلاتێن جیهانێ ل داڤۆسێ».
خویاكر ژی»ب پشكدارییا مەسرور بارزانی د ڤێ كوڕبەندێدا دێ كوردستان جارەكا دی كەڤیتە د نەخشەیێ مەزن یێ دیپلۆماسیدا ل جیهانێ».
سەبارەت ب ڤەكرنا مالا كوردستانی ل داڤۆسێ ب دەستپێشخەرییا سەرۆكێ حوكمەتا هەرێمێ، د.ڤیان سەبری گۆت «ل سالا بۆری ئەڤ مالە ل سەر راسپاردەیا سەروكێ حوكمەتێ هاتبوو ڤەكرن كو تێدا چەندین چالاكی ب پشكدارییا هەژمارەكا وەبەرهێنەر و خودانكار و سەرمایەدارێن كوردستانێ هاتبوونە ئەنجامدان و دەلیڤەیەكا گرنگ بوو بۆ سەرمایەدار و خودانكارێن هەرێمێ دیدار ل گەل مەزنە بازرگانێن جیهانێ هەبن و وان داخاز بكەن بۆ ئەنجامدانا كارێن وەبەرهێنانێ ل هەرێما كوردستانێ و ئەڤ پێنگاڤا مەسرور بارزانی ژی دێ كوردستانێ ل نەخشەیا وەبەرهێنانا جیهانی نێزیك كەتەڤە و ب شێوەیەكی كو بوویە لینكێ پەیوەندی ل گەل وەبەرهێنەرێن جیهانی كو كارێن وەبەرهێنانێ ل هەرێمێ ئەنجام بدەن».
د. ڤیانی ئاماژەكر « د چوارچۆڤەیێ بزاڤێن بەردەوام بۆ ب هێزكرنا پێگەهێ هەرێما كوردستانێ ل سەر ئاستێ نێڤدەولەتی و دیپلۆماسی و پێشدابڕنا پڕۆسەیا وەبەرهێنانێ و گەشەپێدانا ئابووری لە هەرێما كوردستانێ سەرۆكێ حوكمەتا هەرێمێ د گەل شاندەكی پشكداری كربوو».
رۆهنكر ژی» كۆمكرنا وان هەموو سەركردە و كەسایەتیێن جودا ژ وەلاتێن جیهانێ ل وی كۆڕبەندی مەبەست ژێ ئەو بوو سەركردەیێن وەلاتان و خودانكار و رێكخراوێن سڤیل و پسپۆرێن بیاڤێن جودا بشێن دانوستاندنێن ڤەكری ئەنجام بدەن دا پێنگاڤێن پێدڤی بۆ كێمكرنا مەترسییان ب هاڤێژن كو د نوكەدا بەرسینگێ جیهانێ گرتیە لەوما گرنگ بوو دەلیڤەیێن پێدڤی بۆ چارەسەرییێن دومدرێژ بۆ كێشە و پرسگرێكان بهێنە ڤەدیتن».

سكرتێرا پەرلەمانێ كوردستانێ ل خولا پێنجێ یا بۆری باس ل هنارتنا پەترۆلا كوردستانێ و وان ئاستەنگێن كو روو ب روویێ هەرێما كوردستانێ دبیت بۆ پرسا بۆدجەی و هنارتنا پەترۆلێ.
مونا قهوەچی گۆت» ل دەستپێكا پێكئینانا حوكمەت محەمەد شیاع سودانس، بڕیار ئەوبوو كو د دەمێ شەش مەهاندا قانوونا پەترۆل و غازێ ل جڤاتا نوونەرێن ئیراقێ بهێتە دەركرن و كێشەیێن گرێدای پەترۆلێ و غازێ دناڤبەرا هەرێمێ و بەغدایێ دا بهێنە چارەسەركرن، بەلێ ئەوژی وەكو چەندین رێككەفتێن دی نەهاتە بجهئینان، هەروەكو قانوونا بۆدجەی ژی كو رێككەفتن و تێكگەهشتنا پێشوەختل سەر هاتبوو كرن، بەلێ چو ژ وان ژ ئالیێ حوكمەتا محەمەد شیاع سۆدانی نەهاتنە بجهئینان».
