ئه‌ڤرۆ نیوز، نه‌وزاد هلۆرى:

كارمه‌ندێن ئوفیسا دهۆك يا كۆمسیۆنا بلند یا هه‌لبژارتنان  ل عیراقێ خرڤه‌بوونه‌كا  ئه‌نجامدا و خواست كو د بودجا سالا 2019 دا مافێن وان به‌رچاڤ بهێنه‌ وه‌رگرتن و بهێنه‌ دامه‌زراندن.

سه‌كڤان دێره‌شى، به‌رپرسێ راگه‌هاندن وپه‌يوه‌نديێن ئوفیسا دهۆك یا كۆمسیۆنا هه‌لبژارتنان یا عیراقێ بۆ ئه‌ڤرۆ نیوز گۆت: (ئه‌ڤرۆ به‌شه‌ك ژ كارمه‌ند و فه‌رمانبه‌رێن ئوفیسا دهۆك یا كۆمسیۆنا هه‌لبژارتنان ل عیراقێ ل به‌رامبه‌ر ئاڤاهیێ كۆمسیۆنێ خرڤه‌بوونه‌كا نه‌رازیبونێ ئه‌نجامدا و خواست د بودجا 2019 دێ دا مافێن وان به‌رچاڤ بهێنه ‌وه‌رگرتن ‌و بهێنه‌ دامه‌زراندن یان گرێبه‌ستێن وان بهێنه‌ درێژكرن).

زێده‌تر گۆت: (پشتى  بدوماهى هاتنا هه‌لبژارتنان ل عیراقێ نوكه‌ گرێبه‌ستێن هه‌موو فه‌رمانبه‌رێن كۆمسیۆنێ يێن گرێبه‌ست هاتینه‌ راگرتن كو نێزیكێ 300 كارمه‌ند و فه‌رمانبه‌رانه‌ ل دهۆكێ ، ئه‌م وه‌كو ئۆفیسا دهۆك پشته‌ڤانیا خوه‌ بۆ وان رادگه‌هینین، مه‌ داخوازیێن وان به‌رچاڤ وه‌رگرتن و دێ بۆ ئوفیسا نیشتمانى یا عیراقێ ل به‌غدا ره‌وانه‌كه‌ین).

ئەڤرۆ نیوز:

هه‌ڤپه‌یمانیا بینا راگه‌هاندیە، کو حاکمەتا عیراقێ دێ بودجێ هه‌رێما كوردستانێ 12% ڤرێكه‌ت ژبه‌ركو، ئه‌و رێژە مافێ دراڤی یێ هه‌رێما کوردستانێ یه‌.
مه‌نسور به‌عیجی، ئه‌ندامێ هه‌ڤپه‌یمانیا بینا گۆتیە، بودجێ عیراقێ ل گۆر د‌ستۆری دێ ل سه‌ر هه‌موو باژێران هێته‌ بارڤه‌كرن كو هه‌رێما كوردستانێ ژی دناڤا وان دایه‌ و رێژا هەرێمێ 12%‌ و پێدڤیه‌ ل سه‌ر هه‌رێمێ بزانیت كو ده‌ستخستێ وان یێ دراڤی و ژ وێ پشكێ زێده‌تر نابیت.
هەروەسا دیاكریە ژی، هه‌رێما كوردستانێ ئاگه‌هـ ژێ هه‌بوو‌ كو رێژا 17%‌ یا ل سه‌ر ده‌مێ ئه‌یاد عه‌لاوی وه‌ردگرت نه ده‌ستخستیێ وان بوو.
ئەو ژی گۆتیە، بودجێ عیراقێ‌ ل گۆر هژمارا خه‌لكێ باژێران دێ هێتە دابەشکرن و ل گۆر قانوون و د‌ستوری.
ئه‌ڤه‌ د ده‌مه‌كی دایه‌ كو ماوێ چه‌ند سالانه‌ حوکمه‌تا عیراقێ 17% یا بودجەی‌ بۆ هه‌رێمێ نه‌هنارتیه.‌

ئەڤرۆ، سالار دۆسکی:‏

ئەندامەکێ لژنا دارایی ژ فراکسیوونا پارتی دیموکراتی کوردستان ئاشکراکر کو ‏نوکە دەم یێ گونجایە حوکمەتا ھەرێما کوردستانێ شاندەکێ بسپور بۆ ‏دانوستاندنێ ل گەل حوکمەتا ناڤەندی فرێکەتە بەغدا و کار بکەن بۆ چارەسەریا ‏کێشێن ھەلاویستی.‏

د.ئەحمەد سەفار ئەندامێ پەرلەمانێ عیراقێ ژ فراکسیۆنا پارتی دیموکراتی ‏کوردستان بۆ رۆژناما ئەڤرۆ گۆت: کاودانێن نوکە ل عیراقێ ھاریکارن کو کومبوون ‏ل گەل حوکمەتا عیراقێ بھێنەکرن، چنکو وەزیرێ دارایی کوردە و سەرۆک ‏وەزیراێن نوکە ژی نفسسا وی ل گەل مەیە، وەزیرێن حوکمەتێ تەمام نەبووینە، ‏گرنگە حوکمەتا ھەرێما کوردستانێ شاندەکێ بسپور بۆ گەنگەشەکرنی ل سەر ‏بۆدجا کوردان 17% فرێکەتە بەغدا و کار بکەت بۆ زڤراندنا ڤێ رێژێ، رێژا 17% ‏یا نەقانوونی یە لێ رێکەفتن ل سەر ھاتبووکرن، راستە بێژن بودجە ل سەر رێژا ‏خەلکی دھێـتە دیارکرن چنکو چ ئامار نەھاتینەکرن، لەوما کوردان وی دەمی ‏خواست 20% بۆدجێ وەربگرن، ل سەر دەمێ حوکمەتا عەلاوی رێکەفتن ل سەر ‏‏17% بۆ کوردان ھاتەکرن، عەبادی کاودانێن نەخوش دا ھاتەکێمکرن و نوکە ‏حوکمەتا مە دێ داخاز کەت وەک بەرێ بزڤریتە ڤە بۆ 17% .‏

