ئەڤرۆ نیوز:

لژنا موالیدا ل دهۆکێ بەرسڤا کەنالێ سپێدە و مالپەرێ وێ ددەت، ئەڤا ل خۆارێ ژی دەقێ روونکرنێ یە:

بۆ/ كەنال و مالپەرێ‌ سپێدە/ دهۆك و تەماشەڤان و هەڤالێن وێ‌ یێن هێژا
بابەت/ بەرسڤ رونكرنەك لدور بهایێن ئەمپێرێ‌ كەهرەبا موەلیدێن ئەهلی ل دهۆكێ‌ یێن مەهێن 7-8-9-10/2018 و بهایێ‌ ئەمپێرێ‌ كەهرەبا موەلیدێن ئەهلی یێ‌ مەها (10/2018 ) ل پارێزگەها دهۆكێ‌ وبەراوردیا وی دگەل پارێزگەهێن سلێمانی وهەولێر
كەنالێ‌ سپێدە یێ‌ ئێكگرتوی ئیسلامی كوردستان ل دهۆكێ‌ ، ل ڤان دوو رۆژێن بووری دا ل بەرنامێ‌ ( رۆژەڤ ) ژ ئامادەكرن و پێشكێشكرنا كاك ( مصعب ) ، راپۆرتەك ئینفۆگرافیكی بەلاڤ كریە ، كۆ تێدا شرۆڤەیا بهایێن ئەمپێرێ‌ كەهرەبا موەلیدێن ئەهلی ل دهۆكێ‌ یێن مەهێن ( 7- ؟؟- 9 & 10 ) كریە و دبەشەكێ‌ دی ژی دا باراوردیێ‌ دكەت دناڤبەرا بهایێن ئەمپێرییێ‌ مەها 10/2018 ل هەرسێ‌ پارێزگەهێن ( سلێمانی،هەولێر و دهۆك ) ، وب ئەشكەرایی و پشت راستی حكومەتا هەرێمێ‌ وكارگێریا پارێزگەها دهۆكێ‌ ولیژنا سەرپەرشتیا موەلیدان ب دزیكەرو گەندەل و فێلبازو سهربەند دڤی بابەتی دا تومەت بار دەت ، دەما دبێژیت .. حكومەتا هەرێمێ‌ وكارگێریا پارێزگەها دهۆكێ‌ بدەستەكی خەلكی ب بابەتێ‌ 48 ملیون دینارێن پەرلەمانتارێن كوردستانێ‌ موژیل دكەت وبەرێ‌ وان وەردگێریت وبدەستەك دی برێكا موەلیدا پارا ژ بەرویكێن خەلكێ‌ كوردستانێ‌ دئینتە دەر و ددزیت وب ڤێ‌ چەندێ‌ مەزنترین گەندەلیو وفێلبازی وسهربەندیێ‌ ل خەلكێ‌ خۆ دكەت …
ژبەر كۆ تەلەفزیونا سپێدە وب تایبەت پێشكێشكارێ‌ وێ‌ دڤێ‌ راپورتێ‌ دا ئەوا دبەرنامێ‌ رۆژەڤ دا بەلاڤكری ، گەلەك ددویرن ژ راستیێ‌ و پرنسیبێن پیشەیێن رۆژنامەڤانی و ب تایبەت پێشكێشكارێ‌ بەرنامەی ، كۆ دهوندرێ‌ پێشكێشكرنا بەرنامێ‌ خۆدا دیار دبیت وی هن مەرەمێن تایبەت ب خۆ ودەزگەه ولایەنێ‌ خۆڤە هەنە پتر ژ هندێ‌ كۆ مەرەما وی وەكۆ رۆژنامەڤانەك بگەهیتە راستیا بابەتی و خزمەتا بەرژوەندیا خەلكی بكەت كۆ ژ پرنسیبێن سەركی یێن رۆژنامەڤانی ئەوە كۆ رۆژنامەڤان وەكۆ چاڤكێ‌ كامیرێ‌ وێنەی ڤەگوهێزیت وەكۆ هەییی بێ‌ رتۆش وپێزانینێن خۆ پشت راست بكەت ژ جهێن پەیوەندیدار وشروڤەیێن خۆ بكەت دوویر ژ ژێیاتیێن سیاسی وئایدولوژی وبەرژەوەندێن كەسوكی ، ئەڤەیە یا وی ب هیچ رەنگەكی نەكری ، وسەرێ‌ تەماشەڤانێ‌ خۆ شێواندی ب نەوەییی و بوهتانان .
