ئه‌ڤرۆنيوز:

وه‌زيرێ به‌رگريێ به‌رێ يێ عيراقێ كو به‌ربژار بوو بۆ پۆستێ سه‌رۆكێ په‌رله‌مانێ عيراقێ، ل دۆر وى پۆستى دبێژيت ب 30 مليۆن دۆلاران هاته‌ كرين.

خالد عوبه‌يدى سه‌رۆكێ ليستا (بيارق الخير) ل ده‌نگدانا نهێنى دا ئه‌ڤرۆ شه‌مبيێ 15/9/2018 ب ده‌ستڤه‌ئينانا 89 ده‌نگان به‌رامبه‌ر محه‌مه‌د حه‌لبوسى هاته‌ دوراندن كو حه‌لبوسى 169 ده‌نگ بده‌ستڤه‌ئينان وبوو سه‌رۆكێ په‌رله‌مانێ عيراقێ.

عوبه‌يدى دئێكه‌م كارڤه‌دان دا ل به‌رامبه‌ر هه‌لبژارتنا حه‌لبوسى ل تۆرا جڤاكى يا فه‌يسبووكى به‌لاڤكر” بلا ئه‌و خێزانا گه‌نده‌ل ب كه‌ره‌ستێ خوه‌ يا دلخوه‌ش بيت كو (وه‌كو دبێژن) ئه‌و پۆسته‌ ب 30 مليۆن دۆلاران هاتيه‌ كرين، هه‌روه‌سا بلا ئه‌و گه‌نده‌ل دلخوه‌ش بن كو نوكه‌ پيرۆزباهيێ ل هه‌ڤدو دكه‌ن، سه‌باره‌ت عيراقێ وعيراقيان ژى دبێژم، خودێ ل پشتا هه‌وه‌ بيت.

ژلايێ خوه‌ڤه‌ مه‌شعان جبوورى په‌رله‌مانتارێ به‌ري يێ عيراقێ به‌لاڤكر”ئه‌حمه‌د حبوورى پارێزگه‌رێ سه‌لاحه‌دين ل به‌رامبه‌ر 10 مليۆن دۆلاران ل به‌رامبه‌ر حه‌لبوسى خوه‌ ڤه‌كێشا”

ئه‌ڤرۆنيوز:

مالپه‌ره‌كێ عيراقى به‌لاڤكر كو سه‌رۆكێ ليستا حيكمه‌ عه‌مار حه‌كيم وسه‌رۆكێ ليستا فه‌تح هادى عامرى ل سه‌ر به‌ربژاركرنا عادل عه‌بدولمه‌هدى بۆ پۆستێ سه‌رۆك وه‌زيران يێن رێككه‌فتين.

مالپه‌رێ (الغد برس) يێ عيراقى ژزارده‌ڤێ ژێده‌ره‌كێ نێزيك ژ حيكمه‌ به‌لاڤكر” عه‌مار حه‌كيم وهادى عامرى دوور ژ موقته‌دا سه‌در رێككه‌فتينه‌ ل سه‌ر به‌رباژركرنا عادل عه‌بدولمه‌هدى بۆ پۆستێ سه‌رۆك وه‌زيران”.

ئاماژه‌ دا” عامرى ب شێوه‌كێ ب هێز پشته‌ڤانيێ ل عادل عه‌بدولمه‌هدى دكه‌ت”.

عادل عه‌بدولمه‌هدى، جێگرێ سه‌رۆك كۆمارى يێ به‌رێ  ووه‌زيرێ به‌رێ يێ په‌ترۆلێ يه‌ وسه‌ركردێ به‌رێ يێ جڤاتا بلند يا ئيسلامى بوو.

ئه‌ڤرۆنيوز:

رۆژناما (الجريده‌) يا كوه‌يتى ئه‌ڤرۆ شه‌مبيێ 15/9/2018 به‌لاڤكر كو ل رۆژا سێشه‌مبيا بۆرى قاسم سلێمانى فه‌رماندێ فه‌يله‌قا قودس يێ سه‌ر ب له‌شكرێ پاسدارێن ئيرانێ ل گه‌ل برێت ماكگۆرك نوونه‌رێ تايبه‌تێ سه‌رۆكێ ئه‌مريكى بۆ هه‌ڤپه‌يمانيا شه‌رێ دژى داعشێ ب نهێنى كۆمبوويه‌.

ل دووڤ راپۆرته‌كا وێ رۆژنامێ كو پشت به‌ستن ب چه‌ند ژێده‌رێن نێزيك كريه‌، ئه‌و كۆمبوونه‌ ژبۆ رێككه‌فتنێ بۆ ل سه‌ر پێكئينانا حوكمه‌تا عيراقى يا نوو، ديسا ل سه‌ر پرسا سوتنا كونسۆلخانا ئيرانى ل به‌سره وهێرشا ل سه‌ر باليۆزخانا ئه‌مريكى ل به‌غدا‌”.

هه‌ر ل وێ كۆمبوونێ ماكگۆركى ب قاسم سلێمانى راگه‌هانديه‌ كو پێدڤيه‌ هه‌ردو وه‌لات (ئه‌مريكا وئيران) كێشێن خوه‌ بده‌نه‌ لايه‌كى وپێكڤه‌ كاربكه‌ن بۆ پشته‌ڤانيا پێكئينانا حوكمه‌تا عيراقى يا نوو.

رۆژناما كوه‌يتى دياركر ژى كو قاسم سلێمانى د وێ كۆمبوونێ دا ره‌تكر كو هه‌ڤپه‌يمانێن ئيرانێ ل عيراقێ هێرش كربيته‌ سه‌ر باليۆزخانا ئه‌مريكى ل ده‌ڤه‌را كه‌سك ل به‌غدا”.