د. ئەجمەد سەفا ئەندامێ لژنا دارایی ل پەرلەمانێ عیراقێ ئەو ژی گۆت: بۆدجا ‏عیراقێ ب گشتی 132 تریلون دینارا مەزاختیێ گشتی نە، 105 تریلون دینار ‏داھاتێ گشتی نە، کورت ھێنان 27 تریلون دینارن، ئەڤە ل دووڤ پلانەکێ کو ‏بەرمیلا گازێ ل سەر 56$ ھاتیە ھەژمارتن و رۆژانە سێ ملیۆن 880 ھزار ‏بەرمیلێن گازێ دەردکەڤن، لێ نوکە بھایێ بەرمیلا گازێ ب 73$ ل دووڤ گۆتنا ‏شارەزایێن پەترۆلێ ئەڤ بلند بوونە دێ دناڤبەرا 80$ بۆ 100$ دوران راوستیت، ‏رێژا پەترۆلا دھێتە فرۆتن نوکە ژ وێ رێژێ زێدەترە یا پلان بۆ ھاتیەدانان، ل ‏دووڤ پێداچوونێن مە دبیت ھەتا 35 ترۆیلونان پارێ زێدە مە ھەبیت، ئانکو ‏کورتھێنان نامینت و دێ پارە زێدەبیت ژی، بەلکو حوکمەتێ بەرھەڤیێن خوە ‏وەرگرتینە بۆ ھەر کاودانەکی و تایبەت ئەرزانبوونا بھایێ پەترۆلێ ل سەرانسەری ‏جیھانێ، لێ ھەموو شارەزایێن پەترۆلێ دوێ باوەرێ دانە ئەڤ سالە بھایێ پەترۆلێ ‏دناڤبەرا 80$ بۆ 100$ دابیت .‏

ئەڤرۆ، عەزیز ھەورامی:

تیرۆرستێن داعشێ جارکا دیتر دەست ب بزاڤێن خوە ل عیراقێ کرینە، ل گۆڕ دیتنا ‏شارەزایەکێ د بیوارێ گرۆپێن توندڕوەێن ئیسلامی دا، ھەکە ھات و حوکمرٍِانیا شیعان ل ‏عیراقێ ب شاشی بھێتە برێڤە برن، ئەڤە، وی دەمی تیرۆرستێن داعشێ مەترسینە بۆ ‏داگیرکرنا عیراقێ، کو ب ھژمار نێزیکی ( 8 ھەتا 10) ھەزار چەکدارێن داعشێ ل عیراقێ ‏ماینە.‏

سۆران سێوەکانی شارەزایێ گرۆپێن توندڕەوێن ئیسلامی ب تایبەتی بۆ رۆژناما ئەڤرۆ ئاخفت و ‏گۆت: داعش ل عیراقێ ب تەمامی نەھاتیە ژناڤبرن، ھەڤدەم ل گەل قەیرانا حوکمڕانیا ل ‏عیراقێ ژی ئەو گرۆپا تیرۆرستی دشێت خوە بھێز بێخیت، لەورا دبینین داعش ل ھندەک ‏دەڤەران جارەکا دیتر خوە رێکخستن دکەت، و بوویە مەترسی ل سەر چەندین پارێزگەھان، ‏بتایبەتی ل پارێزگەھێن مووسل و کەرکووکێ.‏

ژ ئالیەکێ دیتر ڤە، شارەزا و شرۆڤەکارێن لەشکری و سیاسی ئاماژە ددەنە ھندێ، کو نێزیکی ‏‏10 ھەزار چەکدارێن داعشێ ل عیراقێ ماینە، سۆران سیۆەکانی ژی د وێ باوەرێ دایە، ل گۆڕ ‏پێزانینێن وی ھەین ل سەر گرۆپێ چەکدارێن داعشێ ھەشت ھەزار ھەتا دەە ھەزار ‏چەکدارێن داعشێ یێن شەڕکەر ل عیراقێ ماینە، و رۆژانە کارێن تیرۆرستی ئەنجامددەن، ‏ئەڤە ژی مەترسیەکا مەزنە ل سەر پاشەرۆژا عیراقێ.‏

ل گۆڕ دیتنا چاڤدێرێن سیاسی ژی، چونکی حوکمڕانیا شیعان پشتی سالا 2003 ب عەقلیەتا ‏تولڤەکرنێ ژ سوونیان بوویە، داعش بوویە بەرھەمێ وێ تولڤەکرنێ، ب دیتنا سیۆەکانێ ژی ل ‏دۆر ڤی بابەتی، داعشی رەنگڤەدانا وێ ستەمکاریا دروست بوو یا شیعان ل سەر سوونیان دکر ‏پشتی سالا 2003، لەورا ھەتا قەیرانا حوکمەتێ و حوکمڕانیێ ل عیراقێ ھەبیت، ئەو داعش ‏بنبڕ نابیت و ل سەر گەشەکرنا خوە دێ یا بەردەوام بیت.‏