لەورا مە ب فەر دیت ئەم راستیا بابەتی وشروڤە و رونكرنا وی بدروستی وپشت بەستی ب پێزانینێن پەسەندكری دڤێ‌ بەرسڤێ‌ دا دانینە بەرچاڤێن تەماشەڤانێن سپێدە وهەڤالێن پەیجی سپێدە بەری یێن رایا گشتی ، وئەڤرۆ ئەم ل وێ‌ باوەرێنە كۆ خەلكێ‌ مە گەهشتیە وی ئاستێ‌ هوشیاری وزانین وشەهرەزاییێ‌ كۆ بشێت راستی ونەراستیا ژێك ڤاڤێریت و ئەو حكومێ‌ داویێ‌ لسەر بابەتان بدەت دوویر ژ كارتێكرن و فشاران .
1- بەرسڤ و رونكرنەك لدور بهایێن ئەمپێرێ‌ كەهرەبا موەلیدێن ئەهلی ل دهۆكێ‌ یێن مەهێن 7-8-9-10/2018 ( پشتەڤانیا حكومەتێ‌ و قەر ) :
– جارێ‌ كەرتێ‌ كەهرەبا موەلیدێن ئەهلی ، كەرتەكێ‌ ئەهلی تایبەتە و 100% بازرگانیە ویەك دینارا داهاتێن ئەمپێرێن موەلیدا بۆ حكومتێ‌ ناچیت ( تەنانەت باج ژی لسەر نینن ) .
– هژمارتنا نرخێ‌ یەك دەمژمێر.ئەمپێر وپاشان بهایێ‌ ئەمپێری هەیڤانە لسەرانسەری هەرێما كوردستانێ‌ ب یەك بەرنامێ‌ هژمارتنێ‌ یێ‌ زانستی وكومپیوتەری دهێتە ئەنجامدان ل دوماهییا هەمی مەها ، تنێ‌ چوداهی دناڤبەرا بهایێن ئەمپێری ژ پارێزگەهەكێ‌ بۆ یا دی د نرخێ‌ گازوایلێ‌ و ژمارا دەمژمێرێن كاركرنا موەلیدا وبەرنامێ‌ كاركرنا وانە ل هەر پارێزگەهەكێ‌ . ( بۆ نمونە نرخێ‌ یەك دەمژمێر.ئەمپێر یێ‌ مەها 10/2018 : ل سلێمانیی 44 دینار – ل هەولێر 43 دینار و ل دهوك 43.8 دینار ئەڤ جوداهییا بچویك و نە كاریگەر ژ ئەگەرێ‌ نرخێ‌ گازوایلێ‌ یە ل بازارێ‌ هەر پارێزگەهەكێ‌ )، ئەڤجا هەر پارێزگەهەك بو هژمارتنا بهایێ‌ ئەمپێری دێ‌ ڤی نرخێ‌ یەك دەمژمێر لیكدانی سەرجەمێ‌ دەمژمێرین كاركرنا موەلێن خۆ دمەهێ‌ دا كەن )
– پێشكێشكارێ‌ بەرنامەی ، دەما دهێت و ئینفۆگرافیكێ‌ خۆ پێشكێش دكەت ، بهایێن ئەمپێری یێن مەهێن ( 7 ، 9 و 10/2018 ) دیار دكەت وخۆ لسەر هەیڤا 8/2018 را دهاڤێت وهیچ ئاماژەكێ‌ پێ‌ نادەت ، ئەڤ چەندە ژی دبیتە ئەگەرێ‌ ڤێ‌ شێواندن و تاریكرنێ‌ ، هەلبەت پشتراستین كۆ وی ب مەرەم و ئارمانج ئەڤ چەندە كریە هەر وەكۆ دێ‌ د رونكرنا ل خوارێ‌ دا دیار بیت .