رۆهنكر ژی» حوكمەتا نوكە یا ئیراقێ ب رێككەفتن و سازان د ناڤبەرا پێكهاتەیێن سەرەكی یێن ئیراقێ پشتی دەمەكێ درێژ و پڕۆسەیەكا درێژ و ئالۆز یا سیاسی و نەسەقامگیردا پێكهات، نابیت رێك ب هیچ ئالییەكی بهێتە دان پڕۆسەیا سیاسییا ئیراقێ بێخیتە د مەترسیێدا، دەمێ وێ چەندێ یێ هاتی كو حوكمەتا ئیراقێ كار ب دستوورێ بەردەوام بكەت و رێككەفتنا د ناڤبەرا ئالیێن سیاسی بكەتە پیڤەر بۆ بڕێڤەبرنا كارێن خوە و دادپەروەری و یەكسانی د ناڤبەرا هەموو پێكهاتەیاندا پەیدا بكەت».
مونا قەهوەچی دوپاتكر ژی» رێككەفتنا حوكمەتا ئیراقێ ل گەل بریتانیا بۆ بجهئینانا هەلسەنگاندنا شیانێن دوپارە پێشڤەبرنا هەموو زەڤیێن پەترۆلی یێن كەركووكێ، دژی مادەیێن دستوورییە و ب تایبەت مادەیێ 140 كو مادەیەكا تایبەتە ب دەڤەرێ كوردستانی یێن ژ دەرڤەی ئیدارا هەرێما كوردستانێ، كو ئەڤە پێشێلكرنەكا ئاشكرا یا دستوورییە، چونكە ل وان دەڤەران ب گۆڕەی دستووری دڤێت ب هەڤپشكی ل گەل حوكمەتا هەرێما كوردستانێئەو پڕۆسەیە بهێتە ئەنجامدان، هەروەسا ب گۆڕەی قانوونێ، دستووری رێك یا دایە هەرێما كوردستانێ پەترۆلا خوە ب فرۆشیت».

زنار تۆڤی:

بسپۆرەكا زانستێن سیاسی بۆ رۆژنامەیا (ئەڤرۆ) دیار كر، هەر چەندە ئیراق خودانا دەستۆرەكێ‌ فیدرالییە، بەلێ‌ هەڤڕكی د ناڤبەرا هەولێرێ و بەغدایێ دا یا هەی، هەر ژ سالا 2007 ێ‌، هەتا نوكە، ئەڤ هەڤڕكییە یا بەردەوامە، هەكە ئەم د چارچۆڤەیێ‌ سەردەمێ‌ ئیراقا فیدرالی دا، شرۆڤەكرنەكێ‌ بكەین، دێ‌ بینین، كو هەڤڕكی د ناڤبەرا هەولێرێ و بەغدایێ دا بەردەوام هەبوویە، ژ ئەگەرێن جودا، كو ئەو ژی ئەگەرێن ( كلتووری، نیشتیمانی،باوەری، دیرۆكی، مادی، جوداكرنا دەڤەرێن كوردستانی، بزاڤكرن بۆ ژێكڤەكرنا دەڤەرێن مادێ‌ «140» یێن كوردستانی)، هەروەسا بەغدا هەر ل دووڤ كلتوورێ‌ دۆژمناتی و ب عەرەبكرنێ، چ ژ ئالیێ عەرەبین سوننی یان عەرەبین شیعیڤە ، بەردەوام بزاڤان دكەت، سەروەرییا هەرێما كوردستانێ‌ تێكبدەت.