ئه‌ڤرۆنيوز:

ژێده‌ره‌كى ژناڤ هۆلا په‌رله‌مانێ عيراقێ بۆ ئه‌ڤرۆنيوز دياركر كو هژمارتنا ده‌نگان دپرۆسا هه‌لبژارتنا سه‌رۆكێ په‌رله‌مانێ عيراقێ يا به‌ر ب دووماهيێ دچيت ومحه‌مه‌د حه‌لبووسى پتر ژ 166 ده‌نگێن پێدڤى بۆ سه‌ركه‌فتنێ ب ده‌ستڤه‌ئيناينه‌.

وى ژێده‌رى بۆ ئه‌ڤرۆنيوز دياركر” محه‌مه‌د حه‌لبووسى نوكه‌  پتر ژ 166 ده‌نگان ب ده‌ستڤه‌ئينان وسه‌ركه‌فتن تۆمركر”.

گۆت ژى” ل ده‌مێ ده‌ستپێكرنا هژمارتنا ده‌نگان، ئوسامه‌ نوجێفه‌ ژ هۆلا په‌رله‌مانى ده‌ركه‌فت”.

ئه‌ڤرۆنيوز:

په‌رله‌مانتاره‌كێ عيراقى بۆ ئه‌ڤرۆنيوز دياركر كو هه‌كه‌ چو ژ چار به‌ربژاران 166 ده‌نگان ب ده‌ستڤه‌نه‌ئينن، دێ هه‌لبژارتن دووباره‌ دناڤبه‌را هه‌ردو به‌ربژارێن پتر ده‌نگ ئيناين هيته‌ كرن.

هيشام ئه‌لسهێل، په‌رله‌مانتارێ سه‌ربخوه‌ ل په‌رله‌مانێ عيراقێ بۆ ئه‌ڤرۆنيوز گۆت”  هه‌كه‌ چ ژ هه‌ر چار به‌ربژاران 166 ئانكو ( 165 +1)ده‌نگ بده‌ستڤه‌ نه‌ئينان كو دبيته‌ پتر ژنيڤا ده‌نگان، دێ ده‌نگدان دووباره‌ هێته‌ كرن”.

هيشامى زێده‌تر گۆت” هه‌ڤركى يا توندبوو دناڤبه‌را به‌ربژاران دا وهه‌كه‌ كه‌سێ ژوان 166 ده‌نگ نه‌ئينان، دێ گه‌ره‌كا دى يا هه‌لبژارتنان دناڤبه‌را هه‌ردو به‌ربژارێن پتريا ده‌نگان ئيناين هێته‌ كرن”.

خوياكر ژى” ئه‌ڤه‌ بۆ جارا ئێكێ يه پشتى سالا 2003‌ سه‌رۆكێ په‌رله‌مانێ عيراقێ دهێته‌ دياركرن بێ ته‌وافوق  وب ديتنا من ئه‌ڤه‌ حاله‌ته‌كه‌ ساخله‌مه‌ “.

ئه‌ڤرۆنيوز:

ده‌سته‌يا گشتى يا كه‌شناسيێ ل عيراقێ پێشبينيێ دكه‌ت دده‌مێ ڤێ حه‌فتيێ دا باران بارين ل ده‌ڤه‌رێن رۆژئاڤا وباكوورێ عيراقێ ده‌ست پێ بكه‌ت وپلێن گه‌رمێ بهێنه‌ خوار.

ده‌سته‌يا ناڤبرى ئه‌ڤرۆ شه‌مبيێ 15/9/2018 به‌لاڤكر” پێشبينى دهێته‌ كرن ل رۆژێن دوشه‌مبى 17/9/2018  وسێشه‌مبى 18/9/2018 ل ده‌ڤه‌رێن ناڤه‌راست وجودا جودا يێن رۆژئاڤا وباكوورێ عيراقێ پلێن گه‌رم بهێنه‌ خوار وباران ل وان ده‌ڤه‌ران بباريت”.

ئه‌ڤرۆ نيوز:

ژێده‌ره‌كى ژناڤ ئاڤاهيێ په‌رله‌مانێ عيراقێ بۆ ئه‌ڤرۆ نيوز دياركر كو پرۆسا هه‌لبژارتنا نهێنى بۆ هه‌لبژارتنا سه‌رۆكێ په‌رله‌مانێ عيراقێ ب دووماهى هات و چه‌ندين به‌ربژارێن وى پۆستى يا خوه‌ ڤه‌كێشايى.

هندرين له‌زگين هه‌مزانى بۆ ئه‌ڤرۆ نيوز گۆت” نوكه‌ ده‌نگدانا په‌رله‌مانتاران بۆ هه‌لبژارتنا سه‌رۆكێ په‌رله‌مانى ب دووماهى هات”.

پشتى هه‌ر ئێك ژ ره‌عه‌د ده‌هله‌كى وته‌لال زه‌وبه‌عى و ئه‌حمه‌د عه‌بدوللا جبوورى و محه‌مه‌د تميم خوه‌ ڤه‌كێشايى، تنێ ئوسامه‌ نوجێفى و محه‌مه‌د حه‌لبوسى و خالد عوبه‌يدى و محه‌مه‌د ئه‌لخالدى به‌ربژارن بۆ وى پۆستى ژ پێكهاتێ سونى.

ب گۆره‌يى پێزانينێن ئه‌ڤرۆ نيوز 251 نوونه‌ران پشكدارى د پرۆسا ده‌نگدانا نهێنى دا كريه‌ و نوكه‌ ڤاڤارتنا ده‌نگان ده‌سپێكر.