* شروڤەیا بهایێ‌ ئەمپێری یی َ مەها 7/2018 ( وپشتەڤانیا حكومەتێ‌ ) :
– بهایێ‌ ئەمپێری ( 16.500 ) دینار . ( 3.000 دینار /سەرێ‌ هەر ئەمپێرەكێ‌ كارگێریا پارێزگەها دهۆكێ‌ وەكۆ حكومەت ژ پێش خەلكی ڤە دا ، 500 دینار /سەرێ‌ هەر ئەمپێرەكێ‌ خودانێن موەلیدا ل خەلكی بوورین … ب ڤێ‌ چەندێ‌ خەلكی 13.000 دینار بو هەر ئەمپێرەكێ‌ دان )، وئەڤ پشتەڤانیە هاتە پارڤەكرن ل كارگێرییا پارێزگەها دهۆكێ‌ وهەمی خودانێن موەلیدا لسەرانسەری پارێزگەهێ‌ وەرگرتینە وهەر كەس دكاریت ڤێ‌ راستیێ‌ ژ هەر خودان موەلیدەكێ‌ بزانیت و ب سەلمینیت.
* شروڤەیا بهایێ‌ ئەمپێری یێ مەها 8/2018 ( قەر ) :
– بهایێ‌ ئەمپێری ( 16.500 ) دینار . ( ژبۆ سڤكرنا بارێ‌ خەلكی ، كۆژمێ‌ 13.000 دینار هاتنە راگەهاندن و خەلكی دان ، وكۆژمێ‌ 3.500 دیناران هاتنە پاشئێخستن وەك قەر بۆ مەهێن داهاتی ، كۆ ئەڤ پرنسیپە یەك ژ سیاسەتێن رێڤەبەریا لیژنا سەرپەرشتا موەلیدانە سەرەرای بەلهەرستكاریا دژوارا خودانێن موەلیدا كۆ ئەڤ قەرە بو وان دبیتە كۆژمەكێ‌ مەزن و بارگرانیەكا بەرچاڤ ) .
* شروڤەیا بهایێ‌ ئەمپێری یی َ مەها 9/2018 ( ئەداكرنا بەشەكێ‌ قەری ) :
– بهایێ‌ ئەمپێری ( 12.500+500 = 13000) دینار. ( بۆ كێمكرنا قەرێن مەها 8/2018 ، كۆژمێ‌ 500 دیناران لسەر بهایێ‌ مەها 9/2018 هاتە ئەداكرن وب ڤێ‌ چەندێ‌ ، بهایێ‌ ئەمپێری یێ‌ مەها 9/2018 بوو 13.000 دینار ).
* شروڤەیا بهایێ‌ ئەمپێری یێ مەها 10/2018 ( ئەداكرنا بەشەكێ‌ قەری ) :
– بهایێ‌ ئەمپێری ( 10.250 + 1.750 = 12.000 ) : (بۆ كێمكرنا قەرێن مەها 8/2018 ، كۆژمێ‌ 1.750 دیناران لسەر بهایێ‌ مەها 10/2018 هاتە ئەداكرن وب ڤێ‌ چەندێ‌ ، بهایێ‌ ئەمپێری یێ‌ مەها 10/2018 بوو 12.000 دینار ).
2 – رونكرنەك لدور بهایێ‌ ئەمپێرێ‌ كەهرەبا موەلیدێن ئەهلی یێ‌ مەها (10/2018 ) ل پارێزگەها دهۆكێ‌ وبەراوردیا وی دگەل پارێزگەهێن سلێمانی وهەولێر
پێشكێشكارێ‌ بەرنامی وەكۆ بەراوردی ئەڤ پرس و پسیارە دبەرنامێ‌ خۆدا ئازراندیە ، كۆ بهایێ‌ ئەمپێرێ‌ كەهرەبا موەلیدێن ئەهلی :
( ل سلێمانیێ‌ 6.000 شەش هزار دینارە – ل هەولێرێ‌ 8.000 هەشت هزار دینارە- ل دهۆكێ‌ 12.000 دینارە ) …… بۆچی ؟؟؟؟؟؟
پسیارەكا دجهێ‌ خۆدایە ومافێ‌ هەر كەس و هەر لایەنەكێ‌ هەیە ب پرسیت، ئەڤا لخوارێ‌ رونكرن وراستیا بابەتی یە :
* سلێمانی
– بەرنامێ‌ كاركرنا موەلیدا یێ‌ مەها 10/2018 ، ( 13.5 ) دەمژمێری بوو ( ژ 7 بو 8.5 سپێدێ‌ ، و ژ 1 نیڤرۆ بۆ 1 شەڤ)
– ژ ڤان 13.5 دەمژمێران ، موەلیدان رۆژانە ( 4.18 ) دەمژمێران كاركریە ، ئانكۆ ( 130 ) دەمژمێران د مەهێ‌ دا .