د. نسرین عەلی، پسپۆرا زانستێن سیاسی گۆت» نە هنارتنا پارا و ئاریشا موچەیی بۆ هەرێما كوردستانێ‌، ئێك ژ كارتێن بەغدایە، كو هاتییە بكارئینان وەكو فشارەكا سیاسی ل دژی حوكمەتا هەرێما كوردستانێ‌ و ل دژی هەرێما كوردستانێ‌، وەكو نیشتیمانەك بۆ كوردستانییان، ب رێكا سزادانا هەڤوەلاتیان، ئەڤە ژی تەكتیكەكا سیاسییە و یا دیارە د بیاڤێ‌ زانستێن سیاسیدا، لەوما یا فەرە هەڤوەلاتیێن هەرێمێ‌ ڤێ‌ چەندێ‌ بزانن، هەروەسا هەكە هەڤوەلاتیێ‌ هەرێما كوردستانێ‌ ببیتە هەڤوەلاتیێ‌ ژمارە ( 100) ، هەر دێ‌ هوسا مینیت د چاڤێ‌ بەغدایێ دا، ل دەف حوكمەتا بەغدا چ هەڤوەلاتییەكێ‌ كوردستانێ‌ بیت یان یێ‌ ئیراقی بیت هەر ژمارە ئێك نینە، ل دووڤ سیاسەتا بەغدا، ئەزموونا كوردان ل گەل بەغدا و ئەزموونا دەڤەرێن مادێ‌ (140) یێ‌ دەستووری، دەڤەرێن كوردستانی یێن دەرڤەیی ئیدارا هەرێمێ‌ ڤێ‌ چەندێ‌ دیار دكەت».
د. نەسرین هێشتا دبێژیت» ئێكبوونا كوردان ل بەغدا و فشارێن نێڤدەولەتی، تاكە چارەسەرییە بۆ ئاریشەیێن هەولێرێ و بەغدایێ، زێدەباری هندێ‌ پشتەڤانییا هەڤوەلاتیێن هەرێما كوردستانێ‌ بۆ نیشتیمان و حوكمەتا خوە، چونكی ئەڤ حوكمەتە ب ئیرادا گەلێ‌ كوردستانێ‌ هاتیە دانان، دڤێت رێز ل وێ‌ حوكمەتێ‌ بهێتە گرتن، هەروەسا ئەو ئاریشەیێن د ناڤبەرا حوكمەتێ‌ و هەڤوەلاتیێن كوردستانێ‌ دا، ئەم د ناڤبەرا خوەدا چارەبكەین و مە پێدڤی ب بەغدا نینە، یا گرنگتر ئاریشەیا مە ل گەل بەغدا بهێتە چارەكرن و بەغدا مافێ‌ مە بدەت، وەكو پێكهاتەیەكێ‌ سەرەكی و رەسەن ل ئیراقێ‌ و دەڤەرێن كوردستانی ژی ڤەگەرنەڤە سەر هەرێما كوردستانێ‌.

سەرۆكێ باسكێ هەلویستێ گەشە ل كوردستانێ راگەهاند، بڕیارا ئیراقێ ل دۆر پەترۆلا كەركووكێ بڕیارەكا خرابە و كارڤەدانێن سیاسی یێن خراب دێ ژێ پەیدا بن، لەوما دڤێت بزڤرن بۆ مادەیێن دستووری و ل دووڤ وان مادەیان رەفتار بهێتە كرن.
د. محەمەد بازیانی، سەرۆكێ باسكێ هەلویستێ گەشە ل كوردستانێ د داخۆیانییەكا رۆژنامەڤانیدا گۆت» نابیت هیچ رێككەفتنەك ل سنوورێ كەركووكێ بێی هەرێما كوردستانێ بهێتە كرن، یان رۆلێ هەرێما كوردستانێ ل بەرچاڤ نەهێتە وەرگرتن، چونكە ب گۆڕەی مادەیێ 140 یێ دستوورێ ئیراقی یێ بەردەوام، ئەو دەڤەرە ناكۆكییا ل سەر و دڤێت ئیدارەیا هەڤپشك ل وان دەڤەران هەبیت».
بازیانی رۆهنكر ژی» نوكە ژ روویێ قانوونیڤە هەرێما كوردستانێ دشێت سكالایەكێ ل سەر بەغدا تۆمار بكەت، كو بێی لێ زڤرین بۆ هەرێما كوردستانێ رێككەفتنا پەترۆلی ل سەر زەڤیێن پەترۆلی یێن كەركووكێ ل گەل كۆمپانیێن بریتانی یا ئەنجامدای، ڤی بابەتی هێشتا گرفتێن قانوونی یێن هەین، نابیت ئیراق وان قانوونان و هەروەسا مادەیێن دستووری پشت گوهڤە ب هاڤێژیت».