– ناڤەندێ‌ نرخێ‌ گازوایلێ‌ یێ‌ مەها 10 ل سلێمانیێ‌ ( 580 دینار/لتر ) بوو
– نرخێ‌ یەك دەمژمێر.ئەمپێر ( 44 ) دینار هاتیە هژمارتن
– بهایێ‌ ئەمپێری یێ‌ مەها 10/2018 = ( 130 دەمژمێر * 44 دینار ) = 5.720 دینار
– بهایێ‌ هاتیە راگەهاندن ( 6.000 ) دینار ( ئانكو 280 دینار سەرێ‌ ئەمپێری زێدەتر ژی وەرگرتیە ).
* هەولێر
– بەرنامێ‌ كاركرنا موەلیدا یێ‌ مەها 10/2018 ، ( 24 ) دەمژمێری بوو
– ژ ڤان 24 دەمژمێران ، موەلیدان رۆژانە ( 8 ) دەمژمێران كاركریە ، ئانكۆ ( 240 ) دەمژمێران د مەهێ‌ دا .
– ناڤەندێ‌ نرخێ‌ گازوایلێ‌ یێ‌ مەها 10 ل هەولێرێ‌ ( 570 دینار/لتر ) بوو
– نرخێ‌ یەك دەمژمێر.ئەمپێر ( 43 ) دینار بوو
– بهایێ‌ ئەمپێری یێ‌ مەها 10/2018 = ( 240 دەمژمێر * 43 دینار ) = 10.320 دینار
– بهایێ‌ هاتیە راگەهاندن ( 8.000 ) دینار ( كوژمێ‌ 2.250 دینار وەكۆ قەر پاشئێخستینە بۆ مەهێن داهاتی ).
* دهوك:
– بەرنامێ‌ كاركرنا موەلیدا یێ‌ مەها 10/2018 ، ( 24 ) دەمژمێری بوو
– ژ ڤان 24 دەمژمێران ، موەلیدان رۆژانە ( 7.8 ) دەمژمێران كاركریە ، ئانكۆ ( 234 ) دەمژمێران د مەهێ‌ دا .
– ناڤەندێ‌ نرخێ‌ گازوایلێ‌ یێ‌ مەها 10 ل دهۆكێ‌ ( 592 دینار/لتر ) بوو
– نرخێ‌ یەك دەمژمێر.ئەمپێر ( 43.8 ) دینار بوو
– بهایێ‌ ئەمپێری یێ‌ مەها 10/2018 = ( 234 دەمژمێر *43.8 دینار ) = 10.250 دینار
– كۆژمێ‌ ( 1750 دینار ) ژ قەرێ‌ مەها (8) نەك مەها 7 ‘ لسەر هاتیە ئەداكرن ( 10.250+1.750=12.000)
– بهایێ‌ هاتیە راگەهاندن ( 12.000 ) دینار .
* ئەگەر بێن و بەراوردیێ‌ بكەن ب تایبەت دگەل سلیمانیێ‌ كۆ نێزیكی 4 دەمژمێرین وان دبنە 6000 دینار ویین دهوكێ‌ نێزیكی 8 دەمژمێرێن وان كۆ دوو بەرامبەرە دبنە 10.250 بێ‌ زێدەكرنا قەری ، دیار دبیت كۆ بهایێ‌ ئەمپێری ل دهۆكێ‌ گەلەك ئەرزانترە.
ل داویێ‌ داخوازێ‌ ژ هەوە دكەین ، كا چەوا هەوە ئەو ماف دایە خۆ هوین ڤێ‌ پرس و پسیارێ‌ ب ئازرینن وی مافی بدەنە مە ژی و ڤێ‌ رونكرنێ‌ ل مالپەرێ‌ خۆ بۆ هەڤالێن مالپەرێ‌ خۆ و رایا گشتی ، بەلاڤ بكەن . دگەل رێزگرتنێ‌
پارێزگەها دهۆك/ لیژنا بلندا سەرپەرشتیا موەلیدێن ئەهلی
7 /11/2018