د. محەمەد بازیانی گۆت ژی» ئیراق دشێت ل كەركووكێ وان گرێبەستان ئەنجام بدەت، دەمێ مادەیەك ب ناڤێ مادەیا 140 نەبیت، بەلێ مادەم ئەو مادە د دستووریدا یا هەی، كو ل وان دەڤەران ئیدارەیەكا هەڤپشك هەبیت، ئێدی نابیت ئەو پێنگاڤێن تاكلایەنە بهێنە هاڤێتن».

ل گەل هاتنا دۆنالد ترەمپ بۆ كوچكا سپی و وەرگرتنا ئیدارەیا نوو یا ئەمریكا، بزاڤێن هەلوەشاندنا گرۆپێن چەكدار یێن موقاوەما ئیراقی یێن ب لەزتر بووین، سیاسەتمەدارەكێ نێزیك ژ وان گرۆپان ژی ئاشكرا دكەت كو هەلوەشاندنا وان گرۆپان یا بوویە راستییەك و بڕیارا دووماهیێ ژی یا ل سەر هاتیە دان.
ل گەل هاتنا ترەمپی بۆ كۆچكا سپی، گەنگەشە ل دۆر هەلوەشاندنا گرۆپێن موقاوەما ئیراقی ب لەزتر دبن، میدیایێن ئیراقی ژی ژ هەژمارەكا ژێدەرێن پەیوەندیدار ب وی بابەتیڤە ئەو چەندە ڤەگوهاستییە، سەبارەت وێ چەندێ چارچۆڤەیێ هەماهەنگیێ دەست ب دانوستاندنێن خوە ل گەل سەركردەیێن گرۆپان كریە، ب مەبەستا رادەستكرنا چەكێن خوە و دیتنا میكانیزمەكێ بۆ تێكهەلكرنا وان ل گەل هێزێن چەكدارێن دی ل ئیراقێ.
ل دۆر وێ چەندێ عزەت شابەندەر، ئەندامێ بەرێ یێ جڤاتا نوونەرێن ئیراقێ و سیاسەتمەدارێ نێزیك ژ گرۆپێن موقاوەمێ دداخۆیانییەكا رۆژنامەڤانیدا دوپاتی ل هەبوونا رێككەفتنەكێ بۆ هەلوەشاندنا گرۆپێن چەكدار یێن ب سەر بەرەیێ موقاوەمێ ڤە كر.
شابەندەری گۆت ژی»بڕیارا دووماهیێ یا هەلوەشاندنا وان گرۆپان یا هاتیە دان و تێكگەهشتنا د ناڤبەرا سەرۆك وەزیران محەمەد شیاع سۆدانی و سەركردەیێن وان گرۆپان د ئاستەكێ بلند دایە، ئەو ژی ژ ئەگەرێ وێ چەندێ كو ئەو گرۆپە دێ چەكێن خوە رادەست كەن».
ئاماژەكر ژی كو میكانیزمەك بۆ رامالینا چەكێ وان گرۆپان یا هاتیە دیاركرن، بەلێ هەتا نوكە حوكمەتا ئیراقی ل سەر وێ میكانیزمێ رازی نەبوویە، ل گەل وێ چەندێ ژی دا گرۆپێن سەرەكی كو سێ گرۆپن، دێ هێنە هەلوەشاندن ئەوژی هەر ئێك ژ كەتائیب حزبوللا، بزاڤا نوجەبا و كەتیبێن سەیدولشوهەدا، بێی ئاماژێ ب عەسائیب ئەهلولحەق و هیچ گرۆپەكا دی یا ناڤ بەرەیێ موقاوەمێ دا بكەت.
ل دووڤ میدیایێن ئیراقی، ئێدی هەلوەشاندنا وان گرۆپان ل ئیراقێ بوویە راستییەك، بەلێ ب دیتنا چاڤدێران، ژ بەر ئەگەرێ رەتكرنا هەلوەشاندنێ ژ ئالیێ سەركردەیێن وان گرۆپان، ئیراق روو ب روویێ مەترسییا لێدانا وێرانكەر یا ئیسرائیلێ ببیت و دبیت گرژی بگەهنە ئاستەكی، كو هەڤشێوەیێ كوشتنا سەركردەیێن حزبوللا یا لوبنانی و بزاڤا حەماس، كەسایەتیێن دیار یێن وان گرۆپێن ئیراقی ژی ژ ئالیێ ئیسرائیلێ ڤە ببنە ئارمانج.